سودانيات .. تواصل ومحبة - مكي عباس منع الجلد في المدارس ثم تراجع عنه بعد إسبوع ...

سودانيات .. تواصل ومحبة (http://www.sudanyat.org/vb/index.php)

- منتـــــــــدى الحـــــوار (http://www.sudanyat.org/vb/forumdisplay.php?f=2)

اقتباس:

المشاركة الأصلية كتبت بواسطة رأفت ميلاد (المشاركة 628793)

لكن يا منتصر كلامك ده بناقض كلام الرشيد .. الرشيد بقول العقاب هو الأصل فى التربية والتعليم وبأيّد إستعمال السوط .. ده كلام غريب شديد لامن يصدر من زول مرهف زى الرشيد .. السوط إهانة ما بعدها إهانة .. الطلاب جلد بالسوط قدام السينما بوليس بالسوط يجلدوا البنات بالسوط يفرتقوا المظاهرات بالسوط .. ياخ نحن شعب تافه خلاس ما بمشى إلا بالسوط

يا منتصر الأساس معاهد المعلمين وكلية التربية ينقصها مؤهل تربوى يتعلمه الأستاذ قبل التلميذ .. قابلنا أساتذة مؤهلين أخلاقياً فرضوا علينا إحترامهم بدون سوط وآخرين لم يساعدهم السوط على فرض الإحترام

مرحبتين رأفت
الرشيد حسب ما فهمت يقول أن العقاب ضرورة فرضها شكل التربية
ومفهوم المجتمع للعقاب كمتلازمة للتربية والتعليم ..

اقتباس:

المشاركة الأصلية كتبت بواسطة زول الله (المشاركة 628795)

زمان مافي (جلاد)
زمان في (جلد) تربية وتأديب وعقاب على خطأ
وكنا ماشين زي الألف ونفس السوط الأدبونا بيهو هو الخرجنا وخرج أساتذتنا العلمونا
وماكان في "العنقالي" الفوق دااك الببول في ريسين الناس

(الجلاد) هو الهسه دا والعاملا بإسم الدين والدين مافيهو جلد
(الجلاد) هو الاستاذ الهسه البغتصب تلميذاته وبيطلع براءة
(الجلاد) هو ابودقن البطلعوهو بقرار جمهوري من تهمة إغتصاب طالباته
والقائمة تطول

اقول قولي هذا واستغفرالله لي....................

زول الله
جمعتك مباركة

المقارنة شبه معدومة
لكن ده ما بيمنع إنو كان في جلادين وبيمارسو الجلد بسادية (شواذ القاعدة)
أستاذ بمواصفات زمان (التربية قبل التعليم) عملة نادرة .. الحل شنو؟ ...

اقتباس:

المشاركة الأصلية كتبت بواسطة أبو جعفر (المشاركة 628810)

سلام للجميع
أنا شخصياً مع العقاب والتصفية الصارمة... يعني الأساس 3 سنوات الناجح يمشي لقدام والساقط محلك سر وعليه بمدارس التعليم المهني أو السوق ... على أن تتم التصفية الثانية بعد خمسة سنوات ثم التصفية الثالثة بعد أربعة سنوات إلى الجامعات والمعاهد العليا بحسب حاجة البلد ودمتم.

لكن تعليم 8 سنوات لصعلوك .. وتعليم جامعي لمشروع عاطل .. ده والله تحطيم للبلد.

أبو جعفر
جمعة مباركة

(الأساس 3 سنوات)
تعرف يأ أبو جعفر في السنة التالتة يا دوب التلميذ بكون بدا يتعلم
يزرر زرارة القميص .. من ناحية دروس بكون ما ناقش أبو النوم
كل همو جرس الفطور وجرس البيوت .. السلم التعليمي القديم كان
ممتاز (6 - 3 - 3 ) .. كان مفروض يطوروا المناهج ويخلو السلم زي ماهو
جو يكحلوها عموها ...

اقتباس:

المشاركة الأصلية كتبت بواسطة أبو جعفر (المشاركة 628810)

يا أبو جعفر دى دعوة الجهل عديل .. ياخ نحن ناقصنا جهل ياخ