الخرطوم ... بذخ للطيش لعيون أفريقيا !!!..

[محمد ابراهيم قرض]

تعالوا هنا يا بتاعين القطيعة و الونسة الدقاقة !!!

قالوا ليك حصلت العجايب و الخرطوم تتباهى بإستضافة مؤتمر القمة
الأفريقية. حيث يبدو أن دولارات البترول التي لم تظهر يوما على صحة
و عافية محمد أحمد ، قد انبهلت و بإهمال على مرافق و مراسم استقبال
و استضافة زعماء أفريقيا في الخرطوم عاصمة الثقافة العربية ...
و كل ذلك من أجل ابراز وجه السودان الحضاري (بالمناسبة قالوا المشروع
الحضاري لحق أمات طه بسبب السماد المغشوش الذي استخدم فيه) ...

و على قاعدة أن (الجديد في الكرو سمح) ... بدأ الكل في السودان يتفاخر
و ينفش ريشه بابراز جديده ... و حيث أننا أمة تحترم المؤسسات
و البروتوكولات الدستورية فلقد خصصت السانحة الأولى للتباهي بالجديد
لرئيسنا الهمام و هو في عز مطارنا الدولي يستقبل زعماء القارة السمراء ...

فلقد قرر سعادة المشير ابراز (فردته الجديدة) لتقف إلى جنبه في ساحة
المطار ، تستقبل بدورها زوجات الزعماء الأفارقة ... أما (الفردة القديمة)
فيقول العالمون ببواطن الإمور أن مرسوما رئاسيا قد صدر بشأنها يحدد مساحة
حركتها في إطار حرم المطبخ للطهو و (الصندقة) الملحقة به لتقطيع البصلة
و توريق (الخدرة) و ما تيسر من (الرجلة) ... و لقد أفرد لذلك (ديدبانا)
خاصا برتبة كبيرة يراقب عبر كاميرات تلفزيونية مغلقة كل حركات و سكنات
(الفردة القديمة) بحيث لا تجرؤعلى إنتهاك التعليمات الرئاسية ...

و قالوا ليك سيارات (الليموزين) المخصصة لتنقل زعماء أفريقيا الواحدة
طولها يمتد من باحة المطار لغاية تقاطع شارع القصر مع شارع البلدية !! ..
يعني السواق ما إن يضع رجله على (البنزين) حتي يجد نفسه في مدخل
(المدينة الرئاسية) .... و المدينة الرئاسية هي ذلكم المبنى العملاق الذي
(صُنع خصيصا مثل سجاير البنسون) لإقامة الزعماء الأفارقة ..

و عن المدينة الرئاسية فحدث و لا حرج .. فلقد كساها الرخام و العاج
و المرمر من مبتداها لمنتهاها ... و فرشت غرف نومها بحرير ناعم يضفى
على جسد الزعيم الأفريقي خدرا لزيزا يجعله يدخل في (سابع نومة) بمجرد
أن (ينخمد) في السرير ليعفيه من أرق الشخير و الزفير !!! ....

هذا وما أن وصل زعماؤنا الأفارقة و الوفود المرافقة لهم لأماكن إقامتهم
المترفة حتى نادوا بصوت واحد على (إدارة التشريفات و العمليات الخاصة)
أن يأتوهم بالصبوح يا بهجة الروح ترحني !!!!
قلقد أصر الزعماء و وفودهم المرافقة و وقفوا ألف أحمر .. أنهم لا يستطيعون
الوصول إلى (قرارات مصيرية) دو أن يتم توفير (المشروب) لهم !!!

بس معقول حكومة الوحدة الوطنية تخزلنا و تمرغ رؤوسنا في التراب ؟؟؟
فلقد تحلت حيكومتنا بقدر هائل من المرونة و أمرت بجلب كافة أنواع و مقاسات
القارورات المصنوعة في بلاد الضلالة و الاستكبار إلى أماكن استضافة الزعماء
و الوفود ، و ما كان أحدا يظن بتوفر مثل هذه (الممنوعات) بدولة الخلافة ...
هذا بالطبع بخلاف غض النظر عن ما حوت (الحقائب الدبلوماسية) للزعماء و وفودهم
من المعتق و المخمر !!! ...

و هنا يحكى أن زعيم إحدى الدول الإفريقة الهامة التي تتمتع بحق النقض في
(مجلس السفسفة الدولي) قد دلف مباشرة من (الحمام) إلى فتح (الثلاجة الصغيرة)
المخصصة لغرفة نومه و هو يرتدي (روبا) مخمليا ناصع البياض جعله يبدو مثله مثل
(صهريج) المياه ...

و ما أن تفحص فخامته نوعية (المخزون) و ماركاته حتى هاج و ماج ... ثم رفع سماعة التلفون الموضوع على (السايدبورد) بقرب السرير (الدبل) ، على بعد خطوات من
(الأباجورة) الذهبية .. و أمر بإستدعاء مدير (التشريفات و العمليات الخاصة) بشحمه
و لحمه دون غيره من صغار المعاونين ..

استعجب مدير التشريفات من الشرر الذي يتطاير من عيون الزعيم ، و جزم أن أزمة دبلوماسية خانقة مع دولة الزعيم لابد و أنها على وشك الحدوث ، من شأنها أن تعصف بالقمة كلها لينفض سامر المولد دون حمصا يذكر ...

بادره الزعيم بلهجة سودانية مكسرة و دار الحوار التالي:

-خلاص في السودان مافي إحترام ؟؟؟!!!!
-ليه يا فخامة الرئيس ... الحصل شنو ؟؟
-يعني ما بتعرفوا بيت ريتا ؟؟؟!!!
-بيت ريتا ... ريتا ... كاترينا ... ريتا دي منو يا فخامتك ؟؟؟
-أووووووف واحد سوداني مستهبل ... ريتا ست العرقي !!!!!!

و يتواصل الحكي ....

[حمدي اب جقادو]

بسم الله الرحمن الرحيم

http://www.scsnap.com/music/wardy/banadeeha.mp3

[د.سيد عبدالقادر قنات]

الأخ أبجقادو والمتداخلون

من يهن يسهل الهوان عليه

بلادنا ضاعت وراحت في أقل من شمار ومرقه

والكل يتفرج في تقطيع أوصال الوطن ألي ممالك ودويلات
وثروته تنهب عينك يا تاجر

وكرامته وعزته صارت هباء تذروه الرياح

وغدا ستقول أجيال كان هنا وطن أسمه السودان
وكان يسكن فيه شعب طيب وكريم وأجواد

ولكن شاء له قادته

الذل والهوان والفرقة والشتات

[محمد ابراهيم قرض]

أبو جقادو :
و الله ليك وحشة ..
و بعدين شايفك عملت زحمة كبيرة في السودان (سمح الملح يا خوي) !!!
و المصيبة ما قدرت أعرف (الحاجة) النزلتها دي ... تكون أغنية ؟؟؟
المهم أنا عندي نزل صندوق أسود كبير ...

[محمد ابراهيم قرض]

د. سيد:

من يهن يسهل الهوان عليه

لخصت الموضوع يا دكتور .... تسلم !!!!!

[Garcia]

يعني ما بتعرفوا بيت ريتا ؟؟؟!!!
-بيت ريتا ... ريتا ... كاترينا ... ريتا دي منو يا فخامتك ؟؟؟
-أووووووف واحد سوداني مستهبل ... ريتا ست العرقي !!!!!!

looooooooooool@ محمد ابراهيم قرض
والله يا قرض التغطية عندك ولا ال CNN ...
انتا راصد التحركات على مستوى عالى كمان .. :)

وقلت لى ريتا كيف .. وعرقيها النضيف .. الذى ليس له مثيل :D
دى اكون محمود درويش شرب عندها وقال قصيدته :
بين ريتا وعيون البندقية .. والذى يعرف ريتا ينحنى ويصلى للعيون العسلية ..

وخت شخيط تحت ( العسلية ) دى عندها معنيين فى وقت واحد .. :D :D

[محمد ابراهيم قرض]

وقلت لى ريتا كيف .. وعرقيها النضيف .. الذى ليس له مثيل :D
. :D :D

قارسيا ...
باين عليك حريف و( ذواق) !!!!!

وخت شخيط تحت ( العسلية ) دى عندها معنيين فى وقت واحد

و كمان صاحب خبرة و تجارب ثرة !!!!

[فيصل سعد]

اخونا قرض
الموضوع جليناه تماما بس جينا نسلم عليك و كدة.. الف حمد الله على ظهورك من جديد
و ان شاء الله دايما صحة و عافية و روقة و انبساطة.. اها ودعتك الله و ما تنقطع.

[Garcia]

قارسيا ...
باين عليك حريف و( ذواق) !!!!!

و كمان صاحب خبرة و تجارب ثرة !!!!

يا قرض ما متنا لكن شقينا المقابر ( البكرى / احمد شرفى / حمدالنيل ) ..
:D :D :D

[dayami]

اتاري يا اخوي قرض حاجة حبيبه بتاعة الهناي داك الساكنه الديم قصاد شارع 57 العمارات والابنها لاعب كره كبير زمان اختفت ليها يومين.
ناس الحله صاقعين قبضوها والفاهمين قالو بكره بتطلع. وفي ناس قالو شافوها في الفندك الكبير وناس قالو شافوها تفك في الدولارات واليورو.وتاري بتها الكبيره تلقط في حجار البطاريه القديمة من الحله ما خلتلها حجرا . وسالوها ناس الحله .فقالوا الفاهمين دي نظام التخميره وكده.

تخريمه

قالو ليك ناس الجمارك احتجو لان القندرانات الكبيرة عبرت من الحبشه وقالوا ليهم ماتهبشوها ولمن احتجو ضربوهم بعلب البيره عمك وداعة الله راجل طيب افتكرها علب البومبان راح اندسه وحاج بله راجلا فاهم ودقنو كبيرة خمه العلب خم وفتحليهو كنتين في مايو والطلب عليه زي الرز.ولمن خرج حاج وداعه سالهم الحاصل شنو قالوا ليهو دي ما بومبان دي كرامه مولانا السلطان قالهم الله يزيد كمان وكمان.

[Aboremaz]

دى اكون محمود درويش شرب عندها وقال قصيدته :
بين ريتا وعيون البندقية .. والذى يعرف ريتا ينحنى ويصلى للعيون العسلية ..

وخت شخيط تحت ( العسلية ) دى عندها معنيين فى وقت واحد .. :D :D

اغلب السودانيين عيونم (عسلية) :D :D

[ناصر يوسف]

=محمد ابراهيم قرض]تعالوا هنا يا بتاعين القطيعة و الونسة الدقاقة !!!

قالوا ليك حصلت العجايب و الخرطوم تتباهى بإستضافة مؤتمر القمة
الأفريقية. حيث يبدو أن دولارات البترول التي لم تظهر يوما على صحة
و عافية محمد أحمد ، قد انبهلت و بإهمال على مرافق و مراسم استقبال
و استضافة زعماء أفريقيا في الخرطوم عاصمة الثقافة العربية ...
و كل ذلك من أجل ابراز وجه السودان الحضاري (بالمناسبة قالوا المشروع
الحضاري لحق أمات طه بسبب السماد المغشوش الذي استخدم فيه) ...

و على قاعدة أن (الجديد في الكرو سمح) ... بدأ الكل في السودان يتفاخر
و ينفش ريشه بابراز جديده ... و حيث أننا أمة تحترم المؤسسات
و البروتوكولات الدستورية فلقد خصصت السانحة الأولى للتباهي بالجديد
لرئيسنا الهمام و هو في عز مطارنا الدولي يستقبل زعماء القارة السمراء ...

فلقد قرر سعادة المشير ابراز (فردته الجديدة) لتقف إلى جنبه في ساحة
المطار ، تستقبل بدورها زوجات الزعماء الأفارقة ... أما (الفردة القديمة)
فيقول العالمون ببواطن الإمور أن مرسوما رئاسيا قد صدر بشأنها يحدد مساحة
حركتها في إطار حرم المطبخ للطهو و (الصندقة) الملحقة به لتقطيع البصلة
و توريق (الخدرة) و ما تيسر من (الرجلة) ... و لقد أفرد لذلك (ديدبانا)
خاصا برتبة كبيرة يراقب عبر كاميرات تلفزيونية مغلقة كل حركات و سكنات
(الفردة القديمة) بحيث لا تجرؤعلى إنتهاك التعليمات الرئاسية ...

و قالوا ليك سيارات (الليموزين) المخصصة لتنقل زعماء أفريقيا الواحدة
طولها يمتد من باحة المطار لغاية تقاطع شارع القصر مع شارع البلدية !! ..
يعني السواق ما إن يضع رجله على (البنزين) حتي يجد نفسه في مدخل
(المدينة الرئاسية) .... و المدينة الرئاسية هي ذلكم المبنى العملاق الذي
(صُنع خصيصا مثل سجاير البنسون) لإقامة الزعماء الأفارقة ..

و عن المدينة الرئاسية فحدث و لا حرج .. فلقد كساها الرخام و العاج
و المرمر من مبتداها لمنتهاها ... و فرشت غرف نومها بحرير ناعم يضفى
على جسد الزعيم الأفريقي خدرا لزيزا يجعله يدخل في (سابع نومة) بمجرد
أن (ينخمد) في السرير ليعفيه من أرق الشخير و الزفير !!! ....

هذا وما أن وصل زعماؤنا الأفارقة و الوفود المرافقة لهم لأماكن إقامتهم
المترفة حتى نادوا بصوت واحد على (إدارة التشريفات و العمليات الخاصة)
أن يأتوهم بالصبوح يا بهجة الروح ترحني !!!!
قلقد أصر الزعماء و وفودهم المرافقة و وقفوا ألف أحمر .. أنهم لا يستطيعون
الوصول إلى (قرارات مصيرية) دو أن يتم توفير (المشروب) لهم !!!

بس معقول حكومة الوحدة الوطنية تخزلنا و تمرغ رؤوسنا في التراب ؟؟؟
فلقد تحلت حيكومتنا بقدر هائل من المرونة و أمرت بجلب كافة أنواع و مقاسات
القارورات المصنوعة في بلاد الضلالة و الاستكبار إلى أماكن استضافة الزعماء
و الوفود ، و ما كان أحدا يظن بتوفر مثل هذه (الممنوعات) بدولة الخلافة ...
هذا بالطبع بخلاف غض النظر عن ما حوت (الحقائب الدبلوماسية) للزعماء و وفودهم
من المعتق و المخمر !!! ...

و هنا يحكى أن زعيم إحدى الدول الإفريقة الهامة التي تتمتع بحق النقض في
(مجلس السفسفة الدولي) قد دلف مباشرة من (الحمام) إلى فتح (الثلاجة الصغيرة)
المخصصة لغرفة نومه و هو يرتدي (روبا) مخمليا ناصع البياض جعله يبدو مثله مثل
(صهريج) المياه ...

و ما أن تفحص فخامته نوعية (المخزون) و ماركاته حتى هاج و ماج ... ثم رفع سماعة التلفون الموضوع على (السايدبورد) بقرب السرير (الدبل) ، على بعد خطوات من
(الأباجورة) الذهبية .. و أمر بإستدعاء مدير (التشريفات و العمليات الخاصة) بشحمه
و لحمه دون غيره من صغار المعاونين ..

استعجب مدير التشريفات من الشرر الذي يتطاير من عيون الزعيم ، و جزم أن أزمة دبلوماسية خانقة مع دولة الزعيم لابد و أنها على وشك الحدوث ، من شأنها أن تعصف بالقمة كلها لينفض سامر المولد دون حمصا يذكر ...

بادره الزعيم بلهجة سودانية مكسرة و دار الحوار التالي:

-خلاص في السودان مافي إحترام ؟؟؟!!!!
-ليه يا فخامة الرئيس ... الحصل شنو ؟؟
-يعني ما بتعرفوا بيت ريتا ؟؟؟!!!
-بيت ريتا ... ريتا ... كاترينا ... ريتا دي منو يا فخامتك ؟؟؟
-أووووووف واحد سوداني مستهبل ... ريتا ست العرقي !!!!!!

و يتواصل الحكي ....[/mark]



ــــــــــــــــــــــــــــــــــــــــــــــــــ ــــــ


عذرا الصديق الحبيب
محمد إبراهيم قرض

ربما لأول مرة أتدتخل عبر بوست خاص بالسياسة (الحمقاء)....

نعم أنا ضد كل ساسة السودان وبلاهتهم وأنانيتهم ووووووو إلخ ... ولكن

أنا أفرق بين قطيعتي واختلافي مع النظام الحاكم وبين الدولة ... وما حدث يا أخي أنا شخصيا أعتز به ... أعتز بهذا الصرف الكبير لإظهار وجه السودان ... وهؤلاء إن شأنا أو أبينا هموا رؤساء الدول الإفريقية .. أين يمكننا أن نستضيفهم يا أخي وكيف ؟؟ وهل عندما تستضيف رئيس دولة بما يليق به ، هل هو عيب ؟؟؟

مجرد أسئلة يا صديقي

وهل أنا خاطئ عندما أقول (يجب التفريق بين إختلافنا مع النظام الحاكم وبين صورة السودان المثلي ؟؟)...

[محمد ابراهيم قرض]

كتب المسافة:

اخونا قرض
الموضوع جليناه تماما بس جينا نسلم عليك و كدة.. الف حمد الله على ظهورك من جديد
و ان شاء الله دايما صحة و عافية و روقة و انبساطة.. اها ودعتك الله و ما تنقطع.

دايما أصيل يا مسافة و بتتفقد الناس ...
و الغياب ما كان بي خاطري ...
خالد الحاج رفدني من المنتدى ...
يا زول دي قصة طويلة معقول ما تكون
سمعت بيها ؟؟؟ ..
و لكم تحياتي ...

[محمد ابراهيم قرض]

قارسيا ..

يا قرض ما متنا لكن شقينا المقابر ( البكرى / احمد شرفى / حمدالنيل ) ..

يا زول ده ما كلام شق مقابر و بس !!!
تكون طعمته بي رشفة رشفتين :) :) :) :)
و لا أقول ليك : نص كامل :) :) :) :) :)

[محمد ابراهيم قرض]

ديامي ..
اتاري يا اخوي قرض حاجة حبيبه بتاعة الهناي داك الساكنه الديم قصاد شارع 57 العمارات والابنها لاعب كره كبير زمان اختفت ليها يومين. ناس الحله صاقعين قبضوها والفاهمين قالو بكره بتطلع. وفي ناس قالو شافوها في الفندك الكبير وناس قالو شافوها تفك في الدولارات واليورو.وتاري بتها الكبيره تلقط في حجار البطاريه القديمة من الحله ما خلتلها حجرا . وسالوها ناس الحله .فقالوا الفاهمين دي نظام التخميره وكده.

ديامي صاحبي ...
الشي (زبونتك) و ساكن جنبها تقوم تنسي إسمها ؟؟؟ :) :) :) :)


قالو ليك ناس الجمارك احتجو لان القندرانات الكبيرة عبرت من الحبشه وقالوا ليهم ماتهبشوها ولمن احتجو ضربوهم بعلب البيره عمك وداعة الله راجل طيب افتكرها علب البومبان راح اندسه وحاج بله راجلا فاهم ودقنو كبيرة خمه العلب خم وفتحليهو كنتين في مايو والطلب عليه زي الرز.ولمن خرج حاج وداعه سالهم الحاصل شنو قالوا ليهو دي ما بومبان دي كرامه مولانا السلطان قالهم الله يزيد كمان وكمان.

من بيت الكلاوي يا ديامي :) :) :) :)

[محمد ابراهيم قرض]

ناصر يوسف ..

لأول مرة أتدتخل عبر بوست خاص بالسياسة (الحمقاء)....

نعم أنا ضد كل ساسة السودان وبلاهتهم وأنانيتهم ووووووو إلخ ... ولكن

أنا أفرق بين قطيعتي واختلافي مع النظام الحاكم وبين الدولة ... وما حدث يا أخي أنا شخصيا أعتز به ... أعتز بهذا الصرف الكبير لإظهار وجه السودان ... وهؤلاء إن شأنا أو أبينا هموا رؤساء الدول الإفريقية .. أين يمكننا أن نستضيفهم يا أخي وكيف ؟؟ وهل عندما تستضيف رئيس دولة بما يليق به ، هل هو عيب ؟؟؟

يا زول أنا معاك مية في المية ...
الله يجازيك يا قارسيا ...
كله منك !!!!!

[محمد ابراهيم قرض]

مكرر

[عز المزار]

الغالى قرض
روائع التحايا
كل تلك التازلات من اصحاب المشروع الحضارى
كانت لسبب وهمهم فى رئاسه الاتحاد الافريقى
فى دورته الجديده وليس جديده عليهم التازلات
فهم من سلم العرب الافغان حلفائهم ؟؟؟؟؟؟؟؟؟؟؟
ودمتم

[محمد ابراهيم قرض]

عز المزار:

كل تلك التازلات من اصحاب المشروع الحضارى
كانت لسبب وهمهم فى رئاسه الاتحاد الافريقى
فى دورته الجديده وليس جديده عليهم التازلات
فهم من سلم العرب الافغان حلفائهم ؟؟؟؟؟؟؟؟؟؟؟

بس التنازلات ما نفعتهم يا عز ..
الأفارقة فهموها طايرة !!!

[محمد ابراهيم قرض]

تحدثنا في الحلقة السابقة عن كيف أن الزعيم الأفريقي
الكبير لم يعجبه (المشروب المستورد) ، و أمر مدير
التشريفات أن يجلب له (المشروب البلدي) من بيت ( ريتا)
الظريفة ...

فوجئت ريتا بضوضاء عظيمة خارج فناء منزلها ، و حدثت نفسها أنها (الكشة)
اللعينة رغما عن ما قامت به (في الآونة الأخيرة) من جهود مضنية في درء هذه
الكشة عنها ... فمعظم القيادات و الأفراد الذين يتناوبون على القيام بحملات
الكشة هم من الزبائن المخلصين لها ... بعضهم يأخذ حقه نقدا ماديا ،
و البعض الآخر يأخذه عينا (بكريا) ، و بالمناسبة (بكريا) دي لا علاقة لها
بسعادة اللواء بكري حسن صالح ، و لا حتى بالمدعو بكري أبو بكر !!!! ...

هرعت ريتا لخارج المنزل حاملة قلبها بين يديها ... و يا لهول ما رأت ...
المواتر الصغيرة ديك بالكوم و من الجانبين ... و سيارة ليموزين طووووويلة
في الوسط وضع على (بوزها) علما يرفرف بحنق في شتاء الخرطوم ... و ما زاد
من رعب ريتا و (توَر) عليها آلام (المغص) قبل موعد (دورته) المألوفة أن كل
من المواتر و العربة التي يحيطون بها جميعهم يومضون بأنوار خضراء و حمراء
فاقعة و يطلقون أصواتا مزعجة عبر (بوريهاتهم) العجيبة و الكل يتقدم مباشرة
نحو منزل ريتا !!!....

وقف (الموكب الظافر) أمام منزل المسكينة ريتا ... و كانت الأنوار اللامعة
و الضوضاء قد جلبت الكثيرة من المارة و الفضوليين ... ثم فًتح الباب الخلفي
للسيارة الفارهة لينزل منه السيد مدير التشريفات المحترم يرتدي بدلة جميلة
كحلية اللون و ربطة عنق حمراء ...

ما إن رأت المسكينة ريتا ذلك (الهندام) الفخم حتى بدأ قدرا من الطمأنينة يتسلل
إلى قلبها ... فقد حدثت نفسها بأن كل هذه (الزيطة و الزمبريطة) ما هي إلا زفة عريس
من طبقة الاثرياء الجدد و قد قدم شخصيا لتأمين (المشروب البلدي) لزوم الفرح
و البهجة ، خاصة و أن التشديد على مكافحة (المشروب المستورد) بقدوم العهد
الظافر لرجالة الإنقاذ قد (حرر) من سوق ليبيا ... أقصد سوق ريتا ...

و ما جعل ريتا تجزم أن هذا الرجل الوسيم صاحب الهندام الفخيم هو عريس بحق
و حقيقة ما شاهدته من قطعة معدنية دائرية الشكل ينبعث منها وميض باهر و قد
لزقها الرجل الوسيم على جيب سترته الفخيمة ... نعم هو ذلك (الهلال) الشهير
الذي يرتديه العرسان في ليلة زواجهم و إن أفضى الهوس بملاحقة الموضة إلى أن
يحور من شكله الهلالي إلى الشكل الدائري و إلى أن يُنقش عليه رسمة عجيبة هي
أقرب (للخريطة) لم يكن لريتا المسكينة أن تدرك كنهها !!!!

[Garcia]

لم تكن ريتا تحلم يوم من الايام ان يكون زعيم دولة كبيرة احد زبائنها ..
ويضاف اسمه الى لوحة الزبائن الكبار ...
من شعراء وسفراء وشخصيات مرموقة جدا ... قال احد زبائنها العاديين
ساخرا : ريتا تانى ما حا تبيع لينا بعد ما شرفها سيادة الزعيم شخصيا ..
والمستغرب ليهو الزعيم دة عرف من نوعية الصنف دة كيف ؟؟؟؟
وحقيقة نعيش فى مجتمع لا توجد فيه اسرار على الدولة ابدا ..


اها يا قرض كفاك كدة :D :D :D
تحية ليك ولى احلى ريتا ;)

[مي هاشم]

جنس محن!!!!!
الله يجازي الـ ...............

[محمد ابراهيم قرض]

قارسيا:
لم تكن ريتا تحلم يوم من الايام ان يكون زعيم دولة كبيرة احد زبائنها ..
ويضاف اسمه الى لوحة الزبائن الكبار ...
من شعراء وسفراء وشخصيات مرموقة جدا ... قال احد زبائنها العاديين
ساخرا : ريتا تانى ما حا تبيع لينا بعد ما شرفها سيادة الزعيم شخصيا ..
والمستغرب ليهو الزعيم دة عرف من نوعية الصنف دة كيف ؟؟؟؟
وحقيقة نعيش فى مجتمع لا توجد فيه اسرار على الدولة ابدا ..

نعم ... وحاتك انت ريتا صابتة عين الحسوووود ...
و بعدين زعيم عنده مخابرات أد الدنيا ما يقدر
يعرف محلات الصنف الراقي ... ده برضو كلام
يا قارسيا ؟؟؟؟ :) :)

[محمد ابراهيم قرض]

مي هاشم :
جنس محن!!!!!
الله يجازي الـ ...............

يا حلاوة الطلة ..
طبعا النقط دي قاصدة بيها قارسيا :) :) :)

[ود البدوي]

... أما (الفردة القديمة)
فيقول العالمون ببواطن الإمور أن مرسوما رئاسيا قد صدر بشأنها يحدد مساحة
حركتها في إطار حرم المطبخ للطهو و (الصندقة) الملحقة به لتقطيع البصلة
و توريق (الخدرة) و ما تيسر من (الرجلة) ... و لقد أفرد لذلك (ديدبانا)
خاصا برتبة كبيرة يراقب عبر كاميرات تلفزيونية مغلقة كل حركات و سكنات
(الفردة القديمة) بحيث لا تجرؤعلى إنتهاك التعليمات الرئاسية ...

طبعا دا أصلو لو هم بياكلوا خدرة وموليتا زى الناس التانيين. المهم دردشتك ظريفة وطريفة وطبعاً ناسنا هناك أنفخوا ساكت وأظنهم دايرين التاني الخرطوم عاصمة الثقافة عام 2006 برضو(والخيران فى السوق العربي مليانة موية وريش جداد)قال ثقافة قال.
شكراً ليك ياأخى.هذه الدردشة بالمناسبة مفيدة واصلها وصلك الله.
دم طيباً[

[Garcia]

برقية عاجلة الى قرض :
* علمنا من مصدر موثوق طلب عدم الكشف عن اسمه ..
ان الصنف الخاص بريتا سوف يتضاعف سعره بنسبة %100
بعد زيارة الزعيم التاريخية ... واشادته بالصنف ..
( والما عاجبو امشى اشرب من اى مكان تانى :p ) ..

** واكدت مصادر مقربة للزعيم انه بعد عودته من زيارة ريتا ..
ولاول مرة منذ توليه السلطة لاكثر من ثلاث عقود .. كتب الخطاب
الذى سيلقيه على القمة بخط يده .. ونام قرير العين فى خيمته الفارهة ..

انتهت البرقية ...........................................

* لو ما مصدقنا يا قرض اسأل العنبة الواقفة فوق بيتنا :D :D :D

* مقتبس المقطع الاخير من رواية احمد الملك ( الخريف يأتى مع صفاء ) .....

[mohamed hemaid]

ودقرض اخوي..
ليك وحشة والله وحمد لله علي سلامتك..
يعني الا دخلنا واسطة حتى ود الحاج رجعك تاني؟
و ما جعل ريتا تجزم أن هذا الرجل الوسيم صاحب الهندام الفخيم هو عريس بحق
و حقيقة ما شاهدته من قطعة معدنية دائرية الشكل ينبعث منها وميض باهر و قد
لزقها الرجل الوسيم على جيب سترته الفخيمة ... نعم هو ذلك (الهلال) الشهير
الذي يرتديه العرسان في ليلة زواجهم و إن أفضى الهوس بملاحقة الموضة إلى أن
يحور من شكله الهلالي إلى الشكل الدائري و إلى أن يُنقش عليه رسمة عجيبة هي
أقرب (للخريطة) لم يكن لريتا المسكينة أن تدرك كنهها !!!!

يبدو ان ريتا قد احتست وتزوقت البكري.. وال (بكري) هذه لا علاقة لها ايضا بمن ذكرت.
فازوزقت عيناها وتراءى لها ما رأت هلالاً..وقد أدى تشابه البقر عندها لهذه الرؤيا المخادعة
فما جهر عينيها ليس هلالاً كما توهمت وانما هي شارة اركان الحرب والنيشان لقائد المسيرة
الكبيرة والتي اتت تحرس زعيم السفسفة الدولية في سيارتة الليموزين..وتلك التي تلبس الرقاش
لم تكن اخت العريس ولا صديقة العروس وانما احدي الفتيات اللآتي سكن الطابق العلوي لبرج
المدينة الرئاسية..لم تع ريتا ما قاله (الرجاف) بلسان معووج..فقد قال لها ..(دا موكب اللعريس)
وكان يقصد الرئيس.. وترجم عقلها كلامه المعقول الي صيغة اللامعقول..وزاد الترجمة تاكيدا رؤيتها
للزعيم بالرول الابيض الاقرب لي زفاف العروس..
فهل سيتجرأ الزعيم بالنزول والدخول الي وكر ريتا ومجالسة الرجاف..ام سينتظر في ليموزينه
ويتجرع كأسه الأولى قبل الشراء؟ ألا تروا معي أن عوامل طول الليموزين ستؤادي الى تبخر الكاس
قبل وصوله شفتي اللعين أقصد الزعيم؟ :confused:

حميد..

[محمد ابراهيم قرض]

ود البدوي:

طبعا دا أصلو لو هم بياكلوا خدرة وموليتا زى الناس التانيين. المهم دردشتك ظريفة وطريفة وطبعاً ناسنا هناك أنفخوا ساكت وأظنهم دايرين التاني الخرطوم عاصمة الثقافة عام 2006 برضو(والخيران فى السوق العربي مليانة موية وريش جداد)قال ثقافة قال.
شكراً ليك ياأخى.هذه الدردشة بالمناسبة مفيدة واصلها وصلك الله.

ود البدوي ..
الشكر ليك انت للغشوة الجميلة ..
معقول ياكلوا موليتا يا ود البدوي ؟؟؟!!!
و بعدين أسع قالوا الموليتا بقوا يجمدوها
و يخلطوها بالسمسم ... يعني تكون جاهزة
يا ود البدوي .. بس وين التلاجة البيحفظوها
فيها ؟؟؟!!!

[محمد ابراهيم قرض]

قارسيا:

برقية عاجلة الى قرض :
* علمنا من مصدر موثوق طلب عدم الكشف عن اسمه ..
ان الصنف الخاص بريتا سوف يتضاعف سعره بنسبة %100
بعد زيارة الزعيم التاريخية ... واشادته بالصنف ..
( والما عاجبو امشى اشرب من اى مكان تانى ) ..

مش كده و بس يا قارسيا ..
قالوا ليك البورصة العالمية كلها إتلخبطت ..
النازداك دخل في الدوانق ، و اليورو لحس
الين .. و عيييييييييييييييييك !!!!

واكدت مصادر مقربة للزعيم انه بعد عودته من زيارة ريتا ..
ولاول مرة منذ توليه السلطة لاكثر من ثلاث عقود .. كتب الخطاب
الذى سيلقيه على القمة بخط يده .. ونام قرير العين فى خيمته الفارهة ..

مش كده و بس يا قارسيا ...
قالوا ليك الزعيم ضربته درجة عالية من الفرفشة و المزاج ..
قام من الحمام و جري مباشرة على الاجتماع ...
الجماعة إتفاجأوا بالموية تشر من كل ناحية
و الزعيم (ملطي) رسمي !!!

لو ما مصدقنا يا قرض اسأل العنبة الواقفة فوق بيتنا

لو ما مصدقنا .. أو مكذبنا .. أسأل د. دقش يا قارسيا !!!

[محمد ابراهيم قرض]

حميد ...

أولا ، و بالتبادي كده ما تنسي موضوع القلاب ..
الشغل شغل و الونسة و نسة !!!!

يبدو ان ريتا قد احتست وتزوقت البكري.. وال (بكري) هذه لا علاقة لها ايضا بمن ذكرت.
فازوزقت عيناها وتراءى لها ما رأت هلالاً..وقد أدى تشابه البقر عندها لهذه الرؤيا المخادعة
فما جهر عينيها ليس هلالاً كما توهمت وانما هي شارة اركان الحرب والنيشان لقائد المسيرة
الكبيرة والتي اتت تحرس زعيم السفسفة الدولية في سيارتة الليموزين

في دي ليك حق يا حميد ..
دحين ريتا شن عرفها بالنياشين .. كمان أركان حرب مرو واحدة ؟؟؟

وتلك التي تلبس الرقاش
لم تكن اخت العريس ولا صديقة العروس وانما احدي الفتيات اللآتي سكن الطابق العلوي لبرج
المدينة الرئاسية..لم تع ريتا ما قاله (الرجاف) بلسان معووج..فقد قال لها ..(دا موكب اللعريس)
وكان يقصد الرئيس.. وترجم عقلها كلامه المعقول الي صيغة اللامعقول..وزاد الترجمة تاكيدا رؤيتها
للزعيم بالرول الابيض الاقرب لي زفاف العروس..

لعلمك يا حميد الزولة الساكنة الطابق العلوي
دي السيدة الأولى زاتها ، رغما عن أنه و في الحساب كدي ،
تطلع السيدة التانية ... و لو عندك نضم مع السيدات (الأوال) ديل
ورينا ليهو يا حميد !!!

فهل سيتجرأ الزعيم بالنزول والدخول الي وكر ريتا ومجالسة الرجاف..ام سينتظر في ليموزينه
ويتجرع كأسه الأولى قبل الشراء؟ ألا تروا معي أن عوامل طول الليموزين ستؤادي الى تبخر الكاس
قبل وصوله شفتي اللعين أقصد الزعيم؟

حميد ... كل شئ و لا جبل الرجاف المنه نخاف ..
أما عن التكثف و التبخر ، فمن ناحية فيزيائة (بحتة) ، طالما
كانت درجة غليان بنزين (الليمو) تزيد عنها بالنسبة (للبكري) ،
فإنه لا محال من وقوع التسونامي يا حميد !!!

[د.سيد عبدالقادر قنات]

يا ود البدوي .. بس وين التلاجة البيحفظوها
فيها ؟؟؟!!!

يا جماعة بس كدي ما عارفين التلاجة وين ؟ دا اسمو كلام دا عيب عليكم

أمال اليخت الرئاسي والواقف في الوابورات وحلف بريتا وأخواتها

أنو ما ينزل للموية ، ألا والديبفريزرات بتاعاتو مليانات جراكين صافية بكري زي الموية
وقسما عظما لازم أول من يخت كراعو فيهو الجزمة الأخيرة
وليه لا
كبرت ولا عجزت
ماهي بقت زي بت المطر
وبعدين يا ود البدوي دا ما بذخ دا أسمو أكرام الضيف
وعيب الزاد ولا عيب سيدو
وبليلة مباشر ولا ضبيحة مكاشر

نحن الكرم حارسنا من زمان
وديل ضيوفنا لازم نكرمن للطيش
بالعرقي وكمان ممكن نوديهم محل ما عاوزين عشان انبسطو
معليش انا اتلخمت
أنا نسيت الفلل الرئاسية
يعني الواحد ممكن يتمغي علي كيفو معاهو كم جزمة وكمان محروس بالنيشان
دا كده الكرم ولا بلاش
وياقرض نحن عاوزين نقود العالم أجمع
عشان كده نضحي حتي بالمشروع العملناه زمان دااااااااااااااااااااااااااااااااااااااااك
اسمو شنو يا اااااااااااااااااااااااااااااا
الله اقطع الشيخ الدخل الوزةفي...............نا و........ز الشعب السوداني الفضل

أيوه أتذكرت المشروع الحضاري والدولة الرسالية خلاص خليناهم
أها مبسوطين

[عصمت العالم]

يا صيدله...

الصرف الصرف على حساب اخر دولار..3 مليار دولار..وعقد فلل القريه الرئاسيه مع الشركه العالميه وطواقم الامن المستورده لفترة 5 سنوات..وتنخيل السمسره فى الانشاء..وتخيل من الذين سيسكنون بعد ان انفض العرس الافريقى هناك فى القريه الرئاسيه....
والشعب الفقير يعانى من الايدز والامراض وتدنى احوال المعيشه والصحه..والامن والتعليم والانهيار....
ونحن ما بين احتفلات سيدة السودان الاولى..وسقوط مقعد الرئاسه الافريقيه..والصرف التفاخرى فى فساد الافساد..

تقول لى شريعه اسلاميه...وهى لله..؟؟ لا بالله..حبيبى .يا حريف...!!

عميق الود

[محمد ابراهيم قرض]

عصمت العالم:

الصرف الصرف على حساب اخر دولار..3 مليار دولار..وعقد فلل القريه الرئاسيه مع الشركه العالميه وطواقم الامن المستورده لفترة 5 سنوات..وتنخيل السمسره فى الانشاء..وتخيل من الذين سيسكنون بعد ان انفض العرس الافريقى هناك فى القريه الرئاسيه....
والشعب الفقير يعانى من الايدز والامراض وتدنى احوال المعيشه والصحه..والامن والتعليم والانهيار....
ونحن ما بين احتفلات سيدة السودان الاولى..وسقوط مقعد الرئاسه الافريقيه..والصرف التفاخرى فى فساد الافساد..

تقول لى شريعه اسلاميه...وهى لله..؟؟ لا بالله..حبيبى .يا حريف...!!

عصمت يا عالم ..
3 مليارات تفوت و لا زعيم واحد أفريقي يموت ...
و نحن في مرحلة ننفق مما نلسع ...
و خلينا في الفنجرة و الفشخرة و البوبار ..
محمد أحمد ملحوق !!!