مرحبا بكم اخوتي وشكرا للترحيب ودي المحرية فيكم ومعا نمضي لنبحث عن معان اخري فريدة
|
[QUOTE=Hassan Farah;133045]مرحب بيك كادر موية--- نهديك فنجان قهوة بكرى مع التميرات ديل--مشرق- ام نص وابو راس--
مرحبا بكادر مويه ...اخ وصديق دون شروط .....طن محبة ..عربون ..امسك ... يا حسان بعاين في صورتك دي وحاسة انك ود اهلي وما قادرة ادقق كويس لاني كل ما اقرا حكاية التميرات دي بطلعني من مودي واقعد اتذكر ويا ريت لو معاهم (موية عكرانه من البحر او زير سبيل كدا من (الكريقه )نفسها يكون بتاع خفير الجنينة (الكريقة نفسها )او المزارع ... لكم خالص الود |
[QUOTE=نعمات حمود;133889]
اقتباس:
اسمحيلى اسألك-- العم ادم حمود يبقالك شنو-- |
[الاخ حسان فرح ..
لك كل الاعزاز والمحبة .. ادم حمود دا كان راجل شجاع وهمام ..سيد البلد وزعيم .. تزوج ببنت خالتة مريم سر الختم وخلفت منه خمس من البنات ..وتوفيت رحمهم الله جميعا .. تزوج من اجل الولد بواحدة بت بندر اسمها فاطمة (الزينة )بت راجل تاجركبير محمد علي وزوجتة زهراء الهادي شيخ البلد وحفيدة ابو حجل ملك الرباطاب ...من الشريك بالتحديد .. دي خلفت اربعة بنات وولد ...واحدة توفيت (سمية ادم (رحمة الله عليها )حزنت عليها حقبة من الزمن وما زالت احزاني .... ادم حمود دا عندو بت تسمى زمزم لها بنين وبنات ... وخاصة الاولاد تاج السر وعبد الرحمن ...وديل ماشاء الله عرسان اسي بقوا ... وماشاء الله عمنا ادم حمود دا ...كان يا ما كان ..يطلع ما عندي بيه اي صلة لكن ابوي حمود دا سموهو عليهو لانو اهلوا معجبين بشهامة ورجولة هذا الرجل الهمام .. وانت من وين ؟؟ لكم محبتي |
وياشباب عشان ما تتعبو انا عبد الرحمن ادم عبد الرحمن علي وعشان خالتي ماعرفتني (نعمات حمود) انا تاني ماجاي الا بعد يعود المداد الي قلمي (حقيقية المداد زمنو ولا جا الكيبورد)المهم زمان الناس كانت بتكتب بيد واحدة وحسي بقت تكتب بي يدينا الاتنين (عشنا وشفنا )حارجع قرييييييييييييب وانتظرو........................................... ...
|
اها يا شباب نهاركم سعيد
فى البداية اوجه كلامى لكادر موية-- شوف يا زول بطل الكسل وعلى طول سطر رسالة شكر لخالد الحاج وادارة سودانيات اللموك فى العزيزة خالتك-- فى كل المواقع السودانية شفت ليك جو محبة ومودة زى حوش خالد دا-- لبنتنا نعمات-- انا يا ستى من القليعة التى فى الترعة وبالناسبة محمد خير بدوى ايضا مولود فى القليعة وكذلك ناس المرحوم احمد خير المهدى وناس مصطفى عطية الله ابشر من الشقيقة ايضا فى الترعة مصطفى متزوج عمتنا امنة بت فرح رحمة الله عليها وقد انتقلوا لامدرمان واظنو الان فى السعودية رفقة ولده الكبير عطية زمان عندما ناتى للشريك كنا ننزل فى بيت مصطفى او بيت مجذوب ازيدك معلومة-- ناس عمك البدرياب شوقى وبابكر سكنهم فى راس كشوى الشمالى فى قرية دمبك و فى جريرة مرو --قصاد دمبك توجد جزيرتان اتبا الصغيرة واتبا الكبيرة اها الكبيرة دى ملك خالص لاولادالطيب من الكودق واولاد فرح --شتاء - شتاء يرتادها طائر السمبر المهاجر باعداد كبيرة من اوروبا ونرتادها نحن من الغرب للزراعة-- من اجمل زكريات الطفولة انا السنة الفاتت نزلت البلد وطرقت كل هذه الاماكن المحببة للنفس -الساعة سبعة ونصف خرجنا من الخرطوم بعربية وحصلنا الغداء فى القليعة الشريك مرينا عليها مرور الكرام-- طوالى على البنطون -امنيتى ان ارى قرى الرباطاب عامرة باهلها نحن كم كلنا53000 كل الرباطاب-- فى الانتخابات الجاية عاوز ارشح شوقى بدرى نائبا عن دائرتنا هل من مثنى-- اتركك على خير حسن فرح---- |
الاخ حسن فرح ....وكادر موية ...(دي مهمة دي )من الان ببحث عن تاريخك السياسي لو لقيتك كنت يوم كادر موية من اسي لا خالتك ولاحاجتيين لانو انا اولادي كلهم كوادر خطابية
وامراء والذي منه ... حسن ...القليعة دي بالتحديد كدا ما عرفتها ..لكن ناس اولاد (عطية الله مصطفى وابشر وخضر وست امنه ديل بالحيل بعرفهم ليك فردا فردا .. محمد الخير بدوي لي قصص وحكاوي معاه قبل كم سنة كدا في الخرطوم عند ناس بتول شقيقته ...وطبعا هي خالتي وفي مقام الوالدة وجيرانا في ام در .. ناس الطيب مصطفى وعلى اخوه ديل خيلاني ..واصدقائي ببناتهم .. طبعا معانا سمية شقيقة كادر مويه هنا في سوانيات ولكنها قاطعة خبر ؟؟ لك التحية ويمكن اكون بعرفك او اخواتك بالتاكيد ولكن عميق التواصل ونحو غد اخضر ... شفت بوست سمية الجزر المنسية ؟؟؟ لك المحبة |
اها-- طلعتوا ساكنين فى العباسية-- اقول ليكى لو بتول زوجة المرحوم مجذوب خالتك انا بطلع عمك-- انا وبتول نددا نشأنا مع بعض فى القليعة ولو عاوزه تعرفى عن القليعة عليكى بكتاب محمد خير البدوى- ارسلى لى عنوانك البريدى على الخاص ابعت ليك نسخة الكترونية من الكتاب-ناس الطيب مصطفى اعرفهم خير معرفة لكن المدة طالت و السفر و الجهجهة والبعاد -الشقاوة يا ستى فرقتناايدى سبا
لك ولجميع افراد اسرتك كل المحبة---- |
| الساعة الآن 02:06 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.