حكت مريم اختي الكبيرة، انه ومعاها مجموعة من بنات الحلة ذهبن يكفرن للبنات اللائي وقد رسبن في امتحانات الشهادة الثانوية ذات مارس ماسك كتف ابريل، قالت والله البنات كلهن لقيناهن زعلانات ويبكن، الا نفيسة بت حاج الصافي، لقيناها تاكل ليها في بتيخ،،،
|
قبل نحو ربع قرن من الزمان، كنت عاوز اعمل حمام بلدي في بيتي الجميل، في حلتنا، وقد قررت ان يحفر العمال الحفرة في منتصف حوشي من الناحية الشرقية، جاءت الوالدة عليها سلام، وقالت ان المكان دا غير مناسب خالص، يا ولد في زول بحفر حفرة محل ونستو ونومو
خليها هناك واشارت للركن الجنوبي الشرقي حيث بيت اخوي، في ساعتها تم تغيير المكان لاقصى حدود حوشي في جزءه الجنوبي الشرقي، وفعلا اكتمل، وعملنا لاحقا فاصل مع اخوي، في كل الجزء الجنوبي من حوشي، وعملنا بابين للحمام واصبح مشتركا، منذ ذلك الزمان ما زال هذا الحمام يخدم الاسرتين، طبعا قبل خمس سنوات اتفلهمتا كمغترب مشلهت وعملت سايفون لاولادي حيث يعانون من الحمام البلدي، اخوي برضو عمل حمام تاني قبل اقل من سنة، وما زال هذا الحمام بعيدا يخدم كل من اراد ان يكون بعيدا في لحظات الخلاء الوالدة حكيمة ياخ، كانت اخر من يقرر، وقرارا الكمدة بالرمدة، يمة سلام ياخ ومشتاقيين،، والله شوقنا دخاخين دخاخين، |
خالي رتش مان يوم اخد لفا على كل نساء الفريق، ورشا كل حاجة بمية الف،
تحكي لي امي وقالت لي لما وصلني سلم واتونس ولما جاء ماشي قاليها ياحاجة انتي عندك تلاتة اولاد في السعودية فما محتاجة، وتضيف امي انها كانت مفلسة تلك الايام، واولادا التلاتة كل واحد طاعن الارض، ومصهين وتاكِل المهم قالت لاخوها مستورة والله، هههههها وبعد ما مرق اضافت البقولوا سمين يقول آآآمين |
الشلة من حلتنا، مشوا الفرن جابوا الرغيف
وغشوا بقالة عصام اشتروا طحنية ملفوفة في جريدة، ومشوا الخور رملة باردة يستانسوا، وياكلوا، جاء صديقهم متاخرا، ادوهوا رغيفة، وواحد ناولو باقي الطحنية القليلة، بجريدتا قائلا:- هاك قلع في الكتابة دي اتعشى..... |
اب
|
عمنا عبدالرحمن موظف معانا في ذات الشركة،
الحقيقة انا موظف معاهم، فقد جيت ولقيتو في الشركة الاقدمية يجب ان تُحترم، المهم جاءت المناسبة وقال لييا منعم انت عمرك ٤٠ سنة، النصيحة انبسطتا ما اكضب عليكم ههههها ولكن يا استاذ!!! احمد ولدك مواليد كم، احمد مهندس اتصالات على راس العمل، قال لي مواليد ٨٠ عمنا استدرك قال لي خلاص انت مواليد ٧٩ .... شكرت الاستاذ، وغادرت هسا يقوم يغير رايو كمان،،، |
كان سعر البتيخة في حدود ٥٠
سالت البائع عن السعر، شافني مغترب وقال يغشني قال الواحدة بمية، طلبت ٢ واديتو ميتين، استلم البائع المبلغ تحيط به حسرة عظيمة قبل ان نتحرك سألني اخوي الاصلن مستغرب في القصة من بدايتا، ليه تشتري بالضعف، قتا ليهو عشان البائع دا يموت بالحسرة كونه لم يقل ان البتيخة بالف للمغترب المغبي دا،،، |
٢٠٢٠
سنة صعبة على صعيد غياب اعزاء وعلى صعيد تورط الوطن في مزيدا من الفشل، وعلى صعيد تعطل العمل، وانسياب الحركة، ٣ شهور سدة في البيت، وصلنا مراحل من القلق الارق والتلاتة البعدا بنص ايقاع ونص حركة مع كامل الالتزام بالاحتياطات، التلاميذ لم يذهبوا لمدارسهم لمدة عشرة شهور،،، كلنا نعيش في عمق الازمة بطريقة مختلفة،،، نرجو السماح لعدم متابعة البوست لفترة قد تطول فكلنا في الهم كرونا،، والدنيا مجنونة،، ........ ساواصل |
واحد تعارفنا في النت، سالني .....و...؟ واتخرجت متين لما قتا ٩٢،،،
زعل |
وانت مالك ياخ ٩٢دي انت ول انا،،،
ههههههها |
/في الرياض سالني سوداني متزوج، طبعا،، عندك اولاد اآآأي،
وسالني عن عمر اكبرهم، ولما قتا، زعل برضو هههههههها |
وواحد تاني سالني ليك كم سنة مغترب، كلمتو،
سالني من كم حاجة طلعت ما عندي زعل برضك |
العالم دي وكت الحقيقة بتزعلا
بتسال ليه طيب،، اساسا، |
واحد من حلتنا كان معانا هنا، قرر يمشي السودان
وجاءني مودعا حاولت اثنيه خاصة وانه مرطب مع محامي شهير ولما راى محاولاتي قالي اسمع يا صاحبي انا جيت اكلمك واودعك ما جيت اشاورك،، ههههههههها المسالة محسومة، ساعود لافصل ... تحياتي للحضور الباهي لونو، الوضاح وجميل،،، |
اقتباس:
حبابها شوفة قلمك مزين للبيت الكبير سودانيات |
| الساعة الآن 03:29 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.