اقتباس:
كل سنة و انت طيب و الله انا متفائل جدا بالفين و عشرة تعرف انا قاعد اكتب في القصيدة من مسجل و كل مرة بجي اعمل إضافة و ما داير المقتبس يكون مخالف للمشاركة الاصلية أصلو الكتابة بأثر رجعي متعبة |
تسلم يا بابكر
بس حبة ملاحظات "صفقت الزونيا، القت راكبيها، الدراويش استفاقوا" مستمتعين ومتابعين معاك |
الاستاذ بابکر ..طابت لیلتک ..قال الشیخ عبد الله محمد یونس ...هلا رایت تولعی وتوجعی ...بحبیب قلبی حین کان مودعی ...ثم یقول.. زرفت دموعی عندما لفراقه ...متدفقات کالغیوث الهمع ...4(عندما ..بفتح العین والدال4)...الی ن یصل الی بیت هو فی رایی اجمل ما قیل فی الشعر العربی ..لی فیک انه موجع فعلام لم تک...فیک لی یاظبی انه موجع .........الرجل من رجالات ابی حراز ..وهو من فحول الشعرا ..الذین لم یجدوا حظهم من الاعلام .....اتمنی ان یجد هو وبقیه شعرا ود مدنی حظا فی متصفحک هذا
|
اقتباس:
الدراويش استفادوا راجعتها اكثر من عشرة مرات الشاعر في التسجيل الصوتي يقول استفادوا لكنني غيرتها حسب ملاحظتك الي الدراويش استفاقوا يا خالد الحاج ألحقنا و ورينا كيف نحمل الفايل دا على سودانيات |
اقتباس:
يا زول أبحراز دي هي المثبته مدني، و أهل ابحراز ديل الخير و البركة مرحب بالشيخ عبد الله محمد يونس حفيد يوسف ابشرا |
عشرة لوحات للمدينة و هي تخرج من النهر
الى روح الشهيد طه يوسف عبيد (الشاعر:محمد محيي الدين) واحد لوحة صباحية: شجر البان استعاد الريح و ارتاح على رقصته نسوة يغسلن الجلاليب، الثياب الخضر.. أركان البيوت إنتفضت بالارجل الراكضة الطير إنتشى.. صفقت الزونيا و ضجت ساحة الجميز بالطير الصباحي.. الحمامات تبرجن و رجرجن على الابراج ريشا ابيضا و النهر أخفى لونه العادي.. أجيال من الاسماك ترمي ظلها المائي تخضر و تحمر علي الشاطئ عمال المجاري بائعات الكسرة الشماسة النسوة ارباب المعاشات اشتروا ظلا جديدا في انتظار السفر الباصات ملّت جسد الأسفلت ألقت راكبيها و تخلت عن مواعيد لعشاق يعيشون الجوى فيها كراسي الخشب المكسورة الايدي زمانا في مقاهي السوق تشتاق لرواد يضئون الزوايا و الدراويش استفاقوا من نشيج الرعشة الاولي على ايقاع بوب مارلي استفاقوا لحظة أخري من الظل الذي جاور جدران المراحيض العمومية و النسوة يدخلن تباعا و الضريح انفتحت منه الشبابيك يلملمن الزوارات و أرداف التجار المرحليين على باب المديرية تهتز و آلاف من الطير الصباحي على بوابة النيل تحيي حمد النيل و رايات الضياء الخضر شوشن إذاعات جنود الشعب في الحامية الباسلة الطير انتشى شجر البان استعاد القبعات الموسميات استراحت غابة النيم علي وقع خطى الجند رجال الأمن يوفون نذور الحب للتجار و السادة و القادة و الاطفال يوفون يذور الحب للأرض البيوت انتفضت بالأرجل الراكضة الأردية الخضراء و الزرقاء و الكتب الحكايات المجلات الطباشير المناديل الزهور النور و النسوة نشرن الجلاليب على الجدران جهزن الملاءات الحنوط الكسرة الصامتة /الصامدة الشايا و عبَّأن الأناشيد المواعيد و أقلام الرصاص الجرس الاول دقّ الجرس الثاني دقّ (الجرس الثالث .. دقت الاجراس دقّ جرس جرس النحاسى الاساسي الخلاسي الخلاصي الرصاصي الرصاص كدا اللوحة الاولى اكتملت و لو في زول عندو ملاحظات او شايف اي أخطاء في التنزيل دا، عليكم الله ما يبخل بيها و كمان لو زول قام بعملية التشكيل يكون جيد.. همتك يا كاشف.. |
اقتباس:
لوحة ناطقة لمدينةٍ أشد نطقاً وصبابة .. !! التحية لمحمد محي الدين .. شكرا بابكر عباس .. تحياتي |
[align=center]..............[/align]
اقتباس:
[align=right]مدنى .. ولا زالت .. و تظل .[/align] [align=right]يا بابكر الواحد ينتظر ستة صفحات عشان يظهر ريدك و يتدفق . جهجهتنا معاك ياخ [/align] [align=right]ناظر الكواهلة فى خواتيم القرن التاسع عشر ، جدنا ( البشير ود بكرى ) الذى قالت عنه الشاعرة عشة ( الفريكة) بت الفكى بابكر: ( البكيدك ، وبفيدك .. ، وبسلمك جريمتك فى إيدك ) كناية عن أنه كان يرسل المحكومين إلى المديرية فى ود مدنى بكتاب يوضِّح جرائمهم و التوصية بالعقوبة ولجهل الناس بالقراءة فى ذلك الوقت كانوا يهرعون بالكتاب إلى مدنى ليزج بهم فى السجن ، قال لى جدى ناقلا عن جده الناظر أن ود مدنى لم يكن مخططا لها موقعها الحالى و كان الإنجليز فى عشرينات القرن التاسع عشر يخططون لبناء مرافقهم الحكومية فى المنطقة الممتدة بين قرية ود الضوء و و د محمود و الشكابة مرورا بقرية ( أم ما جغيم ) و ود النور ، ولكن الأعيان فى المنطقة رفضوا ذلك بحجة أن المدينة سوف ( تخرب) أخلاق الشباب ، وستلهيهم عن الزراعة التى كانت مطرية فى أغلب الحالات .. يعنى يا طارق كانديك بى شوية كدة ( الشكابة ) بت شاع الدين و ( ودعشا ) بت بكرى كان ممكن يكونوا فى نص ( الداونتاون) مدنى ، كان على الأقل واطاتى الفى ودعشاء دى جابت ليها مليون مليونين. ملحوظة : ( أم ماجغيم) و ( ودعشا ) هى ذات القرية ولا زالت كما هى منذ عهد الناظر فى الناحية الجنوبية ( لبركات ) إلا أن جعفر نميرى أصر على إضافة كلمة ( الثورة) للإسم فلا هى ودعشا ولا هى أم ماجغيم وليست لها أية علاقة بأيتها ثورة . ملحوظة تانية : الفريكة هو إسم الدلع للمرأة ( الفرَّاكة ) من فرك يفرُك ( الملاح ) بمعنى الست( الطباخة ) أم إيدن طاعمة وتقابلها كلمة ( الميرم) عند ملوك وسلاطين غرب السودان [/align] [align=right]إنتو أنا الجابنى بى جاى شنو ؟ سيرة مدنى دى غايتو ( عوج درب). تحياتى[/align] [align=center]..............[/align] |
شكراً يا بابكر
روعة لكن هي قصة محمد محي الدين مع ناس أبو حراز شنو القصيدة المافيها حمد النيل فيها العليش أو الريح فرسان الصوفية العركيين بعدين رموز المدينة الهامشيين (سميرة العرجاء مثالاً) وقهوة ود أبلبدة والشارع البودي لمحمد عزالدين حيث أشجار الزونيا وحديقة وقيع الله النيل هاجس لمحمد هو بعد رحل من دردق سكن قرب النيل لود مزمن بينهما محمد حكى انتفاضة 1981 بشكل غير مسبوق قراءة القصيدة تصيبك بشحن معنوي مبالغ فيه وكأنك لا تزال في معترك التظاهرة العارمة التي انفضت أمام كلية المعلمات عند سقوط طه يوسف عبيد الأول لو شئت يوماً ما نعود لتحليل القصيدة بعد أن تكتمل ونحاول معاً فهم الرمز عند محمد محي الدين تسلم ياراقي |
اقتباس:
الوليد كيف حالك .. ياخ بيني وبينك ( بخيتة البقت ) اذ يظل للقرية سحرها ونداها .. !! وها نحن لم نخرج عن فلك مدني الذي يكفينا منه أن نحوم حول حماها .. !! تحياتي |
[rams]http://sudaniyat.net/up/uploading/mohmedmhialden.ra[/rams]
التسجيل بمناسبة الذكرى السنوية لاستشهاد المرحوم طه يوسف عبيد |
الاستاذ محمد محيي الدين
سلامات،، أعرف جيد انني تعديت على حقوقك الادبية بنشر قصيدتك الرائعة عشرة لوحات للمدينة و هي تخرج من النهر في تابين زميلنا الشهيد طه يوسف عبيد.. بمنتدى سودانيات دون ان يتحمل المنتدى أي مسئولية حاولت اكثر من مرة الاتصال بك لأخذ الاذن بنشر القصيدة، ولكننى لم افلح.. أرجو المعذرة بالرغم من انني نشرتها مع سبق الاصرار و الترصد |
اقتباس:
|
اقتباس:
دي مداخلة خطيرة برجع ليها يا ود ناسا عوجوا الدرب |
اقتباس:
محجوب شريف، استاذ سعيد شايب شيخ العليش و العركيين ...... ديل كلهم بجتمعوا في: زهدهم في الدنيا و حبهم للاخرين من غير مقابل هم: صوفية شيوعيون.. |
الاخ بابكر : سلام يا صاحب،
تمت معالجة الملف الصوتي للقصيدة، على حسب طلبك و تعليمات الاخ نائب الامين العام .. لك و له اطيب التحايا .. [rams]http://sudaniyat.net/up/uploading/mohmedmhialden.ra[/rams] |
اقتباس:
قصيدة عشرة لوحات للمدينة تنزل بالمنتدى من امس و بصوت الشاعر محمد محيي الدين بجلالة قدرو و ما في اي واحد يكتب اي تعليق.. و الله القصيدة الناس تكوس عليها بايدنا و كرعينا و ما لاقنها تقوموا انتو تفتحوا ليها كدا! وا سودابيز اون لاينااااه!!! |
اقتباس:
الناس يابابكر أخوي بتخش وتقرا حسب الكاتب مش حسب المكتوب وانت ياخوي ما عندك زباين نعمل ليك شنو:confused::confused: أنا شخصيا كنت داخل وعايز أعمل تعليق وأشكر القصيدة وأشكر بابكر الجابا لينا بس بعد ما قريت كلامك لغيت الكتابة وقلت بوست بشحتو ليهو المداخلات دا والله ما ببرد بطن سيدو وخليهو يزعلgoood:Dgoood |
اقتباس:
التلج قاعد و خالد قاعد.. و أبوي الله يرحمو برضو كان بقول شعر |
اقتباس:
يعني هسة دايرني أعمل ليك بوست زي العملتنو للتجاني عشان ما يزعل:p الجاب أبوي وأبوك الله يرحمم شنو:confused: الناس ديل ارتاحو مني ومنك وخلو لينا الدنيا بي حالا..ولا تكون زغلان من خالد عشان عمل لي أبوي شغل مدنكل...كان زعلان قول وأنا أكلم خالد بسحبو ويلحقو أمات فاطنة..وبعدين ياأبكر لو كنت دخلت وكتبت كلمة في البوست اياهو مش كنت سكتني زي ما عادل بعشوم سكتنيgoood:Dgoood |
اقتباس:
كنت حا تقول علي زي ما بابكر (إبليس) دا سكتني |
اقتباس:
خاصة بعد معالجة ود سعد .. وضوح مؤثر .. !! والدراويش استفادوا .. !!!:) له المودة .. والسلام .. !! كل الاحترام |
اقتباس:
ما للدرجة دي يابابكر أنا برضو راجل عندي فهم...عادل..عسوم دا ما اسم أبوهو وهو لقب أما عباس فدا اسم أبوك وما ممكن ياخ ألعب فيهو وأنا برضو زول عندي أدب والوالدين مافي طريقة زول يلعب بيهم..وعسوم لقب يعني حتي لو كان اسم جدو ما كنت حأكتب كلامي مع اني كنت ناسب بعشوم دي لي عادل ذاتو مش لي عسوم...أما الأهم انو بابكر ابليس ما فيها علاقة لحنية مع عباس والحاجات الزي عباس خطيرة جدا لو كنت استعملتها ليك كنت حتجي بي سكاكينك:Dgoood زمان كانت الوالدة الله يرحما لامن تناديني وما سامعا عشان ممكن أكون مليس كانت بتنادي يافتحي يافتحي وأنا سامعا وما قادر أرد وبعد شوية الصوت بيكون أقوي انت ياقشري ..انت يافقري طرشتا:confused::Dgoood:D |
عشرة يناير ذكرى إستشهاد المرحوم طه يوسف عبيد
عشرة يناير 1982 التحية لاسرته و تحايا خاصه لود دفعتنا الفنان اسامة يوسف عبيد أين انت يا ترى؟ |
عشرة يناير ذكرى إستشهاد المرحوم طه يوسف عبيد
عشرة يناير 1982 عن أسرة طه يوسف عبيد بحكي ليكم: دخلنا مدرسة السنى في بداية الثمانينات، في السنة ديك تم إلغاء نظام الداخليات بالمدرسة و تم بناء ثلاثة فصول جديدة برة سور المدرسة القديمة عشان تكون نواة للمدرسة الجديدة بدل المباني الآيلة للسقوط. المدرسة بقت مكونة من جزئيين: المدرسة القديمة، و بها فصول تانية و تالتة زايد الداخليات، و المدرسة الجديدة (من غير سور) و بها فصول السنة الأولى التلات (153 طالب على ما أذكر)، معظم طلاب السنة الأولي في العام داك كانوا من مدني... كانت أسرة طه تسكن بالقرب من المدرسة من الناحية الغربية و كان أسامة يوسف عبيد شقيق طه الأصغر من أولاد دفعتنا لكنو ما كان في الفصل يتاعي... كان لطه و أسامة شقيقة تشبه بنات بشرى الفاضل: قمحية لا كالقمح الذي نعرفه، و لكن كالقمح حينما يكون قمحيا مثلها... و زي بتو اليغنيها مصطفى: لما تطلعي في الشوارع شوفي كيف الناس تصارع,, ناس تصفر و ناس تدفر... كانت تدرس بالدرجة شرق مدرستنا و كانت تعبر مدرستنا الجديدة علي ظهر دراجتها الحمراء يوميا إلى مدرستها، و ما كان في أي واحد مننا بقدر يشاغله ... ما عشان خاطر أسامة، بس لأنها كانت مختلفة و جوانا كنا معجبين بيها (ال 153 طالب ناقص أسامة)... كنا في الصباح و قيل ما يدق الجرس بنجلس فوق كرين قديم بالقرب من المدرسة في انتظار مرورها إلى مدرستها، و كان الواحد مننا طوالي يعد ما يبركن عحلتو بجي جاري الكرين و بسال الجماعة: أوعة تكون فاتت... التحية لهذه الأسرة العظيمة بقدر ما قدمت لنا من تضحية و جمال |
اقتباس:
يعنى طه الله يرحمه بعرفه من نعومة أظافره حتى أصبح صبى فى الثانوى العام .. أخته الكبيرة حنان وهو بعدها والباقين كانوا دقدق .. عمك يوسف عبيد كان رجل شعبى ومحبوب .. أول واحد من كبار الموظفين دخل نادى العمال ولعب كشتينة .. وصار جزء منهم يأكلوه الدامة ويتسنفك .. والدى من أمدرمان وما عنده كبير إلا الجمل بس ما عملا عشان البرستيدج .. وطبعاً كان ذلك أفضل لنا ;) دى العائلة التى نبع منها طه يوسف عبيد .. كان طفل مشاغب شرس الجميع يهابه حتى نحن الكبار .. حدث أن حملته مكتفاً وسلمته لأمه فأمسكت به جيداً لكى أهرب . أسرة عشنا معها أخصب أيام العمر . ويحلو الكلام |
اقتباس:
با رأفت انت مسكون بالسودان بشكل مرضي، كيف قادر تعيش بعيد عنو؟ دا حنين قاتل يا صديقي، لازم ترجع و تتجاوز مرراتك الشخصية... يا أخي السطور القليله دي الكتبتها انت عن اسرة المرحوم طه أصدق و أجمل من ما كتبه انا عشرات المرات... صغارك مشتهين ترجع |
طه عليه شآبيب الرحمة
صديق وزميل ودفعة هو ما كان في السني لكن صرتو مقطوعة فيها عشان جنب بيتهم لكن جمعتنا رابطة الجزيرة للآداب والفنون هو طبعاً معسكر دايماً مع خالد كودي ومحمد عبد النبي نظام تشكليين وكده في سنتنا الأخيرة لمن أنا مستنى البعثات وهو القبول في الكلية أخرجنا مع بشير زمبة المسرحية السافروا بيها الأبيض وفازوا بالذهبية (طبعاً السني حاصدة ذهبيات المسرح من زمن كنديو الله يرحمه) استذتنا كانوا حاجة تانية بابكر كنديو الهدندوي الشرس مات دون أن يستئذن أحد زمبة الآن بالخرطوم استاذ خالد عمر الفتيحابي.. أحمد قوي يعني اساتذة مظاهرة عديل كده نحن يا بابكر غادرناها في 81 وفرد طفشة لكن تعرف أهم حاجة الكرين القديم وهو بالمناسبة ما كرين ده "دي 8" في جماعة كانوا عاملينه خانة بخزنوا فيها السمسمية وناس التمباك لكن مكان مثالي للداكين قصاد مدرسة شدو نحن لمن كنا بندك بنمشي مطاعم سوق الدرجة نجهز الفطور من الحصة الأولى غايتو السني دي كانت حاجة تانية الطلبة براهم كوم ناس عاطف عبدو ومحمد موسى الشاعر ومجدي النعيم وعبد الماجد لمن يعلنوا الإضراب في الداخلية تلقى شيخ الجيلي برجف والصول حسين ماشي جنبو حارسو مدرسة مصادمة جداً برجع ليك تسلم يا غالي حاشية: ناس رأفت ديل أولاد بركات والدرجة مصارين بيض يعني هسه اسألوا من الزقاقات بتاعت ناس تاج السر الملك تلقاه ما شقاها لمن فات مدنيgooodgoood |
الكاشف سلامات
مداخلة سمينة أنا لايمك! ما ممكن! أنزل ليك قصيدة عشرة لوحات في المدينة أوديو و ما تعبرها بكلمة... زي الباقي لي طه سنة 1982 كان مسجل في فصل الإعادة بالسني... |
كيف يا بابكر
أنا علقت ليك عليها أول ما نزلتها واتكلمنا عن العليش وفروته الرمادية والعركيين وبالامارة قلت لي الناس دي كلها صوفية محبة تسلم من الخرف كدي أحكي لينا عن السني بعد ما فتناها الحصل فيها شنو |
اقتباس:
|
اقتباس:
يا أسامة انت القبطي دا ما عارفو ساكت ..علي اليمين هسة كان دخلت معاه في الغريق تلقاهو ممكن يسمع ليك في بيتكم كل زول سريرو وين.. أنا ىمتأكد انو بعرف الملك وناس كبكبيك كلهم وناس عبد العزيز عبد الرؤوف ومعاهم ناس القمش والحلال الهناك كلها :Dgoood |
اقتباس:
فعلا مداخلته عن اسرة طه حيرتني الراجل حبوبة كبيرة |
طبعا موضوع السني كان قوس كبير بقفلو هنا و برجع لموضوع البوست...
بالله عليكم الله كيف؟ مش زي المرحوم بروفسير عبد الله الطيب و علي المك.. الواحد فيهم بفتح القوس و يتكلم فيهو اربعة حلقات في الراديو و بعد داك يعود للموضوع الاساسي.. قتل خالد بن الوليد متتم بن نويرة في حروب الردة بالخطأ و يقال أن لمتتم هذا زوجة جميلة تدعى أم تميم، لم تعرف العرب سوق أجمل من سيقانها و عيك.... عيك.... عيك... و بعد ما ننسى الموضوع الاساسى يجي راجع و يقول ليك: إنتهت حروب الردة و اعلنت العرب طاعتها لأبا بكر الصديق..... |
اقتباس:
اقتباس:
بمناسبة أولاد المصارين البيض .. لما جيت بركات كنت فى الثانوى .. كنا قبلها بنجى من ود الشافعى بالقطر ونركب بص الطلبة من بركات .. أول يوم جيت بركات كان من المدرسة .. زميلنا يوسف العراقى قادنى بيتنا .. ووعدنى يضمنى لى فريق الفدائيين .. إتضح إنه فريق حى العمال .. وبين أولاد الموظفين وأولاد العمال معارك طاحنة .. وأولاد الموظفين عندهم فريق إسمه الجوهرة .. المعارك من العمال قائدا إسمه الرشيد طمبل ومن الموظفين عادل أمين عبدالله (سمساعة لاحقاً) وده أشرس من ده .. بدت المعارك فينى .. سبتهم الإتنين ومشيت نادى العمال .. كان حدث وكسر للقاعدة وعمل زوبعة من الطرفين .. شوية شوية بدوا يتسللوا وصلاح أمين عبدالله بقى حارس المرمى الأول وعادل ومصطفى ومحجوب طمبل كانوا أشهر اللعيبة .. وأنتهت دوامة موظفين وعمال .. فى واحد من أولاد الدرجة زميلنا فى سودانيز أون لاين مابعرفه .. إداخل معاى وقال لى (كان أنت رأفت ميلاد البلبس كم طويل وبخت القميص بى بره وسفته دقار .. أول مرة أشوف شرامى من أولاد الموظفين) :D:D:D نحن يا الكاشف تربة داخليات وأولاد خلا ساكت .. سمعت بى جعفر (جيفارا) .. قبال نجى مدنى كان إسمه (شكينيبة) :D:D أها ده دفعتنا .. ويحلو الكلام كان بابكر عباس أدانى وش بحكى ليك بلاوى مدنى .. من موسى الثعلب لى فاطنة شهاوى مروراً بود الفتلى .. المصيبة يا أسامة بسكت لامن الكلام يكون كبار كبار شعراء وفنانين .. بحب أحكى عن الأبواب الخلفية وصغار الناس فى مراكزم والكبار فى كرامتم .. وأحداث يتم تجاوزا للتجميل ما بقدر أفطها فهى معالم حقيقية .. حتى نار حاج سعيد الداير أى واحد من الأولاد يطفيها :D:D شن قولكم .. نجر ولا نوم على الستة |
لا يارأفت كدي أبدا لي بي فاطنة شهاوي دي وسيبك من ود الكاشف دا قيدو عندي جاهز:Dgoood
|
اقتباس:
المايك معاك يا رأفت تفضل يا خفيف الظل |
طلعت دفعة ودالفتلي يا رأفت
وأنا أقول مالو كلام لازق فيني سليسيون ونارك مولعة شمة بنزين فتحي شغال نظام المديدة حرقتني خلينا في بت الشهاوي وبابكر فاتح ليك قوس من حي البان لي عووضة خش بي كراعك الشمال :p |
اقتباس:
ازيك يا جميل عوض سليمان ومحمد عبدالرحيم محمود وسامي أمين الجمل .. وأسماء أخرى ذكرها لي عوض سليمان محمد الماحي .. في فريق الجوهرة ده .. غايتو .. بقينا متابعنك للتوثيق وللمتعة .. متعك الله بالصحة والعافية .. !! تحياتي |
اقتباس:
بت الشهاوى ما بقدر أخوض ليك فيها هنا كتير .. دى دايرة ليها قعدة فى القهوة القعدنا فيها مع ناس تاج السر .. ولا لاقينى عند شوقى .. كان مصاحبا أكبر وأعتى جزار فى مدنى .. ويوم زرانا عندها .. أتخيل الباقى .. لكن أخوك حى بأمارة بكتب ليك هسة :D:D:D |
| الساعة الآن 02:49 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.