اقتباس:
برضو ح أستأذن الشباب وأرد عليك أول تزوير عقد الزواج مخالفة قانونية جسيمة تغاضت عنها الأجهزة الأمنية لكن يبدو لي مخالفة المعتقد بتكمن في مزالق أخطر من مخالفات القانون وياريت مانسطح عمق الرجة السلوكية المصاحبة للسيد المفتي يادكتور وكلمة واحدة بس اللي انت أرفقتها في ردك انا مشفقة عليك منها واللهي عايز تعرف هو خالف معتقدو في كم حتة غير التزوير؟؟؟ 1/الأخطر من التزوير هو أشارة الأمنجية لعلاقات المفتي النسائية السرية يا دكتور في السطر الأول من التقرير السري ويبدو لي انك بتجيد قراءة مابين السطور ده الا اذا كان عندكم فهم غير فهم الدين والناس لي حتة أرتباط المفتي بالعديد من العلاقات النسائية ....ده زول بطوعه وضع منصبه الديني في مهب ريح اسئلة البشر يادكتور فهل دي بسيطة وبتتوافق مع كلمة واحدة بس بتاعتك؟؟؟ هل الاسلام والدين عموماً بيشجع وبيرعى قيام علاقات نسائية مامعروف كنهها؟؟ ياخ الحلال حسب الحديث بيّن والحرام بيّن وبينهما مشتبهات فمن اتقى الشبهات فقد أتقى لدينه وده بعدين حسب خطتي ح يقود لي معايير اختيار رجال الدين ومعايير محاسبتهم والأخطر من ده كلو سلوك الراجل ده اعطانا الحق نسأل هو رجال الدين والمتدينين ليه ماقاعدين يخافو من الله ؟ وبيخوفونا بيهو نحن ويشنقونا ويرجمونا ويقطعونا ويجلدونا؟؟؟؟؟ يعني الدين بيعطي حصانات لرجالانه تقتل وتذّبح وبيمارس الرجم والتقطيع على البسطاء المؤمنين بعمق ؟؟؟ رجالات الدين والقساوسة عندهم ياتو أسرار بتخليهم يمارسو الحياة بدون خشية من الخالق؟؟؟ هل هم مكتشفين أنه المسألة صح بتاعت لا إله والحياة مادة دي وداسينها مننا؟؟ ولا الله مديهم ضمانات فساد وأفساد وبعدهم حصانة؟؟ لانهم محاسيبه ورجالاته وظله؟؟ قادر أظن بعد كلامي ده تتخيل مدى خطورة سلوك المفتي ومدى فداحة سؤالك الما فكرت فيهو كتير ودردقك الدردقة دي 2/أضافة للمصيبة دي المفتي كان بيبني في علاقة مع السيدة مها متحقق فيها شرط الخلوة وده بس بالأخذ باعتراف السيدة وماخفي كان ....شنووووووووو؟؟؟ أعظم يادكتور يعني بي رندوكنا الشبابي المفتي كان بيجكس وبيخلط وبيعمل في علاقات بالتلفونات ومامعروف فحوى اتصالاتو خالص طبعاً وماليننا نحن فقُر بي حكاية الباءة وصوم الفقير الماقادر يتزوج ولا واحدة وماعندو مال يحلم بي الجواري بتاعين خُلفة الاله في الارض البيوزعوهم السادة ظلال الله المفتي في اقل من تسعة شهوريتزوج عشرة مرات وبقية خلق الله عليها بالباءة؟؟ ده دين شنو ده؟؟؟ دي قدرات فذة بيمارسوها الناس ديل للاخبار عن انه الاله ظالم ومنحاز وشرير ورأسمالي وبيكره الفقراء فهل الهك كده يادكتور؟؟ولاديل زمرة فاسدة يفترض ننقي منهم الدين ونبعده عن متناولهم ونحتفظ ليهو بي قداستو بعيداً عن المناصب البتمطر جواري وجكس على الجلاكين ديل ؟ 3/المفتي لمن طلب من السيدة مها الزواج شرعياً دون الاعلان عنه كان بيتحايل على اشهار الزواج أولاً وعلى أجماع الفقهاء بضرورة أعلام الزوجة أو الزوجات طبعاً في حالة المفتي الميسور وده ثانياً فهل ده حلال بالدين؟؟؟ عشان تتقاضى عنه بس وتمسك في التزوير؟؟ 4/بعدين الراجل ياخ من الفترة اغسطس 2003 لي مايو 2004 متزوج عشرة مرات حسب شهادة السيدة زوجته السابقة.....بدون تسطيح وبالعربي الوااااضح يادكتور بابكر الراجل تقريباً بيرعى بغاء مقنن لانه بيكون مشترط سرية الزواج وبيلغي ركن الاشهار اللي هو من واجبات واركان الزواج وبيلعب بي ورق يكاد يكون عُرفي ويتزوج كل شهر ويطلق ويعيد الكرة وهكذا دواليك فهل دينهم بيقدر قدام الاعلانات العالمية لحقوق الانسان والمواثيق الدولية يدافع عن شكل التسليع والتجارة للمرأة ومحاولة اضفاء شي من الشرعية على الحالات البتجنح لي انها تكون زنا دي ؟؟؟؟ يعني لو في تسعة شهور الراجل تزوج عشرة مرات ....ممكن في عمرو المديد والرغيد ده يكون أتزوج كم مرة؟؟؟أطلع بي متوسط عدد زوجات المتهم يادكترة وبحبح يدك شوية معانا ....ده مفتي ياااااااااااااااااااخ ده مفتي يا دكتور بيكون درس أصول فقه لمن دماغه سخنت وبيكون عااارف هو بيعمل في شنو وبيخالف في منو 5/ الرسول (ص) قال انه لايزني الزاني وهو مؤمن ولايسرق السارق وهو مؤمن وعلى كده قيس طيب حسب النص ده المفتي وهو بيزوّر كان مؤمن؟؟ طيب هم بيختو لينا ناس مامؤمنة ليه؟؟؟ هل هم أعداء للدين وعايزين يصيبوهو في مقتل؟؟؟ ياربي يكونو من الموساد ولا ماسونيين مدسوسين عايزين يشوهو الدين؟؟؟ طيب ليه الجهة البتعين الائمة والدعاة والمفتين والمتشنجين والمهوووسين ديل بتصر ماتحاسبهم لمن يغلطوا؟؟؟؟ هسي الوثيقة دي لو ما الثورة والثوّار كان طلعت؟؟؟ ياربي الاسلاميين والمتدينين يكونو داسين مننا شنو تاني؟؟؟ وياتو قدر من الاسرار الكهنوتية اللي خلتهم مايعتقدو انه في حساب ورب وساعة ياتو قدر من الحاجات دي مخفي عننا نحن معاشر الشعب البسيط ؟؟ روحي محرقاني عشان أعرف ليه هم مابيخافو الله ---- يادكتور طلعت واحدة بس؟؟؟؟؟؟ولاطلع هباب؟؟ مابحب البيسطح لي بي موبقات بتهبش عمق عقيدتي ....شفتا كيف يادكتور بابكر عباس؟؟؟ أنا وأصحابي الهنا ديل ناس عميقين وحاسبنها وعايزين نستفيد من المستند ده فائدة قصوى وماكان تقع في إشكال تهوين كوارث المفتي كان تقول أنا مسلم ومؤمن وانا برئ مما يأفكون وتنجى بي نفسك هسي انت امام الله بررت لاسباب انت عارفها سلوك خاطئ ويوم القيامة ربنا راح يسألك بالجد....ده لو كنت مؤمن انه الله في وفي حساب وكده . يللا ورينا كمان هل التزوير حسب الرسالات السماوية وحسب الاسلامويين مباح؟؟ ليه انت مستهين بالتزوير لمن يعملو مفتي جمهورية؟؟؟ليه ما أدنت المفتي وطلعتو لينا منافق وغلطان؟؟؟ولا انت بتدين فيهو في سرك عشان نحن مانشمت؟؟ أضعف الايمان هنا مابينفع لانه انا هسي دي طالبة شهادتك وعشان مايأثم قلبك طلع النصيحة وأخلي ذمتك -------- البوست ده ح أبذل فيهو كلام نظري فظيع لي قدام بيختص بي لاهوت وحاجات معصلجة فأربطو الأحزمة وانتظروني محبتي للجميع وعذراً للاطناب يادكتور |
اقتباس:
اقتباس:
اقتباس:
|
اقتباس:
سلامات يا لنا.. وكفارة.. الوثيقة الأمنية حال تيقنّا من صدقها.. صحي شينة في حق المفتي.. ما في كلام.. بس الوثيقة دي بدت بــ (وردت معلومات).. يعني كلام سمعناهو.. أها وردت دي نفسّرها كيف..؟ والمعلومات دي كلّها كما ورد في الوثيقة، روتها المدعوة مها عبدالفتّاح دي.. مجرّد راوي واحد في قضية كبيرة بتتعلق بالدين والسلوك لرجل دين ومفتي جمهورية.. طيّب يا لنا.. برأيك كقانونية.. هل يمكن إثبات مثل هذه الدعوة بإعتماد رواية مثل رواية مها دي.. |
اقتباس:
يعني خلاص حسمت أمرك إعتماداً علي وثيقة ما معروف صحّتها من عدمو..؟ وبعدين يا مهنّد نحن بنلتزم بحدود الدين عشان الله قال كدة ولا عشان رجال الدين قالوا..؟ الموضوع ما اعتقد مرتهن بدقن ولا غير دقن.. الحكاية بتتعلّق بضمير صافي ونيّة سليمة.. وكل ما عدا ذلك يبقي مظهر لا يغني شيئا.. الدين دين الله.. ولو حدث وانحرف البعض ممّن ولّيتهم أمري عنه لأيّ سبب من الأسباب.. لا يعني بأنني في حلٍّ عن أمره.. |
اقتباس:
الوقت إتأخر هسع برد ليك على نقطتك الأولى حسب معتقدي و معتقد المفتي (على فكرة نحن مختلفين) اقتباس:
لانها حسب معتقدي و معتقد المفتي إسمها: قذف و أو إشانة سمعة خاصة لو جات من فاسق زي جهاز الأمن المصري* * أعتقد إننا متفقين انو جهاز الأمن المصري القديم فاسق؟ و لا يعتد بكلامو |
اقتباس:
اقتباس:
(أستمرار الاتصالات التلفونية بينهما لعدة أشهر توطدت خلالها العلاقة حتى طلب منها الزواج) ده الوارد في التقرير الدين هنا وين يارشيد؟؟؟؟ الدين قاعد ينتهي بالزواج؟ولا الخلط والخلوات البتنتهي بالزواج؟؟؟ الكلام مافي دين لانه الدين عندو منابرو ومحلاتو وزول مزواج كده الأقرب لي عقلك تصدق انه بيخلط ولابيناقش لاهوت مع واحدة ست في التلفون؟ أنت أكبر من السؤال ده يقيناً يارشيد ...ركز شوية بس معانا اقتباس:
اقتباس:
مها عبد الفتاح تم استجوابها عند ملاحظة علاقات المفتي النسائية وعليك الله ارجع اقرأ التقرير الأمني التقرير ده صادر من جهة أمنية وضبطه الثوّار في أمن الدولة وتم تحريره بواسطة أمنجي ...يعني زي المتحري واحد ...ده زول مكلف رسمياً حسب منصبه يستمع لمواطن ويدّون أفادته ده محضر رسمي يارشيد ولايجوز الا الطعن فيه بالتزوير وسعادة المفتي لم يطعن فيه ولزم الصمت ويمكنك الاطلاع على مستندات أخطر في مواقع الثوّار المنتشرة .أذن عندما يقبل المتهم بالمستند لايجوز للغير الاحتجاج على عدم صحته أو التشكيك فيه وأنا شخصياً عندي المستند ده صحيح ومحرر رسمي أمام موظف مختص ومعترف به من جانب المفتي ثم انه مها لم تروي الحادثة من نفسها بل تم استجوابها رسمياً وروايتها متماسكة ومتسقة مع السياق العام والأخطر من كل ذلك لم تناقضها اي رواية أخرى من السيد المفتي ....يعني ما أحتج ولاقال خطأ ....أنت ملكي يعني أكتر من الملك يارشيد ياخوي؟؟؟ اقتباس:
أجابتي ...نعم لما يلي :- المفتي لم يعترض ولم يحتج على المستند التقرير ولم يناقض فحواه والمستند ملء وسائل الاعلام والراوية لم ترويها مها عبد الفتاح لساكنات الحي بل روتها لجهة أمنية راقبت نشاط مشبوه للمفتي واستجوبت السيدة مها بناءاً على شكوكها كجهة مختصة رشيد أتمنى أني كنت واضحة في محاولة شرحي وممتنة لوجودك خالص وعندي كلام وتعقيب على ردك على مهند صاحبي ده ح اقولو ليك بعد أذنك بعد مهند يوصل رأيو ويكتبو . مودتي ليك يارشيد |
لنا..
يسعد مسااك متااابعين معااك... |
يادكتور مساك خير ويسعد صبيحتك كمان
اقتباس:
ليه الأزهر طيب كجهة دينية بيحض على أطاعة أوامر الفاسدين؟؟؟؟؟؟؟ موش كده انت بهدلت الأزهر البيعين المفتي ده ذات نفسو؟؟؟ جهاز الأمن بقى فاسق بعد مبارك حكم كم وتلاتين سنة وكان بيعين شيوخ الأزهر وديلك بيفصلو الفتاوى على مقاسو؟؟؟ جهاز الأمن بقى فاسد ولايعتد بكلامو هسي؟؟؟ ليه المفتي أو شيخ الأزهر ما أمتلك شجاعة يجهر بي رأيو وينحاز لي مواطنيه ورعيتهده إدبان سطوة الجهاز والرئيس مبارك؟؟ كده الشكل غايتو بقى أبيخ بيني وبينك:D عارف جهاز أمن الدولة ده الكان متابع ومراقب الموظفين الدينيين للدولة المصرية التي كانت تحكم بما لم ينزل الله من شرائع ...عارف الجهاز ده فنياً كان قوي ومبني على أسس غاية في الدقة والصرامة؟؟؟ صح كان ساقط أخلاقياً ....لكن ليه المؤسسة الدينية ماقالت كده؟؟؟؟؟؟؟ يبقى هي ذاتها أكتر سقوط منه يبقى وين اشانة السمعة؟؟؟؟؟ فنياً وتقنياً كل المعلومات دي تُشكل بينات بغض النظر عن سقوط الجهاز من عدمو ...المفتي قام بسلوك أو مجموعة سلوكيات وضيعة وأستغل منصبه وأفسد وهو أزهري ومتدين وبيعتلي منصب ديني حساس ليه ناس الدين ماقالو ليهو انت غلط؟؟؟ليه المؤسسة الدينية كلها ما انتقدت نفسها وادائها؟؟؟ليه ما تبراءوا من سلوك الراجل ده ده ماسلوك فردي بقى ....دي مؤسسة دينية كاملة فاسدة وبتتستر على فضائح عضويتها دي مافيا دينية ومافي زول متدين في العالم وقفهم قال ليهم انتو سابحين عكس تيار الدين يبقى نحن كناس عاديين يفترض نتلقى الرسايل دي كيف ونتعامل معاها كيف ؟ موش دي مؤسساتنا الدينية؟؟؟ يغلط زول واحد ...أوكي ....مؤسسة كاملة تشارك بالتستر والتكتم ؟يبقى هي مرتكبة الأفظع... يبقى وين الدين؟؟؟؟؟؟ بلا اشانة سمعة معاكم بلابطيخ......الوقائع واااااقعة وحاصلة وكلامك عن فسق جهاز الأمن لن ينفي انه المعلومات صحيحة وفي عليها شهود منهم المأذون الماشاف عقد الطلاق بتاع مها عبد الفتاح وقام عقد ليها على الدون جوان مفتي الديار المصرية ومنهم مواطنين مخبرين ومنهم زوجات المناضل المفتي وأيييييييييييييييك ولانامت عين الأزهر زاتو:D:D مودة يابابكر ---- أنا بالمناسبة لن تُلهيني تجارة أو بيع عن رعاية بوستي ده بالوجهة المخططة ليها وح أستفيد خالص من الوثيقة دي وماراح تبعدوني عن هدفي الانساني النبيل بالمشاكسات دي:D حكمة اليوم :- البوست لسه ما بدأ:D:p محبة للجميع |
اقتباس:
ويسعد مساك ياسيد الناس بتسعدني طلاّتك وممنونة للمتابعة أتمناك بخير ياودعصمان وربي مايحرمنا جيتك |
اقتباس:
تعرف يارشيد استقاء الأحكام الفقهية من علماء الحلال والحرام نوع من البلاده ..... كيف؟! تحجر علماء الدين في الفقه وتحجرهم داخل هذا الفقه في تفسير النص المتواتر قرآنا كان أو حديثا مدعاة للنفور فان كان هذا الدين صالحا لكل زمن ومكان وجب على فقهه التطور حسب مقتضيات العصر والارتقاء فبالنسبة لي لا معنى لحكم فقهي يحرم الربا في عصر المعاملات البنكية بين الدول والمؤسسات العابرة للبحار ، لم يعد الزمان زمان النسيئة والفضل ياصديقي فوجب على علماء الأمة ايجاد مخارج تفسيرية تتناسب مع دين صالح لكل زمان ومكان أو فلنقفل بلادنا عن التعامل مع البنك الدولي وصندوق النقد وماشابههم من مؤسسات ليتعدانا ركب الاقتصاد ونعود الى عصور أظلم واشد تخلفا!! ومع عجز هؤلاء العلماء من ايجاد هذه التفسيرات والاستنباطات بالعودة الى مقاصد الشريعة وليس أحكامها الشرعية - ولا يخفى على حصيف مثلك الفرق بين الاثنين - يبقى لي اتباعهم للسلف في احكام زمانهم بلادة والتصاقا بتفسير غابر للنص!! لذلك ارى في علماء المعتزلة شيئا من حكمة -وقد حوربوا في حكمتهم هذه - فان تعارض عندهم العقل مع النقل ترك النقل الى مايقبله العقل .........! ثم انك لا قد حسمت أمري ياصديق قبل هذه الوثيقة بسنين طويلة ومااشارتي لحكم الخلوة الشرعية والذي البسته ثوب المداعبة الا لتبيان أن الزمان قد تجاوز حكمها على المرأة التي تلوذ بالخدور تقية لغياب اثرها وفعلها في مجتمع خرج من الجاهلية منذ زمن قريب !! فالمراة الآن غزت المجالات المتعددة بما يسمح لها شرعيا -ان كان العقل سائدا- أن تختلي بزميل العمل وغيره هاتفيا أم تراها تجلس اباها طرفا آخر في المكالمة خوف الفتنة فقط لأن مفتيا متحجرا اسقط حكما قديما للخلوة على حكم آني وهو أول من يختلي بأجنبية هاتفيا!!!!! أين المقصد الشرعي ياصديق في رفضي لمكالمة زميلة أو صديقة هاتفيا؟!!!! وهم ليس بعض ولاة الامر الذين انحرفوا يارشيد بل كلهم يفكرون بنفس العقلية الديناصورية التي عفا عليها الزمن وتجاوز أبعادها الضيقة ، سألزم نفسي بأي فقه وتشريع يستصحب متطلباتي ومتطلبات عصري وليس متطلبات ابن عمر في دولة المدينة!!!!! لك المودة ياصديق... |
اقتباس:
كفارتك والف عزيز كرامتك وممكن نبدأ ليك برئيس الجمعية قيقا ككرامة ليك:D أنا بخير وناصر في اتصال تلفوني ببلغك السلام وهو بخير |
اقتباس:
عدم شوف عقد الطلاق ضرورة مدنية لا تفسد عقد الزواج الجديد شرعا خاصة في وجود عم و خال الزوجة و الماذون إكتفى شرعا بوجود أهل الزوجة كدلالة لعدم وجود عائق شرعي. مشكلتك شنو شرعيا مع الزيجات الكتيرة بتاعة المفتي؟ و خاصة انو الوثيقة لم تثبت انو المفتي كان متزوج أكثر من أربعة نساء في نفس الوقت المفتي من الناس البعتقدو في التعدد على إطلاقو المحدود باربع و عندو سندو و بعتبروا دي من الاشياء البتقربوا بيها لي الله |
اقتباس:
في المستند التقرير تم أستجواب واحدة من الزوجات وهي السيدة مها عبد الفتاح وهي فعلاً لم تقل ان المفتي لديه علاقات نسائية خارج نطاق الزواج لكن ياسيدي صدر التقرير الأمني وقبل استجواب الست مها بدأ بي أتهام من عناصر جهاز أمن الدولة بتعدد علاقات السيد المفتي الدكتور الأزهري بن المؤسسة الدينية الذي يشغل منصب ديني هام يتطلب منه هذا المنصب أن يكون راعياً لحقوق أمة بأسرها ....يبقى شهادة عناصر جهاز أمن الدولة أفيد لي من شهادة زوجة سابقة يادكتور أما حكاية زوجة واحدة ولاعشرة فهذه لاتتطلب مهارة خاصة.....يعني المسألة محتاجة بس جهاز كمبيوتر لرصد زيجات السيد المناضل والمجاهد في سبيل الله ممكن نرصد مية وممكن اكتر من خلال عقودات الزواج المسجلة في كل محافظة سليم الكلام يادكتور؟؟؟؟ اصلاً ماصعبة دي اقتباس:
فهمتني ياترى؟؟ يعني المأذون ممكن يتم سؤاله ليه مشيت الاجراءات خطأ؟؟ومين أوعز ليك وهل بتتصرف كده مع كل المواطنين على حد المساواة؟؟؟وهل ممكن يحصل شي اسمو اتفاق جنائي بين جميع اقارب مها على ارتكاب جريمة تعدد الازواج بالنسبة ليها؟؟ لانه سعادتها ماراح تتزوج مواطن عادي ...دي ح تتزوج المفتي بتاع الجمهورية على سن ورمح فممكن يضيع حق مواطن تاني او حتى ممكن تكون مها ما أكملت عدتها وتزوجت بالمفتي المفدى....صح؟؟؟ شفتا كيف يادكتور الامور محتاجة عمق؟ ودقة؟ اقتباس:
مشكلتي انه المفتي في في ظرف تسعة شهور متزوج عشرة زوجات...وهنا هو فااات الرسول في عدد زوجاته أظن وزيجات الرسول جات في كل عمره وصاحبك في تسعة أشهر معناها بالنسبة لي أنه الراجل بيمارس ما يشبه البغاء لكن في شُبهة عقد قاعد يكون عادة أشبه بالعُرفي مقاصد الشريعة بتقول انه عقود الزواج تنجز والقصد من وراءها التأبيد....سعادة المفتي متخذ عقد الزواج لعبة وفكرتو زي فكرة الشيعة مع زواج المتعة ده أسمو تحايل على شرع ربنا ...وأسمو تجارة بمصائر النساء وأسمو انه الراجل ماسوي وما أمين على الأمة ولو هو حاسس بالأمر طبيعي ماكان يطلب الكتمان ويؤجر شقق مفروشة ويتخفى من زوجاته مجرد تخفيه فيهو احساس عميق بالأثم وبأنه ثمة خطأ ما في مكان ما ولا كيف؟؟؟ اقتباس:
طيب تعال اسألك عن رأيك في كلام راشد الغنوشي التونسي عن التعدد وعن مجمل قانون الاحوال الشخصية للمسلمين عارفو؟؟؟؟؟؟؟؟؟؟؟ لأنه رأي راشد الغنوشي كمسلم وراعي حزب أسلامي بيتناقض مع سلوك الراجل الما سوي ده وبيهمني الرأي ده جداً لانه بيفرز بين الناس البتنسج نصوص لنزواتها وغرائزها وبين الناس المنفتحة وعايزة تعيش العصر وماتكون خارج حلباته وبين المرضى زي الراجل ده اللي اسمو مفتي عليك الله امشي شوف رأي الغنوشي في قانون الاحوال الشخصية للمسلمين اللي وضعه بن علي العلماني الشين داااك |
اقتباس:
لا مش صح مها حسب الوثيقة أكملت العدة أحسبي المدة من التواريخ المشار إليها في الوثيقة اقتباس:
ما قالت انو الزول دا كان عندو أكتر من أربع زوجات في وكت واحد. و حتى انو زيجاتو العشرة ممكن يكونن ما تمن خلال شهور زواجو من مها! لانو الجملة الأخيرة من الوثيقة غير واضحة و ممكن نفهم منها برضو انو مها: علمت خلال فترة زواجها و ليس تزوج خلال فترة زواجها |
لنا سلامات
ما أظن نحنا عاوزين نحاكم الزول ده بي موجب الوثيقة أعلاه الوثيقة بتوضح أنو المفتي حلقة في سلسلة فساد طويلة أكيد أجهزة الأمن بتحتفظ بوثائق على نفس الشاكلة لي متنفذين كتار ده في حالة الواحد ضميرو (إذا كان فضل فيهو باقي) فرفر الناس الفي أعلى السلسلة ما عندهم مشكلة طالما المفتي عايم في تيارم يارب عندنا هنا كم زي المفتي ده مع ملاحظة انو شيوخنا هنا سابقين الناس ديك بي كمية من السنين الضوئية. كفارة وسلامتك |
| الساعة الآن 11:44 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.