تتمسخري عليّ؟!
عافي ليك؛ عشان بركة عيد الأضحى

داء المغتس حجرنا ( المصالح )
ولكن يادكتور دي ما المحرية فيك .

تقصد مصلحة شخصية؟

واضح يا بابكر أن معظم المتداخلين الذين أدلوا بإفاداتهم في هذا الخيط لم يطّلعوا عليه!
عموماً بوست مميّز.

أولا حمد الله على السلامة يامبر
اعتبرنا ما فهمنا حاجة من هذا البوست عاوين افادتك اوقراءاتك لرغبة الدكتور بابكر الانضمام لحزب الامة .
مع احترامي

السؤال يا فتح العليم هو:
لماذا لا يستغل الصادق المهدي الفرصة لكنس المؤتمر الوطني نهائيا؟
هل الصادق خائن؟ هل هو غبي؟
السؤال دا، لازم تلقى ليهو إجابة ولازم زهير السراج كان يبحث عن الإحتمالات الخلت الصادق المهدي يقيف الموقف دا!!
الصادق المهدي متأكد من نهاية الإنقاذ خلال هذه الشهور، وبكسب في الزمن للوصول إلى إتفاق وحلول تضمن أقل الخسائر.
لو يا فتح، أديتني إجابة سياسية قوية ومقنعة عن سؤالي الفوق؛ بكتب ليك رسالة مفتوحة للصادق وبزيدك في البيعة برسالة للسيدة مريم...

سلامات يابابكر

رؤية الصادق المهدي وخوفو من الحرب الاهلية دي هي نفسها الفزاعة المستخدماها الحكومة لتخويف الناس!! ثم انو ده خطر الناس كلها خاتاهو في حسبانها لكن بيسعو للثورة وتجنيب البلد للخطر ده في نفس الوقت، الحرب الاهلية والنظام ده يستمر ديل بنفس درجة السوء بالمناسبة عشان كده لازم يكون في حل تالت

اجاوب ليك انا

استحملني حا اكتب ليك كمية من المداخلات هنا

لانو الصادق المهدي جبان ولايبحث الا عن نصر ذاتي، الصادق المهدي ضعيف وجبان، كنس المؤتمر الوطني ما بالبساطة دي بيحتاج لعمل وجهد وتضحيات جسام اقلاها نكران الذات والعمل (مع الاخرين) لمصلحة الوطن فقط ، وده المادايرو الصادق ومابيقدر عليهو وبعيد تماما من اجندتو
الصادق لايعمل الا لمصلحتو فقط، والصادق جبان وخوّاف عدييييل ولا يقدر على التضحيات الجسام
الصادق عارف كويس انو حاليا وزنو مازي زمان وعارف انو الناس عرفتو هو شنو بالظبط وعارف انو السودان في المرحلة الجاية محتاج لقوة وعمل قاسي وصعب هو عارف كويس انو ماحايقدر عليهو، يازول اقول ليك؟ الصادق من مصلحتو يظل النظام ده قاعد والبيعمل فيهو اسي ده بس لرفع الحرج عن نفسو وفك الضغط البيمارسوهو عليهو اعضاء حزبو، لو ماكده يمين كان ختة الخمسة فوق الاتنين وقعد يتلفت زي سيدكم التاني داك

تبا لجميع الاسياد :mad:

عارف يابابكر

لمن قريت كلامك عن انك داير تنضم لحزب الامة وبعد داك طوالي قلت لانو الصادق المهدي رؤيتو بلا بلا بلا بلا
استغربت خالص وقلت معقول بابكر بيفكر كده؟ لانو الواضح انو حزب الامة مابيمثل الامة وانما يمثل الصادق وآل بيته، خلينا للدقة نقول بيمثل الصادق وآل بيت الصادق اللسة ماطلعو عن طوعو!!
وانت شكلك عارف كده لانك قلت عديييل رؤية الصادق ولم تقل رؤية الحزب!!
بعد داك قلت بابكر مابكون قاصد، لكن اسي بعد جيت قلت انو عيب الديمقراطي اللبرالي هو تفلتات عادل فبقى لزام علي اني اقول ليك ياخي ماممكن تختزل الحزب كلو في شخص زول واحد، انضم للحزب وتعال اضبط عادل ذاتو واضبط تفلتاتو واعمل الاصلاحات من جوة الحزب، ده حزب ديمقراطي وليس حزب عوائل زي حزب الامة، ومافيهو مصطلحات ناس سيدي وسيدك وولد سيدنا الكبير
سيد شنو عليك الله في حزب سياسي!! وكمان يتحدث عن الديمقراطية بلا خجلة!!

تبا للاسياد شقيش ماقبلو!

اعتقد اني في يوم عيد كده قلت ليك انو في الفتر الجاية دي لزام على كل السودانيين انهم ينضمو للاحزاب، فرض عين عدييل، اي زول يشوف الحزب البيناسبو وينضم ليهو ويعمل من خلالو ويتعلم الديمقراطية والعمل السياسي الصحيح ويعلم الحولو، دي الطريقة الوحيدة للمحافظة على الديمقراطية في البلد دي، اللهي نشر الوعي السياسي والديمقراطي بين الناس، والا بنكون بننفخ في قربة مقدودة ساي!

عندي فكرة بوستين متناقضات لو كنت نشيط حبة كان كتبتهن
البوست الاول بيتكلم عن انو الناس لازم تنسلخ من احزابها السياسية وتنضم للشارع وتسقط النظام بثورة شعبية من غير اي احزاب ولا عمل حزبي، ثورة شعب بس شعب فقط من غير اي انتماء لي غير السودانوية

وبعد نجاح الثورة البوست التاني عن انو الناس لازم تتنظم تحت راية الاحزاب وتعمل من خلالها وتصلحها وتتعلم منها وده فرض عين زي ماقلت ليك فوق

وقبل ما امشي

عليك الله هن ديمقراطيتين وحيدتين، والاتنين ادوهن للصادق المهدي
والاتنين سلمهن صرة وبي خيط للعسكر!!

تااااااااااني يابابكر تجي تقول الصادق المهدي؟؟

وانا قبلت التحدى وحا اقنعك والإ لم تكن بابكر عباس صاحب المبادئ والرجل الديمقراطي . ودي ما رشوة ولكن حقيقة كتاباتك تعبر عن ذلك .

شوف يا دكتور قبل خروج الثوار كان الامر يعدو منطقي تخوفات الصادق من استعمال المؤتمر الوطنى وسائله الغير مشروعة لصد المتظاهرين ولكن بعد الدم اصبح كلام الصادق غير مقنع فنظرة الصادق السابقة الخوف من صوملة السودان وهلم جر
ولكن المنطق والعقل السليم يقول طالما خرج الثوار بعفوية وبدون تخيطط من قبل المعارضة وسال الدم حتى الركب ومات الشباب كان على الصادق ان يختار جانب الشباب والوقوف معهم في ثورتهم .
ماهي الحلول التى يبحث عنها الصادق المهدي للوصول إلى اتفاق والوصول الى حلول تضمن اقل الخسائر ،
اتفاق مع من ؟ المؤتمر الوطنى ، اعتقد ان الصادق متفق مع المؤتمر الوطنى والا لدعم الثوا ر وردد شعار الشعب يريد اسقاط النظام بدلا من شعاره الذي اغضب الانصار الشعب يريد نظام جديد
المؤتمر الوطنى لن يرضى بإي حلول للخروج من الازمة وبالتالي يعتبر ضياع للوقت وتحصيل حاصل .
الناحية المهمة التى لم ينتبه لها الصادق المهدي ان هذا النظام اصبح محاصر اقليميا ودوليا ، على جانب الجوار حدث ولا حرج ساءت العلاقات وعلى الجانب العربي يعرف الصادق المهدي ان القوة العربية المؤثرة عالميا لفظت هذا النظام الى مزبلة التاريخ واستهجنت بقوة حملاته المسمومة ضد الثوار .
الصادق المهدي لم يكن غبياً ولكن حسابات المصالح هي التى دفعت به للتصالح مع النظام وسكوته على ارتماء ابنيه في النظام وربما يجد البعض العذر للصادق في فترة ما بإنه لم يجد تاييد اقليمى ودولي يساعده في زحزحة النظام حيث كان النظام مسنود في فترة من قبل القذافي وبعض القوي ورغم اني لا اميل لهذا التبرير .
من ناحية اخرى تؤكد الدلائل ان أي تغيير في السودان سوف لن ياتى بالصادق المهدي رئيسا واعتقد ان الصادق لديه قناعة ، تغييرت الاحوال ونهضت قوة الهامش الجديدة والتى سوف تجد من يؤيدها داخليا بالوقوف المعنوى معها وخارجيا بالمال .
ان المؤتمر الوطنى من اجل الاحتفاظ بالسلطة سفك دماء الابرياء الذين لم يحملوا سلاحا ضده وانما حملوا هتافات مشروعة من الناحية الاسلامية وتلك الهتافات ايديها المرجعية الدينية في السودان ، فهل بعد الدم يوجد تصالح .
هنالك ناحية دينية هامة ان الحق الخاص لايسقط بالتصالح من قبل الصادق ولكن من قبل اولياء الدم المتضررين وهؤلا لن يعفو بسهولة .
كلنا امل ان يستوعب عقلاء المؤتمر الوطنى الدرس ويغيروا في سياستهم التسلطية ضد الشعب وان يسلموا السلطة للشعب ، ورغم كل الدماء لكنك تعرف ان المواطن السوداني متسامح وربما يعفى عن هؤلاء السدنة .
من وجهة نظري قام زهير السراج بتادية الرسالة نيابة عنا للصادق المهدي ولو كانت لديك نفس العلاقة الحميمة مع الصادق والمناضلة دكتورة مريم اتمنى ان تقوم بمخاطبته للوقوف مع هذا الشعب في خندق واحد ولن يقبل الشارع من الصادق شعارات واتمنى ان تشمل في خطابك له ان يطلب من ابنيه مغادرة الحكومة ولو رفضا ان يتبراء منهما .

مع احترامي وتقديري لك سعادة الدكتور وامل ان نلتقى في بوست اخر .

استاذي العزيز بابكر مخير
لك التحايا والاحترام
وسعدت بمشاركتك في مداخلتى
احنا كنا قائلين فرار المرء من اخيه يوم القيامة ولكن في هذه الدنيا اصبح كل واحد بفر من التانى واقول لا اخوه اكل نارك براك .
فهمت مقصدك ورغم استعمالك للتورية في ردك ولكنك احسنت التعبير
شاكرا لك واتمنى التواصل