الشايقية..ماضيهم المشرق،،حاضرهم الأخضر ومستقبلهم الواعد

[أبو الحُسين]

إخوتي الكرام في سودانيات....
سلام وأشواق وحمداً لله على سلامة العودة....
أدعوكم إخوتي تاااااااااني من جديد (جبنة في الأرتيق ...العنيقريبات متقابلة في ضل الصباح ....الرميلة مرشوشة ... بخور التيمان معجعج المكان والقلوب والنفوس الطبية تقابلكم بالبشاشة المعهودة... لا داخُل... حبابكم عشرة بلا كشرة..) أدعوكم أحبتي... لنبحر سوياً في حوش الشايقية وتراثهم الذي شغل الدنيا بما حواه من مادة ثقافية ثرة ومفيدة...
وستدور كل حواراتنا عن الشايقية بين الماضي المشرق والحاضر الأخضر والمستقبل الواعد بإذن الله تعالى.... بما في ذلك عاداتهم وتقاليدهم في الحياة اليومية إبتداءاً من بناء اللبنة الأولى في المجتمعات (الحب، الزواج، الولادة، الختان، تنشئة الطفل، النضوج، أشعار الحماسة والحرب،، أشعار الحنين والغربة... إلخ) ثم ثقافاتهم الأدبية من أشعار وقصص....
فإلى أُولى هذه المشاركات وهي قصة إستوقفتني ملياً.... وهي وضع الأفندي (الموظف) والمزارع الكادح في ميزان الشايقية زمان!!!!......
يقول أحدهم ناصحاً لفتاة نضُجت وأصبحت على أعتاب دخولها القفص الذهبي على سبيل الوصية والنصح لها....
أُوصيك ريلة.... لا تاْخدي المصُوبِن لي كريمي
أُخدي القشَّقة وقلع الهديمي
المنضِّف تمرو قالِبلو اْلمي ديمي
والمعلِّق تورو كارِبْلو التميمي....
فأضع بين أيديكم هذه الوصية التي تُعتبر ـ على حدِّ نظر قائلها ـ قيِّمة للغاية في زمنها.....

ولكم ودي حتى تستغيثون....

أبو الحسين.....
بعض المفردات..
المصوبِن: هو الشخص اللابس نضيف غاسل ملابسه بالصابون وإحتمال يكون كاوي!!!!
القشَّقها: جاية من كلمة القُشُق والفانوق... ودي كلمات نوبية من مفردات الساقي... وهما عودان يوضعان لتثبيت الساقية من الدوران.... ودايماً يضعها المزارع عندما ينتهي من إستخدام الساقي....

[أبو الحُسين]

التعديل بناء علي رغبة أبوالحسين


xxxxxxxx

[خالد الحاج]

http://sudaniyat.net/songs/modules/topMusic/tracks/yamursal.mp3

[حمدي اب جقادو]

تاني جبتو ليك بي جاي

انت يااب ريده مالك حقار كده ؟؟؟؟
انا الكلام ده مش كتبتو ليك قبل خرتمية سنه ليه مارديت علي ؟؟؟:D

الحبيب جمال ابوريده ود الحسين المدشدش البخاف من ست رييدو

سلامات ياغالي واسعد الله اوقاتك بكل ماهو جميل

اطلعت علي كل ماورد في حوشكم العامر وحقيقي حسدتكم علي حبكم لي قبيلتكم ياشوايقه (لكن برضو مابتلحقونا في ريدتنا لي قبيلتنا) .. وللامانه والتاريخ انا من اشد المعجبيبن بالشوايقه وبالفن الشايقي وكنا زمان في دنقلا من ما المغرب يقول الله اكبر نطلع القيزان وهاك ياطنبور (يادنقلاوي ياشايقي )

ابو الحسين ياعزيز موضوعك جميل وجميل جدا واتمني ان نري الشايقيه والفن الشايقي في العلالي طوالي يارب
كتب اخ عزيز لي (عمار زورق الالحان ) المقاله التاليه بعنوان الشعر الشايقي وهموم القضيه وانا متاكد انها حتفيدكم كثير في حوشكم الجميل ده واتمني ان تنال رضاكم ..فهذا العمار لايكتب الا ماهو جميل جمال اهلي في الشمال :

الشعر الشايقي وهموم القضيه
عمار زورق الالحان

الأغنية الشايقية هي لحن طروب ضارب في أعماق التاريخ ونغم مدوزن بشاعرية الكلمة ورمانسية الفكرة وعبق المباشرة ....
اتكاءات القلم على شعر الشايقية المغنَّى تحمل في طياتها شوقي وحنيني لقريتي الوادعة في شمال السودان (القرير).....
ومحاولة الاتكاء هذه..... هي وضعاً للقلم جانبا وامتطاء حسام المشاعر القوية التي تعتريني حين استمع لأغنية يكسوها الطمبور خضرة ويجملها (الصفَّافين) بألق الترديد وترنيم ما يقوله المغني بحسه الوارف....
وهي أيضا (غزوة) جانبية لمطارات الأغنية علنا نظفر برحلة آيبة إلى رحاب الديار الطيبة والأهل الودودين..........
هل الأغنية الشايقية مجرد أغنية ؟؟؟ أم أنها تحمل مضامين وهموم أهلنا البسطاء؟؟؟
وهل تطورت الأغنية الشايقية على مر السنين؟؟ أم ظلت (محلَّك سر) في مكانها لا تبارحه؟؟
وإذا كانت قد تطورت فما مدى هذا التطور ....
وما هي إنثناءاته على واقع الحياة في بلادي عموماً؟؟؟
ظلت أغنية الشايقية ... ودعونا نقول أغنية الطمبور .... ظلت مليئة بالحنين والشجن متابعةً لأنواء المجتمع وعواصف حِراكه الاجتماعي والسياسي والاقتصادي ....
هذه محاولة لاحتواء شئ من الشعر الشايقي المغنَّى ومعالجته لبعض المشاكل الاجتماعية والاقتصادية وفي بعض الاحيان السياسية.... وذلك من خلال بعض الاغاني التي تناولت الأمر ربما من خلال قصيدة قصصية أو غيرها من ضروب الشعر المغنَّى....
ولنتساءل أولاً هل هذا الأمر جديد في الشعر الشايقي؟؟؟ وأعني تناوله لقضايا المجتمع وإرهاصات الحلول التي يقدمها...
اسمحوا لي أولاً أن أجيب على هذا السؤال وهو أن تناول الشعر الشايقي لمشاكل المجتمع ـ على اختلافها ـ قديم قِدَم الاغنية الشايقية نفسها ... وخصوصاً المشاكل الاجتماعية وتحضرني هنا قصيدة (بت البلد) و(أمونة بت الشيخ حمد) وهي من الأغاني ربما الجيل الجديد الذي بدأ الاستماع للغناء الشايقي لم يسمعها أو يسمع بها.....
ولكنها تناولت قضية في منتهى الأهمية وفي زمن كان تناولها بهذا الشكل يعد ضرباً من المخاطرة ... وهذه القضية كانت إجبار الفتاة على الزواج من ابن عمها ربما أو قريبها .. وذلك خلاف مشورتها ودون رأيها .. وقد تناولت هذه الأغاني هذا النوع من الممارسات الاجتماعية في زمن كان يقال فيه (ود العم برجِّع السيرة) ....... كما أضافت الأغنيتان بعداً آخر فيما يتعلق بقصر اليد وحؤوله دون الوصول إلى المحبوب وما يمثله هذا الأمر من همٍّ يجثم على القلب...فيحيل اخضرار الايام سواداً....
وأن الإنسان مهما كانت أخلاقه وطبيعته الإنسانية لا يساوي شيئا في مقاييس بعض القيم الدنيوية إذا لم يكن يملك مالاً (والشيلة بالشنط الكبار) ...
كل هذا من خلال سرد قصصي تحتويه القصيدة بما فيها من صور إنسانية واجتماعية تتعلق بالحياة اليومية للناس في تلك البقاع البسيطة .....
وبلا خبر طق الخبر مالى البلد
قالو العريس قام بالأحد
الحلى جاطت والحريم يتهامسن جاى الولد
كوم من بنات للبير ورد
يتحدثن جاى الولد
يا بختها وا شوقنا نحن الفينا جمر الشوق وقد
... ابتدر الشاعر المُجيد السر عثمان الطيب قصيدته (بت البلد) بهذا الشجن الخرافي الذي يتملّلك أولئك الفتيات في محاولة لطرق ظاهرة العنوسة وتأخر سن الزواج و(مشاباة) البنات لعش يضمهن مع الزوج المفضال.... وكان هذا منه نذراً باقتراب وصول العريس الذي يحمل ما خف وزنه وربما ثقل وزنه وغلا ثمنه وسنأتي حيناً من الزمان إلى تلك الجزئية ... ولكن دعونا في هذا الجزء من القصيدة وتمهيده لهذا التحول الكبير في قيم المجتمع التي بدأت في التآكل وحلول قيم (السوق) مكانها ...
وأعني هنا مقاييس المادة التي حاول السر عثمان الطيب أن يمهد لها بأن الخبر قد ملأ البلد وأصبح الكل يعرف به وهذا أمر ينسجم مع معطيات القرى البسيطة حيث ينتشر الخبر بسرعة وانظر لتعبير (طق البلد) لم يقل ملأ البلد أو انتشر أو أي تعبير آخر ولكنه اختياره لهذا التعبير يعطيك احساساً بجسامة الحدث وعظمته....
وطرق السر عثمان الطيب موضوعاً اعتبره أنا طرقاً شديد الحساسية وذلك بإدخاله تعبير ( وابختها وواشوقنا نحن الفينا جمر الشوق وقد)..... وهو يرمز إلى انتظار الفتيات للفارس القادم الذي يحيلها امبراطورة على قلبه وينقذها من براثن ما اصطلح على تسميته بالعنوسة..... هذا على الرغم من أن في ذلك الزمان لم يكن الأمر كما هو عليه الآن ولكنها ربما حرفية الشاعر وشفافيته .........
والأغنية في مجملها ملمح درامي بديع ربما تصلح (فيديو كليب) يقينا ما نعانيه من غث الفضائيات ولكن أين تلفزيون السودان من هذا...!!!!

ناس البلد
النام رقد والماسك السبحي وعبد
مشغول هو بي خبر العريس القالو في قطر الأحد
راقد هناك بي غادي في آخر الديار
راكوبة ضلها أحر من حر النهار
كوم من بروش وجريد تمر عيدان صغار
ودلوق هدوم موروثة من زمن الكبار
وتلات عناقريباً صغار
كرَّابة متقطع نزل
والنوم من البي فوقا روح تب جفل
مشهد مسرحي آخر يطرحه السر عثمان الطيب يحاول من خلاله الغوص في بطل مسرحيته السوداوية الدامية هذه في محاولة منه لتعرية الواقع واستشراف لماذا يتم هذا باسم التقاليد والسلطة الأبوية التي كان يمارسها البعض... البعض؟؟؟ لا في ذلك الزمان كان (المعظم) يمارسها أعني معظم الآباء غير مدركين لمشاعر تنمو وقلوب يأكلها الحب والهوى أكلاً....
فيحاول تعرية واقع أليم ومؤلم......من خلال هذا العاشق بطريقة سردية ممتعة ومؤلمة في آن واحد... حتى يدعك تحكم على هذا العاشق من خلال حياته البسيطة وواقعه الضعيف....
والليل في أوله أو آخره لا يهم المهم أن الجميع قد انهمك في شغله منهم من نام والعابدين يرفلون في نعمة التسبيح والذكر والتلاوة..... بينما انهمك هو في شغله الخاص وهمه المقيم...
فهو عاشق متيَّم ولكن هناك ما وراء الأكمة ... لا يعلمنا إياه الشاعر مباشرة ولكن من خلال الوصف التحليلي الرائع الذي يقودنا من خلاله إلى (لماذا لا يظفر العاشق بمحبوبته؟؟؟)
فهو يجلس في راكوبته العتيقة مشغول (هو بي خبر العريس القالو في قطر الأحد)...
في آخر الديار راقد في راكوبته التي (ضلها أحر من حر النهار) وبهذا المقياس ليس فيها ظل أساساً....
كيف يطمح هذا الفقير المعدم في الزواج من بت البلد؟؟؟؟!!!!
ويواصل الشاعر ونواصل نحن رحلتنا عبر الشعر الموضوعي حامل هموم القضية......

وابقو شمس مابتغيب
حمدي اب جقادو
http://www.khayma.com/grayen/bagan.jpg

[أبو الحُسين]

تاني جبتو ليك بي جاي

انت يااب ريده مالك حقار كده ؟؟؟؟
انا الكلام ده مش كتبتو ليك قبل خرتمية سنه ليه مارديت علي ؟؟؟:D

الغالي جداً حمدي أبو جقادو...

ما عاش من يجهلك يا عزيزي... لكن بس إنشغالية الدنيا...

ويشهد الله إني أعزك جداً جداً... وجاييك راجع... عشان اليومين دي عندي إتصالات مع بعض الإخوة الدناقلة المعانا هنا لجميع أشعار الشاعر الفذ ود أحمدون من منطقة لتي... وجايي راجع ومعاي أشواق كل الإخوة الدناقلة هنا عبد الهادي محمد الحسن وعبد الرازق سيد أحمد وكل أهل كدكول وعرب حاج ولتي...

وبجيك راجع بي رواقة...

لك ودي وحبي حتى تستغيث...

أبو الحســــــين....

[أبو الحُسين]

الإخوة الكرام رواد حوش الشايقية...

أهديكم بمناسبة نفحات رمضان...

ليك ولي زمانك أبقى هادي وزين...
ولا تقطع صِلات القُربى والوالدين...
واْسْنِد للضعيف البايِس المسكين...
شان تَربح تنال الحُسنى في الدارين..
تفوز بالجنة... (في الفردوس) مع الكرار وذو النورين...

نسأل الله أن يجعلنا وإياكم من أهل الفردوس الأعلى مع الكرار وذو النورين يا رب...

ولكم ودي كله بلا حدود...

أبو الحســــــين....

[mohamed hemaid]

عمي أبو الحسين والرواد الفالحين..
يا ريت يا أب ريدة (الله يريدك) تتحفنا
بي سرد لتمرحل الرقيص عند الشايقية
ومن فترة ما قبل الجابودي ..وكذلك تمرحل
العزف علي الوتر الحنين خرش وخلِف..
تعرف يا أبو الحسين انو حبوبتي جارتكم
الساكني القلعة القدامكم أخطر من رقص الجابودي
علي وجه الارض..

(ولو طمبورك معاك نزّل لينا مثال علي كل مرحلة)

تفوز بالجنة... (في الفردوس) مع الكرار وذو النورين...

نسأل الله أن يجعلنا وإياكم من أهل الفردوس الأعلى مع الكرار وذو النورين يا رب...



.

آميين..

حميد..

[حمدي اب جقادو]

http://www.nostalgictreasures.com/IMAGES/dog_miss_you_50148.jpg

http://sudaniyat.net/vb/images/uploads/342_599643e203e09ac5c.jpg

وووووين ياعالم وووين

[أبو الحُسين]

إخوتي الكرام رواد حوش الشايقية القدامى والجدد والغالي جداً أب جقادو (جقجق)...

أهديكم مودتي كلها بلا حدود...وأعود إليكم بعد غيبة أظنها طالت كل أملي أن تكونوا زي ما فارقتكم حلاتكم حلاوة ونداوتكم نداوة ومتعافيييييييييين في برندةً باااااااااااردي غاشاها الطراوة..

أعود إليكم وأفتتح معكم بهذه القصيدة القديمة الجميلة التي صاغها الشاعر المجيد محمد سعيد دفع الله وكان من المفترض أن تُغنى بالأُوكسترا ولكن كتب الله لها أن يلحنها المرحوم سمير ويغنيها الرائع ميرغني النجار... ويمكن تكون مفاجأة جديدة إذا قُلت ليكم أن الأُستاذ/ ميرغني النجار أجاز صوته في الإذاعة السودانية بهذه الأُغنية (موش قلت ليكم قديمة!!!)...

يا مرحبا

يا مرحبا.. وشرَّفت جيت ... أهلاً حباب نور العيون ... يا مرحبا..
شوفتك ... بتفرح للقلوب ... بُستان بيحمِل كل لون
يا نسمة.. شايلة دعاش خريف ... جزلانة راقصت الغصون
يا نغمة.. في الليل والسكون ... رنَّت في جوف وترِي الحنون
..........................................
يا أنت.. يا كل الزمان .... الماضي من عمري السعيد
يا أنت.. يا حاضري النَّدِي... وكل لحظة فيهو أعيشَة عيد
يا أنت.. يا مستقبلي ويا سِر... جمال صُبحي الجديد
.................................
والليلة وين ألقى الحروف... شان أكتُب الأفراح غُنا
وارْسُم مشاعري في لوحة ليكْ... بكُلْ خواطري ألوِّنا
يا فرحة.. يا بسْمة عيون... سِعْدت بعَد قاست عنا
يا ما بكت جور الزمان ... والليلة يُبكيها الهنا...
ولكم ودي كله بلا حدود...

أبو الحســـــــــين....

[أبومناهل]

أبو الحسين
بركة الشفناك طيب . .
حمداً لله على السلامة . . .
مشتاقييييييييييييييييين . . . ولازم تعوض غيابك ده وتعمر الحوش الماهل ده

[حمدي اب جقادو]

ابو الحسين

نرجو حذف مشاركتكم التي تحتوي علي صفحةالHTML وذلك حفاظا علي شكل الصفحه وسرة التصفح (في ناس بدخلو من السودان حرام عليك ياخي ):D

نرجع ليك ياغالي وبركه بالشوف

[mohamed hemaid]

عمي أبو الحسين..
والله حرام عليك وماكانت زنقة دي..
حمد الله على السلامة وبركة الجيت..

حميد..

[أبو الحُسين]

أبو الحسين
بركة الشفناك طيب . .
حمداً لله على السلامة . . .
مشتاقييييييييييييييييين . . . ولازم تعوض غيابك ده وتعمر الحوش الماهل ده

الغالي جداً أبو مناهل...

والله يا اخوي شوقي ليكم ماب يتوصف ولو شاكي إتحداك جيب الشوقو ميتر!!!

لك ودي كله بلا حدود... وأوعدكم إني حا أعوض غيابي الفات دا بي مفاجآت بس خليها ساكت...

وهسع هاك دي لزوم ترحيبة...

وأهديها لكل العُشاق ورفقاء الدرب (خالد تنقو ،، مايم ،، ود بادي ،، جمال تاج السر،، وشيوخ العشاق عكود وجُقْجُقْ ... لووووووووووووووووووووووووول!!! وإلى شخصك الغالي أبو مناهل وكل العزابة)...

الكلمات:: جمال أبريدة.. الخُبر.. 2/10/2005م..

...معاك يا غالية أحس الدنيا ملكي براي...

سارِح فيها بي كيفي
نازِل بالعُرُض والطُول
عشْمان في غدٍ أجمل
مُستقبل ملان اْفراح
يحكي كوامِن العِشِق النَبَع جُوَّاي...

مابين القوافي التايهة في محياك
غنِّيتِك شِعِر من نور
إسترجَعْتَ ماضينا
عِشْتِك فرحة في الداخِل
حلااااة ذكراكِ لما تكوني حاضرة معاي...

تتوسع مداخل النور يجينا الضو
تِتْسارع خُطى الأيام علي الشاطئ
وفوق شاطئ الغرام نبني العُشْ الموعود
نهنئ النفس بالباقي الفَضَل فيها
ويكون حققت بي قُربِك سعادتي هناي...

نطْرُد من دُنانا الخوف
نِتْصالَحْ مع الأيام
نَوِزْنَ الصورة بالعَدَلَة
تِنْشاف واضحة بالجِيهتين
في الزمَنْ الردئ ومكَّار تكون سلواي...

نسوِّي أغاني للأطفال
مُتْنفَّس تسلِّيهُم
تَوَسِّع قُدْرَتُم للوعيِ والإدراك
تَحَفِّز فيهُم الجِد لي بلوغ المَجْد
تهْديهم تجارُب حية فكرِ وراي...

طيفِك لمَّا يغْشاني
إتْمَطَّق حلاةْ شَهْدِك
إتْحَسَّسْ خطاويكي
وصْلِ وصَال وصُول وصْلِك
مبتَغى قَصْدي كلَّ مُناي...

كم سَاسَقْ علي بابِك
واقِف لما جاني نِداكْ
أدخُل قلبي مفتوح ليك
وبي نشوةْ عشيق فرحان وجَد ليلاهُ
كُل الكون سِمِع لغُناي...

فِ ليلة سعيدة ما اْحْلاها
خطِّينا الغَد الموعود
رسَمْنا حياتنا أحلى نشيد
عشمنا سَعَد في بُكرة الخِير
نعيش اللحظة والفَرَح اللِّي قادِم جاي...
أبو الحســــــــــــــــــــــــين.....

[أبو الحُسين]

ابو الحسين

نرجو حذف مشاركتكم التي تحتوي علي صفحةالHTML وذلك حفاظا علي شكل الصفحه وسرة التصفح (في ناس بدخلو من السودان حرام عليك ياخي ):D

نرجع ليك ياغالي وبركه بالشوف

الغالي جداً صديقي جُقْجُق...

ما فاهمين حاجة... وضح؟؟؟؟

شكراً على حضورك الدائم الجميل... وبجيك راجع بي رواقة...

لك ودي كله بلا حدود...

أبو الحســـــــــين....

[أبو الحُسين]

عمي أبو الحسين..
والله حرام عليك وماكانت زنقة دي..
حمد الله على السلامة وبركة الجيت..

حميد..

الغالي جداً حميد...

خلاص أيام والله عداها... والحمد لله جيتكم...

مُحُمد ود حُمَّد إحمد قال للبلد شنو؟؟؟
أنا سايل الكريم رب الخَلِق أجيكي تب ما نِتفرِق...

فأسأل الله العظيم يلمنا دايماً في الخير والهناء...

ولكم ودي كله بلا حدود... ولكل الأهل بفرانكفورت... والغالية أم أحمد...

أبو الحســـــــــــــين....

[أبو الحُسين]

الغالين الحلوين رواد الحوش...

أهديكم ودي كله ولكل عشاق الحلي التِحِت والفوق.. أهديكم هذه اللوحة من الريف...

ولكم ودي كله بلا حدود...

أبو الحســــــــــين....

http://sudaniyat.net/vb/images/uploads/505_2890043f9cdcabb1f5.jpg

[mohamed hemaid]

http://www.0zz0.com/2006/02/21/267926288.jpg

عمي ابو الحسين..أنا سايل الكريم رب الخَلِق أجيكي تب ما نِتفرِق...
آميييييييييييييييييييييييييييييييييين..
مابين القوافي التايهة في محياك
غنِّيتِك شِعِر من نور
إسترجَعْتَ ماضينا
عِشْتِك فرحة في الداخِل
حلااااة ذكراكِ لما تكوني حاضرة معاي...
وما اجمل قلمك حين يكتب..بيشمل كل حاجة..

سعال..
ماعندك صورة من الحلي التحت تحت.؟؟ :D

حميد..

[أبو الحُسين]

http://www.0zz0.com/2006/02/21/267926288.jpg

عمي ابو الحسين..
آميييييييييييييييييييييييييييييييييين..

وما اجمل قلمك حين يكتب..بيشمل كل حاجة..

سعال..
ماعندك صورة من الحلي التحت تحت.؟؟ :D

حميد..

الغالي جداً ود أخوي أبو أحمد...

بالمناسبة شفت الحلي البعد التمُر ديك ما العطياب!!!! يعني بس خفسة بي ورا الجبَّانة اللِّت ود حليب...

وأقول ليك كلام... والله الحلي التِحِت عندي وساقية البادياب بي تِحِت عندي!!! لووووووووووووووووووووول!!!!

أشوفها من كمبيوتر البيت وأجي بكرة بإذن الله تعالى أنزلها ليك... الطرافة كلهم قاعدين يريدو الحلي التِحِت (زقلونة في التنكي) يا عملات حُمَّد خير!!!!

لك ودي كله بلا حدود...

أبو الحســـــــــــــين...

سُؤاااااااااااااااااااااال ليهو زمن؟؟؟
ويييييييييييييييييييين عمدة الحوش دا عكود بس من جيت راجع من الغيبة دي لقيتو الحيري والطري!!!!
يا رب الكرم والجود...
يعود يرجع يجينا عكود...
وعزومة كرامة بي كبشاً كبيييييييييييييييييييييير مُو عتود....

[أبو الحُسين]

الإخوة الكرام رواد الحوش الكبير... العامر بيكم دوماً...

حضرت أمس سهرة سودان الجميع والأُستاذة إيناس وكانت مستضيفة الفنان المبدع عثمان اليمني والشاعر نور الدين اليمني والباحث في التراث الشايقي عثمان عبد الله التوم...
وقد تناولت هذه الحلقة كثير من مراحل الغناء الشايقي بالطمبور خاصةً...

فما أُريد أن أقوله هنا... وقفة وتعظيم سلام لهذا الفنان القامة العثمان اليمني...
فهذا الرجل أمس وفي هذه الساعة (الويحيييييدة) تناول معظم ضروب الفنون والإيقاعات الشائعة ليست في مناطق الشمال فقط بل في أُمدرمان (أم الفنون) زي ماب يسموها... وتكلم عن حفلات الأعراس التي كان يقيمها مع زملائه في إتحاد الغناء الشعبي... وكيف أنه عندما لم يجد التجاوب المأمول... في الرقيص.. قال بدأت أحفظ بعض أغاني الحقيبة وأتغنى بها... لكي يجد له مساحة في الدارة الأُمدرمانية والخرطومية!!!

ثم عرج على موضوع مهم جداً.. وهو المنافسة الشريفة التي كانت بين الفنانين في عصره...
وقبل ما إستطرد في كلامه... أتوقف هنا لأذكر ما قاله قبل مدة ليست بالطويلة الفنان الرائع صديق أحمد (متعه الله بالصحة والعافية) عندما كان معنا في رحلة هنا في المنطقة الشرقية بالدما... حيث قال... عندما ظهرنا في ذلك الوقت أنا ومحمد جبارة ومحمد كرم الله... كانت الساحة مليئة بالقامات الكبار النعام آدم (الله يرحمه) وود اليمني مستولين إستيلاء كامل على (الصعيد) الخرطوم... وإسحاق كرم الله على منطقة الشمالية مننننننننننن حدود البديرية إلى حدود الشايقية جنوب... كيف الحل كيف الحل؟؟؟ قال محمد جبارة عَصَر علي جيهة عطبرة ووجد جمهور كبير لا بأس به ولليوم قاعدة محمد جبارة العريضة في مناطق عطبرة معروفة... الباقي منو؟؟؟ محمد كرم الله وصديق أحمد... وشوف سبحان الله الإتنين كانوا في كريمة!!! فقال بتوفيق من الله سبحانه وتعالى... ربنا كتبنا القبول في منطقة كان يسيطر عليها بالكامل إسحاق كرم الله... شئ معارف وشئ إصرار مننا على التجديد حتى نلفت إنتباه المستمع... وفعلاً أتى صديق أحمد بلونية تختلف تماماً عن سابقيه وكذلك محمد كرم الله لونيته المميزة فاستطاعوا بعد ذلك تثبيت أقدامهم في خارطة الفن الشايقي...

أرجع لموضوع المنافسة الشريفة بعد أن سُقت لكم هذه الكلمات من الأخ صديق ...

ود اليمني أمس قال... عندما أتيت إلى الخرطوم.. كان النعام آدم مستولي على الساحة تماماً لما يملكه من صوت جميل وكلمات رصينة ومدح الرجل بما هو فيه (وهذه قل ما تجدها من إنسان إلا أن يكون متمكناً وثقة)...
أها إنت يا ود اليمني تنافس كييييييييييف (القائل ود اليمني نفسه)؟؟؟ قال على طول فكرت أن إخترع لونية جديدة أتميز بها حتى أُنافس مع هذه القامة الكبيرة المستحوذة على الوجود الشايقي هناك...
قال فاخترعت لونية الرميات التي تميز بها حتى لُقِّب بملك الرميات... والرجل حقيقة أجاد فيها وأبدع... فله منا التحية والإجلال...

تعظيم سلام...
لاحظت في حلقة أمس أن ود اليمني تناول معظم الألوان الفنية في الغناء الشايقي... أغاني الدارة (تااااااااااتي يا رحاب يلة ... تاااااااااااتي قوماك في أمان الله تااااااااااااتي)... وأغاني السيرة (دار أبوك الليلة عيدها .. وفرحت أمك بي جديدة)... وأغاني الشوق والهيام... (الرسول يا حمامة قومي إترسلي لي .. أمشي لي ست ريدي واحكيها الحصلي)... وأغاني الهجرة والإغتراب بعيداً عن الأهل..( جاء للناس فرحو بيهو انا عيدي جاني نكد... يا ناس العيد... لقاني غريب وحيد عايش علي زول ما مرق عيَّد....)... كما عرج على الشعر الإجتماعي والفكاهي.. (تَسُرْقي ضحى ونهار يا (بُرَّة) مالك؟؟ لا الطير انعدم لا الفار أبالِك!!)... وشعر الحكمة والعقل...
(وحا أنزلها كاملة لزوم محمد صالح ود الخضر)!!! عفواً القراء الكرام...

سيرتي انا للخلوق لو يسمعولي حديث...
دايماً نكوس درب المحنة نخلي درب ابليس..
كعب الزول يفوت زولو ويبيعو رخيص...
ويزُك الدنيا والجرى ما لِحِقلها ميس...

الحياة ذكرى رغم الناس تجيها ظروف...
مع إنُّو طوف العيشي عايم في بحر والموج معاكس الطوف...
لكن الأيام مناظر في شريط ملفوف..
ساعة يفرِّحِن وساعةً يجيبِن خوف..
وسمِح.. الزول يعيش واضِح علي المكشوف...
وما ينضارى مادام الله فوق بيشوف...
وغيرها من الأغاني الجميلة التي فرقت علينا كتير .. .وأبدع فيها الرجل بأمانة ورمانا بكل جميل...

فله التحية الغالي عثمان اليمني ولكل رموزنا الفنية عبد الرحمن الكرو وعبد الرحمن عجيب والرائع بلاص وصديق أحمد ومحمد جبارة وكل الشخصيات التي خطت هذا الطريق وأبدعت حتى وجد هذا الطمبور مكانه اللائق من بين الفنون في بلادنا الحبيبة...
ولي عودة بإذن الله تعالى...

ولكم ودي كله بلا حدود...

أبو الحســــــــين...

[عكــود]

يا رب الكرم والجود...
يعود يرجع يجينا عكود...
وعزومة كرامة بي كبشاً كبيييييييييييييييييييييير مُو عتود....
أبو الحسين الحبيب،

يعلم الله البوست ده متابع أيي كليمةً إتختّت فوقو ..
علّي ماهو باقي لي عديل أجي وإيدي فاضي ..
وإنت ماك الراجل الهيّن.
بجيك بي كسيقي ومواجبتي
بس الأفضى شويّي،

لك من المحبّة أصفاها،

عكــود

[محمد صالح الخضر]

شكرا يا أبو الحسين على الدرر التي تقدمها لنا.

أتاري الدارة هايصي بي هني وأنا ماني جايب خبر

أهدائك تلك الصورة (لي الحلي التحت والفوق) والله أثار الشجون ودغدغ الكوامن ..
حدقت في الصورة مليا وانتابني شعور بالحسرة .. نحن وين والحاجات دي وين.. أين نحن منها ؟ وكيف الخلاص من النحن فيهو .. ومتى؟!؟

سمعت حلقة ود اليمني أمس وسجلتها كمان ، وفاتني منها جزء صغير. مع أنو كنت نعسان وأدقس لكن أصررت على المواصلة حتى النهاية وسجلتها.
لا يوجد ما أضيفه لوصفك الرائع لتلك الحلقة الجميلة فعلا وأشكرك كثيرا على الاهداء.

تحياتنا أيضا لكل من صنعوا ذلك الفن العظيم ، ولا ننسى بندة وادريس ابراهيم وصالح حسين وبخيت صلاح الذي غنى (كفارة البيك يزول) وكانت من أوائل غناء الشايقية في اذاعة (هنا أم درمان)

واصل ابداعك يا أبو الحسين
لكن حن علينا شوية .. الغربة خلت القلوب خفيفة.

[أبو الحُسين]

أبو الحسين الحبيب،

يعلم الله البوست ده متابع أيي كليمةً إتختّت فوقو ..
علّي ماهو باقي لي عديل أجي وإيدي فاضي ..
وإنت ماك الراجل الهيّن.
بجيك بي كسيقي ومواجبتي
بس الأفضى شويّي،

لك من المحبّة أصفاها،

عكــود


الغالي جداً عمدة الحوش دا... عكود...


الله ياذى الظروف دي يا اخوي... يا ها القطعتنا المدة الطويلي الفاتت دي... لكن الحمد لله جيت لقيت الدارة عااااااااااااامري حلالي... وهسع راجين جرابك المليان دا تلحقنا منو شويي شويي...

ولك ودي كله بلا حدود...


أبو الحســـــــــــين....

تخريمة::
الغالي حميد الصورة ماني ناسيها جهزتها تَب... بس إنتظرها العصر لو ربنا حيانا...

المقل بي جاي والبحر دميري... ومساوي بي هناك...
لوووووووووووووووووووووول...

[أبو الحُسين]

الغالين رواد الحوش...

والله عاوز أسأل من أحد الإخوة الكرام... كان من باب الحوش دا ما قاعد يزح.... أخونا الجعلي الشايقي فزع... وعليكم الله يا عكود وحميد قوموا الفزع عشان تأترو لينا خبرو وين... لكن بيني وبينكم يبقى لي غير أب جقادو مافي واحد بي يجيب لينا قرارو وين؟؟؟ ليهو وحشة بي قدر شوقنا ليهو....

وبالمناسبة دي أهديهو هذه النكتة سمعتها جديييييييييييدة من ناس تيراب...

قال الجعلي ليهو ضُل.. عمل ليهو مخبز ويوم الإفتتاح عمل العيش وقعد منتظر الزبائن... مافيهو أي زول هببو ليهو... يعني عيشو بااااااااااااااير جاهو شايقي قال ليهو أديني عشرة عيشات... قال الجعلي زعلان طبعاً... قال للشايقي أمشي ورا هناك ما شايف الصف دا؟؟؟

الشايقي إتلفت ماشايف صف.. لكن دبر حيلة ورجع ورا عامل نفسوا واقف في الصف... وبقى يتكلم براهو... آناس كدي إتوزنو كدي أعدلو الصف دا؟؟؟ إنتو آناس إلِّي يجيبولكم البوليس؟؟؟ إيه دا شنو الكِباس دا؟؟؟ كدي روقو شويي!!!!

أها يتكلم كدي لااااااااااااامِن وصل الشُباك... وقال للجعلي عليك الله أديني عشرة عيشات...

الجعلي دَنقَر عشان يديهو العيشات الشايقي إتحمى قوووووووووي وأداهو بُنْية في فَقَهْتو لامِن دردقو!!! الجعلي رفع راسو دا مو الضَرَبني دا؟؟؟

الشايقي بي تهكم رد عليهو... دايرني أعرفو ليك في الزحمة دي!!!؟؟؟ (ودا الراي القلت ليكم من الأول رجع في آخر الصف ليهو)!!!!!

لكم ودي كله بلا حدود... ونسأل الله يرجعك لينا يا فزع بالسلامة.. وكل الغايبين من الحوش تايمس لس والملكة الحزينة وملكة سبأ وخالد الحاج وأبو قصي وكل الحبان من جَم...

أبو الحســـــــــــين....

[أبو الحُسين]

التعديل بناء علي رغبة أبوالحسين


xxxxxxxx

الغالي جداً إبن العم خالد الحاج...

أشكرك جداً على الإهتمام والتعديل...

وأوعدك أخي الكريم.... أن كل المواضيع اللي راحت للإرشيف دي... حا أبذل كل جهدي وترى النور في هذا البوست بإذن الله تعالى...ونحن ورانا شنو بلاها؟؟؟!!!

لك ودي كله بلا حدود...

أبو الحســـــــــين....

[عكــود]

وعلي طاري ود اليمني ..
هاك دي يا أبوالحسين:
فسراع يا نسايم أشواقي ودي لي السلام مطبوق
http://sudaniyat.net/upload/uploading/Yamani_nasaem.mp3

http://sudaniyat.net/upload/uploading/Yamani_nasaem.mp3

عكــود

[أبو الحُسين]

وعلي طاري ود اليمني ..
هاك دي يا أبوالحسين:
عكــود

الغالي جداً عمدة الحوش عكود...

شوقتنا والله... الأغنية ما نزلت الظاهر عليها فيها مشكلة...

الرجاء تعديل الخطأ...

ولكم ودي كله بلا حدود...

أبو الحســـــــــــــــين....

أها يا عكود حذفناهو إنشاء الله أبو التي تي يروح منك شرق...

لك ودي كله...

[عكــود]

الأغنية شغّالة معاي زي الورد ..
وبي إقتباسك ده تكرّرت الأغنية بلا أبو التي تي ..
أمسحها من إقتباسك فشان نسمع بي مزاج،

وكدي آ ست نور شوفي الدهن لا يبقى ألمي ..

دحين شوف كمبيوترك لا يبقي غِمّي،

عكــود

[wadosman]

سلاااااام اهل الحوش..
سلااااام ليكم من ناس نورى..
و مالكم قاعدين فى الرقراق.. ؟؟؟؟؟
انا جيت مارى قلت اسلم عليكم وافوت
باقى انا لاحق الطاااحونة...!!!!!!
و هاااكم دى من الشاااعر فؤاد عبد الرحيم
لمن امشى واجيكم راجع..و جهزوا الطاب لمن اجيكم..!!!!

واحلاتك حلاة فى خشمك ايى
وين بلدكم وانتى من وين يا بنيه
انتى اهلك من كريمى ولا نورى الخدراء ديمى
ولا من بنوت حزيمى؟
بى خيشيما انا لى اومت وفى الشفاه طلت بسيمى
ولسه قالتلى بحر ولا تقيف واكسح شويى
انتى من الزومه تبقى ولا من كورتى ابقى صادقى
القرير يبقالى بلدك وفيكى انتى حنين سواقى
غايتو بس شايقيه انتى وبرضى شايقى
وبس بلدنا بقت براها واصلو منها ما بتمرقى
وبرتكانن فوق صديرك من جداولا شايفو مسقى
اصلى بعرفو من اشوفو واصلى بفروزو من الاقى
وانتى بلدك ياها ارقى؟
وبى خجل قالتلى ايى
اى صح انتى من بنوت بلدنا الله ينصر دينا بلدى
انتى ما مسحت جمال بنوتنا الاللبنادر فى فتوه اعلن تحدى
انتى ما غيمه هجير فى النهار وقفت قصادى
انتى ما نسمه صباح فرحت ريس معدى
انتى ما بسمه طفل سواا سدر امو الوسادى
اى صح انتى ارقى بشوفا فيكى
لون رمالا ولون جروفا هى لون وشيكى
والوزازين لما تمشى فوق جروفا زى مشيكى
والعطور الفايحى منك واحلالى على العليكى
عاد لا فرير ولابتبقا محلب ولا بتطولا الصندليه
وواااا حلاتك حلاة فى خشمك ايى

..................

[أبو الحُسين]

الأغنية شغّالة معاي زي الورد ..
وبي إقتباسك ده تكرّرت الأغنية بلا أبو التي تي ..
أمسحها من إقتباسك فشان نسمع بي مزاج،

وكدي آ ست نور شوفي الدهن لا يبقى ألمي ..

دحين شوف كمبيوترك لا يبقي غِمّي،

عكــود

الغالي عكود... والله الشئ دا ما شغال ....

أسأل كُتُر!!!

عليك الله عدِّلو لأن الأغنية دي كاربي خلااااااااااااااص....

لك الود كله كيمان كيمان...

أبو الحســــــــــين...

[عكــود]

العزيز أبوقصي
صباحك خير

الملفات المرفوعة إما "ميديا بلير" وهذه أظنها تشتغل عندك لأن الميديا جزء من نظام وندوس. بعض الملفات مرفوعة بنظام "ريل بلاير" وهذا برنامج في الغالب لا يأتي مع نظام وندوس . وتنويع الملفات الغرض منه منع التضارب حيث لا تحتمل الصفحة إلا ملف واحد من نفس النوع.

في اللنك أدناه تجد برنامج ريل. أعمل ليه إنزال ثم ست أب وستقدر علي سماع ومشاهدة كل الملفات.

http://www.real.com/freeplayer/?rppr=downloadcom1

محبتي لك

خالد الحاج
أبوالحسين الحبيب،

الرد ده كتبو خالد لأبوقصي لأنو قال مِتِل حديْسًك ده في بوست شايقيات ..
دحين جرّب اللنك ده ونزّل الريل بلير وكان ما سمعت بعد داك ..
لوم خالد،
بس عليك سيدي علي تمسح لنك الأغنية من إقتباسك الخامشو من مداخلتي ..
أبو التي تي ما زال شغّال،

شوايقة شُــــتُر !!
:D :D

عكــود

[أبو الحُسين]

http://www.0zz0.com/2006/02/21/267926288.jpg

عمي ابو الحسين..
آميييييييييييييييييييييييييييييييييين..

وما اجمل قلمك حين يكتب..بيشمل كل حاجة..

سعال..
ماعندك صورة من الحلي التحت تحت.؟؟ :D

حميد..

الغالي جداً ... حميد

أها هاك الحلي التِحت من قلعة حبوبتك نورا!!!

لك المحبة كلها بلا حدود...

أبو الحســــــــــين....

http://sudaniyat.net/vb/images/uploads/505_169844401638824643.jpg

[abu qusai]

أبوالحسين الحبيب،

الرد ده كتبو خالد لأبوقصي لأنو قال مِتِل حديْسًك ده في بوست شايقيات ..
!!
:D :D

عكــود


الكاشف أخوي

شيل الحال لزومه شنو ؟؟؟؟؟؟

سلام ياعيال شايق البتلحقوا الضعيف وتنجدوا الضايق
أنا متابعكم كويس ، واصلوا .... وبجيكم راجع

لكم مودتي

أبو قصي

[أبو الحُسين]

إخوتي الكرام،،،
مسالكم الله بالخير والرضا...

أطل عليكم اليوم بقصيدة (الدوسيب) وفيها سنتناول ما سِر هذه القصيدة ذات الكلمات البسيطة والمعنى العميق....
قصيدة (الدوسيب) من القصائد القديمة جداً وكانت تُغنى عند رقِّيص العروس بعد قطع الرحط.. ففي يوم الزواج وبعد الصفاح (العقد) وعند المساء يذهب العريس ومعه أهله سائرين به إلى بيت العروس لإتمام قطع الرحط الذي لم يكن آنذاك فيه قروش أو حلوى (فكان رحط بي حق وحقيقة) فبعد قطع الرحط تقيف الصفوف لرقِّيص العروس التي تظهر كالقمر بين الكواكب بعد ما جلست على الطلح أكثر من شهر آنذاك وتكون لابسة تنُّور مربوط في وسطها ـ عارية الصدر والبطن ـ لماذا؟؟ لكي لا يشك أحداً في عذريتها، وأما المحافظين الذين يمنعون هذه التقاليد فتقوم الدنيا وما تقعد ويشككوا في البت المسكينة إنها على أبسط الفروض حامل!!! وعندي عن هذا الموضوع قصة معاصرة في ذلك في مرة من المرات كنت جالس مع أحد الحبوبات الكبار ـ وأنا دائماً ما يحلو لي الونسة إلا معاهن الله يمد في أيام الباقيات ـ وقمنا ذكرنا أحد الحريم في الحي وحاولنا إطرائها بالخير... فنطت الحاجة الكبيرة دي وقالت ( أي تُب دي في عِرِسها ما دوسبولة) أي ما غنوا لها أُغنية الدوسيب أي ما عرفوا حقيقتها فأصبحت زي العيب ملازمها طول حياتها!!!!
فبعد هذا يبدأ أخوات العريس والعروس وأهلهم في غناء قصيدة الدوسيب....
التي تقول....

الدوسيب .... كدي يا عروسنا
الخضراء جابيق .... كدي يا عروسنا...
سمِحْةَ الذات .... كدي يا عروسنا...
الشروط تامَّات .... كدي يا عروسنا...
سمِحْةَ الزي .... كدي يا عروسنا...
عيش الكُري .... كدي يا عروسنا...
المفوسِب ني .... كدي يا عروسنا...
الحرير للطي .... كدي يا عروسنا...
العظمة زينة الحي .... كدي يا عروسنا...
عيش الباجور .... كدي يا عروسنا...
(الما نقدو زرزور) .... كدي يا عروسنا...
الغَفَرو حاس دور .... كدي يا عروسنا...
عيش القُرير .... كدي يا عروسنا...
الماب يحومبو الطير .... كدي يا عروسنا...
الجنيه في الجيب .... كدي يا عروسنا...
البِقت فوسيب .... كدي يا عروسنا...
الدُّقة والنُقَّار.... كدي يا عروسنا...
القرمصيص العال .... كدي يا عروسنا...
الرصَّة والشبَّال .... كدي يا عروسنا...
شديرة البار .... كدي يا عروسنا...
تضوي فِنْيار .... كدي يا عروسنا...
تِبْش الرمال .... كدي يا عروسنا...
الدوسيب يا خدرة كَمِّك
يا جلادةَ الشم جِبْتي ابن عمك..
الدوسيب نايري وعديلي
عروسنا ام زين مُقْد الجزيري
الدوسيب فاحت جلادها
عروسنا ام زين مسكت وصاتها....

.................................................. ....
ترجمات::
الدوسيب والفوسيب: القصب الأخضر الغض....
الجابيق: كلمة نوبية تستخدم في قطع صفق القصب الأخضر أي أن هذه البت أصبحت جاهزة للجيبيق (الزواج)
الفِنيار: الفانوس.
الجلاد والزباد: من أنفس العطور في ذلك الوقت...

ولكم ودي كله...

أبو الحسين....

[أبو الحُسين]

الكاشف أخوي

شيل الحال لزومه شنو ؟؟؟؟؟؟

سلام ياعيال شايق البتلحقوا الضعيف وتنجدوا الضايق
أنا متابعكم كويس ، واصلوا .... وبجيكم راجع

لكم مودتي

أبو قصي

الغالي جداً أبو قصي... من رواد الحوش الأوائل...

شرفت ونورت دارك يا اخوي... وشيل الحال لزومو الحمد لله الجابك لينا... وإن بقى لي كدي... شيل حالك بي ندقو بالطار!!!! :) :p :) :p

والجابك يجيب الملكة الحزينة... وهي تتاوق عند خشم الباب قالت مضيعي الكُشَر حقها (كلمة سرها)... نرجو من الأخ خالد الحاج يحصلها بيهو سريييييييييييييييييع...

ولكم ودي كله بلا حدود...

أبو الحســــــــــــين...

[abu qusai]

أخي أبو الحسين

سلام

متابعك كويس يا موسوعة .... وما أنسى لما كانت نساء الحي بعد العصر يوقفوا العروس للرقيص ويدقن الكف وتقيف عمتي العاجبة بت عبد الله عليها رحمة الله وتسوي الفوسيب كدي يا عروسنا .. ثم الجابودي ثم رقصة بلدي ينادوا فيها عدد من الصفاقين المشهود لهم أمثال ناس ناس عبد القادر ود مامونة وأب خبته بي طنبورو ويدقوا ليها الكف .... الله قادر

أخي الحبيب
فقط أحب أصحح معلومة وهي أن مرحلة قطع صفق القصب تسمى المتيق ... يقطعوا الصفق ويربطوه بقدر ملية اليد والربطة الواحدة تسمى متيقة ... وقال الشاعر :
الله فوق النايرة قارسيقا
الصغيرة ضميره متيقة

أما الجابيق فهو المرحلة التي تعرف بالشليخ .. وهي قطع القصب الزائد ... يعني لما القصب يصل مرحلة معينة ويكون في قمة خضرته ونضاره يعمد المزارع إلى تفريق المناطق الغزيرة طمعا في زيادة إنتاجيتها من المحصول فيقوم بنزع بعض القصب من المناطق الغزيرة ولا يتم ذلك إلا بعد سقاية الزرع قبلها بيوم حتى تسهل عملية نزع القصب ويومها طبعا بيكون القصب رويان وأخضر شديد ... وهذه العملية تسمى الجابيق . ومرحلة الجابيق عادة تسبق مرحلة المتيق والكلمتين نوبيتين فعلا ...

مع تحياتي

أبو قصي

[أبو الحُسين]

أخي أبو الحسين

سلام

أخي الحبيب
فقط أحب أصحح معلومة وهي أن مرحلة قطع صفق القصب تسمى المتيق ... يقطعوا الصفق ويربطوه بقدر ملية اليد والربطة الواحدة تسمى متيقة ...
مع تحياتي

أبو قصي

الغالي جداً أبو قصي...

الحمد لله الجيتنا قبل ما نشيل طارتنا ونقوم فوقك... :)

تشكر يا ملِك علي التوضيحات وإطرائك الأنا منو لسع بعييييييييييد...

وعشان توجيهاتك دي يا اخوي نحن عاوزنكم إنتو والغالي عكود... تكونوا دايماً متواجدين وفي خشم الحوش بي كراسيكم الخيزران والرملة قدامكم مرشوشة.. وتراقبوا الطالع والنازل... ما تقولوا من الكُبُر... لوووووووووووووووول... :) :mad: :mad: :p دي بس لزوم الوجاهات وكدي!!!! وتوجهوا وتصححوا...

يديكم ألف عافية... ويلة خلي بالك معانا... وشكراً جميل على التوجيهات وحا تكون دوماً على العين والرأس...

وبجيك راجع تاني...

لك وللإخوة المتداخلين والقراء الكرام ودي كله بلا حدود...

أبو الحســــــــــــين....

[محمد صالح الخضر]

يا الله عليك يا أبو الحسين
يا سلام عليك

الليلي تستاهل نوط الجدارة
جبت لك حاجات عجيبة
أول ما شفت صورة الحلي وعاينت للبيت القدام في الصورة تخيلت الزول مطلع عنقريبو في الحوش داك في الصيف والقمرة تلهلج والنسمات تهب وليس بينه وبين السماء حجاب. عينك للنجوم طوالي. الروائي المبدع علي الرفاعي يقول في رواية (قبيلة من وراء خط الأفق) في صفحة 70 يقول:

في تلك الليلة التي آوى فيها سعد المجيذيب الى قوز قرافي، وضع سريره تماما في البقعة التي كان يضعه فيها منذ سنوات خلين. وقد عرف ذلك من تلك النجمة التي تقع في خط عمودي مع عينه اليسرى.
فتأمل!
من منا لم يعش هذه التجربة؟

أيضا منظر الحوش ذكرني الأبيات التالية:

لبيت تخفق الأرياح فيه أحب اليّ من قصر منيف
وكلب ينبح الطراق دوني أحب اليّ من قط أليف
ولبس عباءة وتقر عيني أحب اليّ من لبس الشفوف
وأكل كسيرة في عقر داري أحب اليّ من أكل الرغيف

الكباشية قالت :
يا دريجة وا شوقي
نووا لي بالسوقي
بسمع حنين نوقي
دايرة عرب ذوقي

نوى عريسها أن يرحلها الى مكان آخر غير المكان الذي عرفته وألفته.

أما قصيدة الفوسيب كدي يا عروسنا فتمثل قمة الروعة
دي جبتها من وين يا أبو الحسين؟

حكى أحد أعمامنا وهو يشير الى أحداهن فقال :
أنا كنت صغير لمان (فلاني دي) رقصوها بالفوسيب. حكى انها كانت تلبس رحط فقط (مصنوع من سيور الجلد المشققة) . وباقي جسمها عاري تماما. البطن والصدر وما تحت الركبة.

والجابيق ذكرني قول الشايقي :
لا بجابق لا بورق ... داير أحش من حد العرق

وقد أعجبتني جدا عبارة الحاجة الكبيرة :"اي تب دي في عرسها ما دوسبوله"

مزيدا من الابداع يا أبو الحسين يا فنان

[أبو الحُسين]

إخوتي الكرام رواد الحوش العامر بيكم دوماً... صبحكم الله بالخير والرضا...

اللللللللللللللله يا الحب الصادق عند الشايقية زمان.... الما زي حب ناس واحدين هسع !!!!؟؟؟ :p

خصمتكم بالله شوفو جنس الكلام دا حصل لاقاكم في حكايات ألف ليلة وليلة؟؟؟؟ :)

مرسالي الهميم أركب هجَّاني..
رُوح بي سُرعة أنزل في الحِتَّاني..
أمِش واندلّة بالدرب التِحتاني...
كُورك بي سُتُر قول يا فلاني...
زايلي الدنيا مُخْلاتي المَلاني...
أنا ماب انساكي لا مُدةْ زماني...
عند القرقرة وعَقْدةْ لساني....
أجيب الكلمة واْخْتِمها بي فلاني....

ولنا عودة... وجاييك راجع يا محمد صالح...

ولكم ودي حتى تستغيثون...

أبو الحســـــــــــــين...

[أبو الحُسين]

يا الله عليك يا أبو الحسين
يا سلام عليك

الليلي تستاهل نوط الجدارة


والجابيق ذكرني قول الشايقي :
لا بجابق لا بورق ... داير أحش من حد العرق

وقد أعجبتني جدا عبارة الحاجة الكبيرة :"اي تب دي في عرسها ما دوسبوله"

مزيدا من الابداع يا أبو الحسين يا فنان

الغالي جداً حُمَّد صالح... كما يحلو لي أهلنا...

لك التحية والود على حضورك الدائم... وزي ما قلت ليك الدار هي داركم ونحن ضيوفها... بس نشارك فيها زينا زيكم...

أما حكاية الحاجات الكبار ديل يا اخوي... أنا أصلي ما قاعد أجالس غيرِن... الله يمد في عمر الحيات ويرحم الماتَن يااااااااااارب...

وأحكي ليك القصة دي مع جَبَنةْ أُمي سعيدي... حاجة كبييييييييييييرة (نسأل الله يحفظها ويديها طولة العمر يا رب)... يعني كبيرة أم الجميع...

كنا دايماً في إجازتي بقعد نصت نهار معاها أشرب الجبنة... ونان أريتها جبنتك هي... الجبنة والبرندة مرشوشة وبخور التيمان ويجن علينا ناس سعيدي بت آسيا وناس سكينة وفاطني بت الحسن ووووووو... شفت كيف... نقعد من بعد الفطور لامِن حمد الحسن ود أب كروق يأذن صلاة الظهر... بعد داك نقوم نتفرتَك ومرات مرات ينتقل المجلس لي جنينة ناس عبد الرحيم ود المتوكل الغداء تحت المنقة... لووووووووووووووووووول....

أها الكلام دا روتيني كل يوم ... يعني أي إجازة جايي أنا من الخرطوم من الجامعة... أقضيها كدي...

يوم مسافر من البلد ماشي الخرطوم... وقمت نسيت حكاية الجبنة الكنا بنشربها نصت نهار دي... مشينا في القبولاب فطرنا عااااااااادي وشربنا شاينا... وناسي حكاية الجبنة دي كلو كلو... أها قال كدي البص دا إتحرك من القبولاب وتعال شوف الكع والكرع والكربرب.. الفي راسي... نان البندول سوى فيهو شئ... الريفو سوى فيهو شئ؟؟؟ الريفادول الشنو شنو شنو كدي دول سون فيهو شئ؟؟؟

إلا قامو قالو لي تستهدى بي الله وتنتظر لي بكرة مواعيد شراب جبنة الجن دي حتى راسك يستعدل... نان مي من اليوم دا... تاني حلفت ما أشرب لي جبنة بي إنتظام... في رمضان دا بقيت يوم أشربها ويومين أغبها...

أها لمن هسع نزلت إجازة... وزرتها الحاجة أمي سعيدي بعد الفطور كالعادة... جابو الجبنة شربتها الليلي... بكرة لأ لأ لأ... بعد بكرة نعم نعم نعم... وهكذا....

ياااااااااااااحليلة أيام كانت... نسأل الله يرجعنا طيبين ونلقاهم كلهم طيبين يااااااااااااارب...

لك أخي محمد صالح والإخوة المتداخلين والقراء الكرام من المودة أعذبها...

ونتلاقى كان الله مد في الأيام...

أبو الحســــــــــين...

[أبو الحُسين]

إخوتي الكرام رواد حوش الشايقية،،،

مساكم الله بالخير والرضا...

الللللللللللللللللللللللله يا المخاطرة من أجل المحبوب....
أخونا دا كان من كبار المزارعين المرموقين،،، لكن محبوبته في الحي الآخر،، فأراد أن يخاطر بمكانته الرفيعة بين زملائه المزارعين ،،، وعشان سواد عيون محبوبته يُصير شحاداً يمر بالحلاّل حقيراً ذليلاً يسأل الناس!!!! أي مخاطرةٍ هذه؟؟؟؟
يقول شاعرنا....

دايْر أقِد القرعة مالي علي الشقاوة...

وداير أباري الحِلِّي واشحدها شاوة شاوة...

في التمُر والسكر والعيش والحلاوة...

أتقِّل دمي عِنْ بيت الزغاوة... (دا بيت محبوبته)!!!!

وأشوف الدابو بالمِتِّيق إتساوة...

الصَّمَدو علي السواقي أخد البراوة....

شفتو كيف؟؟؟ قالوا حُب قالوا!!!!

ولكم ودي كله قواسيب قواسيب...

تحياتي أبو الحسين.....

[أبو الحُسين]

إخوتي الكرام رواد الحوش،،،
صبحكم الله بالخير والرضا...

الللللللللللللللللللللللله يا المخاطرة من أجل المحبوب....
أخونا دا كان من كبار المزارعين المرموقين،،، لكن محبوبته في الحي الآخر،، فأراد أن يخاطر بمكانته الرفيعة بين زملائه المزارعين وأعيان الحي!!!،،، وعشان سواد عيون محبوبته يُصير شحاداً يمر بالحلاّل حقيراً ذليلاً يسأل الناس!!!! أي مخاطرةٍ هذه؟؟؟؟ :D لووووووووووووووول :D
يقول شاعرنا....

دايْر أقِد القرعة مالي علي الشقاوة...

وداير أباري الحِلِّي واشحدها شاوة شاوة...

في التمُر والسكر والعيش والحلاوة...

أتقِّل دمي عِنْ بيت الزغاوة... (دا بيت محبوبته)!!!!

وأشوف الدابو بالمِتِّيق إتساوة...

الصَّمَدو علي السواقي أخد البراوة....

شفتو كيف؟؟؟ قالوا حُب قالوا!!!! :D

ولكم ودي كله بلا حدود...
ونواصل بإذن الله تعالى...

أبو الحســــــــــين.....

[أبو الحُسين]

الإخوة الكرام.... رواد الحوش...

إنتو مالكم ... بقيتو تجاجو بي برة... الحاصل شنو؟؟؟

بس بقت قولة عوافي ماب تجيبكم... ولا قولة سلام كمان؟؟؟؟

لووووووووووووووووووووووووووووول..!!!

والله كلام...

لكم من المودة أحلاها وأعذبها... وجاييكم راجع... بس لزوم حركات وكدي...

أبو الحســـــــــــــين...

[محمد صالح الخضر]

العزيز أبو الحسين

والله كلامك أحلى من المشرقيي (اللانصها) وأحلى من المدين والتمود والكريق. أنا شخصيا متابعك ، متابعك متابعك، لكن ما عندي الوقت عشان أرد عليك بمزاج. الجريدة أشيلها معاي البيت مرات ما أقدر أقراها.
أنا شخصيا (متكل) على ناس عكود وحميد وباقي الجماعة يردوا لك .. ... لكن الظاهر عليهم برضو مشغولين.

نحن متابعنك ما وقفنا تب.

بس أنت واصل في الكلام السمح ده، نحن أضعف الايمان بنحفظوا في الكومبيوتر ونطبعوا. ما تقول مجهودك رايح ساكت.
أوع (الصنة) دي تخلي همتك تفتر.

ليك السلام من عندي مردوم .. يملا بابور بابور يقوم

[mohamed hemaid]

الإخوة الكرام.... رواد الحوش...

إنتو مالكم ... بقيتو تجاجو بي برة... الحاصل شنو؟؟؟

بس بقت قولة عوافي ماب تجيبكم... ولا قولة سلام كمان؟؟؟؟

لووووووووووووووووووووووووووووول..!!!

والله كلام...

لكم من المودة أحلاها وأعذبها... وجاييكم راجع... بس لزوم حركات وكدي...

أبو الحســـــــــــــين...

عمي ابو الحسين..
مساك الله بالخير ياعملاتك..
والله انت زاتك مامدينا فرصة ندخل فيها كرعين
تصبح وتمسي علينا بهذا الكلام الجميل..وعارفك
يالجميّل راسك مليان بالحديث السمح دا..وزي دا نجيبو من وين
انت مباري الجبنة من الهادياب لي الحميداب ومن تحت شجر الجوافة
لي شجر المنقة..( انا ماقلت مبارى الضللة) ما تفهمني غلط :D
والله مستمتعين الي حد تفقش عنده السنون..ومي تحمد الله الجنة الرمتك
في راسك وما رمتك من فوق راس البص :D
وبتل ما قال ود الخدر نشيل ونخزن ونقرا..

لاتقطع حبل الوصال...

حميد..

[أبو الحُسين]

العزيز أبو الحسين

والله كلامك أحلى من المشرقيي (اللانصها) وأحلى من المدين والتمود والكريق.



ليك السلام من عندي مردوم .. يملا بابور بابور يقوم

الغالي جداً محمد صالح...

أها زي الكلام دا... يرفع المعنويات ويخلي الواحدد يتفوجج ساااااااااااااااكت... ويخُم ويصُر...

لووووووووووووووووووووووووووووووول... :D :) :p

لك من المودة أحلاها... والله يا اخوي القصد من الطلة مرة مرة... تشجيع الواحد للمواصلة... وأنا عاااااااااارفكم بتقرو وتخزِّنو لكن مرة مرة كدي قولو عوافي...

أبو الحســـــــــــــين....

[أبو الحُسين]

عمي ابو الحسين..

انت مباري الجبنة من الهادياب لي الحميداب ومن تحت شجر الجوافة
لي شجر المنقة..( انا ماقلت مبارى الضللة) ما تفهمني غلط :D


لاتقطع حبل الوصال...

..

الغالي جداً ود أخوي حميد...

أنا فاااااااااااااااااهمك يا اخوي جداً... وناقشك كمان...

أشجار المنقة والمقيل تحت الجوافة وأُمي سعيدي حلييييييييييييييييييييلة... (نسأل الله يديها طولة العُمُر)...

وحبل الوصـــــــال أبشرك... ماب يِنقَطِع... وبس شوية كدي... حبل الوصال (4) فوق الدرب...

لك من المحبة والمودة أعذبها وأحلاها...

أبو الحســـــــــــين.....

[عكــود]

ألأحباب أبو الحسين والمتداخلين،
لَيْ كم يوم في بيت شعر، قالو محمد سعيد دفع الله، معلّق معاي ..
عايزكم تتأمّلوا وصف النُضج والعِفّة فيهو:

شبه البي تِحِت في أمو مال فدع الجريد
لا حام الدباس بي فوقو لا اتمدّت لو إيد
متابعنّك يا جمال،

عكــود

[عبد العظيم الطاهر]

إخوتي الكرام رواد الحوش العامر بيكم دوماً... صبحكم الله بالخير والرضا...

اللللللللللللللله يا الحب الصادق عند الشايقية زمان.... الما زي حب ناس واحدين هسع !!!!؟؟؟ :p

خصمتكم بالله شوفو جنس الكلام دا حصل لاقاكم في حكايات ألف ليلة وليلة؟؟؟؟ :)

مرسالي الهميم أركب هجَّاني..
رُوح بي سُرعة أنزل في الحِتَّاني..
أمِش واندلّة بالدرب التِحتاني...
كُورك بي سُتُر قول يا فلاني...
زايلي الدنيا مُخْلاتي المَلاني...
أنا ماب انساكي لا مُدةْ زماني...
عند القرقرة وعَقْدةْ لساني....
أجيب الكلمة واْخْتِمها بي فلاني....


ولنا عودة... وجاييك راجع يا محمد صالح...

ولكم ودي حتى تستغيثون...
أبو الحســـــــــــــين...



:D :D :D :D انا غيرت رأيي من العبايي و الملفحه ...

حوشكن ده آ ود الحسين دايرو عرّاقي الليل ساكوبيس عدييييل كدي

ود الطاهر


جاييكم

[أبو الحُسين]

ألأحباب أبو الحسين والمتداخلين،
لَيْ كم يوم في بيت شعر، قالو محمد سعيد دفع الله، معلّق معاي ..
عايزكم تتأمّلوا وصف النُضج والعِفّة فيهو:

شبه البي تِحِت في أمو مال فدع الجريد
لا حام الدباس بي فوقو لا اتمدّت لو إيد
متابعنّك يا جمال،

عكــود


الغالي جداً عمدة الحوش عكود...

شوف عليك الله حُمَّد سعيد حالفو الإختيار دا كيف....
شبه البي تحت في أمو مال فدع الجريد...
يعني الحلاوة الفوق الحلاوة...
لا حام الدباس بي فوقو لا اتمدَّتلو إيد...
لا حام الدباس يعني ولا نظرة سااااااااااااااااكت... ولا اتمدتلو إيد... يعني ولا حركات كمان!!!....

قمة الروعة تسلم ويسلم أخونا الغالي جداً محمد سعيد دفع الله...

والبيت دا ذكرني بي بيت في قصيدة الدوسيب كدي يا عروسنا البي يقول:::

عيش الباجور ... كدي يا عروسنا ... الما نَقدو زرزور... كدي يا عروسنا...

الزرزور ينقدو الجن اليجننوا!!!

ولك من المودة أحلاها وأعذبها...

أبو الحســــــــــــــين....

[عكــود]

عيش الباجور ... كدي يا عروسنا ... الما نَقدو زرزور... كدي يا عروسنا...

الزرزور ينقدو الجن اليجننوا!!!
دحين يا أبو الحسين ..
إن بقى الزرزور ده نَقَـد العيش نلومو ..
وللا نلوم سيدو الما قيّل حَرَســو فوق حاحايتو؟
هو عيش الباجور .. عيش نَصَاح؟

عكــود

[أبو الحُسين]

:D :D :D :D انا غيرت رأيي من العبايي و الملفحه ...

حوشكن ده آ ود الحسين دايرو عرّاقي الليل ساكوبيس عدييييل كدي

ود الطاهر


جاييكم[/align][/size]

الغالي جداً ود الطاهر...

أها نعاين والبحر صااااااااااااااااااافي... لا دالةً وقعت ولا هجيمةً جات مطفِّري...

شنو عراقيك دا لسع سليمان ود أحمد سليمان ما جهزوا؟؟؟؟

لك من المودة أحلاها... شكراً على مرورك الجميل....

أبو الحســـــــــــين....

[wadosman]

يا ود الحسين...
انتو ساكتين كيفن على الزول البيقولوا ليهو الجيلى
الزول دا هبشنا بهناك وجاب سيرة اليهود وكلام زى دا..
الا بينك و بينك.. نحن كان عندنا ساقية اسمها ساقية الياهو
ولى الليلى قاعدى اصلو كان اشتراها منهم عمن لينا زمااان
انا عارف الكلام دا بيجيب لينا الهوى.. لكن للامانة بقولو
و سجن سجن غرامة غرامة....و محل رهيفى ال....

[كمال حسن علي]

أسجل حضور ومتابعه لهذا البوست البلد
وأطالب بمنحي إقامة دائمة فيه (يعدلا عليكم الله شقيش ماتقبلوا)

[أبو الحُسين]

يا ود الحسين...
انتوالا بينك و بينك.. نحن كان عندنا ساقية اسمها ساقية الياهو

....

لووووووووووووووووووووووووووووووووووووووووول...

الغالي ود عثمان أخوي....

أولاً حمداً لله على سلامة عودتك للحوش... وسعيدين بيك طايرين السمي...

أها ساقة الياهو دي بجيك ليها... بس الأٌقعد سمح ... ويهود الشايقية برضو بجيك ليهم...

إنت قايل مافي يهود ... في... :D :p :) لكن تفاصيلهم بنزلها بعدين... بس خليك معانا على الخط...

لك ولكل الإخوة المتداخلين الود كله بلا حدود...

أبو الحســـــــــــــين...

[محمد صالح الخضر]

بمناسبة عيش الباجور .. الما نقدو زرزرو .. دي ياجماعة

زمان كنا بنمشي نفتش العيش .. عيشايي عيشايي .. نكوس في الدود عشان نشرك بو للقيردون والرقّّاي

الرقّاي ود مديني ... يأكل الدودي السميني

و

القينقرد ... يا الحاجي .. دودك ورد .. يا الحاجي

كان القيردون يأتينا في وقت معلوم من كل عام

أنثاء البحث عن الدود كنا بنلقى (البالبكي) وكنا بناكل البالبكي
هل تذكرون البالبكي؟

كنا نغني سعداء:
البالبكي .. في ساقة ولاد المكي (أي في ساقية ولاد المكي)

البالبكي ده عبارة عن فطر (Smut) ، كنا بناكلو وما كان بيسويلنا شئ .

فيا ود الحسين
ويا عكود

خلونا في حالنا

[أبو الحُسين]

أسجل حضور ومتابعه لهذا البوست البلد
وأطالب بمنحي إقامة دائمة فيه (يعدلا عليكم الله شقيش ماتقبلوا)

الغالي جداً... كِمْلِي... كما يحلو للمُسَمَّى كمال!!

أهلاً بيك وبي عموم ناس جلاس التحت والفوق... منننننننننننننننننننن أُم درق ليييييييييييييي الأركي والقدنبلية فوق...

وإقامتك في قلوبنا تَب آخوي إتفضل الحوش لو ماشالك تشيلك عيوننا...

لك من المودة والمحبة أحلاها...

أبو الحســـــــــــــين...

تخريمة هامة::
بس الإقامة الدائمة دي... لازم تاخدها من عُمْدة الحوش عكود... لزوم عندو موس الشِلِّيخ وكدي!!! لووووووول...

[mohamed hemaid]

جماعة الحوش سلامات..
ما شاء الله جلستكم عامري تشهي

وطالما ود الخدر جاب سيرة الحاجي القيردون
نديكم غنيتا كاملي باقي ماها طيرة هيني شئ
ودوديرا صعب بالحيل..

القينقرد....... يالحاجي
بحرك شرد ...يالحاجي
دودك ورد .....يالحاجي
بت الملوك ....يالحاجي
تمشي وتلوك.. يالحاجي..

ضربت تلفون قبل كم اسبوع للبلد
قالوا انفلونزا الطيور ما جات عليهم
الا خايفين تجيبا ليهم القيردون :D :D

السلا م مطبوووق ..

حميد..

[ملكة سبأ]

نحن كان عندنا ساقية اسمها ساقية الياهو ولى الليلى قاعدى

يقال ان جد اليهود الاول حضر إلى ديار الشايقية عام 1880 او 1885م ويدعى إلياهو وإستقر بمدينة مروي واشترى ساقية ببلدة حلوف تعرف اليوم بساقية إلياهو .. كان يزرع فيها الحنظل والحرجل والسنمكة ويصدرها إلى دول اوربا . وكان قبل حضوره مقيما وأسرته بالعراق .

وصل بعده إلى الشايقية إبنه شاول سنة 1920م يصحبه ابنه الخضر ، وخضر هذا ولد بالعراق ووالدته تدعى حنينة .

استقر شاول بأرض الشايقية وانجب أولاده سليمان وإلياهو وموسى .

هاجر موسى إلى امريكا وسرته الآن بها ..

هاجر سليمان إلى اليونان واستقر بأثينا ( يالهوي :rolleyes: ) وكان مديرا بالخرطوم قبل ان ينزل المعاش ويهاجر وهو الآن من رجال الأعمال باليونان ويملك مصنع لتعليب المواد الغذائية ..

اما خضر شاول اعتنق الإسلام عام 1938م وتزوج فرع الزين من بلدة الكرو وانجب منها ابنه عبد الجليل وثلاث بنات ..

إذن فعلاقة اليهود بالشايقية هي فرع الزين زوجة خضر شاول ..

توضيح :
( دي لخبطة فاطني بت مُحمد علي :rolleyes: )

[wadosman]

يقال ان جد اليهود الاول حضر إلى ديار الشايقية عام 1880 او 1885م ويدعى إلياهو وإستقر بمدينة مروي واشترى ساقية ببلدة حلوف تعرف اليوم بساقية إلياهو .. كان يزرع فيها الحنظل والحرجل والسنمكة ويصدرها إلى دول اوربا . وكان قبل حضوره مقيما وأسرته بالعراق .

وصل بعده إلى الشايقية إبنه شاول سنة 1920م يصحبه ابنه الخضر ، وخضر هذا ولد بالعراق ووالدته تدعى حنينة .

استقر شاول بأرض الشايقية وانجب أولاده سليمان وإلياهو وموسى .

هاجر موسى إلى امريكا وسرته الآن بها ..

هاجر سليمان إلى اليونان واستقر بأثينا ( يالهوي :rolleyes: ) وكان مديرا بالخرطوم قبل ان ينزل المعاش ويهاجر وهو الآن من رجال الأعمال باليونان ويملك مصنع لتعليب المواد الغذائية ..

اما خضر شاول اعتنق الإسلام عام 1938م وتزوج فرع الزين من بلدة الكرو وانجب منها ابنه عبد الجليل وثلاث بنات ..

إذن فعلاقة اليهود بالشايقية هي فرع الزين زوجة خضر شاول ..

توضيح :
( دي لخبطة فاطني بت مُحمد علي :rolleyes: )

يااا ملكة...
دا عندو لزووووم..!!!
المهم الياهو كان سفير اسرائيل فى مصر...
و بعجين بنات شاول الان موجودات بالخرطوم وانا شفتهم بعينى دى
لكن ما بنااات والسماحة ما تديك الدرب..
و ساقة الياهو هسع قاعدى و زى ما ذكرت اشتراها عما لينا..
طبعا كان هناك بعد الاقوال الغير صحيحة بخصوص اشخاص
بعينهم وتبعيتهم لاسرة الياهو..و الناس ديل انا بخليهم فى سرى
و هم الان موجودون فى العاصمة وبعضا منهم فى البلد..
و يا ملكة ربنا يديك العااافية..

[محمد صالح الخضر]

ملكة سبأ وحميد
إزيكم

انت يا حميد لا أسعيتي متذكر القنقرد كلها ؟

واحد ابن عمنا ونحن صغار كان يدودر في دباسة سميني... بعدين لما قربت من الشرك ، جاء واحد راجل كبير راكبلو حمارة ومشى جنب الدباسة ، والدباسة طارت .. قام ابن عمنا عاينلو بي غضب وقطع فيه ....... يعني قالو : أنعل ......

ويا ملكة سبأ الرائعة
كنت تتمي الكلام بتاع فاطمة كلو عشان تبرئي ساحتنا تماما.

آخر فقرة في كلامها قالت:
هولاء هم اليهود بمنطقة مروي. بعيدا عن التحريفات والمهاترات والمزايدات. والتي تنسب الشايقية الى اليهود وتبرر زعمها بهؤلاء اليهود. فاليهود علاقتهم بالشايقية هي فرع الزين التي تزوجها خضر شاوؤل.


لكن فاطمة أحمد علي دي قامت بعمل عظيم جدا جدا جدا .....................................
عمل يساوي مجهود عشرة رجال
هو البوست ده بتاع منو ... وموضوعو شنو؟

[أبو الحُسين]

ملكة سبأ وحميد
إزيكم




هو البوست ده بتاع منو ... وموضوعو شنو؟


حُمد صالِح!!.. الغَبا اليَغَبا عدوك قول آمين...!!!!

دا سؤال شنو دا؟؟؟

البوست دا إنت ماك عارف سيدو منو؟؟؟

البوست دا... ملك الجميع... حوش الشايقية المفتوح للغاشي والماشي... اليدخل يقيِّل من لفح الهجير... ويقوم يواصل سيرو.. واليدخُل ياكل ليهو تُرمة يفك بيها ريقو... واليدخل يرتاح وينبسط تَبْ يفِك زهجتو... (طنابيرنا ... وشعرانا ... وفنانِنَّنا وشاعراتنا ورملاتنا وسمرنا)... يعني حوش للجميع... ومن هنا الدعوة نرسلها حاااااااااااااااارة للغالي الجيلي يجينا داخِل يشوف هنا في شنو!!! :D

لك من المودة أحلاها وأعذبها يا ود الخِدِرْ...

وتاني لا تعقِّب سؤالك دا!!!

أبو الحســـــــــــــين...

[محمد صالح الخضر]

أبو الحسين العزيز

الجماعة عندنا لمان يمشو محل العزاء (فراش البكي) ، أول حاجة يشيلو الفاتحة بي (نهرة كدي) ..

الفاتحة ....

مع وجه يحمل علامات الحزن

بعد شويي الواحد يقعد يجيبو لو كباية شاي ويدخل في الونسة مع الجماعة، شئ سياسة وشئ كورة وشئ شواويل تمر وشئ غلاء أسعار ، يخلتو الحكايي جاو وبركاوي ... يقوم الواحد ينسى حكاية المرحوم ذاتو .
نحن دحين يا أبو الحسين سرحنا لحدي ما راح علينا الموضوع الأصلي .

الكبر والغربة يا أبو الحسين لحسن مخنا

لكن يا أبو الحسين

هو الشايقية عندهم ماضي .. يا من يكون عندهم مستقبل واعد :D

[أبو الحُسين]

أبو الحسين العزيز



لكن يا أبو الحسين

هو الشايقية عندهم ماضي .. يا من يكون عندهم مستقبل واعد :D

لوووووووووووووووووووووول...

أيْ سُودْ علينا يا حُمد صالح!!! دا كلام شنو دا!!!

بجيك راجع بعدين... وهسع هاكم دي...


بما أن الحُب زمااااااااااااان كان تِحِت تِحِت (يعني بالدس) وإذا جادت لك الدنيا وأن نظرت إلى محبوبتك في الشهر أو الإسبوع مرة واحدة فأنت محظوظ غاية الحظ.... لأن المحبوب كان لا يجد طريقاً لمشاهدة محبوبته إلى عن طريق الخفا ،، الطاقات (الشبابيك الصغيرة) الخلفية للبيت أو عن طريق شباك المطبخ الصغير على الشارع... أو عندما تِندلَّة تلك المحبوبة مع أُمها أو أخواتها إلى مناطق الزراعة لغرضٍ ما.... فهنا تكون قمة سعادة العاشق لأن نظرة فقط بدون كلام كانت تكفي على تحمل معاناة العمل الشاق في الزراعة وتكون كمثل من أتته اليوم (في زمننا الحاضر) من محبوبته شريطين كاسيت (فنَّانُنْ: محمد ميرغني!!! لووووووووووول) ومعاهن جواب كبيييييييير أو عدد من الرسائل الإس إم إس أو عدد من رسائل البريد الإليكتروني.... تخيلوا إخوتي طعم الحب دا كان كيف!!!!!
وأنظروا إلى روعة لهفة الشوق في هذه الأبيات....

جيت بالسِكَّة بي بيتكم مِتعَدِّي..
لِقيت الجاهلة بالطاقات تسَدِّي...
سَجَد لله يا ناس مُو متوضِّي....

والحاجة الجميلة هنا أن المحبوبة أيضاً متلهفة بدليل ((لقيت الجاهلة بالطاقات تسدِّي)) أي تجي وتروح في إنتظار مرور محبوبها أمام بيتهم... أي حلاوةٍ هذه!!!

ولكم من المودة والمحبة كمثل حلاوة التمودة...

أبو الحســــين.....

[عكــود]

أبو الحسين والروّاد الكِرام،

ظاهرة ما لقيتلها تفسير ..
أغلب من أبدع في فن الغناء الشايقي من غير الشايقية، عدا القليلين منهم
النعام، إدريس إبراهيم، إسحق ومحمد كرم الله، صديق أحمد، عبدالرحيم أرقي، عيسى بروي، حتى عثمان اليمني (نُص .. نُص)
بينما أغلب الشعراء شايقية، عدا القليلين منهم

عكـــود

[محمد صالح الخضر]

العزيز عكود
من عكود
ظاهرة ما لقيتلها تفسير ..
أغلب من أبدع في فن الغناء الشايقي من غير الشايقية، عدا القليلين منهم
المساحة التي يطلق عليها اسم منطقة الشايقية تمتد من أمري جنوبا الى منطقة الغدار شمالا. قبائل وسلالات بشرية كثيرة تسكن في هذه المنطقة. أعراق متعددة لكنها تحمل ثقافة واحدة، نفس العادات ، نفس التقاليد، نفس اللهجة (مع اختلافات طفيفة) ، نفس أسلوب الحياة. أصبح اسم شايقية يعني ثقافة مشتركة لمنطقة بعينها ، أكثر من أنه يشير الى تلك السلالة المنحدرة من صلب شايق بن حميدان بن صبح ابي مرخة بن مسمار بن سرار بن السلطان حسن كردم بن .... بن .....بن ....بن ..................... بن العباس بن عبد المطلب.

وطالما وحدت الثقافة الناس في هذا الاقليم فالابداع يجئ من مختلف الأعراق في المنطقة، بديري أو منصوري أو حتى أحيانا دنقلاوي. لكن تواضع الناس أن يطلقوا على هذا الابداع وهذه الثقافة (شايقية) وقد قبل الآخرون عن طيب خاطر هذه التسمية. وأنا أحبذ هذا المفهوم الثقافي وليس العرقي لكلمة شايقية.
هنالك مثلا سلالات جاءت من قبائل الهوسا في غرب أفريقيا، واستقرت في هذا الاقيم، وأنجبت ونشأ الابناء وترعرعوا في المنطقة واكتسبوا ثقافة الاقليم. يتكلمون لهجة الشايقية ، وبناتهن يرقصن (الشايقي) أفضل من الشايقيات المنحدرات من شايق بن حميدان. بعض الجنوبيين الذين نشأوا في هذا الاقليم (يدقون) الطنبور ويغنون الشايقي أحسن من بعض الشايقية.

بعض أبناء الشايقية (المنحدرين من شايق) ولدوا في كندا وأمريكا ونشأوا هنالك. لا يعرفون محمد جبارة ولا صديق أحمد. شايقية عرقا ولكن ثقافتهم غير شايقية ولا يعرفون شيئا عن تراث أجدادهم. تلك القادمة من قبائل الهوسا والتي ترقص الشايقي (شايقية) أكثر من هذه الشايقية المولودة في أمريكا.

أنها مسألة ثقافة (تجمع) الناس ، أكثر من أنها مسألة (عرق) يفرق الناس ويشتتهم.

[عبد العظيم الطاهر]

أبو الحسين والروّاد الكِرام،

ظاهرة ما لقيتلها تفسير ..
أغلب من أبدع في فن الغناء الشايقي من غير الشايقية، عدا القليلين منهم
النعام، إدريس إبراهيم، إسحق ومحمد كرم الله، صديق أحمد، عبدالرحيم أرقي، عيسى بروي، حتى عثمان اليمني (نُص .. نُص)
بينما أغلب الشعراء شايقية، عدا القليلين منهم

عكـــود




عكود ...


حاج الماحي في مدحة من مدحاتو قال :-


شايق والبدير وجبرتي
في الجاه من جِرا ولا لتي

تعرف البيت ده ساقني وخلاني افتش هني وافتش هني
لقيت انو البديرية شايقية وإنتسبوا بس لى بدير الجد القريب وخلوا البعيد لكنهم في الاصل شايقية
ولقيت لك أربعة من أولاد شايق , المؤرخين اختلفوا في أسماءهم , واحد منهم سكن حلفاية الملوك
وإتفرعوا بعد داك لامن وصلوا البسابير ( شندي ) وصلوا ( ود البصل ) و ( قيلي ) ووصلوا غرب كردفان
وديل فرع من الحامداب اللت نوري جدهك إسمو حامد أحد أبناء ( كادنقا ) وكادنقا ده طبعا الابن الاكبر لى شايق وواحدين في بحر أبيض وواحدين في صحراء ( بيوضة ) وخلني اللرجع لى دفاتري أجيبن ليك بالتفصيل


ود الطاهر

[محمد صالح الخضر]

الأستاذ عبد العظيم الطاهر
لك التحية ،

أحد أعظم رجال البديرية على الاطلاق وهو الشيخ العجيمي نسب نفسه الى الشايقية. ففي نهاية نسبه قال : البديري الدهمشي الشايقي. ومن شدة التداخل أصبح هنالك خلط في مسألة بديري وشايقي هذه .
من عبد العظيم الطاهر
لقيت انو البديرية شايقية وإنتسبوا بس لى بدير الجد القريب وخلوا البعيد لكنهم في الاصل شايقية
تختلف الأقوال في مسألة القبائل والأعراق هذه.
ففي مصدر آخر نجد أن البديرية ليسوا شايقية. فهم لا ينحدرون من صلب شايق بن حميدان. هم أبناء بدر أو بدير بن سمرة الجعلي. وهم ثلاثة أقسام :
دهمشية ، ودويحية وشويحات. ولبدير سبعة أولاد هم : حليب، ودهمش، ومحمد، وموسى، وهلال ، و أغبش وحمد الله ، بالاضافة الى بنتين هما : نعيمة و ملكة (ليست ملكة سبأ :D ) ، وكان للبديرية خمس ممالك ، أربع بدنقلا والخامسة بكردفان.
والبديرية حضروا الى السودان عن طريق مصر وانقسموا الى قسمين بعضهم اتجه لشمال السودان والجزيرة عن طريق النيل واتجه البعض لكردفان عن طريق الأربعين حتى بلغوا جبل الكاب بشمال كردفان.
لكن يا أستاذ عبد العظيم ألا توافقني على المفهوم الذي ذكرته أعلاه. أننا يجب أن ننظر الى المسألة من ناحية الثقافة التي توحدنا نحن والبديرية وكل الذين عاشوا في المنطقة، ونغض الطرف عن مسألة العرق هذه.
السر عثمان الطيب (يشعر) وصديق أحمد (يغني)
يا الناسينا حبك في ربيع دنيانا شال نور .. يا الناسينا
يطرب القوم ويصفقوا ويبشروا وترقص البنات (ويدنهم) الشبابيل، وكلو شايقي في شايقي دون اشارة الى عرق.

[عبد العظيم الطاهر]

الأستاذ عبد العظيم الطاهر
لك التحية ،
لكن يا أستاذ عبد العظيم ألا توافقني على المفهوم الذي ذكرته أعلاه. أننا يجب أن ننظر الى المسألة من ناحية الثقافة التي توحدنا نحن والبديرية وكل الذين عاشوا في المنطقة، ونغض الطرف عن مسألة العرق هذه.
السر عثمان الطيب (يشعر) وصديق أحمد (يغني)
يا الناسينا حبك في ربيع دنيانا شال نور .. يا الناسينا
يطرب القوم ويصفقوا ويبشروا وترقص البنات (ويدنهم) الشبابيل، وكلو شايقي في شايقي دون اشارة الى عرق.

نعم ... اوافقك تماماً ........

فنحن بعض من كلٍ ..... وحبنا لهذا البعض , كما يحب الفرد منا أسرته , لن يخرجنا ويبعدنا من الكل
فكلنا لآدم .......


شكرا لك

[عكــود]

أنها مسألة ثقافة (تجمع) الناس ، أكثر من أنها مسألة (عرق) يفرق الناس ويشتتهم.
الأعزاء
محمد صالح
عبد العظيم الطاهر

نعم، هي مسألة ثقافة وليست مسألة عرق، ولا أنكر عليهم ذلك، فقد تشرّبوا الثقافة وبرعوا في فن الغناء الموصوم "بالشايقي" كنوع وليس حِكْر.
أنوســـة من قبيلة الزاندي، عاش بالقرير وبرع في صناعة الطنابير ولا يبزّه أحد في العزف عليها.
عن الفنانين، لاحظت أن أغلب فنانينا هم من غير الشايقية، كعرق، ومواطنهم تحد مناطق الشايقية شمالاً وجنوباً.
هل السبب، يا تُرى، أن "قصبة التقنت" دائماً هي الأندى؟


عكـــود

[محمد صالح الخضر]

العزيز عكود

كلامك صاح، زي ما قلت أغلبهم من زمن ادريس ابراهيم والنعام آدم واسحق كرم الله (عرقا) ما شايقية.
والآن جعفر السقيد أشهر فناني الشايقية . لكن (عرقا) ما هو شايقي. من المنظور الثقافي للكلمة هو شايقي (شديد)، أكثر مني أنا الذي أنتمي (عرقا) الى شايق بن حميدان.

قصبة التقنت دي من شدة نداها مرات يدلعوها في الغنا يقولوا (قصيبة) التقنت
ناس أم هبج (البطانة) عندهم قصبة مدالق السيل.

تحياتي لك

[أبو الحُسين]

الغالين الحلوين...

رواد الحوش... لكم تحية بقدر شوقنا للقعدة والجلسة معاكم...

بس اليوميني الفاتتي دي لمَّ فيي فيروس الله لا وراهو لا عدو ولا صليح... جهجه منامي وقلل نومي...

كدي هسع اللَّروق شويي... وأجيكم بي تُقْلي، لأن الموضوع المفتوح مهم جداً...

ولكم من المودة والمحبة أحلاها وأعذبها...

أبو الحســـــــــــين....

[wadosman]

يا ود الحسين...
دا كلااااام تخلو البوست دا يطفش لاخر الدنيا....
انتو دايرين القوات الدولية تتدخل ولا شنو؟؟؟
اها هسع انا من قبيل اتلفت افتش فى الحوش دا ما لاقيهو...
الليلى انا جيتكم بى حقى شايلو معاى.. و معااى ضيفان كمااان
و براكم حتعرفوا الضيفان المعاى ديل منو يلا اسمعوهم:
http://www.uparab.com/files/tLDgOjUw2X0Ssm4f.wma

[أبو الحُسين]

الغالي جداً ود عثمان...

صبحك الله بالخير والرضا... المشكلة العندي هي ما عندي برنامج يقرأ ملفات الفيديو... سبحان الذي أتى بي من البدو!!! :D

أها كدي ورنا ضيوفك منو... ويا مرااااااااااااااحب بيك وبيهم في حوشكم وداركم...

لك من المودة أحلاها وأعذبها... وعندي ملف بعد فيهو من زمن زكرياتي مع الراحل المقيم محجوب كرار الله يغفر له ويرحمه... حا أبدأ أنزلو عن تطور الأُغنية الشايقية (البديرية لووووووووووووول)... وشعراء الأغنية وكدي!!

طولت ما شفت لي عمةً كبيييييييييري حايمي في الحوش دا... يااااااااااااربي لعَلُو شال سوق التلاتاء ولة سوق قَنِّبْ؟؟؟ :D :confused: ;)

أبو الحســــــــــين....

[قمر الزمان]

أستاذي أبو الحسين
تحياتي لك و لكل الشوايقية الفي حوشك
بوست ما محتاج ليهو اطراء لأنو ماشاء الله عمران بناسو
و ما حقدر أداخل معاكم عشان كلامكم كبار كبار .. ما بقدر عليهو :o

بس عندي سؤال لو سمحت لي أستاذي :
أموووووت و أعرف سر العداوة بين الجعل و الشوايقة دي لييه !! :confused:
وليه مافي نكتة جعلية بتخلو من شايقي في الموضوع !! :confused:
وليه بقولو الجعل و الشوايقة ..الشحمة والنار !! ( مش بقولو كدة برضو )

تحياتي لكل المتواجدين معاك..
ولك يا سيد الحوش..

[أبو الحُسين]

أستاذي أبو الحسين
بس عندي سؤال لو سمحت لي أستاذي :
أموووووت و أعرف سر العداوة بين الجعل و الشوايقة دي لييه !! :confused:


الغالية جداً قمر الزمان...

أولاً نشكرك على طلتك البهية... ونورتي بي (تِيويقْتِك أكيام) الحوش... للشرح والترجمة أرجو الإستعانة بأحد رواد الحوش..!! :rolleyes: :)

وثانياً بالنسبة لسؤالك يا ستي عن ما بين الشايقية والجعليين... أقول ليك وأنا أبو الحســــين... يا أختي مافي أي حزازات بين الجماعة ديل... وهل تعرفي هم أبناء عمومة والإثنين ينحدرون من المجموعة الجعلية وجدهم واااااااااااحد من لا ورا... وهم الإتنين عباسية جدهم العباس بن عبد المطلب رضي الله عنه... تاني اليجي ناطي الجيلي يقول ليكود :) :D :o ;) (لكود (لِغُود) عدوك يتهردِن يا الجيلي قول آمين)!!! للترجمة هنا يمكنكم هنا الرجوع لشيخ الحوش عكود بس!!!

أها الناس ديل حلويييييييييييين مع بعض بس بعض الناس بيعملو حركات سااااااااااكت...
وأهديك وللأخ فزع الجعلي (ليهو وحشة طويلة وعليكم الله العارف عنو حاجة يورينا) هذه النكتة من شريط ناس تيراب 2006 المسمى الإتجاه المعاكس...


قالو.. الجعلي ليهو ضُل.. عمل ليهو مخبز ويوم الإفتتاح عمل العيش وقعد منتظر الزبائن... مافيهو أي زول هببو ليهو... يعني عيشو بااااااااااااااير جاهو شايقي قال ليهو أديني عشرة عيشات... قال الجعلي زعلان طبعاً... قال للشايقي أمشي ورا هناك ما شايف الصف دا؟؟؟

الشايقي إتلفت ماشايف صف.. لكن دبر حيلة ورجع ورا عامل نفسوا واقف في الصف... وبقى يتكلم براهو... آناس كدي إتوزنو كدي أعدلو الصف دا؟؟؟ إنتو آناس إلِّي يجيبولكم البوليس؟؟؟ إيه دا شنو الكِباس دا؟؟؟ كدي روقو شويي!!!!

أها يتكلم كدي لااااااااااااامِن وصل الشُباك... وقال للجعلي عليك الله أديني عشرة عيشات...

الجعلي دَنقَر عشان يديهو العيشات الشايقي إتحمى قوووووووووي وأداهو بُنْية في فَقَهْتو لامِن دردقو!!! الجعلي رفع راسو دا مو الضَرَبني دا؟؟؟

الشايقي بي تهكم رد عليهو... دايرني أعرفو ليك في الزحمة دي!!!؟؟؟ (ودا الراي القلت ليكم من الأول رجع في آخر الصف ليهو)!!!!!

ولكي أختي الكريمة وللإخوة المتداخلين الود كله بلا حدود... وأبقي لا تقطعي طلتك...

أبو الحســــــين...

[قمر الزمان]

الغالية جداً قمر الزمان...

أولاً نشكرك على طلتك البهية... ونورتي بي (تِيويقْتِك أكيام) الحوش... للشرح والترجمة أرجو الإستعانة بأحد رواد الحوش..!! :rolleyes: :)

وثانياً بالنسبة لسؤالك يا ستي عن ما بين الشايقية والجعليين... أقول ليك وأنا أبو الحســــين... يا أختي مافي أي حزازات بين الجماعة ديل... وهل تعرفي هم أبناء عمومة والإثنين ينحدرون من المجموعة الجعلية وجدهم واااااااااااحد من لا ورا... وهم الإتنين عباسية جدهم العباس بن عبد المطلب رضي الله عنه... تاني اليجي ناطي الجيلي يقول ليكود :) :D :o ;) (لكود (لِغُود) عدوك يتهردِن يا الجيلي قول آمين)!!! للترجمة هنا يمكنكم هنا الرجوع لشيخ الحوش عكود بس!!!

أها الناس ديل حلويييييييييييين مع بعض بس بعض الناس بيعملو حركات سااااااااااكت...
وأهديك وللأخ فزع الجعلي (ليهو وحشة طويلة وعليكم الله العارف عنو حاجة يورينا) هذه النكتة من شريط ناس تيراب 2006 المسمى الإتجاه المعاكس...


قالو.. الجعلي ليهو ضُل.. عمل ليهو مخبز ويوم الإفتتاح عمل العيش وقعد منتظر الزبائن... مافيهو أي زول هببو ليهو... يعني عيشو بااااااااااااااير جاهو شايقي قال ليهو أديني عشرة عيشات... قال الجعلي زعلان طبعاً... قال للشايقي أمشي ورا هناك ما شايف الصف دا؟؟؟

الشايقي إتلفت ماشايف صف.. لكن دبر حيلة ورجع ورا عامل نفسوا واقف في الصف... وبقى يتكلم براهو... آناس كدي إتوزنو كدي أعدلو الصف دا؟؟؟ إنتو آناس إلِّي يجيبولكم البوليس؟؟؟ إيه دا شنو الكِباس دا؟؟؟ كدي روقو شويي!!!!

أها يتكلم كدي لااااااااااااامِن وصل الشُباك... وقال للجعلي عليك الله أديني عشرة عيشات...

الجعلي دَنقَر عشان يديهو العيشات الشايقي إتحمى قوووووووووي وأداهو بُنْية في فَقَهْتو لامِن دردقو!!! الجعلي رفع راسو دا مو الضَرَبني دا؟؟؟

الشايقي بي تهكم رد عليهو... دايرني أعرفو ليك في الزحمة دي!!!؟؟؟ (ودا الراي القلت ليكم من الأول رجع في آخر الصف ليهو)!!!!!

ولكي أختي الكريمة وللإخوة المتداخلين الود كله بلا حدود... وأبقي لا تقطعي طلتك...

أبو الحســــــين...

جزيل الشكر لك أستاذي على اجابتك
و حأحاول افهم المعلومة دي عشان السؤال دة دايما بنطرح..

وفعلا النااااس ديل حلوين مع بعض بدليل أعز أصحاب بابا شوايقة
و عشرة عمر مع بعض... و ربنا يديم المودة ان شاء الله ..

وبعدين النكتة دي ... اتعادت مرتين في البوست دة ..وما حلوة :cool:
لو عندكم نكتة جديدة عننا جيبوها :mad:

كل الـــــــود
قمـــــــــــــر

[dayami]

استحلفك بالريد رائعة من روائع السر عثمان الطيب


استحلفك بالريد أوعك تفارقنى
لاتسبينى فى الاحزان أبحر تغرقنى
ياروحى مشغول بال محتار أنا ومحتار
مابهون فراقك يوم ألم الفراق تاوار
يا المستحيل بعدك يا الحار فراقك حار
قلبى الحنين أصبح موطن هواكا ودار
دنيايا غير عينيك ليل مسدل الاستار
فيهو القى روحى بلاك مسجونة دون أسوار
انت المعاى أنغام داؤود بلا مزمار
تسكر حنايا الروح من كأس ندى الازهار
أستحلفك بالفيك والفى موقد نار
بى صرخة فى الاعماق دار تفضح الاسرار
بى دم دموع عينى بى دمعك المدرار
يرويك ويروينى ويخنق غنا الأوتار
بالالفة حلفتك بالخوة حق الجار
أوعك تسيبنى تفوت ترمينى للأقدار
خايف عليك وعلى من جور زمن غدار
خايف من الايام ودولابن الدوار
لالا لا ترحل كوس للقعاد أعذار
دابن خطاى وخطاك فى الريد بدوا المشوار

[أبو الحُسين]

إخوتي الكرام... رواد الحوش صبحكم الله بالخير والرضا...

الغالين قمرنا ... وديامي... أشكركم (أشكركم شنو)... إنتو من أهل الحوش وساداته... يعني مافي شكر ليكم... ديامي اخوي عليك الله لا تقطع زي دي زي دي... وياريت لو تكون عندك الأُغنية دي بصوت الرائع محمد جبارة...

الأخت قمرنا... النكتة الكانت دي... أنا نزلتها ليك لزوم الترحيب وإتذكرت قبل كدة كتبناها نسأل عن الأخ الغالي جداً من الرواد القداااااااااااام للحوش الجعلي المتشويق اللي ضُل فزع... نسأل الله يكون غيابه في خير... والحمد لله التأكدتي من صفاء الشايقية والجعليين لي بعض ودي بس حاجات بيقولوها الناس كنكات ساكت... ;)


وأهديكم جميعاً والإخوة رواد الحوش هذا النموذج للتفاني وقتل الذات في الحب... فهذا فارق أهله ليكون بالقرب من محبوبته ليراها كل ما حانت له فرصة اللُّقياء!!!!
فأنظرو كيف خاطر هذا العاشق بأهله عشان محبوبته....
يقول،،،،

يوم الجمعة جيت طالِب فريقا...
شفت اللَّمَّة دي وداير فرتيقا...

(شوفو غيرتو كمان!!!؟؟؟)

كُُت دايرلَيْ عِويشاً أزيلْبُو الرِّيقة...
جَحَدْتَ علي الكلام أنا بالحقيقة...
آه أنا الفارقت أهلي فِحال طريقا...

عليكم الله زي دا لاقاكم؟؟؟!!! ;) :p

إخوتي الكرام عليكم الله الراجل دا يكون بالجد فهمو شنو داير يفرتك اللمة الفي بيت البت دي؟؟؟!!! وهل إحتمال اللمة دي تكون عِرِس محبوبته؟؟؟ أم تكون زواج في الحلة عادي وهي موجودة فيهو وأخَدَتُو الغيرة ما داير واحد يشوفها؟؟؟؟ لوووووووووووووول!!! يا الله تسترنا من الزي دا!!! :rolleyes: :cool:

لكم ودي كله بلا حدود...

أبو الحسين...

[أبو الحُسين]

دابن خطاى وخطاك فى الريد بدوا المشوار


الغالي ديامي...

دي خاتمة حلوة إتوفق فيها أُستاذنا السر غاية التوفيق،،، والله أنا البيت دا دق في وتري الحسَّاس.. لا تقولو لزوم البكاء وكدي ;) :D...

ونحن من هنا من سودانيات موطن الحب والجمال... ومن حوش الشايقية،، بيت الإلفة والمحبة... نسأل الله أن يجمع كل حبيبين خطا في درب الحُب خطوتهما الأولى... ويوفق الجميع لما يجمع الشمل يااااااااااارب... قولو آمين...

لك من المودة والمحبة عزيزي ديامي أحلاها.. وللغالي السر ودي كله بلا حدود...

أبو الحســــــين...

[أبو الحُسين]

وبعدين النكتة دي ... اتعادت مرتين في البوست دة ..وما حلوة :cool:
لو عندكم نكتة جديدة عننا جيبوها :mad:

كل الـــــــود
قمـــــــــــــر

الغالية جداً قمر الزمان...

إنتي يا أختي حالفي ما تفوتيلي حاجة... الإعراب خليناهو كمان النكتة القُلت أقشُر بيها دي مرتين ولة تلاتة ماكي دايري تخليني إتفوجج بيها؟؟؟!!! :cool:

أسوي شنو يا ناس أنا؟؟؟!!! ;) :D :rolleyes:

لك من المودة والمحبة أحلاها وأعذبها...

وأها رفعت حوش الشايقية عشان شايفو نزل لا تحت ومن هني ولي قدام بإذن الله تاني مافي نزول ليهو والدعوة لجميع الأحبة الحوش فاااااااااااتح حلالي...

أبو الحســـــــــــين...

[منعم ابراهيم]

العزيز ابو الحسين


هذا البوست الجميل ...ادخل اليه سرا في كل يوم تقريبا...

ولديا من الاسباب التي جعلتني لا أشارك ..في هذا البوست رغم جماله معرفيا ...


هنالك بعض الشوايقة يستغلون هذا الانتماء ...للتفرد الاثني ...والتعالي الاجوف ..
أعتقد أن لا ثقافة تعلو علي أخري ...أو تحاول ان تثبت انها الافضل ...
كل قبيلة لها الحق في استعراض تراثها ...وايصال قيمها الي الآخر
للتمازج والاندماج....كنت في ما مضي قد تصديت لاحد الشوايقة
بكلام ساخر ...وقد هبشت سخريتي الأخت المحترمة ( ملكة سبأ)

أنتهز هذه الفرصة للاعتذار لها دون ادني مبرر لذلك ...وأعتقد انها
فهمت الظرف والسياق الذي وردت فيه عباراتي تلك . ولا اعفي ذلك الشخص من
رؤيته المتحيزة .


ملمح:



قبيلة الشايقية تفردت في ايقاع الدليب"وهو علي مااعتقد
معكوس لايقاع "السامبا"أرجو ان يصححني مختص كعزيز خطاب او الموصلي
لو أخطأت التقدير أو من يدرك فن الايقاعات ...

لفت انتباهي موسيقار روسي عالمي يدعي( ياني)

لتوظيفه وبكثافة ايقاع يماثل الدليب ...وعرفت انه مهتم بالايقاعات الافريقية

وفي محاضرة اقامها منتدي شموس الثقافي بالقاهرة عام 2002 قدم فيها
الاستاذ والموسيقار عاصم الطيب قرشي ورقة فلسفية وعلمية عن الموسيقي السودانية
ربطها بانساق رباعية متناقمة مع تحليلاته لمركبات ذات ابعاد وظيفية مستحدثة
لحركة الايقاع وانعكاسه في البيئة ..كجغرافيا صورية تتطابق فيها تضاريس المنطقة
مع حركة الايقاع .

ملمح ثاني

سوف اعود لتوضيحه لاحقا

[منعم ابراهيم]

ملمح ثاني:


لماذا" الدليب " معكوس السامبا ...؟



اذا نظرنا للايقاعات من ناحية السرعة والصخب ...نجد انها مرتبطة بمساحات الشوف + طبوغرافيا المنطقة التي يتولد فيها الايقاع .....الايقاعات السريعة دايما مرتبطة بالبيئة ذات الغابات الكثيفة ...كما هو الحال في لهاث الطبل الافريقي ...بالنسبة للايقاعات السودانية من اقصي الجنوب وحتي اقصي الشمال نلاحظ الآتي :


يبدا الايقاع سريعا متلاحقا .. يبطئ درجة كلما اتجهنا شمالا...في منطقة الشايقية تحديدا ...ينعكس الايقاع مع انحناءة النيل في منطقة شمال ابي حمد..منطقة المناصير ...ويصبح مقلوباوسريعا مع اتجاه النيل في هذه المنطقة جنوبا الي منطقة كورتي ,أوسلي ,حيث يتجه النيل شمالا مواصلا رحلته تجاه منطقة المحس ...لذلك نجد ايقاع الدليب في منطقة المناصير والحمداب اسرع من مناطق القرير ,ارقي ...ليبدأ تغيراته من جديد في منطقة السكوت والحلفا ....


ملمح ثالث

لاحقا

[أبو الحُسين]

الغالي جداً منعم إبراهيم…
صبحك الله بالخير والرضا...

شكراً ليك أخي الكريم وشرفت الحوش وبقيت سيييييييييدو تَب… أماموضوع إعتذارك للأخت الكريمة ملكة سبأ... فيا أخي الكريم نحن مجتمع سودانيات بنفوسنا الطيبة دي... أصلاً ما بيناتنا شئ... نسأل الله يدوم المحبة والخوة بيننا ياااااااااااااارب...

كلامك عن الإيقاع في منطقة الشايقية الأخير دا.. حقيقي ومية المية…

وأنا عاوز أضيف لي كلامك القلتو عن حركة السرعة والبطء في إيقاع الدليب..

فأنا أخي الكريم بحكم معاصرتي لهذه الحركات الإيقاعية زي ما إنت قلت كلما إتجهنا شمالاً كان الإيقاع تقيل شوية… والشاهد علي ذلك إذا قارنا بين إيقاع عيسى بروي (الله يطراهو بالخير ويديهو الصحة والعافي) زمان ـ وهسع مسك الراية وراهو عوض الجرِف ـ تلقاهو سريييييييييع لي درجة الفلَلَلي وكان محبوب جداً للشباب من النساء… وإتذكر كان لمن يجي في مناطقنا (المقل ـ الحجير الأراك وكدي)… الحريمات الكُبار زمن الرقيص الصح صِح تلقاهِن يزمجرن هسع دا يرقصوهو كيفِن؟؟؟ تقول بابوراً فاكْ الموية؟؟؟!!! أي تُبْ…!!! أها مقارنة الإيقاع السريع دا مع عثمان اليمني (الله يطراهو بالخير ويطول في عمرو) في مناطق حزيمة والقرير (أي مناطق الوسط)… تلقاهو شوية بين بين يعني ماهو تقيل شديييييييييد وماهو خفيف كمان (يعني يرقص الشباب والحاجات كمان!!!)… أها تمشي شويي كدي لا قدام (علي مناطق بَحْري زي ماب يقولوا أهلنا هناك)… تلقى النعام آدم (الله يغفر له ويرحمه) شوية أتقل يرقص الحريم الكبار وإتذكر مرة جابوهو أول مرة أشوفو أنا في عرس نجم الدين أحمد عبد الرازق وكان مهرجان طنبور كل الإيقاعات القلتها دي إمتزجت فيهو.. (بدءاً من النعام آدم ـ عثمان اليمني ـ عيسى بروي ـ محمد جبارة ـ صديق أحمد وعيييييييييك) أها لمن النعام آدم دا غنى… كان نسبة مشاركة البنات الشابات في الرقيص أقل منها في ود اليمني أقل منها في صديق وكانت قمتها في عيسى بروي صاحب الإيقاع السريع في ذلك الزمان (زمن أُغنية: جاتنا صيدة .. حكمة الله … وجات تصيدنا وماب نصيدة … حكمة الله)..…

لكن إخوتي الكرام الكلام دا هسع كلووووووووووو إتقلب…
وبجيكم صاد أوريكم قلبتو لي قدام…

لكم مودتي كلها قواسيب قواسيب…

أبو الحســـــــــــين...

[منعم ابراهيم]

الغالي جداً منعم إبراهيم…
صبحك الله بالخير والرضا...

شكراً ليك أخي الكريم وشرفت الحوش وبقيت سيييييييييدو تَب… أماموضوع إعتذارك للأخت الكريمة ملكة سبأ... فيا أخي الكريم نحن مجتمع سودانيات بنفوسنا الطيبة دي... أصلاً ما بيناتنا شئ... نسأل الله يدوم المحبة والخوة بيننا ياااااااااااااارب...

كلامك عن الإيقاع في منطقة الشايقية الأخير دا.. حقيقي ومية المية…

وأنا عاوز أضيف لي كلامك القلتو عن حركة السرعة والبطء في إيقاع الدليب..

فأنا أخي الكريم بحكم معاصرتي لهذه الحركات الإيقاعية زي ما إنت قلت كلما إتجهنا شمالاً كان الإيقاع تقيل شوية… والشاهد علي ذلك إذا قارنا بين إيقاع عيسى بروي (الله يطراهو بالخير ويديهو الصحة والعافي) زمان ـ وهسع مسك الراية وراهو عوض الجرِف ـ تلقاهو سريييييييييع لي درجة الفلَلَلي وكان محبوب جداً للشباب من النساء… وإتذكر كان لمن يجي في مناطقنا (المقل ـ الحجير الأراك وكدي)… الحريمات الكُبار زمن الرقيص الصح صِح تلقاهِن يزمجرن هسع دا يرقصوهو كيفِن؟؟؟ تقول بابوراً فاكْ الموية؟؟؟!!! أي تُبْ…!!! أها مقارنة الإيقاع السريع دا مع عثمان اليمني (الله يطراهو بالخير ويطول في عمرو) في مناطق حزيمة والقرير (أي مناطق الوسط)… تلقاهو شوية بين بين يعني ماهو تقيل شديييييييييد وماهو خفيف كمان (يعني يرقص الشباب والحاجات كمان!!!)… أها تمشي شويي كدي لا قدام (علي مناطق بَحْري زي ماب يقولوا أهلنا هناك)… تلقى النعام آدم (الله يغفر له ويرحمه) شوية أتقل يرقص الحريم الكبار وإتذكر مرة جابوهو أول مرة أشوفو أنا في عرس نجم الدين أحمد عبد الرازق وكان مهرجان طنبور كل الإيقاعات القلتها دي إمتزجت فيهو.. (بدءاً من النعام آدم ـ عثمان اليمني ـ عيسى بروي ـ محمد جبارة ـ صديق أحمد وعيييييييييك) أها لمن النعام آدم دا غنى… كان نسبة مشاركة البنات الشابات في الرقيص أقل منها في ود اليمني أقل منها في صديق وكانت قمتها في عيسى بروي صاحب الإيقاع السريع في ذلك الزمان (زمن أُغنية: جاتنا صيدة .. حكمة الله … وجات تصيدنا وماب نصيدة … حكمة الله)..…

لكن إخوتي الكرام الكلام دا هسع كلووووووووووو إتقلب…
وبجيكم صاد أوريكم قلبتو لي قدام…

لكم مودتي كلها قواسيب قواسيب…

أبو الحســـــــــــين...





:D :D :D :D


وإتذكر كان لمن يجي في مناطقنا (المقل ـ الحجير الأراك وكدي)… الحريمات الكُبار زمن الرقيص الصح صِح تلقاهِن يزمجرن هسع دا يرقصوهو كيفِن؟؟؟



والله قطع مصاريني بالضحك ....الله يجازي محنك ياابو الحسين....

جاييك بي رواقة...

[أبو الحُسين]

إخوتي الكرام مساكم الله بالخير والرضا...

أُقدم إليكم اليوم نموذج آخر للبذل والعطاء إلى آخر رمق من أجل المحبوبة... وهي قصيدة لا تخلو من الفكاهة والنكتة في مناطق كثيرة من جوانبها... فهذا العاشق الولهان يُريد أن يضحي أن يكون خادماً لمحبوبته إلى أن يتم له مراده ويتزوجها...

أُنظروا ماذا يقول....

وين فرحة قلبي، وتمامة كيفي، التقول يا ضيفي،، دي البَعَجِب صُباها...

بالذوق والجمال الله خصَّاها

الأدب والهيبة من الأُم حارساها

عِن جيرانها بَسمع بي نباها

إن لِقت وإن عِدمت إبليس ما غشَّاها

وماب تشارع صاحبها النفس إن هداها

يا فهيم صدقني إنو اللوم حاشاها

خِطابك أقْفِلوا لا يِتْعَدْ سفاها

أنا عاوز أمشيلها آخد اْسبوع معاها!!!! (لزوم الخدمة)

وابيِّض نيتي والمقسومة أرجاها...

واشتغِل مجان كفاءاً لي رُضاها

واكِنس الأُوضة والأزيار أملاها

واْفُرشَ المرتبة وانْفُض غتاها

وألقِّط صيغتها إن كانت راماها

وابقى محادثة إن جات بت عاوزاها!!!!
(يا له من سكرتير جيد!!!)

واقيف بالموية عِن ساعة غداها

وتخسِّم فيي لامن بطني املاها

إن نوت للفُسحة للجيران أبراها

ماب اْرفع راسي اعاين لي قفاها!!!! (عليكم الله شوفو كمان الأدب دا)

وخطِوْتي تكون سوى مترين وراها

وما بَعَلِّي الصوت إن اتْكَلَّم معاها

يا البنات المترشِّحات ودايرات نباها

كلُّ بهيمة ترجع لي مرعاها

الرايقي كُلما تِتْفتِح خانات تملاها

وأنا يومي أقدِّم طلبي كان الله هداها!!!! شوفو عدم اليأس كمان....

غير زواج بالسنة ما أمسك يداها.....

الللللله العفة كمان تجلت في نهاية القصيدة أسأل الله أن تعود تلك العادات السمحة الإخلاص ،، الوفاء ،، العِفَّة ..........

وإلى أن ألقاكم لكم محبتي وودي...

رجائي أن تتناولوا البيت (( وماب تشارع صاحبها النفس إن هداها)) بالشرح والتحليل ولكم ودي....

أبو الحسين.....

[أبو الحُسين]

إخوتي الكرام،،،

مساكم الله بالخير والرضا...

عودة إلى موضوع العشق الجنون عند الشايقية...
حكى لي الأُستاذ/ الشاعر (الثوري) محمد محمد الشايقي (المعروف بكريمة)...

قال لي عندما كان ببورتسودان عضواً في نادي الخريجين وفي أحد الجلسات الأدبية طُرحت مسابقة مالية عن أكثر (بيت شعر قيل في الحب الصاااااااااادق)... فقال لي،،، معظم الإخوان تكلموا بأبيات عنتر وعبلة وقيس وليلى وجميل بثينة... وما شاكلهم من الشعراء الفطاحلة في الشعر العربي والغزل... فقال لي أنه بعد هؤلاء العمالقة طلع المسرح وقال للجنة التحكيم والجمهور أُريد أن أحكي لكم قصة ومعها مقطع قصيدة....

القصة... زماااااان كان في واحد يحب ليهو واحدة لكن طبعاً زي ما تكلمنا في مواضيع سابقة الحب كان بالدس فإتفق هو معاها يسافر يغترب في بلاد بحري (الدناقلة والمحس) ويلم القروش ويجي راجع ويدخلوا قفصهم الذهبي السعيد كأحلام كل الشباب... وفعلاً حمل هذا الإتفاق الذي جعله يشتغل ليل نهار وحماس منقطع النظير.... (بدل التَبَّانة الظاهر عليهو يشيل تبانتين)!!!!:) :rolleyes: :D لاحدي ما جمع القروش وجاء راجع،،،، في الفترة دي البت تقدم ليها ود عمها وخطبها وتزوجها وحتى لو ما أكذب عليكم كانت حامل!!!!:p ;) وطبعاً ما ممكن تقول أنا مرتبطة كان حا يقطعو لسانها.. لأن الزمن داك ما كان في حاجة إسمها الإرتباط... إلا الإرتباط بالهوية والبلد...

فعندما رجع المسكين وجدها قد تزوجت بإبن عمها ولم يُظهر أي معارضة خارجية كتم حبه بين ضلوعه ليش لم يزعل،،، لأنه يعرف تماماً إنها لم تدِّيهو شاكوش إنما التقاليد هي التي فعلت به هذه الإفاعيل... فاستغفر ربنا وصبر...:mad:

ففي يوم من الأيام صادفها وهي تشتري من الدكان القريب لبيتهم فقالت له السلام عليكم،،، فرد عليها السلام... (والسلام سنة الإسلام)... فذهبت هي خجلانة لصديقتها وقالت لها قابلت اليوم حبيبي فلان وقلت له السلام عليكم لو كان عارفني (حامل) ما كان قال لي عليكم السلام!!!!
فصديقتها أخذت الكلام حااااااااااااااااااار وأخبرته به... فهنا قال هذه الأبيات...
قال لها....


تريديني وبرِيدِك ومن زماااااااااااان كُتْ فيكي عشمان...

إن وِلِدْتي إنشاء الله تيمان...

إن بِقى لا رابِع بُطان...

إن لِقيتك ماني ندْمان....:p ;) :confused:


فهنا قررت اللجنة إعطائه الجائزة.... أسأل الله أن يعطي شاعرنا الفذ السياسي البارع محمد محمد الشايقي العافية وأن يجمعنا به في داره العامر بأُمبدة في أسعد اللحظات...
عليكم الله يستاهلها ولَّة ما يستاهلة؟؟؟

لكم وللغالي محمد ود حُمد إحمد الشايقي مودتي ومحبتي قواسيب قواسيب...

أبو الحسين....

[أبو الحُسين]

الإخوة الكرام...

فوووووووووووووووووووق لزوم الزهرات الجديدة الشايفها متفتحة اليومين دي في سودانيات...

ولكم جميعاً مودتي كللللللللها بلا حدود...

أبو الحســــــــــــين...

[أبو الحُسين]

قصيدة وتعليق...

دايْر أجُر النَّم يا جِنات...

وسِتَّكِن عاجباني آبنات...

أُم لهيجاً سكَّر نَبات...

تَعَرِف الذوق سِت الوِهَاط..

أُم خشيماً ماهو غَلاَّت...

رُتْبَتا القايْد الحرَابات...

وظِيطا من دينار غادي فات...

وتَكْرِم الضيفان بي ثَبَات...

البَقُول بَطَّالة لخْبَات...

ويِنْسئِل يوم جَبْد الصراط...



إخوتي الكرام... صبحكم الله بالخير والرضا...

كل سنة وإنتو طيبين وكل عام وأنتم بخير...

أمس أقرأ في كتاب شدتني القصيدة دي وشوفو عليكم الله الراجل دا وصَّف البِت دي كيفِن؟؟؟
أولاً إستأذن ودي لزوم الإستلطاف وبعدين سواها سِت البنات من جم... وبدأ عاد في شُكْرو لهيجها زييييييي سكر النبات.. وذوقها وإحساسها المرهف وضميرها الحساس دا خليهو ساكت... ووسط الجيران حلاااااااااتة لاب تغلِّت على زول ولا حاجة... أما منزلتها في الحي بس تقول الضابط القائد للجيش من هيبتها وجلالة قدرها... وشُهرة فضائلها أكبر من شُهرة علي دينار الفاقت شهرتو حدود السودان... وأهم صفة هي زي ماب يقولو أهلنا الكبار المرة لو مابقت مرة ضيفان ماها مرة شئ!!!
أما واااااااااااااويل من يقول بطالة ولة يصيبها من شيتاً يُنقص مقدارها... الله يسألو يوم القيامة ويجب خبرو...

قصة حقيقة فيها كل الصفات الكفيلة بأن البنت تكون بهذا المدح...

أسال الله يحفظ بنياتنا وبنيات المسلمين ويكونِن متلها ياااااااااااااااارب...

ولكم جميعاً مودتي كلللللللللها قواسيب قواسيب...

أبو الحســــــــــــين....

[أبو الحُسين]

أُم خشيماً ماهو غَلاَّت...

رُتْبَتا القايْد الحرَابات...

وظِيطا من دينار غادي فات...



أنا أبوك يا السارة...

يا ست الذوق الرفيع والقدر العالي...


أبو الحســـــــــــين...

[ملكة سبأ]

كل قبيلة لها الحق في استعراض تراثها ...وايصال قيمها الي الآخر
للتمازج والاندماج

لا فض فوك ...

تحياتنا ابو الحسين ..
وماك مشحود ياجميل ..

واصل آزول ولاقينا على القائمة ((ب)) :D

[نزار حسن علي]

الأخ الصديق/ دو الحسين

كل سنه وانت طيب والشوق ماسورة محلوجه

بلادي انا تكرم الضيف وحتي الطير من يجيها جعان ومن اطرافها تقيها شبع


مع مودتي

[عبدالله الشقليني]

حبيبنا ود الحسين

أنا ما شايقي لكن بَحِب الشايقية :

عندما تغنى النِعام على إيقاع الدليب :

حور في سُور
سيدو مُعَلي سُورو
الجيران ما قادرين يزورو
لئام غُفرا
الزول ما بيَدُورو

ستعرف كيف كان الوصف البليغ
وكيف هو اللحن الجاذب .

شكراً لك ود الحسين

[أبو الحُسين]

لا فض فوك ...

تحياتنا ابو الحسين ..
وماك مشحود ياجميل ..

واصل آزول ولاقينا على القائمة ((ب)) :D

يجازي محنك يا ملكة بنات جيلها... ;)

والله القائمة ((ب)) دي مافي طريقة تحلني منها تَبْ... قااااااااعد وجابِد عنيقريبي الهَبَّابي من تمانية صباحاً ليييييييييييي سبعة مساء... ما يحلني منها إلا نهاية الدوام والنوم... وبيني وبينك في لَمَّة كدي بالليل حقت ناس أُوروبا قاعدة تفوتني عندي نية إنترنت في البيت لكن خااااااااااايف علي العوينات لا يلحقن الصِح :D ...

بس أنا عاتب عليك... ليش حوش أهلك في الأون لاين دوت كوم ماكي قاعدي تتاوقي عليهو... لايمنك شديييييييييد خلاااااااااااس... :rolleyes:

وبالنسبة لإقتباسك الفوق دا... يَعَلم الله يا الملكي ويا الحِبَّان عموم... غير نشر تُراثنا وأشعارنا والتواصل مع الناس بالكلمة الجميلة المموسقة والموزونة... ما عندنا شئ في قلوبنا... وشعارنا الرافعِنُّو اللمة الحلوي والبسمة الرايقي والذوق الشايقي والنَّفْسْ الطيبي غير دي أصلاً ما عندنا أي شئ... ربنا يصفي النفوس ويطهر الضمائر...

كميات مودتي...


أبو الحســـــــــــــين...

[على حسن على]

ابو الحسين اخوى والله محل ما تمشى يانا وراك (عضو جديد النافعابى)

[أبو الحُسين]

الأخ الصديق/ دو الحسين

كل سنه وانت طيب والشوق ماسورة محلوجه

بلادي انا تكرم الضيف وحتي الطير من يجيها جعان ومن اطرافها تقيها شبع


مع مودتي

الحِبيِّب نزار...

تسلم يا الغالي...

وشوقنا نحن جدوَل ضَكَر فاتح في إنقايي مرااااااااااقَدة مسطرة بس... ساقيها سَدُرْ... :D

شرفت ديار أهلك وأحبابك يا اخوي...

وبلادي أمان وبلادي سلام...

أبقى متوهِّط لا داخُل ويا ولد الضبيحة لي خالك نزار... :rolleyes:


قواسيب مودتي...


أبو الحســـــــــــــين...

[أبو الحُسين]

حبيبنا ود الحسين

أنا ما شايقي لكن بَحِب الشايقية :

عندما تغنى النِعام على إيقاع الدليب :

حور في سُور
سيدو مُعَلي سُورو
الجيران ما قادرين يزورو
لئام غُفرا
الزول ما بيَدُورو

ستعرف كيف كان الوصف البليغ
وكيف هو اللحن الجاذب .

شكراً لك ود الحسين

الحِبيِّب وصديقي الشقليني...

إنت عارف يا الغالي... النعام دا مدرسة متفردة الللللللله أعلم تتكرر تاني... لكن بيني وبينك.. ود النصري في حفلته الأخيرة في الشرقية عندنا قد رائعة الأُستاذ/ محمد سعيد دفع الله الزول الوسيم في طبعو دايماً هادي... أداها بطريقة النعام وطلعاتو ونزلاتو ذااااااااااتة...

وأنا بطلتك الجميلة دي أهديك والجميع... النعام آدم في أُغنية القلب الجريح...

http://www.anwarking.com/music/aln3am%20adam/algleb%20aljriii7.wma

ولك كميات مودتي...


أبو الحســــــــــــــين...

[خالد عبدالرحمن الحردلو]

الف شكر ليك ياجمال .وإن جاءت متاخرة .
[B] ولكن العتبا علي مشاغل الدنيا
ولي مقطع ظريف عن قراصة الشايقية
عندما رفض عبدالله ودست النفر الفطور بحجة ان القراصة كرهته حياته
قالو ابه علي ود مديني
ياعبدالله ودست النفر ليش تابا القراصة
حبايت الويكي قدر عين الدباسة
لك شكري / خالد الحردلو

[أبو الحُسين]

ابو الحسين اخوى والله محل ما تمشى يانا وراك (عضو جديد النافعابى)

آلاااااااااااااااف مراحب بيك يا خالي الغالي...

وأنا وين لاقيكم يا آل النافعاب...

تشرفونا في أي محل... وتسعدنا زيارتكم يا أخوالنا...

كميات مودتي...


أبو الحســـــــــــــين...

[عبدالرحيم ابراهيم العبيد]

الاخ العزيز أبو الحسين الراجل الزين وأهل الدار أستاذنكم في الدخول والمشاركة
شكرا علي هذا التوثيق الجميل 0000000000 لكن يا جماعه
الشوايقه حتي في نضميهم حلوين
يا أبو قصي كلما أقرأ كلامك أقول الزول ده عمره فوق السبعين
ربي يحفظكم 000 اليومين دهـ بسمعه بدندن لصديق أحمد 0000 ربي يجيب العواقب سليمة
لكن المجنني أنتو الكلام الحلو ده بتجيبوهـ من وين
أمكن من طبقات ود ضيف الله
وبعدين معاكم000 مش000 لازم تكون في ترجمه علي الشريط
لان الشوايقه أغلبهم أتبندروا وبقوا حناكيش
وفي أنتظار مزيد من الابداع
ودمتم[B]

[أبو الحُسين]

الف شكر ليك ياجمال .وإن جاءت متاخرة .
ولكن العتبا علي مشاغل الدنيا
ولي مقطع ظريف عن قراصة الشايقية
عندما رفض عبدالله ودست النفر الفطور بحجة ان القراصة كرهته حياته

قالو ابه علي ود مديني
[B]ياعبدالله ودست النفر ليش تابا القراصة
حبايت الويكي قدر عين الدباسة

لك شكري / خالد الحردلو

الجميل خالد الحردلو...

الله يديك العافية يا اخوي وإنت ياكا زولي تَبْ...

بس وصف حبة الويكي كأنه عين الدباسة "المبلِّجي" فدي مبااااااااااالغة...

لك قواسيب مودتي وأبقى واصل يا اخوي...


أبو الحُسين...

[عادل عسوم]

أبو الحسين
أنشاالله دايما أيدك وقلبك ملانين وتوزع للناس من جم :rolleyes::D:D
أمااااااني ماعجبني كلامك اللاّ فوق داك للملكي ;)
جينا على عنقريبك الهبابي دة أن كان ناخدلنا تكية كدي ونقوم على واطاتا لينا لاتحت :D
تحياتي ياحبيب

[كرار]

صديقي الجميل جدا ابو الحسين

اول مرة اشوف البوست و عايزلو يومين عشان الواحد يتصفحو مع تكية في عنقريبك الهبابي يا عملات عادل عسوم .
بس عليك الله تنزل لينا القصيدة القلتها لينا في ديوان ابو زهير ديك اللت الراجل العرسلو بنية من بنات امدرمان ماني طاريها سمح مع اسباب القريض :D:D:D

خالص مودتي

[أبو الحُسين]

الاخ العزيز أبو الحسين الراجل الزين وأهل الدار أستاذنكم في الدخول والمشاركة
شكرا علي هذا التوثيق الجميل 0000000000 لكن يا جماعه
الشوايقه حتي في نضميهم حلوين
[B]

الجميل عبد الرحيم العبيد...

أشكرك لك كريم زيارتك لحوش الشايقية...

ونتمنى لك إقامة طيبة... مع هذا الجمال...

http://www.alnsri.com/upload/uploads/D010067.JPG
من كاميرا الصديق ود كروم "حفظه الله"...


[B]يا أبو قصي كلما أقرأ كلامك أقول الزول ده عمره فوق السبعين
ربي يحفظكم 000 اليومين دهـ بسمعه بدندن لصديق أحمد 0000 ربي يجيب العواقب سليمة

وبعدين معاكم000 مش000 لازم تكون في ترجمه علي الشريط
لان الشوايقه أغلبهم أتبندروا وبقوا حناكيش
وفي أنتظار مزيد من الابداع
ودمتم
تسلم أخي العبيد وحقيقي بنتساءل عن هذا الجميل أبو قصي فقد طال غيابه من هنا وهناك...

لك وله وللجميع قواسيب مودتي...

والترجمة جاااااااااااااهزة يا عزيزي بس ما عليك إلا تستفسر ونحن ماب نقصر معاك!:D


أبو الحُسين...