سودانيات .. تواصل ومحبة - كمال بدري المحارب في سوريا ، الى جوار ربه

كنت في لندن لمن فتحت سودانيات وقريت البوست دآ،
حقيقي إستغربت ولقيت المداخلات كلها تصب في غير الذي كان يدور بخلدي،،
وحسي لمن رجعت وبي مزاج قلتا أجتر البوست وأشوف قصد شوقي
وبانت القصة كما يراها شوقي بدري "ملاحظة لمن كان في لبث، قلتا شوقي وحسي قلتا شوقي بدري"
فقد الشباب قطع شك مؤلم لكن المؤلم أكتر أنه والدته والمفروض متعلمة ومتحضرة ما كان تدفعه لي طريق، يعلم الله وحده الي أين أصحابه منقلبون..
كنت قبل إزالت اللبث عايز أذكر حديث ليا كان مع الخال مالك بدري "عمه لي شوقي" وهو من قيادات الإسلاميين ورجل عالم وخاصة في علم النفس،،
آها الزول دآ بيشوف حكاية الإستشهاد (حسب فهمي لي نقاشي معاه "أنها تطرف وحالة نفسية غير منتظمة"- دآ ما كلامه لكن ما فهمته وهو عالم وأنا زول ساكت).
الوليد مسكبن راح فيها وأمه لساتها بتكابر أنها ما عايز فيهو عزاء ومثلها كُثر أكان أمهات أكان أباء وبعد دآ نتكلم ونتبجح أنه أحنا المسلمين روابطنا الاسرية ومحبة الجنآ وطاعة الوالدين في حين أنه الامهات في أمريكا يمرقن يتظاهرن ويسبن ويلعن سلسفيل حكومتهم لمن ترسل أولادهم للحروب ويوم أسود على الحكومة لمن يموت واحد..
يا أخي مش الإسلام ولاقرآن الكريم بيمنعنا من أن نرمي أنفسنا في التهلكة وبعدين الوليد لمن مشى، عارف نفسه ميت،، مش دآ برضه إنتحار والإنتحار سيده بيمشي الجنة..
شكرن شوقي لطرحك موضوع حيوي وهام وديمة ياكا شوقي بدري..