سمعوا عن طفلة بحاجة إلى عملية لإستئصال عينها..
وإنتشر الخبر.. فتدافعوا كل يحدث معارفه... ومنهم من كان على معرفة بإدارة مستشفى مكة... فكان تخفيض التكلفة للنصف.. والنصف الآخر جمع في أقل من 3 ساعات... وإلى الآن تم إجراء 8 عمليات بحمد الله... ولاحظوا مشكلة توفير الدم ومشتقاته... فكان التبرع بالدم.. وتقدمت الفتيات الصفوف... وصار الدم يوفر في أقل من 5 ساعات... وصحيح أن كل الخدمات داخل المستشفى تقدم للأطفال مجاناً... إلا أن هناك بعض الفحوصات والأدوية غير متوفرة في المستشفى... لجأوا لبعض شركات الأدوية لتمنحهم أدوية مجانية... ولم تتأخر شركة الحكمة ومن ورائها كمبال والتوكيلات الطبية... والقائمة طويلة من داخل وخارج السودان... |
وبدأ التفكير في أن لا بد من تجهيز إحتياطي من الأموال لتكون جاهزة لمقابلة أي طارئ...
وبحمد الله لم يحدث أن إتصل بهم طبيب يطلب دواءً أو صورة أشعة لطفل وتأخروا عنه... والآن لهم حساب جارٍ مع أربع صيدليات ومركزٍ للتحاليل الطبية وآخر لصور الأشعة... عبر إستمارات موجودة بطرف الأطباء في القسم.. يأخذها مرافق الطفل المريض إلى إحدى هذه الجهات.. وينال ما يريده معززاً مكرماً.. وتراهم هم فقط في آخر الشهر.. يسألون عن قيمة المطالبات ويدفعونها دون سؤال أو تذمر... |
ومن خلال تواجدهم شبه اليومي في قسم الأطفال..
وذوبان الحواجز بينهم وبين الأطفال وأسرهم.. تكشفت لهم مشكلة جديدة وهي مصاريف السفر والإعاشة... فمعظم هؤلاء الأسر من خارج ولاية الخرطوم.. وجلسات العلاج والمتابعة قد تستمر لسنوات... فكان الإتصال بشركات الترحيلات وأصحاب البصات السفرية... وبحمد الله فقد كانت إستجابتهم كمجموعة لكل طلبات السفر التي وردتهم هي 100%... ولم يغفلوا عن أهمية الإهتمام بالنظافة اليومية.. وأعمال الصيانة الدورية لقسم الأطفال... فظلوا لصيقين بالشركة المسؤولة عن نظافة القسم لضمان أن يكون أداؤها على أعلى مستوى... وكانت إستجابتهم الدائمة لإصلاح أعطال دورات المياه المتكررة.. وصيانة النوافذ والأبواب.. بالإضافة إلى صيانة الأجهزة الطبية وتوفير بعض المعينات البسيطة والمحاليل لمعامل المستشفى من داخل وخارج السودان... |
ولم يغفلوا الجانب الإجتماعي.. فكان إلتزامهم بزيارة أسرية كل أسبوع لمنزل أحد الأطفال المرضى بولاية الخرطوم...
وزيارات العيد والمناسبات الدينية وغيرها وغيرها... بالإضافة إلى قيامهم بالمساهمة في إفطار المرافقين بالمستشفى طيلة شهر رمضان.. من خلال توفير مواد عينية وتواجد شبه يومي ساعة الإفطار.. ترى الفتيات يساعدن في تحضير الطعام.. والشباب يحملونه ليقدم للمرافقين... وقاموا بتنظيم حملة صغيرة ضمن نطاق معارفهم وأصدقائهم لجمع ملابس مستعملة لتوزع بمناسبة العيد على الأطفال... وجائتهم طفلة عمرها تسع سنوات تحمل بعضاً من ملابس العيد الجديدة خاصتها.. لتهديها إلى إخياتها اللاتي لم تلدهن أمها... |
كفانا إندياح الليلة
|
[align=right[frame="7 80"]]اليوم اضم صوتي وعضويتي واتعهد بان اساعد واساهم بكل ما تجود به يدي
لمساعدت الاطفال ذوي السرطان اسجل عضويتي لمنظمة نحن من هذا اللحظه هل توافقون اتمني لكل اهل الخير الانضمام من هذا البوست والتعهد بمد يد العون ايمان [/align][/frame] |
اقتباس:
ايمان لديها الكثير لتضيفه وتعطيه وتقدمه من تجربتها الشخصية ايمان ايتها القوية المعطاءة دثرك الله بثوب العافية يامن هزمتي المرض في اخبث صوره كوني بالف خير ياحبيبتي وراجيين منك الكتير يامنقا وانا كذلك اضم صوتي لايمان واعلن تأهبي واستعدادي لكل عمل من شأنه التخفيف علي هؤلاء الاطفال |
اقتباس:
هذا التنادي كان في بداية فتح هذا البوستر .. فماذا تم من خطوات حتى الآن. ؟ كيف يمكن متابعة هذا الموضوع الحيوي .. الشكر والأجر إن شاء الله للقائمين على تجمع "نحن" ، وإن كان من المفروض على حكومة السودان أن تشمل علاج كل حالات السرطان على حساب التأمينات الإجتماعية دون إشتراط الإشتراك .. أي مجاناً بحيث تتحمل مصلحة التأمينات الإجتماعية تكاليف العلاج داخل السودان وتبقى الجهات المدنية رافداً آخر وإن إنبغى تنظيمه. نرجو المتابعة يا شباب .. فلا نقعد بعد كل خطوة ولا نقف عند كل فكرة دون حراك. لكم التحايا |
أشكر كل المتداخلين ومرحب بأي زول داير ينضم للمجموعة
وحواصل وبرحع ليكم في النهاية إنشاء الله |
هو طريق طويل إرتضيناه لنمشيه معاً ضد مرضٍ خبيث تزايدت أعداد المصابين به من بني شعبنا الطيبين في الآونة الأخيرة بصورة مخيفة شيباً وشباباً.. مرض لا يفرق بين إمرأةٍ وطفل..
ولمعرفتنا العميقة بصعوبة هذا الأمر وضخامة حجمه وطبيعة العمل الطوعي بالسودان خاصة ونحن مجموعة من الشباب المتطوعين لسنا منظمة أو جمعية رسمية وليس لدينا أي لون سياسي... لكل ما تقدم ولرغبتنا الأكيدة في مواصلة هذا المشوار بلا إنقطاع أو إحباط، إرتأينا أن نبدأ بالأطفال فهم زهور الحياة.. لا نتعامل مع المرض وآلامه فقط ولكننا نتعامل مع أدق اللحظات الإنسانية الحرجة في حياة هؤلاء الأطفال الذين لا يجيدون التعبير عن آلامهم وعذاباتهم بالإضافة إلى أوضاعهم الخاصة والتي تشكل محنة بالنسبة إلى أهاليهم الذين لا يملكون أن يفعلوا شيئاً إزاء آهاتهم الخافتة... نعم... كان صعباً علينا في بادئ الأمر أن نتقبل أن هذه الأجسام الغضة البريئة مصابة بالسرطان... وصحيح أننا تأثرنا ونحن نشاهد الدموع في أعينهم والحزن يعلوا ملامحهم... لكنهم في نفس الوقت كانوا أقوياء يمدوننا ويمدون كل من يراهم بالأمل والقوة والصبر... لذا كان علينا أن نحاول قدر المستطاع بأن نقدم لهم ما يزرع إبتسامات الفرح على أوجههم الصغيرة... لا نود أن نروي لكم قصة رحلتهم مع المعاناة والآلام والدموع... ولا أن ننقل لكم منظر أم تشاهد صغيرها الذي كان يتعثر في مشيته بينما كان يلهو مع أشقائه قبل حين وهو يركض في مستنقع موحل مظلم تشده آلاف الأيدي الغامضة.. تجره للموت جراً وهو أضعف من أن يقاوم... ووالده مغلوب على أمره تقف أمام شجاعته سدود من مرض لا يعرف المنطق.. فكل ما ذكرنا معروف لجلكم إن لم يكن كلكم. ولا نود أن نسرد ما قدمناه طيلة الأشهر الماضية.. هذا إن كنا قد قدمنا شيئاً.. فليس هذا هو المهم... فلا يزال المئات من أطفالنا هذا إن لم يكن الآلاف في إنتظار مصير مظلم ما لم تتحد كل الجهود من أجلهم.. لذا وكما أسلفت أنه ليس المهم ما قدمنا أو ما قدم غيرنا... المهم ما هو آت وقادم... ما يهمنا هو ذاك الغد المولود في رحم الضباب... فلنتكاتف جميعاً يداً واحدة من أجل مرضى السرطان عامة ومن أجل أطفالنا منهم خاصة.. من أجل غد أجمل فلنساهم من أجلهم بكل ما هو مستطاع ولا يجب أن نبخس قدرأي مساهمة فكلها تحدث فرقاً... كـــــن معــــنا مــــن أجلـــــهــم |
كيف ممكن نساعد؟؟!
سؤال شاغل بال ناس كتار... وما لاقين ليهو إجابة... في الداير يساعد بروحو وزمنو أو بقروشو أو بمعارفو... وفي البتعاطف بس معاك وما بقدر يقدم ليييك أي حاجة... وكل القلناهم ديل إحنا محتاجين ليهم وأهم حاجة إنو مافي زول يقلل من قدر مساهمتو لأنو أي حاجة بتعنى كتير للأطفال وأهلم.... |
كــيــــــــف نرسُم بسمة على وُشوشُم؟؟!!
تعالوا وشاركونا في اليوم الترفيهي الشهري الإحنا قاعدين نسويهو ليهم يوم السبت الأخير من كل شهر... أو تعالوا العنبر براكم في أي وكت بعد الساعة 12 وإستأذنوا الدكتور القاعد.. السراير الفي عنبر 12 سرير، جيبوا على عددم هدايا... ما عندكم حتى واحد جنيه حق الهدية، يا أخوانا ولا تزعلوا روحكم.. شيلوا ليكم جونتيات بلاستيك طبية من مكتب السسترات و أنفخوها.. وأمشوا ألعبوا معاعهم... والله سؤالكم عن أحوالم ولعبكم معاهم... عندهم بساوي أكتر من مليون جنيه... بتعرفوا ترسموا تعالوا علموهم لينا كيف يرسموا ويلونوا حياتم.. وما تشيلوا هم المواد إحنا بنتشايل ونوفرا ليكم... تقدروا تعلموهم أي حاجة.. طيب راجين شنو.. هم في إنتظاركم... وكدا ممكن تساعدوا.. |
كيف نوفر ليهم الدوا
مجموعتنا بتتعامل مع 4 صيدليات عشان مافي طفل يتحرم من علاجو ولا يتأخر يوم عن جرعتو ولا عمليتو تتأجل: 1- صيدلية المركز (الذرة) الشعبية (ش القصر). 2 - صيدلية مركز فضيل الطبي (ش الحوادث). 3- صيدلية الشهيدة د. سلمى (ش السيد عبدالرحمن). 4- صيدلية العمارات (ش محمد نجيب). أمشوا وأسألوا من حسابنا (مجموعة متطوعي مستشفى الذرة) وأدفعوا البتقدرو عليه، أو شوفوا لينا شركة أدوية وجيبوا لينا منهم عينات مجانية لأي أدوية أطفال من المضادات حيوية لغاية البندول الشراب... وكدا ممكن تساعدوا.. حسابنا الرئيسي مع صيدلية الشهيدة د. سلمى ممكن تمشي وتدفع هناك مباشرة بس اسأل من حسابنا مجموعة متطوعي مستشفى الذرة، أو ممكن تكتب شيك باسم الصيدلية وأضرب لينا إحنا بنجيك ونوديهو ليهم أو ممكن تنزلا في حساب الصيدلية مباشرة البنك السعودي السوداني صيدلية الشهيدة د. سلمى رقم الحساب: 21498 بس لمن تنزل قروش ورينا برسالة أو تلفون أو حتى إيميل عشان نكلمم ينزلوها لينا في حسابنا معاهم |
هذا البوست يمسك بتلابيب الإنسانيّة فينا . .
ولا نطيق فكاكا. هاشم إنتهازي لا أستطيع أن أوفيكم حقّكم . . فلنوفيهم حقّهم علينا. معكم بجهد المقِل. رقمي 00971505615109 |
http://sudaniyat.net/up/uploading/nasir-omer3.jpg http://sudanyat.org/image/nasir-omer2.jpg http://sudaniyat.net/up/uploading/nasir-omer1.jpg اللوحة للفنان التشكيلي ناصر عباس (بلجيكا) مساهمة في حملة سودانيات لدعم المنظمة... أنزلتها بثلاثة أحجام ... |
أكيد بكرة أحلى
معاكم وبيكم |
كيف نوفر ليهم الدم ومشتقاتو
أطفالنا محتاجين دائماً للدم ومكوناته (صفائح دموية أو بلازما)... فخليكم معانا متبرعين منتظمين كلها 20 دقيقة وبتكون أسهمتوا في إنقاذ حياة 3 أطفال.. سجلوا بياناتكم معانا وحنتصل بيكم لأنو دايماً أطفالنا في حاجة... ولو ما عارفين فصيلتكم شنو أضربوا لينا وتعالوا معانا إستاك بعملوا ليكم فحص الفصيلة طوالي في أقل من 5 دقائق... وإذا كنتوا بتقروا في جامعة أو معهد أو شغالين في حتة معاكم فيها موظفين كتار.. ممكن تنسقوا معانا... وإحنا بنجيب ناس البرنامج القومي للتبرع الطوعي بالدم ونعمل كلنا سوا حملة تبرع بالدم في حتتكُم الإنتو فيها... وأكيد إنشاء الله تكون ناجحة... بس إنتو إتصلواعلينا وحتلقونا قدامكم... |
فحوصات الدم وصور الأشعة
والأنسجة المريضة الأطفال دايماً في حوجة للفحوصات، منها تحاليل للدم أو صور أشعة ومع إنو المستشفى بتعملا مجاناً لكن في فحوصات ما متوفرة هناك... إحنا بنعملا ليهم في: 1- مركز زين للتحاليل الطبية. 2- مركز الخرطوم التشخيصي المتطور. 3- مركز فضيل الطبي. 4- مستشفى سوبا الجامعي التعليمي. 5- المعمل القومي المركزي (إستاك). قدرنا نلقى فرص مجانية شهرية منهم لكن برضو ما كفاية لو بتعرفوا ليكم معمل أو مركز بتاع أشعة كلمو خليهو يدي كم فرصة مجانية أو تخفيض للأطفال، أو أمشوا وشوفوا حسابنا كم مع الناس ديلا وأدفعوا البتقدرو عليهو... |
مشاكل السفر في المشية والجية
معظم الأطفال العيانين أسرم ما من الخرطوم وجايين من بعيد ومرات كتيرة ما بكون عندهم حق السفر وبفوتو الجرعات وحتى إذا وصلو الخرطوم بنقطعوا وما بكون عندهم حق الرجعة... لو بتعرفوا زول بتاع شركة سفريات أو ترحيلات ممكن تشوفوا لينا يوفر لينا تذاكر سفر مجانية أو بتخفيض. نسقوا لينا معاهو، على الأقل ممكن يعمل لينا حساب معاهو ونحنا نحاسبو آخر الشهر عشان مافي أسرة تتأخر على جرعتا أو في الرجعة... لأنو دي واحدة من الأسباب الأساسية البتخلي الأسر تبطل تجي للعلاج... وكدا ممكن تساعدوا... |
حــــوجـــة القــســــــــــم
القسم عندو إحتياجات شبه يومية وأسبوعية وحاجات تانية كتيرة.. أجهزة ومعدات.. حاجات خاصة بالأطفال وبس للأطفال.. و محتاج صيانة أول بأول للحمامات والمكيفات والأنوار ... إدارة المركز بتوفر جزو كتير من الحاجات دي ولكن ما كلها وفي حاجات مرات بتتأخر وروتين الحكومة كلنا عارفنو.. لو بتعرف ليك شركة معدات طبية ممكن تدينا أجهزة ومعدات مجاناً أو بتخفيض دا كتير بساعد.. لو بتعرف ليك مغلق أو شركة هندسية أو ناس فنيين ممكن يعملوا لينا حاجة من الحاجات دي... ولو كنت إنت زاتك أكيد ممكن تساعد... |
سلام للكل
غداً الجمعة سيكون أعضاء المجموعة على الهواء مباشرة عبر إذاعتي الإف إم 100 برنامج: أكيد في أمل من الساعة 5 إلى 6 مساءً 89 برنامج: صحتك الساعة 5:30 عصراً وأكيد بكرة أحلى |
تفعيل موقع المجموعة الإلكتروني
بحمد الله فقد تم تفعيل النسخة التجريبية لموقع المجموعة الإلكتروني تحت العنوان
www.wegroup.sd وهي باللغة العربية |
خالد بعد دا الكورة في ملعبك
أعمل التصميم والداتا في الموقع ورسلو لينا والدعوة مفتوحة للكل |
بحمد الله أقامت المجموعة يومها الترفيهي الثاني عشر للأطفال بنادي جامعة الأحفاد اليوم السبت 21/03
وكان الجديد في اليوم أنه تزامن مع عيد الأم فكان توزيع الهدايا على الأمهات بواسطة الأطفال أنفسهم وشاركتنا فرقة الكشافة البحرية بمسابقات وألعاب وإنشاد وكان الحضور الأجمل للشاعر الإنسان محجوب شريف والذي أنشد مع الأطفال بعضاً من قصائده ومشاركات شعرية من بعض أعضاء المجموعة وتفاعل فوق الوصف من طالبات جامعة الأحفاد +++++++++++++++++++++++++++++++++++ إستضافت إذاعة أمدرمان إف إم 100 المجموعة مرة أخرى يوم الجمعة 20/03 في برنامج أكيد في أمل كما أفردت أسرة برنامج أفتح الباب بإذاعة مانقو 96 مساحة خاصة ومداخلة عبر الهاتف للمجموعة وذلك في حلقة الأمس الجمعة 20/03 بمناسبة مرور سنة على بداية البرنامج +++++++++++++++++++++++++++++++ إستضافت إذاعتي أمدرمان إف إم 100 والإقتصادية 89 أعضاء من المجموعة يوم الجمعة 13/03 وتم عرض نشاطات المجموعة وكانت بالجد حلقتين رائعتين ++++++++++++++++++++++++++++++++++ تم عمل تحقيق عن المجموعة ونشاطاتها بجريدة الوطن عدد الأربعاء |
اقتباس:
تجولت في الموقع التجريبي .. شغل جميل حقيقة . لا أعرف لماذا تسمونه تجريبي؟ هذا عمل محترفين .. سأقوم بالعمل في نفس التصميم لجعله باللغتين يعني إضافة النسخة الإنجليزية ما سأفعله هو وضع إعلان عن الموقع أعلي المنتدي وفي صفحة سودانيات الأولي بهذه الطريقة يصير الموقع معروف . كذلك سأفعل نفس الشيء في موقع البركل وأدعوكم لنشر رابط الموقع في كل المواقع السودانية.. تهنئة صادقة للمصممين... |
والله يا خالد أخجلتم تواضعنا
إحنا لقينا التصميم دا في microsoft puplisher ولعبنا فيهو لكن الموقع والإستضافة مجانية من الجمعية السودانية للإنترنت ولهم الشكر خالد طالبنك تصمم لينا حاجة للموقع لأنو النسخة المرفوعة الآن غير قابلة للتعديل في إنتظارك تحياتي للكل |
ممكن برضو أغير ليكم في التصميم نفسه لمعالجة بعض الأخطاء الطفيفية مثلا إتجاه الصفحة يعني ما تكون مايلة لليسار.
كذلك تضمين الإنجليزية وده بيعني ترجمة (محترفة) لكل ما هو منشور بالعربية في موقعكم المؤقت .. رأيك شنو ؟ مثلا ده بعد التعديل شكل الصفحة ممكن يكون كده : [align=center]http://refag.com/image/wegroup.jpg[/align] |
this what we r talking about dear
keep the good work up cann't wait ya sa3adtak لك ود بلغة الإنسانية ولنا ما تبقى من ترجمات الإغريق |
الإثنين 23/03
إستمعوا إلى إذاعة مانقو 96 إعادة حلقة برنامج أفتح الباب الساعة 9 م |
عمدتنا الحبيب
غايتو جنس غشة عشتها، إتحسبت على عمري، لكن النتيجة!!! إعجاب منقطع النظير، فرحة مبااالغة... تعرف يابا، قريت عنوان البوست وقعدتا أتضارآ منو جاي، جاي،،، ما شنو؟؟؟ قال قواعد وآلاء وأخواتها إفتكترها حاجة جديدة مستحدثة مكملة لي ناس إنا وأخواتآ... يا زول ريديتي ليك، قلتا مش معتصم هو سيد البوست، كدي النستفيد ونشوف آلاء دي الجابها لينا عمدتنا، موقعها وين من الإعراب؟؟؟ لقيت بسم الله صورة، هديت أعصابي، قلتا النكمل، بعدها صورة لي مجموعة وسطهم خلود والغريبة أول شخص وضحت ليا صورته، إمكن الصلعة،، إتوكدتا الصورة ولقيت أني وسطها ممثل في إتنين،،، شهنوزا (شاهناز أحمد بدري، بت أخوتي وكمان اليزابيث هوتشكينز "أختي").. يا زول إرتحتا أكتر لمن لقيتك وسط الزهور مصور ودخلتا بي قلب قويييييي. بقيت أقرا وأندهش، أعجب وأنشرح.. ما إنتهازي فكا الطلاسم.... بفكر كيف أتلم على الشغل دآ،، ما حأطول قبل ما أجي بالبقدر عليهو وربنا ويفقكم.. تحايا وحب ومودة وكل خير لأهل الخير بديت إتا وقلتا وبعد ما |
عمي الحبيب بابكر مخير
وإيه رأيك إنو إنتهازي زاتو إنت بتعرفوا أنا ناظم أسأل مني زينب وآمنة تحياتي وفي إنتظارك |
اقتباس:
أسأل العنبة وحسي إتا رجعتها تاني من جديد،،،، ما قلتا ليا أسأل العنبة والتفاح والورد والزهور،، وكل البيجي من طرف الحبيب بيكون حبيب... مدام قلتا ليا أسأل أغلى غاليين، أبقىخلاص عرفتا حتى لو ما عرفتك، برضي عرفتك.... وحقيقي يابا عرفتك... بس البكتبو هنا دآ؟؟؟ خليهو سر بيناتنا،، ما تمشي تشمر الشابات ديل وإتى عارف "زينب" برآك..... :eek::o:( لك إبني الحبيب كل الشكر على هذا العمل... وسودنا لساتو بي خير، مدام إتو حفظت مستقبله..... |
ما تخافش يا كابتن مش حفتن
وشكراً لجميل ما سطرت |
التحية و التقديرو الاحترام و الاجلال و الاعزاز لكل من ساهم في هذا العمل الانساني الخير ،و نسأل الله التوفيق و السداد ..
|
ستشارك المجموعة في المنتدى الأسبوعي للنادي
يوم الإثنين 6/4 الساعة 8 - 11 مساءً بالتعاون مع البرنامج القومي للتبرع بالدم تحت عنوان دور التبرع الطوعي بالدم في إنقاذ الحياة أطفال السرطان نموذج ستكون للمجموعة كلمة + مشاركات لأطفال مصابين وأسرهم + عرض لفيلم رحلة علاج بالإضافة إلى العرض التوضيحي كيف ممكن تساعد ومشاركة المطربة المعروفة إيمان لندن والشاعر د. عمر محمود خالد حضوركم يهمنا |
المكان
النادي العائلي الخرطوم شارع المطار قبالة نادي الضباط |
شاركت المجموعة في منتدى النادي العائلي الأسبوعي يوم الإثنين الماضي 6/4
وتجاوب حضور المنتدى مع الفقرات ومشاركات الأطفال وتقدم الصناعيون ممثلون في الأستاذ عبدالرحمن عباس تبرعاً سخياً مقداره 10,000 ج.س وأعلن ممثلوا 4 شركات للسفريات عن تكفلهم بكافة بنفقات سفر الأسر داخل السودان مهما بلغ العدد إلى ما شاء الله وكتبت صحف الرأي العام وآخر لحظة عن المنتدى في أعدادها الصادرة صباح اليوم الأربعاء 8/4 وتسلمت المجموعة دعماً مالياً من بعض الأسر مقداره 600 ج.س وتم توزيع الهدايا على الأطفال المشاركين وتكريم د. عرفات من قسم الأطفال بالمركز والذي سيغادرنا إلى السعودية للعمل هناك كما دعت إدارة المنتدى المجموعة للمشاركة بصورة دائمة في المنتديات الأسبوعية لإستقطاب الدعم |
سلامات ناظم
أنا خلصت النسخة الإنجليزية من الموقع .. ليتك ترسل لي ترجمة محترفة للصفحات. سأبدأ في الصفحات العربية إن شاء الله في هذا الويك إند |
الأستاذ ناظم .. والأخ خالد ..
تحية تقدير ومباركة لهذا الموقع الحيوي .. وتلك الرسالة الإنسانية الحيوية .. والشكر لكل من نفح من موروث نخوته ليساهم في هذا العمل ... وفقـكم الله وسدد خطاكـم لخدمة هذه الفئة التي جار عليها الزمان ولم تلق الدعم الكامل من الجهات المختصة ، فنهض بالمسؤولية أبناءً حباهم الله بالشهامة وخصهم بحب الخير وهداهـم للبذل من أجل الغير في نكران للذات لا تنكره عين ولا تخطئه نظرة. بارك الله فيكم وبكـم .. ودمتم مخلصين. على الرغم من أن الصور لم تفتح وبدت في شكل مربعات صغيرة وعلى رغم أن التبويبات أيضاً لم تفتح ، إلا أن ذلك لم يؤثر في فخري التام بما رأته عيناي ، فلكل من وضع لبنة هنا أنحني ، ولكل من ساهم بكلمة له الإجلال مرتقى. |
|
| الساعة الآن 03:17 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.