يا بكة الذي ... السلام كيمان
إنت جمهوري ؟ ولا كنت جمهوري ولا الحاصل شنو ؟

سلام عادل
لا تستطيع يا عادل، أن تصنع لنفسك مجدا من غير الإنتصار على الآخر. ببقى بعد داك تقييم القيّم العدلية يعتمد على وضعية الشخص من هذا الإنتصار

الحاصل يا بروف، انو الكيزان والشيوعيين كانوا بمارسوا علينا إرهاب نفسي، كان علينا دائما أن نثبت ليهم الاثنين في وقت واحد: انو ممكن تكون ما كافر وما متخلف وبرضو إيجابي جدا.
أها، الإتنين كانوا جواهم بحترموا الجمهوريين جدا، عشان كدا كنا نحتمي بأفكار الاستاذ (من غير الانضمام اليهم) في مواجهة الارهاب الكيزاشيوعي.

أمين يا أخي، لو مداخلتي الفاتت مكوجنة، أعفي لي، بجيك بعدين بعد الدوام.

يا بكة الذي ...
خليني أعيد ليك السؤال بطريقة تانيه عشان ما تكوجن لي الاجابة ... هل انت الان بتؤمن بافكار الأستاذ محمود عليه رحمة الله ولا لا ؟

كدا، السؤال ساهل وأنا بحب الأسئلة الساهلة
الإجابة: لا

ليه لا ؟؟

مالها افكار محمود محمد طه ؟



اسي ده سؤال صعب :)

قبل فترة قصيرة يا أمين، وضع الدكتور الجمهوري عبد الله أحمد النعيم عنوانه البريدي بسودانيز أون للتواصل المباشر حول كتاباته والفكرة الجمهورية، بعثت له برسالة تتعلق بأمر جوهري في الفكرة الجمهورية:
ردّ عليّ قائلا:
لو المراسلة دي، يا بروف، ما عندها علاقة بسؤالك، رجعها لي بقبلها

الظاهر إنو الدكتور صحي كان مستعجل!!، وانا بقرا في الرد حقو، إتذكرت الساقية

شكرا يا بكة علي الاجابة الواضحة ...
----------------
عليك الله يا دوك ما تشكر لينا بكة في الخريف !!
تعرف ... "بكة الذي" كان عندو ميزة علي الخلق الحايمة دي فهي عدم الاحساس ... خلايا الاحساس عندو ماتت منذ الف سنة مما تعدون !! :(

سلام خالد غالي، يا سيدي سؤالك برضو ساهل، أفكار الاستاذ هي محاولة لإخراج النصوص من ورطة صلاحيتها لكل الازمنة، والإحساس بالطبخ داخل تلك الافكار واضح خاصة بعد زوال الإنبهار بجراءة الافكار.

يا الزوول، أوعة كلام أمين الأخير دا، يطلعني من لستة العشرة، وحات سيدي الحسن، أنا حساس وحتى بالإمارة لما أوباما فاز في الدورة الأولى بكيت!

موش عشان مستعجل؛ دي إجابة جميع الجمهوريين!
الكلام عن رسول الرسالة الثانية:
"هو رجل آتاه الله الفهم عنه من القرآن، وأذن له في الكلام"
مكتوب في كتاب الرسالة الثانية، الكتاب مطروحة فيهو أفكار الرساالة؟! وبرضو المفروض نحن نقتنع بأنو الاستاذ لم يشر صراحة بأنه ذلك الرجل؟!

خلاص خلونا ننتظر قدوم ذلك الرجل، وفي الوقت دا، نحن نكثف جهودنا المدنية لتحقيق العدل الإجتماعي الذي كان ينشده الاستاذ ولو الرسول جا، خير وبركة، ولو ما جا، نكون ما عطلنا روحنا

رسالة عاجلة من الزعيم البعثي طارق كانديك إلى السيّد بابكر عبّاس: لا مانع لدينا من دعم ترشحك لمنصب والي ولاية الجزيرة في أول إنتخابات ديمقراطية قادمة وذلك بشرط أن "تختى لينا أمريكا دي" (وجه ثوري ضاحك).

الاخ بابكر شكرا على البوست البهبش جوانا محل امريكا قاعدة
عايز اقول ثلاثة حاجات عن امريكا والجمهوريين.

1-امريكا الافلام ومايكل جاكسون والحلم الامريكي المامعروف شنو احلى من امريكا
2-سنة 2001 قلت للاستاذ عبد اللطيف عمر انتو الجمهوريين بدوكم تاشيرة بسهولة... نفى الحكاية دي.
3- في واشنطن هنا الجمهوريين اكتر ناس ريلاكس وسط السودانيين يعني ما بهاتو بي مشي السودان كتير و يمكن ما بمشوا ذاتو.. ودا ما انتقاد لكن ملاحظة... انا شخصيا كان تميت سنتين ما مشيت السودان بطق لي عرق.

صباح الخير يا شيخ إدريس (الأرباب)
2- بعد مقتل الأستاذ، أعتقد إنو كان في تعاطف قوي معاهم، ممكن سهولة التأشيرة يقع في خانة اللجوء الديني
3- الجماعة ديل، مرحمنين، لو في أمريكا أو في أي مكان تاني، هم صادقين صدق شديد في إتباع الفكرة

داير الجد يا مُبر؟
أنا والبعثيين ديل، أصلو ما ح نتفق؟ هم أبدا ما ح يقدروا ينسوا مقتل صدام، وأنا حب أمريكا دا، ما ببدلو
.بكفاية يا أخي، اصواتم الاتناشر الفي عموم الجزيرة دي!

طبعا عدم قبول التحالف لا يفسد للود قضية

"أمة عربية واحدة ذات رسالة خالدة"

بهناك يا أمين، باون لاين، بله موسى، منزل ليك بوست إهداء عن أمريكا، يقطع القلب، وفضّل ليهو بس ينده شيوخ أبحراز عشان يجيبوك؛ وانت "سادر في غيّك"!
يا أخي، حركات عسوم دي، سيبها، ورد ليهو في البوست دا، إن شاء الله ببسمة

بكة الذي ...
شفت البوست و الدوك يوم شكرو ما يجي ... ما بقدر أزيد لانو زي ما قال المثل " أي كلام عن بهناك هنا ما صاح في حق الهناك و الهنا " !! :rolleyes:



---------------------
انتو يا بكة محلكم ده ما فيه جمهوريين ؟!!

مرة مرة كدا بجينا الاستاذ شقيليني (الشهير ببكاسو) وهو جمهوري الهوى فقط، بحب الأستاذ موت، لكنه لا يرضى أن يُوصف مباشرة بأنه جمهوري!

دايرين لينا زول جمهوري عديل ... أنا ممكن ادعو أخونا جمال المنصوري .... و بالتاكيد ما بكون عندو مانع ...

سلام يا أمين،
مشيت قوقلت عن جمال المنصوري، الرجل يبدو انو جمهوري مختلف وواضح.
لو عندك الإيميل بتاعو أُخد لينا من إذن ورسلو لينا لو أمكن، خلينا نتواصل معاهو، وإن شاء الله تكتب ليك في ميزان حسنات نشرك للوعي والتنوير.