امي عيدك .. وانتي مافي ...

[علاء الدين علوب]

من دون الناس أنا يا يمة ..
محزون بهديكي تهاني العيد ..
في عيد الأم والناس أفراح ..
بي حضن الأم والشوق والريد ..
مفتقدك يمة وحاسي بخوف ..
ودموع ولهانة ونار في الجوف ..
واشواق بتسيل جواي وتقيد ...

تلاتة سنين يوم رحتي بعيد
مـُـتجنـِّن فيهن وباقي وحيد
واليوم بتفوح في عيد الأم
ازهار البهجة رياحين عيد

في عيون أُمات الفرحانين
علي هامش ظل المشتاقين
والمرتاحين في حضن الأم
بتسوّل نظرة أم بحنان
او كلمة حب وسلام وأمان
لو قالت أم – يا وليدي تعال
تلتفت الروح والعين والبال ..

وارجع بالذكرى سنين خاليات ؟..
وانا داخل ليك بالحب آيات ..
يوم عيدك اركع ابوس قدميك
من وين اهديكي .. سوى الدمعات ..
دمعات عرفان وحنين ماطرات ..

من وين اهديكي كنوز الكون ؟
قدامك كلها تبقى قتات
او تبقى رفات ..

مافي فـ قامتك حاجة تليق ..؟
غير اركع عندك وابقى ( رقيق)
من وين اوفيكي ليالي الهم ؟
شان اكبر .. ونورك ضاوي طريق
من وين اوفيكي زفير الآآآآهـ
من صدرك طالعة غيوم وبريق
والغربة تشيل اولادك خلسة ..؟
ويبقى الشوق في عنيكي حريق ..

من دون الناس الليلة .. وعيدك ..
عاجز يمة وباكي وليدك ..
حاير وسط الليل والغربة
مادد إيدو ... بس وين إيدك ..

لاني بطولك ..
لا ياريت بتجيبني سهولِك ؟؟
لا احضانك ..
لا ريحانك ..
بس نور ( قبرِك )
وطايف حولك ؟..

وانا يا يمة
جناك العايش بعدك غـُمّة
وفاقد طعم العيشة بدونك
وراجي ببابك يوم ( اللـمّة ) ؟؟
وطالب منك يُمة ..سماحِك ..

وانا بهديك في عيدك يمة
دعوات زول
مجروح
مهزوم ..
وبعيش الوحدة
حنين مكتوم ..

مخنوق بالعبرة
مجافي النوم ..
مشروق بالشهقة
وزول محروم ..

دي الدنيا معاك
يوم نفسِك فينا
كانت طيبة
علينا حنينة ..

نرحل ونرجع لي تحنانك
نلقى جمال عينيك
راجينا ..

ما بنشيل لي الدنيا هموماً
طول ما شمسك
هالة علينا


غبتي وغاب
الفرح الباذخ
وساب دنيانا الباقية حزينة
والأيام من بعدك حايرة
يا نبكِّـيها
يا تبكِّـينا ...

وكل سنة
وأمات العالم
مبسوطين
في عيد الأم
بهديهن وردة
حب وحنين

[سمراء]

العزيز علاء الدين علوب

قرأت القصيده اكثر من مرة
ولم استطع كتابة حرف بعدها
حقيقه انفطر قلبى لما سطرته للام
وهى التى تعجز كل الاقلام عن تسطير حرف واحد لها
ربنا يرحمها ويجعل الجنة مثواها
ويلهمك الصبر على فراقها

[عبده سعد]

ياما نزيف الوجع الجوة بحبس الغصة ويمنعا تطلع.
ومع الآهات بتكب دمعات وتسوى خدودك زى المشرع.
ساربة ونازلة تسيل وتجف بتبكى حنان الأم الودًع .
ومرات نبكى بكانا الجوة ومين لألمنا يتكرم يسمع .
وتلاقى همومك والوجعات تفوت ليك ترجع.
بدور من ربى الرحمة تجيك وتبق كتير مراقدك أوسع.
ويرحمك الله بالرحمة العندو انتى الأصل وانتى المنبع.