وصف الزعيم الأزهرى بالفلاتى ، كمنقصة

[شوقي بدري]

وصف الزعيم الازهرى بالفلاتى ، كمنقصه
...

قبل اقل من ثلاثه سنوات تعرض الهوسه والفلاته لهجوم وقتل . وصرح البشير بأن الهوسه ليسوا بسودانيين . وكان هذا بمثابة الضوء الاخضر للهجوم على الهوسه والفلاته . ولحسن الحظ انشغل اهل الانقاذ باشياء اخرى . ونسيوا الهوسه والفلاته.
الانظمه الدكتاتوريه تبحث عادةً عن اشياء تشغل بها الناس والعنصريه والشوفينيه والتطرف هى من اكثر الاشياء فاعليه . لقد وحدت العنصريه الشعب الالمانى وجعلته يلتف حول هتلر والنتيجه كانت ربع مليون من الغجر احرقوا بدون سبب . وخمسه مليون من اليهود . وعدد غير معروف من الالمان اللذين كانوا من اصحاب الاحتياجات الخاصه . وتعرض كثير من الالمان من من وصفوا بأنهم ليسوا من الاذكياء ، بعملية اخصاء .
فى هذه الامور ليس هنالك مجال لان يقف الانسان متفرجاً . وبعد ان ينفصل الجنوب ، ومشكلة دارفور وجبال النوبه . سيبحث البشير عن أى شئ لكى يدغدغ به شهور الشارع الشمالى . وقد يعود البشير الى موضوع الهجوم على الهوسا والفلاته . وهذا الشعور موجود فى الشارع السودانى . ولكن الانقاذ ستقننه وستأخذه الى ابعاد اعلى .
..............................
هذا الموضوع كتب قبل ثلاث سنوات عندما سالت دماء الهوسه بسبب العنصرية والهوس .
هوس الهجوم علي الهوسة (2)
الهجوم علي الهوسة والاستخفاف بهم اغضبني كما اغضب كل صاحب ضمير . اذكر قديما انه عندما بدأ الرئيس الازهري في كتابة مذكراته ، ونشرت في الصحف ، بدأ بعض رجال المعارضة يتململون ويتتضايقون ، ويسخرون من كتاباته . وللرئيس الازهرى اخطاءه وحسناته . كان يمكن ان تناقش ولكن لماذا كان الهجوم عنصرياً وبدون وجه حق .
الشتائم اتت في شكل ، ان الازهري فلاتي. واننا لسنا من الذين حضروا مربوطين علي ظهور امهاتهم . اشارة الي مهاجري غرب افريقيا. وكانوا يصفونه بابوالقدح وتخصصت جريدة الناس لصاحبها محمد المكي في الهجوم وشتم الرئيس الازهري . وكان يختم مواضيعه بوصفه لطعام النيجيرين واهل غرب السودان(ناس قدوقدو درادم درادم زي رأس البني آدم) . وكانوا يشيرون له بابو اضان مقدودة واذكر ان اذن الرئيس الاذهري اليسري كانت مثقوبة وقديما كان السودانين وبعض زملائنا يحملون قمبور كنذر ، او يضعون لهم فدوة علي اذانهم ايعملوا ليهم درب الطير. وهو وشم او شلخ في شكل صليب وهذا امتداد للمسيحية ، لم ينتهي. او يعطوهم اسم قبيح . ويسموه اسم الفقر حتي لايموت الطفل ، او يصيبه ضرر . اسم عوض عوضية هو اسم الطفل الذي مات شقيقه او شقيقته الاكبر . وهذا تقليد دينكاوي شلكاوي ونويراوي .هو شول واشول (عوض وعوضية).
الغريب ان اللذين دافعوا عن الرئيس الازهرى وهم قله جداً ، كانوا ينفون ما يعتبروه تهمه . هو ان الازهرى فلاتى . وكأنما هذه سبه او اساءه يتبرأ منها الانسان وبسرعه .
في نهاية الثمانينات طلب مني صديق وهو شخص رائع وهو طبيب اخصائي في السويد ان اتصل بوالدته في مدني ، لكي اساعدها في الحصول علي فيزا سويدية والحضور مع ابن ابنتها لكي تنعم بالعلاج في السويد .
صديقي كان قد مكث عشرين سنة خارج السودان بدون ان يرجع . وكان يريد ان يحل مشكلة حضور والدته بدون ان يثير مشاعر الاخرين ، لان كل فرد في العائلة كان يحسب ان له الحق في ان يذهب الي اوروبا في صحبة السيدة الوالدة.
وبعد جهد ورحلات مكوكية الي مدني في ايام ندرة البترول, رفض الحفيد ان يسافر وكان هو والاسرة في حالة غضب شديد لان اسم جده كتب ابكر فى الجواز الجديد . وبذلت جهدا كبيرا في اقناعه ، واقناع الاخرين في انه يمكن ان يسافر بهذا الاسم ويغيره فيما بعد وفي النهاية غضبت الاسرة مني (كيف يشيل جواز مكتوب فيهو ابكر ، ليه هو فلاتي ؟ّّّ! ) . وبعدها رجعت مرة اخري للسودان كانت مشكلة الجواز لم تحل . وتوفيت والدة زميلي التي كانت تود في المكان الاول ان تشاهد ابنها قبل ان تنعم بالعلاج .
قبل بضعة شهور اتصل بي الابن الاخ وجدي الكردي رئيس تحرير جريدة حكايات ومعه ابناء رجل عرف ب ( س ) الفلاتي وهو مكافح محترم ومحبوب في امدرمان بدأ كبايع كتب يحملها علي ظهره ولقد ذكرته لانه باع ديوان احمد شوقي للشاعر التجاني يوسف بشير, وبسبب هذا الديوان طرد التجاني يوسف بشير من المعهد العلمي . فلقد زعم احد زملاء التجانى فى العهد العلمى عندما لامه على دفع ثمانين قرش على ديوان ، ان التجانى قال ان شعر شوقى خير من القرآن وكانت هذه كذبه .
اشرت له في كتاباتي بان بائع الكتب نيجيري لانه كان يلبس ما عرف بالزي النيجيري وهي جلابية خاصة وطاقية خاصة بدون عمة وعرف ب ( س ) الفلاتى . وكان الابن غاضبا يقول لي اني قد شتمت والده . فقلت له طيب انا لو قلت ابوك سعودي او قرشي كنت حا تزعل وتشتكي . فقال طبعاً لا . وقلت له نيجيريا اكبر دولة بها عدد سكاني في افريقيا وبها اكثر عدد من المسلمين . انحنا عرفنا ابوك نيجيري . انتو جنسكم شنو؟ . فقال لي نحن جعليين واذا قلت انو انحنا نيجيرين حا نعتبرها اهانة ونشتكيك . لان بعد ده مافى زول حيتزوج مننا ومافى زول حيحترمنا . فسألته اذا انتوا جعليين خشم بيتكم ياتو وشيخكم منو . فلم يعرف . فقلت له تفضل اشتكينى . ولحسن الحظ فشل محاميهم في ان يثبت أن كلمة نيجيري او فلاتي هي اساءة .
خالي حسن محمد صالح ابتر . رحل من منزلنا في امدرمان وسكن مع اخي كمال ابراهيم بدري وسكنا في منزلين متجاورين في حلفاية الملوك فى نهاية الستينات . وعمل حسن في مصنع النسيج وتدرج الي ان صار مديرا . وحسن رجل مرح خلوق خفيف الظل . الا ان طلبه للحصول علي قطعة سكنية كان يرفض . وفي النهاية عرف من اصدقائه في لجنة الاراضي ان اسمه كان يشطب لان حسن محمد صالح احد اعيان حلفاية الملوك . وله ما يكفي من المساكن . وطالبوه ان يربع الاسم .ورفض اسمه مرة اخري وبعد المراجعة قالوا له الموظف المسؤول كتب امام اسمك لا يوجد لان الاسم ابتر لغرابته غير لابكر . وقال له الموظف والله انا شفت ابكر قلت ما عندنا فلاتي هنا . فقال حسن مازحا ياخي انت ما قريت كتاب التاريخ صفحة 69 زاكرين ابتر فقال الموظف انت حفيد الزول الكان ببيع الناس ؟ . ثم قال له نحنا بنضمن ليك السنة الجاية قطعة ارض . وفي القرعة عندما سحب حسن قالوا له مبروك ناصية فقال حسن ناصية بس ؟ . وعندما رأي الغضب في وجه مسؤل الاراضي قال له (انتو اخرتوني عشرين سنه مفروض القطعة تكون مبنية وجاهزة وفيها بقالة في الركن ). ما هو الفرق بين خالي حسن الدنقلاوي الرطاني الذي لايزال يستمخ ويستمع للاغاني بلغة الدناقلة وابكر الفلاتي او الهوساوي او الغرابي ؟ انا فشلت ان اجد اي فرق .
في سنة 1987 كنت اجلس في طائرة الخطوط
الجوية السودانية المتجهة الي انجمينا وكانو ، وعلي يساري كان يجلس صديقي الفاتح ابو سم ، وعلي يميني كان يجلس ابن الاخت اسعد وهو شاب في العشرين وسيم (اصفراني) وهو حفيد البشير الريح وبما اننا كنا نجلس في مقدمة الطائرة , فلقد كانت المضيفة التي تخطت الاربعين تنادي علي الراكب ابكر بالميكرفون ، وعندما تكرر النداء والطائرة في حالة حر وكتمة قلت لها مشيرا الي اسعد ياهو دا ابكر. فتوقفت من النداء واكلت اسعد بنظراتها وقالت لي( ابكر شنو ؟ هسي ده شكل ابكر ) فندمت علي مداعبتها لانني لم استطع ان ارد عليها . لماذا نفتكر ان ابكر شخص غير وسيم او اقل من انسان .
عندما كان الاخ الاردني احمد عناب في مكتبنا في مالمو وهواردني ، وقد ارتبط طيلة حياته بالسودانيين ، منذ ان كان طالبا في موسكو في الستينات . تحدثت عن مسابقة جمال في الخرطوم في عام 1984 فقال احمد بكل عفوية . جمال ؟في جمال في السودان؟ . فقلت له مشيرا نحو الرشيد حامد وشقيقي اسعد بدري وحسين خضر ود الحاوي . ايوة في جمال في السودان . واجمل ناس في الدنيا هم الاثيوبيون رجالا ونساء . وهؤلاء ليسوا من البيض كما تظن انت ان الجمال مرتبط بالبيض . وابعد انسان عن الجمال في هذه الغرفة هو انت . والصدفة ان الثلاثة الذين كان يجلس معهم كانوا من اهل الوسامة.
وانا في العاشرة من عمري وفي السنة الاولي في المدرسة الوسطي اتانا مدرس نيجيري درس في معهد بخت الرضا لكي يتدرب في مدرستنا ( بيت الامانه ) قبل الذهاب للتدريس في نيجيريا. واذكر انه كان يقرا لنا من مجلة سنباد اللتي كانت تصدر في القاهرة وهي مجلة للاطفال . والقصة كانت بعنوان صائد الارانب. الا انه كان ينطقها صائد الارانيب وكنت اجلس في الصف الثاني بالقرب من الشباك الشرقي بجانب البوابة الرئسية وبجانبي طفل مشاغب اخر اسمة عكاشة حسن خضر من سكان الشهداء شارع ود البصير . وصرنا نتندر علي الاستاذ ونضحك عليه . الا انني لاحظت فجأة الاستاذ المرهوب فؤاد التوم ضابط المدرسة الذي ارتبط اسمه فيما بعد بناي الهلال ، كان يراقبنا من الشباك الغربي .وبعد الحصة تعرضنا للجلد المبرح وطرد عكاشة من المدرسة . وطلب منه الاستاذ فؤاد التوم ان لا يعود الا ومعه والده . فخطوت بدوري نحو البوابة . فطلب مني الاستاذ فؤاد التوم ان اذهب الي الفصل . وتعلمت ان الناس ليس سواسية .فبعد فترة شاهدت والد عكاشة يجلس مع بعض الرجال علي ظهر كارو ، بعد ان فرغوا من امر في ميدان المولد الذي كانت تعد خيمه للاحتفال بالمولد. ونحن كنا نحضر للمدرسة بسيارة فورد ضخمة يقودها سائق ببردلوبه . وكرهت التفرقة بين البشر . وخجلت وكرهت استخفافي بالاخرين . وعندما كان بعض اطفالي الصغار يسخرون من نطقي لبعض الكلمات السويديه ، اتذكر المدرس النيجيري في امدرمان.
عندما كنت اتصل بتوأم الروح بلة رحمة الله عليه تلفونيا . كنت اتصل بالحبيب صلاح عمر في العباسية فريق فلاته . الذي كان يرسل من يأتي بصديق عمره وجاره بلة رحمة الله عليه . هذا قبل ان تتوفر التلفونات في السودان . امثال الاخ صلاح عمر هو ما يعرف بالسوداني ود الناس ، صخرة صمود في مجتمعه . يقف في كل حارة يؤتمن علي المال والعرض يبعث المغتربون تحويلاتهم عن طريقه يؤتمن علي المال والسر والعرض. اذا كان امثال صلاح عمر ليسوا بسودانيين فأنا من المؤكد انني برازيلي . فصلاح عمر خير مني دينا وادبا وعملا وهو فخر لمجتمعه.
التحية
ع . س شوقى ...
قديماً كتبت هذه النقاط ونسيتها بعد ان نشرت . والآن اجد ان النقطه الحاديه عشر تمثل ما يحدث الآن ...


في انتظار صديق
الاسبوع الماضي وانا في انتظار صديق تأخر كعادة السودانيين امسكت بقلم وكتبت.
1- عندما يعتزر لك صديق بعد خلاف لاتنسي ان تشكره كثيرا لانه قام بما فشلت انت في عمله
2-اذا بدأت تحس بأن اللذين ساعدتهم قد نسوك , حاول ان تتذكر مباشرة عشرة(10) اشخاص ساعدوك. لن تقدر.
3- اذا كنت تظن ان صديقك يحسدك, فكر في انه يحسدك لان لك ما ليس له, صديق وفي
4- اذا اردت ان تدين صديقك اللذي لم يهب لنجدتك, فلتتأكد من انه لازال يتعافي بعد ان باع كليته.
5- اذا صفعك شخص ورددت عليه بصفعة واحدة, فسوف يكون متفوقا عليك بنقاط المبادرة
6-اذا عودت الناس بأن لاترفض لهم طلبا , فأستعد, بمنديل في يدك لانه بعد البصق علي وجهك سيطالبونك بأن تمسح فمهم.
7-اذا كنت تتوقع الكرم والشجاعة طول الوقت من الكريم الشجاع, فسوف تتأسف لان الكرم والشجاعة ليست ذهبا يخرج من خزينة بنفس مقداره كل مرة.
8- اذا حسبت ان فاتورة التعليم كبيرة, فسيجبرك الجهل ان تدفع اكثر
9- اذا كنت تحسب ان تنظيرك يحل المشاكل فلتحاول ان تجد الحل عندما تكون هنالك مشكلة. فمن السهل التنبؤ إلا فيما يتعلق بالمستقبل.
10- اذا وجدت امة ليس لها مسرح فتأكد من ان تلك الامة لم تتكون بعد,
11ـ اذا دليتنى على بلد تحتقر فيه فئه فئه اخرى لدليتك على بلد فى طريقها الى الجحيم .

شوقي,,,

[مبر محمود]

تحيّاتي يا سيدي..
هذا موضوع في غاية الأهمية، يتتبّع ظاهرة سلوكية "مجتمعية" في غاية القبح..
اللا إنسان في رائي هو ذلك الذي ينظر لإنسان أخر بعين الإستعلاء والإستحقار
ليتك تواصل الكتابة في هذه الموضوعه، وليت الجميع يتدافعون للكتابة معك فيها، فلا شئ الأن يهدد سلامنا الوطني سواها

[مهند الخطيب]

تحيّاتي يا سيدي..
هذا موضوع في غاية الأهمية، يتتبّع ظاهرة سلوكية "مجتمعية" في غاية القبح..
اللا إنسان في رائي هو ذلك الذي ينظر لإنسان أخر بعين الإستعلاء والإستحقار
ليتك تواصل الكتابة في هذه الموضوعه، وليت الجميع يتدافعون للكتابة معك فيها، فلا شئ الأن يهدد سلامنا الوطني سواها

ختام مداخلتك يامبر نجمة عالية .....

فعلا فلا شئ يهدد الوطن كما يهدده الاستعلاء والاحتقار للآخر.....

عمنا شوقي سلام ياعزيز .....

[عبدالمنعم الطيب حسن]

العنصرية قاتلة
لعن الله من يوقظها
للاسف في السودان القبلية متفشية
وزادتها الحكومة والاغتراب
توغلا
الحكومة معروفة
كيف الاغتراب ؟
الاغتراب غير انه يجمع ناس الحلة في مكان واحد
على اساس قبلي
وهنالك مشاكل اخري خاصة في الدول العربية
خد ابوبكر*مثلا قبل يغترب كان يعتقد انه عربي قح
جاء لقى العرب غير معترفين بعروبته
دعك عن قحوحيتها
واكتشف انه مختلف عنهم كمان من ناحية الجينات
ولكنه اصرعلى هذا الامتياز الفارغ الذي يبدو كامر مفرغ منه في محيطه
فانكفى علي نفسه عربيا اكثرخاصة لمن يكون في السودان

استاذنا شوقي بدري شكرا لهذا الموضوع العميق وتحياتي لك ومن معك
*ابوبكر دا مثال لمغترب شمالي خريج جامعي او فاقد تربوي لا فرق

[azzam_farah]

السَيِد الفاضِل / شَوقي بدري
كيف حالك؟ علك طَيِب

هو الفرق بين خالي حسن الدنقلاوي الرطاني الذي لايزال يستمخ ويستمع للاغاني بلغة الدناقلة وابكر الفلاتي او الهوساوي او الغرابي ؟ انا فشلت ان اجد اي فرق

نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي.

[مبر محمود]

السَيِد الفاضِل / شَوقي بدري
كيف حالك؟ علك طَيِب



نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي.
السيّد الفاضل/ عزّام فرح
الدنقلاوي والفلاتي كليهما إنسان
العراقة والأصالة في زمننا هذا لا تحددها الأقدمية في الجغرافيا..
فالـ"عالم" الأن يحكمه زنجي كيني من داخل البيت الأبيض الواشنطوني

[رأفت ميلاد]

سلامات الحبيب شوقى بدرى

قصة أبو الزهور فلاتى قصة مضحكة جداً .. السودانيين عندهم شغل فخر عجيب .. زى إدعاء عدد من الرؤساء الأفارقة من أصول سودانية .. مثل بوكاسا وعيدى أمين وغيرهم .. إذا كان الأمر حقيقة أو إدعاء فارغ .. فهو مدعاة للفخر بأن سوادنى وصل الى رئيس دولة .. فالفلاتة لهم نفس حق الفخر بأن أحدهم صار رئيس دولة :)

والله العظيم يا شوقى .. لم أحس فى عمرى بأن هناك رئيس يحكمنى بكل الولاء والفخر به سوى الزعيم إسماعيل الأزهرى ..

قلت لى كلاهما أعجمى يا عزام :D:D ياخ كان والله كان يوم أسود يوم ما دخلتنا اللغة العربية ..

[أبوبكر عباس]

السَيِد الفاضِل / شَوقي بدري
كيف حالك؟ علك طَيِب

نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي.
يا مُبر بالغتا يا أخي!
أعتقد انو صديقنا القديم الجديد عزام قاصد ب
الأصالة و العراقة قاصد بيها القُدم
ما في أتنين تلاتة
الدناقلة قديميين قُدم شديد
كشجرة
عرقها ثابت
و أصلها في السماء

مرحب بعودتك يا عزام

[سارة]

السَيِد الفاضِل / شَوقي بدري
كيف حالك؟ علك طَيِب



نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي.

الاخ الكريم ممكن تشرح لو سمحت ماذا تعنى بحداثة الفلاتى؟؟؟
قلت لى السودانى الشمالى كله عراقة مخير الله فى ملكه

عم شوقى وضيوفه سلام

[عكــود]

قلت لى السودانى الشمالى كله عراقة مخير الله فى ملكه


سلام يا سارة،

الأخ عزّام ما قال كده.
قال الدنقلاوي النوبي، مافي واحد في السودان الشمالي يدانيه في العراقة.

مع تحيّاتي لشوقي.

[سارة]

سلام يا سارة،

الأخ عزّام ما قال كده.
قال الدنقلاوي النوبي، مافي واحد في السودان الشمالي يدانيه في العراقة.

مع تحيّاتي لشوقي.


مرحب يا عمدة اعتذر لم اقصد بس سؤالى قائم

[أبوبكر عباس]

الاخ الكريم ممكن تشرح لو سمحت ماذا تعنى بحداثة الفلاتى؟؟؟
قلت لى السودانى الشمالى كله عراقة مخير الله فى ملكه

عم شوقى وضيوفه سلام
و عليكم السلام سارا
حداثة الفلاتي تعني حديث و جديد بالمنطقة

[سارة]

و عليكم السلام سارا
حداثة الفلاتي تعني حديث و جديد بالمنطقة

بابكر سلامات واريتك طيب
سؤال عم شوقى واضح وهو استنكاره طالما ان كليهما اعجمى
لماذا التفريق بينهم ولماذا التقليل من شان الفلاتى واطلاق لفظ فلاتى
على غير الفلاتة لمعايرتهم دا بابكر سؤال عم شوقى حسب تفسيرى
ولو أنا مخطئة فى التفسير صححونى ولما ياتى الرد السبب انه{ كلاهما اعجمى
ولكن الفرق عراقة الدنقلاوى وحداثة الفلاتى } هنا يبقى تفسيرك
للحداثة بمعنى تواجدهم حديثا بالمنطقة غير مبلوع على الاقل بالنسبة لى
وهنا ارى فى رد مبر هو المنطق الطبيعى لفهم المداخلة

شاكرة ومقدرة جدا توضيحك يا بابكر

[الأغبش]

سلام علي الجميع ...
أستاذ الأجيال شوقي بدري .. إسمح لي هنا أن أختلف معك مع إني أعلم أنك لن ترد علي مداخلتي هذه ..
لاحظت في الفترة الأخيرة أنك تطرق مواضيع فيها مافيها من النعرة القبلية وإن كان من زاوية الدفاع عن المهمشين والمظلومين ...بداية بأبناء النوبة والآن الفلاته ..
لا أريد أن أجادل في مدي صحة ما سقته من مواقف ..ولا حتي ما تأصل في نفوس السودانيين في فترات سابقة ..وحتي إن كان بعضه ما يزال موجوداً ..
أولاً ماجدوى الحديث عن هذه المواقف الآن تحديداً وحالنا لا يسر صديق ..هل الحديث فيها حتي وإن كانت صحيحة سيعالج جذور المشكلة أم سيأجج نيران الغضب والحقد لدي فئة من السودانيين ..
ثانياً .. كل ما سقت من مواقف يمكن إعتبارها فردية وإن أراد غيرك اتباع نفس المنهج في التعميم يمكنه أن يجد ما يماثل هذه المواقف في الإتجاه المضاد ..
ثالثاً ..كثير مما تستشهد به مر عليه أكثر من خمسين عاماً .. هل تريد محاسبة أجيال اليوم بأثر رجعي ؟؟

رابعاً .. في كل العالم حتي الأول منه هناك مشاكل إجتماعية في تاريخ أي أمه ..بعضها تخلص منها نهائياً وبعضها جزئياً ولم تكن وسيلة العلاج عندهم إثارة النار تحت الرماد ..

خامساً .. كثيراً ما يظلم الإنسان أخيه الإنسان وما أقبحه من ظلم فكلنا لآدم وآدم من تراب .. وهي سويعات نقضيها في دنيا لا تسوى جناح بعوضة ..

عميق ودي وإحترامي

[سارة]

غبوش سلامات ومشتاقين والله

سبحان الله هسى كنت بقطع خلف المنبر فى عم شوقى..صحيح انه هو نصير
الضعفاء والمهمشين لكن عليك امان الله عم شوقى مرات كتيرة بزود العيار:D:D:p

غايتو لو فيها عكة ولا كوماج انا دا طرفى من البوست داlooool

[الأغبش]

غبوش سلامات ومشتاقين والله

سبحان الله هسى كنت بقطع خلف المنبر فى عم شوقى..صحيح انه هو نصير
الضعفاء والمهمشين لكن عليك امان الله عم شوقى مرات كتيرة بزود العيار:D:D:p

غايتو لو فيها عكة ولا كوماج انا دا طرفى من البوست داlooool
سروره ... والله الشوق مطر أغسطس
استاذنا شوقي مرجع في التاريخ السوداني بما له من ذاكرة خارقة وبما أتاحته له ظروف نشأته وتنقلاته داخل وخارج السودان لذا فحديثه ليس كحديث غيره .. وهنا تكمن خطورة وعمق تأثير ما يكتب ...فلو زاد العيار عنده سيُحرق بدل أن يُطفئ ..

انا ذاتي قلت كلامي ومارق ...علي طريقة شوقي بدري :p

[أبوبكر عباس]

الشتائم اتت في شكل ، ان الازهري فلاتي. واننا لسنا من الذين حضروا مربوطين علي ظهور امهاتهم . اشارة الي مهاجري غرب افريقيا. وكانوا يصفونه بابوالقدح وتخصصت جريدة الناس لصاحبها محمد المكي في الهجوم وشتم الرئيس الازهري دكتور عبد الله علي إبراهيم لمح إلى انو دكتور منصور خالد ممكن يكون هو الكتب الكلام بتاع انو الازهري فلاتي بجريدة الناس و ذلك لصالح عبد الله خليل (كسب سياسي).
خلونا يا جماعة نكون عمليين،
في الوقت الراهن الرأي العام السوداني ما ممكن يقبل التمييز العرقي بشكل معلن,
لكن في الخمسينات لو الأزهري طلع فلاتي و الله ما يفوز
مستقبلا الإنتساب لقبائل الأطراف (المهمشين) - حسب السياسيين- ، ممكن يكون بصب في صالح الكسب السياسي.
رئيس السودان القادم أكيد ح يكون من كردفان أو دارفور أو النيل الأزرق
و ح يظهر كيد سياسي جديد يقولوا فيهو المرشح الفلاني دا فيهو عرق بحر!

[سارة]

سروره ... والله الشوق مطر أغسطس
استاذنا شوقي مرجع في التاريخ السوداني بما له من ذاكرة خارقة وبما أتاحته له ظروف نشأته وتنقلاته داخل وخارج السودان لذا فحديثه ليس كحديث غيره .. وهنا تكمن خطورة وعمق تأثير ما يكتب ...فلو زاد العيار عنده سيُحرق بدل أن يُطفئ ..

انا ذاتي قلت كلامي ومارق ...علي طريقة شوقي بدري :p

يديك الف عافية

ابصم على ما قلته يعنى انحنا بنقول ناس الشمال عنصريين
ولما يجى عم شوقى يفتل ليهم فى حبالهم اقصد يتعنصر لفئة معينة حتى لو كانت
مهمشة اهو بخلى اى زول يثور وما مداخلة احد الاخوان وردى عليه الا نتاج
صغير لخطورة تاثير ما يكتبه عم شوقى شفت كيف{ اعتراف ضمنى بالعنصرية}

بس انا شايلة نعلاتى فى ايدى ودا طرفى من البوست دا:p
لك وللحلوين حولك كل المحبة

[فتحي مسعد حنفي]

ياجماعة أخونا شوقي ما قال حاجة غلط والنعرة القبلية العنصرية بالفعل متأصلة في نفوس السودانيين بمختلف انتماءاتهم..وحتي داخل القبيلة الواحدة هناك خيار وفقوس وأهل أخونا شوقي الرباطاب عندهم تقسيمات فئوية للرباطاب أدناها كما يقولون التمارة مع انهم كلهم رباطاب..
أما أخونا عزام ربما يكون خانو التعبيرفجاء كلامه غير محدد لما يريد ايصاله لنا..
بالمناسبة أنا كنت برضو بعتبر الفلاتة درجة أدني من باقي القبائل السودانية لغاية ما مشيت السنغال (داكار)في ضيافة أحد السنغاليين وهناك رأيت الفولاني أو الفلاتة كما نطلق عليهم علي حقيقتهم وعرفت ان قبيلة الفولاني هي أكبر قبيلة في أفريقيا وهي قبيلة عريقة تتواجد في معظم دول غرب أفريقيا..
في داكار رأيت شعب نظيف منظم يعيش حياة عصرية جعلتني أتحسر علي الشعب السوداني وتذكرت انتي يالكبرتوك والبنات فاتوك.وشكلنا كدا دولة الجنوب برضو حتنضم للفاتونا وحنفضل احنا زي ما احنا نصنف في الناس .دا فلاتي وديك خاساوية وفلان فيهو عرق..عرق ان شالله يطق ليكم في راسكم..

[حافظ حسين]

سلام علي الجميع ...
أستاذ الأجيال شوقي بدري .. إسمح لي هنا أن أختلف معك مع إني أعلم أنك لن ترد علي مداخلتي هذه ..
لاحظت في الفترة الأخيرة أنك تطرق مواضيع فيها مافيها من النعرة القبلية وإن كان من زاوية الدفاع عن المهمشين والمظلومين ...بداية بأبناء النوبة والآن الفلاته ..
لا أريد أن أجادل في مدي صحة ما سقته من مواقف ..ولا حتي ما تأصل في نفوس السودانيين في فترات سابقة ..وحتي إن كان بعضه ما يزال موجوداً ..
أولاً ماجدوى الحديث عن هذه المواقف الآن تحديداً وحالنا لا يسر صديق ..هل الحديث فيها حتي وإن كانت صحيحة سيعالج جذور المشكلة أم سيأجج نيران الغضب والحقد لدي فئة من السودانيين ..
ثانياً .. كل ما سقت من مواقف يمكن إعتبارها فردية وإن أراد غيرك اتباع نفس المنهج في التعميم يمكنه أن يجد ما يماثل هذه المواقف في الإتجاه المضاد ..
ثالثاً ..كثير مما تستشهد به مر عليه أكثر من خمسين عاماً .. هل تريد محاسبة أجيال اليوم بأثر رجعي ؟؟

رابعاً .. في كل العالم حتي الأول منه هناك مشاكل إجتماعية في تاريخ أي أمه ..بعضها تخلص منها نهائياً وبعضها جزئياً ولم تكن وسيلة العلاج عندهم إثارة النار تحت الرماد ..

خامساً .. كثيراً ما يظلم الإنسان أخيه الإنسان وما أقبحه من ظلم فكلنا لآدم وآدم من تراب .. وهي سويعات نقضيها في دنيا لا تسوى جناح بعوضة ..

عميق ودي وإحترامي

سلام يا الأغبش
يا أستاذ شوقي بدري و المرور الكرام ما دعاني للتداخل هنا تلفون صبح الرحمن من الطاهر علي الفلاتي ... الطاهر زميل دراسة و شقيق أوجاع ما عنده حساب هنا و أتمني يسجل و يجي يكتب أوجاعه و أوجاع أهله. إتصل علي لأن شوقي بدري عبر عنه و كتبه شكراً يا شوقي بدري و يا الطاهر بكره جميل طالما خرج من صلب تجار الرقيق و إنحاز للإنسانية إنسان مثل الأستاذ شوقي بدري. أتصل حاثني علي قراءة هذا البوست و فيه وجدت العجب العجاب و خلينا نبدأ بالأغبش.
في البداية يا الأغبش إسمح لي من خلال مداخلتك دي أحي عمنا الأستاذ شوقي بدري الذي تجاوز صلف و غرور أجداده و صار أجمل و أسمي و عقبال لأحفاد تجار الرقيق البقية أن يسلكوا نفس السلوك بدل ما يطلعوا الزبير باشا بطل و يعملوا ليه شارع ... شوقي بدري هنا تفوق علي ذاته و كتب عن المسكوت عنه في ركام الكراهية و الخوف هذا .. ففيما يكتبه و كتبه شوقي بدري ردود الافعال حوله تختلف , و كدي نشوف إختلاف ردك يا الأغبش. قلت لي ملاحظ أن شوقي بدري في الأونة الأخيرة بدأ يكتب مصحياً النعرات القبيلة في هذا المنعطف الخطير؟ إن لله من هذا المنعطف, يا أخوانا المنعطف الخطير دوماً دا حنتجاوزه كيف و متين لو ما الناس كتبت؟ و الله يا الأغبش مداخلتك دي اقل وصف ممكن الزول يوصفه بيها أنها مداخلة سخيفة و تفتقر للحس الإنساني .. يا خي إنت وقت ما وصلت مرحلة إنتقاد و التبرأ من سلوك أجدادك حاول تشجع الناس الوصلت المرحلة دي ما تقيف قدامهم بعبارات صحيان النعرات القبلية و النسيج الإجتماعي الذي في خطر و الخ من الكلام الممجوج ....يعني في البداية أنت بتعترف أن في مشكلة لكن مفروض ما يصحيها زول زي شوقي بدري , زي فكرة يا خي هم ما عارفين داير تعرفهم ليه؟ أو الفتنة نائمة لعن الله من أيقظها ... لكن نطمنك و الله الناس دي عارفة و شغالة كويس ترتب في صفوفها و مرحب بشوقي بدري في مجموعة الحقوق المدنية.
نجيك في ثانياً دي يا الأغبش قلت شوقي بدري بكتب عن أحداث فردية , أنا معاك هي مواقف فردية جداً لكن المواقف الفردية دي هي البنتج الفعل الجماعي , فالسؤال هنا المواقف دي حصلت و لا لا؟ و بعدين قصة فردية دي ما بتمرقك و لا بتماسكك لان يا حبيب في ابجديات البحث العلمي في البداية الشعور بالمشكلة و بعدين بجي تحليل و تقييم هل المشكلة دي حقيقة و لا مفتعلة ...هسي يا حبيب أستاذ شوقي بدري شعر بمشكلة ما, إنت كيف شعرت و لا محتاج لزمن؟.... المهم يا الأغبش كما اسلفت و تاني اسلف شوقي بدري حس أن هنالك مشكلة بعد دا بجي دور المؤرخين و علماء الإجتماع, علماء النفس و الخ إذا كان هنالك علماء امينون في هذه البلد الزفت , يجوا يشرحوا المشكلة دي يشوفوا الأسباب و المألات و بعدين يضعوا الحلول.
في ثالثاً ان ما يستشهد به شوقي بدري مر عليه أكثر من خمسون عام و لماذا يحاسب عليه أجيال اليوم؟
شوف يا الأغبش ما قاله شوقي بدري مر عليه أكثر من خمسون عام لكن حتي الان يمارس بكل الفجاجة و عشان ما أجيب ليك أمثلة من بعيد شوف المنبر دا بس يوم أمس , في بوستين فاتحنهم ابودعد و النقر حتعرف من كلام أم التيمان البشع لعلاء في مخاطبته ب (أنا ستك) و رد علاء الأكثر بشاعة الذي لم يستنكر كلمة ستك و إنما بلعها دون أن يرف له حلق و رد برد أكثر بشاعة متهكماً و معرضاً بشريحة كاملة من المجتمع البدون و هن ستات الشاي, ... المهم الادارة خجلت و قفلت البوست لكن فتشه بتلقاه*, شوف بوست النقر البتهكم فيه علي ناس فقط الفارق بينه و بينهم لون مزعوم ... علي فكرة حسب زمني السابق أن أم التيمان و علاء من رواد التنوير ( و أحب التنوير السوداني ذاتو)... يا الاغبش الموضوع ما مر عليه خمسين سنة الموضوع بتمارس في كل يوم و كل لحظة , لفظ خدم و عبيد بنسمعه في أي ملف, جعلي حر أصابتنا بالطرش, أولاد اصول , سوداني ود بلد ... إنت عارف الكلام دا بحصل الليله ليه؟ و حيحصل بكرة و بعد بكرة لانو لسا ما طلع عدد كافي من أمثال شوقي بدري لإدانة مثل هذه الممارسات و بالتالي وضع الحلول.
في رابعاً دي معاك أن كل العالم مر بمثل هكذا تجارب و منهم من تخلص و منهم من ينتظر لكن الناس الاتخلصوا جزئياً من هذه النعرات كما تدعي أتخلصوا منها كيف؟
بالتأكيد ما إتخلصوا منها بعقلية عفي الله عما سلف, و يا أخوانا الفات مات, و يا أخوانا نسيجنا الإجتماعي في خطر , لكن إتخلصوا منها بنقد صارم و مخلص للذات بنضال شرس وصل في كثير من الأحيان حد الموت , نضال تجرجر فيه أبناء و بنات المضهدون الي دوائر الانسانية و لك في حراك جنوب أفريقيا قدوة حسنة شفت كم من البيض رفضوا أمتيازاتهم التي بالميلاد عندما حكموا ضميرهم الإنساني, حركة الحقوق المدنية في أمريكا و القائمة تطول يا صاحب.
يا خي خامساً دي لقطة مداخلتك كلها , قلت لي الانسان يظلم أخيه الإنسان و نحن في الأرض دي بنتم سويعات بس صاح ...شكلك داير تقول ما دام بنتم سويعات بس الجرجرة في شنوو الجعلي تم يومه خنق ما نصبر لحد ما ربنا يشيل أمانته و نلقي بقادي جنة و حور عين.... يا زول هوي الكلام دا تقوله لزول ما عنده حديدة و ديني أنا شغلي الشاغل في الدنيا دي لو فضلت لي دقيقة خليك من سويعات حاخليها لمحاربة العنصرية و الإستعلاء بكافة أشكاله
المهم بجي راجع تاني لمداخلة بابكر عباس و مداخلة أخري تدس السم في الدسم, كما لا ننسي الأقليات الذين يتبنون أيدلوجيات قهرهم تحت الشعار الإنتهازي القائل (يا المركز اقبلنا نحن متسامحين)

[حافظ حسين]

سلام علي الجميع ...
أستاذ الأجيال شوقي بدري .. إسمح لي هنا أن أختلف معك مع إني أعلم أنك لن ترد علي مداخلتي هذه ..
لاحظت في الفترة الأخيرة أنك تطرق مواضيع فيها مافيها من النعرة القبلية وإن كان من زاوية الدفاع عن المهمشين والمظلومين ...بداية بأبناء النوبة والآن الفلاته ..
لا أريد أن أجادل في مدي صحة ما سقته من مواقف ..ولا حتي ما تأصل في نفوس السودانيين في فترات سابقة ..وحتي إن كان بعضه ما يزال موجوداً ..
أولاً ماجدوى الحديث عن هذه المواقف الآن تحديداً وحالنا لا يسر صديق ..هل الحديث فيها حتي وإن كانت صحيحة سيعالج جذور المشكلة أم سيأجج نيران الغضب والحقد لدي فئة من السودانيين ..
ثانياً .. كل ما سقت من مواقف يمكن إعتبارها فردية وإن أراد غيرك اتباع نفس المنهج في التعميم يمكنه أن يجد ما يماثل هذه المواقف في الإتجاه المضاد ..
ثالثاً ..كثير مما تستشهد به مر عليه أكثر من خمسين عاماً .. هل تريد محاسبة أجيال اليوم بأثر رجعي ؟؟

رابعاً .. في كل العالم حتي الأول منه هناك مشاكل إجتماعية في تاريخ أي أمه ..بعضها تخلص منها نهائياً وبعضها جزئياً ولم تكن وسيلة العلاج عندهم إثارة النار تحت الرماد ..

خامساً .. كثيراً ما يظلم الإنسان أخيه الإنسان وما أقبحه من ظلم فكلنا لآدم وآدم من تراب .. وهي سويعات نقضيها في دنيا لا تسوى جناح بعوضة ..

عميق ودي وإحترامي

دكتور عبد الله علي إبراهيم لمح إلى انو دكتور منصور خالد ممكن يكون هو الكتب الكلام بتاع انو الازهري فلاتي بجريدة الناس و ذلك لصالح عبد الله خليل (كسب سياسي).
خلونا يا جماعة نكون عمليين،
في الوقت الراهن الرأي العام السوداني ما ممكن يقبل التمييز العرقي بشكل معلن,
لكن في الخمسينات لو الأزهري طلع فلاتي و الله ما يفوز
مستقبلا الإنتساب لقبائل الأطراف (المهمشين) - حسب السياسيين- ، ممكن يكون بصب في صالح الكسب السياسي.
رئيس السودان القادم أكيد ح يكون من كردفان أو دارفور أو النيل الأزرق
و ح يظهر كيد سياسي جديد يقولوا فيهو المرشح الفلاني دا فيهو عرق بحر!

و الله يا بابكر عباس شكلك ما بتعرف مصطلح (الكلام الساي) القاعد تقوله , لكن نوريك ليه كلامك الفوق دا بس يا هو (الكلام الساي) و كمان طق كيبورد في الفاضي ما أكتر, الراي العام السوداني شنو الفي الوقت الراهن ما بقبل التمييز العرقي دا؟ دا راي سوداني موديل يوليو 2011 و لا شنو؟
يا خي إنت مش قبل فترة فاتح ليك بوست حدادي مدادي بتتكلم فيه عن التمييز العرقي في السودان, البوست الفيه الناس إنداحت بكل هذه التممايز العرقية , بوست علي شاكلة دا فيه عرق ما بندي بتنا, و ما عارف الفلاتي المهذب, و الجنوبي الجميل, الغرابي سيد البلد و الخ ... علي فكرة أنا ما عندي أي تحفظ أو مشكلة مع البوست داك و علي العكس أفتكرته خطوة الي الامام في محاربة العنصرية و التمييز العرقي أنو الناس تجي تتكلم.
لكن الما قادر أفهمه يا بابكر عباس قبل اقل من شهرين تفتح بوست زي دا تشتكي فيه لطوب الأرض عن التمييز العرقي و هسي تجي تقول الراي العام السوداني موديل يوليو 2011 ما بقبل التمييز العرقي؟
يا أخوانا بالجد بتجننونا بالصورة دي.

بعدين تحليلك للرأي العام السوداني الما بقبل التمييز علي أساس عرقي دا اوعي يكون مبني علي الملاحظات اليومية السخيفة دي, زي الأحزاب البتجيب ليه زول من الهامش تخته في لجنتها القائدة, الزول البتبني أيدلوجية قهره و قهر أهله و تجي تقول ليك السودان تمام ما دام أكس في قيادة الحزب الفلاني, أو تكون بانيه علي منظمات السجم المدني دي البتوظف ليها جنوبي أو غرباوي تكف بيه شر العين العنصرية و تجي تتبجح علي الخواجات أولياء النعمة أنها بتوظف الاقليات؟
غايتو يا حبيب لو بانيه علي الأحداث السخيفة دي شوف ليك حل و مراقة تانية لهذا الراي العام السوداني الما ممكن يقبل التمييز العرقي.
اها و طوالي قلبت الهوبة و حددت رئيس السوداني القادم حيكون من وين؟
و الله يا أخوانا دق الكيبورد هين

أخيراً كدا يا خي بالجد داير أعرف في اي كتاب منصور خالد قال أو لمح أن عبدالله علي إبراهيم كان بعاير الأزهري أنه فلاتي ؟

[حافظ حسين]

يديك الف عافية

ابصم على ما قلته يعنى انحنا بنقول ناس الشمال عنصريين
ولما يجى عم شوقى يفتل ليهم فى حبالهم اقصد يتعنصر لفئة معينة حتى لو كانت
مهمشة اهو بخلى اى زول يثور وما مداخلة احد الاخوان وردى عليه الا نتاج
صغير لخطورة تاثير ما يكتبه عم شوقى شفت كيف{ اعتراف ضمنى بالعنصرية}

بس انا شايلة نعلاتى فى ايدى ودا طرفى من البوست دا:p
لك وللحلوين حولك كل المحبة




المقهور و القاهر في سرج واحد .... يا خي دي ديمقراطية و تسامح زي الليل... هسي عليك الله يا سارة قولي للناس هنا عمي شوقي أتعنصر وين لفئة محددة, شوقي بدري أورد حقائق كونها ما عجبت بعض العنصريون دي أبداً ما مشكلته عشان تجي تصفيه بالتعنصر ... غايتو مداخلتك دي إسمها زر الرماد في العيون مع سبق الإصرار و الترصد.
يا سارة جيتي رديتي هنا علي كلام محدد الناس طارت فيك جوز قالوا ليك ردك دا ما كدا و الزول دا ما قاصد كدا طوالي ختيتي القاهر و المقهور في نفس الخانة و بتديتي تبرري... معقولة بس ؟
يا سارة فلنفرض جدلاً أن المقهور, الهامش , الأقليات أو سميه كما تشأئين كان عنصري , هل سألتي نفسك أن عنصريته دي ممكن تكون رد فعل لعنصرية و أفعال بشعة أخري؟

يا خي كيف دايرة زول في يوم من الأيام باعوه و إشتروه , و ما وقفوا في الحد دا لكن لحد هسي بتباهوا و بفتخروا بعاميل اجدادهم, يسموا عليهم شوارع, يكتب فيهم شعر, يغنوا فيهم و يطالبوك كمان ترقص... يعني كيف زول زي كدا تطالبيه ما يكون عنصري, و من باب أولي لك ثم أولي تشوفي المشكلة وين, يعني بدل ديل ما يعتزروا عن عمايل و أفعالهم كمان يمجدوها و نجي نمجد معاهم , دي محن شنو دي؟
غايتو يا شوقي بدري جاتك محنة سودانية جديدة اديها رقم.

[سارة]

حافظ حسين سلامات واريتك طيب

مع احترامى لك وللعم شوقى بدرى..انا قلت عم شوقى نصير المقهورين والمهمشين
لكن احيانا بعض كتابته انا سارة بشم فيها التعنصر لفئات معينة وانسان زى عم شوقى
وتأثير كتابته { صاحبك الفلاتى قريبى مثالا} يجب على عم شوقى ان يضع فى حسابه
ان كتابته قد تكون سلاح ذو حدين ..البوست الموضوع على صدر البانر..أعظم ابطال
السودان كانوا من النوبة هذا العنوان فيه عنصرية واضحة بصرف النظر عن من هم
النوبة وماذا عانوا ..يعنى عم شوقى مد الله فى ايامه ومتعه بالصحة والعافية مثل هذا
النوع العنوانين ممكن يفتح مجال كبير للتعنصر يعنى لو جاء عكود كتب اعظم
ولا اشرف
ابطال السودان كانوا من الشايقية ولا جاء بابكر عباس وكتب اعظم
اهل السودان هم من مدنى ولا جا جعلى كتب عن الجعليين والله كان قامت الدنيا وما قعدت

حافظ يا اخوى لم انتقد عم شوقى للتقليل او القدح فى وطنيته لا سمح الله ولكن
اهمية ما يكتبه عم شوقى وخطورة تاثير مفرداته ومواضيعه هو ما جعلنى اقول
هذا الكلام وفى النهاية تبقى وجهات نظر

لك وللعم شوقى كل المحبة كاملة غير منقوصة:cool:

[أبوبكر عباس]

و الله يا بابكر عباس شكلك ما بتعرف مصطلح (الكلام الساي) القاعد تقوله , لكن نوريك ليه كلامك الفوق دا بس يا هو (الكلام الساي) و كمان طق كيبورد في الفاضي ما أكتر, الراي العام السوداني شنو الفي الوقت الراهن ما بقبل التمييز العرقي دا؟ دا راي سوداني موديل يوليو 2011 و لا شنو؟
يا أخي عبارتي كانت محددة جدا:
في الوقت الراهن الرأي العام السوداني ما ممكن يقبل التمييز العرقي بشكل معلنبشكل معلن دي أنا ما كتبتها ساي، لكن لو داير ترد لي كلمة "ساي" بتاعتي، بشيلا منك و أقول ليك: بضاعتنا رُدّت إلينا
الكلام دا زمان كانوا بكتبوهو في الجرايد، حاليا ما في زول بقدر يقول الكلام دا بشكل علني من غير ما الناس تنط ليهو في حلقو و والناس البنطو ليهو في حلقو بكونوا الأقربين ليهو، زي ما أنا نطيت لأمي في حلقها لما قالت لي:
ما لو العريس دا التقول فوقو عرق؟
بخصوص تلميح دكتور عبد الله تابع سلسلة مقالات د. عبد الله عن منصور خالد بتلقى انو دكتور عبد الله إتهم منصور خالد بأنو هو الكان بكتب في جريدة الناس بإسم مستعار
المقالات عندي مطبوعة بحاول لو مزاجي سمح ألقى ليك المقال اللمح فوقو (خلي بالك من كلمة "لمح" الإستعملتها أنا)، لانو ما ح أقبل أكتر من الزرزرة الملمحة في الموضوع دا...

*على فكرة
مداخلتي "الساي" ديك كان عندي فيها مآرب أخرى و هي، جرجرة شوقي بدري للكلام عن تلميح د. عبد الله في منصور خالد

[حافظ حسين]

يا أخي عبارتي كانت محددة جدا:
بشكل معلن دي أنا ما كتبتها ساي، لكن لو داير ترد لي كلمة "ساي" بتاعتي، بشيلا منك و أقول ليك: بضاعتنا رُدّت إلينا
الكلام دا زمان كانوا بكتبوهو في الجرايد، حاليا ما في زول بقدر يقول الكلام دا بشكل علني من غير ما الناس تنط ليهو في حلقو و والناس البنطو ليهو في حلقو بكونوا الأقربين ليهو، زي ما أنا نطيت لأمي في حلقها لما قالت لي:
ما لو العريس دا التقول فوقو عرق؟
بخصوص تلميح دكتور عبد الله تابع سلسلة مقالات د. عبد الله عن منصور خالد بتلقى انو دكتور عبد الله إتهم منصور خالد بأنو هو الكان بكتب في جريدة الناس بإسم مستعار
المقالات عندي مطبوعة بحاول لو مزاجي سمح ألقى ليك المقال اللمح فوقو (خلي بالك من كلمة "لمح" الإستعملتها أنا)، لانو ما ح أقبل أكتر من الزرزرة الملمحة في الموضوع دا...

*على فكرة
مداخلتي "الساي" ديك كان عندي فيها مآرب أخرى و هي، جرجرة شوقي بدري للكلام عن تلميح د. عبد الله في منصور خالد

و يتواصل الكلام الساي ... الكلام المفكوك علي عواهنه .... يعني هسي معلن دي ياها مراقتك يا بابكر .... يا بابكر عباس أحب أطمنك لحد النهار دا الكلام دا معلن و بتكتب في الجرايد و كمان الأسافير .. هسي عليك الله الإنتباهة دي الكلام البتكتب فيه دا تسميه شنو؟
خليك من الإنتباهة البعيدة ديك ناس النقر, أم التيمان, و علاء و القائمة تطول من الكتاب البكتبوا هنا ديل تسميه شنو؟
خليك من الكتابة و شوف البيان بالعمل , الزبير باشا كأسوأ سوداني مشي علي وجه أرض السودان للكثيرون , الزبير باشا دا عاملين ليه شارع عديييييييييييييييييل و الأمر ما وقف هنا بس, الناس الخاته نفسها مستنيرة بدأت في الفترة الأخيرة تلمع فيه و تحاول تكتب ليه تاريخ جديد, تاريخ يتناسب مع المرحلة ... إعلان أكتر من كدا كيف؟

المهم فيما يختص بجرجرتك لشوقي بدري فيما يتعلق بتلميح عبدالله علي ابراهيم عن منصور خالد يا خي جرجرتك بخيتة و سعيدة عليك و انشاء الله أستاذ شوقي يجيك ....

بالله قلت لي منصور خالد لمح؟

[أبوبكر عباس]

بعدين تحليلك للرأي العام السوداني الما بقبل التمييز علي أساس عرقي دا اوعي يكون مبني علي الملاحظات اليومية السخيفة دي, زي الأحزاب البتجيب ليه زول من الهامش تخته في لجنتها القائدة, الزول البتبني أيدلوجية قهره و قهر أهله و تجي تقول ليك السودان تمام ما دام أكس في قيادة الحزب الفلاني, أو تكون بانيه علي منظمات السجم المدني دي البتوظف ليها جنوبي أو غرباوي تكف بيه شر العين العنصرية و تجي تتبجح علي الخواجات أولياء النعمة أنها بتوظف الاقليات؟
غايتو يا حبيب لو بانيه علي الأحداث السخيفة دي شوف ليك حل و مراقة تانية لهذا الراي العام السوداني الما ممكن يقبل التمييز العرقي.
اها و طوالي قلبت الهوبة و حددت رئيس السوداني القادم حيكون من وين؟
و الله يا أخوانا دق الكيبورد هين

انت يا حافظ طالب مننا نحن ديل أحفاد الناس المارسوا العنصرية ديل شنو؟
مجموعة كبيرة جدا مننا بتحارب في العنصرية دي و و صوتنا عالي جدا و نحن حاليا أول من يتصدى لأي عنصرية معلنة
أقول ليك شئ: حاليا في ونساتنا الخاصة أصبح الكلام بشكل عنصري عن الآخر أصبح صعب جدا.
الموضوع دا مشكلتو انو "أحفاد المقهورين" ما زالو بيعانوا من تبعات القهر النفسي، لكن في نفس الوقت لا يستطيعوا تحميل أحفاد "القاهرين" أكثر مما يجب لانهم ببساطة ما عندهم ذنب مباشر في الممارسات القديمة.
محاولة أحفاد المقهورين دفعنا لمربع ضيق ما ح يجيب نتائج إيجابية
الموضوع دا حلّو:
التسامح بعد إعترافنا الأدبي مما بدر من أجدادنا
مثلا شارع الزبير باشا دا ممكن نتفق على إزالة إسمو،

تعبتا هسع..

[حافظ حسين]

انت يا حافظ طالب مننا نحن ديل أحفاد الناس المارسوا العنصرية ديل شنو؟
مجموعة كبيرة جدا مننا بتحارب في العنصرية دي و و صوتنا عالي جدا و نحن حاليا أول من يتصدى لأي عنصرية معلنة
أقول ليك شئ: حاليا في ونساتنا الخاصة أصبح الكلام بشكل عنصري عن الآخر أصبح صعب جدا.
الموضوع دا مشكلتو انو "أحفاد المقهورين" ما زالو بيعانوا من تبعات القهر النفسي، لكن في نفس الوقت لا يستطيعوا تحميل أحفاد "القاهرين" أكثر مما يجب لانهم ببساطة ما عندهم ذنب مباشر في الممارسات القديمة.
محاولة أحفاد المقهورين دفعنا لمربع ضيق ما ح يجيب نتائج إيجابية
الموضوع دا حلو:
التسامح بعد إعترافنا الأدبي مما بدر من أجدادنا
مثلا شارع الزبير باشا دا ممكن نتفق على إزالة إسمو،

تعبتا هسع..

بابكر عباس سلام تاني و كتير ليك و للأسرة
يا بابكر عباس عليك دينك و إيمانك هسي كلامك الفوق دا علاقته بكلامي شنو, إنت يا بابكر ببساطة أعلنت هنا و بكيبوردك البياكلوا الهكر دا أن لا يوجد تمييز في السودان بشكل معلن و قارنت سودان الليله بسودان الخمسينات أن الكلام العنصري كان بتكتب في الجرايد , أنا قلت ليك لا بتكتب لحد هسي و عندك الانتباهة و بعض الأقلام في سودانيات جست كمثال , لكن برضو مالو مداخلة كويسة و أقلها ممكن تفتح حوار مفيد علي أقل تقدير بالنسبة لي....
في البداية يا بابكر أنا ما مطالبك بأي حاجة إنت كحفيد قاهرين غير أنك تشوف الحقيقة وين و تقولها ما أكتر , و زي قصتك أنو ما في تمييز معلن و الحنك الذي منه دا خير نموزج للحاجة الدايره منك... يعني إنت هسي يابابكر ما زورت التاريخ بس لكن زروت الحاضر العايشنه الان أنا و إنت و في تقديري دي عملية واعية أو غير واعية لذر الرماد في العيون.

ثم ثانياً يا بابكر دي شنو اللغة الغريبة دي لغة نعمل ليكم شنو, و متفقين في إزالة شارع الزبير باشا دي, الموضوع يا حبيب أكبر من شارع يتشال أو كلمة عبد و خادم ما تتقال, الموضوع يا بابكر محاربة العقلية و البنية الإجتماعية و الثقافية الموجودة التي تنتج و تعيد إنتاج مثل هذه الأفكار و الشوارع ... بعدين في موضوع العنصرية دا إنت ما بتعمل لزول , هنا إنت بتعمل لنفسك و بشكل براغماتي جداً لان في تقديري الاتنين القاهر و المقهور هم ضحايا. غايتو يا بابكر في قصتك دي ذكرتني قصة جحا (أنا برا),

ثالثاً: بالجد قصة الكلام العنصري عن الأخر الفي جلساتكم أصبح صعب بالجد دي نقطة متقدمة لكن ما المحصلة النهائية محتاجين لبعض عشان نطلع من الحفرة دي سوا سوا, لان موضوع العنصرية أو التمييز بكما ذكرت دوماَ ضحاياه كافة الأطراف.

يا خي الأخيرة دي لقطة و دين أمي... قلت لي هسي المشكلة كلها بقت في أولاد المقهورين؟ عجبي البحر يحاكم سمكة...
بعدين يا بابكر جملتك الأخيرة دي سلاح مستخدم من زمان لكل الأصوات المنادية بتغيير الواقع , فمثلاً في الحركات النسوية المنادية بالتغيير معبودة الرجل هي المرأة التي تتبني عقليته الذكورية في خضم هذا الصراع , في صراع الهامش و المركز إبن الهامش الداجن القبلان بالفتتات هو انسان متسامح و غير عنصري, والخ.... يعني حكاية أني بكون زول متسامح إذا قبلت ثقافة القهر بكافة أشكالها و الا بكون عنصري, معقد و الخ ... السلاح دا يا حبيب فقد مفعوله الناس تحاول تجرب ليها سلاح تاني أكثر مضاءة.

بجي تاني

[حافظ حسين]

حافظ حسين سلامات واريتك طيب

مع احترامى لك وللعم شوقى بدرى..انا قلت عم شوقى نصير المقهورين والمهمشين
لكن احيانا بعض كتابته انا سارة بشم فيها التعنصر لفئات معينة وانسان زى عم شوقى
وتأثير كتابته { صاحبك الفلاتى قريبى مثالا} يجب على عم شوقى ان يضع فى حسابه
ان كتابته قد تكون سلاح ذو حدين ..البوست الموضوع على صدر البانر..أعظم ابطال
السودان كانوا من النوبة هذا العنوان فيه عنصرية واضحة بصرف النظر عن من هم
النوبة وماذا عانوا ..يعنى عم شوقى مد الله فى ايامه ومتعه بالصحة والعافية مثل هذا
النوع العنوانين ممكن يفتح مجال كبير للتعنصر يعنى لو جاء عكود كتب اعظم
ولا اشرف
ابطال السودان كانوا من الشايقية ولا جاء بابكر عباس وكتب اعظم
اهل السودان هم من مدنى ولا جا جعلى كتب عن الجعليين والله كان قامت الدنيا وما قعدت

حافظ يا اخوى لم انتقد عم شوقى للتقليل او القدح فى وطنيته لا سمح الله ولكن
اهمية ما يكتبه عم شوقى وخطورة تاثير مفرداته ومواضيعه هو ما جعلنى اقول
هذا الكلام وفى النهاية تبقى وجهات نظر

لك وللعم شوقى كل المحبة كاملة غير منقوصة:cool:

سارة كيفك و الوليدات و الله ليك وحشة

يا سارة قبال ما تحاكمي بعض كتابات شوقي بدري أن فيها بعض التعنصر أو لا, محتاجة تعملي انستقيشن للواقع , هل الكتابات دي في الواقع موجودة و بتحصل بشكل شبه يومي و لا كتابات فنتازيا ؟

و بعدين الهدف من أي كتابة هو التأثير, سوي تجلي ذلك في شكل صدمة, استرخاء, , دموع و الخ و إلا فقدت الكتابة هدفها...
بجي تاني

[azzam_farah]

السَيِد الفاضِل / مبر محمود
كيف حالك؟ علك طَيِب

اقتباس:
السيّد الفاضل/ عزّام فرح
الدنقلاوي والفلاتي كليهما إنسان
العراقة والأصالة في زمننا هذا لا تحددها الأقدمية في الجغرافيا..
فالـ"عالم" الأن يحكمه زنجي كيني من داخل البيت الأبيض الواشنطوني (إنتهى الإقتباس)

مُداخلتي كانت بِتجاوِب على سؤال السَيِد الفاضِل / شوقي بدري
اقتباس:
ما هو الفرق بين خالي حسن الدنقلاوي الرطاني الذي لايزال يستمخ ويستمع للاغاني بلغة الدناقلة وابكر الفلاتي او الهوساوي او الغرابي ؟ انا فشلت ان اجد اي فرق (إنتهى الإقتباس)

فأرِدت أن أُعينهُ فيما فشل فيه
ـــــــــــــــــــــــــــــــ
بِخُصوص أن الدُنْقُلاوي والفلاتي كِلَيْهِما "إنْسان" هذا معلوم، وكذلِك عِرق حاكِم أمريكا، هذِهِ أيضًا معلومة شائِعة ومبذولة، فقد أتاح لي الإنترنت والقنوات التِلِفِزْيونِية أن أعرِف الكثير وقد عرِفْت أن أوباما زنجي مِن أصل كيني ويحكم من واشنطن! الحمدلله الذي هيأ لي إكْتِساب المعلومات. أما عن الأماكِن -الجُغْرافيا- فعلى العموم، هُناك أماكِن أفضل مِن أُخرى، مِثل بكة والقُدْس وكُل البِلاد التي تقع على ضِفاف الأنهار، والتي ضرب بِها الله تعالى المثل والتشبية في وصفِهِ تعالى لِلجِنان.
ـــــــــــــــــــــــــــــــ
اقتباس:
العراقة والأصالة في زمننا هذا لا تحددها الأقدمية في الجغرافيا.. فالـ"عالم" الأن يحكمه زنجي كيني من داخل البيت الأبيض الواشنطوني (إنتهى الإقتباس)

أراك قد عَينت عِرق وجهة أوباما!

[أبوبكر عباس]

إنت يا بابكر ببساطة أعلنت هنا و بكيبوردك البياكلوا الهكر دا أن لا يوجد تمييز في السودان بشكل معلن و قارنت سودان الليله بسودان الخمسينات أن الكلام العنصري كان بتكتب في الجرايد , أنا قلت ليك لا بتكتب لحد هسي و عندك الانتباهة و بعض الأقلام في سودانيات جبت كمثال ,
كدي نشوف عضم كي بوردي قال:

في الوقت الراهن الرأي العام السوداني ما ممكن يقبل التمييز العرقي بشكل معلن
بابكر عباس
لا يوجد دي أنا ما جبت سيرتها في عضمة كي بوردي! أنا قلت لا يمكن يقبل.
و كدي خلينا نناقش الأمثلة الجبتها و أبدأها بكلام النقر العنصري
و عليك الله بأمانة شوف ردة الفعل تجاه كلامو داك
و قارن بين الناس القبلوا كلامو(لو وجد) و الناس الوقفت ليهو

عنصرية الطيب مصطفى الموجودة في الإنتباهة هي عنصرية فهم ديني و ليست عرقية،
بدليل انو كراهية الطيب مصطفى تجاه ياسر عرمان تفوق كراهيته لدكتور خليل

[azzam_farah]

حبيبي إنت يا رأفت ميلاد
كيف حالك؟ علك طَيِب

اقتباس:
قلت لى كلاهما أعجمى يا عزام :D:D ياخ كان والله كان يوم أسود يوم ما دخلتنا اللغة العربية .. (إنتهى الإقتباس)

عِندي بِت خالي جات مِن عبري لِلجامعة في الخُرطوم، قالت لي:
- إنتو بِتعرِفو كيف تقولو [الشمِش دي] ولا [الشمِش دا] يعني القاعِدة شنو؟
- والله أول مره أنتبه لِلحِكاية دي.. ما عارِف والله!
- كيف ما عارِف وإنت بتتكلم عربي زي الورد؟
- أفْتكِر دي حاجة بِتُكْتسب كِده مِن النشأة.
- يعني ما في قاعِدة مُمْكِن الواحِد يمشي عليها؟
- في طبعًا.. بس البتكلمو عربي ما بِفكِرو فيها لامِن يتكلموها.
- رُحنا في ستين داهِية على كِده

[azzam_farah]

السَيِد الفاضِل / فتحي مسعد حنفي
كيف حالك؟ علك طَيِب


اقتباس:
أما أخونا عزام ربما يكون خانو التعبيرفجاء كلامه غير محدد لما يريد ايصاله لنا.. (إنتهى الإقتباس)

كتر خيرك والله يا فتحي وشُكْرًا.. بس يا خوي ما خاني التعبير ولا شِتين، وكلامي مُحدد جِدًا ومُعَزلْ بِعِنايةٍ فائِقة، أنا قاصِد كُل كلمة كتبتها في الإقْتِباس أدناه:

اقتباس:
نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي. (إنتهى الإقتباس)

البِخون دايمًا وأبدًا "الفهم" ودي حاجة بِتاعت ربُنا بقى.. قِسَمْ يعني.. وكِده

[النور يوسف محمد]

سلام علي الجميع ...
أستاذ الأجيال شوقي بدري .. إسمح لي هنا أن أختلف معك مع إني أعلم أنك لن ترد علي مداخلتي هذه ..
لاحظت في الفترة الأخيرة أنك تطرق مواضيع فيها مافيها من النعرة القبلية وإن كان من زاوية الدفاع عن المهمشين والمظلومين ...بداية بأبناء النوبة والآن الفلاته ..
لا أريد أن أجادل في مدي صحة ما سقته من مواقف ..ولا حتي ما تأصل في نفوس السودانيين في فترات سابقة ..وحتي إن كان بعضه ما يزال موجوداً ..
أولاً ماجدوى الحديث عن هذه المواقف الآن تحديداً وحالنا لا يسر صديق ..هل الحديث فيها حتي وإن كانت صحيحة سيعالج جذور المشكلة أم سيأجج نيران الغضب والحقد لدي فئة من السودانيين ..
ثانياً .. كل ما سقت من مواقف يمكن إعتبارها فردية وإن أراد غيرك اتباع نفس المنهج في التعميم يمكنه أن يجد ما يماثل هذه المواقف في الإتجاه المضاد ..
ثالثاً ..كثير مما تستشهد به مر عليه أكثر من خمسين عاماً .. هل تريد محاسبة أجيال اليوم بأثر رجعي ؟؟

رابعاً .. في كل العالم حتي الأول منه هناك مشاكل إجتماعية في تاريخ أي أمه ..بعضها تخلص منها نهائياً وبعضها جزئياً ولم تكن وسيلة العلاج عندهم إثارة النار تحت الرماد ..

خامساً .. كثيراً ما يظلم الإنسان أخيه الإنسان وما أقبحه من ظلم فكلنا لآدم وآدم من تراب .. وهي سويعات نقضيها في دنيا لا تسوى جناح بعوضة ..

عميق ودي وإحترامي

بسم الله الرحمن الرحيم

سلام يا دكتور ..
ولك التحايا والود ..

يتعذر على قارئ مداخلتك يا دكتور تحديد وجهة إختلافك مع الأخ شوقى بدرى ..
فالذى لم ترد أن تجادل فيه هو صلب الأمر وجوهره ..
وما بينته فى ( أولاً حتى خامسا ) تفرعات من الموضوع الأساس ..

من وجهة نظرى أن الكتابة والنقد والنقاش والتحليل هو السبيل الوحديد لمعالجة المشاكل الناتجة عن تراكم أرثى وسلوكى وهى الممهد لقيام تشريعات ولوائح وقوانين تحمى وتنظم العلاقات الإجتماعية ..
النظرة الدونية والمفاهيم الإستعلائية يجب نبذها جهراً ودراستها بغية قيام ضمير جمعى فى الأمة يحاسب بكل حسم الخارجين عليها ..
وكتابات شوقى بدرى تساعد على ذلك ..

المسألة ليست محاسبة أجيال بقدر ماهى تنبيه وأخذ للعبر والمواعظ وما يسوقه السيد شوقى بدرى من أمثلة متوفر اليوم فى ىسوق الله أكبر ..
وفى ظنى يا دكتور أن توالى الحديث وفضح هذ الممارسات دون ملل هو ما يعجل بوضع أسس متينة نابعة من الواقع لحل المشكلة ..
وكتابات شوقى بدرى تساعد على ذلك ..

وحسب إطلاعى أن السبيل الجيد الذى اتبعته الأمم للتخلص من إشكالاتها الإجتماعية هو مواجهتها بقوة ووضعهاعلى طاولة التشريح ولا أرى احسن من الكتابة والنقاش كطاولة نشرح فيها مأساتنا ونصل الى موطن الداء ..
وكتابات شوقى بدرى تساعد على ذلك ..

محاولات تغليفها وتزيينها ببضعة مراهم لن تبرى هذا الجرح ..
سيغور ويغور يا أغبش ولن تنفع عندها كل مضادات الدنيا ...

[فتحي مسعد حنفي]

اقتباس:
المشاركة الأصلية كتبت بواسطة azzam_farah http://sudanyat.org/vb/images/buttons/viewpost.gif (http://sudanyat.org/vb/showthread.php?p=389792#post389792)
السَيِد الفاضِل / فتحي مسعد حنفي

كيف حالك؟ علك طَيِب


اقتباس:
أما أخونا عزام ربما يكون خانو التعبيرفجاء كلامه غير محدد لما يريد ايصاله لنا.. (إنتهى الإقتباس)

كتر خيرك والله يا فتحي وشُكْرًا.. بس يا خوي ما خاني التعبير ولا شِتين، وكلامي مُحدد جِدًا ومُعَزلْ بِعِنايةٍ فائِقة، أنا قاصِد كُل كلمة كتبتها في الإقْتِباس أدناه:

اقتباس:
نعم، كِلَيهِما أعْجَمي.. فقط الفرق يكْمُن في أصالة الدُنْقُلاوي النوبي -الذي لا يُدانيه أحدٌ في السودان الشِمالي كُلِهِ عراقةً- وحداثة الفلاتي. (إنتهى الإقتباس)

البِخون دايمًا وأبدًا "الفهم" ودي حاجة بِتاعت ربُنا بقى.. قِسَمْ يعني.. وكِده




ياخ كتر خيرك والظاهر فعلا أنا فهمي عاجز وما لي فيهو قسمة..
لوانت كلامك زي ما بتقول واضح ومحدد يبقي ياخوي أنا وانت بقينا زملاء..لكن الغريبة يبدو انو في ناس تانيين بشاركوني في العجز الفهمي دا بدليل انهم ما فهمو انت قاصد شنو..مع اني أنا شخصيا فهمت انت قاصد شنو خصوصا وانت حددت شمال السودان وبالتالي شمال السودان هو البنطبق عليهو كلامك..بس ىاخوي كنت تختار ليك حتة فيها كثافة فلاتية زي كردفان مثلا وتبعدنا من الناس اللي من أندينا:D..عموما أنا كلامك واسلوبك التهكمي عجبني شديد وعاذرك مادام سيادتك من عبري:D

[مبر محمود]

بِخُصوص أن الدُنْقُلاوي والفلاتي كِلَيْهِما "إنْسان" هذا معلوم، وكذلِك عِرق حاكِم أمريكا، هذِهِ أيضًا معلومة شائِعة ومبذولة، فقد أتاح لي الإنترنت والقنوات التِلِفِزْيونِية أن أعرِف الكثير وقد عرِفْت أن أوباما زنجي مِن أصل كيني ويحكم من واشنطن! الحمدلله الذي هيأ لي إكْتِساب المعلومات. أما عن الأماكِن -الجُغْرافيا- فعلى العموم، هُناك أماكِن أفضل مِن أُخرى، مِثل بكة والقُدْس وكُل البِلاد التي تقع على ضِفاف الأنهار، والتي ضرب بِها الله تعالى المثل والتشبية في وصفِهِ تعالى لِلجِنان.
عزّام فرح
تحيّاتي مجدداً يا عزّام..
شاكر لكَ السؤال عن حالي، أنا بخير والحمد لله وأتمنى أن تكون أنت ايضاً بخير
تعقيبك على مداخلتي لم أجد فيه توضيح لمسألة "الأصالة والعراقة" التي أصبغتها على مجموعة سكانية دون الاخرى في مداخلتك الأولى.. و قد كانت هذه المسألة هي مدخلي الرئيس لمكاتبتك في هذا البوست
المهم، إن كنت تعني بالأصالة والعراقة الأقدمية- مثلما ذكر بابكر- فلكَ ذلك، ولكن أعلم إن هذه المسألة في زماننا الراهن لا يعوّل عليها كثيراً لتمرير أجندة إستعلائية عبرها، وهذا هو جوهر ومنطلق تساؤل عمنا شوقي.

ملحوظة:
ليس هنالك من مشكلة إن ذكرنا عرق أحدهم او جهته او حتّى جيناته الوراثية، فهذه مسائل لا عار فيها، ويكفي أنها مبذولة ومتاحة ومعروفة "مثلما وضحت أنت"

[فتحي مسعد حنفي]

اقتباس:
المشاركة الأصلية كتبت بواسطة مبر محمود http://sudanyat.org/vb/images/buttons/viewpost.gif (http://sudanyat.org/vb/showthread.php?p=389850#post389850)
تحيّاتي مجدداً يا عزّام..
شاكر لكَ السؤال عن حالي، أنا بخير والحمد لله وأتمنى أن تكون أنت ايضاً بخير
تعقيبك على مداخلتي لم أجد فيه توضيح لمسألة "الأصالة والعراقة" التي أصبغتها على مجموعة سكانية دون الاخرى في مداخلتك الأولى.. و قد كانت هذه المسألة هي مدخلي الرئيس لمكاتبتك في هذا البوست
المهم، إن كنت تعني بالأصالة والعراقة الأقدمية- مثلما ذكر بابكر- فلكَ ذلك، ولكن أعلم إن هذه المسألة في زماننا الراهن لا يعوّل عليها كثيراً لتمرير أجندة إستعلائية عبرها، وهذا هو جوهر ومنطلق تساؤل عمنا شوقي.

ملحوظة:
ليس هنالك من مشكلة إن ذكرنا عرق أحدهم او جهته او حتّى جيناته الوراثية، فهذه مسائل لا عار فيها، ويكفي أنها مبذولة ومتاحة ومعروفة "مثلما وضحت أنت"




ياخ شنو يامبر..الزول دا مش قال الفهم قسم:confused::confused:
الغريبة هو مصر انو كلامو واضح والبقرو هم الما بفهمو:eek:غايتو بعد دا الواحد يكوس ليهو وظيفة تانية ياكل منها عيش غير الصحافةlooool

[رأفت ميلاد]

المشاركة الأصلية كتبت بواسطة النور يوسف محمد http://sudanyat.org/vb/images/buttons/viewpost.gif (http://sudanyat.org/vb/showthread.php?p=389840#post389840)
من وجهة نظرى أن الكتابة والنقد والنقاش والتحليل هو السبيل الوحديد لمعالجة المشاكل الناتجة عن تراكم أرثى وسلوكى وهى الممهد لقيام تشريعات ولوائح وقوانين تحمى وتنظم العلاقات الإجتماعية ..
النظرة الدونية والمفاهيم الإستعلائية يجب نبذها جهراً ودراستها بغية قيام ضمير جمعى فى الأمة يحاسب بكل حسم الخارجين عليها ..

عليك نور يا النور .. حاولت أرد لكن ما عرفت أرد على شنو .. الفكرة التى وصفها اللغبش سريعة شديد .. زى كأنو الحديث وسط جماعة .. ما خطاب باقى للمجتمع ..

وكلو كوم وسارة كوم .. سرحت شديد فى تفصيل العنصرية .. وطلعت شوقى زاتو عنصرى بالمقلوب .. يعنى إسبارتكوس زاتو لمن قام بثورة التحرير كان عنصرى :D:D

[أبوبكر عباس]

أخيراً كدا يا خي بالجد داير أعرف في اي كتاب منصور خالد قال أو لمح أن عبدالله علي إبراهيم كان بعاير الأزهري أنه فلاتي ؟يا حافظ أنا قلت دكتور عبد الله هو اللمح بانو دكتور منصور خالد هو القال في جريدة الناس انو الازهري فلاتي

الرابط:
منصور خالد 10 (http://www.sudanile.com/2008-05-19-17-39-36/56-2008-12-01-11-26-03/346---10.html)

[رأفت ميلاد]

المشاركة الأصلية كتبت بواسطة azzam_farah http://sudanyat.org/vb/images/buttons/viewpost.gif (http://sudanyat.org/vb/showthread.php?p=389789#post389789)
عِندي بِت خالي جات مِن عبري لِلجامعة في الخُرطوم، قالت لي:
- إنتو بِتعرِفو كيف تقولو [الشمِش دي] ولا [الشمِش دا] يعني القاعِدة شنو؟
- والله أول مره أنتبه لِلحِكاية دي.. ما عارِف والله!
- كيف ما عارِف وإنت بتتكلم عربي زي الورد؟
- أفْتكِر دي حاجة بِتُكْتسب كِده مِن النشأة.
- يعني ما في قاعِدة مُمْكِن الواحِد يمشي عليها؟
- في طبعًا.. بس البتكلمو عربي ما بِفكِرو فيها لامِن يتكلموها.
- رُحنا في ستين داهِية على كِده

:D:D:D
سلامات يا عزام وبركة موضوع شوقى النكتك
تعرف كلامى وقع ليك صاح بى حكاية بتكم دى :D:D

تعرف يا عزام أنا ركزت ف (أعجمى) .. بنلصقا زاتا على كيفنا .. أعجمى تعنى غير عربى ليس (بلغة العرب) .. ولكن من العرب .. هسة دى أشرحا كيف :(

بمعنى من يقولها يجب أن يكون ود عرب :) ..

تعرف فى السعودية أشتغلت مع (حيدر العامودى) .. وكنت طازة ما وقع لى كلامم .. قام نادانى فى مكتبو ورشانى بكمية كلام كده طلعت منها بيش .. (قلت ليه أنا جديد فى البلد .. لو سمحت براحة) .. قال لى بخبث (ما قلتوا عرب) .. قلت ليهو وكانت حرقتنى (ده شغل سياسة ونحن ما عرب .. حتى كان دخلنا دم .. الرجل إبن أمه .. وبعدين نحن عندنا كلمة "يا عربى" فيها تقليل زى ما عندكم كلمة "عبد")

بقى كل ما يطلع السلم جمب مكتبى .. براحة يقول لى (هلا يا عبد) .. أرد عليه (مرحب يا عربى) :D:D

[عادل عسوم]

التحية للاستاذ شوقي والاحباب
قال السيد رأفت ميلاد:
قلت لى كلاهما أعجمى يا عزام :D:D ياخ كان والله كان يوم أسود يوم ما دخلتنا اللغة العربية ..
...
لا (والله) ياأخي...
بل كان يوما أبيضا أضاف الى مجدنا الغابر مجدا (تليدا)
...
..
.

[حافظ حسين]

http://www.youtube.com/watch?v=UguS-HNTsnw

صورة للهامش المتسامح جداً

بجي راجع تاني

[عبداللطيف النقر]

الاستاذ شوقى بدرى -- تحية طيبة وبعد --

اخى فى البدء اقول لك بانى من مواليد 1955 اى عمرى تقريبا بعمر الاستقلال -- احترم كل رؤساء البلد السابقين والحاليين والقادمين اذا مد الله فى الاعمار --

معلومة ان الرئيس الازهرى فلاتى -- اقسم بالله اول مرة اسمعها -- فانا لم اقرا جريدة الناس فى وقتها ولم ابحث عنها فى اضابير دار الوثائق -- حيث ان المعلومة لا تهمنى كثيرا فالرئيس الازهرى رحمه الله هو الان بين يدى ربه ولن يضيره ان يكون فلاتيا او جعليا او شايقيا او شلكاويا -- ويكفيه فخرا انه ابو الاستقلال وسيظل اسمه عاليا خفاقا فى نفس كل سودانى -- ويكفيه انه مات نزيها وان منزله بنى بالدين --

لاحظت بعض المداخلات التى عابت ذكرك هذا الامر فى وقت السودان فيه على مفترق طرق -- وان كلامك ليس ككلامى او كلام غيرى فى الصحف والمنتديات بل كلام يعتد به ويسمع له وقد يستغله البعض فى تاجيج هذه النعرات المتزايدة -- وهذا ليس باسلوب العلاج الامثل -- فانك يمكن ان تكون خير مثال للتعايش الامثل للسودانيين بما مكنك الله به من مفردات تجعل الاخر يستمع اليك ويتحرى نهجك --

قطعا انك لم تختار الزمن المناسب ولا المكان المناسب ولا الجو المناسب لكتاباتك الاخيرة والتى قد تفسرها بعض الجهويات بما تهوي --

فى اعتقادى بانك عنصر جذب طاغى جامع فرجاء واصل على مثل هذا النهج الجامع -- مثلما كان آباؤك دوما بحلوا لى العوجات -- واحترمهم الناس لانهم منارات علم يهتدى بها --

ولك خالص تحياتى

[أبوبكر عباس]

صورة للهامش المتسامح جداً
بجي راجع تانيانت يا حافظ مفتكر انو نحن صدقنا انو الجلابي دا غول زي ما بروج ليهو بعض مثقفي الهامش في العالم الاسفيري؟
يا زول نحن ناس طبيعيين جدا، علاقاتنا بناس الأطراف ديل في عمومها علاقة إنسانية ممتازة.
نحن يا زول رسل إقتصاد و ثقافة و كان لنا دور مهم بربط ناس الاطراف ديل بالشمال الكبير، عشان كدا إستحقينا هذا الغناء الجميل من الجميلات ديل
بعدين يا أخوي البنات ديل عرقيا تبع الهامش البتتكلمو عليهو داك، لكن واقعيا البنات ديل جزء من النسيج الإتكون في الوسط (الديم مثالا) و هم رواد في كل مجالات الابداع المختلفة

[ناصر يوسف]

ده كلام كويس
عمنا وكبيرنا
شوقي بدري
متعه الله بالصحه والعافية
يفجر قنبله أصلها متفجره
أهااااااااااااااا
عن نفسي أتحدث وعن جنسي
طبعاً أخوكم لما قرر يتأهل ويدخل عش الزوجية تَمَّ من العُمر عتيا 39 سنه
أهاااااااااااااااا
قوووووووومي كدي يا بت الناس البقت أم نغم ورحيق أسعليني السُعال السعلوه ليها أهلها ...

الزول الداير يعرسك ده جِنسُو شنو ؟؟؟

أقوم أنا أقول ليها والله ما عارف ... لكن كدي دقيقة خليكي معاي ..
أشيل موبايلي وأمشي أدخل علي أبوي ( عليه الرحمة والمغفرة) في الصالون وأسألو ...
أبوي ... إنتَ نحن جنسنا شنو ؟؟ أصلو دي سمية أهلها سألوها عن جنسنا شنو ؟؟
أبوي يتعجب ويندهِش .. ويعاين لي من فوق لي تِحِت وأن أذيد علي تاؤلي ...
والله العظيم يا أبوي أنا ما عارف إنو جنسنا بالضبط شنو ...
فيرد علي وما زالت إنداهشته تملأ عيونو .... جلابَه هَوَارَه
أرجع للموبايل وأقول ليها ... أسمعي ... نحن جلابه هواره ..
تقول لي يعني شنو ؟؟؟
أرد عليها : أنا عارف ؟؟ ما ياهو أبوي سألتو وقال لي ( جلابه هواره)
تضحك سميه وأضحك أنا ...
وبعد المكاملة ناداني أبوي ربنا يرحمه ويغفر ليه ويسألني ... يا ولد إنتَ جااااااااادي في سؤالك ده ؟؟؟
أرد عليه وأقول ليه ... يعلم الله جادي ... لأنو ما بيهمني أنا جنسي شنو ..
ودي حقيقه .. أصلاً ما حصل سألت نفسي السؤال ده .. أي زول يسألني كنت برد عليه والله كل العارفو أنا سوداني ...

و ما عارف ليه إتذكرت مقولة أستاذنا الموسيقي الجميل عضو أوركسترا الإذاعه الأستاذ ( محمد جبريل ) عازف الباص جيتار ... ونحن في كافتيريا الإذاعة وكان النقاش عن مسألة العنصرية ... شايقي / جلابي / شنو شنو كده ما عارف ... لما لقي ليهو فرقة حلقوم وقال للجميع:

غايتو الأنا بعرفو.... عَبِِد حُر ولا عربي مُجَهجَه :p :p

عليكم جِنِس فعايل يا أهلنا غايتو ؟؟؟ ;) ;)

[حافظ حسين]

انت يا حافظ مفتكر انو نحن صدقنا انو الجلابي دا غول زي ما بروج ليهو بعض مثقفي الهامش في العالم الاسفيري؟
يا زول نحن ناس طبيعيين جدا، علاقاتنا بناس الأطراف ديل في عمومها علاقة إنسانية ممتازة.
نحن يا زول رسل إقتصاد و ثقافة و كان لنا دور مهم بربط ناس الاطراف ديل بالشمال الكبير، عشان كدا إستحقينا هذا الغناء الجميل من الجميلات ديل
بعدين يا أخوي البنات ديل عرقيا تبع الهامش البتتكلمو عليهو داك، لكن واقعيا البنات ديل جزء من النسيج الإتكون في الوسط (الديم مثالا) و هم رواد في كل مجالات الابداع المختلفة


بابكر عباس عندك مداخلة فوق ما تقول ناسيها بجي ليها برواقة بعد الرد علي البخوها يلوي دي ...

يا بابكر عباس أنا هنا ما بمثل أي هامش و لا بتكلم بلسان أي هامش , عشان تجي تقول لي صدقتوا و لا ما صدقتوا دي ... بعدين يا بابكر عباس راجع هنا و في اي مكان أخر وشوفني لو إستخدمت كلمة جلابي في وصف أي حد في يوم من الأيام ... لان مصطلح جلابي دا بالنسبة مصلطح محمل بحمولات عالية من الكراهية و الغبن لأن المصطلح دا إرتبط بصيد العبيد, الإختطاف, الفهلوة, الغش و الخ من الأوصاف السيئة , و بعدين هنا أتخيل لي المساحة للحوار و ليس للإساءة عشان كدا ما حأستخدمه.
لكن شايفك الكلمة دي عجبتك و طوالي فصلت لنفسك منها عدد واحد جلابية , غايتو يا بابكر بقت عليك حكاية الثوار البكاتلوا في حكومة ما , أها الحكومة الما دي في إطار حربها الإعلامية بتوصفهم بفلول التمرد , فلول التمرد , أها واحد من الثوار ديل في لقاء ما بدأ يتكلم : (نحن كفلول تمرد و كدا)... نهايته كدا يا بابكر سلوكك دا ما بأهلك تكون جلابي مأصل و مفصل لكن لو مصر ينادوك كجلابي علي كيفك. لكن برضو ما بقول ليك جلابي فهمت علي؟
يا بابكر عباس صدقني ما جاتني لحظة شكيت في أنك زول ما طبيعي لكن رسل إقتصاد و ثقافة دي شوية واسعة و خاصة وقت وصفت نفسك بالجلابي ... أها بالمرة تم جميلك و مع الإقتصاد و الثقافة دي خت محبة , عشان محور الخير يكتمل يكون ( رسل إقتصاد و ثقافة و محبة), يلا يا بابكر بالله أركز لي هنا و قول أنك ربط الجميلات البغنوا ليك ديل باي وسيلة بالشمال؟
الربط دا كان بأي ألية؟
ووقت جيت تربطهم شاورتهم و قالوا ليك حباب ربطك؟


بعدين نجي لموضوع الغناء الجميل , عليك دينك كدا طلع من الكلام دا الإيقاع و أسمعه حاف , شوف لأي مدي حاطة بكرامة الإنسان و الحيوان ذاته, معقولة بس؟
و خطورة الكلمات دي وقت تصدر من الضحية ذات نفسه ... يا خي دي قمة التماهي مع الألم و إنت متكيف؟


بجي تاني

[عبدالمنعم الطيب حسن]

انت يا حافظ مفتكر انو نحن صدقنا انو الجلابي دا غول زي ما بروج ليهو بعض مثقفي الهامش في العالم الاسفيري؟
يا زول نحن ناس طبيعيين جدا، علاقاتنا بناس الأطراف ديل في عمومها علاقة إنسانية ممتازة.
نحن يا زول رسل إقتصاد و ثقافة و كان لنا دور مهم بربط ناس الاطراف ديل بالشمال الكبير، عشان كدا إستحقينا هذا الغناء الجميل من الجميلات ديل
بعدين يا أخوي البنات ديل عرقيا تبع الهامش البتتكلمو عليهو داك، لكن واقعيا البنات ديل جزء من النسيج الإتكون في الوسط (الديم مثالا) و هم رواد في كل مجالات الابداع المختلفة

الجلابي اسمع به
لكن اول مرة اشوف جلابي على الهواء مباشرة
جلابي اسفيري
وقال ايه رسل اقتصاد وثقافة
وبعدين ورينا سيرتك الذاتية وماذا جلبت
وكيف وصلت لمرحلة جلابي
بالله ورينا ولا تبخل
امكن نحن ذاتو نطلع جلابة وما عارفين
دنيا
ناس طلعت القمر
وناس طلعت جلابة

[أبوبكر عباس]

عليك دينك كدا طلع من الكلام دا الإيقاع و أسمعه حاف , شوف لأي مدي حاطة بكرامة الإنسان و الحيوان ذاته, معقولة بس؟
و خطورة الكلمات دي وقت تصدر من الضحية ذات نفسه ... يا خي دي قمة التماهي مع الألم و إنت متكيف؟
عليك الله يا حافظ تعال أكتبها انت بشكل كامل و واضح،
شوقتنا نشوف نقدك للأغنية

برسل لي بابا حبيب جلابة
خبرو فوق البئر حبيب جلابة
أتنين و أربعين حبيب جلابة
مركوبو نمر أصيل حبيب جلابة
عصايتو سن الفيل حبيب جلابة
هدومو لي.... حبيب جلابة

[أبوبكر عباس]

وبعدين ورينا سيرتك الذاتية وماذا جلبت
عندي كمبيوتر

[عبدالمنعم الطيب حسن]

عندي كمبيوتر

حننتني والله
عليك الله اعفى لي اكان زنقتك شديد يا الجلابي
زميلنا جويدة رجل لطيف
يقول
الجلابي اذا لاقيتو في الدكان يقول ليك اذا كان
واذا لاقيتو وحيدة يديك وليدا

[أبوبكر عباس]

واذا لاقيتو وحيدة يديك وليدا
عليك الله يا عبد المنعم خلينا شوية نشوف حافظ داير يقول شنو؟
من هسع
لو قلت لي في المداخلة الجاية: أطلع معاي الخلا،
ما بطلع
أنا عندي فرد ولد

[أبوبكر عباس]

... لان مصطلح جلابي دا بالنسبة مصلطح محمل بحمولات عالية من الكراهية و الغبن لأن المصطلح دا إرتبط بصيد العبيد, الإختطاف, الفهلوة, الغش و الخ من الأوصاف السيئة , و بعدين هنا أتخيل لي المساحة للحوار و ليس للإساءة عشان كدا ما حأستخدمه.

منو قال ليك الكلام دا؟
يا زول الجلابي دا هو التاجر الشمالي و أغلب الظن انو الكلمة جاية من جلب أي أتى بالبضائع
كيف يكون هو بشيل العبيد و يسموهو جلابي؟
يا زول الغنى بتاع النسوان الجبتو انت دا بيوضح معنى الكلمة الحقيقي في الذاكرة الشعبية و مقصود بيها التاجرالشمالي الوجيه في ملبسو,,,

المعنى بتاع الباقر عفيفي الناجرو من راسو دا و القال فيهو انو الجلابي هو تاجر الرقيق هو معنى سياسي إلتقطوهو المثقفين بتاعين الاطراف و دايرين يبتزونا بيهو

[حافظ حسين]

منو قال ليك الكلام دا؟
يا زول الجلابي دا هو التاجر الشمالي و أغلب الظن انو الكلمة جاية من جلب أي أتى بالبضائع
كيف يكون هو بشيل العبيد و يسموهو جلابي؟
يا زول الغنى بتاع النسوان الجبتو انت دا بيوضح معنى الكلمة الحقيقي في الذاكرة الشعبية و مقصود بيها التاجرالشمالي الوجيه في ملبسو,,,

المعنى بتاع الباقر عفيفي الناجرو من راسو دا و القال فيهو انو الجلابي هو تاجر الرقيق هو معنى سياسي إلتقطوهو المثقفين بتاعين الاطراف و دايرين يبتزونا بيهو

يا بابكر سلام
أنا هسي ما بقدر أرد عليك لظروف لوجستية لكن حفظنا المداخلة دي عشان ما تجي تعدلها و لحد بكرة نشوف الباقر العفيف دا القاعد يسمع كلامه منو و البشيل كلامه مين يا دكتور ؟

انت ملاحظ يا بابكر كل مداخلاتك خالية من السلام و حتي السلام البديك ليه ما بتردوا ؟

[عبدالمنعم الطيب حسن]

عليك الله يا عبد المنعم خلينا شوية

اخليك وين.؟ البخليك منو
هو يعني كل يوم الواحد بلقى جلابي معترف
يازول الجلابة طريقة تفكير
عليه انت جلابي بامتياز
وطالما اعترفت لن اخليك ابدا
والله لاندرعن فيك درعة اؤلئك الذين اذاقونا الامرين ومازالوا
يعني هسع انت خليت الاغتراب وابوظبي وحسن موسى والانبهار
وبقيت علي جلابي دي....
غايتو قميص عامر
وان شئت جلابية عامر
بالمناسبة سلم لي علي الزبير ودرحمة
وكل الجلابة بطرفكم لحد ما اجيك تاني
واكان تاخرت ومااظني
قزقز بالجلابية بيضاء ومكوية
يا جلابي

[أبوبكر عباس]

حفظنا المداخلة دي عشان ما تجي تعدلها ...

انت ملاحظ يا بابكر كل مداخلاتك خالية من السلام و حتي السلام البديك ليه ما بتردو؟

سلام يا حافظ
مساء الخير يا حافظ
حافظ إزييييك؟
تحياتي يا حافظ
سلامات يا حافظ

مؤونة عام من السلام*

المشكلة شنو يا حافظ لو عدلت المداخلة قبل ما انت ترد عليها؟
القصة دوري؟

* النص الأول من الجملة حقوق النشر لود الخير أو محمد فرح، ما متأكد منو!
المهم:
هي لله هي لله

[عبدالمنعم الطيب حسن]

المثقفين بتاعين الاطراف و دايرين يبتزونا بيهو

يا زول المداخلة دي موغلة في الفراغ وواضح انك بتقول كلام ساهي ما عارف راسو من قعرو
ودا مشكلة حقيقية ..
السؤال من هم مثقفي الاطراف؟
وماهي الاطراف اصلا؟
ولوقاصد حافظ
حافظ دي من سنجة هل سنجة طرف
ولً بتعتبر الاطراف هم المهمشين انت اكبر مهمش وان كنت لا تدري
امااخر تلاتة كلمات فدي الفلم ذاتو
السؤال من انتم ؟
وطالما مافي طرف معناها هنالك مركز
هل انت مركز؟
مركز ايه وماذا تمثل ومن مركزك وفوضك
مداخلة تعمل وجع القلب براهو الليلة موجوع من فعايلكن ايها الجلابة

[النور يوسف محمد]

بسم الله الرحمن الرحيم


والله يا بابكر وعبد المنعم الشكية لله
غايتو من حيث لا تدرون أخذتم معكم البوست
لى وين ما عارف ..
وكمان نجحتم فى ( جر ) حافظ الى أطراف البوست

كان مقدراً أن يستمر النقاش بعمق فى هذا المفترع
لكنه دخل فى عوالم ( أنا وأنت وياتو ومنو وشنو )
فجاءت كل المداخلات اللاحقة على سطح الحدث ...


أها نشوفكم بعافية ... :):)

[أبوبكر عباس]

كان مقدراً أن يستمر النقاش بعمق فى هذا المفترع
يا أخي و الله الأعماق دي حيّرتنا

[مبر محمود]

يازول الجلابة طريقة تفكير
تحيّاتي يا عبد المنعم، والتحايا عبرك لبابكر وحافظ..
الجلابة مصطلح قديم يرجع تخلقه لما قبل دولة الفونج، ويشير ببساطة لمجموعات سكانية معينة كانت تشتغل بالتجارة في غرب وجنوب السودان، وللمصطلح بلا شك "صبغة عرقية" فهو لا يطلق على عموم التجّار وإنما خُصص للتجّار الوافدين من الشمال، الشمال النيلي تحديداً..
لاحقاً أخرجت الكلمة من سياقها التاريخي والإجتماعي و وضعت في قوالب سياسية لتمرير ودعم أيدلوجيا محددة، يقول في ذلك الدكتور حيدر إبراهيم :
كلمة الجلابة نزعت من سياقها التاريخي، بعض الجلابة ساهموا في دعم الوحدة الوطنية والبعض الاخر حاول إستغلال ظروف التخلف في الجنوب لتحقيق مكاسب شخصية ولكن التعميم الذي يشوب إستخدام المصطلح يؤدي إلي عنصرية مضادة.وهناك من يري أن الإستخدام المتكرر للكلمة يأتي في سياق الذم والقدح وتدخل مجموعات سكانية واسعة وكبيرة تحت مظلة الصفات السالبة الملتصقة بالمفهوم، وهنا تجد الحركة الشعبية نفسها في موقف المدافع عن نفسها وتسعي لنفي تهم العنصرية والجهوية والجلابة بحسب تعريف القيادي بالحركة الشعبية إدوارد لينو:هي شريحة إستأثرت بالثروة والسلطة وليس كل اهل الشمال جلابة ولايوجد عرق إسمه الجلابة والجلابة الان هم المد افعون عن اطروحات المؤتمر الوطني.
http://www.sudanile.com/2009-09-03-11-02-44/13749-2010-04-26-10-50-23.html

حاولت قيادات الحركة الشعبية في سنوات نضالها الأخيرة أن توظف المصطلح بمثلما ذهب إدوارد لينو في حديثة داخل المقتبس والذي عالجه د.حيدر، فالجلابي في أدبيات الثوّار الجنوبيين كان ببساطة هو "تاجر الرقيق"، وفي ذلك تجافي تام مع الحقيقة.. فتاجر الرقيق لم يكن الزبير رحمة-الشمالي- وحدة، فثاني أكبر "زريبة" للرقيق في السودان كانت لسلاطين دارفور،وحتى مكوك الشلك كانت لديهم "زرائب".. فلماذا إذاً لم يطلق الناس عليهم "جلّابة"..؟

هذه مداخلة مقتضبة قد تعينكم في الحوار، وسأعود

[عبدالمنعم الطيب حسن]

بسم الله الرحمن الرحيم


والله يا بابكر وعبد المنعم الشكية لله
غايتو من حيث لا تدرون أخذتم معكم البوست
لى وين ما عارف ..
وكمان نجحتم فى ( جر ) حافظ الى أطراف البوست

كان مقدراً أن يستمر النقاش بعمق فى هذا المفترع
لكنه دخل فى عوالم ( أنا وأنت وياتو ومنو وشنو )
فجاءت كل المداخلات اللاحقة على سطح الحدث ...


أها نشوفكم بعافية ... :):)

عارف يا النور يااخوي دا ميزة الحوار ونصف رايك عند محاورك
بالعكس ارى مداخلات بابكر في عمق البوست وموضوعه
بل ارى انها تمثل مسكوتا عنه خاصة ممن يعتبرون انفسهم مثقفين
عني نفسي اول مرة اشوف واحد يتبجح انه جلابي
بل يمركز نفسه مستندا على كونه جلابي
ويستلم المركز ويتحدث عن الاخرين باستعلاء اجوف
ويقول ببتزونا بارائهم
ان لم يكن هذا عمق البوست
فيكون نحن المسطحين هكذا دائما في الاطراف
بعدين عبارة الشكية لله دي ماعارف لكني اراها ضيقا من الحوار وتبرما
ولك كل التحية والاحترام

[أبوبكر عباس]

قفين
عني نفسي اول مرة اشوف واحد يتبجح انه جلابي
يا أخي أنا قلت انا جلابي و عرفت الجلابي بتعني شنو
ليش تشيل إعترافي بانو أنا جلابي و تسقطو علي فهمك لكلمة جلابي؟
القصة حوار و لّ أخنق فطس؟
أنا من أسرة كلها تجار منتشرين في كل مدن السودان، في مدن كتيرة الحتة البنكون ساكنين فيها إسمها: فريق الجلابة و لو سألتني ساكن وين؟ بدون ما أفكر بقول ليك فريق الجلابة

يا أخي لو داير الحوار بتاع 25% دا أنا بعرف ليهو خالص و تاني كل أربعة مداخلات ليك برد ليك بربع تفكير.

[سارة]

الله قادر

[فتحي مسعد حنفي]

عارف يا النور يااخوي دا ميزة الحوار ونصف رايك عند محاورك
بالعكس ارى مداخلات بابكر في عمق البوست وموضوعه
بل ارى انها تمثل مسكوتا عنه خاصة ممن يعتبرون انفسهم مثقفين
عني نفسي اول مرة اشوف واحد يتبجح انه جلابي
بل يمركز نفسه مستندا على كونه جلابي
ويستلم المركز ويتحدث عن الاخرين باستعلاء اجوف
ويقول ببتزونا بارائهم
ان لم يكن هذا عمق البوست
فيكون نحن المسطحين هكذا دائما في الاطراف
بعدين عبارة الشكية لله دي ماعارف لكني اراها ضيقا من الحوار وتبرما
ولك كل التحية والاحترام

غايتو يامنعم كان انت افتكرت انو بابكر بيتبجح بأنو جلابي تبقي الراجل دا انت ما فهمتو تب وكون انو نسب نفسو للجلابة فدا أنا بعتبرو عكلتة منو ساكت عشان هو عارف انو مافي جنس اسمو جلابة..وتعال نشوف سوا منو هو الجلابي وهل هو التاجر الذي يجلب كل ما يباع ويشتري أم تاجر الرقيق أم هو من يرتدي الجلابية..:confused::confused:
تعرف في الجنوب في معظم المدن في حي بسكنوهو أثرياء الشماليين وبيطلقو عليهو حي الجلابة وهم في غالبيتهم تجار ومعظمهم من من يلبسون الجلاليب والذين يطلقون عليهم هذا الاسم هم الجنوبيين وما أفتكر انو الجنوبي بيعرف معني كلمة جلابي التي كما يقول الأستاذ حيدر هو التاجر الشمالي أصلها من الجلب.لذلك أنا أرجح أن يكون أصل الاسم هو لابس الجلابية وفي هذه الحالة بابكر بكون جلابي بي رخصة..
ناس أمدرمان ربطو الموردة بتجارة الرقيق علي أساس انها المرسي التي ترسي عليها المراكب المحملة بالعبيد..أما أصل التسمية فهي من ورود النساء للماء عند ذهابهن لشراء السمك من السماكة العائدين بصيدهم من النيل..
يابابكر بطل العكلتة عشان ما أجيب ليك بشاشة وتراجي هنا:D:D

[عبدالمنعم الطيب حسن]

يا أخي أنا قلت انا جلابي و عرفت الجلابي بتعني شنو
ليش تشيل إعترافي بانو أنا جلابي و تسقطو علي فهمك لكلمة جلابي؟
القصة حوار و لّ أخنق فطس؟
أنا من أسرة كلها تجار منتشرين في كل مدن السودان، في مدن كتيرة الحتة البنكون ساكنين فيها إسمها: فريق الجلابة و لو سألتني ساكن وين؟ بدون ما أفكر بقول ليك فريق الجلابة

يا أخي لو داير الحوار بتاع 25% دا أنا بعرف ليهو خالص و تاني كل أربعة مداخلات ليك برد ليك بربع تفكير.
اوعى تكون زعلت يا دكتور(9)
بعدين مصطلح جلابي دي معروفة شنو وانت لمن قلت جلابي كنت عارف معناها شنو
وحتي الان لم تبتعد كثيرا
ما تقول اهلنا تجار والموضوع انتهى
اوردت مفردة جلابي مع ضبابيتها وثقلها علي كل صاحب ضمير وانساني
اها النقولك التجار ديل كانت تجارتهم ليست فوق مستوى الشبهات وكانوا بيبعون الطبلة
ومفتاحها .... وهكذا استغلال لبسطاء الناس قد يكن اهلك بعيدون عن هكذا سلوك ولكنه الغالب
بعدين القصة حوار لكنك العاوز تفطسنا بان تبيع لنا الطبلة والمفتاح كل على حدة
وطبعا دي صعبة
اراك في الختام اخطأت في الحسبة
طالما الحوار بي 25% مفروض بعد كل اربع حوارات ترد علي بواحد تفكيرصحيح
او
بعد كل مداخلة ترد علي بربع تفكير
يا اخونا الساكن في فريق الجلابة عديل كدة مبروك

[أبوبكر عباس]

يابابكر بطل العكلتة عشان ما أجيب ليك بشاشة وتراجي هنا:D:D
با فتحي ناس بشاشا و تراجي عندهم خطاب خطير
الخطاب دا بصف دولة الجبهة الاسلامية حاليا بدولة الجلابة، و تعريف الناس ديل للجلابة: القبائل الشمالية و بالأخص العربية ودا ما صاح؟
الشئ المخوفني أنا ردة الفعل تجاه قبائل زي الجعليين و الشايقية الممكن تحصل نتيجة للخطاب دا في حالة سقوط الأنقاذ!

اوريك مفارقات خطاب المعارضة الساي:
عمر البشير و أحمد هارون الاتنين مطلوبين للمحكمة الجنائية في قضايا عرقية،
فد يوم سمعت زول وصف أحمد هارون بانو جلابي؟ لو القصة صحي نمط تفكير!

[فتحي مسعد حنفي]

با فتحي ناس بشاشا و تراجي عندهم خطاب خطير
الخطاب دا بصف دولة الجبهة الاسلامية حاليا بدولة الجلابة، و تعريف الناس ديل للجلابة: القبائل الشمالية و بالأخص العربية ودا ما صاح؟
الشئ المخوفني أنا ردة الفعل تجاه قبائل زي الجعليين و الشايقية الممكن تحصل نتيجة للخطاب دا في حالة سقوط الأنقاذ!

اوريك مفارقات خطاب المعارضة الساي:
عمر البشير و أحمد هارون الاتنين مطلوبين للمحكمة الجنائية في قضايا عرقية،
فد يوم سمعت زول وصف أحمد هارون بانو جلابي؟ لو القصة صحي نمط تفكير!

ياخ الاتنين ديل ما عندهم سالفة..تراجي متسلبطة في ناس دارفور وشانة حرب علي العرب مع انها متزوجة أردني.وبشاشا نوبي الأصل وما عارف يشوت وين..والاتنين شغالين بمبدأ خالف تعرف..

[عبدالمنعم الطيب حسن]

الشئ المخوفني أنا ردة الفعل تجاه قبائل زي الجعليين و الشايقية الممكن تحصل نتيجة للخطاب دا في حالة سقوط الأنقاذ!

!
لا اطمئن يا حبيب المعارضة منتظمة في شندي وكبوشية كما هي في مروي وكريمة
القبائل دي الحبة ما بتجيها
ناس الانقاذ معروفين واحدا واحدا
كاشخاص غض النظر عن القبيلة

[أبوبكر عباس]

كدي يا حافظ أدينا رايك في إستعمال القاص يحيي فضل الله لكلمة جلابة في النص دا:
(شكل الدينكا بعداً ثقافياً متميزاً في منقلا اضفى على المنطقة ثراء جميلاً وقوة اقتصادية كان الجلابة التجار الشماليون بأزيائهم المميزة والجالية الإغريقية ومتاجرهم مركز اشعاع وحلقة وصل بين الشمال والجنوب ـ الراديو كان دهشتي الكبيرة ـ وقتذاك كانت ام درمان الإذاعة اكثر حضوراً وتمدناً منها اليوم اذ كنا نسمعها في كل الاوقات ـ لا اذكر وقتاً لم يكن الراديو يتكلم فيه او يضحك او يحاضر او يغني او يمثل ـ لم اكن استوعب كيف يمكن لهذا الصندوق العجيب ان يحشد في احشائه كل هذا العالم ـ عندما كانت والدتي تصحبني الى السوق«وغالباً ما كنت اذهب معها لسماع الراديو في متاجر الجلابة)
يحيي فضل الله العوض

[أبوبكر عباس]

دا برضو يا حافظ حديث تاني ليحيي فضل الله عن عمر الخليفة مؤسس سينما كادقلي (1956):
عمر الخليفة من أولئك (الجعليين) الذين أدمنوا الترحال والهجرة إلى حيث تذهب بهم الأرزاق، إنه واحد من أولئك (الجلابة)- كما يقال عنهم- قادته أقداره وأرزاقه إلى حيث جبال النوبة، لتلك المنطقة التي تعودت أن تسلب روح أولئك القادمين من الشمال، فلا مفر لهم إلا البقاء فيها، فامتزجوا بناسها وصارت لهم أوطاناً لا يمكن التخلي عنها. هكذا قام (عمر الخليفة) بفعل ذلك الفعل المتميز عن بقية أولئك التجار، أن تتصل مدينة صغيرة مثل (كادوقلي) بالعالم وتختلط أحاديث رواد السينما عن إسماعيل يس، جون واين، اشا باريخ، محمود المليجي، كيرك دوغلاس، دوليب كومار، الالات شويا، جاك بلانس.
و لو راجعت "التداعيات" بتلقاها مليانة بالحديث عن الجلابة

[أبوبكر عباس]

و دي ياها يا حافظ بعض أحاجينا الهدهدونا بيها، ما شفنا المعنى السالب للجلابة البتتكلم عنو دا:
ومرقت فاطنة من بطن الواطة قدام القافلة وبقت تبكي وتبكي وتبكي وتقول:
عمي اخي ابوى يا جلابة
كتل مُحُمّد اخوي يا جلابة
في شان قندول يا جلابة
والقندول يا جلابة
اكلو الزرزور ياجلابة
وطار ووقع في سبع بحوريا جلابة
وقالت الجلابة :
مالك يا بت ودايرة شنو
قالت :
ابوي اخدراً طويل يا جلابة
وتوبو توب حرير يا جلابة
جملو الهدير يا جلابة
سوطو الوروير يا جلابة
ابوي مو فيكن يا جلابة

[ناصر يوسف]

البعرفو غايتو إنو أبوي قال لي جنسنا
جلابه هواره
أها يا ربي برضو داخلين في تجارة الرقيق ؟؟؟ تجارة البشر ؟؟؟
تبقي مصيبه عاد ...

[رأفت ميلاد]

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=390272#post390272)
منو قال ليك الكلام دا؟
يا زول الجلابي دا هو التاجر الشمالي و أغلب الظن انو الكلمة جاية من جلب أي أتى بالبضائع
كيف يكون هو بشيل العبيد و يسموهو جلابي؟
يا زول الغنى بتاع النسوان الجبتو انت دا بيوضح معنى الكلمة الحقيقي في الذاكرة الشعبية و مقصود بيها التاجرالشمالي الوجيه في ملبسو,,,

المعنى بتاع الباقر عفيفي الناجرو من راسو دا و القال فيهو انو الجلابي هو تاجر الرقيق هو معنى سياسي إلتقطوهو المثقفين بتاعين الاطراف و دايرين يبتزونا بيهو

بابكر سلامات
أصل الكلمة خرج من النخاسة .. والموضوع يطول .. ومتورط فيه ملوك و(رثات) .. دى جمع رث :) .. والجلابة كانوا يأتون بالسكسك والمحار وكل المزركش هدايا للملوك والقبائل القوية .. ليسهلوا مهمتهم ..

ربما مؤخراً تم تعميم الكلمة وعرّفت التجار المقيمين فى الجنوب .. والجلابة تقريباً مواطنين .. أصبح أسم كأنه (قبيلة) بمرور الزمن ..

أنت يا شفيف كان مشيت هناك .. ما بتبقى جلابى .. أنت مندوكورو ساكت :)

يا بكور تحور الكلمة بفعل الزمن لا يلغى تاريخها .. هذا ما حل بلفظة (خاسه) لقبيلة البنى عامر المستضعفة .. ثلاثة أرباع الناس (الآن) يعتقدون أنها أسم قبيلة .. ويسمونهم هكذا بكل أريحية ..

ياخ زمان عز الدين عثمان كان لامن ينادوهو (الدحيش) .. كان بضرب بونية وبنيتو كافرة .. بقى أسمو الدحيش بالبنط العريض فى الجرائد .. ويحيي الناس البنادوه بالدحيش فى الشارع .. ولكن ذلك لم يرقى بالدحيش الأصل .. وما زال تصغير (دحش) .. يعنى ما تامى (جحش) :)

تبرى وتستبرى أنت من الجلابة looool

[أبوبكر عباس]

بعدين مصطلح جلابي دي معروفة شنو وانت لمن قلت جلابي كنت عارف معناها شنو

اوردت مفردة جلابي مع ضبابيتها وثقلها علي كل صاحب ضمير وانساني
نفهم من كدا انو فهمك و تعريفك لكلمة جلابي ملزم لينا؟

[رأفت ميلاد]

المشاركة الأصلية كتبت بواسطة ناصر يوسف http://sudanyat.org/vb/images/buttons/viewpost.gif (http://sudanyat.org/vb/showthread.php?p=390392#post390392)
البعرفو غايتو إنو أبوي قال لي جنسنا
جلابه هواره
أها يا ربي برضو داخلين في تجارة الرقيق ؟؟؟ تجارة البشر ؟؟؟
تبقي مصيبه عاد ...


سلامات يا ناصر
حاولت هسة شرح أصل كلمة جلابة .. لكن يمكن أتلفحت من واحد منكم :D:D
الجلابة المعروفين فى الجنوب خليط من الأجناس .. وأتمددت الكلمة الأن وشملت كل الشماليين .. ربما لتعاون الجلابة مع جيش الشمال أبان الحرب .. وده من قبيلة (المسكوت عليه) .. أغتنى كثير من الصباط فى حرب الجنوب فى حمالة الجلابة ونقلهم فى أطواف للتجارة عبر الحدود مع يوغنده وزائير (الكونغو) وكينيا .. يعنى شغل تجرى من الخارج .. وبودى قارد من الداخل

[بدر الطائف]

عمر البشير و أحمد هارون الاتنين مطلوبين للمحكمة الجنائية في قضايا عرقية،
فد يوم سمعت زول وصف أحمد هارون بانو جلابي؟ لو القصة صحي نمط تفكير!

.

[أبوبكر عباس]

بابكر سلامات
أصل الكلمة خرج من النخاسة .. والموضوع يطول .. ومتورط فيه ملوك و(رثات) .. دى جمع رث :) .. والجلابة كانوا يأتون بالسكسك والمحار وكل المزركش هدايا للملوك والقبائل القوية .. ليسهلوا مهمتهم ..

ربما مؤخراً تم تعميم الكلمة وعرّفت التجار المقيمين فى الجنوب .. والجلابة تقريباً مواطنين .. أصبح أسم كأنه (قبيلة) بمرور الزمن ..

أنت يا شفيف كان مشيت هناك .. ما بتبقى جلابى .. أنت مندوكورو ساكت :)

شكرا يا رافت
طيب يا رافت لو الكلمة عبر زمن طويل إكتسبت معنى التجار الشماليين و أصبحت في حتات كتيرة تشير للشماليين
لو جا زول هسع و داير يبعث المعنى القديم للكلمة، أنا لازم أقيف ليهو لانو دا ببقى إستعمال سياسي أنا ممكن كشمالي و حفيد للناس ديل أتضرر منو

مندوكورو أصلا تعني وسخ البحر لكن حاليا تستخدم للزول اللونو فاتح و من الشمال

[حافظ حسين]

كدي نشوف عضم كي بوردي قال:


لا يوجد دي أنا ما جبت سيرتها في عضمة كي بوردي! أنا قلت لا يمكن يقبل.
و كدي خلينا نناقش الأمثلة الجبتها و أبدأها بكلام النقر العنصري
و عليك الله بأمانة شوف ردة الفعل تجاه كلامو داك
و قارن بين الناس القبلوا كلامو(لو وجد) و الناس الوقفت ليهو

عنصرية الطيب مصطفى الموجودة في الإنتباهة هي عنصرية فهم ديني و ليست عرقية،
بدليل انو كراهية الطيب مصطفى تجاه ياسر عرمان تفوق كراهيته لدكتور خليل

بابكر عباس سلام تاني ... كويس أنا وعدتك إني أرجع لمداخلتك دي و أهو بنحاول نوفي بالوعد قدر الإمكان ,,, نرد عليك و بعدين نجي نشوف مصطلح الجلابة المفخخ دا لانه علي الإطلاق ما بهمني لكن بقدر أن بهمني عملية زر الرماد في العيون المنظمة دي و تحديداً حكاية أن التمييز العنصري بقي ما مقبول في سودان الليله... معليش يا بابكر أسمح لي أقول ليك هنا في تناقض سافر جداً, في مداخلتك الفوق دي جبت جريدة الإنتباهة ووصفتها بأنها عنصرية أو صاحبها عنصري, إنت عارف يا حبيب جريدة الإنتباهة دي من أكثر الجرائد توزيعاً في السودان ... يعني جريدة تكون أكثر توزيعاً و الجريدة دي بتنادي بأفكار عنصرية واضحة و برضو التمييز بقي ما مقبول؟
عليك الله فمهنا أنت قاصد بالقبول شنو؟
قلت لي عنصرية الطيب مصطفي منطلقها ديني ما عرقي .... لكن يا حبيب نطمنك العنصرية هي العنصرية صرف النظر عن منصة الوهم المنطلقة منها ... كدا نشوف عنصرية الطيب مصطفي دي , عليك الله بس راجع وصفه لقيادة الحركة الشعبية و قيادة دارفور ؟
و تعال شوف وصفه لياسر عرمان .... هل الطيب مصطفي أو أجعص عنصري بقدر يعير عرمان بلونه أو تفاصيل جسده؟

بجي تاني

[حافظ حسين]

منو قال ليك الكلام دا؟
يا زول الجلابي دا هو التاجر الشمالي و أغلب الظن انو الكلمة جاية من جلب أي أتى بالبضائع
كيف يكون هو بشيل العبيد و يسموهو جلابي؟
يا زول الغنى بتاع النسوان الجبتو انت دا بيوضح معنى الكلمة الحقيقي في الذاكرة الشعبية و مقصود بيها التاجرالشمالي الوجيه في ملبسو,,,

المعنى بتاع الباقر عفيفي الناجرو من راسو دا و القال فيهو انو الجلابي هو تاجر الرقيق هو معنى سياسي إلتقطوهو المثقفين بتاعين الاطراف و دايرين يبتزونا بيهو

أوكي يا بابكر عباس قلت الغناء بتاع النسوان دا بوضح المعني الحقيقي للجلابي في الذاكرة الشعبية , طيب في غناء تاني بس ما سمح زي دا يا ربي حيكون بوضح أي نوع من الذاكرة ... الغناء الفيه بيقولوا
(الجلابي هبل قيتان
كان لقيتي في دكان يقول ليك إذا كان
و كان لقيتي وهيدا ينطيك وليدا )

معليش الأغنية دي أنا ما حافظها كلها لكن بستعين بصديق و من هنا لحد الصباح بتجي كاملة .... بس هنا أنا داير أسألك سؤال واضح و صريح و يا ريت تجاوب لي عليه , لاني كل ما أسالك سؤال بتنط منه

غنية الدنقر السمحة دي المدمرة للحياة البرية دي (مركوبو جدل نمر و عصاية سن فيل), الهي بتصور الجلابي كزول قيافة و رسول شنو و شنو كدا ما عارفه قلت بتمثل التصور الشعبي للجلابي , أها الأغنية بتاعت الجلابي حبل القيطان دي بتمثل أي ذاكرة؟
و علي فكرة الأغنيتن ديل غننهن نساء سودانيات ....

نصيحة ليك يا بابكر مصطلح جلابة دا مصطلح مفخخ و يا ريت تحاول تبعد نفسك عنه....

[رأفت ميلاد]

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=390449#post390449)
شكرا يا رافت
طيب يا رافت لو الكلمة عبر زمن طويل إكتسبت معنى التجار الشماليين و أصبحت في حتات كتيرة تشير للشماليين
لو جا زول هسع و داير يبعث المعنى القديم للكلمة، أنا لازم أقيف ليهو لانو دا ببقى إستعمال سياسي أنا ممكن كشمالي و حفيد للناس ديل أتضرر منو

مندوكورو أصلا تعني وسخ البحر لكن حاليا تستخدم للزول اللونو فاتح و من الشمال

تعرف يا بابكر أنت زول مباشر أكتر من اللزوم :) بتاخد المفردة بطريقة لا تقبل التأويل .. رغم الكلام ليهو معانى واسعة .. وكلمة واحدة تعنى الكثير ويختلف أدائها حسب الحدث .. (مثلاً) إذا وصفت أحدهم بأنه (طيرة) .. فبديهى لا تعنى أنه زرزور أو قمرية :)

لاتعتقد بأنى بصدد الدفاع عن كلمة (مندكورو) .. فهى تقريرية قبلية عنصرية .. الدينكا مثل كل القبائل والشعوب يعتبرون أنفسهم (الجنس الأفضل) .. ربما يعترفون بالنوير كندية أقل منهم .. فتكون علاقة (الحقارة) .. مثل ما يحدث بين الجعليين والشوايقة من مناقرة .. وكلاهما يعتقد ما دونهما (لحمة راس)

بالتمام وصف الجنوبيين للشمالين بـ(مندكورو) تكاد تطابق (لحمة راس) .. أكثر من اللفظ المباشر (وسخ البحر) .. وقبل أن نحتج عليها أو جعلها دليل .. كل زول يهبش راسو ..

وزى ما قلت ليك بعض الكلمات بمرور الزمن بتأخذ منحى أريحى .. ما سمعت بقصة (موندكورو شبه منقة) :D:D:D

[مبر محمود]

(الجلابي هبل قيتان
كان لقيتي في دكان يقول ليك إذا كان
و كان لقيتي وهيدا ينطيك وليدا )
أها الأغنية بتاعت الجلابي حبل القيطان دي بتمثل أي ذاكرة؟
تحيّاتي يا حافظ..
ألا توافقني إن الأغنية الفوق دي ما جميلة أبداً، وتحمل مفاهيم عنصرية في غاية القبح..
أن تتهم عرق كامل بالخوف فهذا يعني إنك تؤمن بأن السلوك الإنساني يتأثر بالعرق، وفي ذلك جوهر التأسيس للعنصرية.

يا أخوانا مافي مجموعات عرقية خوّافة وأخرى شجاعة..
العرق ما عندو دخل في نبل او وضاعة الإنسان
الإنسان إنسان سواء كان يقيم في الغرب أو يقيم في الشمال، والعنصرية لا تحارب بالعنصرية

[بدر الطائف]

اعتقد ان كلمة جلابة ومندكورو لا تستخدم كثيرا على المستوى الشعبى.
واعتقد جازما بان الكثير من افراد الشعب لايعرف معنى للكلمتين.
فهذه الكلمات تستخدم فى اماكن محدده ومن ضمنها هذا المنتدى.

[عبدالمنعم الطيب حسن]

نفهم من كدا انو فهمك و تعريفك لكلمة جلابي ملزم لينا؟

يا زول لاتاخذك العزة بالاثم وتكابر
سالناك عشرومية سؤال كلها نوافذ للحوار مطلقة
لم تاخد اي منها
لم نتلقى منك عقاد نافع
يبدو ان نظرية 25% تفكير
تبدو هلامية
من ردودك ومداخلاتك اتوقع انك شغال بمكنة 100% تفكير
ولكنها تبدو لنا كانها 1%
وهنا تكمن المشكلة يا صديقي الجلابي
القاطن حي الجلابة
اؤلئك المهاجرين من القحط والمحل والجدب
الي مناطق غنية بخيراتها والانسان فيها غني
بانسانيته وبتساميه مع ذاته والمحيط

[حافظ حسين]

تحيّاتي يا حافظ..
ألا توافقني إن الأغنية الفوق دي ما جميلة أبداً، وتحمل مفاهيم عنصرية في غاية القبح..
أن تتهم عرق كامل بالخوف فهذا يعني إنك تؤمن بأن السلوك الإنساني يتأثر بالعرق، وفي ذلك جوهر التأسيس للعنصرية.

يا أخوانا مافي مجموعات عرقية خوّافة وأخرى شجاعة..
العرق ما عندو دخل في نبل او وضاعة الإنسان
الإنسان إنسان سواء كان يقيم في الغرب أو يقيم في الشمال، والعنصرية لا تحارب بالعنصرية

يا مبر سلام
في البداية أحب أطمنك أنا علي الإطلاق ما قلت الأغنية دي سمحة..و إنما أغنية كعبة جداً و بشعة كمان .... و بعدين يا مبر أنا ضد التنميط دا كله , و أزيدك من الشعر بيت أنا ضد التنميط الموجود في نكات ناس محمد موسي , التنميط الموجوده في شعر الهمباتة , في الأغاني بمختلف مؤديها و لموضوع التنميط بجيه وقت تاني , لكن في المكان دا , عشان نشوف التمييز العنصري البقي ما مقبول دا
بعدين يا مبر يعني أنا بحارب في عنصرية وقت أجي اتبني لي عنصرية جديدة الفايدة شنو, و عملت شنو؟
لا يا صاحب أنا ما الزول البعمل كدا

لكن يا مبر من الكلام دا فكرتي الأساسية ابراز تناقض بابكر عباس البقي ما محتاج لمجهود كبير عشان يبرز.... يعني السيد بابكر عباس شال كلامات الأغنية السابقة ديك طوالي و لبسها لروحه و طلع نفسه زول قيافة جداً , لابس مركوب نمر, شايل ليه عصاية من سن الفيل و بضرع في سوق أبرم طاقيتك و يجي يقول ليك بكل بساطة دي صورة الجلابي في الذاكرة الشعبية.... بس هنا سألت السيد بابكر عباس إذا كان الأغنية بتاع مركوب النمر بتمثل ذاكرة شعبية, الأغنية التانية بتمثل شنو؟

و في إنتظار بابكر عباس

[أبوبكر عباس]

أوكي يا بابكر عباس قلت الغناء بتاع النسوان دا بوضح المعني الحقيقي للجلابي في الذاكرة الشعبية , طيب في غناء تاني بس ما سمح زي دا يا ربي حيكون بوضح أي نوع من الذاكرة ... الغناء الفيه بيقولوا
(الجلابي هبل قيتان
كان لقيتي في دكان يقول ليك إذا كان
و كان لقيتي وهيدا ينطيك وليدا )

معليش الأغنية دي أنا ما حافظها كلها لكن بستعين بصديق و من هنا لحد الصباح بتجي كاملة .... بس هنا أنا داير أسألك سؤال واضح و صريح و يا ريت تجاوب لي عليه , لاني كل ما أسالك سؤال بتنط منه

غنية الدنقر السمحة دي المدمرة للحياة البرية دي (مركوبو جدل نمر و عصاية سن فيل), الهي بتصور الجلابي كزول قيافة و رسول شنو و شنو كدا ما عارفه قلت بتمثل التصور الشعبي للجلابي , أها الأغنية بتاعت الجلابي حبل القيطان دي بتمثل أي ذاكرة؟
و علي فكرة الأغنيتن ديل غننهن نساء سودانيات ....

نصيحة ليك يا بابكر مصطلح جلابة دا مصطلح مفخخ و يا ريت تحاول تبعد نفسك عنه....
أغنية القيطان:
وجود الجلابي المنفتح النضيف الغني داخل مجتمعات الأطراف بشكل منافس جديد و قوي لصورة الرجل المطلوب بواسطة الحسان
عشان كدا لازم يجي إعلام مضاد يركز على مسألة الرجولة و الغابة و معروف كل ما الزول إتمدن ببعد من إستعمال العنف اليدوي

الأغنية برضو بتصب في مصلحة الجلابي

[عبدالمنعم الطيب حسن]

وجود الجلابي المنفتح النضيف الغني داخل مجتمعات الأطراف بشكل منافس جديد و قوي لصورة الرجل المطلوب بواسطة الحسان


حي الجلابة هل يصنف ضمن مجتمعات الاطراف ام لا
غايتو يا بابكر لقيتك منفوخ على الفاضي كيف ..اعمل حسابك ما تطرشق....
الواقع الان غير والجلابي غلبتو العيشة في قلب الخرطوم سيبك من الاطراف
وتخارج برة ليعيش في دول الاغتراب
ولكن للاسف مازال يفكر كجلابي لكنه مهزوم
وهنا تكمن ماساة وطن وجلابة

[مبر محمود]

لكن يا مبر من الكلام دا فكرتي الأساسية ابراز تناقض بابكر عباس البقي ما محتاج لمجهود كبير عشان يبرز....
تحيّاتي مجدداً يا حافظ..
والله أنا شايف إنك جيت تطلّع تناقض بابكر فقمت طلعت لينا عنصرية "بعض" سكّان الغرب..
فالذاكرة الشعبية واسعة وممتدة ولا تنحصر في فِهوم ثقافية محددة
خذ مثلاً الذاكرة الشعبية في الشمال فهي مثلما أخرجت لنا "الجاي من الغرب ما بسر القلب" فقد أخرجت لنا أيضاً أجمل الغزليات في نساء ورجال الغرب!
في رائي لا يوجد تناقض في أحاديث بابكر يا حافظ وإنما التناقض موجود في هذه الذاكرة الشعبية العجيبة..

ببساطة لو جيت تحتكم للذاكرة الشعبية لسكان غرب السودان متمثلة في "أغنية" عشان تحاكم بيها عموم "الجلابة"، فياخي بالمرّة عرّج على الذاكرة الشعبية لسكان الشمال وستجد فيها اغنيات بالكوم تمدح في إنسان الغرب!
فهل هذا يعني إن سكان الشمال لم يمارسوا عنصرية على سكان الغرب؟

[أبوبكر عباس]

حي الجلابة هل يصنف ضمن مجتمعات الاطراف ام لا
غايتو يا بابكر لقيتك منفوخ على الفاضي كيف ..اعمل حسابك ما تطرشق....
الواقع الان غير والجلابي غلبتو العيشة في قلب الخرطوم سيبك من الاطراف
وتخارج برة ليعيش في دول الاغتراب
ولكن للاسف مازال يفكر كجلابي لكنه مهزوم
وهنا تكمن ماساة وطن وجلابة
عبد المنعم يا اخي لما تلقى جملة "الذاكرة الشعبية" مكتوبة في نقاش
طوالي تعرف انو الناس ديل بتكلموا عن ماضي

[أبوبكر عباس]

يا حافظ نحن و الله كنا بنتفوق على ناس الاطراف ديل في حاجة واحدة وهي الجغرافيا.
و لو التقسيم السياسي الحديث كان وقعنا ضمن حدود مصر، كنا واجهنا نفس الاشكاليات،
لكن تقول شنو
الطشاش كان في بلد العمى شوف

[بدور التركي]

لكن يا مبر من الكﻼ‌م دا فكرتي اﻷ‌ساسية ابراز تناقض بابكر عباس البقي ما محتاج لمجهود كبير عشان يبرز.... يعني السيد بابكر عباس شال كﻼ‌مات اﻷ‌غنية السابقة ديك طوالي و لبسها لروحه و طلع نفسه زول قيافة جداً , ﻻ‌بس مركوب نمر, شايل ليه عصاية من سن الفيل و بضرع في سوق أبرم طاقيتك و يجي يقول ليك بكل بساطة دي صورة الجﻼ‌بي في الذاكرة الشعبية.... بس هنا سألت السيد بابكر عباس إذا كان اﻷ‌غنية بتاع مركوب النمر بتمثل ذاكرة شعبية, اﻷ‌غنية التانية بتمثل شنو؟



ما في تناقض ولا حاجة
انت بس مكبرها حبتين
وبعدين من ناحية قيافة
ياهو قيافة
انت زعلان ليه:D

تحياتي للعم شوقي
ولك ولكل المتداخلين

[عبدالمنعم الطيب حسن]

عبد المنعم يا اخي لما تلقى جملة "الذاكرة الشعبية" مكتوبة في نقاش
طوالي تعرف انو الناس ديل بتكلموا عن ماضي

شكرا يا استاذ عارف والله
انت الان كجلابي في نمط التفكير بس
عارفك عايش على اطراف الصحراء وبقيمها ومهزوم
بالاحمر مبني على الفاضي

[مبر محمود]

ما في تناقض ولا حاجة
انت بس مكبرها حبتين
وبعدين من ناحية قيافة
ياهو قيافة
انت زعلان ليه:D

تحياتي للعم شوقي
ولك ولكل المتداخلين
الأخت بدور تحّياتي..
الحوار بين بابكر وحافظ حوار ناضج وجميل.. وهو باي حال غير شخصي
حافظ لم يكبرها حبتين، فهو يناقش وفقاً لرؤية واضحة ومحددة، وفي المقابل بابكر يرد عليه برؤية واضحة ومحددة..
وجميعنا من تحاورهما نرجو الإستفادة
كوني بخير

[أبوبكر عباس]

(مندكورو) تكاد تطابق (لحمة راس) .. أكثر من اللفظ المباشر (وسخ البحر) ..
مندكورو حسب مروان حامد الرشيد يتعني الوسخ الجابو البحر.
رافت أنا ما مختلف مع مداخلاتك ديل

[حافظ حسين]

ما في تناقض ولا حاجة
انت بس مكبرها حبتين
وبعدين من ناحية قيافة
ياهو قيافة
انت زعلان ليه:D

تحياتي للعم شوقي
ولك ولكل المتداخلين

اللهم لا تمحنا لا تبلينا ... دا شنو دا هسي؟

------------
التعديل دا عشان أشيل كلامي من كلامك

[أبوبكر عباس]

عارفك عايش على اطراف الصحراء وبقيمها ومهزوم
بالاحمر مبني على الفاضي
عبد المنعم يا أخي انا عارف انو شروط العضوية في المنتدى دا كمبيوتر و انترنت
لكن كمان ريحني شوية و مارس عضعضتك (من عضوية) دي شوية مع ناس تاني غيري
أنا قلت الروب

[حافظ حسين]

تحيّاتي مجدداً يا حافظ..
والله أنا شايف إنك جيت تطلّع تناقض بابكر فقمت طلعت لينا عنصرية "بعض" سكّان الغرب..
فالذاكرة الشعبية واسعة وممتدة ولا تنحصر في فِهوم ثقافية محددة
خذ مثلاً الذاكرة الشعبية في الشمال فهي مثلما أخرجت لنا "الجاي من الغرب ما بسر القلب" فقد أخرجت لنا أيضاً أجمل الغزليات في نساء ورجال الغرب!
في رائي لا يوجد تناقض في أحاديث بابكر يا حافظ وإنما التناقض موجود في هذه الذاكرة الشعبية العجيبة..

ببساطة لو جيت تحتكم للذاكرة الشعبية لسكان غرب السودان متمثلة في "أغنية" عشان تحاكم بيها عموم "الجلابة"، فياخي بالمرّة عرّج على الذاكرة الشعبية لسكان الشمال وستجد فيها اغنيات بالكوم تمدح في إنسان الغرب!
فهل هذا يعني إن سكان الشمال لم يمارسوا عنصرية على سكان الغرب؟

سلام يا مبر
يا مبر تناقض بابكر عباس دا ما داير ليه بطارية عشان يتشاف ... الزول دا صمم ليه مودل سريع سريع كدا و جاء عمل ليها إختبار بمدخل أغنية مركوب النمر و قال خلاص المودل دا ظابطة جداً , و في خضم نشوته كرجل قيافة نسي أن المودل دي عشان تختبرها بتدخل أكثر من مدخل, أها قمنا قوقلنا ذاكرة الشعوب البضرع بيها بابكر دي و جبنا ليها حبل القيطان كمدخل تاني لزوم الإختبار, لكن الزول وقت يتنمط صعب الإقناع ... المهم ما علينا أن فكرتي الأساسية من الأغنية دي إبراز تناقض بابكر عباس و كونها أبرزت أن في عنصرية في غرب السودان دي أصلاً ما مشكلة و لا أنا داير أغتغت علي عنصرية جهة محددة , الموضوع بالنسبة لي فرش متاع نجيب كل الإشارات العنصرية و نختها هنا عشان زول زي بابكر ما يجي تاني يقول أن التمييز العنصري أضحي غير مقبول في سودان اليوم.

و بجي راجع لذاكرة الشعوب و العنصرية و العنصرية المضادة

[عبدالمنعم الطيب حسن]

عبد المنعم يا أخي انا عارف انو شروط العضوية في المنتدى دا كمبيوتر و انترنت
لكن كمان ريحني شوية و مارس عضعضتك (من عضوية) دي شوية مع ناس تاني غيري
أنا قلت الروب
الذي يعضعضك يا وهم هوالكلب
ما تعمل فيها ذكي واضح ان ذكاءك بمستوى طفل لم يتجاوز السادسة
احترم نفسك
لان سافل القول زي كلامك دا ما محتاج لجلابي كلنا نعرفه
ولكن تربيتنا وقيمنا تمنعنا من وصف انسان بالكلب
لن انزلق لمثل كلامك الذي لا يفتقد المنطق فقط ولكن الادب ايضا
ولن اتركك تهنى في هذا المنتدى
وتكتب كلمة اكتب عشرة
وقاعد لك حا اكرهك يوم وصفتني فيه بالكلب
يافاقد المنطق يا جهلول

[أبوبكر عباس]

وتكتب كلمة اكتب عشرة
كلمى

[نهلة عمر الشيخ]

الذي يعضعضك يا وهم هوالكلب
ما تعمل فيها ذكي واضح ان ذكاءك بمستوى طفل لم يتجاوز السادسة
احترم نفسك
لان سافل القول زي كلامك دا ما محتاج لجلابي كلنا نعرفه
ولكن تربيتنا وقيمنا تمنعنا من وصف انسان بالكلب
لن انزلق لمثل كلامك الذي لا يفتقد المنطق فقط ولكن الادب ايضا
ولن اتركك تهنى في هذا المنتدى
وتكتب كلمة اكتب عشرة
وقاعد لك حا اكرهك يوم وصفتني فيه بالكلب
يافاقد المنطق يا جهلول
لو المنتدى والحوار مع الناس بسبب ليكم كل التشنج دا فانا بنصحكم تاني ما تخشوهوا لانو بالطريقه دي موكد حيجيكم ضغط وسكري واحتمال فقر دم:D:D
العمر ما بعزقة ويا روح ما بعدك روح -- فوق ام كم النبز والانفعالات والتشنجات هههههههه؟؟؟
الزول الحاسي بيهو ما زول حوار وما عايز يفهم كلامك جليهو طوالي وما تتعب قلبك وتضحكنا فيك

اخيرا الزول دا ما قال ليك يا كلب قال ليك بتعضعض
انا هسي اخوي الصغير في البيت عضاني في يدي:D:D

واضح يا عبد المنعم انك انفعلت اكتر من اللازم وفقدت المنطق وقلت كلام ما جميل
فحقو تعضي اصابع الندم :D:D

استهدوا بالله يا اخوانا وما تقلبوها لينا افلام اكشن

[شبارقة]

السلام عليكم جميعا ً

الحوار في هذا البوست مفيد وإيجابي للجميع وح نستفيد منو كلنا والله

لكن عندي طلب أتمنى يجد القبول عند الأخوين العزيزين عبد المنعم الطيب وبابكر عباس وهو التكرم بعدم النزول بالحوار إلى هذا الدرك ... فأنتما أسمى من ذلك.

وشكرا ً للجميع.

[عبدالمنعم الطيب حسن]

لو المنتدى والحوار مع الناس بسبب ليكم كل التشنج دا فانا بنصحكم تاني ما تخشوهوا لانو بالطريقه دي موكد حيجيكم ضغط وسكري واحتمال فقر دم:D:D
العمر ما بعزقة ويا روح ما بعدك روح -- فوق ام كم النبز والانفعالات والتشنجات هههههههه؟؟؟
الزول الحاسي بيهو ما زول حوار وما عايز يفهم كلامك جليهو طوالي وما تتعب قلبك وتضحكنا فيك

اخيرا الزول دا ما قال ليك يا كلب قال ليك بتعضعض
انا هسي اخوي الصغير في البيت عضاني في يدي:D:D

واضح يا عبد المنعم انك انفعلت اكتر من اللازم وفقدت المنطق وقلت كلام ما جميل
فحقو تعضي اصابع الندم :D:D

استهدوا بالله يا اخوانا وما تقلبوها لينا افلام اكشن

انت اخر من يتكلم عن الكلام الما جميل من يوم ما جيتي المنتدى دا وانت شايتا في الناس استهزاء واستفزازا
وخالف تذكر وكتاباتك تنضح بذلك وتزيد
وانت فاقدة المنطق من يوم ما عتبتي هنا
ومفروض تكون اصابعك ادمت من عضها على الندم
لم اقرا لك كلاما جميلا ابدا
فتوقفت عن قراءتك
فتوقفي عن نصحي
كونو يجينا ضغط او سكري او حتى جلطة لا اعتقد ان الامر يهمك كثيرا فدعينا وحالنا ارجوك

[عبدالمنعم الطيب حسن]

السلام عليكم جميعا ً

الحوار في هذا البوست مفيد وإيجابي للجميع وح نستفيد منو كلنا والله

لكن عندي طلب أتمنى يجد القبول عند الأخوين العزيزين عبد المنعم الطيب وبابكر عباس وهو التكرم بعدم النزول بالحوار إلى هذا الدرك ... فأنتما أسمى من ذلك.

وشكرا ً للجميع.

شكرا شبارقة
سمعا وطاعة سيدي عاصم وانت تامر وانا انفذ

[نهلة عمر الشيخ]

انت اخر من يتكلم عن الكلام الما جميل من يوم ما جيتي المنتدى دا وانت شايتا في الناس استهزاء واستفزازا
وخالف تذكر وكتاباتك تنضح بذلك وتزيد
وانت فاقدة المنطق من يوم ما عتبتي هنا
ومفروض تكون اصابعك ادمت من عضها على الندم
لم اقرا لك كلاما جميلا ابدا
فتوقفت عن قراءتك
فتوقفي عن نصحي
كونو يجينا ضغط او سكري او حتى جلطة لا اعتقد ان الامر يهمك كثيرا فدعينا وحالنا ارجوك:D:D:D
من مداخلة عبد المنعم دي طلعت بالنظرية دي ((اي زول يقول ليك كلامك غلط فمعناتو فاقد المنطق))
نظرية مدهشة والله :D:D

يا عبد المنعم اي فكرة ما عجبتك اسخر منها طوالي واضحك عليها طوالي مافي زول منعك
بس ما تشتم صاحبها -- عيب
فهمت؟

[فتحي مسعد حنفي]

:D:D:D
من مداخلة عبد المنعم دي طلعت بالنظرية دي ((اي زول يقول ليك كلامك غلط فمعناتو فاقد المنطق))
نظرية مدهشة والله :D:D

يا عبد المنعم اي فكرة ما عجبتك اسخر منها طوالي واضحك عليها طوالي مافي زول منعك
بس ما تشتم صاحبها -- عيب
فهمت؟

هسة كان جيت وحاولت أصلح بين أطراف الجدال حيقوموا يدوني لقب جديد وما بعيد يكون المحلل الشرعي:D:D

[نهلة عمر الشيخ]

هسة كان جيت وحاولت أصلح بين أطراف الجدال حيقوموا يدوني لقب جديد وما بعيد يكون المحلل الشرعي:D:D
محلل شرعي عندو منطق ولا فاقد منطق:D:D

يا زول قول كلامك وما تجامل زول -- وطالما انك ما حتشتم زول فمهما اختلفنا معاك حنحترم وجهة نظرك
نحن مافي شي جايبنا لي ورا غير المجاملة والطبطبة

[عكــود]

العزيز عبد المنعم،

مساء الخير . .

أتابع هذا البوست و استفدت جدّاً من الحوار الراقي الذّي يدور.
ردّك على بابكر عبّاس يبدو أنّك كتبته و أنت غاضب بناء على تفسيرك لكلمة (عضعضتك)، حتّى بعد أن شرحها بين قوسين (جاية من عضويّة).
و قراءتي لها، قد إستخدم بابكر الكلمة ببلاغة تؤدّي المعنى (مناكفاتك - إذا رجعنا لمداخلاتك السابقة معه) لكنّها لا توحي بأي حال من الأحوال بما فهمته أنت.
أقول هذا القول لرصدي لكتابات بابكر هنا التّي تبعد كل البعد عن شخصنة المواضيع و تبعد عن توجيه الإساءات الشخصيّة لأيّ من الأعضاء.

شاكر لك إستجابتك لنداء شبارقة، لكنّي أطمع في إعتذار منك لبابكر و للقرّاء على مداخلتك الغاضبة، التّي لا أريد لها إقتباسا، و أعلم أنّ لك من الأخلاق ما يمكنك فعل ذلك.

تحيّاتي.

[فتحي مسعد حنفي]

محلل شرعي عندو منطق ولا فاقد منطق:D:D

يا زول قول كلامك وما تجامل زول -- وطالما انك ما حتشتم زول فمهما اختلفنا معاك حنحترم وجهة نظرك
نحن مافي شي جايبنا لي ورا غير المجاملة والطبطبة


منطق شنو يانهلة مع كلامكم السايب المنطق وشغال علي ردود شخصية بعيدة عن هدف البوست الأنا بعتبرو بوست جيد ومفيد لكن كالعادة النقاش اتحول لردود شخصية.وأنا معاك انو منعم غلط عليك وحمل مداخلتك فوق معناها المقصود وردك انتي علي الرغم من انو كان مهذب لكن فيهو كم كلمة زي السم..ما ضروري نشتم الزول عدييل وكفاية نكتب كلام مبهم يفهمو الشخص المقصود وكل لبيب بالاشارة يفهم.
ياريت تتوقفوا عن ابداء رأيكم في بعض وتهتمو بي موضوع البوست..
وانت يامنعم كنبت كلام عن نهلة فيهو قسوة غير مبررة ووصفتها بأشياء بعيدة كل البعد عن شخصيتها ونرجع نقول المحبة قسم..
هذه مديدتي طرحتها فمن أراد فليكشح والا كشحته أنا بها..
دي سياستي الجديدة بلا تطييب خواطر بلا بطيخ..لخبطة وفتن وبس..يللا دوروا في بعض خلوا الما يشتري يتفرج..:D:D

[رأفت ميلاد]

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=390500#post390500)
مندكورو حسب مروان حامد الرشيد يتعني الوسخ الجابو البحر.
رافت أنا ما مختلف مع مداخلاتك ديل


عارف .. ولكن بستغل كلامك عشان أوصل معلومتى looool .. أنت أحرف من ينكشنى ..

مندكورو زمااان طارق الحسن قال وساخة البابور (بابور البحر) .. فممكن برضو تكون تابعة للبحر :)

[أبوبكر عباس]

لكن عندي طلب أتمنى يجد القبول عند الأخوين العزيزين عبد المنعم الطيب وبابكر عباس وهو التكرم بعدم النزول بالحوار إلى هذا الدرك ... سلامات يا شبارقة
يا سيدي المعنى الوصل ليهو عبد المنعم من مداخلتي بعيد جدا،
لكن ما دام عبد المنعم شاف فيها إساءة،
و شبارقة وصفها بانها تشارك في إنحدار الحوار "لهذا الدرك"

ببقى لابد لي من الإعتذار للأخ عبد المنعم عنها و لكافة القراء الذين وصلهم هذا الفهم

و ليك يا شبارقة الشكر لهذا التنبيه

[حافظ حسين]

سلام يا د. بابكر عباس .... و تشكر علي الإعتذار و انشاء الله نسمع من منعم ....

أما بعد يا دكتور حواري معاك ما إنتهي بالله تعال لينا هنا و ما تتعمل إعتذارات و تزوغ ... للحول ما بخليك ما بخليك

غايتو عرب حقارين خلاص .... هسي بدور التركي دي ما مسحت بي الأرض زول قال ليها عينك في رأسك مافي هههههههههههههههه :D:D:D

[حافظ حسين]

http://www.aljazeera.net/NR/exeres/211A6018-044A-46BE-ABBC-07226488E2AF.htm?GoogleStatID=9

العنصرية ما مقبولة برضو؟

و للطيب مصطفي أتباع

[أبوبكر عباس]

http://www.aljazeera.net/NR/exeres/211A6018-044A-46BE-ABBC-07226488E2AF.htm?GoogleStatID=9

العنصرية ما مقبولة برضو؟

و للطيب مصطفي أتباع

الرابط و التصريحات ما فيهم عنصرية عرقية
دي عنصرية دينية تمارس علينا نحن برضو (الجلابة بالميلاد)

[عبدالمنعم الطيب حسن]

قد إستخدم بابكر الكلمة ببلاغة تؤدّي المعنى (مناكفاتك - إذا رجعنا لمداخلاتك السابقة معه)



العمدة عكود وكل الناس الذين مروا من هنا
سلام وتحية
كنت واقع تحت استفزاز شديد من جراء مداخلة بابكر التي لاتحتاج لذكاء شديد
لاستنتاج ما توصلت اليه ....
اسف اذا عباراتي جرحت مشاعر الناس هنا
وشكرا لكل محضر خير مر من هنا
وتقديري للجميع

[الجيلى أحمد]

يااخى والله أنا ماعاجبانى حكاية انو بابكر يمكن يطلع من الزردة دى ساااى كدا ,:p:p

فياشباب أدوها صنة وخلونا نمرق بى فائدة من الحوار الممتاز المدور دا ..


_________________
شكرآ بابكر على الاعتذار الجميل
وننتظر منعم

[فتحي مسعد حنفي]

يااخى والله أنا ماعاجبانى حكاية انو بابكر يمكن يطلع من الزردة دى ساااى كدا ,:p:p

فياشباب أدوها صنة وخلونا نمرق بى فائدة من الحوار الممتاز المدور دا ..


_________________
شكرآ بابكر على الاعتذار الجميل
وننتظر منعم

يالجيلي الاعتذر دا منعم ما بابكر:eek:غايتو لو كنت في السودان مع السلفي كنا فهمناها لكن الخلاك تشوف منعم في جلباب بابكر ألله يديني منو حبة:D:D

[حافظ حسين]

يا الجيلي و كل مثمني الإعتذاز يا خي الشباب ديل الاتنين إعتذروا خلاص خلونا نشوف شغلنا مع الناس النصبه نفسهم جلابة ديل و الله يصبحك يا ليل

[شبارقة]

شكرا ً لكم جميعا ً على هذا الوعي الذي يشبهكم

البوست ده رغم مرارة موضوعه الرئيسي (العنصرية) إلا أن الحوار فيه مفيد جدا ً

وحتكون نتائجه مثمرة لنا وللأجيال القادمة