المساعد الشخصي الرقمي

مشاهدة النسخة كاملة : طرائـق مألـوفـة فـي فـن الردود عـلى البوسـتات

الطيب بشير
17-01-2006, 01:39 AM
*أحيانآ تأخذك الدنيا بمشاغلها و تبعد عن البورد، تأتي لتجد واحد صاحبك عندو بوسـت ملعلع..يصعب عليك الدخول متأخرآ بعد الصفحة الرابعة أو الخامسة فتكتب:
متابعين باهتمام و سنأتي للرد :cool:
أو
لي زمن أتاوق في البوست دة و أمشي و اجيهو راجع :eek:
هي في الغالب حركات علاقات عامة بدلآ لإعتذار مباشر أو قبول حقيقة أنك دخلت متأخرآ..

**إسـتراتيجية الكوبي بيسـت..
و تكثر في المناسبات الإجتماعية.. يعني أبو جهينة كتب الآية الكريمة في مطلع تعزيته إنت تلفحها بنقرة سريعة و تلزقها ع الماشي..و تكثر هذه الظاهرة عند مهاجري الدول الغربية حيث ندرة الكي بوردز العربية..تنسخ إسم المرحوم..تنسخ إسم العضـو أو الزميل..تنسخ ألقاب الناس الفنية و العلمية..
أعترف بإرتكاب هذه الجنحة بتصـرف لأني أكتب لكم بنقر كل حرف على الماوس .. ;)

*** الظريفة جملة ـ لي عودة ـ.. و بجيك راجع..تسعة و تسعين في الماية من الناس ما بتجي راجعة لأنو الفكرة ـ زواغـةـ بالأسـاس..و و يجوز أن تقال حين يكمل الكلام ..و في مجاملة الأصدقاء مع الكراهة ..و يحرم تكرارها باتفاق الجمهـور..

أمـا بـعـد...
فهـذه بعـض حيلكم علينا و زوغـانـنـا منكم..
فما هي أســاليبكم دام فـهـمـكـم؟
Osman Hamad
17-01-2006, 01:50 AM
بمشى واجيك راجع يالطيب ;)
الطيب بشير
17-01-2006, 02:54 AM
:mad: :mad: That's what I was saying man
abdu abubakr abdalla
17-01-2006, 04:43 AM
الطيب البشير : كيفك ؟ من زمان ما شفناك البركة بالطلة .
والله المشاغل بتخلى الناس تأخذ الزوغة بالزوق والتلوين ؟


يديك العافية
أبوجهينة
17-01-2006, 07:04 AM
أبو بشير الطيب

عيدكم مبارك

أرجو أن تكون أم بشير و العروسة الصغيرة بخير ..

بعض القراء يجاملك بأن يقرأ آخر مقطع في النص عملاً بالمقولة ( هات من الآخر و خلصنا ) ..

و البعض يعلق على موضوع دون أن يقرؤه قائلا ( مشتاقوووووووووووووووووووون ) ..
و البعض يضع نكتة لا تمت للموضوع بصلة ..

أما أكثر مجاملة سهلة هي كلمة ( UP ) .. عتالة مجانية و مؤثرة ..

واصلوا
أم سهى
17-01-2006, 07:48 AM
الطيب بشير
اول مرة اعرفك شيال حال :D
لا اله الا الله ..عالم ما بتريح....كان سكتنا وما علقنا وووب وكان كتبنا حاجة بسيطة رغم مشغولياتنا ووبين
نسوي شنو عاد؟ :)
وجاء كمان تماها ليه ابو جهينة
ود حمد
عفيت منك :p
Garcia
17-01-2006, 08:38 AM
ابوالطب ... مشكووووووور :p
تخيل تكون كاتب موضوع طويل وشحمان ... واجيك فلان او فلانة مشكوووووور :D :D
دى مجاملة اخير عدمها مش كدة ؟؟؟ المسألة كلها تعود لتربيتنا من الاساس مجاملة x مجاملة ..
ابوك اكون طالع مشوار اجيهو واحد ناطى فى الباب ( ازيك يا حاج عثمان وكيفنك ) والقعدة الياها ..
وابوك اخلى المشوار والضيف اقعد واتونس واتغدى واتعشى وانوم ( وانا اعيط على قول عادل امام :D )
ودى الشئ القمنا شفناهو يا الطيب .. كيف نتخلص من تلك المساوئ فى تركيبتنا الشخصية ...
وبحق موضوع يمكن البعض ينظر له بانه بسيط.. لكنه اعمق من ذلك والمسألة اكبر من مجاملة فى البوست ..
كفاك لحدى كدة وماشى وما بجى الا اذا لزم الامر :p
كل الود والتحية
الطيب بشير
17-01-2006, 05:52 PM
أهلآ عبدو أبوبكر
أنا جيت طوووولت ياخ، إنت الغايب
شكرآ ليك و أقيف النعمل ليك ألوان و حركات
الطيب بشير
17-01-2006, 06:06 PM
أبو بشير الطيب

عيدكم مبارك

أرجو أن تكون أم بشير و العروسة الصغيرة بخير ..

بعض القراء يجاملك بأن يقرأ آخر مقطع في النص عملاً بالمقولة ( هات من الآخر و خلصنا ) ..

و البعض يعلق على موضوع دون أن يقرؤه قائلا ( مشتاقوووووووووووووووووووون ) ..
و البعض يضع نكتة لا تمت للموضوع بصلة ..

أما أكثر مجاملة سهلة هي كلمة ( UP ) .. عتالة مجانية و مؤثرة ..

واصلوا

أبو جهينة يا مجهبذ كيف حالك؟
و الله ياهـو ذااااتو
و لو القصيدة طويلة ينسخ أربعة خمسة أبيات و يكتب تحتها عبارات إطراء ع الطاير و أنت تنتظر نقد جاد و دراسة متأنية..
أما ناس up ديل فأوضح من الخواجات
تعال تاني :D :D يا جلال ما تزوغ
خالد الحاج
17-01-2006, 06:57 PM
في طريقة يا طيب يا أخوي جديدة
تجيك رسالة داخلية (الموضوع :تحية)
والله يا طيب موضوعك جميل وممتع بس داير ليهو مزاج رايق وأنا الأيام دي مزحوووووووووم.؟؟
طيب الوكت الكتبت فيهو الرسالة ده مش كفاية للرد!!

أو :
موضعك ده جميل والله لكين بجيب لينا الهوا :D :D
الطيب بشير
17-01-2006, 08:02 PM
ود حمد
عفيت منك

أخـيتي الغالية أم سـهى
تسـلمي إنت .. و أبعدي مني ود حمد دة
الجنى دة أبوهـو مربـي جليل لكن هـو.........كبير
أبقي ردي علي البوستات بدون عواسـة أو إنتظري شيـل الحال
عجبتني زررررتـك
أخوك أحمد أمين..أقصد الطيب بشير
الطيب بشير
17-01-2006, 08:11 PM
كفاك لحدى كدة وماشى وما بجى الا اذا لزم الامر
الغالي قارسـيا
مرحبتين..هسـع و بعدين
أظنك عرفت سـر الحياة، لأن هذه المجاملة هي البعـد القاتل في شخصيتنا..نجامل بعض..نجامل أنفسنا بالربت على الذات في موضع التعنيف..
نجامل العرب لما يسخروا من الزول..نجامل...نجامل..نجامل
شكرآ لي شـوفـك السـمح
و تعاااال فرح ليالينا
تعال مجاملة ساي :D
المجدلية
17-01-2006, 08:16 PM
العزيز الطيب بشير

شكلك قاصدني عديل :)
بجيك راجعة :D
سمح ;)
الطيب بشير
17-01-2006, 08:18 PM
طيب الوكت الكتبت فيهو الرسالة ده مش كفاية للرد!!

مرات يا أبا جعفر بيكون الموضـوع طويل و عاوز قعدة، و نحن قوم لا نقول I don't know بالسـاهـل..و لا نريد أن نكتب ردآ يظهر جهلنا بالموضوع، فنلجأ لحيلة الرسالة الداخلية..
مرات بيكون الموضـوع، على أهميته، طـويل.. و فيهو إقتباسات لآراء كتيرة و تغفل يومين تجي تلقى البوست متندل، طبعآ أكثرنا لا يكتفي بأن يكون قارئآ فحسـب، هنا يبدأ القفز بالماسنجر و حركات العلاقات العامة.
الطيب بشير
17-01-2006, 08:20 PM
العزيز الطيب بشير

شكلك قاصدني عديل :)
بجيك راجعة :D
سمح ;)


المجدلية
سـت الذوق
إنت بتفقدي الغايبين :rolleyes: :rolleyes:
منو الزيك
كدي أقدري ما تجي راجعة :(
الجيلى أحمد
17-01-2006, 09:08 PM
A-MAN
A-MAN
:D :D
دا منو يارب :rolleyes: :rolleyes:

**إسـتراتيجية الكوبي بيسـت..
و تكثر في المناسبات الإجتماعية.. يعني أبو جهينة كتب الآية الكريمة في مطلع تعزيته إنت تلفحها بنقرة سريعة و تلزقها ع الماشي..و تكثر هذه الظاهرة عند مهاجري الدول الغربية حيث ندرة الكي بوردز العربية..تنسخ إسم المرحوم..تنسخ إسم العضـو أو الزميل..تنسخ ألقاب الناس الفنية و العلمية..
أعترف بإرتكاب هذه الجنحة بتصـرف لأني أكتب لكم بنقر كل حرف على الماوس ..

:o :o :o
الطيب بشير
18-01-2006, 04:19 AM
A-MAN
A-MAN

و الله يا الجيلي ضبطتني متلبسـآ :mad: :mad:
و أحييك و أنت تنسـخ إعترافي
mamkouna
18-01-2006, 07:19 AM
اخونا أبو موحى...
كنت دايرة أكتب ليك (( بجيك راجعة )) لكن خُفت من شيل الحال.... :p

يا سيدي أعترف ليك إني ككاتبة لأي بوست...تسعدني أي كلمة أو حرف ...لأنه يعني أن فلان أو فلان شرٌفني أو شرٌفتني بحضورها...و أعترف ليك إني في بوستات معينة (( زي بتاعت عصمت العالم أو إشراق درار أو مهند الجيلي )) بيغمرني إحساس جميل يصعب التعبير عنه...أقوم أخاف أكتب أي كلمة أو حرف يشوه الجو الرومانسي العام...حينها أكتفي فقط بتسجيل حضوري ...
على العموم يا سيدي...ال منك ما بناباها...لكن ال فيك عرفناها.... ;)
الطيب بشير
18-01-2006, 04:50 PM
على العموم يا سيدي

ممكونة إن شا الله إنت طيبة و بي خيرين تلاتة
أمـا قبل ..
فقد أرجعتني مفردة يا (سـيدي) لزمان كنا نعبر فيه عن أحاسـيسنا بشـغـب على حاجب العين الأيسـر :D ، و بالطبع لذلك قصـة، كنا نتنافس لإرضائكن :( و جاءني خبر خروجي من نهائي بطولة لا تزال غصـته عالقة بسـقف الحلق، أخبرتني أن غريمي يناديها بقوله:
يا سـتـي..
كلما خاطبها..و هذا يؤسـس لمستقبل يسوده التقدير، و تمنت لي الخـير..
مضى على كلامها ربع قرن، فقـط، تعادل ألف سنة مما تعدون بمقياس ريختر لتقدير حجم الدمار العاطفي الشامل.. لذا لم أتبين غير هذه المفردة من ردك... :mad: ...لو قرأ الممكون حديثي فاستسمحيه بأنها إرتعاشات ناصر يوسـف و...
بجيك راااااجع للـرد :rolleyes: :rolleyes:
عكــود
18-01-2006, 05:34 PM
أبو الطيب الأنيق،
كيفك وعساك بخير يا أبو البشير ..
المداخلات تسعد صاحب البوست .. حتى لو مجاملة.
طبعاً الأجمل إنها تكون إضافة للموضوع يستفيد منها صاحب البوست والقرّاء ..
لكن إن لم يكن ذلك كذلك، فمافي ما يمنع من المجاملة المعقولة ..
من باب ريحتو ولا عدمو،

كَسْــــرة:
أشوف ممكونة قلّبت عليك جمراً قديييييم مدفون ..
بس حكاية ربع قرن من الزمان دي بتجيب ليك الهوا ..
وتركّبك اللاندروفر،
وأنا برررره،

عكــود
الطيب بشير
18-01-2006, 05:59 PM
عـكـود الخير أريتك تبقى طـيب إنت
لا اعتراض على المشاركات مهما صغرت إنماهـو بوسـت شيل حال، بحسـب الشقيقة أم سـهى، و صـح لسانك يفرح صاحب البوست بكل الردود لكني ألهـب الهـمـم بهذه السـياط لكي تكتبوا لنا المزيد و لك تقديري.
أمـا كسـرتك الحاقـدة على شبابي..
فإن مـولـد موحـى يجعلني أتراجع عاشقآ لأبدو صهـرآ، و مبرووووك الشباب علي ود خطاب :mad: ، نحن بعد دة نفتش لينا لقب وقـور..إنت عمو ..و خالد خالو..أنا أظني حـاج الطيب النعمني أديت الفريضة لأنو شيخ الطيب لا تناسب سفاهاتي العارضـة كلما هزني الطرب لغناء أو شـعر أو حتى شيشـة بمعسـل تفاح...يا مرتاح :D :D .
mamkouna
18-01-2006, 09:10 PM
...لو قرأ الممكون حديثي فاستسمحيه بأنها إرتعاشات ناصر يوسـف و

الممكون هين...
سوما كيف؟؟؟؟! :eek: !!!!
الطيب بشير
19-01-2006, 03:03 AM
ممكونة :rolleyes: :rolleyes:
Shhhhhhhh
Aboremaz
19-01-2006, 10:23 AM
up
:D :D :D
أم سهى
19-01-2006, 01:24 PM
عجبتني زررررتـك
أخوك أحمد أمين..أقصد الطيب بشير
هوي هوي دقيقة بالله :mad:
احمد امين زرا منو؟ الا كان زره روحو في (نجلاء بتاعتو دي) :D :p
وعفيت منها نجلاء (بي قلبي ) طبعا :D
علا وحاتك انت البزرني (بكسر الباء وضم الزين وفتح الراء) امو لسة ما ولدتو
تسلم
وبجيك راجعة :p :p :D
الطيب بشير
19-01-2006, 05:37 PM
up
:D :D :D
التحية ليك أبو ريماز
على قول عكود و مـمسـوووووخة، أي زيارة تسعد صاحب البوست
الطيب بشير
19-01-2006, 05:40 PM
أم سهى يا أخية كيف حالكم؟
أحمد أمين هارشـكم جــCHــت و أول واحدة إنتي :eek: :eek:
لكن طعنته النجـلاء لا تزال تنزف
المجدلية
20-01-2006, 08:15 AM
العزيز الطيب بشير
كدي أقدري ما تجي راجعة مافي أي طريقة للزوغة :rolleyes:

أنا مع ممكونة في الاعتراف :)
ومع عكود في الكلام الكتبه. ;)
:)

عشان كدا

موضوعك جميل يا أبو بشير :D
الطيب بشير
20-01-2006, 04:02 PM
المجدلية
مرحبتين
واااا حبابك
يجيك الخير
عارفة يا مـجــد..القصـة تمشي و تجي للمجاملة، نحن شعب مجامل و لذلك آثار جانبية و البيعة واحدة..
عبدالله الشقليني
20-01-2006, 04:28 PM
أعاين فيهو واضحك
وامشي واجيهُو راجِع

أقيس الفم بودعة
وألقى الودِع واقِع

شكراً ليك يا أبو الطيب
3mk-Tango
20-01-2006, 08:26 PM
حيرتني يا الطيب بشير قفلت علي كل المنافذ ....
اديك اعتراف تاني .. انا كمان اكتر بوست ما بقدر اكتب فيهو هو البوست البكون مفتوح عشاني يعني
يا تنقو ما عارف شنو وعيد ميلاد سعيد ..وسلامتك .. دا بقي بعمل ( offline ) طوالي وبقعد اعاين بي برا زي الما شايفو
مرة اتكلمنا في الحته انو لو زول فتح ليهو بوست نقد كلنا بنجي داخلين و ( ننقد ) وننتقد عادي .. لكن بوست
شكر كل الناس بتاخد منو جفله .. دي تربيتنا كدا بنتعقد من الكلام الحلو .. لكن جاهزين لي كلام النقد ..

ما عارف اجي ولا ما اجي تاني .. :D

وعلي ذكر اجي دي .. وتاكيد علي كلام ابو جهينة انو ممكن واحد يرد نكته ما عندها علاقة بالموضوع
هاك النكته دي .. :D ( قالو كابلي لقي الاغنية بتاعة اكيداكيد حنتقابل ممسوحة من مكتبة الاذاعة ..
ولما سال عن السبب قالو ليهو .. مافي حاجة اسمها اكيد .. كلو في علم االغيب .. ولازم تقول انشاء الله حنتقابل )

:D

.
مي هاشم
21-01-2006, 11:39 AM
الطيب بشير والله داخلة أضحك على نكتة تنقو :D :D
الطيب بشير
21-01-2006, 02:04 PM
وجيه البورد مرحبتين
دي ما بلقاها زولآ
زي انا..
صــيـدو ناااااجع :( :(
و ابقى تعال راااااجع
الطيب بشير
21-01-2006, 02:11 PM
.. دي تربيتنا كدا بنتعقد من الكلام الحلو ..
سلامات يا تنقـو
مرة غلبني أتحمل إنسـانية عكـود
فكتبت بوست طويل عريض وصفته فيه بما هو أهل له
دخل البورداب فأوسعوا عكودآ ـ تشكـيرآ ـ
جاء هو متأخرآ و بدأ قوله بي إنو لما قرا البوست..إتبلم و إتبكم.. :)
تخيل عكود اليناطق الجـن دة و هو ضـما غالبو اليقولو
بس يا هو كلامك..
لو ما جيت راجع..أكيد..أكيد ح نتقابل.. :D :D
الطيب بشير
21-01-2006, 02:14 PM
الطيب بشير والله داخلة أضحك على نكتة تنقو :D :D
سلامات يا مـي يا بت السـمانية
الدهـر دهـــــــــــــــــــــــــرنا
أضــــحــــكــــي و ..ح نتقابل :D
haneena
21-01-2006, 03:31 PM
سلام للطيب أبوموحى( المرة دي صاح!!) :)
شيل حس فعلآ
قصة بجيكم راجعة دي يا الطيب و الله أنا بعملها
لكن بيكون الموضوع جميل و بيستحق و أنا في قمة المشغولية و شغل السهر
و بما إننا حضرنا زمن صفوف البنزين و الرغيف ووووووو...أول أيام الإنقاذ
بقينا مزلوعين زلعة لي هسع ما مرقت
....عشان كدة لازم نحجز في الصف بي طوبة
طوبتنا هي بجيكم راجعة

أها بجيك برضو راجعة :D :D :D
الطيب بشير
21-01-2006, 06:26 PM
قصة بجيكم راجعة دي يا الطيب و الله أنا بعملها

أهـم حاجة يا الحنينة الإعتراف دة
بعد داك التبرير ;)
أما طوبة الحجـز فذكرتني طوبة أخرى يضعها البعض في حالات محددة :D :D ، زي متين يا ربي :confused: :confused: ؟
حبابك بي طوبتك يا بتنا..
الطيب بشير
21-01-2006, 11:09 PM
:D الأكثر طرافة هو أن تجد أحدهم قد زارك في البوسـت مرتين بذات الإختصار، بلا إدراك لكونه قد زارك قبلها بذات الكلمات التي نسخها ع الماشي.. :D :D :D
الطيب بشير
23-01-2006, 04:19 PM
نتمني من الله العلي القدير ان يرد غربه كل غائب :D :D 0
mime
21-02-2006, 11:32 AM
يا حاج الطيب

سلامات

في نوعية ما اتكلمتا عنها ، النوعية اللتي أنا دا .... ديل البكون مرات الكلام عاجبم عجب شديد ، علا ما قادرين يقولوا شيء ، تلقاهم يعاينو ويقولو (قادر الله ، قادر الله )
أها الواحد فيهم لما ربك يفتح علينا بي كلمتين بنقوم نكشحن في البوست ، ونقول لنا عودة ، وعييييييييييييك

بعدين في طريقة حديثة الت أقتباسات ، انك تشيل كلمتين من كلام الزول سيد البوست عشان تكيفوا (حاج الطيب) مثلا ;) ;)


بالجد يا ابو موحى انا واحد من المتابعين ولو علي ارد علي الناس دي ست عليها لكين بس تقول شنو ، المعايش جبارة

ولنا عوووووووووودة :eek: :eek:
نولا
21-02-2006, 12:50 PM
الطيب بشير

اول حاجة ازيك يا اخوي

يا اخي البوست بتاعك دا ورطه عددددددددددددددديل والله :mad: :mad: :mad:

لي ساعة بقرا فيهو ما عرفته اعمل شنو ... لا عرفته امرق لا عرفته اقعد ... لا عرفته اقول شنو

في النهاية قلته النمرق اخير لي ...



لكن اقول ليك سبب واحد تاني يجبني ليهو مافي :D :D
الطيب بشير
23-02-2006, 02:52 AM
الحبايب مايم و نولا
شكرآ لرفع البوســت و الكلام الســمح
بمشي و اجيكم راجع
لوووووووووووول
ناصر يوسف
23-02-2006, 07:48 AM
أها أنا جيت


إزيكم


ومع السلامه


بجيكم السنه الجايه



الله يسهلها علينا وعليكم
ندى
07-03-2006, 04:36 PM
الطيب أخوي في فن جديد ما سمعت بيهو اسمو في سري
وأقول ليك قصتو
عندي اختي خواااااااااااااااااااافة شديد تجي مرات تحكي لينا تقول لينا والله فلان داك ولا فلانة ديك شاكلتني وأنا قلت ليها أو ليهو كدة وكدة وكدة نقول ليها والله قلتي دة كلو تقول لينا آيي نقول ليها ما خفتي تقول لينا ما قلتو ليها /ليهو في سري :p

أها أنا مرات كتيرة بقرأ البوستات دي وبرد عليها كلها لكن في أغلب الأحيان في سري :D :D :D
وحلك لما تشوف النور
أها سمعت بالفن دة قبل كدة ؟؟؟
الطيب بشير
07-03-2006, 04:56 PM
[B ] إزيكم

ومع السلامه

بجيكم السنه الجايه
[ /B]

الحبيب ناصر يوســف
تعال
قبل السنين تجري
تعال فرّح ليالينا
الطيب بشير
07-03-2006, 04:58 PM
أها أنا مرات كتيرة بقرأ البوستات دي وبرد عليها كلها لكن في أغلب الأحيان في سري :D :D :D
وحلك لما تشوف النور
أها سمعت بالفن دة قبل كدة ؟؟؟
دي جديييييييييدة يا مولانا ندى
أوّل مرّة أسمع بيها
أنا كان قلت الفي سرّي دة كللللللللللو ما بتحصل حرابات و مصايب
أبقي ردّي لينا على البوستات كاش داون
و الفي سرّك خلّيهو..يوم فـــتّـــو ما يجــي
لووووووووول