شاعرة سودانيات

[احمد عبدالعاطي]

اشتقنا ليك
====
اشتقت ليك
لمن حدود الشوق شكن
احتجت لي شوفة عينيك
لمسة حنان
يغمرني بيها حنين ايديك
وحياة عينيك
يالبعيد
عمري ابدا ما نسيت
اني منك... اني ليك
اني باحلم بلقاك ولو لحين
ولو دقايق او ثواني
ما سنين
اشتقت لي كلامك
لي حكيك
واللهفة ليك
كتلتني فيك
دايراك تعود
لي زول بحبك ومشتهيك
مرة باحلم بي لقاك
ومرة اسرح في هواك
ومرة اقعد
في محطات الزمان ارتجيك
واسال الايام عليك
حبي ليك
ورحي فيك
عيني تشتاق لي عينيك
ومشاعري ديمة تغني ليك
اشتقنا ليك
اشتقنا ليك
=====
هذه القصيدة نظمتها زميلة معكم في سودانيات حزروا فزوا واعرفوها ومن يتعرف عليها فله جائزة كبري......
المطلوب من كل الزملاء المهتمين بالشعر والنقد تقدييم تجربتها .. وانا ساقوم بانزال عدد من اشعارها

[Dr. Mohammed Hassan]

بسم الله الرحمن الرحيم

في خيارات والا نستعين بصديق؟

[أبومناهل]

العزيز / أحمد عبد العاطي
بدون خيارات وتخمينات . .
دي shival
والجائزة تبرعت بيها للأخ / محمد يحيي . . لزوم عضة الكلب وكده . .
القصيدة جميلة ومهضومة ( كما يقول اللبنانيين ) ودي حدودي هنا في التعبير عن وجهة نظري في القصيدة . .
أما النقد والتقويم الصحيح فدونك أساطين الأدب والشعر السوداني الذين تزخر بهم سودانيات . .

[عمر صديق]

ابيات تنم عن موهبة متفتحة
ومقدرة عن الافصاح والتعبير
لو عرفت ليك الجائزة حتكون شنو؟؟؟؟
انا ما اقول ليك شنو لكن انا البحددا
عرفتها ليك
الجميلة
وضاحة

[وضاحة]

هههههههههههه
احمد انا اكيد عرفتها بس ياريت الجائزه بسرعه
عشان انا فى اشد الحوجه ا ليها
(shival......shival
shival
الغاليه نهله
وشكر ليك احمد على القصيده الحلوة دى

تخريمه انا ياعمر صديق لو بكتب زى دة تانى عايزة شنو ؟فى الدنيا دى

[معتصم الطاهر]

اشتقت ليك
لامِن حدود الشوق شكن
احتجت لي شوفة عينيك
لمسة حنان
يغمرني بيها حنين ايديك
وحياة عينيك
يالبعيد
عمري ابدا ما نسيت
اني منك... اني ليك
اني بحلم بى لقاك ولو لحين
ولو دقايق او ثواني
ما سنين
اشتقت لي (كلامك) ---- تحتاج لمراجعة وزن ---
لي حكيك
واللهفة ليك
كاتلني فيك
دايراك تعود
لي زول بحبك ومشتهيك
مرات بيَحلم بي لقاك
ومرات بيسرح في هواك
ومرة يقعد
في محطات الزمان يرتجيك
واسال الايام عليك
حبي ليك
وروحي فيك
عيني تشتاق لي عينيك
ومشاعري ديمة تغني ليك
اشتقنا ليك
اشتقنا ليك


أظن الأخت shival ترغب فى سماع صوت مختلف
لكن قدر قدرتى وقدر حيلى ..

لامن حدود الشوق شَكَنْ .. ( لامن فرضتها ظروف الوزن وهى أقرب للقلب والعادية )
كاتلنى فيك ( دواعى الوزن ..وهى هكذا تبدو كوصف للحال .. )
مرات .. ضرورة الوزن وهى تعطى كثرة اختلاف الحال وتنوعه ..
تعديل ( بيحلم .. بيسرح ) لوصف الغايب .. لأن الفاعل غايب ( لى زول بحبك ) ..
فالزول بيحلم وبيسرح .. وأنا أحلم واسرح.. والانتقال من المتحدث للغايب .. مع انو معروف الزول هو المتكلم ..

أما القصيدة فهى فيها بوح جميل
واستخدام مفردات بسيطة لتكوين قصيدة عميقة ..
والقصيدة مترابطة ..

فيها أبيات متفردة ..
مثل
حدود الشوق شكن ..

زول يزعل مافى ..
خاصة اساتذتى .. الكبار ..
دى شلاقة ليس الا ..

[احمد عبدالعاطي]

الاخوان
د محمد حسن
ابو مناهل
عمر صديق
وضاحة
شكرا لمداخلاتكم واعدكم باني ساتيكم بمزيدة من قصائد هذه الشاعرة
الاخ معتصم الطاهر
نيابة عن الشاعرة اشكرك كثيرا علي محاولتك النقدية واعتقد ان الشاعرة سوف تسعد بيها كثيرا وحتما ستجد بها ما ينير لها طريقها الشعري

[احمد عبدالعاطي]

واحتوتني ذكرياتك
ذكري في العمر المجافي
كنت باحلم اني ابقي
معاك طول عمري البفافي
ماغدرت في يوم بعهدك
ولي عيونك كنت وافي
بذكر يوم قلت لي يا حياتي
اني لما اكون بقربك ما تخافي
كنت اجمل كلمة شفتها
كنت عمري ربيع جفافي
نسيت يوم جمعتنا ريدة
وبعت حبا كان خرافي
انت يا اجمل قصايدي
حبي باين وما هو خافي
ارحم الجارية في صحاري
الريد وحيدة وما تجافي

[ناصر يوسف]

يا أحمد يا عبد العاطي ويا الساكن قاهرة المعز

ما تحرق روحنا يا خي

أنا ما عرفتها لي هسي وكان وريتني ليها

بديك أنا جااااااااااااااائزه قيمه

أها حتوريني ليها ولا لأ ؟؟




تخريمه سغنتووووووووووووووووووووووووته

ولكنه قلم يكتب الدسم

[عمر صديق]

[QUOTE=Nasir Yousif]



تخريمه سغنتووووووووووووووووووووووووته

ولكنه قلم يكتب الدسم[/QUOT
والله ياناصر
مجننا بيها
الشىء تقول ساكنو جنى بليل بقى يضرب بيها
تكون دى اعراض انفلونزا الطيور

[عمر صديق]

[QUOTE=Nasir Yousif]



[U]تخريمه سغنتووووووووووووووووووووووووته
ولكنه قلم يكتب الدسم[/QUOT
والله ياناصر
مجننا بيها
الشىء تقول ساكنو جنى بليل بقى يضرب بيها
تكون دى اعراض انفلونزا الطيور

[ناصر يوسف]

هههههههههههههههههههههههههههههه

احمد ده خليه اليهضرب كدي لامن القطر

توووووووووووت يصفر في المحطه التانيه

[محمد يحيى]

الاخ احمد عبد العاطى
لك الشكر على الكلمات الجميله واتمنى ان تزيدنا من كلمات الشاعره الشفيفه شيفال وطبعا سمعنا انو انت رجل اعمالها والناطق الرسمى ;)

الاخ أبو مناهل : تسلم يا حبيب بس انا مش عايزه جائزه انا عايز واحد ياخد مصل السعر بدلا عنى ينفع انت ياخوى عندك صره كبيره وبتستحمل :D

[احمد عبدالعاطي]

شيفال عثمان نواي
الميلاد :الخرطوم 22\10\1984 (لكنها سابقة سنها بكمين سنة)
الاقامة : جمهورية مصر العربية
طالبة بجامعة القاهرة\ كلية الحقوق السنة الاولي
ممثلة بفرقة سنودس للتراث والمسرح الافريقي

الشكر لك المتداخلين
والجائزة ستصل لكل من تعرف عليها