أم ضرع خرفت وطلقت... [الأرشيف] - سودانيات .. تواصل ومحبة

mohamed hemaid

09-10-2005, 11:03 PM

- الشمس المدقوقة وتد في نص السماء ابت ما تزح..ضل الليمونة المضبلني لابت تحتا وحالف ما يجي منسلي مارق..لا علّوب لا الشيخ واحدا طاري الآذان فيهم مافي..عنقريب أم ضرع نصو في ضل الليمونة والنص التاني في شمس الله ونص النص مهتوك من عمايل أب سنكيت الليلية والنهارية والرمضانية..(الله يرحو قطّاع الحبال)..كل زول في همو..النمل يشيل ويحفر في ترى حوض الليمونة..أم ضرع ترشرش في جسما والعنقريب والمكان الجايي منو الهواء والهمبريب..ريحة البن المقلي والجبنة مشاققات العرِق وداخلات النخرين ..
أم ضرع - مع رقبتا تهمس-:-
يآ ربي دي مني الجالدي رمضان دي..والله ان قمت وباريت الريحي الطاقي دي علا أعرفا..أسع تلقاها يا وحيدة شيطانا قوي او راجلا أقوى من الشيطان ويمكن ظروف.. الله أعلم..
أم ضرع تواصل في الرشريش وتبل التوب من نقاع الزير وتتغطى..شويتين يجن داخلات عليها مقطوعات النصيب..كلّهن التقول جايات من عرس مستحميات وقاشرات..
الحلوب:-
سلام جاكي..مالك منططي عويناتك ديل فينا؟ إن شاء الله خير..قولي ما شاء الله وعيني باردي لا تسحرينا..
أم ضرع -من محلّها ما قامت- :
سلام وحبابكن وماشاء الله عليكن..الزمن اتغير..وحآتكن ووحاة الله.. كان الشئ الساواتنو في نفسكن دا سويتو لي أب سنكيت في رمضان كان لي يوم الليلي أقضي..ومسعولات من الخير دحين ريحة الجبنة دي شاماتنها؟ وللا يتمارالي ساكت؟..
العرجي-ختت صلبا جم كرعين أم ضرع-:
الحالة دي قلنا الريحي جايي من عندك..لكن أسمعن قولي دا.. الأيام الأولانيي في رمضان كلها زي دا..هلاويس ..والشئ الفي قلب الزول يشمو في نخريهو..
الخبابا:-
أييّ والله صدقتن..أها أسمعي آ أم ضرع الإتفاق المن وراك دا..ونحن جايين عليكي قلنا نذكرك بي قصتك مع ود عشرة كل مرة تقولي لينا بقولا بقولا ولايوم الليلي راجنك وانتي ساواهو لينا في التقى..
أم ضرع:-
كدي جرلّكن عنقريبين تلاتة إتوهطن في الضليل دا إن بقى شالكن وتعالي آ الحلوب شبري الضل دا وشوفي الضهر ما ختا؟..النصليهو ونتفكّ منو..واطاتنا بتصبح إن بقينا رجينا الشيخ وعلّوب يبقى شالتن نومة..
الحلوب:-
انتي ضايقي علي الضهر مالك التقول مغرب..والله المغرب ماقعد تضيقيلو كدي..لكن بيني وبينكن هم زاتن مابيخلوكي تضيقي.. وقبال ما تغيب سمح تلقاهم أذّنو..
الرقطي:-
الضل ما ختا..يكون باقيلو تاني خمسة ستة ساعات كدي..
العرجي-تضحك-:
إنتي آ خرابا يومك مالو زي يوم اجدادنا القدام..كدي وقعي بعد ستة ساعات العشي يدخل..وكدي قومن النركع ونجي نقعد لي ود عشرة..
أم ضرع:-
هيي هيييي..وحاتكن ووحاة المدفون في الترب..إن بقيت حكيتلكن قصتي مع ودعشرة بس ياكن الفاطرات والله أعلم اليوم يتحسبلنا صيام..أنا في الفطر شاردي من حكيها أجي أحكيها في رمضان الكريم والله ياهو..وبالنهار كمان ..بري بري ماهو شيتا يتقال..إستغفر الله..إستغفر الله..كدي قومن إتوضن والحلوب التبقالنا إمام ..صلاتا كيف سريعي وسمحي.. كلها بالحمدو واعطيناك الكوثر..
ونواصل..

mohamed hemaid

09-10-2005, 11:03 PM

http://sudanyat.org/forum/viewtopic.php?t=96&postdays=0&postorder=asc&start=0

أبو الحسين

15-10-2005, 08:14 AM

mohamed hemaid

16-10-2005, 06:48 PM

الغالي جداً ود أخوي حميد...

أشواقنا سيول خور الحسن يا اخوي... وييييييييييييييينك ووين بلودك كل عام وأنت وأم أحمد وأحمد وأم ضرع وعكود وأمين بخير وعافية يا رب...

لكم ودي كله بلا حدود... وأها واصل نحن راجنك...

ود الحسين عمي..
أشواقنا ليك سيول خور صلاح( وللمعلومية المطر كان عاصر قبلي هذا الخريف)..
نحن موجودين وبكثرة إلا انت من ماجيت من السودان راجع وما مركز معانا..

أنا نفسي بسأل عن عكود وأمين والعذرو معاهو تايملس..

حميد..

خالد الحاج

16-10-2005, 07:47 PM

- سلام وحبابكن وماشاء الله عليكن..الزمن اتغير..وحآتكن ووحاة الله.. كان الشئ الساواتنو في نفسكن دا سويتو لي أب سنكيت في رمضان كان لي يوم الليلي أقضي..

:D :D :D

mohamed hemaid

16-10-2005, 08:31 PM

ود الحاج أخوي..
وبرغم مشاغل الزمن لا زلنا في بالكم..
وصلني سلامك آالمبروك..وقدرو كيمان كيمان يا عملات ابو الحسين..
سعدت كثيراً لمرورك الجميل جمالك..فلا تنقطع عنّا..

ولّى زمان كسر الويكي..وأتى الحصاد الآلي.. :D

حميد

amine

16-10-2005, 10:57 PM

mohamed hemaid

17-10-2005, 07:22 PM

يا سلام يا حميد ..
أنا جيت و تحياتي ليك يا أبو الحسين
و كبيرنا خالد الحاج الله يعطيه العافية ..
و شوقنا للبقية و على رأسهم عكود ..
و الله كان كدي أنا زاتي خرفت و نسيت ..
الشافي الله ..
رمضان كريم ..
تحياتي يا حلوين ..
أمين
أمين أخوي..
ياسلام ياخي..والله كنا شفقانين عليك..
وين يا راجل حمد لله على السلامة..وبركة العودة الحميدة..
الله يستر عليك من مناداة أم ضرع ليك بي (يافردة)..
الله يشفيك ويشفينا
قول آميين..
لا تطوّل علينا..
(تحياتي يا حلو)..

حميد..

عكــود

18-10-2005, 08:03 AM

mohamed hemaid

18-10-2005, 07:29 PM

حميّد يا أب أحمد،
أنا تاني الحوش ده ما بعتّبو إن بقى أم ضرع ما أفصحت..
هي عاملة فيها شهرزاد وللا شنو؟
والله ياهو!!!

أبو الحسين
خالد
أمين
تضامنوا مع مطلبنا العادل أعلاه..
وأم ضرع يا خالد ما بتقدر على قضا رمضان عاد..
عشان كدي كانت بتخت لأب سنكيت منوّم مع السحور..
ما يحس إلا مع المغارب...لا تحرّكه إلا شهوة البطن،

عكــود
عكود أخوي..
والله الحوش ده مابيبقى بلاك..الارضة بتمسك في شقايقو
ان بقيت طوّلت منو..( الحوش رملاتو كتيري) والفلق مافيها زيت
رجوع وراقدي عرياني فوق السريقة..

أضم صوتي تضامناً مع المتضامنين للمطلب العادل أعلاه..
أم ضرع النجيضي قدرت علي أب سنكيت واتفكّت من القضا
الا خايفين منها تفصح ..ونبقى نحن في القضا.؟

أم ضرع وود عشرة في الطريق اليكم..
(ود عشرة زي ود عشرة يا ابو الحسين لكن ماياهو.).

حميد...

ناصر يوسف

19-10-2005, 10:26 AM

محمد حميد
عذرا إن كان مروري متأخرا كثيرا علي مطالعة تخاريف أم ضرع .... وأسأل نفسي لماذا تأخر مروري علي هذا البوح الغريب الأريب الجميل حد الإفضاح المجتمعي الحميم ... أراك وعذرا أن أستنطق هنا أسماء غيرك في تشابه الحكي وطلازته لديكم .. أراك وعثمان حمد وأبوجهينة أقلام ما فتئت تحجينا ببعض حجاوينا الملقاة علي ظلال التاريخ المجتمعي ... ولعلي الأن أعيش معها هي أم ضرع وهي تحجيني بمغامراتها بمثل ما تحجي سوسو حمادة عثمان حمد تلك الحكاوي الغنية بالتفاصيل المثيرة .. وكله واقع من المسكوت عنه في الحكي العام كما الجهر ......
لك أيها المترع بالأحرف النور ... سلام .... إلتفاف حولك حروفك البكر .... وتشكرات تريانات كرائحة القهوة التي تنامت لحاسة شم نون النسوة وحبيبةتهن أم ضرع التي خرفت وطلقت ....
هل يطول إنتظارنا لتواصل مد الحرف سريعا سريعا ؟ فأنا أعشق الحكي والحجاوي من لدنكم ... هيا سريعا سريعا إئتني بما عندك من حكاوي عنها هذه التي أحببت (أم ضرع) وعذرا مرة أخري إن جاء إطلاعي عنها للمرة الأولي هنا فق .

mohamed hemaid

20-10-2005, 10:05 PM

ناصر يوسف أخوي..
ميدالية أم ضرع الذهبية مهداة اليك ـ سبحة لحاء العرجون مرصعة
بقنديلة وكُرشة..بركاوية وتمودة..مشرقة ومدينة..ـ شكراًً وعرفاناًً
ابتهاجاً وسروراً بمرورك الجميل..قنّب طولاً بجوارها فضل اليمونة يسع
كل الحبائب..وانت اول الحاضرين..
ود يوسف أخوي..
لي الشرف الكبير ان أكون قريبا من العمالقة ود حمد وابي جهينة..
ولم نسبقك كثيراًً..فأم ضرع مهيلة الحجي نؤومة الضحى غتيتة الحكي
وما تحويه جعبتهاأضعاف ما قالته حتى الآن..ولكن جرعاتها صغيرة ..

لا تغب كثيراً..

دمت يا حبيب..

حميد..

عمر صديق

20-10-2005, 11:10 PM

الاخ حمد ودعثمان اهنئك فى البدءعلى هذه اللغة التى استطعت خلالها قول ما تريد
استطعت نقلها من اليومى والمعيش, اللغة العادية البسيطة
هى قطعة ادبية مكتملة بكل المقاييس وشكر يا ود عتمان

mohamed hemaid

23-10-2005, 06:45 PM

الاخ حمد ودعثمان اهنئك فى البدءعلى هذه اللغة التى استطعت خلالها قول ما تريد
استطعت نقلها من اليومى والمعيش, اللغة العادية البسيطة
هى قطعة ادبية مكتملة بكل المقاييس وشكر يا ود عتمان
عمر صديق أخوي..
سلامات وتصوم وتفطر علي خير..
ولو تعلم عمر أخوي كم أجد متعة في التخاطب
والحديث بهذه العادية البسيطة المتكاملة..
إنها لغة مشبعة بكلمات ومعانٍ في شكل صور
وتحف رائعة..

سعدت بمرورك وتراك ما مشيت بعيد
وود عثمان برضو قريبي..

حميد..

عمر صديق

23-10-2005, 11:26 PM

الاخ محمد حميد
تحية احترام
وانا اسف جدا للخطا الغير مقصود
خلطت بينك وبين الاخ الزميل عثمان حمد حتى هو شقلبت اسم ابوه يظهرانو الهواء ضربنى لانى كنت جاى من الدقى ولك العينى حتى ترضى

عمر صديق

23-10-2005, 11:59 PM

mohamed hemaid

24-10-2005, 05:16 PM

كما وضحت لك تشابهت على الاسما ء
المحيرنى فى الموضوع علم السودان فى الليلة ديك شفت ما عارف ظهر كيف بدل البت الحلوة بابتسامة الرائعة
وهو الشعار الخاتيهو عثمان حمد
اعتذر للاخوين وزى ما قلت ليك الهواء ضربنى شوية وحاجات تانية حامينى
مع خالص الود والاحترام
ملحوظة رجاء خاص دى ما تحولا لقصة قصيرة
بس خليها زى ما هى :)

عمر صديق أخوي..
ياربي يكون من الكبر..؟ الله اعلم .. :D
ولا يهمك ياحبيب علا كلامك دا كان سمعتبو ام ضرع
ياها المفرجاك للخلق..(اضانا تقيلي وعيونا شبهات) الا
زول يوصل ليها الكلام..واخونا داك يكون لاحدي اسع كلّما

لكن بيني وبينك يا عمر انت تمرق من دي تقع في دي
الولد اسمو احمد وبي شنباتو تقولو عليهو بت ..؟
دي ماضربة هواء بس الدنيي رمضان يازول.. :D

ودي لك ولاتطوّل وركّز.. :D

حميد..

عمر صديق

24-10-2005, 10:52 PM

الاخ العزيز

محمد حميد
تحياتى العطرة
ربنا يحفظو ويخلو ليك وسلامى لاحمد الصغير
انت عارف فى مشكلة تانى انا وقعت فيها
الاخوان الجالسين معاك فى الراكوبة الواسعة ده
ويسمعو فى حكيك ونضميك السمح ده وبدون مبالغة بذكرنى بروايات ابراهيم اسحق
لكن انت لك صوتك المختلف
عنه بالتاكيد ارجع بيك لموضوعنا تانى الخال وامين ما عندهم مشكلة
لكن عكود بيقف فى الكبيرة والصغيرة وانا خايف اعمل منها موضوع
مع خالص احترامى وودى لكل الموجودين

ناصر يوسف

25-10-2005, 10:28 AM

Ishrag Dirar

25-10-2005, 11:25 AM

محمد حميد ...

كلما قرأت اشعر بانني ارغب في المزيد
تشدني قوة خفية الي سلاسة الكلمات وبساطتها
وروعة السرد

اعود لاقرأ

اقرأ مرة عاشرة

أعود لاقرأ
ولا اكتفي ...........!

ودي
اشراق

mohamed hemaid

25-10-2005, 03:45 PM

عمر أخوي..
الفات دا كلو ما كان بيعمل ليهو
حتة مووضييع الا الكلام التاني دا
ياهو الجاب ليك المواضييع..
وللا شنو ياعكود؟ :D
الخال وامين ما عندهم مشكلة
لكن عكود بيقف فى الكبيرة والصغيرة
عمر أخوي..
توهط علي الدايمي..فالسرد يبدا عند انتهاء الشمس من جولتها..

ودي يا حبيب

حميد..

mohamed hemaid

25-10-2005, 03:51 PM

حميد هكذا هموا الرائعون دوما يقفون دائما خلف الظل وخلف الكاميرات والأضواء ، يتواضعون كثيرا كثيرا جدا ... وأنا لم أقل إلا ما أحسسته فعلا وبكل الصدق تجاه أقلامكم ... شكرا مجددا لهذا الألق الجميل ونحن في إنتظار بوح كلمات أقلامك النبيلة ...
ناصر يوسف اخوي..
المرور الرائع روعتك اسعدني لا منتهى..
ومدحك ــ الجميل جمال حروفك المنتقاةـاخجل تواضعي..
بوح الكلمات آت..تربع وامدد..فالبوح يقتل في الانامل خارجاً..

لك الود..

حميد..

mohamed hemaid

25-10-2005, 04:07 PM

محمد حميد ...

كلما قرأت اشعر بانني ارغب في المزيد
تشدني قوة خفية الي سلاسة الكلمات وبساطتها
وروعة السرد

اعود لاقرأ

اقرأ مرة عاشرة

أعود لاقرأ
ولا اكتفي ...........!

ودي
اشراق
اشراق اختي..
قشّينا الدرب عدّمنا الحجر والعود..
شلنا الشوك بعيد وفرشنا بدلو ورود
نوارة برم زهرة سلَم سوسنا بيها نجود
ودا كان قليل الا ياهو العندنا الموجود..

عزيزتي ..
هذا هو حال ظمأ الحروف الذي لا يُرتوى..
وكلما (غرفنا) لنشرب من بحره زادنا عطشاً..
سأشرب..

سأشرب مرة حادية عشر..

ولا ارتوي..

انها (الخواطر المرقّمة..)

حميد..

عمر صديق

27-10-2005, 01:09 AM

الاخ محمد حميد
اللغة العامية هى الرصيد والتى تميزنا عن الاخرين
وحتى اننا نجد الروايات والشعر السودانى استفاد من توظيف طاقاتها
لانها هى الاقرب الى المتلقى حتى عمالقة الرواية السودانية الطيب صالح ,ابراهيم اسحق وظفهوها فى الحوارات

mohamed hemaid

28-11-2005, 06:00 PM

عمر صديق اخوي..
يبدو ان ام ضرع قد نامت كاهل الكهف
ويديك تفتح وتغمت في عويناتا غتيتي
فانها وان نامت نامت وان صحت افصحت
ستعود حتما للحكي طالما هناك عقاب رويحي..
الاخ محمد حميد
اللغة العامية هى الرصيد والتى تميزنا عن الاخرين
وحتى اننا نجد الروايات والشعر السودانى استفاد من توظيف طاقاتها
لانها هى الاقرب الى المتلقى حتى عمالقة الرواية السودانية الطيب صالح ,ابراهيم اسحق وظفهوها فى الحوارات

صدقت يالصديق..
لاتغب..

حميد..

mohamed hemaid

04-12-2005, 08:00 PM

ـــ شعاع الشمس المفضّل من عقاب النهار بقى احمر خجلان من قولة الوداع..باقي السحابات التعبانات من جري النهار الطويل متلصقات مع الشعاع يقالدن يوادعن فيهو..يآحليلن اليوم كلو متشاكلات ومتزاككات ..يتلمّن يتلمّن ويتفزعن علي الشمس وهي بي سيطانا فوق ضهر الساحابات من فوق..يجرن منّها وتاني يتفزعن عليها..وعند المغيرب متقالدات..أريتنا الكان بقينا زيّهن..صوت البهم المفروز في الوكر عند ساعة الحليب يجيب الطاش..صوت القعو في الجدول الضكر..صوت الطير فوق النيمة فرّش للنوم..صوت القطى الكان وارد البحر طالع للجبل..صوت الحلوب كاشتي وارترتعت في عتبة الباب المبنيي جديد كان دايري تتقلّم زرب وقعت في حجر أم ضرع ضاماهاـــ
أم ضرع:ــ
بسم الله قولي بسم الله مالك آخرابا؟ لا يبقى مشيتي عند حجر الناطور في المغيرب دا؟ الله يقلعو قلّاع بول الكلاب وهرار الصبار لامي الشياطين عليهو..وكدي قومي من فوقي وجعتي صفحتي..اللقوم أجيبلك بخرتين كت ماخداهن من شيخنا لي متل جنّك دا..
الحلوب:ــ
أقعدي أقغدي وخليك جمبي..ماني ممسوسة علا الشفتو الليلي هو والجن في فد سرج راكبات..
الضحاية ــ جاي مارقي من القاطوع ولافحي جريدة تمر مولعي نار تلهلب من تحت صاج كسرة العشي ــ
أعوذ بالله من الشيطان الرجيم..وكُر كُر كُر لمى فيك وين آالمسنوحة..نعل مو في بيتك القديم المهبرك داك؟
أم ضرع:ــ
آالضحاية شيلي نارك دي مني بعيد شويي..تشتشتينا بيها وأمشي كوركي لأب قرن اليجي ويجيبلو ناس معاهو للكتيف ومدي حبل المحويق معاك..
الضحاية:ــ
أب قرن مرقة الصباح ما صدّ راجع مابعرفو وين غتس.. الفطور والغدي ما جابنّو الليلي لا يبقى واقعلو في مترة؟
الحلوب:ــ
أنا عارفي محلو وكان صبرتلّي شويي أشيل نفسي وأحكيلكن الله لا كسّبكن ضايقات ضيق الكلبي..
العرجي ــ جات خابي مترتعي في عتبة الباب ومن غير سلام تناهدــ:
آالحلوب انتي بي هني وأنا قالبي الدنيي عليك قلب..والله عندي ليك خبر إن ما أديتيني فيهو كوريتين دقيق ما أقولو ليك..
أم ضرع ــ تتمطّق وخاتي ايدا الشمال تحت حنكا متمحني ــ:
الساتر الله ديل ماهن براهن الليلي..دا كلو من عدم الصلاة الكان قاعدات يركعن ما كان دا حصل..إنتي آخرابا قلنالك شيلي نارك دي من فوقنا حرقينا كمان واتفكي مننا..
الضحاية:ــ
انتي آأم ضرع شايلاها في ناري دي مالك ماك نصيحي؟
أم ضرع:ــ
هو النصيح منو الليلي؟ ديل زي الضبان الراشنّو بالفليت رب رب وقّعن فوقي كسّرن ضلعي رضرضنّها وهتكن عنقريبي وويحيدتن وقّعت الكلام مافي..دحين قولن العندكن وللا قومن فارقن صباحي دا.. والله ياهو..الواحدي فيكن شاردي ومابتسعل علي ووقتين تجيها مصيبي تجي جاري جري علي ام قشر المسكيني دي..حِكم آخر الزمن والله..
الحلوب:ــ
آيمة أريتو الكان المصايب كلّلها زي دي..أولا تبادي أب قرن راجلك آالضحاية نصيح وما عندو عوجي..
أم ضرع:ــ
وتالتاً بالتبادي؟ و..
الحلوب:ــ
لاتقاطعي واصبري و..
الخبابا ــ برضو عترت في عتبة الباب داخلي ــ:
انتن قاعدات بي جاي وبي هناك الدنيي مقلوبة قلب والخبر مالي البلد ماسمعتن بـ ..
العرجي ـ تقمتلها خشما ـ:
اسكتي آالخبابا أحشي ولاتودري علي كوريتين الدقيق خبر زي دا ما بقولوهو بالساهل..
أم ضرع ــ زهجاني ودايري تموت بي عدم معرفة الخبر للليلي ـ:
والله حيرتننا ..وإن بقى لي كوريتين الدقيق ديل أنا بديك ليهن معيوسات كمان بس أطرشي الخبر الشايلاهو دا..
أب قرن ــ شاربلو شئ يدقش عتبة الباب ويقرّب يقع ــ:
متلمات كدي مالكن نعلّكن عافي أمشي آ الضحاية جيبيلك أكلاً كتير باقي معاي ضيف..
الضحاية:ــ
سمح ماشي .. علا ضيفك منو الشايل بطنو عند المغارب فاضي؟
أب قرن:ــ
سعالك ماهو واقع لي..يعني التكنو متلمات كدي وما عندكن خبر ضيفي منو؟..بلا..
العرجي ــ تجر الحديث لي محل كُتُر بالا في كوريتين الدقيق ــ:
آأب قرن التمرات الطوال الفوق قيف البحر حشّهن وشيل التمر الفيهن لي رقبتك..وإن درت تقطعن وتشققن فاق ماعندي مانع ..
ــ الكلام وقع لي أب قرن في جرح باقي مقرود في تميرات يبلّهن وبسراع مرق رقبتو علي القاطوع جري خايف من نطّة العرجي في القالتو ــ
أم ضرع :ــ
انتي آالبومة إن كان حشّ الغبيرات ديل وجابلك إن شاء الله ربعن مو أخيرلك من غبريتين الغبير ديل؟
الضحاية ـــ لفحت الخبر من أب قرن الكان معاها في القاطوع وجات جاري لا برا عترت في كراع عنقريب أم ضرع وانكبّت علي وشيها وبي جبهتا فوق حقة الصعوط الراقدي عند كراع العنقريب المن تالا القبلي ..رب وقعت غمراني واتذكّرت الخبر فاقت في ثواني ومن حقة التمباك شالت ملت ايدا حشتبها الجرح البدأ يسيل في الدم..

ونواصل..

Dr. Bakri Osman Hamad

04-12-2005, 09:04 PM

خالد الحاج

04-12-2005, 09:17 PM

mohamed hemaid

04-12-2005, 10:42 PM

العزيز حميد ... اراك تجرني جر نحو الشمال الحبيب ... ابذل من الجهد الكثير لاروي ذلك الظمأ القديم... لعن الله الغربة و مراسيها فلقد جعلتنا نتجول في المقل حوافي الاقدام خلف حمارا جاري شوك في درب الترك .. متعك الله بالعافية...

بكري

بكري أخوي..

ليتني املك جهد وافر لارواء الظمأ لابعثه لك..ولكن ما دخرته
لاروائي قد نفد..

وكم تمنيت الآن التجوال خلف الحمار في درب الترك فينغرس الشوك
في اقدامي واتسلى بنزعه في هذه الغربة فلعلّ ألمه يعيشني لحظة اني هناك..

دامت عافيتك ولا تغيب..

حميد..

mohamed hemaid

04-12-2005, 10:54 PM

حميد يا جميل
عاد سوي لينا في المرقة والدخلة و.....نواصل
يا زول ما عندنا صبر لي جنس ده فحقو تتفق معانا تنزل حلقتين في الأسبوع
باقي نحن روحنا محرقانا وما بنقدر علي شيلة النفس والمساسقة.
:mad: :mad:
فت الخبر والكوريتين حقات الدقيق علي أنا.

ود الحاج أخوي..

الجرسة مابتجيب شئ وخلي بالك سلبة..واعمل نفسك مامهتم
براها ام ضرع تجي جاري..اماني مو غتيتي داخلي مارقي..
اسع عليك الله دا وقت يجي فيهو اب قرن..ماكان طافش من الصباح
ما لقى يجي علا عند ساعة قولة الخبر..أها بلا رمى مرتو وكان داير تروح فيها
وعتبة الجن دي مالقو يبنوها علا الليلي..حكم والله.. :D

وان بقى لي كوريتينك..انا دققتو شوال قمح في الطاحونة
بس ان شاء الله ترضى ..باقي العرجي راقدالا فوق راي آخر
والله اعلم.. :D

حميد..

Osman Hamad

06-12-2005, 12:11 PM

حميد المجنون
تقول لى برضو انا مجنون.

تعجنى جد اًكتاباتك وإسلوبك الذى هو اكثر من رائع.

حقيقة قلمك يستحق النشر، واصل ياحميد فنحن نتابع.

لك كل الود والعشق.

عكــود

06-12-2005, 05:26 PM

شعاع الشمس المفضّل من عقاب النهار بقى احمر خجلان من قولة الوداع..باقي السحابات التعبانات من جري النهار الطويل متلصقات مع الشعاع يقالدن يوادعن فيهو..يآحليلن اليوم كلو متشاكلات ومتزاككات ..يتلمّن يتلمّن ويتفزعن علي الشمس وهي بي سيطانا فوق ضهر الساحابات من فوق..يجرن منّها وتاني يتفزعن عليها..وعند المغيرب متقالدات..أريتنا الكان بقينا زيّهن..صوت البهم المفروز في الوكر عند ساعة الحليب يجيب الطاش..صوت القعو في الجدول الضكر..صوت الطير فوق النيمة فرّش للنوم..صوت القطى الكان وارد البحر طالع للجبل..

يا سلاااام يا حميد على الصورة الناطقة لمغربية في البلد نهايات أغسطس..
البَهم يكوركِن دايرات يفكّوهِن للرضاعي...
أمّاتن يثغِن شوقاً لفلذات الأكباد وإستجابة لأجراس المعدة، فقد حانت ساعة العَلَف..
عودة الشُفّع فوق الحمير من التحتانية..
كل واحد معودِل بطيحتو (كان لوبي كان برسيم كان كاويق كان كُداد)..
في جيب كل واحد قندوليّات نص إستواء وفي الجيب الآخر ليموناتاُ نايراااات..
العجاج وراهُن لاوي، تعكس ذرّاته بقايا أشعة الشمس عند إختفائها..
صوت أذان المغرب من تالا الجامع..
وبعد أن يصل إلى "أشهد أن محمّداُ رسول الله" يبدأ الأذان من تالا الخلوة..
باقي ما عندو ساعة، كان راجي الجامع يبدأ أذانو..
نص دستة جداد "واحدي بي سواسيوا" يرعِن في بطيحة البرسيم القلبوها هسّع..
قبّال ما يعشّوا البهايم ويضيعِن في الكرعين...
البهايم كابسات الكَتِّقَة حاسدات الجداد البدا عشاهو..
عريبي قايد جملو فوقو راس برسيم وراس واقود وجرايداُ خُدُر قطعِن من التمرة الواقعي فوق جدول الساقي..
واقف يشرب من السبيل وجملو يخرِت من صفق النيمة وياكل،

واصل يا حمّيد الإبحار بنا تجاه الشمال وتجاه القلب،

عكــود

خالد الحاج

06-12-2005, 05:31 PM

صوت أذان المغرب من تالا الجامع..
وبعد أن يصل إلى "أشهد أن محمّداُ رسول الله" يبدأ الأذان من تالا الخلوة..
باقي ما عندو ساعة، كان راجي الجامع يبدأ أذانو..

عكــود
:D :D :D

mohamed hemaid

06-12-2005, 07:04 PM

حميد المجنون
تقول لى برضو انا مجنون.

تعجنى جد اًكتاباتك وإسلوبك الذى هو اكثر من رائع.

حقيقة قلمك يستحق النشر، واصل ياحميد فنحن نتابع.

لك كل الود والعشق.

ود حمد أخوي..
تشكر يا جميل الكلام علي المرور..
اسعدتني مداخلتك يالحصاحيصا دوت كوم
لاتغيب كتير وتسويها لينا شرح دروس :D
انت الغياب العليك شنو لآمن يشرحولك؟

كل الود..
حميد..

mohamed hemaid

06-12-2005, 07:25 PM

عكود أخوي..
ما اروع تصويرك الديجتالي لهذه اللقطات..

عودة الشُفّع فوق الحمير من التحتانية..
كل واحد معودِل بطيحتو (كان لوبي كان برسيم كان كاويق كان كُداد)..
في جيب كل واحد قندوليّات نص إستواء وفي الجيب الآخر ليموناتاُ نايراااات..

الشفع شفقانين كان صبرو وخلوهن نجضن في امهن مالو؟ ياربي يكون سارقنهن
من شدرات التوم الطلع لاحق المغرب..

البهايم كابسات الكَتِّقَة حاسدات الجداد البدا عشاهو..

البهايم خارتاتنّو قرض ولاماتنّهن الاتنين شفقة وحسادي..أظنو اصابتن العدوى من الحاصل في البلد..

عريبي قايد جملو فوقو راس برسيم وراس واقود وجرايداُ خُدُر قطعِن من التمرة الواقعي فوق جدول الساقي..
واقف يشرب من السبيل وجملو يخرِت من صفق النيمة وياكل،

والعريبي كمان فالح في الغتاتة والنجاضة وتلقاهو قطعلو كوزين وسوى شراب البوقة
الجديدي علي مهلتو لامن جملو يشبع من النيمة :D

كتّر من الزي دا آ العكود..
حميد..

mohamed hemaid

06-12-2005, 07:28 PM

:D :D :D

ود الحاج أخوي..
أقعد سوّو في الضحك لآمن تدفق كوريتين الدقيق.. :D

أبقى قريب..

حميد..

mohamed hemaid

06-12-2005, 11:43 PM

خبر عاجل..
ورد ما هو آت علي لسان العرجي وغيّرت رايا في الكلام القالتو..

العرجي ــ جات خابي مترتعي في عتبة الباب ومن غير سلام تناهدــ:
آالحلوب انتي بي هني وأنا قالبي الدنيي عليك قلب..والله عندي ليك خبر إن ما أديتيني فيهو كوريتين دقيق ما أقولو ليك..

العرجي تطالب بعودة امين مقابل فت الخبر..

ياربي هو وين؟؟

حميد..

mohamed hemaid

13-12-2005, 06:15 PM

-- بعد وقعة الضحاية الدنيي صنّت عدمت الحركة..علا من صوت شافع بعيد يبكي دقتو أمو عشان دقش العشي بي كراعو دفّقو في الواطة حقت الله..حس الام تهرج اعلى من حسو وتقولو تسكت وللا أجي أحشاهو ليك..أب قرن الشايل اللكل مارق والمركوب اللابسو يسوي في الطق طق طق باقي قعرو مقلوع من جلدوالنقلتي طوّل ما ظهر..الشايل اللكل يترتع شمال ويمين وكان الشايلو لبن كان ادفّق ملا الهديمات.. ترس وقف عند كوم الحريم المتلمات فوق الضحاية الدايخي من الدم النزف وقرقر ضحك وبي لسانو المعووج:ـــ
مالكن متكومات كدي عند راسا ؟ الخرابا قلتلا لا تجري وأمشي بشيشي وبراحا كرعيك المكجولات ديل بيفقهنّك يوم..ما سمعت الكلام وسوتلها جري الزول النصيح الزاكيهو سحار ما يسوي جنس سواتا دي..والله ايام الشقاوة أزاكك فيها تحت التمر ما سوت متل دا..وللا ياربي كان ساواها نجاضا مخسوس ودايراني الِم فيها اقبضا وأقالدا ؟ و..
أم ضرع ـــ قطعتلها حِتي من الفركي اللابساها وحشكنتا صعوط وكمدتبها جبهة الضحايةــ:
غور يا خرابا أمش الشايلو دا لا يبرد والجوع لايقدك ويقد بطن ضيفك..جنّكم الواحد يملا بطنو ويجي يلقلق ويتطوطح يغلبو يمشي..كم مرّة قلنالكم وقتين يتحرّق دفقوهو ولا تجغموهو..سب فوقكم..والله ما شفتو أب سنكيت الله يرحمو إن بقى ضاقلو فيهو فد طعم مو ياهو..يدفقو في الواطة قدام عيوني شررر..
الضحاية ــــ دايخي راقدي والكلام جاييها من بعيد زي التقول في منام ــ:
لا تبقى نسيت البصلات يا أب قرن .. قطعتهن ليك تلقاهن في صحن الشطّة الصغير الجبتو معاك اليوم داك..آبعرفو بدلتو مع صحانة منو ؟ شكلو كُتُر وماهو متل عديدتي الموسمة في قعرا باللحمر.. والكبايي الشلتها ولفحتها وقايلني ما شفتك.. أبقى عليها عشرة ولاتلحقا أمات طه زي الفاتن .. ياها الفضلت من الدستي..والله ولا طوّلت من جبتها..انتلّحت فيهن واحدي ورا التاني سقطتا حجرن ..إنتو كع كع بي خشم القزازي مالو؟كدي أمش وإن درتو الزيادي تعال .. وعليك الله لاتكتّر الليلي وتجي تنجدع تنوم ..دايراك في غرد بعدين..
أب قرن :ــ
الله لاكسبّكن الكان دايري تموتي وبالك في عديدتك وكبابيك وغردك..وأقيفي لي هني..متين جيت وإنجنضلت نمت قبال كدي؟ عفّو..دايري تطلّعي فيي عيب قدام صاحباتك ديل وللا شنو ؟.
الحلوب ــ فرحاني بي الكلام دا وعاجبا عجب تضحك سن سن ــ:
والله آالضحاية ضحكتيني وباقيلي كدي الشافك طردتينا بدري من ضو ما كضّب..بس لايبقى تعب بلا عوض وفي اللآخر تنومي بي دوختك دي وتمرقي بي قد القفة..وآمغصتي أنا الشديدي..وأماني يالنجيمات الفي السماء ماجاكن عدّاد الليلي..أحسبكن نجمي نجمي ولآخدلي وقفة ,افكّر في الكلام القلتيهو دا آ الضحاية..لكن بيني وبينكنالواحدي تفكّر في شنو وتخلّي شنو؟ دحين خبر الليلي دا خلّالي عقلاً أحسبو وافكربو؟..
أم ضرع ــ تدفر في الضحاية من فوقا ..باقي كان حاضناها زي الشافع البيرضع ــ:
كدي قومي من فوقي إن بقى عندك باقي موت تميهو فوق عنقريبك الداساهو في الحوش البي غادي داك..عمايلك ظاهري ومكشوفة ..انتي ماتخلّي الشمش تدخل سمح وبعدين بي بشيشك تشيليهو جنب عنقريب أب قرن لامن شاف لامن دِرا..وأقيفلّي عاد..كلّكن بقيتن عارفات تاخبر المالي البلد علا أنا زي الأطرش في الزفة وويحيدتن دايري توقعو لي مافي..وداخلني قسم إن ما قلتنّو لي أسّع دي.. تاني قصتي مع ود عشرة تبقالكن قدحة وماتشمنّها..أها..أوريكن التعزّز المابتعرفنو وماطقش إضنينكن قبال كدي..
العرجي ــ برضو تزح الضحاية الكان متكلي فوقا ــ:
أقيفي آأم ضرع ..ولااه زعلك مابنقدر عليهو..دحين اللشربلي شوية مويي وأجي..وإن بقى ماقالنّو ليك أنا بقولو..وكان لي كوريتين الدقيق أها دا طرفي منهن منو العوض وليهو العوض..وقوليهوآالحلوب باقي انتي ياك ست الوجعة..

ونواصل..

amine

13-12-2005, 11:52 PM

العرجي تطالب بعودة امين مقابل فت الخبر..

ياربي هو وين؟؟

هههههههههه يا حميد أخوي أت ما عارف العرجي بقى عليها شنو ؟؟
ما هيي طلعت حراميي و سراقة كمان ...لعنو قامت تلبت فوق حيطتنا علشان تسرق الشدرة التانية ...
أها شفت كيف حليفتي (( وحات مهدي الله أبو زينب )) ..لحقتها بالحليفيي دي و قامت وقعت و كسرت كراعها لمن بقت عرجي ..علشان كدي أني بنقول لكل الحراميي و السراقين ما تقربو علي حوشي دي ..
بس أم ضرع حرم نضرب ليها سلام و تعظيم لامن يقوم أب سنكيت البعاتي ...بس العرجي البيتها بتربي فيهو الصبرات الباكلن الفويلات و السميسمات حرم نكسر ليها كراعا التانيي علشان تقعد في نص الشارع و تشحد ...
يا ربي أنا وين ؟؟؟
تحياتي يا حلوين ...
أمين

amine

14-12-2005, 12:07 AM

أمش وإن درتو الزيادي تعال .. وعليك الله لاتكتّر الليلي وتجي تنجدع تنوم ..دايراك في غرد بعدين..

ههههههههههه يا حميد أخوي ده شنو ده ؟؟؟ (( الغرد ده شنو ؟؟ ))
يا ربي أنا وين ؟؟؟
تحياتي يا حلوين ...
أمين

mohamed hemaid

14-12-2005, 10:26 PM

امين اخوي..
وينك ياحبيب مشتهنّك والله..
ههههههههههه يا حميد أخوي ده شنو ده ؟؟؟ (( الغرد ده شنو ؟؟ ))
يا ربي أنا وين ؟؟؟
تحياتي يا حلوين ...
أمين

انت الكلام المكتوب داك كلو ما لقيت حاجة تسال منها غير الغرد دا؟ :D
باقيلك الكان انا عارفو ما كان كتبتو؟

لا تطوّل بكانك مابيتملي..

حميد..

amine

15-12-2005, 01:21 PM

انت الكلام المكتوب داك كلو ما لقيت حاجة تسال منها غير الغرد دا؟
باقيلك الكان انا عارفو ما كان كتبتو؟

لا تطوّل بكانك مابيتملي..

حميد..

ههههههههههههههههههههه يا حميد أخوي و حات البزوروهو الحفايا و العرايا أني ما لقيت حاجي نلكلم فوقكها غير الغرد البعدين داك ...أني يا زول أضهبت عديل وحات الشيخ الفوق داك ...ياخوي أم كراعن عوجي دي خليها شكيتها علي الضواها أبو اللمين ...بس عليك شيخي الماحي أبو شرا كان تسلم لي على أم ضرع ...و قول ليها شيلي الهم من رويسك اللمين حلف و عايز يلمك في حوليتو ...و خليها تنسى البعاتي داك ...لعنو العرجي بقت حراميي ...
يا ربي أنا وين ؟؟؟
تحياتي يا حلوين ....
أمين

mohamed hemaid

21-12-2005, 06:31 PM

ههههههههههههههههههههه يا حميد أخوي و حات البزوروهو الحفايا و العرايا أني ما لقيت حاجي نلكلم فوقكها غير الغرد البعدين داك ...أني يا زول أضهبت عديل وحات الشيخ الفوق داك ...ياخوي أم كراعن عوجي دي خليها شكيتها علي الضواها أبو اللمين ...بس عليك شيخي الماحي أبو شرا كان تسلم لي على أم ضرع ...و قول ليها شيلي الهم من رويسك اللمين حلف و عايز يلمك في حوليتو ...و خليها تنسى البعاتي داك ...لعنو العرجي بقت حراميي ...
يا ربي أنا وين ؟؟؟
تحياتي يا حلوين ....
أمين

امين اخوي..
ومازال الغرد معلّق بين شفقة ام ضرع واصرار العرجي علي الدقيق..
ومالك الحكايي سويتا كلها شيوخ في شيوخ؟ اها خلّهم ينفعوك ويوروك الغرد شنو :D
تقعد تباري العرجي الا كرعيك يحفن بالحفي..

حميد..

ملكة سبأ

22-12-2005, 11:25 AM

باقي نحن روحنا محرقانا وما بنقدر علي شيلة النفس والمساسقة.

فت الخبر والكوريتين حقات الدقيق علي

http://sudaniyat.net/vb/images/smilies/biggrin.gif

والله ياخال كلنا ركبنا سابت من المساسقة

وحميد يجي يقولك مدقق لي شوال قمح !!

وهو يدققلنا في المغسة

وحاة الله شدة روحي ما قاعدي تحرقني ... لمن اقرب اقول افرزوا البوست دا وسولكم واحد للمداخلات وواحد للقصة لاني بصراحة قاعدي افطها وافتش باقي القصة ودا كدي بتور نفسنا !!

اها خليكم زي الملكي دي واحد مايجي يفتح خشمو .. يسكت يقرا ويمرق !!

وكدي نكمّل لحميد والعرجي فهمن

http://sudaniyat.net/vb/images/icons/icon10.gif

amine

22-12-2005, 07:50 PM

يا حميد أخوي وحات الله أني الليلي ماني داير أرد علي أم ضرع و العرجي ...بس داير نقول ليك كلام ..
جاتك ملكة سبأ .. ووحات البزوروه الحفايا و العرايا ..ملكة سبأ دي !! لسانها بقدر علي كلام أم ضرع و العرجي ...أها كان كدي ياخوي شيل شيلتك ووريها دريب الصبرة البتاكل السميسمات و الفولات دي ....بس و الله ملكة سبأ دي منها هيني و الله ...
يا ربي أنا وين ؟؟؟
تحياتي يا حلوين ...
أمين

mohamed hemaid

22-12-2005, 07:53 PM

http://sudaniyat.net/vb/images/smilies/biggrin.gif

والله ياخال كلنا ركبنا سابت من المساسقة

وحميد يجي يقولك مدقق لي شوال قمح !!

وهو يدققلنا في المغسة

وحاة الله شدة روحي ما قاعدي تحرقني ... لمن اقرب اقول افرزوا البوست دا وسولكم واحد للمداخلات وواحد للقصة لاني بصراحة قاعدي افطها وافتش باقي القصة ودا كدي بتور نفسنا !!

اها خليكم زي الملكي دي واحد مايجي يفتح خشمو .. يسكت يقرا ويمرق !!

وكدي نكمّل لحميد والعرجي فهمن

http://sudaniyat.net/vb/images/icons/icon10.gif

الملكي اختي..
والله من شدة الضحك لآمن الخبر كان داير يقع مني.. :D :D
اسع حميد ذنبو شنو ؟ هو زاتو مددق قمحو وراجي الخبر زيّكم
شئ تحنيس وشئ وشيات..الا زي ماقلت ويبقالي كدي العرجي
لابدي فوق رأي..اصلو كوريتين الدقيق ديل ما بيطلبن زول ماعندو
خبرا قوي وخصوصا في ايام القمح الغالي دا..
اسع الكان قالت كوريتين مديدي مالو ؟المريق راقد ورخيص وحلة
ام ضرع الراقدي تحت الزير اصلها ما فضت من المديدي..
وكان قلتي للعطرون اياهو من حق الصعوط جاهز ومبلول
كف يغمتولا خشما بالمديدي ويقلعو الشمار من تحت لسانا..
ويا خبر الليلي بي شلن بكرة يبقى في خشم ام ضرع.. :D

ومابخليك تساسقي كتير..

حميد..

معتصم الطاهر

07-01-2006, 09:30 PM

amine

07-01-2006, 10:44 PM

][align=center]http://sudaniyat.net/upload/uploading/dd1.JPG

سلام يا نديدي يا ود الطاهر ..
أها يا حميد أخوي الهندسة ظهرت هنا ....
أنا ما قلت ليك خالد أخوي ده جاري ورا الأردية القصار ؟؟
و كمان في أبو ظبي أنشغل في الكاميرا الديجيتال لأنه هناك مافي لا أردية ولا أيسكريم ....
بس الصورة الرسمها الباشمهندس دي خايف منها لأنه أب سنكيت البعاتي حيقوم من سباته ...
و أم ضرع ظااااااااااااتها بكرة حتقول لينا و الله أنا لا خرفت و لا طلقت ....علشان كدي شيل شيلتك ياخوي ...
يا ربي أنا وين ؟؟؟
تحياتي يا حلوين ...
أمين

mohamed hemaid

08-01-2006, 09:15 AM

ود الطاهر اخوي..
كنت عارف انو محل ما تمشو يقطركم الجَمال..
ياربي ونستو زي ونستنا دي في اللحظة ديك ؟ تسأل ام ضرع..

مرورك نسمة نوّار برسيم ..

حميد..

mohamed hemaid

08-01-2006, 09:30 AM

أمين أخوي..
أنا ما قلت ليك خالد أخوي ده جاري ورا الأردية القصار ؟؟
و كمان في أبو ظبي أنشغل في الكاميرا الديجيتال لأنه هناك مافي لا أردية ولا أيسكريم ....

الخال محنو كتيري..الا حكاية الاردية اول مرة اسمعا منّك.. :D

بس الصورة الرسمها الباشمهندس دي خايف منها لأنه أب سنكيت البعاتي حيقوم من سباته ...
و أم ضرع ظااااااااااااتها بكرة حتقول لينا و الله أنا لا خرفت و لا طلقت ....علشان كدي شيل شيلتك ياخوي ...

والله صورة ترد الروح وتطّيب الممسوس وتقّوم الفي القبور مدسوس..وشيلتي براي بشيلا..حضّر دقيقك..

يا ربي أنا وين ؟؟؟

انت طالع لا فوق علي البيوت وخِتيت درب الترك..والصورة القدامك دي محصورة بين
(عريف الديك )( والقلعة الصفراء.)..هناك حيث ديجتال العيون هو الشاهد..

حميد..

معتصم الطاهر

08-01-2006, 12:16 PM

ود الطاهر اخوي..
كنت عارف انو محل ما تمشو يقطركم الجَمال..
ياربي ونستو زي ونستنا دي في اللحظة ديك ؟ تسأل ام ضرع..
مرورك نسمة نوّار برسيم ..
حميد..

حميد
سلام
ونسة عكود وخالد لو جات أم ضرع كان شليخاتا اتورمن ..
غايتو أنا كانوا محرسنى الباب

mohamed hemaid

08-01-2006, 03:15 PM

حميد
سلام
ونسة عكود وخالد لو جات أم ضرع كان شليخاتا اتورمن ..
غايتو أنا كانوا محرسنى الباب

:D :D :D
الحراسة يا ود الطاهر أخوي درجات..
فان كنت خلف الباب المتاقى فانت برئ من فعلتهم
والا انك كنت تخوض معهم.. :D

دفقت من منطال دواخلي عليك شوق..

حميد..

عكــود

08-01-2006, 03:30 PM

دفقت من منطال دواخلي عليك شوق..

لا حولاااا يا حميد..
يا زول كلمة "منطال" دي نَكَتّها من وين؟
يعلم الله ليها زي 25 سنة كدي ما طقشت أضاني،
خفّف العيار على الجماعة شويي (ود الحاج ورهطه)
يعني نباريك بالدكشنري وللا كيف؟

ود الطاهر صِح كان حارس الباب،
إلاّ كان بيدي الحِلّة وصا..
والنُقّارة عصا،
ونستنا كانت حش برسيماُ غزير وتريااااان وواطاتو رملية..
ومناجلنا مطرّقة عند سليمان الحلبي،

لك من المحبّة قيزان أوسلي،

عكــود

mohamed hemaid

08-01-2006, 06:58 PM

عكود أخوي..

ونستنا كانت حش برسيماُ غزير وتريااااان وواطاتو رملية..
ومناجلنا مطرّقة عند سليمان الحلبي،

واااااحلالي عليكم ..تربطو راس راس وتجدعو لا ورا..
وان شاء الله الحجر البيلاقيكم بتجدعوهو برا التقنت؟
ومناجلكم المطرقات عند سليمان ديل الداقيهم ليكم منو؟
ومبرد وللا سيخة بالة؟..
ومسعول من الخير..ود الطاهر دا موقفنو بعيد مالو
خايفين عليهو المنجل يجرحو وللا خايفنّو يقب البرسيم؟ :D

متوسد اهداب الكِيم راجيك..

حميد..

amine

16-01-2006, 01:49 AM

أجماعة هوي أني الليلي ماني قايم من بحلتي دي علا نشوف أم ضرع الخرفت و ما طلقت دي بتمشي وين ؟؟ كان راجية أب سنكيت البعاتي علا نجيب خبرا الليلي ...أتلقاها شبعت أم فتفت و مرارة ساكت و بقت تهضرب بالبعاعيت ...مافي خروفن ضبحوهو في الحلي علا و شالت ضنبو ...أها أكلت الضنيبات كلهن و لما العصر جي و الغنيمات جن و قالن باااااااااااااااااااع لحميلااتن ...!!! أم ضرع قالت بوووووووووع و قضفت كل الضنيبات الأكلتن ...أها قامو ناس محمد ود جار النبي أخدوها للشفخانة الفي حلة ناس حامد ود اللعيسر .والحمار حق بلل ود منزل زاتو ما قدر ليها علا قعد يسوي طوط طوط طوط و الصديق ود أم شراحات ماسك ليهو المخلاية في أيدو و ملاني فيتريتة ...بس الحمار ما وقف ضريطو و يهز في ضنبو و حرن ..أتاريهو ما قادر يلكلم ويقول أم ضرع الماكلي الضنيبات دي تقيلي عليهو ...أها من الضريط الكتير عرفنا عنو الحمار حلف حليفي تاني ما يركبو أم ضرع فوق ضهرو ....(( البعاتيي )) ...
يا ربي أنا وين ؟؟؟
تحياتي يا حلوين ...
أمين

amine

23-01-2006, 03:00 AM

mohamed hemaid

23-01-2006, 07:47 PM

أها يا أخواني زي ما قلت ليكم ... أني الليلي ما قايم تب من بنبري دي علا نشوف أم ضرع دي تسوي شنو ...!!!! ماهيي بعاتيي عديل ... و يقوم محمد ود حميد يسوي ليها قعر ...بس أني الخايف منو ..!!!أنو محمد ود حميد دي يكون أب سنكيت ظاااااااااااتو , وأنقلب بعاتي ....(( الله ينجينا من البعاعيت )) أظهر يا بعاتي ....ولا عايزني أجيب ليك (( عكود )) ؟؟؟ هو عكود ظااااااااااااااااتو وينو ؟؟؟
يا ربي أنا وين ؟؟؟
تحياتي يا حلوين ...
أمين

:D :D :D
أمين أخوي..
والله يا امين ان بقى بنبرك من حبال اشميق بس ياك المدبر
والدبرة في حالتك دي بتقوملك في محل مابيحوو فوقو ولا
حتى الكي بينفعك زي دبرة الصرة..فدحين يا اخوي شوفلك شيتا لين ختو تحتك
يحميك من النمييل والعرق..
كان اب سنكيت ياهو حميد .باقيلك ام ضرع دي كان بتقبل عليكم
الخرابا قلنالك مابيفرز الليل من النهار ومابيخاف العمى..

انا غايتو شامي لي ريحة خبر قوي شديييد ..الله يستر لايبقى اب سنكيت ما مات..

الدبرة اسال منها عكود..
حميد..

amine

27-01-2006, 03:35 PM

هوووي يا بعاتي هووووي ما أني عارف أب سنكيت ما مات يا بعاتي أنت ...
يعني بعد الفلقصة سويتا فلهمة كمان ؟؟؟ أنت قايلني عندي (( أم جريطي )) ولا عندي (( أم جريطي )) ؟؟
أت بتخبر (( أم جريطي )) (( مع تعطيش حرف الجيم )) ...ولا قايلني عندي لصاقة الحمير ديك ...؟؟؟
بتتذكر أمهاتنا لمن كانن بقولن ..(( يا ود عيد تجيبو غليد )) و (( يا ود مضوي تجيبو قوي )) بس أوعى تقول لي ده الأسهال ظااااتو البصبق الكريرا ....ههههههههههههه
يا ربي أنا وين ؟؟؟
تحياتي يا حلوين ...
أمين

mohamed hemaid

02-02-2006, 05:22 PM

ــ القمرا قدرت بعد تعب وطلاع روح تمرق رويسا بين سعف جريد تمر البحر الطوال..هجمت علي الضلام زكتو وماخلتلو غير وليداتو الكبار منزوين تحت الحيط وداخل البيوت المافيها فوانيس..النجيمات الماتمّن ساعة من مرقن غتّن وشياتن بي الشاش الشفاف..ضل حقة الصعوط الراقدي جم كراع العنقريب انشرّا واتشعبط حيطة القاطوع مباري شخبطة ضفور الكديس المباري الكيمي..
أم ضرع ــ سرحاني في ضل الحقة وشخبطت الكديس الخربت اللياسي ـ:
والله آحبيباتي كان لقيتلي حقة قدر دي مو كت سويت البدع مع ود البتول البوم..وحات قعدتي المعاكن دي الشغلانيي كاسري معاهو ومابيعرف يوقع الحكايي ..بي شلن يملالك الحقة كان صغيري وللا كبيرة جردل زرد لي خشما بو وبوم..
الضحّاية ــ فرهدت وفتحت عويناتا من بعد الوقعة الدايري تودرا ــ:
انتن في دا وللا في ود العجب البوم التاني كمان..ديك النهاريي رسلتو لي الدكان يجيبلي شريط لي لمبتي أم ضنيب دي..مشى وجاني مالي ايديهو طحنيي قال ما لقى الشريط وبدل مايجي فاضي ايد ورا وايد قدام جاب الحلاوة دي معاهو..كمدتلو خشمو بي حجير منّها والباقي قمت عليهو براي دفستو في بطني..علا الشريط كيف كت مغرودة فيهو..لكن ترا قمراة الله في..
الحلوب:ــ
اتاريك واتاريك ماكلالك طحينيي وقمتي تتهاتي علي اب قرن ماتتاخر وتعال بدري..سماحة يا وللا دايراك في غرد..هه..وااحلالي عليك متغذي وسجم خشمو اب قرن الليلي ..عليك الله كتريلو في المويي عضامو لاينشفن..
أم ضرع ــ ماها ناسي شمار الخبر المالي البلد علا الكلام دا بقالا سمح ــ:
هيييي هيييي الضحاية القدامكن دي ماها دايرالا علوق من برا ..الخرابا داخلي مارقي تقرمش في التمر وواقعي القنديل العاول..والله دا كمان فيهو شيتا يقول للطحينيي جاي من وين..يااا حليل أب سنكيت بعد العشي يخت ربع الشوال جم راسو وياكل لامن تفج يعدمو الحبة..وكمان ان بقى بلوهو باللبن يسوي البدع ويخلي الفتيات جاريات في الشارع يقابضن في البطان..أسّع دحين لايبقى ماكلات الخلطة دي جيتن تتخابتن كدي؟
العرجي ــ كاشتي من المزيرة وضلها وصل قداما ــ:
اها جيتكن..واسمعني يا أم ضرع والضحاية..انتن مالو كل ما أجي مزيرتكن دي مابلقا كوز الجن دا؟ الله يقلع الكيزان الكان في دوبن العطش داير يكتلنا..حكم الزمن حياتنا بقت معلقة في الكيزان..يعني الواحدي كان خانقا عضم مو ياها الفاتبها الفوات في دوب الكيزان ديل..أها علا في الآخر قرفت بي ايدي ديل شربت علي الاقل ضامني طهارتن اكتر من الغيبران..ويا أم ضرع دحين في واحدي برّدتلك بطنك بالخبر المالي البلد وللا راجاني؟
الحلوب ــ جابتلها رجفة ــ:
لا وحاتك في رجاك..أنا غايتو بخجل التكنو الكلام دا بيخسني وكدي..
أم ضرع ــ مستغربي في كلام الحلوب ــ:
خجل شنو كمان آالحلوب؟ من متين نزل عليك دا ؟ حكيك اللاورا البي يشيّب الراس داك كلو نسيتيهو؟ التقول داير يعرسوك..عجبي لي حيرتي ..
العرجي ــ تختف الحديث ــ:
والله يا أم ضرع انك ختيري..قرّبت تعرفيهو ..ويبقالي كدي الخبر طاقش اضانك بس براك عاملالنا ماك عارفي الموضوع..دحين أسمعي اللوقعو ليك سمح..الليلي عند الفطور ظهر الزواري في البلد..وبي عند جبيلات الحليلي جاء طالع..
أم ضرع ــ مهجومة قعدت في الواطة وايديها فوق راسا وقميصا متعلق في كراع العنقريب ومرفوع فوق لامن سير المحفضة العند ضلع عضم الضهر ظاهر ــ:
الزواري بي شحمو ولحمو ؟!! والله بختك يالحلوب بعد ما اتكسّر واترضرض وقلنا مابتقوملو قايمي جا نصيح بي كرعي؟!! أها المرة دي أمسكي فيهو قوي بي ايديك وكرعيك..وان شاء الله لاقيتيهو؟!!
الحلوب ــ للليلي ترجف ــ:
أيي لاقيتو ملاقاة السرور..وحاتكن ضماني عليهو قالدني لامن ضلعي طقطقن..علا أب قرن الله يقلعو جا جاري زي الشيطان من وين آبعرفو..وقطع علينا الاستمخاخي..الكان اتاخر في جيتو ثانيتين بس كان عفيت منو دنيي وآخري..لكن اللقولكن دا..عن فكتو لي همس لي وقال بيدورني في موضوع..ان شاء الله عاد ياهو الفي بالي..الله يديني الصبر آخياتي لا باكر..أريتو يفتح خشمو مع أب قرن الليلي..مو ياهو ولي أمري..
الضحاية ــ نطت التقول قرصتا عقرب ــ:
كلو شئ ولا أب قرن دا الليلي..باقي دايراهو بالو رايق وهادي..ودحين الليل مو فلل عليكن؟ كيف نعسانين ودايرين الرقاد من بدري..
الحلوب :ــ
قوماكن اتطلباكن الله..لاتدقنا وتعضينا السعراني دي..وباكر بلاقي الزواري وألم فيهو من تحت الواطة دي ..وكان حكيتلكن أضحكن علي..قومي آ الخبابا انسدي كاتمي كدي مالك لايبقي خاتي عينك عليهو؟..

ونواصل..

عكــود

08-02-2006, 06:47 PM

والله آحبيباتي كان لقيتلي حقة قدر دي مو كت سويت البدع مع ود البتول البوم..وحات قعدتي المعاكن دي الشغلانيي كاسري معاهو ومابيعرف يوقع الحكايي ..بي شلن يملالك الحقة كان صغيري وللا كبيرة جردل زرد لي خشما بو وبوم..

أحمد ود فضل السيد، عليه رحمة الله، قاعد قدّام دكّان التعاون الصباح وجات عربية جاهوري من تالا مساوي شايلي مروي، ملياني رُكّاب فوق وتحت .. كلما جاهوري يشوفو راجل وللا مريتن بي شفّعا .. يقيف ويشيلُن برضو والعربية تمشي لي قدّام، جاهوري كان راجلاُ طيب وما بيكسرلو خاطر زول، الله يرحمه ويغفر له. أها أحمد ساعة شاف العربيّي ومع إنها ملياني برضو تشيل الناس البيقيف لهن جاهوري، قال:
والله عربية جاهوري دي مِتِلْ حُقّة الصعوط، البي قِرِشْ يملاها، والبي شِلِنْ تشيلو.

لكن يعلم الله جاهوري كان لاهو بَوْ ولاهو بُوم ..
إلا زولاُ مبروك بالحيل،

واصل آ حميّد ..
متابعين وبشغف،

عكــود

mohamed hemaid

09-02-2006, 01:53 PM

عكود أخوي..
يا سلام علي مرورك الرائع روعة بص جاهوري..

والله عربية جاهوري دي مِتِلْ حُقّة الصعوط، البي قِرِشْ يملاها، والبي شِلِنْ تشيلو.

:D :D
سعال واقوم جاري..
كنت بتركب جوا البص وللا مصطح ( يوم الخميس)؟ :D

حميد..

mohamed hemaid

09-02-2006, 01:56 PM

اها خليكم زي الملكي دي واحد مايجي يفتح خشمو .. يسكت يقرا ويمرق !!

وكدي نكمّل لحميد والعرجي فهمن

نناشد الملكة برفع الحظر المفروض علي ام ضرع
والا.... :D

حميد..

ملكة سبأ

11-02-2006, 12:31 PM

نناشد الملكة برفع الحظر المفروض علي ام ضرع
والا

كمان شوفو المصيبة الجاي تقع فوقا الملكي :( ؟!

انا قلت يمكن ام ضرع حردت وخلتو للفلانيين الخرفو وطلقو :D

ولي دورين بجي اتاوق واغني :
ياروحي كنتي تدخلي وين كان الله ماخلق الصبر ؟!

القمرا قدرت بعد تعب وطلاع روح تمرق رويسا بين سعف جريد تمر البحر الطوال
ويالقمرا كنتي تدخلي وين كان الله ما خلق التمر :o

mohamed hemaid

12-02-2006, 07:12 PM

ولي دورين بجي اتاوق واغني :
ياروحي كنتي تدخلي وين كان الله ماخلق الصبر ؟!

ويالقمرا كنتي تدخلي وين كان الله ما خلق التمر :o

وانا بمد راسي بالطاقة واكورك:

ويالعرجي كنتي تطلقي وين كان الله مافكّ الحظر.. :D

حميد..

mohamed hemaid

28-02-2006, 02:41 PM

ـــ الدنيي نصة نهار..البيوت خاتات ضلهن تحتن وراكطات فوقو..حتى الليمونة حالفي وداخلا قسم ما تمرق ضلها لا برا التقول بقى بي قروش..تلاتة فريخات طيرة لابدات في الجحر الحافراهو امّهن تحت شقيقة السيسبان المزروقة جديد بدل القديمي المسكتا الارضة..خيط الدموريي المدلدل نازل من العش راكات فوقو ضبانتين ضكر وانتايي مترادفات فوق بعض يطيرن ويركن كلما ام الفريخات تجي شايلالا دودي في خشما..أم ضرع تعاين للعرش..الضحاية راقدي ورافعي كرعيها على الحيطة تهبب فيهن..الحلوب سرحاني ترعى في غنم ابليس ومرة مرة تفقش سنونا..العرجي تطبقلهن في جبنة النهار مع التمر اللصفر..الخبابا شايلالا شوكي تمرقبها في عقاب الجضل الطامسلها في كراعا..ـــ
أم ضرع ــ زي مهجومة وجقمة البن الكبيري حارقاها في حلقا ــ:
والله آحبيباتي كيف محنني الفريخ الصغير دا..عليكن الله شوفن اخياتو حاقراتمبو كيفن عند اللكل..يدفرنو لا جوّا وحاماتنو ياكل رزقو ..الله يعلم يعيش..وان بقى عاش يبقى زي ود السرّة مسولل وضعيّف ان قلتيلو هوف يقع..يعلم الله كان لقيتلي شافعا نزّلو لي من العش علا اربيهو وأدغلبو لامن من الحمام ماتفرزنّو..
العرجي ــ مادي فنجان الجبنة للضحاية وتمطّق في خشما مستغربي في كلام ام ضرع ـــ:
والله آ أم ضرع فايقي ورايقي..كملتي العندك كلو ودايري تقبلي علي ترباية الفريخات؟؟ ياهو الفضل كمان..ويا الضحاية امسكي جبنتك دي قبّال ما أرجعا..ايدي وجعتني وانتي راقدي ومتشتحي ..هو الهواء وينو البي يتشتحولو ؟؟ الله يدينا ليهو نتنفسو في بطنا دي..
الضحاية ــ من محلها ما اتحركت وكانو الكلام مو ليها ــ:
انتي حاسداني مالك علي رقدتي دي؟؟ ختي الجبنة عند راسي وكفاك فصاحة..خليني اللهبب المحلات الموكرة دي قبال ما يجي زول داخل..وقومي آ الحلوب باقي انتي خفيفي أمشي تاقي باب الحوش داك لا يشوفونا الماشين بي شارع الله..
الحلوب ــ فرحاني بي قولة خفيفي..خفست سريع لي قفل الباب وجات راجعي متمحني ايدها تحت حنكا ــ:
وآ حيتي وآحيتي دا شنو دا آ الضحاية؟؟ عنقريبك في الحوش البي غادي راقد لا يوم الليلي تحت الشمش؟؟ ودي سواة شنو دي المغتسي كرعين العنقريب الاربعة لا نصّهن في واطاة الحوش المدككة؟؟ اتاريك بي سببك ضبلاني ورافعي كرعيك للهواء..قومي انسندي وامشي دخليهو لا داخل الشمش لا تاكلّك حبالو..
الضحاية ــ في رقدتا ما زحت ــ:
كفاك أحشي..انتي قالولك تاقي الباب وللا اتفقدي الحيشان؟؟والله قمت عليهو صباح الرحمان واتلّحت دايري أقلعو من الواطة واديرو علي الضل..مو كرعيهو حلفن وقسمن ما يجن منسلات..علا اب قرن يجيهو يقلعو الشئ دايرلو مروة..مو بركة الماتكسّر..وكمان كان خليناهو وطبقنا فوقو الليلي بس قولن ياهو الغاتس لامن يتساوى مع الواطة وبعد داك نرايملنا فوقو قليبة رملة ونواسيهو مع الحوش..
أم ضرع ــ تتفاخر ــ:
هو كان قالولك كدي؟ أنا يا يمة مع أب سنكيت علا نختلنا تحتو وقايات فحال ما يطمس..وكان مو كدي كان راح ضراعين تحت الدايمي..وأسمعن كلامي دا ولا تمرقنو لا برّا شئ ..حكتو لي ويحيدتن مابقولكن اسما..قالت ود السرة المسولل داك تعرفنو؟ قالوا كان مابي العرس علا امو جبرتو عليهو وعرستلو بت علويي المشلّخة..والمسكين قايل العرس بس ياهو اكل وشراب..وبت علويي اخير منها هو.. ليسي وما تعرف التكتحا..الاتنين ماهن جايبين للدنيي خبر يكلو ويشربو و..
العرجي ــ تهب في الجمر وتقاطع ام ضرع ــ:
هييي هيييي كضبتي في محلك دا..ييدا عندهن ولد كبي راكب حمارتو طالع ونازل..اها جابوهو بالهواء؟؟
أم ضرع ــ تقعد علي حيلا فوق طرف العنقريب ــ:
كدي أقيفي اللكملّك كلامي ولا تقاطعيني شئ.. سب فوقك..ولدن القلتيهو دا جابوهو بعد كم سنة من العرس ؟ مو بعد خمسة اعياد ضحيي من عرسن؟؟وقولي ليكن دا قول نجيض ومؤكد وماهو كلام خارم بارم..أها الاتنين رقادم في حوش واحد علا عنقريب ود السرة في ركن وبت علويي حارسي الركن التاني..وماكن طارات التور الجابو ود عشرة للجزاري وكتين انطلق في الليل ودخل علي بت الكرب نايمي اداها كم نطحات كان داير يلحقا امات طه علا الناس لحقوها؟؟أها اليوم التاني ليهو بت علويي نايمي في ركنا وحلمت انو التور زاكيها وقامت من عنقريبا مفزوعة وجري علي ود السرة النايم في شرق الحوش ورب وقعت فوقو ..الوقعة الياها..وأكنّكن عدنّها وأحسبنّها سمح..تلقن كلامي دا في محلو..اها التور انطلق قبل وفاة العجمي بي يوم وولد ود السرة امو ملصتو قبل ما امرق من الحِد بي دورين..أها مو ياها التسع شهور وعشُر ايام؟؟وانتي آالحلوب عرستيهن اربع عرسات وما جبتيلك بطان ..لايبقى ماك عارفي شئ كمان؟؟,واصبري لي الزواري لاقيتيهو صباح الليلي وللا بي ليلك داك لميتي فيهو؟؟
الحلوب ــ تقلّب في حوجبيها ــ:
في الليل لاقيتو ودان صباح الليلي كمان..علا الحديس النجيض بديكن ليهو باكر دغش..

ونواصل..

أبو الحسين

28-02-2006, 03:45 PM

ـــ في الليل لاقيتو ودان صباح الليلي كمان..علا الحديس النجيض بديكن ليهو باكر دغش..

ونواصل..

الغالي ود أخوي حميد...

تلاقي النبي في الشرق يا الله... قول آمين...

الله يجازي محنك... :) :mad: :p :)

ويا الله تجيبك يا باكر دا ونبقى طيبين...

لك التحية والود... ويلة راجين الحديس النجيض مو ني...

أبو الحســـــــــين...

خالد الحاج

28-02-2006, 05:39 PM

كفاك أحشي..انتي قالولك تاقي الباب وللا اتفقدي الحيشان؟؟والله قمت عليهو صباح الرحمان واتلّحت دايري أقلعو من الواطة واديرو علي الضل..مو كرعيهو حلفن وقسمن ما يجن منسلات..علا اب قرن يجيهو يقلعو الشئ دايرلو مروة..مو بركة الماتكسّر..وكمان كان خليناهو وطبقنا فوقو الليلي بس قولن ياهو الغاتس لامن يتساوى مع الواطة وبعد داك نرايملنا فوقو قليبة رملة ونواسيهو مع الحوش..

ايام؟؟وانتي آالحلوب عرستيهن اربع عرسات وما جبتيلك بطان ..لايبقى ماك عارفي شئ كمان؟؟,واصبري لي الزواري لاقيتيهو صباح الليلي وللا بي ليلك داك لميتي فيهو؟؟

:D :D :D

الله يديك العافية يا حميد يا أخوي.
غايتو جنس وصفك ده يشهد الله وصف زول قاعد يتصنط للكلام أظنك يا حميد بس مباري العجائز
الله يجازي محنك.

عكــود

01-03-2006, 10:42 AM

الدنيي نصة نهار..البيوت خاتات ضلهن تحتن وراكطات فوقو..حتى الليمونة حالفي وداخلا قسم ما تمرق ضلها لا برا التقول بقى بي قروش..تلاتة فريخات طيرة لابدات في الجحر الحافراهو امّهن تحت شقيقة السيسبان المزروقة جديد بدل القديمي المسكتا الارضة..خيط الدموريي المدلدل نازل من العش راكات فوقو ضبانتين ضكر وانتايي مترادفات فوق بعض يطيرن ويركن كلما ام الفريخات تجي شايلالا دودي في خشما.
وما دام ياكلِن في الصفّوري معناها الدنيا صيف قبّال التمر ما يمرق (شهر 7)، ومتل الأيّام دي الخلِق بتكون مفلّسي والخُلق ضايقي .. جرورة الدكّان كِترت وراجين الفرج في التميرات الباقي لي حشّهِن شهرين، ده إن بقى ما أكلوهو أخدر ..
صنّانةً مِتِل دي يا حمّيد، البيكون حايم بي برّه واحداً من ديل:
زولاً جايي من التحتانيي .. صارّي عيونو من الشمس .. راكب حمارتو وطوريتو في مخلاتو وصحن قرّاصتو الفاضي، مقلوب فوقو الطِبيق، مع صبّارتو لافّهِن بي دِلِق توب الزراق الكان رابطين بو الصحن (باقي كان قرّاع)
زولاً نزّلنّو العربيات الجايات صادّات من مروي / كريمة
شفّع المدرسة راجعين ومتلمّين لهن في مزيرة سبيل ويورجقوا بلا الطويرات الكابسات المدينيّي
شافعاً مرسّل راكب دحيشتو عِرِي وبلا حبِل ومقارب بها وبي نقّيزتها بقى بلا إبرة مكنة الخياطة من شدّة ما قرّب لي رقبتها
عريبيي راكبي فوق شوّالة قشّها الملاني كُداد وقدّامها جرايد واقود، وحمارتا الخدرا ماشي علي مَهَلَتَــا وتنشاف من بعيد رِهاب رِهاب..

عنيقريب الضحّاية الله يقلع لو كريعاتو من الدلجي .. لا يلحق الّليل أم ضرع شي،

واصل يا حمّيد وانكت الحديس القِدَيّم مِتِل دي:كضبتي في محلك دا..ييدا عندهن ولد كبي راكب حمارتو طالع ونازل

عكــود

عكــود

05-03-2006, 07:39 AM

الخبابا شايلالا شوكي تمرقبها في عقاب الجضل الطامسلها في كراعا..ـــأم ضرع ــ زي مهجومة وجقمة البن الكبيري حارقاها في حلقا ــ:
غايتو وصّافاً ..
التقول حسّاني (في الوصِف بس!)،

وينك؟

عكـــود

mohamed hemaid

06-03-2006, 03:18 PM

الغالي ود أخوي حميد...

تلاقي النبي في الشرق يا الله... قول آمين...

الله يجازي محنك... :) :mad: :p :)

ويا الله تجيبك يا باكر دا ونبقى طيبين...

لك التحية والود... ويلة راجين الحديس النجيض مو ني...

أبو الحســـــــــين...

الغالي عمي ابو الحسين..
الظاهر عليك ناسي غتاتة ام ضرع..وتشيل وتتمنى
في يوم باكر..وماعارف انو يوم الخرابا دي يكاد
يكون مقداره اربعون الف سنة..خم وصر وانتظر.. :D

ومابتخزلك..

حميد..

mohamed hemaid

06-03-2006, 03:30 PM

:D :D :D

الله يديك العافية يا حميد يا أخوي.
غايتو جنس وصفك ده يشهد الله وصف زول قاعد يتصنط للكلام أظنك يا حميد بس مباري العجائز
الله يجازي محنك.
ود الحاج اخوي..
الحكايي ومافيها ملخبتة شوية صنيط علي زيادة
خرف مخلوط بي قليل من الطلقان..العجائز ديل بيتونسو
والرادارات شغالة تلتقط وقالوا علينا صغار ما فاهمين.. :D

بيني وبينك..
اخوك قالع الكلام دا من راسو ولا علاقة للعجائز به..

حميد..

mohamed hemaid

06-03-2006, 03:44 PM

وما دام ياكلِن في الصفّوري معناها الدنيا صيف قبّال التمر ما يمرق (شهر 7)، ومتل الأيّام دي الخلِق بتكون مفلّسي والخُلق ضايقي .. جرورة الدكّان كِترت وراجين الفرج في التميرات الباقي لي حشّهِن شهرين، ده إن بقى ما أكلوهو أخدر ..
عكود اخوي..
والله ومن غير مبالغة انا كنت بكتب وفي راسي
لفت كل الحاجات الذكرتها دي..بس قدمت علي
كلامك دا بي 15 يوم ..ماها كتيري..ومن ناحية اكلوهو اخدر
دي ..اكلوهو مر بي مويتو..
صنّانةً مِتِل دي يا حمّيد، البيكون حايم بي برّه واحداً من ديل:
زولاً جايي من التحتانيي .. صارّي عيونو من الشمس .. راكب حمارتو وطوريتو في مخلاتو وصحن قرّاصتو الفاضي، مقلوب فوقو الطِبيق، مع صبّارتو لافّهِن بي دِلِق توب الزراق الكان رابطين بو الصحن (باقي كان قرّاع)
زولاً نزّلنّو العربيات الجايات صادّات من مروي / كريمة
شفّع المدرسة راجعين ومتلمّين لهن في مزيرة سبيل ويورجقوا بلا الطويرات الكابسات المدينيّي
شافعاً مرسّل راكب دحيشتو عِرِي وبلا حبِل ومقارب بها وبي نقّيزتها بقى بلا إبرة مكنة الخياطة من شدّة ما قرّب لي رقبتها
عريبيي راكبي فوق شوّالة قشّها الملاني كُداد وقدّامها جرايد واقود، وحمارتا الخدرا ماشي علي مَهَلَتَــا وتنشاف من بعيد رِهاب رِهاب..

اها عليك الله اسع الوصفو حساني منو انا والله انت؟؟ :D
وقدر ما فتشت لي زولا اقول ليك حايم في النهاريي دي لقيتك
كلهم قلتهم..ويا عملاتك..ما خليتلك فرض..انت وكتين عندك المتل
دا ماتسعفنا بيهو.. عنيقريب الضحّاية الله يقلع لو كريعاتو من الدلجي .. لا يلحق الّليل أم ضرع شي،

في انتظار عودة آدم ( اب قرن ) يقلع العنقريب
دا اذا الضحاية ما وقفت وقالت بالالماني..
( zugabe::zugabe::zugabe) :D

حميد..

أبومناهل

07-03-2006, 08:33 AM

المبدع / محمد حميد . . .

إنت عارف من زمن سودانيات البرتقالية أنا قاعد أجي أتاوق وأتصنت في الحكاوي دي . . وبراحة أنسرق أمش

ولا حس ولا خبر . . وأضحك وأكتم الضحكة ما تمرق من خشمي . . . إلا كان عاينت لي تلقي ( كرشي تتهوزز من

الضحك . . . بيني وبين نفسي أقول أها أكان إتكلمت أقول شنو ؟ ؟ ده قمة الإبداع لا نملك إلا الحضور

والإندهاش لهذا الإبداع الذي يندلق في بساطة وحميمية نادرة . .
إ
لا الليلة قويت قلبي وقلت كدي النخش ( شمال ) . . بس إثبات حضور ليس إلا ( علا والله مداوم هنا ) . . . معاينة

سااااكت وضحك . .

تسلم والله يديك العافية ويقويك . . .

mohamed hemaid

10-03-2006, 10:49 PM

ابو مناهل اخوي..
يا سلاااااااااااااااااااام علي مرورك دا..وتستحق عليهو
قلادة ام ضرع يا سماحتا في الرقبة معلّقة..
وتاني من هني ولي قدام لاتمد راسك بالطاقة وترجع
شئ..ختلك كلي كلمتين..واها جيتك لينا دي جابت معاها
البشارة..العشرة حلقات الراحت مني في سودانيات البرتقالية
ربنا جمعني بيهن ــ الحلقات الاولى ــ وبنزلن هديي بمناسبة جيتك دي
ان شاء الله ..ماك زولا هين..
وأضحك وأكتم الضحكة ما تمرق من خشمي . . . إلا كان عاينت لي تلقي ( كرشي تتهوزز من

الضحك . . . :D :D :D
تاني وكتين تجي داخل لاتملى كرشك مويي..وتعال اشرب من زيرنا البارد دا..

mohamed hemaid

10-03-2006, 11:30 PM

ضاعت الاجزاء الاولى مني ومن سودانيات ايام الهكر
وبحمد الله لميت فيها..ام ضرع الخرفت وطلقت كانت ناسي
محل داساهن..ولقتن في مراح الغنم والنعاج ماكلات نصهن :D

بوست الجزء الاول..
http://sudaniyat.net/vb/showthread.php?t=1634

حميد..

mohamed hemaid

21-06-2006, 10:08 PM

قلاعاً يقلعا..

عزبتني عزاب لامن لقيتا والفي راسي راح..

جدول سائل مابتنقطع مويتو..

حميد..

أبو الحسين

22-06-2006, 05:58 AM

قلاعاً يقلعا..

عزبتني عزاب لامن لقيتا والفي راسي راح..

جدول سائل مابتنقطع مويتو..

حميد..

ود أخوي الغالي أبو أحمد...

قلتي جدول سائل مابتنقطع مويتو!!!

الله يجازي محنك يا اخوي...

وينك يا راجل قاطع وصــــــــــالك؟؟؟

ليك وحشة كبييييييييييييري كما شوقنا ليك...

وشنو دا كاس عالم ولة قيامي قايمي التقطعك قدر دا... إنت عارف في البلد هناك الناس قاعد يقولوا شنو عن كاس العالم العندكم دا؟؟؟ ناس حسن دقنو وأحمد يوسف؟؟؟

بوريك المرة الجايي اليوم داك طبعاً إلتقيت بمجموعة على الهواء مباشرةً وشَدِّينا فوقك!!! لوووووووووووول!!! ;) :D :confused: :rolleyes:

لك ولأم أحمد مودتي كلها بلا حدود...

أبو الحســــــــــين...

mohamed hemaid

23-06-2006, 01:22 PM

ود أخوي الغالي أبو أحمد...

قلتي جدول سائل مابتنقطع مويتو!!!

الله يجازي محنك يا اخوي...

وينك يا راجل قاطع وصــــــــــالك؟؟؟

ليك وحشة كبييييييييييييري كما شوقنا ليك...

وشنو دا كاس عالم ولة قيامي قايمي التقطعك قدر دا... إنت عارف في البلد هناك الناس قاعد يقولوا شنو عن كاس العالم العندكم دا؟؟؟ ناس حسن دقنو وأحمد يوسف؟؟؟

بوريك المرة الجايي اليوم داك طبعاً إلتقيت بمجموعة على الهواء مباشرةً وشَدِّينا فوقك!!! لوووووووووووول!!! ;) :D :confused: :rolleyes:

لك ولأم أحمد مودتي كلها بلا حدود...

أبو الحســــــــــين...
ابو الحسين عمي..
يسال منك الخير ..
كاس عالم شنو يا زول انا كنت بقطف في نتاج
ضربات الجزاء بتاعت السنة الفاتت.. :D
بعدين تعال هني مالو شغلك كلو داير تورينا ليهو باكر
والمرة الجايي..الناس راجية منامك لايوم الليلي بي هناك..
والله مشتاقين لي تعليقاتهم ورملاة حبوبتي سرورة

تحيات ام ( احمد ورؤى)
حميد..

أبومناهل

07-03-2007, 04:06 PM

مبدعنا الغالي / حميد
شوق بحجم الوطن ...
خليك مننا نحن
أم ضرع دي ذنبها شنو ؟؟
( فرقتك ما بتنسد ) ...
منتظرين ... وواثقين
تحياتنا للعيال ...

mohamed hemaid

03-09-2007, 11:01 PM

مبدعنا الغالي / حميد
شوق بحجم الوطن ...
خليك مننا نحن
أم ضرع دي ذنبها شنو ؟؟
( فرقتك ما بتنسد ) ...
منتظرين ... وواثقين
تحياتنا للعيال ...
الغالي ابو مناهل
شوق بحجم سودانيات..
ماذلت اضحك (وتجلبق) بطني حين اتذكرك
تضحك (وتجلبق)..:D
وجودك هنا له طعم خااااااص

طعم:
تمرات صفر..

ام ضرع كشجرة الحراز..
ولي عودة..

شليل

04-09-2007, 07:19 AM

ناصر يوسف

04-09-2007, 07:49 AM

محمد حِميد
سلام
عوافي
شوقنا أمده طال
يلاك أكتب وأكتب وأكتب وأمتعنا بحرفك الندي
يمينك لا توجعك يا أخوي

عكــود

04-09-2007, 12:32 PM

والله أيااااام يا ام ضرع . .
دحين يا حميد . .
هلّ هلّ على الجد،
و على حكاوي ام ضرع،
قبال رمضان يدخل
ونبقى في جرّيح صيام

mohamed hemaid

05-09-2007, 09:35 PM

حميد: تعرف إنو كتابتك تخلي الواحد يخرم

وشعاع نورك يجهر العيون ويفك الخرمة..
مرحب بك في حوش ام ضرع..

هدية..
سفة بعد فطور رمضان:D
ولاتروح يا شليل وخليك قريب

mohamed hemaid

05-09-2007, 09:40 PM

محمد حِميد
سلام
عوافي
شوقنا أمده طال
يلاك أكتب وأكتب وأكتب وأمتعنا بحرفك الندي
يمينك لا توجعك يا أخوي

ود يوسف اخوي..
ويلاكم نغني ونغني ونغني فرحة بالبعيد الجانا..
ويشهد الله يا ناصر ضربت ليكم كم مرة وكل مرة
بيرن لاحدي ما يقطع..بس ما تسالني متين فقد صعب
عليّ عد الشهور..

ساكتب بي قلبي حتى لا تفتر يميني..

mohamed hemaid

05-09-2007, 09:45 PM

والله أيااااام يا ام ضرع . .
دحين يا حميد . .
هلّ هلّ على الجد،
و على حكاوي ام ضرع،
قبال رمضان يدخل
ونبقى في جرّيح صيام

:D:D:D
يا حليلكم والله يا عكود..

اتريد يا هذا ان تخم الرماد من تحت صاج ام ضرع؟:D
جريح الصيام هيّن الكلام قد اليوم..

طلبات الهلّ هلّ مجابة..

mohamed hemaid

05-09-2007, 10:01 PM

ـــ الجداد يكاكي, الديك يعوعي ,الغنم تكورك, القعو ساد خشمو بي طين الجدول
السماء لبست توب الحداد القمرا تشكو قلة النجوم حواليها, حتى الكلاب والصبار
ما زيّنت هذه المغربية بنغمات صوتها الجميل ــ
الضحاية ـ لاوي خشما باستغراب مع قليل من تمطيق الشلالفيف ـ:
يا يمة دي مصيبة شنو الوقعنا فيها دي؟ يعني الواحدي ان بقت دايري تحجيلا شُفع
فشان ينومو تحجيهن متين؟ كُر كُر ,آام ضرع ما تقولي شئ؟ مالك متمحني وخاتي عينك
في الخرابة دي ؟ بي تعمي, انت ماك سامعي بي جر النور الطويل البي يعمي؟مو ياهو زي
بحليقك دا.
ام ضرع ــ تدعك في عيونا بالاصبع الكبير ــ:
اقول شنو واخلي شنو ؟ اخيرلي اتمحن وابحلق وبس اعاين بي عيوني ,الخرابات
ديل جو غزغزوهن لينا فوقنا حمننا النوم , اسع عليك الله آ الضحاية ان بقى عندك تميرات
ودايري تاكليهن بالدس تسوي شنو ؟ يبقالي كان اخيرلنا قبستنا وضلامنا كافين خيرنا
شرنا, والتميرات هينات الكلام ان بقى عندك غردن تاني مع اب قرن تفرّجي فيك خلق الله؟
:الضحاية ــ هم تفكيرها بعدم المقدرة علي الحجي زاد بهم فرجتها لخلق الله ــ:
اي والله كلامك في محلو, انت ماك سامعي الباب دا ينقر ليهو زمن ؟ كمان لايقولو علينا
تقينا وبقينا نعرف التعزز,
ــ الضحاية تفتح الباب , وتقالد العرجي والخبابا وتمد ايدا للحلوب ــ
الحلوب ــ اخر المسلمات علي ام ضرع ــ:
مبروك مبرك عاد آ أخياتي مو بقى ما عندنا فرق من ناس لافوق عليكن الله شوفن النعيم
البقينا فيهو عاد اوصفو ليكن كيفن؟ ما هو شيتا يتوصف وحاتكن , وا حلالي وا حلالي.
ام ضرع ــ تتفحّص في الحلوب من فوق لي تحت ومرة مرة تصر عيونا وتدعك فيهن ــ :
اقيفي هني انت قعد تشكّري في شنو ؟ والله حيرتيني معاك , دي واحدي والتاني
انت كتي وين جايانا مغبرنة ومكدنكة كدي ماك زي عوايدك ؟ دايما يا يمة متمسحي
ومندلّكي الا يوم الليلي دا, والقش الخاماهو معاك في هدومك دا جاك من وين في الليل دا؟.
آيمة ماك نصيحي كدي قرّبي قريب, عليك غباش التاباني كُتي ماخدالك عومة في بحر الدميري؟
ودا درب اصابعين منو الفوق جسمك دا؟ آخرابا لقيتيلك محل مضلَم وين سوقتيهو عليهو؟
الحلوب ــ تقلَع في توبا وتتفحَص في شخبيت الكديس في جسما ــ:
آسجم الرماد الليل ماك براك كدي براحة علي, وشوي وشوي.
الضحاية ــ تختف الحديث وتلكد العرجي بي كتفا ــ:
ام ضرع دي الليلي تحك في عيونا من المغيرب هردتن هريد بالدَعكي, والله علا يصبحلَها
مقضَيات ووارمات ويتلمن عليها الاتنين العمى والطرش.
ام ضرع :
الطرش اليطرشك سويتيني طرشاني كمان؟ ييدي مالي؟ واكان طرشاني زي ما قلت كان
كل يوم حكيتلك سواتكن اللت الليل انت واب قرن؟ وارجي الجاييك من يوم الليلي ولي قدام
تاني احكيلك ليلك كلو يالصوت والصورة .
الخبابا ــ انشرقت بي جغمة المويي الفي خشما ــ
اي وآحيتي , دا كلام شنو دا آ ام ضرع؟ انت كمان قعد تتلبَتي؟ آ يمة عيب التاباني,
العرجي:
والله آ الضحاية مع اني ماني عارفي لكدتك لي في شنو علا بشوف اتهامك لي ام ضرع
بالطرش ماهو في بكانو شئ,ما ليكي حق والله .
ام ضرع ــ تمرق السفة وتبصَق ــ:
هيييي لا تخرتنَو صفق اخدر واقيفن اللَوقعو ليكن, حس الضحاية يجيب الطاش وماهو
دايرلو سمعا نعيم, ولبيد شنو البتلبدو بي عقاب عمري دا؟ انا قاعدي في محلي دا تجيني الصورة
قولن لي كيفن؟.
كلَهن وبصوت واحد ــ:
كيفن؟.
ام ضرع ــ تتعدل في القعدة وتدي حوش الضحاية نظرة ــ:
الكهرباء الجاتنا دي مو قالوا قويي ومافي اقوى منها غير نور الشمش؟ وعنقريب الخرابا دي
مو راقد تحت اللمبة الفي الحيطة ديك؟ اها قولن لي ضلها يمشي وين؟ مو ياهو يجيني هني؟
ينشر ينشر ويعدي بي فوق الحيطة ويخت عند عنقريبي دا, وعاد اشوفلكن التقلَب
الفوق العنقريب كلَو, واللوريكن كمان بقدر افرزن يعني ان بقيت شفت الضل بي شعيراتو
دي ياها الضحاية والتاني ياهوالخرابا اب قرن, شفتن كيف؟
الحلوب ــ ميتي من الضحك ــ :
والله بالغت آ ام ضرع أتاريك تدعكي في عيونك من بحليقك الكتير في لمبة النور؟
اي كدي مو سمح والله علا تعمي بالصح, وانا اقول الغباش الماني شايفاهو فوقي دا انت جبتيهو من وين؟
وبعدين تعالي هني ضل الضحاية البجيبو ليك شنو والحيطة فاصلاكم ؟ كمان الضل قعد ينط
بي فوق الحيطة زي حرامي الليل؟ مو ينشر ينشر ويموت في حوشو بي غادي لامن شاف لامن درى
واماني تشوفن الدنيي برَة كيف مولَعي بالكهارب, ومحلا مضلَم الزول يلاقي فيهو الزواري مافي
واظنَك آ ام ضرع اتهمتيني ساكت وقايلاني لاقيتو والغباش منو؟ سجم خشمي وسجم خشمي
ان بقيت سويتا.
العرجي:
انتن ما سمعتن الجوطة القبل شويي دي برَا؟ الرجال الجايين من صلاة العشي الفي الخلوة لمَوا
في الشفع نهروهن زين وكاتلوهن, أتاريهن قالوا لقوهن شايلين الحجار وحالفين علا يكسروا
اللمبات المضويات برَا كلََهن , قالوا احمنهن يلعبو كعود شلع والدسوسيي.
الخبابا :
اماني آخياتي عاد بنشوفلنا كتارة محن بالمصيبة الجاتنا دي, وانا السمعتو قالوا جنا الجداد
يرقد حب اطرش, قالوا النور الطوالي دا يلخبت الجداد لخبتة اولا شئ الديك آب ينوم
والجدادي ترميلا بيضة وتقوم من الحفرة تاني بطنا توجعا تجري جري علي الحفرة
وتختلا بيضة تاني , وصدقا لي كلامي دا اسمعن جدادكن يكاكي من متين حسو ما وقف
من انا جيت داخلي.
ام ضرع :
كترة البيض ماني دايرنها بلا يسويلنا الزلالي, وان بقت الكهرباء دي دايري تسوي
فينا معروف , التجبَدلنا التمر مرتين في السنة, اماني كيف مشتهالي اكل تمرات صُفر
في شهر اربعة.وكمان ان بقى جابولنا شارع اللسمنت بس يانا الطمعانين في تلاتة جبيدات تمر.
الضحايا:
كدي اقيفن اللمشي ارقد فوق عنقربي داك شوفن ضلي بيجيكن؟.

ونواصل..