إستعدوا للفضائح...!!

[mamkouna]

في مؤتمر صحفي عُقد منذ أيام,أعلنت شركة يابانية أنها بدأت بالفعل في تطوير جهاز قادر على قراءة أفكار العقل البشري.
و قد صرٌح رئيس الشركة بأن هذا الجهاز يمكنه النفاذ إلى الأفكار التى تدور في ذهن الإنسان و ترجمتها إلى عبارات مفهومة. و توقع أن يصبح الجهاز جاهزاً لتجربته على متطوعين من البشر في غضون الخمس سنوات المقبلة.


صدقوا الخبر ده زعٌلني زعل أصلو ما معقول...

قولوا لي ليه؟؟؟!!!

[mamkouna]

الإنسان كائن إجتماعي...و لكسب الصداقات و إتقاء شر الكثيرين لابد من بعض النفاق الإجتماعي .
تخيلوا معي هذه المواقف.....

زوج و زوجة و حلة محشي...الزوج يتناول أول لقمة و يبتسم راضياً مرضيا..
الجهاز : (( لا نافعة في طبيخ لا نافعة في غيره...ده مقلب شنو الأنا إتمقلبتو ده؟ ))
الزوجة تتناول لقمة و هي تبادله الإبتسام...
الجهاز : (( تاكل السم اليهري مصارينك...ده وش يطبخو ليهو ده؟ ))


زميلين في عمل..
الأول : مبروك الترقية يا فلان...تستاهلها..
الجهاز (( أصلك حرامي و مرتشي و معروف إنك إنتهازي و متسلق ))
التاني: الله يبارك فيك يا فلان..عقبالك..
الجهاز (( إنت من يومك حاسد و حاقد عشان كده عمرك ما ح تتقدم و لا تنفع ))

صديقتين إتقابلوا بعد طول غياب...
الأولى: مشتاااااقة ليكي يا هناية شوق ما عادي .
الجهاز : (( كنت مرتاحة من وشك المزلوط ده...ده يوم شنو النحس ده ))
التانية : و الله بالأكتر يا هناية...مالك بقيتي سمحة كده ؟
الجهاز : (( بقيتي عاملة زي الفيل و وشك قدر الطبق.. )) ....


يمكننا تخيل المئات من المواقف المُحرجة و المافي ليها داعي...
حقو اليابانيين ديل يخلونا كده...
بدل ما نواجه حقائق إن تبدو لنا.... تسوءنا...

عليكم الله ما لي حق أزعل....؟؟!!!! :mad: :(

[أبومناهل]

أنا : والله ياممكونة موضوعك جميل وطريف وخطير . . وفي السلك

الجهاز : أثني

[أبو العز الجنوبي]

العزيزة ممكونة
بصراحة كده ... ابدعت.....
كانت لدي نفس فكرة أبو مناهل في الرد... واظن كل واحد حيقرأ البوست ده حيكتب على ذات المنوال...
لكن انا بفتكر انو المجانين ديل.... اقصد اليابانيين ديل ما عندهم شغله.... والجهاز ده عند الخواجات ما بنفع لأنهم صريحين وما فيش حاجة بتخليهم يكذبوا.... بنفع معانا انحنا ناس العالم الثالث ديل...ولّ شنو يا ممكونة؟؟؟
الجهاز: ممكونة قاعدة تمكن في الناس، يوم مكنه من اليابان ويوم من فلتكان....
ممكونة: آآآي والله ....صدقت...
الجهاز: شوف بالله الزول المهضرب ده، اليابانيين ما قادر ينطقها يجي يعمل فيها عايز يفتي في جهاز زي ...قال كمان ولّ شنو ياممكونة... المكنة التقد.....

[ناصر يوسف]

ههههههههههههههه


هي هي هي أنا حاجز لي جهاااااااااااااز من هسِي دي

قولو لي ليه ؟

بقول ليكم عشان كلما يكون في مسعول عندو تصريح للإعلام أخت ليه الجهاز ده جنب المايكرفون

وعشان أخت الجهاز ده لكل نواب البرلمان لما يكونوا في ندوة بتاعة الإنتخابات ديك البقولو فيها :

حنسوي ليكم ونسوي ونفعل ونفعل ونسوي وحنحفر ليكم البحر ده من هني لي هنوووووووووووك

وحندخل ليكم الكهرباء والمويه والظلطات وهلمجرا



أنا : ممكونه يا ظريفه

الجهاز : (صمت)

أنا : ممكونه يا راقيه

الجهاز : (صمت مطبق)

أنا : تسلمي يا الممكونة من أي بلا

الجهاز : تسلم ممكونة من أي بلا وتسلم سودانيات من خدماتي .....

[معتصم الطاهر]

خايفة من شنو يا ممكونة؟

ممكونة : حايفة على البشرية

الجهاز : خايفة أطلّع الماكنِّى ..

[3ashig Alneel]

أختنا ممكونة
الجهاز والله فكرتو مجنونة

أتخيلي بالله الجماعة البكونو خالطين من صباح الرحمن
ديل لو معاهم الجهاز دا بقدرو يقعدوا عشرة دقايق ؟
ونبقى في يا تافه ... تفكيرك منحط .. وفصاحة بنات الجامعة الإنتي عارفاها !!


الجهاز: الزول دا ما قاصد حاجة !!

[الطيب بشير]

ممكونة
هائل
الجهاز طلع من اجتماع الترابي و علي عثمان جاري جري
مسكو الياباني الصنّعو
قال ليهو مالك؟
الجهاز قال ليهو (بالعربي)
يقطعني ما فهمت أي حاجة
قلت انفد بي كهروبي
تسلمي يا الممكوووووونة

[Osman Hamad]

إنتِ عارفة ياممكونة بالبوست بتاعك دا اثبتى لى انو انا عالم ماهين :p
بالجد صدقينى فكرة الجهاز دى عندى من زمان فى رأسى. ;)

[ندى]

إنتِ عارفة ياممكونة بالبوست بتاعك دا اثبتى لى انو انا عالم ماهين :p
بالجد صدقينى فكرة الجهاز دى عندى من زمان فى رأسى. ;)

الجهاز
:D :D :D

[د.سيد عبدالقادر قنات]

سلام ليكم /ن

أنتو خايفين ليه ؟؟

لازم تكونو عملتو حاجات غلط كتير شديد

وعشان كدي الطبع يغلب التطبع

وما حا تقدرو تستمرو في الموضوع لنهاياتو


بس لكن يا ممكونة عندنا ناس فاتو اليابان في الأختراعات


وكمان الفهلوة والمسميات والشروحات

ديل عندهم حاجة سموها فقه الضرورة

وعشان كدي الجهاز دا ماعندو شغل معاهم

طبعا هم يحللون الحرام ويحرمون الحلال

ويكفي كلام الطيب بشير

ديل قتلو شعب وامة ومشوا في الجنازة

يغلبم جهاز مفعوص ؟؟؟؟؟

مسعولين من الخير ::

السقف الزمني ما قرب يا جماعة ؟؟؟


يديكم العافية

[جمال تاج السر]

ممكونة...
الفضائح لسع جاية قدام :D :D
كدي أقري معاي الخبر ده كويس :)
نقلاً عن منتديات فوت بول:
(انتشر بين الشباب موخراً في اليبان جهاز يضيفونه للجوال بحيث انه يمكن الشخص من الرؤية تحت الملابس.
هذا الجهاز يتم تركيبه على تلفونVodaFoneV602 ويبلغ سعره حوالي الــ100جنيه استرليني...وبما إنه انتشر بين المستخدمين, فقد اضطرت الشركة ان تضعه كاضافه اختيارية في الجهاز...ولم يتم الاعلان عن دعم هذا النوع من الكاميرا بشكل رسمي من الشركة...
من ناحية أخرى..
هذا النوع من الكاميرا صمم من قبل شركة (( Yamada Denshi )) اليابانية...وهي شركة للدعم العسكري..
وقد تم تصميم هذا النوع من الكاميرا التي تعتمد على أشعة اكس..للاستخدام العسكري...
الكاميرا المعنية..يقال انها مخصصه للرؤية الليلة... وبعد التجربة اكتشفوا انها تمكن الرؤية من خلال الملابس...
وتكون أفضل على الملابس الداكنة ليلا.
الكاميرا لم تنتشر الا في اليابان ........... )
أها الجهاز ده كان جاء السودان ياممكونة
نعمل شنو؟؟ :D :D :D

[معتصم الطاهر]

أها الجهاز ده كان جاء السودان ياممكونة
نعمل شنو؟؟ :D :D :D

أسأل عكــــــــود !

[mamkouna]

يا جماعة...
من الصباح زعلانة من موضوع جهاز الصراحة ده...و خايفة تتصادر أفكاري من غير ما أشعر...
لكن...

بعد قريت كلام جمال تاج السر...


أخير لي جهاز الصراحة... :o :o :o

[Osman Hamad]

الجهاز
:D :D :D


جحا ياندى قال: ما رأيت أحداً أدخل يده فى جيبه إلا وظننت انه سوف يعطينى شيئاً ;)

بس ياها دى البقت عليك ;)

لكن ماتخافى، الموقف إذا تأزم أنا قاعد، اهو أخير من عدمى ;)

[ناصر يوسف]

ممكونة...
الفضائح لسع جاية قدام :D :D
كدي أقري معاي الخبر ده كويس :)
نقلاً عن منتديات فوت بول:
(انتشر بين الشباب موخراً في اليبان جهاز يضيفونه للجوال بحيث انه يمكن الشخص من الرؤية تحت الملابس.
هذا الجهاز يتم تركيبه على تلفونVodaFoneV602 ويبلغ سعره حوالي الــ100جنيه استرليني...وبما إنه انتشر بين المستخدمين, فقد اضطرت الشركة ان تضعه كاضافه اختيارية في الجهاز...ولم يتم الاعلان عن دعم هذا النوع من الكاميرا بشكل رسمي من الشركة...
من ناحية أخرى..
هذا النوع من الكاميرا صمم من قبل شركة (( Yamada Denshi )) اليابانية...وهي شركة للدعم العسكري..
وقد تم تصميم هذا النوع من الكاميرا التي تعتمد على أشعة اكس..للاستخدام العسكري...
الكاميرا المعنية..يقال انها مخصصه للرؤية الليلة... وبعد التجربة اكتشفوا انها تمكن الرؤية من خلال الملابس...
وتكون أفضل على الملابس الداكنة ليلا.
الكاميرا لم تنتشر الا في اليابان ........... )
أها الجهاز ده كان جاء السودان ياممكونة
نعمل شنو؟؟ :D :D :D




ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــ


مافي لينا يا جمال غير إننا


نلبس

شرابااااااااااااااات وبس


:p :p :p

[جمال تاج السر]

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــ


مافي لينا يا جمال غير إننا

نلبس

شرابااااااااااااااات وبس

:p :p :p

ناصر
أتخيلت المنظر ... والله ضحكته ضحك :D :D :D

[haneena]

الممكونة الحبيبة
سلام
و الله قعدت أفكر في قصة قراءة العقل الباطن دي
يعني في الحالة دي
لا شواكيش
و بالتالي مافي بكاء و جرسة
الواحد قبل ما يلاقي الواحد أو الواحدة يكونوا عرفوا الفي راسو/ها
طيب بعدين الشعراء حيكتبوا كلام الهجر و الخداع من وين؟
ناس المخابرات و المتخبِّرين ياكلوا عيش من وين؟
ناس الأمراض النفسية و العصبية يخلفوا كراع في كراع و يهشوا الضبان
و العرافين و العرافات و ناس الفكي و الشيخة فلان و فلانة تروح عليهم
و لا رمي ودع و لا هاتوا دهب




أحلام زلوطــــــــــــــــــــــــ :rolleyes:



و الله مشكلة
الحياة حتبقي مسيييييخة من غير بكا

[mamkouna]

my arabic keyboard is out of order....as usual....

i will be back soooooooooooooooooooon

[أم سهى]

:D ممكونة
الزول بقى يخاف يقول اي كلمة بعد جهازكم ده
هو قبل ما يجي انتو بتحللو كلامو بكون شنو؟
بكمتونا كلو كلو
ربي يديكم العافية :D

[omrashid]

والله يا ممكونه انا بالاول قلت دا جهاز تمام بس كشف افكار الزوجين دي مشكلة --احسن يخلونا مستورين

[الزوول]

السلام عليكم

الأخت ممكونه
هسه الجهاز ده معاك ؟؟
وبعدين بيقرأ الأفكار من على البعد أو لازم يكون متصل
لأني ناوي أقول ليك موضوعك ده جميل :) :) :)
........
ذكرتيني بكتاب قريته من سنين
أرض النفاق ليوسف السباعي سأحاول تلخيصه هنا
يحكي الكتاب
عن رجل عثر على متجر على أطراف البلد مكتوب عليه دكان لبيع الأخلاق
فدخله على سبيل حب الاستطلاع فوجد رجلاً عجوزاً أمامه شوالات مكومة مكتوب عليها صدق ، مرؤة ، شجاعة ، أمانه ... إلخ وأخرى فارغة ولكن الكتابة عليها تشير إلى انه كان فيها كذب، نفاق ، دناءة ...الخ
طلب من الرجل على سبيل السخرية أن يبعه بعضاً منها فأخبره الرجل ان البضاعة الوحيدة المتوفرة (البايرة) هي الأخلاق الحسنة كالصدق والشجاعة أما الأخلاق السيئة كالنفاق والكذب فهذا معدوم لأن البشر تكالبوا عليها فاستنفدوها منذ زمن طويل..
المهم ..وزن له الرجل شجاعة ( 10 أيام ) على شكل بدرة تذاب في الماء ..
شرب الرجل جرعة الشجاعة فانقلبت أحواله ...ففي أول ايام الجرعة ..تشاجر مع الكمساري ومع حماته ومع بعض فتوات الشارع الذين كان يهرب منهم قبل الجرعة.. وكان نتائج ذلك إصابات وكدمات في كل إنحاء جسمه ..
عرف انه لو ظل على تلك الحال من الشجاعة باقي أيام الجرعة لهلك ..فأسرع إلى متجر الأخلاق ليخلصه من تلك الجرعة فأعلمه البائع أن لا حل الا بتناول جرعة أخرى من مادة أخرى ..ففضل الصدق ..
فكانت النتيجة أن ذهبت زوجته إلى بيت أهلها بعد سؤالها له عن رأيه في جمالها
وعاقبه المدير في العمل بخصم أسبوع من معاشه بعد أن سأله رأيه في القصيدة التي الفها فأخبره أنها مسروقة..
وحلف زميله أن لا يكلمه بعد أن شكا له تخطي المدير له في الترقية فاخبره أنه لا يستحق أن يعمل حتى ساعياً في مكتب وانه كسول وحمار وغبي ووو
أسرع للمتجر ليتخلص من الصدق فوجد البائع غائباً ففكر أن رجلاً صادقاً وحيداً بين مجموعة من المنافقين عبث ، ولكن ماذا لو تحول كل الناس إلى صادقين؟
اخذ شوال الصدق و اذابه في الصهريج الرئيسي الذي يشرب منه سكان المدينة وجلس يراقب تأثير ذلك على الناس
ويأتي لنا الكاتب بمواقف مختلفة لمأتم يتظاهر فيه الناس بالحزن الشديد ثم يشربون من الماء (الملوث بالصدق) ..ولك أن تتخيل ردود أفعالهم ..
ثم يأتي بمثال آخر للقاء سياسي بالتلفزيون يشرب ضيوفه من الماء الملوث..
الكتاب جميل وجدير بالقراءة لما يحوي من أفكار مبتكرة
....
ممكونة
اها رأيك شنو مش اليابانيين ديل سرقوا فكرة الجهاز ده من الكتاب؟؟
تحياتي
ومعذرة للتطويل


...
تحياتي

[عكــود]

ممكــونة،

إن شاء الله الجهاز ده ما يصل السودان إلا بعد ما نعجّز ونطلُق
عشان نسوّي في الخَرَف والطُلقان

معتصم كتب:

أسأل عكــــــــود !
إنت مالك ما بيسألوك..
عميان وللا مشلّق؟

عكـــود

[mamkouna]

الأحباب...

أبو مناهل...
أبو العز الجنوبي..
ناصر يوسف...
معتصم الطاهر..
عاشق النيل...
الطيب بشير...
عثمان حمد..
ندى...
د. سيد قنات..
جمال تاج السر...
حنينة...
أم سهى...
أم راشد...
الزوووول...
عكود...

كي بوردي يا دوبو إتصلح...
برجع ليكم نفر نفر..
كل مولد... و إنتو طيبين و طيبات..

[معتصم الطاهر]

يعني في الحالة دي
لا شواكيش
و بالتالي مافي بكاء و جرسة

أحلام زلوطــــــــــــــــــــــــ :rolleyes:

و الله مشكلة
الحياة حتبقي مسيييييخة من غير بكا

أظهر وبان

وعليك الأمان

مرحبا بك قى الرابطة ..
بعدين البكا دا ما داير جهاز ..
براهو بظهر ..

[mamkouna]

هل الصراحة...راحة..؟؟!!!

[Asma Abdel Halim]

ممكونة
يا ختى أمسكى عليك "عيونك" ديل أنحنا القدرنا طلعناه بفعل الهم والغم عمل لينا عداوات ما ليها حد ، دايرة تدخلى العالمين جووووة.
زمان كان فى فلم أمريكى خيالى عن مجموعة أطفال ولدوا فى فترة زمنية واحده وعندهم خاصية قراءة أفكار الناس وكانوا مضرين إلى حد أن أباءهم قرروا يقضوا عليهم بوضع قنبلة فى الفصل. وحتى لا يعرف أى منهم تلك النية قرر أستاذهم وله ابن بينهم أن لا يفكر فى شىء أثناء وجوده معهم سوى حائط من الطوب القوى.
والفيلم يصور رأس الأستاذ وعيون تلاميذه تحاول هدمها لقراءة ما فى عقل الأستاذ
ولما خلاص قربوا انفجرت القنبلة واخدتهم بى استاذهم وأراحت البلاد والعباد.
أها النمشى اشوف لى طريقة حيطة مانعة "أمرق بها اقرابها"
تحياتى

[بابكر مخير]

ممكونة
الجهاز دا السودان سبق اليابان 63 سنة،،،،
ما إسمو عمنا شوقي بدري
أصلو الحبيب شوقي بطلع الحقيقة أكتر من الجهاز دا
الحب والمودة ليك ولي شوقي وسودانيات

[الوليد عمر]

والجهاز ده عند الخواجات ما بنفع لأنهم صريحين وما فيش حاجة بتخليهم يكذبوا.... بنفع معانا انحنا ناس العالم الثالث ديل...ولّ شنو يا ممكونة؟؟؟


.....



تعرف يا أبو العز يا أخوى أنحنا ذاتنا ما بنمرق النصيحة أكان كتلونا .. ماسكين فى وصية أبونا الشيخ فرح ود تكتوك .. مسكة شديدة .. وإتجاوزنا قصة وشين دى زمااااااااان .. هسى أقل حاجة الواحد بقى عندو خمستاشر وش ..

واحد فى الشغل : :mad:


واحد فى البيت :confused:

واحد فى الشارع : ::eek:

واحد فى المسرح ::rolleyes:


واحد وقت القهوة بعد الفطور ::cool:

واحد لما يجو الشفع من المدرسة ::p



وعييييييييييييييييييييييييك ...



ممكونة :

أنا : تحياتى القلبية ..
الجهاز : برضو تحياتى القلبية ..

[مُهيَّد]

الجهاز : (( لا نافعة في طبيخ لا نافعة في غيره...ده مقلب شنو الأنا إتمقلبتو ده؟ ))
الزوجة تتناول لقمة و هي تبادله الإبتسام...
الجهاز : (( تاكل السم اليهري مصارينك...ده وش يطبخو ليهو ده؟ ))

هههههههههه الله يديك العافية ....

العزيزة أم أحمد ،،

صباحك نادي ..... الفكرة فيها كثير من السلبيات وإن كانت تقبل الحقيقة في كثير من جوانبها ولكن .... الله يعينا علي التكنولوجيا ..!!!!!

سؤال .... هل يمكن أن نتعايش بدون نفاق إجتماعي (ولو كان مقنناً) ؟؟

جانب آخر (جادي جداً) .... أعتقد أن الضرر والمنفعة قد تكون متبادلة - إن صدق وخرج الجهاز- بين فئتين رئيسيتين (الجهات الأمنية /الشرطية والفئة الإجرامية) من حيث إنكشاف أسرار وطريقة تفكير وتخطيط كل طرف ...

تقديري ،،،

مُهيَّد

[مُهيَّد]

هل الصراحة...راحة..؟؟!!!

لا يتفق الكثير علي إيجابية الوضوح والصراحة .... قد تجلب الكثير الكثير من المتاعب والمشاكل لمن يمتهنها ويجعلها ديدن ومنهاج لحياته .... والبعض يحاول أن يخلق مزيجاً من الوضوح والصراحة وبعض النفاق/المجاملة الإجتماعية الزائفة كي تسير الحياة دون عقبات .....

ولكن في تقديري أن إتباع الصراحة والوضوح تكسبك إحترامك لشخصك وذاتك أولاً وهي في تقديري أكبر وأقيم من أي شئ آخر ...

من فقد إحترامه لشخصه وذاته ... لا يري فيه الآخرين غير ظلال شخصية مهترئة ...

تقديري ،،،

مٌهيَّد

[mamkouna]

أنحنا القدرنا طلعناه بفعل الهم والغم عمل لينا عداوات ما ليها حد

الحبيبة..دكتورة أسماء
تعرفي...كلمتك السابقة دي واحدة من أسباب (( مكنَتي )). من غير هم و غم و الصراحة كاتلاني مما أفقدني الكثير من الراحة النفسية..و أكسبني حيرة لا ليها أول لا آخر...
لذلك أتساءل دوماً...متى تكون الصراحة..راحة؟؟!!

[mamkouna]

بابكر مخير..
التحية ليك و للأستاذ شوقي بدري.

[ندي عبدالمنعم]

لكن يا ممكونة ,, فى ناس كتار ح يضيعوا فى البورد دة :D .

غايتو نحن قاعدين نمرق النصيحة اول بأول و نرتاح و نريح..

[معتصم الطاهر]

مخيّر الله فى خلقو

اسع بعد سنة النكت البوست دا شنو

حالة صدق

ولا بكا ...

[د.سيد عبدالقادر قنات]

مخيّر الله فى خلقو

اسع بعد سنة النكت البوست دا شنو

حالة صدق

ولا بكا ...


دي حاجات تانية يا باش

ما تحكوها شديد

خلو الخلق لي خالقا


خارج النص حالة صدق :::


الحاجة رجعت من الحج ،

عمك الحاج قال ليها مالك؟؟

قاتليهو عاد بعد الحج في كضب ؟؟؟

ظنيتا خايفا من الجهاز !!!!!!!!!!!!!!


يديكم الصحة والعافية

[mamkouna]

الوليد عمر..
أنا أتخيل الجهاز دا زي الموبايل..
ممكن تفتحو..ممكن تقفلو..و ممكن تعملو (( صامت ))..
لكن..
بيشتغل (( هزٌاز )) مع كل كضبة!!!:D :D

[elmhasi]

حقو اليابانيين ديل يخلونا كده...
بدل ما نواجه حقائق إن تبدو لنا.... تسوءنا...

عليكم الله ما لي حق أزعل....؟؟!!!!



ممكونة


ليك حق في الزعل


لكن الشغلة مش فيها شوية فايدة برضو ...

[elmhasi]

حقو اليابانيين ديل يخلونا كده...
بدل ما نواجه حقائق إن تبدو لنا.... تسوءنا...

عليكم الله ما لي حق أزعل....؟؟!!!!



ممكونة


ليك حق في الزعل


لكن الشغلة مش فيها شوية فايدة برضو ...

[mamkouna]

كيفك يا مهيد..إن شاء الله كويس؟
و الله سائلة منك و سعيدة جداً جداً بمداخلتك الثرية.

يا سيدي - و من تجربتي الشخصية -الصراحة حااااااارة حتى لو طلبها منك الطرف الآخر. و أنا أتكلم عن حروريتها للطرفين..
يعني أنا لمن أكون صريحة مع شخصٍ ما..و أقول ليهو أنا بفتكر إنك كذا و كذا و كذا...هو ح يتألم بشدة لصراحتى حتى لو حسبها في راسو و تأكد إني صديقُُ صدوق..
أنا زااااتي...لو طلبت الصراحة من إنسانٍ ما..و أداني ليها في يدي زي ما بيقولوا..ح توجعني شديييييد..حتى و لو تأكدت إنو صديقُُ صدوق..و إحتمال يتخلق حاجز من الكُلفة و الحرج بيني و بينه..
الموضوع شائك..و نحن عندنا عزة نفس و أنفة شديدة..و نرفض الإعتراف بنقاط ضعفنا..و لو أننا بارعين جداً في كشف نقاط ضعف من حولنا.
زي الجهاز المزمع دا ممكن يخلق لينا جفوات ومشاكل إجتماعية فظيعة جداً جداً.

ليه؟؟؟؟
1/ عشان بنمقت الصراحة و نتقبلها بصعوبة.
2 / عشان لساننا طويل و عندنا قدرة عجيبة على إنتقاد الغير.

[طارق الحسن محمد]

ممكونة كيفك ؟؟
بوست جميل وفى السلك والله
الجهاز : ياخى دى تفتح ليها بوست وتزوغ منه
اسع بوست القهوة داك ما طنشتو ؟؟؟؟؟؟
:mad:

[mamkouna]

ياخى دى تفتح ليها بوست وتزوغ منه
اسع بوست القهوة داك ما طنشتو ؟؟؟؟؟؟


ممكونة : وينك يا طارق و كيف أخبارك؟
شكراً ياخي على كلامك الحلو دا و على مرورك الكريم.

الجهاز : إن شالله طارق الحَيرَة دا كان بهتني و قابلني..
يقابلنو شباشب المولد!!!!:mad:

[مُهيَّد]

كيفك يا مهيد..إن شاء الله كويس؟
و الله سائلة منك و سعيدة جداً جداً بمداخلتك الثرية.

يا سيدي - و من تجربتي الشخصية -الصراحة حااااااارة حتى لو طلبها منك الطرف الآخر. و أنا أتكلم عن حروريتها للطرفين..
يعني أنا لمن أكون صريحة مع شخصٍ ما..و أقول ليهو أنا بفتكر إنك كذا و كذا و كذا...هو ح يتألم بشدة لصراحتى حتى لو حسبها في راسو و تأكد إني صديقُُ صدوق..
أنا زااااتي...لو طلبت الصراحة من إنسانٍ ما..و أداني ليها في يدي زي ما بيقولوا..ح توجعني شديييييد..حتى و لو تأكدت إنو صديقُُ صدوق..و إحتمال يتخلق حاجز من الكُلفة و الحرج بيني و بينه..
الموضوع شائك..و نحن عندنا عزة نفس و أنفة شديدة..و نرفض الإعتراف بنقاط ضعفنا..و لو أننا بارعين جداً في كشف نقاط ضعف من حولنا.
زي الجهاز المزمع دا ممكن يخلق لينا جفوات ومشاكل إجتماعية فظيعة جداً جداً.

ليه؟؟؟؟
1/ عشان بنمقت الصراحة و نتقبلها بصعوبة.
2 / عشان لساننا طويل و عندنا قدرة عجيبة على إنتقاد الغير.


أم أحمد ... صباحك نادي ..

إمتناني للسؤال ويديك ألف عافية ....

أتفق معك تماما في صعوبة تقبّل الصراحة والوضوح ... وتكمن الصعوبة في إعتقادنا إنو دايماً نحن صاح وتصرفاتنا لا تقبل الإنتقاد ... وفي تقديري أيضاً أن الإعتقاد الراسخ لدينا بأن الإنتقاد أو الوضوح والمكاشفة قد يقلِّل من شخصيتنا وقدرنا له دور أصيل في عدم قبولنا لصراحة الآخر تجاهنا..

مع إنو دايما نحنا بنردد مثل قديم بيقول ((يا بخت من بكاني وبكي عليَّ ولا ضحكني وضحَّك الناس عليَّ))

في الكثير من المواقف نطالب الطرف الآخر بالوضوح والصراحة ونعدد فوائدها وووووو ... وعندما تأتي ساعة الحقيقة نجد الإلتفاف حولها ومحاولة الهروب منها ..

هي في تقديري قيمة تربوية تُغرس في نفوسنا وتنمو مع التنشئة - وهذا يقودنا إلي اساليب التربية الأسرية وكيفية التعامل مع الأخرين ...

أيضاً لدي العديد من الأمثلة في التعامل بكل وضوح وصراحة .. وللأسف كانت النهاية أن البعض قد آثر الإبتعاد علي القبول بما هو حقيقي وواقع .!!!!

ذُبدة الموضوع .... أن الصراحة والوضوح فيمة تربوية عالية لا تُكتسب من فراغ أو بالصدفة ولكنها تٌغرس في نفوسنا وتنمو بمرور الأيام إلي أن تكون منهج

وإسلوب تعامل يكون دلالة علي شخصية الفرد منا ...

تسلمي كتير أم أحمد علي موضوعك القيِّم الذي يحمل الكثير الكثير في طياَّته إن أحسنَّا قراءته بكل هدوء ...

تقديري وإمتناني ،،

مُهيَّد

[mamkouna]

غايتو نحن قاعدين نمرق النصيحة اول بأول و نرتاح و نريح..


الحبيبة..و بت دفعتي ..ندى..
قلتي..نرتاح..و نريح..
معنى كدا إنك بتؤيدي المقولة : الصراحة ....راحة.
نفسي ألقاك يا ندى و أحكي ليك كمية الخسائر الخسرتها من جراء الصراحة و الوضوح..
الخسائر الخسرتها من مرق النصيحة...
الخسائر الخسرتها من قولة إنت أعور..للأعور..
خسائر..لم تعود عليٌ بأي (( راحة ))..بل العكس.
خسائر أفقدتني الثقة في المقولة الفاتت و خلتني (( ممكووووونة )) و صابرة.

عرفتي أنا (( ممكونة )) ليه؟؟؟.

[mamkouna]

مخيّر الله فى خلقو

اسع بعد سنة النكت البوست دا شنو

حالة صدق

ولا بكا ...


جُرح قديم...يتجدد.

-- --------------
راجع *الفضيحة* السابقة.