محنة النبى لوط [الأرشيف] - سودانيات .. تواصل ومحبة

مشاهدة النسخة كاملة : محنة النبى لوط

تاج السر الملك

23-11-2007, 02:02 AM

ستيغما (2)
محنة النبى لوط

تاج السر الملك

ذهبن الى غير رجعة الأيام الزاهيات المذهبات لبقالات ( سفن-الفن) , فحتى اوائل التسعينات , و فتيات (هيو هفنر) صاحب ( البلاى بوى) , يقدمن البارد و الساخن , و المشوى و المقلى, على طبق من ابتسامات عذاب و تبهكن يملأ القلب حبورا و بلهنية , و يتمنين لك فوق كل ذلك ( نايس داى) , و جاءت على اعقابهن حسان اثيوبيا اللواتى يتقن كلمة ( نكست) , و الأصرار على الحديث باللغة ( النماستية) استدرارا للأعجاب , أو حياء من الأكسنت الكثيف , حتى انزوين جميعا فى ( قراشات) تحت الأرض, يقول الخبثاء ان المال فيها جزيل , أجزل من وظيفة فى ( ناسا) , ثم اتى عصر المحرمات المحجبات , من أرض الباكستان و الأفغان, و اولاء يكثرن من الأستغفار كلما مرت بين اياديهن علب البيرة الباردة , او ( حصان طروادة) المطاطى !!! اما عهد الهنود , فهو عهد الشك , فكل زبون حرامى حتى و لو كان قاضى المديرية , و الأنجليزية عندهم كما يقول صديقنا ( الرشيد) ( زول بتكلم و فى خشمو بلى).
و جاء اليوم الذى دخلت فى صباحه البهى , كعادتى لشراء القهوة, حتى فوجئت بتحية الجالس خلف الكاونتر
- سنو
- -سنو آفيا_ اجبت دون وعى
- آفيا كلو أنا زاكا أنا كجيا ...و حانت منى التفاتة فرايت لدهشتى الصاعقة , كورة ( القودوقودو) , و عليها صورة هلال رمضان , قابعة , ( مطرقعة ) فى صمت بجانب الميكرويف , وفم الرجل محمر , مصفر , من اثر مضغ ( القورو) , ...أمريكا رحلت مشت وين؟؟.. صرخت فى سرى يائسا ..بينما الرجل ( الكزو) يحدق فى وجهى , و كأنى بسيل افكاره الهادر , يلطمنى على وجهى ( الحبشى المعفن ده داير شنو)..وددت ان اجيبه ..انا سودانى اول حاجة..و لكنه لم يسألنى, فعملت على مجاهدة النفس كاتما رغبة ملحة فى الصياح.....كيس!!
- حز فى نفسى هذا المنولوغ الشرير لبرهة قليلة, قضى عليه شعور بالحسرة على ايام زمان , ايام كانت ( مانهاتن) مبنية بالجالوص, تمنيت حيث لا يجدى التمنى, عودة فتيات الغلاف الى مباشرة اعمالهن فى ( سفن-الفن) , و فتيات ( ايبونى) السمراوات , و على اسوأ الفروض , شباب أديس ابابا الباسل , او الكاريبيات اللائى ينشرح الفؤاد لخطى السالسا التى يمشين على ايقاعها. و اصابنى الأكتئاب العضوى الفورى , وانا اصطلى بالنظرات المكوة لعاملنا الجديد, و الذى اكاد اجزم بأنه لم يسمع فى حياته بكلمة ( كستمر سيرفيس) أما ( اليونيفورم), الأخضر المزوق بالأحمر فكأنى به يصيح من غربة ووحشة و حسرة لاعنا اللوترى و سنسفيله.
- عكفت فى الأيام التى تلت , مجدا فى البحث عن الأمريكيون , فما وقعت لهم على اثر, فكأنما انشقت الأرض و ابتلعتهم , وتخيلت كم من الناس احرجوا , حينما صرحوا بكثير من الفلهمة ( جيرانا بيض) , حتى افاقوا من النوم على رحيل البيض فى الصباح التالى, فكأنما حملتهم مركبة فضائية الى خارج المجرة, ثم سرعان ما تمتلىء المنطقة بمزيد من ( البنى كجة) , يفدون كاللعنة التى لا فكاك منها, و علمت فى بحثى , بهجرة الأفروامريكان الى الجنوب, حين لم يستقم لهم ود مع اى من المهاجرين , و خاصة اهل آسيا, حصدوا منهم ما حصدوا , و حينما اشتد عزم الشرطة و غرامهم الأزلى مع القهوة المجانية و ( الدونت) و الدفاع عن تلك المزايا حتى آخر رمق, هاجروا الى الجنوب بخيرهم و شرهم.
- و انتبذ البيض الأماكن القصية العصية, كتلك التى تصل فيها قامة الجليدعشرة اقدام او يزيد ,و الأربعون تحت الصفرتلك لا تجامل احدا من جنس غير ساكسونى مهما عظمت هامته , محولة اياه الى دندرمة, و قد علمت بعد جدى و جهدى فى البحث , اننا جميعا , اسايلاب , لوتراب و مزارعين , لابد و ( مصطكون) فى سوق واشنطون الشعبى الأكبر , فأسفرت البقالات الحلال عن مكنوناتها , زيت السمسم , و روائح ( الفرير دمور) و جنائن السيد على و الكافن كافن و عرق المحبة و سعوط الوطنية بحرى , و غير ذلك , شاشات الجزيرة الضخمة فى المقاهى و صورالمجازر المنقولة عبرها بصدق و تفان و انت تتناول طعام العشاء بلذة و شغف.
- نمت و فى خاطرى سؤال..هل هذه هى امريكا التى غنت لها البنات فى الستينات( الروك اندروك..والقمر الروسى) ؟؟؟
- ثم بدأ الأمريكيون فى زيارتنا من وقت لأخر, كانوا سواحا من الرسميين , جلهم من المفتشين و الجباة والمحامين ..صحة, ضرائب, و مخابراتية , فى المقاهى و المساجد وبينهم ( بنى كجة ) ايضا , و قد تداعت الخواطر المزعجة فى عقلى الى حد خفت فيه من اليوم الذى أفتح فيه ابواب منزلى فى صباح العيد لأفاجأ باهازيج ( ايدو مبارا الينا اليكم ..كل سنا مكو تايبين) , مثلما يفجئنا الساسة السودانيون , الذين تركنا البلاد لاجلهم ,و ملاحقتنا بمحاضراتهم الفجة اللزجة , التى لا تسمن او تغنى من جوع , ملتصقون على اعقابنا انى حللنا!!!حتى اصابنا ما اصاب صاحبنا الذى هاجر الى اقصى حدود ( السكا) , ظنا منه بأنه بعيد عن ايدى ( بنى كجة) , حتى سمع من وراء باب كابينة موارب صيحة ترعد منها الأفئدة....خمسين!!
- حكى لى صديق آخر خبر ادائه لقسم الجواز , بكثير من الزهو و النشامة , و كيف انه كان يردد نشيد السلام الجمهورى السودانى فى سره اثناء اداء القسم , فاعجبت ايما أعجاب بهذه العبقرية النادرة , , اجبت على قوسى عينيه الفارغتين بمزيد من الأطراء و انا كاذب حتى العظم , أشدت داخل القوس بما فعل , و اثنيت على الشطارة التى (فاتت) على اهل الجوازات و الهجرة , و ذكرته بأن قلوب و خواطر الأمريكان لا بد و ان تنشق ان علموا , فكم من ليال قضوها فى انتظارك, لتحل ضيفا عليهم , تعمل ليل نهار , لتستأجر منهم الغرفة التى تنام فيها , و تكترى السيارة التى تمتطيها , و حتى الهواء الذى تتنفسه, تدفع فى سبيله ضريبة ( الأيميشن), فأن (تمنتشت) عليهم , ارسلوك اهلك عاريا كما ولدتك امك!!!فأنبسط الصديق لقولى و همس فى اذنى ( الأمريكان ديل بلداء...ما تشوفن كدا) , و كنت ( اشوف) فى تلك اللحظة , المختصر المفيد , من قبائل العالم الثالث , متكدسون ما بين ( سمنارى رود) , و ( ليزبيرغ بايك) ..لا حلم و لا قدرة على الحلم , اقرب قليلا الى قول احدهم ( كاسرين ركبة)!!! و جال بخاطرى انشاد صديقى للسلام الجمهورى , ويده مرفوعة فى فضاء الغرفة , تمنيت لو انه تلاه بصورته الصحيحة , و ليس كما انشده احد لاعبى الفريق القومى لكرة القدم , حين قال ( يا بنى السودان..هذا جيشكم..يحمل العلبة..) الخ الخ..هى محنة اشبه بمحنة نبى الله ( لوط), الذى أرتبط اسمه بسلوك , قاتل ضده حتى النهاية , فما سمى حرم او شارع واحد بأسمه , و لا ادعى النسبة اليه احد.

ـاج السر الملك
-

YaSSeR

23-11-2007, 03:48 AM

[QUOTE= اما عهد الهنود , فهو عهد الشك , فكل زبون حرامى حتى و لو كان قاضى المديرية , و الأنجليزية عندهم كما يقول صديقنا ( الرشيد) ( زول بتكلم و فى خشمو بلى).
-[/QUOTE]

BiG SmILE

الله يجازي محنك يا الرشيد

بابكر مخير

23-11-2007, 12:07 PM

الحبيب تاج السر
محنة واحدة من محن يمر بها أحفاد تهراقا كل يوم

فيصل سعد

23-11-2007, 12:50 PM

سرد جميل يا تاج السر.
الحال هنا في كندا نفس الملامح و الشبه مع زيادة جليد عمت بشائره.

تاج السر الملك

24-11-2007, 02:14 PM

اخوتى
ياسر
بابكر
و فيصل
لكم ودى و تقديرى

فتحي مسعد حنفي

24-11-2007, 09:56 PM

تاج السر كيف حالك0
تصور لي كم يوم أجي حايم جنب البوست بتاعك أقول أتاوق تجيني خوفة أقوم زايغ
ياخي أختنا تراجي خلت الواحد يخاف يجيب سيرة النبي دا ذاتو احسن يقوم يجيهو اتهام
من حيث لا يدري ويكوس اليمرقو ما يلقاه0
الليلة قلت الحي الله والكاتل الله ونطيت لا جوة سريع عشان مافي زول يشوفني ولقيت
انه كلامك كلام لذيذ وما فيه حاجة من الحاجات البتخوف فحمدت الله علي السلامة وفت
قمت مارق وبعدين قلت يازول هسع كان زول ما قرا البوست دا ولقي اسمك فيه يقول
شنو0 طوالي اتذكرت المثل البقول البتبلبل يعوم رحت مسخن الكيبورد وأخدت لي سفة
لاني من ما قريت تمباك الوطنية الخرمة اشتغلت وهسع قاعد مستمخ بشكر في البوست
وتصور كنت عايز اكتب في بوستك خفت زول يقراها غلط فلحقت غيرتها في آخر
لحظة الي البوست0مش كدا برضو أحسن0
وبعدين تعال النسألك الجبرك علي العنوان دا شنو ماكنت تشوف ليك عنوان made in Taiwan
مش كان برضو أسلم0
يازول ولا يهمك وأي زول تاني تلقاه ليهو علاقة بالبتكتبو نزلو طوالي في العنوان
علي مسؤوليتي بس تعمل حسابك الهندي عز الدين ما يقراهو0
تحيات صالحات ودي احفظا يمكن يجوكم الاتراك
فتحي0

عبدالوهاب حجازي

24-11-2007, 11:55 PM

قوية والله يا أستاذ!
الزولة شافتني بضحك براي قالت الراجل ده جنّ ولا شنو.
شكلكم قريب جداً من الاقاشي.

خاتمة: جنس قصتك دي في القرية المجاورة زي ما بتقول دكتورة بيان كان عملت ثورة شعبية.
يلموا فيك قروب ايت G8 يرسلوك خلف الباصويرد زاتو..

يسلموا ها الايديات! ديل ما جاكوكم لسة؟

فيصل سعد

25-11-2007, 10:08 AM

يسلموا ها الايديات! ديل ما جاكوكم لسة؟

الاخ عبدالوهاب حجازي ، انت زلمي و لا مو هييييك؟
تحياتي

فتحي مسعد حنفي

25-11-2007, 10:26 AM

أها ياملك أخوك بعد ما اتخطي حاجز الخوف لقي نفسو قريب قال يديك غشوة تاني0
الحقيقة عندي سؤال ما لاقي ليهو اجابة ويمكن تساعدني فيهو0
انت العرب ديل لخباتين كدي مالهم!!الخلاهم يسموا الناس القالت عليهم أختنا تراجي
مثليين علي نبينا دا وينسبوهم ليهو شنو وأوعي تقول لي الحكاية بتاعة قوم لوط الماتوا
وشبعوا موت0يعني عندك أخوانك الخواجات نسبوهم للبلد الكان فيها الموضوع داك
وسموهم علي سادوم وما رموهم في النبي لانو هو ذاتو متبري منهم0
لو فكرت في كلامي بتركيز حتصل للأنا عايز أقولو الزول دايما بينسبو ليهو الحاجة
البتخصو يعني الاولاد بينسبوهم لي أبوهم أو للذين يتبعون مذهبهم وعقائدهم يعني
المؤمنين بجمال عبد الناصر والمبادئ حقتو بنقول عليهم ناصريين وما بنقول عليهم
مصريين أما من يتشبهون بالمصريين فديل بنقول عليهم متمصرين0
يبقي هنا الناس الباطلين ديل بننسبهم لنبي الله لوط ليه0وللا كيف؟
يازول أخير الواحد يفرمل قبال ما جماعة القرية الذكية المجاورة يجوا ناطين وما
نعرف نشرح ليهم انو الكلام دا ما زي داك0
المهم الباطل دا حقو نقول عليهو سادومي ويا دار ما دخلك شر موش؟
لوالجماعة بتاعين ال G8جو ناطين انا من هسع بقول ليك في زول سرق باسووردي0
والكلام دا ما لي علاقة بيهو0شاهد ياخالد الحاج؟

ناصر يوسف

25-11-2007, 10:46 AM

تاج السر يا بهيُ القلم الخيال

شكراً للطرح التحليلي المنطقي من واقعِ أنت تعيشه متكاااااااااملاً

وهو صحي بالله يا الملك ... هم الأمريكان ديل ظااتهم مشوا وين ؟؟

البلد (ماما أمريكا) إتملت باللوتراب والآفريكانيزم والآسيويييييشن والما تعرفوا داك

تاج السر الملك

25-11-2007, 09:03 PM

أخى فتحى مسعد حنفى
أها انت الكلام وقع ليك فى مداخلتك التانية
شفت كيف أسم نبى من انبياء الله ممكن يخوف كيف؟؟ و ده بالضبط الأنا عنيتو، فالنسبة الى النبى الحقت ستيغما بأسمه بالرغم من انه بعث للنهى عن السلوك المعين اياه فأصاب الناس الهلع لغير داع من مجرد الأنتساب اليه او تسمية حرم بأسمه و لا حتى شارع... بعدين تمباك الوطنية ده جبتو من وين؟؟ شكرا لك أخى على التليبة و هاك المدونة دى اقرا فيها
http://tajsudan.maktoobblog.com/

أخى عبد الوهاب
بركة الما قالت عليك مسحلب..نحنا اصدقاء شباب أديس الباسل

ناصر يوسف
و الله الواحد بقى يوم الأسنو ما يطلع من البيت من كترة حوادث سائقى المناطق الحارة ، غايتو رواندا بصمتا هنا ، و الفلبين و الأمازيغ و الدواريت ، وطنية بحرى زاتا جاية ، بقينا نشتهى الأمريكان نمشى نشوفن فى الويك اند ، وسط البلد ما تسمع غير حسين شندى ، و مناقل مناقل جنب شباك بوش.

فتحي مسعد حنفي

25-11-2007, 10:03 PM

أخونا تاج السر شكرا علي ردك الظريف واللنك الذي دعوتني لقراءته0
عن موضوع تمباك الوطنية فانا مقيم في القاهرة وكمان من بحري يعني في أي
لحظو بيكون عندي اتنين تلاتة كيلو ستوك للزنقة0
الكلام واقع لي من المداخلة الأولانية لكن أخوك جديد وما كان داير ينبهل وكلامو يكمل من مرة واحدة0

أما بخصوص الرابط فياخي حرام عليك انت داير الزول دا يقعد فوق نفسنا
لغاية ما يتقاعد؟
غايتو التمباك في لكن السنسميليا مافي وكان عندك زول ماشي ليك عن طريق القاهرة قول عوك برسل ليك معاهو مؤونة تكفيك كام شهر0
تحياتي

بابكر مخير

25-11-2007, 10:14 PM

أخونا تاج السر شكرا علي ردك الظريف
عن موضوع تمباك الوطنية فانا مقيم في القاهرة وكمان من بحري يعني في أي
لحظو بيكون عندي اتنين تلاتة كيلو ستوك للزنقة0
غايتو التمباك في لكن السنسميليا مافي وكان عندك زول ماشي ليك عن طريق القاهرة قول عوك برسل ليك معاهو مؤونة تكفيك كام شهر0
تحياتي

قبل كم يوم عرضو في ال bbc (قصدتا أكتبا بالصغير، لأنها معلوماتها صغيرة ومبتورة وملفقة، أتذكر العميد يوسف بدري كان مسميها سوبا من حكاية اللخبتا)
عرضو فيلم وثائقي عن المهدية والرابط هنا أنهم ذكرو أن خلال حكم المهدية كان البسجر والبسف بيجلدوهو والكلام دا معروف لكن زادو أنو لوفي راجل قبضوهو بيضحك بيقيم عليهو نفس العقوبة :D:D
طبعن الحكاية دي لبشتني، وإن كان عارف ناس كتيرين ما بيرتاحو للجايي
القصد يا الحبيب فتحي، السفة شينة ومكروها وممرضا
ولو عاوز تشوف زيادة نتلاقى في الديوان
الحبيب تاج السر ويا ملك سماح، نطيت زي المهبوش، مش كدا
لك التحايا

تاج السر الملك

26-11-2007, 12:39 AM

اخانا بابكر
الكلام ده انا سمعتو قبل كده و التكباك ادخلوه فى باب الحرمة أما الضحك ده ما عارف الفهم ليه شنو ..بعدين الهبشة سمحة ماتخاف منها.لك التحية

و يا فتحى
وين فى بحرى؟؟
انا منتشر بين حلة خوجلى و الميرغنية و حلفاية الملوك و قد تلقيت تعليمى الثانوى فى الخرطوم القديمة و الوطنية دى بعرفا تمام ( غشوات) و كده ، السنسميليا دى اشاعة مغرضة ساكت..حشاش بى دقنو
لك الود

بابكر مخير

26-11-2007, 12:56 AM

اخانا بابكر
الكلام ده انا سمعتو قبل كده و التكباك ادخلوه فى باب الحرمة أما الضحك ده ما عارف الفهم ليه شنو ..بعدين الهبشة سمحة ماتخاف منها.لك التحية

الحبيب تاج السر
كتر خيرك، نفيت عني الهبشة بأنك تجاوبتا مع المداخلة بتاعتي
الضحكة يا سيد أمك يا سيد أبوك (كلمة محببة ليا كنتا بسمعها من الوالدة) سببها حكاية أنو البيضحك كانو بيجلدوهو، تعرف لو كان كدا؛ كان الأمير النور عنقرة يسموهو (جلدة) من كترت ما كان إجلد.
مش السفة بس، كان معروف عن هذا الأمير البطل أنو بيشرب وبيسف وعلى قول سيدي خليفة المهدي:
في ناس أبتخاف ربها وما بتخاف خليفة المهدي وناس أبتخاف خليفة المهدي وما بتخاف ربها والأمير النور، لا بيخاف خليفة المهدي ولا أبتخاف (...) وعلى ذمة الرواة.
الحبيب السفة هي طبعن من التمباك وهو التباكو Tobacco والمادة الأساسية وهي مشترك في السفة والسجاير والشيشة هي النيكوتين.
آها الناس الإشتغلو في الحكاية دي قالو:
يتسبب تعاطي التبغ في:
إلتهابات اللثة وإصابات العضلات والذبحة الصدرية وآلام الرقبة والظهر وتحرك العينين الغير عادي وإصابة العين بالطفيليات وقرحة الإثني عشر ونخر(هشاشة ) العظام بالجنسين وعتمة العين والتهاب عظام المفاصل وعدم قدرة القضيب بالرجل علي الإنتصاب وقلة الحيوانات المنوية او تشوهها وسرعة القذف وقد يصل المدخن إلي العجز الجنسي، يضاف الي هذا التهابات الدورة الدموية بالأطراف والتهاب القولون والإكتئاب والصدفية وكرمشة الجلد وفقدان السمع والتهاب المفاصل الروماتويدي . و ضعف جهاز المناعة وفقدان الأسنان. وقد تصاب المرأة بالعقم والتبكير في سن اليأس . كما قد يؤدي الي العمي أو مايسمي بفقدان النظر بسبب التبغ. وللتبغ تأثير مباشر على الرئتين مما قد يتسبب في أن يصاب المدخن بالسل والإلتهاب المزمن بالجيوب الأنفية والتهاب أعصاب العين .والتدخين أو التعرض لدخان السجائر يعجلان بظهور أمراض شرايين القلب والقرحة بالمعدة ويسببان إضطرابات في الإخصاب وإرتفاع ضغط الدم و أمراضا مميتة وتأخير إلتئام الجروح وظهور سرطان الشرج والكبد والبروستاتا.
طبعن طبيب الأسنان المرحوم الشيخ الزاهد أحمد عبد المجيد إدريس، عمل شغل جميل في موضوع التمباك وتقرحات الفم وسرطانات اللثة، ربنا يكفينا شر الأمراض ويرفع من مدمني التدخين والسفة الداء العضال دا
معلومة أخيرة
إدمان التبغ، يضع هذه المادة في الدرجة التالتة في المواد الأكثر إدمان.

قلتا ليا كيف؟؟؟ قوم لوط

فتحي مسعد حنفي

26-11-2007, 01:05 AM

الكاتب تاج السر:
=======

يعني انت منتشر في جميع انحاء بحري لكن ما قلت لي انت من وين في الأصل وطبعا أنا قاصد
العاصمة عشان ما تقول لي من مدني ولا شندي0عموما انا ياسيدي من حلة حمد شارع الجنينة البلدية الاسمو حاليا شارع قصر الصداقة ودا بيبعد عن بيتنا حوالي 100 متر.احنا بيتنا لاصق في جامع
الصديق0 ودا ما حيفيدك كتير لاني طلعت من السودان سنة 64 ولغاية هسع علاقتي بقت بس الاجازات
وطبعا الزمن داك انت كنت صغير دا لوكنت مولود0 أنا عشت 14 سنة في اوروبا و17 سنة في الامارات وداخل في السنة التلتاشر في مصر0يعني زي أخوي شوقي تلتين حياتنا غربة وجوازات غريبة وجوازات دي بتشمل جوازات سفر وزواجات0
اما اخوك بابكر مخير فدا راجل خبيث انا عارفو بيضحك مالو واسألو يمكن يقول ليك0 ما بيرتاح الا يديني لكزة محل ما يلقاني وانا اليومين ديل مراقبو عشان اعرف بينوم متين عشان اكتب مداخلتي سريع ولمن هو يصحي يكون في زول تاني كتب بعدي وغطي الاسم يمكن ارتاح شوية0
فتحي

بابكر مخير

26-11-2007, 01:22 AM

الكاتب تاج السر:
=======

طلعت من السودان سنة 64 وطبعا الزمن داك انت كنت صغير دا لوكنت مولود0 (لا باللهي أعملو قدرك) أنا عشت 14 سنة في اوروبا و17 سنة في الامارات وداخل في السنة التلتاشر في مصر0يعني زي أخوي شوقي تلتين حياتنا غربة وجوازات غريبة وجوازات دي بتشمل جوازات سفر وزواجات0

فتحي

وجد Grand Father

تاج السر الملك

26-11-2007, 08:32 PM

يا فتحى
وين لى بيت ناس لوط؟؟
انا هناك اصحابى ناس عبد الحليم بلدية و اولاد رستم وناس نديم
و المقبول و ناس على السيد الصديق رحمه الله
انا من ود مدنى قلبا و قالبا و الأصول شايقى من ناحية الأب جعلى ( مجاذيب) من ناحية الأم
حلة حمد دى حمناها بجربوكس كلب من زمن حديقة البلدية

يا بابكر
الراجل معترف

بابكر مخير

26-11-2007, 10:45 PM

الحبيب تاج السر
كأنك بتشوف
هاك الحصل دا

http://www.l44l.com/up/uploads/36d02ef3bb.png (http://www.l44l.com/up)

ود فكيا جد

تاج السر الملك

27-11-2007, 03:18 AM

يا بابكر انا فى روحى دى شيخ
اسم تاج السر ده فى كسلا بيأجرو منى عديل
بخرة بالأيميل ده برسلا ليك..أها!!!

فتحي مسعد حنفي

27-11-2007, 06:24 AM

عبد الحليم صديق(بلدية)المريومابي ورانا وهم أقرب لي حلة الشلالية وناس رستم في زقاق متفرع من شارع بيتنا وناس صالح نديم برضو قراب مننا ومقبول الصديق بيتهم فاتح في الجامع واحنا بيتنا ملاصق الجامع وبيت المرحوم علي السيد بعد ما تفوت بيتنا وانت ماشي علي البلدية أول شارع علي يمينك وديل كلهم أولاد حلتي لكن أنا طبعا صاحب الأخوان الكبار الما كيزان زي عبد العزيز وعبد العظيم صديق أخوان بلدية والمرحوم عمر والشفيع ومحمد نور أخوان علي السيد ومصطفي رستم والطيب رستم ورستم ذاتو وأولاد عمتهم اولاد حسنين حامد0وغريبة انك ما تعرف سمير اخوي سيد الفولجا البمبية واحنا بيتنا بيقولو عليهو بيت الهندي0والاسم دا اكيد سمعتو مادام بتعرف حلة حمد0 ومدني ذاتها انا بعرفها كويس وكنت ساكن في ضهر نادي الاتحاد في البيت اللاصق في السينما القديمة وفاتح علي المحكمة والمكتبة القديمةوخالي انور كان مدير السينما0
لكن ناس لوط ديل منو؟أكيد دي اتعلموها بعد ما انا سافرت زمنا ما كانو في وبعدين دا اسم ولا صفة0تعرف انا عارفك داير تعمل لي مشاكل وأنا زول عقلت وسبت المشاكل واحنا العلمنا المرحوم علي السيد المشاكل وجات الطلقة الأخدها في اكتوبر كملت الباقي0
اها من حلة حمد ولا لأ؟وأنا من اعيان حلب الجعلية دي علي وزن عب شايقية القالها ابو داود للقاضي لما عاين ليه قال لقاه قاعد عامل زي كديس الكيتي كولا ولما قال ليه انت قبيلتك شنو قال ليه عب شايقية 0أداهو براءة0ما قلت ليك حتعمل لي مشاكل هسع الشايقية يزعلوا ومعظم مجلس الادارة منهم0
سلام ياخوي

معتصم الطاهر

27-11-2007, 07:25 AM

لا حلم و لا قدرة على الحلم

من هنا نبدأ ..
ينادوننا أن تعالوا لأرض الاحلام
ونأتي بأحلامنا القصيرة .. الفاترة ..
وتناقضنا و كيف انه كان يردد نشيد السلام الجمهورى السودانى فى سره اثناء اداء القسموبأسوأ عاداتنا ..و تخلفنا
و الذى اكاد اجزم بأنه لم يسمع فى حياته بكلمة ( كستمر سيرفيس)وغبننا .. على بعض ..
( الحبشى المعفن ده داير شنو)
و استخفافنا .. ببعضنا .. و تريقتنا ..الى حد خفت فيه من اليوم الذى أفتح فيه ابواب منزلى فى صباح العيد لأفاجأ باهازيج ( ايدو مبارا الينا اليكم ..كل سنا مكو تايبين)
و لا ادعى النسبة اليه احد.
دى .. برجع ليك فيها ..

تاج السر الملك

28-11-2007, 06:37 PM

اخى معتصم
تحليل عميق..و مؤلم معا
لك التحايا

يا شاب يا حنفى
اها انا دفعتى على السيد الصديق
التلحمة وين؟؟

فتحي مسعد حنفي

28-11-2007, 08:02 PM

يازول التلحمة دي جبتها من وين؟انت سألت وأنا جاوبت وبعدين نسيت اقول ليك في اتنين ناس رستم الأنا قلتهم ليك هم الأصل وفي قرايبم ناس أحمد وكمال الموجود هسع في أمريكا واخوهم حسين المرحوم اتوفي قبل فترة بسيطة وديل ساكنين قدام بيتنا جنب بيت المقبول الصديق (العمدة) وبيت النور غانم كان متزكرو وأنت بتعزل من الكلام البيتفع معاك وبتزوغ من الباقي مالك0
وكان انت دفعة علي السيد الله يرحمو وبلدية يبقي واطاتك اصبحت 0تقول لي سنسميليا قايلني عوير وأنا من الناس الضربو السما جير!!!!!
أها وسمير ود الهندي ما اتذكرتو؟ومحمد هندي!!

فتحي مسعد حنفي

28-11-2007, 08:46 PM

أي واحد من ناس رستم لازم يكون من العائلة الرستمية ومأمون دا أكيد منهم لكن أنا مافي قرابة بتربطني بيهم غير الحلة بكسر الحاء000وانت الوداك العين شنو؟أنا بعرف ناس كتار من ناس العين وكان عندي اقامة في البريمي وود خالي صلاح محمود شغال في بنك أبو ظبي الوطني فرع الدفاع وود خالتو محمد ميرغني الصعلوك0 الشغال في بلدية العين وتقريبا هو عمدة السودانيين في العين أكيد قابلتو أو سمعت بيهو0
معلومة ليك ما في زول عارفها آل رستم ديل مماليك تبع المملوك الهارب زمن مذبحة محمد علي في القلعة
النط بي حصانو من القلعة وهرب للسودان وهم برضو قرايب الفنان زكي رستم0

فيصل سعد

29-11-2007, 06:04 AM

وانت الوداك العين شنو؟
مشيت اجيب ليك موية تشرب :D:D و لا يمكن لقيتها نعسانة دايرة تنوم؟ :D محمد ميرغني بعرفوا تب و بعرف حسين اخوه كمان ... ناس بهجة و كدا :D في بحري اهلنا كتار يا خواجة.

تحياتي..

فتحي مسعد حنفي

29-11-2007, 11:15 AM

فيصل سعد

29-11-2007, 11:45 AM

يا فيصل سعد0
محمد وحسين ميرغني ديل أولاد خالتي والبهجة كان فاتتهم بتنقرض00مناسب منو في الشلالية؟انت عارف بينا وبينم شارع وبينم وبين خوجلي شارع ولو ما كان الله ختاهم بين حمد وخوجلي ما عارف كان عملوا فينا شنو0

حقوا تدفع لتاج السر خلو طرف و تخليه يتخارج يشتت:D:D و فعلا زي ما قلت جدادة خلاء و لايوقة كمان :eek::eek::eek:

فتحي مسعد حنفي

29-11-2007, 12:54 PM

يا أخوانا أشهدوا فيصل كضاب قال اتزكرني(تماما) ولاقاني في البريمي مع اني قلت كان عندي اقامة في البريمي وما قلت كنت قاعد في البريمي وبعدين أنا خليت البلد ديك من سنة93 وآخر 5 سنين كنت عايش في الشارقة لكن اقامتي علي البريمي00
الجير يا مولاي بجيبو من مغلق واحد اسمو عبدالله العجلاتي ومغلق عبد اللطيف 00أسأل منهم تاج السر بيوصف ليك مكانم0
انا موافق ندفع لي تاج السر لكن فيفتي فيفتي وبعدين يابركة انت قايل المواقع والمنتديات دي عاملنها ليه0ما هي بجانب الفايدة الثقافية بتلم شمل الغايبين وبتعرف الما عارفين وبطفش الشينين0

تاج السر الملك

29-11-2007, 01:13 PM

يا جماعه العوة فوق شنو

يا حنفى اولاد رستم صحبانا كانو عبد الرؤف و احمد و صلاح ، عبد الرؤوف كان مشهور بكلمة ( نعنى) مشار اليه فى بوست حرامية و كلاب ( دعك الحرامى بالتلج فى سدرو) ، بعدين على السيد ( رحمة الله عليه) ، ضرب جير ما كان معانا يا شفت ، انت اظنك من جماعة الكضمى و سافرت من السودان عشان تنشر مذكراتك( كتاب الأغانى) .

يا فيصل انت الشلالية نسابتكم؟؟
البريمى دى سماها شايقى و لا شنو؟؟

فيصل سعد

29-11-2007, 01:19 PM

يا أخوانا أشهدوا فيصل كضاب قال اتزكرني(تماما) ولاقاني في البريمي مع اني قلت كان عندي اقامة في البريمي وما قلت كنت قاعد في البريمي وبعدين أنا خليت البلد ديك من سنة93 وآخر 5 سنين كنت عايش في الشارقة!!
0

يا فتحي كفيلك في البريمي ذاتو عرفتوا.. و بخصوص الجير سؤال شنو الاسألو تاج السر ما الجواب بقروا من عنوانه:D:D عجلاتية و يشتروا منهم جير؟:confused::confused: كلامك دا بخلينا نشك في وجه القمر و الناعسات عيونن :D:D
بعدين يا حبة نحنا كان ما متنا، شقينا المقابر :eek::eek::eek::eek:

فيصل سعد

29-11-2007, 01:23 PM

يا فيصل انت الشلالية نسابتكم؟؟
البريمى دى سماها شايقى و لا شنو؟؟

نعم النسابة و نعم الاهل.
البريمي يكون سماها الخال ود الحاج دا.

تحايا طيبة.

فتحي مسعد حنفي

29-11-2007, 01:53 PM

[QUOTE=فيصل سعد;81954]يا فتحي كفيلك في البريمي ذاتو عرفتوا.. و بخصوص الجير سؤال شنو الاسألو تاج السر ما الجواب بقروا من عنوانه:D:D عجلاتية و يشتروا منهم جير؟:confused::confused: كلامك دا بخلينا نشك في وجه القمر و الناعسات عيونن :D:D
بعدين يا حبة نحنا كان ما متنا، شقينا المقابر :eek::eek::eek::eek:[/QUOT
ما أظنك ممكن تعرف كفيلي وما حاقول ليك منو عشان ما تقول آي كنت عارفو لكن والله العظيم لو عرفتو حأقول ليك صاح وليك هدية كمان0
ياشاطر يعني عشان اسمو العجلاتي لازم يكون عندو علاقة بالعجلات!!انت سألت الجير البستعملو في ضرب السما بجيبو من وين وأنا وريتك من وين0اتلومت معاك؟ وتاني اسأل تاج السر يمكن يدلك وأنا فهمت منو انو بيعرفو لكن من بعيد لي بعيد00يمكن;):D المقابر أكيد شقيتها في دي أنا معاك0ولسة ياما تشقها وكمان تحجز فيها بيت جنب بيتي0

فتحي مسعد حنفي

29-11-2007, 02:29 PM

فتحي مسعد حنفي : اننا لا نضرب الجير، و الحسان الغيد حولنا في كل مكان يحيطوننا بكامل رعايتهم و عطفهم جنوب شرق سوق سعد قشرة العاجبكم دا :D:D
بتعرف المرحوم صالح محمد صالح "اب اصبع" و شقيقه المرحوم الكابتن سعد دبيبة رحمهم الله؟
اما كفيلك لقيتوا بواسطة دكتور مهدي..

أكيد بعرف صالح وسعد وانا كنت بلعب في التحرير وبعدين صالح الله يرحمو سافر قطر التي كانت تضم معظم ناس بحري مثل سعد دبيبة00كامل عباس000عبدالله ربيع00اولاد بلاش000حاج عثمال عبد اللطيف000عمر النور وغيرهم الكثيرين00اما لو قاصد دكتور آدم مهدي فما حتعرف حاجة لكن انا حأريحك كفيلي كان أحمد الريسي مدير جوازات البريمي بأوامر من سيد جيفر البوسعيدي الرجل الثاني بعد السلطان قابوس في ذاك الزمان0

فتحي مسعد حنفي

30-11-2007, 11:31 AM

يا فيصل
أنا قلت بقرا ما بين السطور ما بقرا نقط ولو بقرا برضو ما حأفهم دي لاني راجل مؤدب وقريبك دا كان شلالي أكيد بكون قال ليهو شيتن ما بتكتب ولا بينقال. ياخي انت لخبت لي راسي بقيت محل ما امشي القاك هسع حكاية النسب دي أنا رديت عليك في بوست عنصرية ناس أمدرمان غايتو أنا حأستأذن الادارة يدوني عضوية تاني مع دي تكون بي اسم مستعار عشان اتعامل من خلالها مع الناس الجادين وأخليك انت وبابكر تنططوا زي ما عايزين في المحلات التانية الفرغانة

تاج السر الملك

30-11-2007, 01:22 PM

و الله يا جماعة انا البراءة بتاعتى بقت مهددة بالجماعة ديل و رموزهم الغريبة..جير و عجلاتى و سعد قشرة ، ياخى نحنا من البيت لمدرستو
اشرحو لينا القصة ، النار دى عرفناه يا قول جدك ...يا خى انتو لعيبة قدام و خاصة حنفى ده..العجلاتى مش الزول البصلح العجلات؟؟

فتحي مسعد حنفي

30-11-2007, 01:37 PM

[اول حاجة ما تآخذنا علي الاحتلال لكن طبعا انت راجل مشغول وما فاضي تصنقر اليوم كلو فوق الكي بورد واحنا هدفنا نبيل عشان نخللي ليك البوست دايما في قمة الصفحة الأولي0أما حكاية الرموز بطل الشيطنة وزمان قالوا عايزني أقول ليك انت منو وريني أصحابك منو وانت من صورتك دي ومن بوستاتك الأنا متابعها من زمان قاريك من كل الصفحات وبطل شيطنة والعجلاتي دا انت بتعرفو كويس وزي ما قال فيصل انت ما مت لكن اكيد شقيت الترب تبرا وتستبرا وخللي الطابق مستور ومافي داعي للنكشي البخللي الزول يقوم يفضفض0
احنا عايزين معاك كم سهم كدا في البرائة بتعتك دي انشالله ماهية غفير حراسة بوست0 اعتبر دا
blackmailing

فيصل سعد

05-12-2007, 08:26 AM

سلامات يا تاج و فتحي، قلنا ناخد فيكم الاجر ،، و كدا :D:D

فتحي مسعد حنفي

05-12-2007, 10:42 AM

سلامات يا تاج و فتحي، قلنا ناخد فيكم الاجر ،، و كدا :D:D

يافيصل بوستات تاج السر دي ممنوع الدخول فيها لمن هم دون السن القانونية والمرة دي بنفوتها ليك وأجرك خليهو للعصابة بتاعتك وأهو الحمدلله شايفك ابتديت ترجع ليك العافية 0ألله يتم شفاك0
دايرني تعال لي في بوست تاني يكون مسموح دخول الأطفال فيهو عشان اخلاقك ما تبوظ0

تاج السر الملك

05-12-2007, 01:44 PM

انا بوستاتى بتعضى يا حنفى؟؟
و الله الا اكلم ليك نجاة
بعدين فيصل الحمى قايمة عليه؟؟ قعد يهضرب بالحيا و العفاف و شمبلت
الكفيل مات؟؟

فيصل سعد

05-12-2007, 01:51 PM

وأهو الحمدلله شايفك ابتديت ترجع ليك العافية 0ألله يتم شفاك0
دايرني تعال لي في بوست تاني يكون مسموح دخول الأطفال فيهو عشان اخلاقك ما تبوظ0

انت يا خواجة :D داير تمرضنا و السلام، ما قلنا ليك يا حبيبي انا عيان ديك كانت اغنية في " الطيف او في الصحيان" سافي و سمعك تقيل و ماكل كباب كمان. :D:D يمين كدا بتخليني اشك في شاعريتك و رقيق حواشيك :D:D و الكلام الباقي داك خليتك و سامحتك فوقوا تب .

فتحي مسعد حنفي

05-12-2007, 02:16 PM

انت يا خواجة :D داير تمرضنا و السلام، ما قلنا ليك يا حبيبي انا عيان ديك كانت اغنية في " الطيف او في الصحيان" سافي و سمعك تقيل و ماكل كباب كمان. :D:D يمين كدا بتخليني اشك في شاعريتك و رقيق حواشيك :D:D و الكلام الباقي داك خليتك و سامحتك فوقوا تب .

يعني يافيصل دا جزائي عشان خايف عليك0تفتكر هسع لو لقيت ولدي بيتفرج علي فلم بورنو بقول ليهو عيب ولا بخليهو0
بعدين عيان دي احساس داخلي اتبني علي قلة مشاركاتك في الفترة الأخيرة واعتبرها زي احساس الوالد بي تعب ولدو من علي بعد0وما ماكل كباب امبارح بالصدفة لقيت في السوق سمك هامور وطبعا في مصر نادر وهسع قاعد راجيهو يجهز عشان أقوم عليهو0طبعا انت كنت قاعد في العين ودي زي الأبيض بالنسبة للسمك0يعني بتكون ذكرياتك كلها من السوكي والموردة وأبروف0

فيصل سعد

05-12-2007, 02:44 PM

يعني يافيصل دا جزائي عشان خايف عليك0تفتكر هسع لو لقيت ولدي بيتفرج علي فلم بورنو بقول ليهو عيب ولا بخليهو0
بعدين عيان دي احساس داخلي اتبني علي قلة مشاركاتك في الفترة الأخيرة واعتبرها زي احساس الوالد بي تعب ولدو من علي بعد0وما ماكل كباب امبارح بالصدفة لقيت في السوق سمك هامور وطبعا في مصر نادر وهسع قاعد راجيهو يجهز عشان أقوم عليهو0طبعا انت كنت قاعد في العين ودي زي الأبيض بالنسبة للسمك0يعني بتكون ذكرياتك كلها من السوكي والموردة وأبروف0

يا خواجة ما تحكها كتير انت الهظار ما تقلبوا جد خصوصا انه برلمتك انتهت و كدا :D:D، خليك زي صاحبك ملاسي كلمة و غتايتها :D:D ، حصل خير يا بتاع الهوامير انت.

فيصل سعد

05-12-2007, 02:48 PM

انا بوستاتى بتعضى يا حنفى؟؟
و الله الا اكلم ليك نجاة
بعدين فيصل الحمى قايمة عليه؟؟ قعد يهضرب بالحيا و العفاف و شمبلت
الكفيل مات؟؟

انت كمان جبت ليها حمى :confused::confused: ما خاتي عليك كان قاليك اصحابك منو؟ عجلاتية و جيارين، دي امة يرفعوا ليها علم؟؟ :D:D:D

بابكر مخير

05-12-2007, 02:56 PM

غايتو أظنو النبي لوط (عليه السلام) لو كان بيعرف أنو (ف) أوس 2 حيسرحو كدي في بوستو، ما كان إشتغل بوعظ ناس بلدتو الجابو ليهو الكلام وكان رحل منهم ويكون مرتاح والناس تسمي عليهو بمزاج (طبعن ما دباديب)
لكن دا الله ودي حكمتو

فتحي مسعد حنفي

05-12-2007, 03:00 PM

فيصل سعد

05-12-2007, 03:01 PM

فيصل سعد

07-12-2007, 07:48 AM

[QUOTE=تاج السر الملك;82546]انا بوستاتى بتعضى يا حنفى؟؟
و الله الا اكلم ليك نجاة
بعدين فيصل الحمى قايمة عليه؟؟ قعد يهضرب بالحيا و العفاف و شمبلت
الكفيل مات؟؟[/QUO

نجاة دي منو يامعلم ولا داير تجيب لي تهمة وتعمل لي مشاكل مع المرا0 أنا عمري كلو غير نجاة الصغيرة ما بعرف وكان في راسك واحدة تانية قول ما تخاف أنا مستعد للمباطنة ولا انت نسيت اني حلبي جعليين:D الليلة خليت شغل الجرافيك مالك ولا خلاص المخزن اتملا؟

علي باليمين يا خواجة نجاة دي انتا عارفها و فايتة اضانك :D:D:D و قلت "اخت سودانية عزيزة و حتدافع عنها كاحدى شقيقاتك ان تعرضت للهجوم" :o:o فبطل لف و دوران و خليك مع الشيشة بس ما تسرح و كدا :D:D علي باليمين متكيف منك شديد في فورتك علي اهلك المصريين :):):)

فتحي مسعد حنفي

07-12-2007, 07:55 AM

أها كدا فهمت لكن الدخل تاج السر في الموضوع دا شنو!!!!:confused::confused::confused: الظاهر أنا الحاكلمها ليهو

فيصل سعد

07-12-2007, 08:45 AM

أها كدا فهمت لكن الدخل تاج السر في الموضوع دا شنو!!!!:confused::confused::confused: الظاهر أنا الحاكلمها ليهو

احتمال يكون عندو فرمالة و لا اتو زايد فدخل في مربوطتك :):):)

فتحي مسعد حنفي

07-12-2007, 08:49 AM

احتمال يكون عندو فرمالة و لا اتو زايد فدخل في مربوطتك :):):)

خليهو هو بس يظهر وما تخاف برضو بيتسنفك

مجدي مسعد حنفي

07-12-2007, 10:46 AM

فتحي مسعد حنفي

07-12-2007, 12:16 PM

تاج السر
تحياتي
بوست جميل والمداخلات فيهو مفيده ومليئه بالمعلومات والذكريات الجميله واتمنى ان يكون المتداخلين من اصحاب الاخلاق الرياضيه العاليه وان يتقبلوا التعليقات بصدر رحب ونفس طويل .
اخوك مجدي مسعد

يامجدي ياخوي انا اخوك الكبير وبقول ليك البوستات المشبوهة دي أبعد منها عشان أخلاقك ما تبوظ وبالذات بوستات تاج السر الملك0 غايتو أنا عملت العلي وانت حر0

تاج السر الملك

07-12-2007, 12:38 PM

فتحي مسعد حنفي

07-12-2007, 02:12 PM

شكرا اخى مجدى على الحضور و المتابعه
أخوك ده لمن يقوم عليه ( اللمباجو) بهضرب، بعدين عامل ما بعرف ألأخت العزيزة نجاة ، البركة فى فيصل سعد ...بعدين كلام الطرابيز ده يا فتحى ( يتسنفك) و الألفاظ البتضرس دى محلها الحتات الغميسة المابنعرفها..كمان امشى جيب سيرة حمدتو المن الله شحدتو ، عشان نخلى سودانيات دى ذاتا.
======
حمدتو ياتو فيهم الكان بيلعب كورة ولا طه حمدتو المذيع ولا بتاع الحلاوة وكان قاصد أبو ديل أنا ياخوي ما توت عنخ آمون0دا ما حضرتو ولا شقيت معاهو ترب0
عموما مقبولة منك وأنا ياسيدي ما جبت سيرة الكشاتين الا لما الركيبين جابوها وأنا بس رديت علي فصاحتم الما بتكمل0
أما أخوي فأنا مسؤول عنو وما عايز أقول ليهو دا صاحب بلدية عشان ما يخاف ويخلي ليك المنتدي كلو0
وبعدين في ذمتك انت مرتاح هنا معانا ولا في الحتت التانية؟علي الأقل هنا بتتحاور مع أولاد ناس وطبقة مثقفة ما فيهم شماشة زي بعض الأماكن التانية الانت عارفها براك0ومضيع مجهودك مع ناس هم ذاتم ما فاهمنك بتقول في شنو يعني عامل زي ساقية جحا تشيل من البحر وترمي في البحر0

فيصل سعد

11-12-2007, 08:31 PM

======
حمدتو ياتو فيهم الكان بيلعب كورة ولا طه حمدتو المذيع ولا بتاع الحلاوة وكان قاصد أبو ديل أنا ياخوي ما توت عنخ آمون0دا ما حضرتو ولا شقيت معاهو ترب0
عموما مقبولة منك وأنا ياسيدي ما جبت سيرة الكشاتين الا لما الركيبين جابوها وأنا بس رديت علي فصاحتم الما بتكمل0
أما أخوي فأنا مسؤول عنو وما عايز أقول ليهو دا صاحب بلدية عشان ما يخاف ويخلي ليك المنتدي كلو0
وبعدين في ذمتك انت مرتاح هنا معانا ولا في الحتت التانية؟علي الأقل هنا بتتحاور مع أولاد ناس وطبقة مثقفة ما فيهم شماشة زي بعض الأماكن التانية الانت عارفها براك0ومضيع مجهودك مع ناس هم ذاتم ما فاهمنك بتقول في شنو يعني عامل زي ساقية جحا تشيل من البحر وترمي في البحر0

وين مهضرب اللمباجو ود الملك تاج السر؟.
و وين زعيم الجيارين ود مسعد الخواجة؟.

فيصل سعد

12-12-2007, 06:39 AM

تاج السر
تحياتي
بوست جميل والمداخلات فيهو مفيده ومليئه بالمعلومات والذكريات الجميله واتمنى ان يكون المتداخلين من اصحاب الاخلاق الرياضيه العاليه وان يتقبلوا التعليقات بصدر رحب ونفس طويل .
اخوك مجدي مسعد

مرحب بيك مجدي ، اخوك لسانه زفر :D:D لكن ما تقلق نحنا غير روحنا الرياضية :D:D نؤمن بالمثل "عشان خاطر عين، تكرم مليون عين" :D:D بعدين اظهر ياخي مع انه اخوك المنضمة ما مديك فرقة و كدا :D:D

فيصل سعد

06-01-2008, 11:59 AM

سلام يا شباب،

وجب السؤال عن عمنا فتحي مسعد الغائب ليو زمن من البورد و حايم بين ازقة و حواري العاصمة المثلثة :D:D العندو خبرو يطمنا و لا يجينا بنفسة يرمي السلام و يتخارج يكمل حوامته و مشاويرو :D:D

تاج السر الملك

14-01-2008, 04:37 AM

يا فيصل
آسف لتأخير الرد..مشغول بفتش على العم فتحى..و أشياء أخر
كل عام و انت و جميع شباب المنبر بخير.

فيصل سعد

17-04-2008, 04:49 PM

يرفع بطلب من صديقة برلومة :D:D

محمد حسن العمدة

04-02-2010, 05:16 PM

ى محنة اشبه بمحنة نبى الله ( لوط), الذى أرتبط اسمه بسلوك , قاتل ضده حتى النهاية , فما سمى حرم او شارع واحد بأسمه , و لا ادعى النسبة اليه احد.

اها يا جماعة عاوزين ناس كاربيييييييييييين يكسرو الحاجز دا ويسمو اولادوم لوط وعزرائيل رايكم شنو ؟ فوكا حاجة دي ؟؟

بابكر مخير

06-02-2010, 05:39 AM