منوعات الاغاني السودانية [الأرشيف] - سودانيات .. تواصل ومحبة

فيصل سعد

05-03-2006, 11:07 AM

أيام صفانا
محمد بشير عتيق

أذكري أيام صفانا
و إذكري عهد اللقاء
و الليالي الفي حبور

إذكري ايام صفانا
و الليالي الفيها
متبادلين و فانا
اصطفينا ظروفنا
و الحظ اصطفانا
جينا بي كل إقتراح
بي حديث يشفي الجراح
بمغازلة و انشراح
و القمر بي ضياهو آلق
و النسيم يهدينا
أنفاس الزهور

كنا داخل روضة
مافيش حد سوانا
غير أن القمري
يهتف بي هوانا
من أهازيج فنوا
يسمعنا اسطوانة
أما أرواحنا الخفاف
رافلة في أثواب عفاف
زي عرائس يوم زفاف
و النجوم بي عيون
تسالم في إشتياق
تنظرنا من خلف الستور

الرياض مبتهجه
داخل اقحوانا
و الزهور نديانه
تستقبل اوانه
زاهيه يانعه و رايعه
في توب أرجوانا
و النهر لينا إقترب
و الطيور تسجع طرب
عامله موسيقه قرب
إنحنا صار مجلسنا
عامر في طرب
في غبطه في
نشوه و حبور

يا أمير الحسن
يا سامي المكانه
من عواطفك
حبي لو فاقد مكانه
أهدي لي تفاحه
بس أو برتكانه
فهي غير شك مرضيه
بيها أقتبس الضياء
بل أذوق طعم الحياه
إنت ملهمني الاغاني
أنت مصدر فني
و أحساسي و شعوري

الطيب بشير

06-03-2006, 01:09 AM

و الله حلوة يا مسافة
و ملــعـــــــــوبــــــــة
ترى من يســـــــــمعنــــــا لها
؟؟
أنا شحدت الناس لمن استحيت :o

abdu abubakr abdalla

06-03-2006, 06:53 AM

و الله حلوة يا مسافة
و ملــعـــــــــوبــــــــة
ترى من يســـــــــمعنــــــا لها
؟؟
أنا شحدت الناس لمن استحيت :

الشفيف الطيب البشير : قصدك عمك تنقو ؟
تلاقيه بفتش فى الدولاب جاييك ما تستعجل!!
المسافة : قربت الخطاوى قريبا ملتقانا ونسمع ايام صفانا .
لك كوم فلاورز.

فيصل سعد

06-03-2006, 07:13 AM

مرحبا الطيب و عبدة و مبسوطين خالص بوجودكم هنا.
معكم نتمني ان نسمعها و مدد يا امينا العام مدد... قبل ما نخش في الاغنية الثانية...
يا شباب (دون تحديد جندري و عمري) البوست دا مفتوح للجميع بكل الاختيارات و الخيارات من اغنياتنا.

ارقدوا عافية.

عطر

06-03-2006, 11:43 AM

عيش معايا الحب

عيش معاي الحب عيش معاي حناني
خليني أنسى سنين عشتهم وحداني

إيه يضرك تسأل يوم علي يا غالي
وإنت وحدك عارف همي عارف حالي

كيف أواصل صبري في الطريق الخالي
كيف بدونك تصبح اليالي ليالي

أنا كنت دايما ً بصبر مهما البعاد أضناني
في قلبي إنت بتكبر تكبر معاك معاني

برجى الأيام وستنى أمالي بين نيراني
والهجر مهما يألم يرجع حنانك تاني

لو كان جفيتني خليتني وحدي برايا
مع ليلي الوحدة والشوق حنينو معايا

ما بسيبو غرامك رضيان معاك بشقايا
وقت الطريقك يوصل أعرف نهايتة خطايا

http://www.sudamix.com/vb/images/smilies/chat03.gif

الزوول

06-03-2006, 04:26 PM

السلام عليكم

http://sudaniyat.net/upload/uploading/asbabsafana.ra
بالنيابة عن عمك
إصلنا عمك ده
داخرنو لعوزة
تنفع؟؟؟

3mk-Tango

06-03-2006, 04:56 PM

ايام صفانا سمحة بالحيل ..

الا ايامنا اسة فيها شوية قولان ..

المسافة والطيب والزول .. معاكم بكون اليوك يوم صفانا ..

تسلم يا الزول .. ودا كود الحفظ ..
http://sudaniyat.net/upload/uploading/asbabsafana.ra

.

فيصل سعد

07-03-2006, 06:24 AM

مرحبا بكم 3mk-Tango - عطر و الزوول
و شكرا للمشاركات القيمة.

نـعـيـم الـدنـيــــا

كيف الحياه غير ليمك
من بعدك أصبح حظي
زي لون هضليمك
يا نعيم الدنيا

يا حليف الخدري
التايه في نعيمك
ما دام هاجرني
أرسل لي نسيمك
و أنعش لي روحي
بندى جسيمك
أو طيب المسك
الفايح من تبسيمك

يا أماني حياتي
البيك نور إقليمك
يتمنى التبري
يلمع كأديمك
مشتاقه الشمس
تظفر بي ليمك
تاخد من نورك
تلثم لي قديمك

يا فرع البانه
المايل في خميلك
من قامتوا حبيبي
متعلم ميلك
يا البدر التم
ما بتم تكميلك
لو ما تجعل لي
محبوبي زميلك

سيوف الهندي
من لحظة عينك
ليه بيها تصيبني
إيه بيني وبينك
غير كوني بريدك
و حياة خدينك
كف عني صدودك
يا روحي و دينك

ليك حق في صدودك
و تيهك و تذليلك
ليك حق تهجرني
و يكتر تعليلك
ما دام حسنك فردي
تمتاز بالعفه
المانعني أجيلك

مع صدك و هجرك
لا زلت أريدك
و منام عيني
بين حظوظ جيدك
تيه بي نعيمك
مولاي يزيدك
ضيعت حياتي
تسلم لي إيدك

abdu abubakr abdalla

07-03-2006, 08:27 AM

حمدي اب جقادو

07-03-2006, 08:54 AM

المسافه ياسيد التراتير العسجديه :D

يشهد الله ليك وحشه يامان

واااصل وكلنا نتابع يامبدع

لكن بيني وبينك لقيتك شفت (عايز تلم اكبر كميه من الاغاني مجان مش؟):D

Garcia

07-03-2006, 09:14 AM

الحــــــــب .. والظروف ..
كلمات: فضل الله محمد
غناء والحان : محمد الامين

قلنا ما ممكن تسافر
نحن حالفين بالمشاعر
لسه ما صدقنا انك بجلالك جيتنا زاير
السفر ملحوق ولازم انت تجبر بالخواطر
* * * * * *
الغريبة الساعة جنبك تبدو أقصر من دقيقة
والدقيقة وإنت ما في مرة ما بنقدر نطيقها
دنيا بقربك يفرهد كل طائر يحيا فوقها
وجنة من بعدك بيذبل كل مخضر فيها ناضر
* * * * * *
لو تسافر دون رضانا بنشقى نحن الدهر كله
ما بنضوق فى الدنيا متعة وكل زول غيرك نمله
أقل حاجة تخلي سفرك حتى لو إسبوع أقله
وإنت عارف نحن بعدك للصباح دايما نساهر
* * * * * *
لا لا ما بنقبل نسيبك تمشي للوحدة وتعاني
برضو ما بنقدر نقاوم شوقنا من بعدك ثواني
وما بنغنى وراك كلمة وما بنشوف البهجة تاني
غايتو لو شفقان علينا ما أظنك يوم تسافر

Ghada

07-03-2006, 10:49 AM

والله ابداع لكن مع الفنان ود الامين الله يطول في عمرة
وشكرا ليك اخ غارسيا
كل الود

Garcia

07-03-2006, 11:15 AM

العزيزة غادة ... تحايا عطرة وحمد الله بسلامتك .. ولك احدى درر هاشم صديق واداء ود الامين ....
وللمسافة الزول المسكون بالجمال وولعة باشعار هاشم صديق ...

هاشم صديق
كلام للحلوه

لما شُفتِك
ليلِى ضَّو وبَقَّ نور
ونرجس الجنه المفرهد
رفّ بى جِنحَات عطور
وغنَّى فارسِك
خَتَّ صورتِك فى الإطار
فى الليالى نَجِم يِلالى
ونسمه فى وهج النهار
وقال فى وَصفِك لما بنتى
أحلى مِنِّك . برضُه إنتِى
وما فى غيرِك زول معانا
حتى كان يا سمحه غِبتى
ومَرّه جَالَن الف خَاطِر
بى عيون عقلى المسَاهر
فجأه عينيكِ الحبيبه
!قالو سارح وين مِسَافِر؟
عِشتَ قولِن شيل وصَفقَه
وقُلت بس يا ريتنى القى
همسه فى حُلم الأميره
أو سَبَايب فى الضفيرة
أو عِقيد فى تِبرِ جيدها
أو قليب فى راحة ايدها
يا زمان أسمعنى واكتب:
البَرِيدها وريدها سِيدى
وريدِى سِيدَها
الزمان لوحتى بالغ
ما أظِن فى زول يعيدها.
يا حَلاتِك
مره همسه ..
ومره نَسمَهومره هَلّت نَجْمه غابت
ومره صَحْوَة غمزه نامت
ومره ضحكه تَرَضِّى شوقنا
ومره كلمه تضِّوى فوقنا
ولمّا نسرح فيكِ قَادلَه
زى ملايكه علينا نازله
بَس نغنى:
يا حلاتكُم يا أهَلنَا
يا مصابيحنا ونجومنا
الضّاويَه فى واحات زَمَنَّا

haneena

07-03-2006, 01:16 PM

المسافة
دي طوبتي..مع هذا الكلام الجميل و الغناء الأجمل
تجدنا متابعين حتي و إن كنا من وراء الكواليس..لكنا متابعون

سؤال بس لو ممكن..
من هو شاعر نعيم الدنيا؟

تحياتي

Garcia

07-03-2006, 01:43 PM

سؤال بس لو ممكن..
من هو شاعر نعيم الدنيا؟

سلام حنينة ...
اعتقد الاغنية من كلمات الشاعر عمر البنا ,
والحان كرومة ... واشتهر بها ابوداؤد ...
ومن بعده سميرة دنيا :D

الزوول

07-03-2006, 02:30 PM

السلام عليكم
عمك ...
تلحقنا وتنجدنا
الظاهر الحكاية وسعت أوي
غايتو دي ربيع الدنيا بصوت ابو داوود

http://sudaniyat.net/upload/uploading/rabee3aldonya.ra

والله يقدرنا على الباقي
تحياتي

3mk-Tango

07-03-2006, 05:57 PM

متابع انا يا الزوول اي عصلجات قول عوك تلقاني جنب يدك اليمين

فيصل سعد

08-03-2006, 07:06 AM

المسافة
دي طوبتي..مع هذا الكلام الجميل و الغناء الأجمل
تجدنا متابعين حتي و إن كنا من وراء الكواليس..لكنا متابعون

سؤال بس لو ممكن..
من هو شاعر نعيم الدنيا؟

تحياتي

حنينة ست الناس :

اولا عن اي كواليس تتحدثي يا اخت العرب؟
انت تتابعي و تبكي بس!!
بعدين .. نحنا وين لاقينك .. طوبتك و لا درابك نحن راضين بيهم.. :) :)
ثانيا نحن نعتمد اجابة جارسيا بخصوص شاعر الاغنية.
و اخيرا لك السلام و الود و المحبة و التقدير و الاحترام براك و لوحدك دون اي شركاء :D :D :D

فيصل سعد

08-03-2006, 07:20 AM

المسافه ياسيد التراتير العسجديه :D

يشهد الله ليك وحشه يامان

واااصل وكلنا نتابع يامبدع

لكن بيني وبينك لقيتك شفت (عايز تلم اكبر كميه من الاغاني مجان مش؟):D

عزيزي : جقجق/حمدي/طاهر/فرفور/ ود نورا عبد اللطيف
(اختار ما يعجبك حسب المزاج و الجو و الميقات)

كيفك يا جسم الدمار َََََ ََ ََ أأأي انت اقعد زوزي بي كدا و جيب لينا الهوى ََََ ََ ََ لامن الكورس يطير و تطير معاه عيشتك ََ ََ ََ تحياتي لك و لناس الكمبو فردا فردا و ان شاء الله تكون سحنت و غربلت شمارك بتاع صور وداع لندن بعد ما فلقت الناس و عملت ليهم تصديع يا مان باسئلتك المعكلتة و اللايوقة... قلت لي غناء مجاني ... يا مطرطش انت لسة معلق في الغناء بالقروش .. واطاتك اصبحت كان كدي :D :D ... ودعناك الله.

فيصل سعد

08-03-2006, 07:26 AM

الزوول & 3mk-Tango
Garcia & Ghada

مرحبا بكم و شكرا للمشاركات القيمة.

فيصل سعد

08-03-2006, 07:33 AM

حبيناك من قلوبنا
اسماعيل حسن

حبيناك من قلوبنا
واخترناك يا حلو
ماتبادلونا العواطف
ليه تدللو

حبينا فيك العفة
والدم الشربات
والله العيون خلتنا
في حيرة وآهات
وفي ابتسامتك شفنا
جنات وجنات
شوف العلينا واحكم
كان داير اثبات

كان الدلال من طبعك
وعاجبنا فيك غرور
ان جرت برضك عادل
ظلم الجميل مغفور
نهواك نهيم في ريدك
شايفين ألمنا سرور
نار الغرام يا هاجر
في قلوبنا توقد نور

أصلو الجحيم في غرامك
نرضاه عشان يرضيك
حتى المحال ان درت
بنطوعو ونهديك
ارواحنا حولك هايمه
حارساك دوام تحميك
بيك نورت أيامنا
والفرحة تمت بيك

فيصل سعد

09-03-2006, 07:56 AM

dayami

09-03-2006, 12:29 PM

http://www.anwarking.com/uploads/user_muarchive/bidoor_algal3a32K001.mp3

للتحميل (http://www.anwarking.com/uploads/user_muarchive/bidoor_algal3a32K001.mp3)

السيوف ألحاظك تشهرا
للفؤاد المن بدرى انهرا
اخفى ريدتك مرة و اجهرا
نار غرامك ربك يقهرا

****
يا بدور القعلة و جوهرا

****

صيدة غيرك مين الجسرا
تستلم افكارنا و تأثرا
حال محاسنك مين الفسرا
يالثريا الفوق اهل الثرى

****
يا بدور القعلة و جوهرا

*****

الصدير اعطافك فترا
النهيد باع فينا و اشترى
الشعر اقدامك سترا
رقيصيبو قلوبنا البعترا

****
يا بدور القعلة و جوهرا

*****
عالى صدرك لى خصرك برى
فيه جوز رمان جلى البرا
الخطيبة و ردفك منبرا

*****
يا بدور القعلة و جوهرا

*****
جلسة يا ابو الحاج اتذكرا
و رنة الصفارة اتفكرا
وهبة بى مزيقتو اتحكرا
كم طرب افكارنا و اسكرا

*****
يا بدور القلعة و جوهرا

*****

العيون النوركن بجهرا
غير جمالكن مين السهرا

****
يا بدور القعلة و جهورا

abdu abubakr abdalla

10-03-2006, 07:14 AM

الحبيب جدا : المسافة الشحادة بعد ابوداوؤد كفى !.

الزول : الزول الراقى ما خليت شىء تب , لكن ما شغل يا الزول!! خليك من هنا ورايح جنبنا بس ما تغيب . ؟![QUOTE]

haneena

10-03-2006, 03:58 PM

سلام لكل الفنانين الجميلين الهنا

و الله لدي شعر و أغنية جميلة بس نخلي الصفحة تقلب حتي لا يتلخبط علينا الغنا

شدوا حيلكم

أبو حازم

10-03-2006, 06:25 PM

انصاف
عبد الرحمن الريح

يا روحي أنصفني
في حكمك
لأنو قاسي علي
أنا يا حبيب ظلمك

تظلمني والأيام
قد تنصف الانسان
نشاهد المحبوب
عفوا عيان وبيان
بالنسبة للطفك
والرقة يا فتان
ما كنت تظلم من
قد أضحى بيك ولهان
تتركني للماضي
مع انه في الامكان
تجدد الذكرى
وتنسى كل الكان

هيامي بيك يا فاتن
مصدره الانصاف
انصفت حسنك حب
وانصفت حبي عفاف
ذوبت روحي معاني
دقيقة في الاوصاف
هومت نفسي خيال
في معبدك طواف
سكبت روحي على
كاس المحبة سلاف
هل بعد ذلك اكون
لسهام نواك اهداف

انا يا حبيبي غرامي
تركته للايام
تركت حب ودموع
تركت شوق وهيام
عودت نفسي
اذا ما اشتدت الالام
اصبر على الحرمان
واضحي بالاحلام
جنة هواي العذري
ندية كالانسام
تخلي نار الشوق
بردا علي وسلام

الأخ الرائع المسافة
الضيوف الكرام

بستانكم عامر والله ونشكركم على هذا الإبداع والتواصل الحميم
أسباب صفانا ، عيش معاي الحب ، نعيم الدنيا ، الحب والظروف ، كلام للحلوة
وحبيناك من قلوبنا وأخيراً إنصاف .. والله دي جلسة عامرة نرجو أن تجد التداخل من الجميع
الأخ المسافة:
سبق لي أن أشرت في بوست سابق لهذه الأغنية الخطيرة التي كتبها المبدع
عبد الرحمن الريح بمزاج رائق ومشاعر صادقة.. والله العظيم لم أجد أصدق منها في غنائنا
السوداني الجميل.. يا اخي حاول أتخيل معاي هذه الأبيات وبلاغتها..

هيامي بيك يا فاتن
مصدره الانصاف
انصفت حسنك حب
وانصفت حبي عفاف
ذوبت روحي معاني
دقيقة في الاوصاف
هومت نفسي خيال
في معبدك طواف
سكبت روحي على
كاس المحبة سلاف
هل بعد ذلك اكون
لسهام نواك اهداف

شوف بالله هذه الجنون : هوّمت نفسي خيال في معبدك طواف
جعل من ذكراها معبد ومن تخيلها طواف
والله شعراء الحقيبة ديل ما لقوا حد ينصفهم.. ربنا يغفر ليهم جميعاً
حقيقة بتحسر لما الناس تمر مرور الكرام على مثل هذا الكلام وتعتبره غناء وفقط
ولا تنظر إليه كأدب ، بعيداً عن تصنيفه كغناء أم غيره..
ولا أنسى أن أشيد بهذا البوست الرائع وأشكر جميع المشاركين فيه
وإلى مزيد من الجمال والروعة
دمتم سدنة للإبداع والجمال
ودامت أياكم أفراحاً

Garcia

10-03-2006, 08:13 PM

* الى الاخ ديامى الذى انزل تلك القصيدة (بدور القلعه)... نهديه ما كتب عنها بالراكوبة :

حى القلعه الشهير فى ام درمان
وتغزل فيه ..الام درمانيون ..زمنا طويلا ..اغنيات ما
زالت باقيه ..يترنم بها جيل اليوم ..مثلما تغنوا
لحى الاسبتاليه والمسالمه والمورده وابوروف وبيت المال
تخليدا لسكان هذه الاحياء ..البشوشين الطيبين ..ايضا
تغنوا لبدور القلعه وجوهره

العيون النوركن بجهره
يا بدور القلعه وجوهره

وهى من كلمات والحان الشاعر صالح عبد السيد ..ابوصلاح
كتبها فى حى القلعه الذى يقع وسط ام درمان
القديمه ..ست الاسم ..التى يحدها من الشمال فريق
ودنوباوى ..وتحديدا مسجد الشيخ قريب الـلـه ..الطيار
وغربا حى الركابيه وجنوبا حى السيد المكى ..وشرقا
وددرو ..ومنها يقودك الطريق اذا رغبت الى سوق الشجره
ثم ابوروف حيث المعديه والمشرع ..وعبور النيل الى
شمبات فى ايام الجمع والزيارات الاسريه والترفيهيه
والشاعر ابو صلاح كتب اغنيه بدور القلعه فى احدى
المناسبات بهذا الحى العريق ..حيث ان حفلات الزواج
فى تلك الايام ..كانت الفتيات فيها يجلسن على
السباته ..البساط ..وليس على الكراسى على ايامنا هذه
..فى اتجاه معاكس للفنان والضيوف
وكان فنان الحفل فى تلك الليله هو فنان الحقيبه
المعروف والمشهور كرومه ..وكان الشاعر ابوصلاح من
بين حضور الحفل ..وكان كداب الشعراء فى مثل تلك
المناسبه ..ان يقف منزويا فى ركن قصى حتى تتاح له
فرصة مراقبة الحفل ومشاهدة الحسان وحتى يتمكن من
وصف ما يشاهده ويعكس ذلك عبر قصيده تكتب فى اجمل
حسان الحفل

وبينما الفنان كرومه يقدم فاصله الغنائى
فى الحفل قال العريس لاحدى الحسناوات ان
الشاعر ابو صلاح موجود فى الحفل ..ولربما
كانت محظوظه فيكتب قصيده يصف فيها جمالها
..اشار لها العريس فى اتجاه الشاعر ابوصلاح
ويبدو ان الحسناء لم يعجبها ..حال ..شاعرنا
ابو صلاح اى الشكل العام للشاعر ابو صلاح
..قصيده على عكس ايامنا هذه حيث صارت رغبات
الحسان اليوم ما تعبر عنه اغنية البنات التى
تقول ..بالضراء يا ابوشرى ..بالضراء ان شاء الله
راجل مرا
علم الشاعر ابو صلاح من العريس ان الحسناء لم
يعجبها ..شكله ..وعلى وجه الخصوص شكل عينيه
وكان الشاعر ابو صلاح لها بالمرصاد ..فاخذ
يخاطبها فى صمت ..وشرع على الفور فى كتابة قصيدته
:الشهيرة
العيون النوركن بجهره
غير جمالكن مين السهره
يا بدور القلعه وجوهره
السيوف الحاظك تشهره

حى القلعه مثله مثل باقى احياء ام درمان ..يمتاز
بالصفاء والعلاقات الاسريه المتميزه ..وهو مثل
حى العرب ..تقوم فى داخله احياء صغيره مثل
فريق الشفايعه ..وفريق الشيخ الجعلى ..وفريق
المقابيل والفتحاب ..ولهذا الحى ايضا نكهه مميزه
..فهو قد ضم الفنان المشهور الحاج محمد احمد
سرور ..
------------------------------------------------
* اضافة لما جا فى المقال فقد عاش فى ذلك الحى كبار
الشخصيات المعروفة مثل : القارئ عوض عمر الامام
توفيق صالح جبريل , عثمان الديم , آل الشيخ الجعلى
د. عبدالملك الجعلى , د. بخارى الجعلى , محمد عبدالله ( مازدا )
, عثمان خالد .... وقد ضم ذلك الحى ايضا اسر
كبيرة مثل : اسرة محمد سعيد الاسد ( الذى استشهد فى احداث
ودنوباوى 29 مارس 1970 ) ...
اسرة المقابيل , آل شداد , آل با سعيد , آل التنى , آل صباحى
آل الشفيع ( الذين قدموا للوطن عدد كبير جدا من الاطباء و
الطبيبات - حفظهم الله ) والقائمة تطول ........
* وكثيرة هى الاغانى التى كتبت فى ذلك الحى مثل :
ما بنمشى لى ناس ما بجونا فى القلعة رجعوا اعذبونا ..

Garcia*

wadosman

10-03-2006, 08:37 PM

سلاااااام للجميع هنااا
تسجيل حضوووور فى هذا البوست الرائع
الذى حقا يستحق المتااابعة...
و نحن فى انتظااار المزيد من الروائع

فيصل سعد

11-03-2006, 08:51 AM

جارسيا َ حنينة َ ديامي َ ابو حازم و ود عثمان
حبابكم الف.

بعض الرحيق
محمد المكي إبراهيم

الله يا خلاسيه
يا حانةٌ مفروشةٌ بالرمل
يا مكحولة العينين
يا مجدولة من شعر أغنية
يا وردة باللون مسقيّه
بعض الرحيق أنا
والبرتقالة أنت
يا مملوءة الساقين
أطفالا خلاسيين
يا بعض زنجيّه
يا بعض عربيّه
وبعض أقوالى أمام الله

من اشتَرَاكِ
اشترى فوح القرنفل
من أنفاس أمسيه
أو السواحل
من خصر الجزيرة
أو خصر الجزيرة
من موج المحيط
وأحضان الصباحيّه
من اشتراك اشترى
للجرح غمداً
وللأحزان مرثيه
من اشتراك اشترى
منى ومنك
تواريخ البكاء
وأجيال العبوديه
من اشتراك
اشترانى يا خلاسيه
فهل أنا بائع وجهى
وأقوالى أمام الله

فليسألوا عنك
أفواف النخيل رأت
رملاً كرملك
مغسولاً ومسقياً
وليسألوا عنك
أحضان الخليج متى
ببعض حسنك
أغرى الحلم حوريه
وليسألوا عنك
أفواج الغزاة رأت
نطحاً كنطحك
والأيام مهديه

ليسألوا
فستروى كلُ قمريه
شيئاً من الشعر
عن نهديك في الأسحار
وليسألوا
فيقول السيفُ والأسفار
يا برتقالة
قالوا يشربونك
حتى لا يعود بأحشاء
الدفاق رحيق
ويهتكون الحمى
حتى تقوم لأنواع
الفواحش سوق
والآن راجوا
فظلّ الدن والإبريق
ظلت دواليك تعطى
والكؤوس تدار

هزّى إليك بجذع النبع
واغتسلى
من حزن ماضيك
في الرؤيا وفي الإصرار
هزّى اليك
فأبراج القلاع تفيق
النحل طاف المراعى
وأهداك السلام الرحيق
الشرق الأحمر
والنعمى عليك إزار
نجرى ويمشون للخلف
حتى نكمل المشوار

طاف الكرى
بعيون العاشقيك
فعادوا منك بالأحلام
ما للعراجين تطْواح
وليس لأطيار الخليج بغام
النبعُ أغفى
وكلّ الكائنات نيام
إلا أنا
والشّذى
ورماح الحارسيك قيام
متى تجاوزتهم
وثباً إليك أجئ
شعرى بليل
وحُضنى بالورود ملئ
فلتتركى الباب مفتوحا
وحظى في الفراش دفئ
ولتلبسى لى غلالات الشذى
وغناء النبع والأشجار
فلى حديث طويل
مع نهديك في الأسحار
يا برتقاله
ساعات اللقاء قصار
تأملينى في الصباح أطلْ
البحر ساجٍ
وتحفافُ النخيل غزل
وبركة القصر بالنيلوفر ازدحمت
والنحل أشبع كاسات الزهور قبل
واننى الآن أزهى ما أكون
وأصبى من صباى
ومكسياً من النور الجديد إزار
تأملينى فإن الجزر أوشك
إنى ذاهب
ومع المدّ الجديد سآتى
هل عرفتينى؟
في الريح والموج
في النوء القوى
وفي موتى وبعثى سأتى
فقولى قد عرفتينى
وقد نقشت تقاطيعى وتكوينى
في الصخر والرمل ما بين النراجين
وإنى صرت في لوح الهوى تذكار

dayami

11-03-2006, 07:21 PM

تسلم اخوي غارسيا على الاضافات القيمة وتذكيرنا بامدرمان وحواريها ومبدعيها

ونهديك اغنية بخاف لابوعركي

بـخــــــــــــــــــاف

أخاف أسال عليك الناس

وسر الريده بينا يذيع

اخاف أكثر كمان ياغالي

من إيديّ إنت تضيع

وأعيش بعدك حياتي جفاف

مواسم ريده مافي ربيع

************************

بخاف يا إنت لوجيتك

ألملم في خطاوي الشوق

وأزور بيتك

يقولو عليّ حبيتك

بخاف لوبرضي غبت عليك

تقول نسيت وجافيتك

بَهـِم لو صدفه لاقيتك

درب حِـِلـِّتنا جابك يوم

تشيل ياروحي ترمي اللوم

عليّ وتزيد همومي هموم

تقال جافيك وأنا نسيتك ؟؟؟

*********************************
يأريت تعرف

حنيني إليك ياريتك

كمان تعرف

لحدة وين بعزك

وفي أعماقي حسيتك

ياريت إنت تعرف

وبس خايف إذا جيتك

حكاية الريده تمشي تذيع

ومن إيديَّ إنت تضيع

وأعيش بعدك حياتي جفاف

موسم ريده مافي ربيع

Garcia

11-03-2006, 07:30 PM

تسلم يا ديامى للاهداء الراقى للمبدع ابوعركى البخيت ..
والذى نسيت ان اشير انه سكن فترة طويلة بالحى ...
اضافة للفنان محمود على الحاج وحسين ابوعرب ..
وكتبت مرة فى بوست لخالد تفقو هذا الموقف :

موقف لن ينسى يا تنقو : اذكر حين كنا فى المرحلة الابتدائية قمنا بتكوين فريق بالحى ..
وواجهتنا مشكلة الفنايل فقمنا بحملة تبرعات .. لكنها لم تكن كافية لشراء الفنايل ...
فاقترح احدنا ان نكتب خطاب بلغة جميلة وان نعطيه للفنان ابوعركى البخيت ...
- كان فى ذلك الوقت يسكن فى حينا وتحديدا فى الشارع المتفرع من شارع الوادى ..
ويدخلك لمسجد الشيخ قريب الله - المهم اوكلوا لى المهمة ومعى واحد اخر لشقاوتنا ..
فى ذلك الوقت ومواجهتنا لها بجراة ... دقينا الباب واعطينا الخطاب للاستاذ ابوعركى ..
وبعد ان قراه قال لينا انتو محتاجين شنو تحديدا للفريق دة .. نطيت انا طوالى وقلت ليهو :
محتاجين فنايل ... وبعدها بيومين احضر لنا فنايل ففرحتنا بها لا تعادلها فرحة فى ذلك الوقت ..
فتحية من هنا للاستاذ الفنان والانسان ابوعركى البخيت وكل اسرته الكريمة .....

ولك كل التحية يا ديامى ...

dayami

11-03-2006, 07:32 PM

وما دام الصفحه قلبت هاك الاغنيه زاتها

http://www.alrakoba.net/ss/abo3raky/bkhaf.rm

فيصل سعد

11-03-2006, 10:15 PM

مرحبا ياشوق
الجيلي عبد المنعم

لم يكن
إلا لقاء وافترقنا
كالفراشات
على نار الهوى
جئنا إليها واحترقنا
كان طيفا
وخيالا ورؤى
ثم ودعنا الأماني
وأفقنا

بالذي اودع
في عينيك
إلهاما وسحرا
والذي ابدع
فيك الحسن
اشراقا وطهرا
لا تدعني للأسى
يدفعنى مدا وجزرا
أثقلت كفي الضراعات
وما تقبل عذرا

يا حبيبا بت أشكو
حرقة الوجد اليه
وتوسلت
نذرت العمر
قربانا لديه
ماله لو عاد
فالقلب رهين بيديه
وعيوني ظامئات
للهوى من مقلتيه

يالقلبي
عاد من بعد النوى
يطوي شراعا
آه بالهوى
يبعث في الروح
حنينا واندفاع
مرحبا يا شوق
اغمرني
شجونا والتياع
فوداعا فوداعا
فوداعا فوداعا
للذي شيدته
بين ضلوعي
فتداعى
فوداعا
فوداعا

فيصل سعد

11-03-2006, 10:22 PM

آسيا وأفريقا
تاج السر الحسن

عندما أعزف يا قلبي
الأناشيد القديمةْ
ويطل الفجرُ في قلبي
على أجنحِ غيمةْ
سأغني آخر المقطع
للأرض الحميمةْ
للظلال الزُرق
في غابات كينيا والملايو
لرفاقي في البلاد الآسيويةْ
للملايو ولباندوق الفتيةْ
لليالي الفرحِ الخضراء
في الصين الجديدةْ
والتي أعزفُ في قلبي
لها ألف قصيدةْ

يا صحابي صانعي
المجد لشعبي
يا شموعاً ضؤها
الأخضر قلبي
يا صحابي فأنا
ما زرت يوماً أندونيسيا
أرض سوكارنو
ولا شاهدتُ روسيا
غير أني والسنا في
أرض أفريقيا الجديدةْ
والدجى يشرب من ضوء
النجيمات البعيدةْ
قد رأيت الناس في الملايو
مثلما شاهدت جومو
ولقد شاهدت جومو
مثلما إمتد كضوء
الفجر يومُ

مصر يا أخت
بلادي يا شقيقةْ
يا رياضاً عذبة
النبع وريقة
يا حقيقة
مصر يا أم جمال
أم صابرْ
ملء روحي
أنت يا أخت بلادي
سوف نجتث
من الوادي الأعادي
فلقد مدّت لنا
الأيدي الصديقة
وجه غاندي
وصدى الهند العميقةْ
صوت طاغور المغني
بجناحين من الشعر
على روضةِ فنِّ

يا دمشق كلنا
في الفجر والآمال شرق
أنتِ يا غابات كينيا يا أزاهرْ
يا نجوماً سمقت مثل المنائرْ
يا جزائرْ
ها هنا يختلط القوس الموشّى
من كلِّ دارٍ كل ممشى
نتلاقى كالرياح الآسويةْ
للملايو ولباندونق الفتيةْ

abdu abubakr abdalla

11-03-2006, 11:20 PM

يا صاحب مشاعره الجندول .
القصة طالت واحلوت فتماديت وامددتنا بروح جميل كل الجمال فمدد يا المسافة مدد !.
يديك العافية .

فيصل سعد

12-03-2006, 09:30 AM

يا صاحب مشاعره الجندول .
القصة طالت واحلوت فتماديت وامددتنا بروح جميل كل الجمال فمدد يا المسافة مدد !.
يديك العافية .

شكرا يا abdu abubakr abdalla على المشاركة و الاطراء و خليك متابع.

مريه
صلاح أحمد ابراهيم

ليت لي ازْميل(فدياس)
وروحاً عبقرية
وأمامى تل ُ مرمر
لنحت الفتنة الهوجاء
في نفس مقاييسك
تمثالاً مُكبر
وجعلت الشعر كالشلال
بعضُُ يلزم الكتف
وبعض يتبعثر
وعلى الأهداب ليلاً لا يُفسر
وعلى الخدين نوراً يتكسر
وعلى الأسنان سُكر

وفماً كالأسد الجوعان زمجر
يرسل الهمس به لحنا معطر
وينادى شفة عطشى
وأخرى تتحسر
وعلى الصدر نوافير
جحيم تتفجر
وحزاماً في مضيقٍ
كلما قلتُ قصيرُُ هو
كان الخصر أصغر

يا مريه
ليت لي إزميل فدياس
وروحاً عبقرية
كنت أبدعتك يا ربة حسنى بيديَّ
يا مريه
ليتني في قمَّةِ الأولمب جالس
وحواليَّ العرائيس
وأنا في ذُروة الإلهام بين المُلهماتْ
أحتسي خمرةَ باخُوس النقيَّة
فإذا ما سرتْ النّشْوةُ فيَّ
أتداعى ، وأُنادى : يا بنات
نقٍّّروا القيثار في رفقٍ
وهاتوا الأغنياتْ
لمريه

يا مريه
ما لعشرينين باتت
في سعير تتقلب
ترتدى ثوب عزوف
وهي في الخفية ترغب
وبصدرينا (بروميثيوس)
في الصخرة مشدوداً يعذب
فبجسم الف نار
وبجسم الف عقرب
أنتِ يا هيلينُ
يا من عبرت تلقاءها
بحر عروقي ألفُ مركبْ
يا عيوناً كالينابيعِ صفاءْ ونداوة
وشفاهاً كالعناقيدِ امتلاءْ وحلاوة
وخُدوداً مثل أحلامي ضِياءْ وجمالا
وقواماً يتثنّى كبرياءْ واخْتيِالا
ودَماً ضجَّتْ به كلُّ الشرايينِ
اشتهاءْ يا صبيَّة
تَصْطلي منهُ صباحاً ومساءْ غجريَّة

يا مريّه
أنا من إفريقيا صحرائها الكبرى
وخطِّ الإستواءْ
شحنتْني بالحراراتِ الشُموسْ
وشوتني كالقرابينِ على نارِ المجُوسْ
لفحتني فأنا منها كعودِ الأبنوسْ
و أنا منْجمُ كبْريت سريعِ الإشتعالْ
يتلظَّى كلًّما اشتمّ على بُعدٍ تعالى

يا مريه
أنا من إفريقيا جوْعانُ كالطِّفلِ الصَّغيرْ
و أنا أهْفو إلى تُفاحة حمراء
من يقربها يصبح مذنب
فهلُمي ودعي الآلهةَ الحمقاءَ تغضبْ
وانْبئيها أنها لم تحترم رغبة نفسٍ بشرية
أيُّ فردوسٍ بغيرِ الحبِّ كالصَّحراءِ مُجدبْ
يا مريه
وغداً تنفخُ في أشرِعتي أنفاسُ فُرْقة
و أنا أزدادُ نأياً مثْل (يوليس)
وفي الأعماق حرقة
رُبما لا نلتقي ثانيةً
يا مريه
فتعالى وقّعي أسمك بالنار هُنا في شفتي
ووداعاً يا مريه

فيصل سعد

12-03-2006, 10:48 PM

ماهو عارف
خليل فرح

ماهو عارف
قدمه المفارق
يا محط
آمالي السلام

في سموم الصيف
لاح له بارق
لم يزل يرتاد المشارق
كان مع الأحباب
نجمه شارق
ماله والأفلاك
في الظلام

يا دهر أهوالك تسارق
منها كم كم شابت مفارق
ما علينا الفات كله فارق
رقنا ولا نعيد الملام

من حطامك أنا غصني وارق
في شن أبقيت للطوارق
غير قليبا في همومه غارق
ولسانا برده الكلام

ويح قلبي الما انفك خافق
فارق ام درمان باكي شافق
يا أم قبايل ما فيك منافق
سقي أرضك صوب الغمام

يا بلادي كم فيك حاذق
غير الهك ما أم رازق
من شعاره دخول المأزق
يتفاني وشرفك تمام

مسرح الغزلان في الحدايق
والشوارع الغر والمضايق
قول لي كيف أمسيت دمت رايق
دام بهاك مشمول بالنظان

مجلس اللذات في النمارق
والترف لا زال وصفه خارق
ضاري حسك فاح جانا مارق
وله قاطعو الريح ما هو لام

في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الامام

أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام

أين مني الفي زهوه باسق
في شبابه نقي من مفاسق
بين ثيابه البيض المناسق
حولك اشبه رتل الحمام

يا بريد الجو فوقي حالق
ميل علي الروح ليها خالق
عدت سالم قول وأنت عالق
مقرن النيلين كيلو كام

الحبايب لفتوا الخلايق
بيني وبينهم قطعوا العلايق
ان دلال ان تيه كله لا يق
نحن ما مجينا الخصام

يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام

من فتيح للخور للمغالق
من علايل ابروف للمزالق
قدله يا مولاي خافي حالق
بالطريق الشاقه الترام

ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام

فيصل سعد

13-03-2006, 07:22 AM

:o :o :o
ربيع الحب
إدريس جماع

فى ربيع الحب كنا
نتساقى ونغنى
نتناجى ونناجى
الطير من غصن لغصن
ثم ضاع الأمس منى
وانطوى بالقلب حسرة

اننا طيفان فى حلم
سماوى سرينا
واعتصرنا نشوة العمر
ولكن ما ارتوينا
انه الحب فلا تسأل
ولا تعتب علينا
كانت الجنة مأوانا
فضاعت من يدينا
ثم ضاع الامس منى
وانطوى بالقلب حسرة

أطلقت روحى من
الأشجان ما كان سجينا
أنا ذوبت فؤادى
لك لحنا وأنينا
فارحم العود اذا
غنوا به لحنا حزينا
ثم ضاع الامس منى
وانطوى بالقلب حسرة

ليس لى غير إبتساماتك
من زاد وخمر
بسمة منك تشع النور
فى ظلمات دهرى
وتعيد الماء والأزهار
فى صحراء عمرى
ثم ضاع الامس منى
وانطوى بالقلب حسرة

فيصل سعد

13-03-2006, 07:37 AM

كسلا
توفيق صالح جبريل

نضر الله
وجه ذاك الساقي
انه بالرحيق
حل وثاقي
فترآى الجمال
مزدوج الإشراق
يسبي معدد الإفاق

وابنة القاش ان
سرى الطيف وهنا
اعتلى هائما فكيف لحاقي
كسلا أشرقت بها
شمس وجدي
فهي في الحق
جنة الإشراق
كان صبحا
طلق المحيا نديا
اذا حللنا
حديقة العشاق
نغم الساقيات
حرك أشجاني
وهاج الهوى
أنين السواقي
بين صب
في حبه متلاشي
وحبيب مسترق
في عناق
ظلت الغيد
والقوارير صرعى
والأباريق
بتن في إطراق
إئتني بالصبوح
يا بهجة الروح ترضى
إن كان في الكأس باق

فيصل سعد

15-03-2006, 07:13 AM

من غير ميعاد
التجاني سعيد

من غير ميعاد
واللقيا أجمل
في الحقيقة
بلا اتظار
صحّيتي
في نفسي الوجود
ورجّعتي
لعيوني النهار

كل الطيوب الحلوة
يا مولاتي والجيد الرقيق
واللفتة اللفتة
والخصل اللي نامت
فوق تسابيح الغريق
وخطاك والهدب المكحل
وفتنة التوب الأنيق
في لحظة مرت كالظلال
تعبر رؤاي إحساس عميق
فتحتي جرح الليل عزاء
من صمتي ما قادر أطيق

لو مرة بعدك
يا زمان الغربة
تجمعنا الصدف
أنا كيف اعود
من طيبة أول نظرة
للدار منكسف
وا ضيعة الوتر
اللي ما غنيت
معاه ولا عزف
من صدفة عابرة
بلا سلام
قلبي الغريق
في الهم نزف
ياريتني ما
شفتك ربيع
ولا كان
يلازمني الأسف

ضاع الكلام ماتت
حروف اللقيا
قبال اهمسا
والله ما غابت
محاسنك لحظة
لا الجرح اتنسى
للّيلة ما وشوش نسيم
في روضه
وما غرد مساء
للّيلة ما سافر عبير
في الطيب
يغازل نرجسة
للّيلة يا حبي الكبير
في حرقة لافيني الأسى
صحّيتي في نفسي الوجود
ورجّعتي لعيوني النهار

فيصل سعد

17-03-2006, 09:21 AM

سلام لكل الفنانين الجميلين الهنا

و الله لدي شعر و أغنية جميلة بس نخلي الصفحة تقلب حتي لا يتلخبط علينا الغنا

شدوا حيلكم

سلام يا حنينة .. اها الصفحة قلبت و ما سمعنا اغنيتك؟ :cool: :D :cool: :cool:

أرحل
التجاني سعيد

قلت أرحل ..
أسوق خطواتي
من زولاً نسى الإلفة
أهوم ليل
أساهر ليل
أتوه من مرفى لي مرفى
ابدل ريد بعد ريدك
عشان يمكن يكون اوفي
رحلت وجيت
في بعدك لقيت
كل الأرض منفى

عيونك زي سحاب الصيف
تجافي بلاد وتسقي بلاد
وزي فرحاً يشيل
مني الشقا ويزداد
وزي كلمات بتتأوّه
تتوه لمن يجي الميعاد
وزي عيدا غشاني وفات
و عاد عمّ البلد أعياد
وزي فرح البعيد العاد
وزي وطناً وكت اشتاقلو
برحل ليهو من غير زاد
بدون عينيك بصبح زول
بدون ذكرى وبدون ميلاد
رحلت وجيت
في بعدك لقيت
كل الأرض منفى

زمان الفرقة والتجريح
بسيبو عشان تشيلو الريح
بسيبو عشان صحيح الذكرى
بتّوِّه عمرنا صحيح
وانتِ معاي لا بندم
ولا بقضي العمر تبريح
أصلو العمر شوقا كان
و حزنا كان وصبرا كان
فسيح وفسيح
أصلو العمر كان
دربا مشيتو كسيح
وكان غرسا سقيتو بكاء
وقبضت الريح

عبد العظيم الطاهر

18-03-2006, 10:29 AM

هذه واحدة من أغاني ملك الاناشيد حسن خليفة العطبرواي والتي ظلت باقيةفي وجدان أهل عطبرة برغم قدمها
يرددونها ويطربون لها حتى اللحظة وهي لشاعر مجيد لا أذكر اسمه كان قد عشق فتاة مسيحية من أقباط مدينة عطبرة وبادلته حباً بحب وأرادت ان تعتنق الاسلام ديناً لا أدري عن قناعة أم لكي يقربها من هذا الحبيب ... ولكن وقف الاهل وبجانبهم جل إن لم يكن كل أقباط مدينة عطبرة ضد هذا الحب ... وقد أفلحوا ...

يا سلوة المحزون يا قيثارة القلب الجريح
يا شابة فاقت على الأتراب بالقد المليح
يا زهرة أنفاسها كالعطر عبق في الضريح
أهوى جمالك والشعور يزينه القول الصريح
قد هزني منك الجمال فجئت بالشعر الفصيح
ترفقي يا هذه فالناس من جسد وروح

*** *** ***
بحق بطرس يا فتاتي من شفى الرجل الكسيح
بماري جرجس والصليب بالكنيسة بالمسيح
بالقس بالمطران بالجرس المرن على السفوح
قداسة البابا المعمد وبالشموع وبالذبيح
أن ترحمي متعذبا يهواك في حب صريح
*** *** ***
متى يتم لقاؤنا في شاطئ النيل الفسيح
والنخل والصفصاف والقمر المطل على السطوح
بدت نجوم الفجر بالاضواء في الافق تلوح
أنين ساقية تدور وصوت مزمار يصيح
هناك ينبعث السرور على النفوس فتستريح
*** *** ***

عبد العظيم الطاهر

فيصل سعد

22-03-2006, 07:08 AM

عبد العظيم الطاهر
مرحبا بك نورت البوست
و شكرا للاضافة... و نشوفك تاني...ابقى طيب و قريب.

فيصل سعد

27-03-2006, 08:27 AM

الفي دلاله
سيد عبد العزيز

الفي دلاله ما أعظم جلاله
إستحل هلاكي ولي حرم هِلاله

الهلال الشغل الناس هِلاله
الظلام حين شاف محيه أنجلالهُ
نضرة خدوده وبالأنوار يلالو
راح أنفسنا وريحانة لخِلاله

المنعم توب العز كِِساله
مثال النعمة وماأعظم مِثاله
جداول ديسه في وردانه سالو
طيبه يعبق كل ما الليل أمساله

شالو فاله الناس يتمنوا حاله
مثاله الباسم وحتى الغيم سِحاله
ومن ضميري حب الغير محاه
نائم وخِلى الكان نائم صِحاله

المدلل ما أكرم خصاله
حسنه وافي ومافي لسان حصاله
عالي سماه بي بعيد وصاله
المحاسن في مراية جماله

رطب قوامه وخمر التيه أماله
يتلو قلبك عند قلت شماله
وتدعيله عليه يدوم كماله

فيصل سعد

28-03-2006, 09:48 AM

عيد الكواكب
محمد عوض الكريم القرشي

يا فني جود
و انصفني ديمه
يا لحني اشدو
شعرا قويما
تصور الاقمار
عرفت غناك
نزلت من السموات
تسمو حداك
و ازدانت الحفلة
و النور تجلى
يا الله زيد في الحب
و العفة ديمه

فلتسالوني عن
عيد الكواكب
الفيه نور الدنيا
صفاه ساكب
صوت المغني
اصف المواكب
دا الدهب المجمر
بجماله انضر
دا الفل يحكي
لونه ما احلى نونو
فشهدت استغراضا
كان عظيما
و سهرت والاقمار
لسواى ظليمة

الحقيقة حبي بعيد
و بعيد سماه
و ما ذنبي لو عازل
بالجور رماه
ليه التجني و انا
راقي فني
و حلو التثني
قد غاب عني
معروف هواى
و طاهرات نوايا
و الا لو اصررت
تكون اليمة
ساجفو و الاقمار
لي داني ريمها

فيصل سعد

31-03-2006, 08:37 AM

أول غرام
علي ميرغني

أول غرام
يا أجمل هدية
يا أنبل مودة
يا نور عيني

حبي ما هديته
وغيرك ما اصطفيته
واجمل من عيونك
في الكون ما رأيته

لونك أبهى لون
وكفاك العيون
آه للإبتسامة
كالنغم الحنون
نظراتك لهيب
وتثير الشجون
ليه قلبي سليته
وبالآم رميته
قول لي يا شرود
ايه ذنبي الجنيته

نسيت ضو القمر
في أجمل ليالي
وشعاع النجوم
يبهر كاللآلي
كيف تنسى النسايم
وانا حبي المثالي
قول لي كيف نسيته
مع إنك رويته
جورك يا ظلوم
لله اشتكيته

انا ما زلت هايم
اذكر طيف جمالك
اواصل الليل نهار
اسبح بخصالك
وماضي الذكرى عاد
يسجد لدلالك
تعال يا من هويته
وشوف حالي الأذيته
رفقا بدموعي
والحب البنيته

فيصل سعد

01-04-2006, 10:12 AM

لحن الحياة
محمد عوض الكريم القرشي

لحن الحياة منك
ماتقول نسينا الماضي
وصرنا ناسنك
محبوبي الجميل

سالوني مين انك عرفتهم
ايه الصفات عنك خبرتهم
شافو الجمال منك اقنعتهم
طولت لكنك انا يا حبيب الروح
اعفيني من ظنك محبوبي الجميل

سالمني بي ايدو والدمع انهمر
ذكرني بي ريدو اوقات السمر
ساحرني بي محيو جنني واسر
شاغلني بي نورو الكم اخجل قمر
بس تنسى كيفنك وانت الوحيد بالذات
الكنا ذاكرنك محبوبي الجميل

وفيما الملامة
يا حبيبي
وكلي هيـاما
ويامن تساما
سلاماً .. سلاماً
ياروحي
وذكري محبي
تموج بقلبي
وانت بقربي
حياتي وحبي
يا حبيبي
أهنأ وانت بعيد ؟
ماكنا ناسنك
والحب عليك ازداد
غمر النفوس دنك
محبوبي الجميل

فيصل سعد

04-04-2006, 10:38 PM

هــل تــدرى يــا نــعــســان
مـــحـــمـــد بـــشـــيـــر عـــتـــيـــق

هـل تـدرى يـا نـعـسـان
أنـا طـرفـى سـاهـر
جـسـمـى أضـمـحـل بـغـرامـك
وانـت زاهـر
هـل تـدرى يـا نـعـسـان

أنـا حـالـى ظـاهـر
عـاشـق نـبـيـل
يـاجـمـيـل
لـيـك حـبـى ظـاهـر
وشـاعـر مـجـيـد
لـغـنـاك فـنـان ومـاهـر
بـسـحـر جـمـالـك
وكـرم خـصـالـك
وعـشـان جـمـالـك
أهـوى الـقـمـر والـنـيـل
وأهـوى الأزاهـر

لـيـل ونـهـار
أنـا لـحـبـك بـهـاجـر
أخـذنـى نـورك
يـا سـاحـر الـمـحـاجـر
لا أخـشـى لـوم فـى هـواك
لا أخـشـى زاجـر
مـهـمـا الآقـى
مـن طـول فـراقـى
وفـرط أشـتـيـاقـى
حـافـظ عـهـودك
وحـيـاة خـدودك
يـالـلـى هـاجـر

حـسـنـك بـديـع يـا وديـع
فـى عـصـره نـادر
حـكـم صـفـاك
مـولاى ذو حـكـمـه قـادر
مـكـتـوب هـواك
لـى ضـنـاى
يـا حـبـيـبـى صـادر
مـاكـر شـفـاى
وأراك عـلـى طـبـى قـادر
وانـا بـرضـه امـل
تـعـطـف تـجـامـل
بـمـس الأنـامـل
تـشـفـى الـجـروح والـروح
ولـى لـقـاى تـبـادر
تـشـفـى الـجـروح والـروح

فيصل سعد

05-04-2006, 07:22 AM

الزيارة
عبيد عبد الرحمن

أفكاري حيارى
تاهت بإختيارا
حبيبي آه قلبي تاه
في يوم الزيارة

الدنيا وعمارا الجنة ونعيما
بزهورا وثمارا
فصود في خدود يضون
وخدود بدون أمارة
يرسلوا نور ملون
أحمر أخضر أصفر
فاتن يا سمارا

التفت وأهداني نظرة
تزري بالزهر اذدهارا
مثلت فيها البراعة
وخفة الروح والمهارة
الشغل عقلي بفنه
نظرة مني ونظرة منه
وارتفعت الحرارة
والتهبت العواطف
وأصل النار شرارة

ماهو عارف البي
لأنه لسه نونو
حوله ناس بالعيد يهنوا
ناس متابعنه ويهنو
وأنا روحي ليه تهوم
داعيها حادي الشوق
هايمة بليلها ونهارها
وانت يا الناعسات عيونك
الله لعيوني السهارى

فيصل سعد

07-04-2006, 07:16 AM

احرموني
ود الرضي

احرموني
ولا تحرموني
سنة الاسلام السلام

عطفكم يا من الموني
كالاشعة الاسهم رموني
الشجون بالليل نادموني
الانين والنوح علموني
لو معنعن قول كلموني
حبي طاهر لم تظلموني
برضي قابل الظلم احترام

يا النفوني كفى اعرفوني
ساهي ساهر ساحات جفوني
في هواكم يا من جفوني
لا الوم ان لم تنصفوني
انعكاس الاحوال كفوني
ايضا الايام عرفوني
يوم سموما ويوما غمام

كلما النسمات عطروني
فاجأوني دموع مطروني
رب اغفر للعكروني
في وداعة الباري العروني
رب وقت يتذكروني
او يقول القايل دروني
او يحدث عقلي المنام

طاف خيالك والليل كافر
شفت بدرو المتجلي سافر
صك غاضب لقى دمعي دافر
قاللي جملة وعقد الاظافر
قاللي طبع الريم اصلو نافر
قتلو عل تريم النوافر
وعل راء الريم تبقى لام

في التفكر اصبح وامسي
ايضا التذكار نجوى همسي
وحياتي اشبه بامسي
اشكو يومي واسترحم امسي
ما عهدتك يا ليل تمسي
انت وامتى اشراق شمسي
وانت وين يا بدر التمام

قتلو ليت الايام يندن
تبقى لانت وسحابا دندن
بلماك النيران يخمدن
ليك روحي واجزيك حمدا
قال لي كيف تستوجب لي حمدا
من تعاطى المكروه عمدا
غير شك يتعاطى الحرام

haneena

07-04-2006, 11:40 AM

http://sudaniyat.net/upload/uploading/anahali.imiri.rm

يا سلام عليك يا المسافة يا سلام
تأخرنا كثيرآ علي هذا البوست المميز

إقبلها مني...
أنا حالي

بصوت الراحل المقيم الذي ما زال يبكينا علي روعته و ضياع شبابه الغض

العــــمـــــيري

فيصل سعد

08-04-2006, 08:42 AM

اختنا و صديقتنا حنينة:
شكرا على الاغنية و مقبولة منك تب :D :D
بس اوعك تجي تقولي لي تب دي شنو شايفك متفسحة بهكذا اسئلة اليومين ديل :) :) :)
كثيف الود و المودة.
و ابقي طيبة و عافية مننا.

فيصل سعد

11-04-2006, 07:18 AM

هواك وهواى
الامـــــى

هواك وهواى بى جاروا
سبن أفكارى نظراتك
أحب تعطف تزيل وجدى
واحب كل البحب ذاتك

بحب لونك بحب لونك
بحب يا حبى نفحاتك
بحب فى خدك الزهرة
وبخاف ترمينى لمحاتك
أخاف صدك بخاف جورك
واحب تتهنى بحياتك

بحبك حبى للعافية
وكمان يا سيدى وحياتك
بحب فيك الحيا الفطرى
ويذوب من حالى صيحاتك
إذا فى حبكم ضعت
واذا أُقبر فى ساحاتك
أكون للحظ دوام شاكر
وأقبل أنت راحاتك

أحب أنظر جمال محياك
وأخاف تسحرنى بسماتك
وأخاف لحظك يجرحنى
واحب تسكرنى بسماتك
وأحب طيفك يأنسنى
واحب تسمعنى نغماتك
وأخاف هجرك يطول بى
و أخاف تحرمنى كلماتك

منعم يا فريد عصرك
سعيد وسعيدة ساعاتك
مكمل يا نزيه صافى
وعفافك فطرى مافاتك
وديع وبديع مثال رقة
حشيم والريم هوى صفاتك
أٍرت فؤادى يا ضامر
ودمعى خضاب فى كفاتك

زيد يا دمعى فى سيلك
وزيد يا صدرى زفراتك
حبيبك ودعك راحل
زيد يا طرفى عبراتك
حمام الأيك حن مرة
تعال أسمعنى نبراتك
طريت أم در مقر أملى
زماني كفاى عباراتك

haneena

11-04-2006, 08:46 AM

بس اوعك تجي تقولي لي تب دي شنو شايفك متفسحة بهكذا اسئلة اليومين ديل
:D :D :D
ضحتني يا المسافة

لكن بصراحة هكذا بإستعمالها الشامي دة بتجيب لي الكاروشة

و هنا أذكر مداخلة في سوادنيات الفاتت من أخونا أب جقادو..الله يطراهو بالخير الزول الغائب.. ما زالت تضحكني حتي الآن..

ليك القومة يا المسافة

ملحوظة
من الذي يؤدي أغنية هواي و هواك للأمي؟
ما قادرة أتذكر نهائي

فيصل سعد

13-04-2006, 06:33 AM

:D :D :D

ملحوظة
من الذي يؤدي أغنية هواي و هواك للأمي؟
ما قادرة أتذكر نهائي

سلامات حنينة:
انا غايتو سمعتها من فرفور و مبارك حسن بركات.

فيصل سعد

19-04-2006, 06:23 AM

بت ملوك النيل
سيد عبد العزيز

يا بت ملوك النيل
يا أخت البدور
مين لى علاك ينيل
فى البدو والحضور

الجبرة فيك بتخيل
محمية الحما
الما حام حداه دخيل
ما كان أبوك بخيل
بت عز الرجال
أهل الدروع والخيل
الهنا والسرور

يا السامية ست الجيل
طرفك من حياء
فى عصر السفور خجيل
حسنك وضع تسجيل
فى صحف الدهور
يتلوه جيل عن جيل
لى يوم النشور

الهيفاء يا الخنتيل
حروف آيات محاسنك
أرتلن ترتيل
يعجبنى فيك تمثيل
أخلاق الملاك
فى سطوة القتيل
الفارس الجسور

غضنك رطيب وعديل
شعرك ليل جبينك
يخجل القنديل
النور عليكى سديل
يا معنى الجمال
الما أتوجد له عديل
فى ناس ولا حور

فقتى الكانوا قبيل
ما خدات فى الجمال
جائزة نوبيل
حيرتى كل نبيل
عيناك سحرهن
يسحر سحر أبابيل
يخترق الصدور

يا صاحبة الأكليل
ما أظن النهار
العين تدور له دليل
محياك نوره جليل
كنت أقول شمس
لو ما الزمان كان ليل
يا آية التكميل
يا مراية الجمال
الفيكى كل جميل
ريحانة العصور

فيصل سعد

22-04-2006, 07:13 AM

القطار
محمد عوض الكريم القرشي

القطار المر
فيه مر حبيبي
بالعلى ما مر
يا الشلت مريودي

في الرصيف مستني
وللثواني احاسب
امتى يظهر نورو
الليه ديمة اراقب
القى فيه هناى
يلقى فيني هناهو
ننسجم لريدنا
الكان يا مريودي

الاشرجي تراه
للاشارة اداهو
فتحوا السنفور
لمروره براهو
قلبي زاد خفقانه
و زاد كمان في ولاه
للحبيب الماري
الليهو زاد شوقي

القطار يتهادى
حل في وادينا
يلا نجري نشوفه
المن زمان ناسينا
في السلامة سلامة
اه انا الجنيتها
في المحطة بكيتها
يا القطار تدشدش
يا الشلت مريودي

فيصل سعد

22-04-2006, 07:27 AM

ما رأيت في ا لكون
عبدالرحمن الريح

ما رأيت في الكون
يا حبيبي أجمل منك
في دلالك وتيهك
وفي جهالة سنك

من كمالك و ظرفك
ومن جمالك أظنك
يا حبيبي نساء
الدنيا ما ولدنك
راجي عطفك ولطفك
راجي حلمك و حنك
ديمه يا مريود
تجدني سائل عنك

يا حبيب الانفس
ما بتوب من حبك
لو صليتني بنارك
برضي برضي بحبك
مره تيه في دلالك
ومرة ارعي محبك
مره خليك جاير
مرة خاف من ربك

يا جميل المنظر
كيف كيف أذمك
سيبني في آلامي
و بالعلي ما يهمك
خالي عقلك و قلبك
فاضي فكرك و همك
المدام المسكر
والعسل في فمك

قلبي ذاب من نارك
وصبري ضاع من صدك
هل أداري حياتي
أم أعالج ودك
نسمة الاسحار
مزاجه نفحة ندك
وزهرة الازهار
بستانه صفحة خدك

السرور اوقاتك
والمحاسن خمرك
الزمان خدامك
ممتثل لي أمرك

فيصل سعد

24-04-2006, 05:37 AM

مداعب الغصن الرطيب
سيد عبدالعزيز

في بنانك إزدهت الزهور
زادت جمال ونضار وطيب
يا مداعب الغصن الرطيب

يالمنظرك للعين يطيب
تبدل الظلمات بنور
وتبدل الأحزان سرور
إن شافك المرضان يطيب

تعجبني والشيء العجيب
هادئ وأليف ماك النفور
بى عفتك صنت السفور
والحسن والأصل النجيب

أنا وأنت في الروض يا حبيب
راق النسيم وحلى للمرور
بقى أحلى من ساعة السرور
وأدق من فهم اللبيب

والروضة في موقع خصيب
حضنوها وإتلافوا النهور
ترى فيها أنواع الزهور
من كل لون أخدت نصيب

دنت الثريا بقت قريب
بين السلوك في تاني دور
في ثانية كم سطعت بدور
وأهلة كان نوعن غريب

شيء ينعش الروح في الأديب
ويحيي روح ميت الشعور
للقاك تنشرح الصدور
ويفرح القلب الكئيب
زادت جمال ونضار وطيب
يا مداعب الغصن الرطيب

فيصل سعد

27-04-2006, 07:22 AM

الأوصـفـوك
محمد بشير عتيق

الاوصفوك
بالبدري أو بالزهر
هم ما أنصفوك
الأوصـفـوك

كيف يجهلوك
و على الجمال العادي
راحوا يمثلوك
و لو بادلوك
عين الحقيقة
أو بالصيرة تاملوك
بالنور أو بالنار
أو بي قدر ما ضاع
الخيال ما عادلوك

كوكب منزه في علوك
سحرك غريب
شخصك بعيد بعيد
أو كان قريب
أنواروا آخذه
بدون سلوك
يبرق ثناك في
غيهب الليل الحلوك
أظرف شمايلك زاملوك
و هم أكملوك
أدبك هبة
فيك موهبه
حسن الظبى
و طبع الملوك

haneena

27-04-2006, 10:36 AM

فيك الخير يا المسافة
تعرف أنا عندي مشكلة عويصة في تذكر كلمات الأغنيات
و بما إني أحبب الدندنة..مرات بيغلبني أواصل
نعمل طباعة للكلمات و ندندن بمزاااااج تاني
رغم علمي التام بإمكانية رفع قضايا تعويضية من الجيران :rolleyes:

تاني شكرآ و بجيك صادة بالموجود

فيصل سعد

28-04-2006, 06:37 AM

سلامات حنينة و الف شكر على الاطلالات الحميمة و منتظرين عودتك باغنية اغنيتين.

فيصل سعد

09-05-2006, 09:30 AM

ســـــميرى
الجاغريو

يا زهــــــــــرة احــــــــلامـــى
بنظـــــم فيك كــــــــــــلامــى
تايه ودمـــــعـــى هـــــــامــى
مع القمـــــــــــــــرى البقوقى
برسل ليك ســـــــــــــــلامى

نزلـــــــــت منى دمــــــــــعه
والامـــــــــــــــــه مجتمعــــه
واليوم كــــــــان جمـــــــعـــه
يا فارم الإمــــــــــــــــــــــعــاء
ارحم سيب صدودك
حبيب روحى يا ابو لمــــــعــه

حــــــــــبيبى أهـــــــــــديلى
من عــــــــنبك أديــــــــــــلى
يا ملايكه عِـــــــــــــــــــديلى
انا نسيت مناديــــــــــــــــلى

نازله فـــــــى قلبى غــــمــه
وبقـــــــــــيت فى ملمـــــــــه
يا وحى ميعـــــــــــــــــــــــادك
يســــــــــــــعدنى لو تم

النقرن أجـــــــــــــــراســـــــن
انا قـــــــــــــلبى ميراســـــــن
حـــــــن الزهر باســـــــــــــــن
انظـــــــــــــــــــــــــر ديك بثينه
وكمان شــــوف ديك محاســن

بعد مــــــــا كنت هــــــــــادى
فى قلبى قـــــــــــدح زنـــادى
يا حظى كفاك عنـــــــــــــادى
بقيت كل يوم انـــــــــــــــــادى
واطوف ليلى واهـــــــــــــــادى

ديل بسمـــــــاتها حـــــــــاليه
مهـــــــــــــذبه روحها عـــاليه
فى الحى الامـــــــــــــــــامى
جوار الاســـــــــــــــــــــبتـــاليه

ديلك جن تــــــــــــــــــــــلاتة
بعــــــــــرف تومتى ياتـــــــــا
بحـــــــــــــلف بغـــــــــــــلاتـا
اهــــــاجر ليــــها حــــــــــافى
وأزور بيـــــــــــــت الخــــياطــة

انظر شـــــــــــوف حـــــــلاتـــها
انا مغــــــــــــــــرم بغـــــــلاتـها
ناعســـــــــــــــــات كاحــــلاتـها
انا دســـــــــــــــــــــتورى نازل
فى الخرطـــــــــــــــــوم تــــلاتة

انا لي ايام عــــــــــــــــــــديدة
مــــــن النايـــــــــر خديــــــــدها
اجمل غاليه شوفتـــــــــــــــــك
فى الحــــــــــــــــــــله الجديدة

فيصل سعد

08-08-2006, 07:08 AM

فى محراب الحب
التجانى يوسف بشير

أنت يا نيل يا سليل الفراديس
نبيل.. موفق.. فى مسابك
ملء أوفاضك الجلال فمرحى
بالجلال المفيض من أنسابك
حضنتك الأملاك فى جنة الخلد
ورفّت على وضئ عبابك
وأمدّت عليك أجنحة خضرا
وأضفت ثيابها فى رحابك
فتحدرت فى الزمان وأفرغت
على الشرق جنة من رضابك
بين أحضانك العراض وفى
كفيك تاريخه وتحت ثيابك
مخرتك القرون تشمّر عن ساق
بعيد الخطى قوى السنابك
يتوثبن فى الضفاف خفافا
ثم يركضن فى ممر شعابك

عجب أنت صاعدا فى مراقيك
لعمرى أو ساقطا فى أنصابك
مجتلى قوّة ومسرح أفكار
ومجلى عجيبة كل ما بك
كم نبيل بمجد ماضيك مأخوذ
وكم ساجد على أعتابك
سجّدا ذاهلين لا روعة التاج
ولا زهو إمرة خلف بابك

أيها النيل فى القلوب سلام
الخلد وقف على نضير شبابك
أنت مسلك الدماء وفى
الأنفاس تجرى مدويا فى انسيابك
إن نسبنا إليك فى عزة الواثق
راضين وفرة من نصابك
أو عبدنا فيك الجلال فلم
نقض حق الزياد فى محرابك

فيصل سعد

18-11-2007, 12:07 PM

جمال الدنيا

بشوف في شخصك أحلامي
ودنيا تفيض بأنغامي
وسحر الدنيا في عيونك
يبعد عني أوهامي

بشوف الكون جميل وبديع
مر أيامي يبقى ربيع
احب الدنيا لي حبك
ويسعد حبك أيامي

رياض وزهور على خديك
بديعة بتخلب الأنظار
تزيد فوق الجمال الفيك
معالم كلها اسرار
تخلي الدنيا في عيوني
جمال وكمال بيتجدد
أمل بسام بيحدوني
اغني اليك واتودد
ولحني الغالي اهدي اليك
وانبت للوجود أزهار

ياحبيبي الدنيا ما احلاها
بديعة وحلوة بين ايديك
فهل أيامي تنساها
إذا ما غبت عن عينيك
هويتك صرت ولهانك
عشقت الدنيا دي علشانك
كتير جددت ذكراها
كتير غنيت بشوقي إليك

OMERMOHAMEDNOUR

20-11-2007, 09:24 AM

الاخ فيصل...
لك التحية وانت تنقب عن الدرر الغوالي في مسيرة الغناء السوداني.
اتسأل هل نستطيع ان نصف ايامنا الحالية بانها ايام صفاء؟

منال

20-11-2007, 12:08 PM

ممكن تتحفنا بنص اجسمانا لجسمين و كذلك الفريد فى عصرك

و تحياتى من السودان العامر

فيصل سعد

20-11-2007, 12:14 PM

الاخ فيصل...
لك التحية وانت تنقب عن الدرر الغوالي في مسيرة الغناء السوداني.
اتسأل هل نستطيع ان نصف ايامنا الحالية بانها ايام صفاء؟

عزيزي عمر . عسى و لعل .. تفاءل خيرا

فيصل سعد

20-11-2007, 12:55 PM

ممكن تتحفنا بنص اجسمانا لجسمين و كذلك الفريد فى عصرك

و تحياتى من السودان العامر

اهلا و سهلا منال و مرحب بيك
و ها هو طلبك مستجاب:

الزمان زمانك
عبدالرحمن الريح

الزمان زمانك
أهدى لي مـن فـضـــلـك
نـظـره فى رمانك
يا الفريـــــــد فـى عصرك

يا الفريـــــــد فـى عصرك
قلبى فاقد امانك
حرام عليك تهجرنى
وترضى بى حرمانك
بالكـمــال شــرفـــــت
مـنــاطق ام درمانك
وبالجمال امــتــــــزت
عـلـى شباب أزمانك

يا أنيس الصـيـــــــد
أنــا فى الغرام إنسانك
انت روح شعـــرى
وانا فى الشعر حسانك
ان قصدت هلاكــى
تـجــدنـى مـن فرسانك
وان عـطــفــــت عــلـــى
ذاك مـن إحسانك

يا الحنـيـــن فـى نفـسك
قولى ويـنه حنانك
شلت قلـــــــبـى ودمــى
خـضـبـت بيهو بنانك
ان مرقت تـــمــر
فى الـروض عـلى افنانك
النجوم تـتـــــــغــزل
فــى بـيــــاض اسنانك

بابكر مخير

20-11-2007, 01:08 PM

dayami

20-11-2007, 06:44 PM

يا سلوى المحزون

يا سلوة المحزون يا قيثارة القلب الجريح
يا شابة فاقت على الاتراب بالقد ا لمليح
أهوى جمالك والشعور يزينه القول الصريح
يا زهرة أنفاسها كالعطر عبق في الضريح
قد هزني منك الجمال فجئت بالشعر الفصيح
ترفقي يا هذه فالناس من جسد وروح

** ** **
بحق بطرس يا فتاتي من شفى الرجل الكسيح
بمارى جرجس والصليب بالكنيسة بالمسيح
بالقس بالمطران بالجرس المرن على السفوح
قداسة البابا المعمد بالشموع وبالذبيح
ان ترحمي متعذباً يهواك في حب صريح
** ** **
متى يتم لقاؤنا في شاطئ النيل الفسيح
والنخل والصفصاف والقمر المطل على السطوح
أنين ساقية تدور وصوت مزمار يصيح
بدت نجوم الفجر بالاضواء في الافق تلوح
هناك ينبعث السرور على النفوس فتستريح

والثانية برضو للعطبراوي

صابر معاك صبرا طويل كاتم العلى
واصلوا العلى ما مرّ يوم بخيال بشر
لو قلتى قيس والله قيس بالنسبة لى
لا شاف عذاب لا ضاق ألم
لا قاسى مر
من كم سنة يا ستنا من كم سنة
عايش براى زى الغريب
وايامى لا فيها الضنا
من كم سنة قلبى الحزين
زى اليتيم
لا ضاق حنان لا شاف هناء
من كم سنة ما قلتى لى
اخبارك آيه مالك مشيت من حينا
لا جيتى مارة علينا يوم
زرتينا يا جارة الهناء
ولا قلتى أسأل عليهو
الزول قريبنا ومننا
السمحة يا ست البنات
يا ست عذابنا وكلنا
مخلوقة انتى تعيشى فوق
وتكونى فوق ما جنبنا
ما ست سماحة وست جمال
ما زى بناتنا وزينا
تعبانه ليه ؟ ما تسألى
مجبور عليك أسأل أنا .

فيصل سعد

21-11-2007, 11:55 AM

الحبيب فيصل
سؤال
هل هو إختيارك للأغاني عنصر الفاكهة فيها بشكل أساس؟
ولا ناس الكلامات الحلوة بيحبو الفاكهة؟
ولا في منظور تاني؟؟؟؟؟؟؟؟؟؟؟؟؟;);)
عتيق: أهدي ليا تفاحة بس أو برتكانة
عبد الرحمن الريح: نظرة في رومانك
الجاغريو: أهديني ومن عنبك أديني
وغيرهم كتيرين
يديك العافية وليك الشكر والمحبة

عزيزي / دكتور بابكر

الاسئلة اعلاه تحول لخبير الفاكهة الاستوائية و المتوسطة و الصحراوية و قطع شك بمنطقك تب :D
اما نحن فجات معانا بالصدفة ساكت :rolleyes: ليس الا لكن ظاهر صادفتك بالحيل و وقعت ليك في جرح :):)

عزيزنا ديامي تشكر على طلتك و غناء العطبراوي!!

فيصل سعد

22-11-2007, 08:17 AM

المصير
سيف الدسوفي

ليه بنهرب من مصيرنا
ونقضى ايامنا فى عذاب
ليه تقول لى انتهينا
ونحن فى عز الشباب

نحن فى الأيام بقينا
قصة ما بتعرف نهاية
ابتدت ريدة ومحبة
واصبحت فى ذاتها غاية
كنت تمنحنى السعادة
ولى تتفجر عطايا
ولما أغرق فى دموعى
تبكى من قلبك معايا

كنا فى ماضينا قوة
قوة تتحدى الصعاب
نقطع الليل المخيم
ونمشى فى القفر اليباب
كنا للناس رمز طيبة
وكنا عنوان للشباب
وهسى تايهين لينا مدة
نجرى من خلف السراب

تأنى ما تقول إنتهينا
تنهى جيل ينظر الينا
بانى آماله وطموحه
ومعتمد أبداً علينا
نحن قلب الدنيا دي
ونحن عز الدنيا بينا
تانى ما تقول إنتهينا
نحن يا دوب إبتدينا

فيصل سعد

31-12-2007, 08:00 AM

http://sudanyat.org/agani2/ya_gaiat_alamal.wma

همس الشوق

02-01-2008, 08:43 AM

للشاعر خليل فرح
في حب أم در

أذكر بقعة ام درمان

***

أذكر بقعة أم درمان

وأنشر في ربوعها أمان

ذكر يا شبابي زمان

دارنا ودار أبونا زمان

فيها رفات جدودنا كمان

ما بنساك خلقه ضمان

جنة وحور حماك أمان

ذكر يا شبابي زمان

بطرا الأسسوك زمان

كانوا يحلحلوا الغرمان

يساهروا يتفقدوا الصرمان

ذكر يا شبابي زمان

في السودان فتيح معروف

ولسه أب عنجه خوره سروف

ود نوباوي زول معروف

باقى وديك مشارع أبروف

ذكر يا شبابي زمان

كانوا جبال تقال ومكان

نزلوا اتربعوا الأركان

خلوا البقعة كل مكان

آهلة وزارة بالسكان

ذكر يا شبابي زمان

ليه يا كعبة العربان

غاضبة وفين عريسك بان

قبال نسأل الركبان

حبك من حسودك بان

ذكر يا شبابي زمان

فيصل سعد

21-02-2008, 11:16 AM

http://sudaniyat.net/up/uploading/Ashmteeni.ram

يا شباب لو سمحتوا ادونا اغنية "كم نظرنا هلال ، مكتوبة و مسموعة"

فيصل سعد

21-02-2008, 11:38 AM

WIDTH=400 HEIGHT=350

بابكر مخير

21-02-2008, 05:42 PM

تحياتي
إن كانت جات قبل كدا نغيروها على طوووووووووول
الشاعر معروف ثم معروف ومن لا يعرفه مقصر
الفنان ثم المعروف منه وعدم معرفته بينة

اعلي الجمال تغار منا
ماذا عليك اذا نظرنا
هي نظرة
تنسي الوقار..وتسعد القلب المعني
دنياي انت وفرحتي
ومني الفؤاد اذا تمني
أنت السماء بدت لنا
واستعصمت بالبعد عنا
هلا رحمت..متيما عصفت به الاشواق وهنا
وهفت به الذكري..فطاف مع الدجي..مغنا فمغني
هزته منك محاسن...غني بها لما تغني
يا شعلة طافت خواطرنا..حواليها..وطفنا
آنست فيك قداسة
ولمست اشراقا..وفنا
ونظرت في عينيك...آفاقا..وصراعا..ومعني
كم باللقاء..سمحت لنا
كم بالصبابة..ظلمتنا
جمع عهودك في الصبا
واسأل عهودك كيف كنا

شبارقة

24-02-2008, 05:01 PM

http://sudaniyat.net/up/uploading/Ashmteeni.ram

يا شباب لو سمحتوا ادونا اغنية "كم نظرنا هلال ، مكتوبة و مسموعة"

أنا غايتو بديك ليها مكتوبة وهاك ...أمسك

الشاعر : صالح عبد السيد (أبو صلاح)

كم نظرنا هلال ما شاقنا غير هلالـو *** ما أظنو زلال يروينا غير زلالو
ــ
أرى الهلال ينقص وأرى محيو يتجلالو *** كل يوم يزداد في خديدو نور يحلالو
تتقاصر الأبصار من حسنو من إجلالو *** يتيه يصد باسم آه .. ما ألذ دلالـو
ــ
ألذ شيء قُربو وغزلي النظر في جمالو *** وأمرّ شيء بعدو وجفاهو وإهمالـو
أرى الغصون بتميل وأظن هواها أمالو *** على الخلاف وإذا مَيّل عليّ أنا مالو
ــ
طرفو ليه نعسان وأنا طرفي ليه يصحالو *** يتلو آية الحب الفي الخديد لايحالو
جمالو كل ما يزيد جسمي يزيد إنحـالو *** أما قلبي الضّاع خلّي اليروح في حالو
ــ
إذا أدار لحظـو على جبـل دكّالــو *** ولو بَسَم أنزل دمع السـحاب أبكالو
قلبو لا يشفق على عاشقو مهما شكالــو *** حبيبي طبع الطيـر ينزل على أشكالو
ــ
أنا لي حبيب يا ليل نوم العيون ملالـو *** وليْ حبيب يا ليل قتل النفوس حلالـو
وليْ حبيب يا ليل تشوف خِدودو يلالـو *** مع الظلام تشتاق الزهـرة تدّلالـو