طقس معتدل بأمر السلطات ....!
كدت أيأس من إستطاعتي لسماع أغنيات مصطفي ـ أي والله فأنا ومنذ عام بتمام الكمال قررت ونفسي عدم الإستماع لمصطفي لا لكونه لا يطربني أو لكونه ما عاد يشجيني بلحنه الأليم ـ بل لأنني رأيت نفسي أقل كثيراً من هكذا حضور موسيقي ولحني وأداء ـ حتي إنني في المنتصف من يناير كل عام أهرب ـ ها ناس أهرب بجلدي عديل . تاركاً خلفي أزمنة التآبين والتناصات العدم . فمصطفي بتاعي ده جواي وأنا ما مِت بعد .
والكومسنجي ينادي عربي عربي عربي تقدمت شأني شأن كل السحنات التي أمامي بحثاً عن مقعد خالي سودانيون ـ وحبوش ـ ومصارنة فارين ـ وبنغلاديش ـ وإيش وإيش وعرب ـ وصينيون ـ وشعوب ما تعرف من أي وادي هبطوا بالضبط ليزاحمونا كراسي الحافلات ـ وأنا أحلم ـ بـ مقعد وبس ـ مُقعد أنا ومقعدة أحلام هادا الشارع ، من الأزقة الخلفية نخرج ـ في الإنتظار المميت نلتقي ـ نتزاحم ـ يزاحم بعضنا البعض ـ ومعنا ما معنا ـ نشالون ـ لصوص صغارـ موظفوا دولة ـ موظفات تتقدم خطاويهن الثياب البيض ـ ورجال (بيض) والبيض كثير في هذا الوطن البيض ـ بواليس ـ مجانين ـ صعاليق ـ بنات ـ شحادين ـ ونتزاحم ياخي نتزاحم كل منا يقدم نيته . صباح اليوم خرجت فاتراً ـ فاترة الحياة في دواخلي خرجت ـ لا أمل يلوح في الأفق ـ غبار كثيف علق بسماوات البلاد ـ غبار ما (نعرفوا) أتي من وين وهيئة الإرصاد تحدثنا أوان عودتنا في الأمسيات عن طقس معتدل . معتدل هو طقس الهيئة القومية للإرصاد الجوي ـ معتدلةً أجواءنا بأمر السلطات تقريباً غير أن مزاجنا عكر .... عكره السهر في إنتظار حنفيات المياه ـ عكره الدولار والبوبار والكوراك والـــ غاغات ... عكرته السلطات بحاجاتها التي ما عرفنا لها (رأساً من كراع) ـ عكرته تصاريفنا السيئة وحظوظنا الأسوأ ـ عكره كون أننا لا زلنا نري في إنتصارات الغير إنتصار لنا ـ ياخ لا زلنا نتابع محكمة مبارك وحبيب العادلي بشغف رغماً عن الف مبارك وألف حبيب ظالم يعيثون في أرضنا الفساد . قال قائل اليوم : علي الأيمان الناس ديل شغالين بالكجور يعني الناس ديل كم نفر بالضبط ثم حسبهم حساب أصابع اليد ثم فاجأني بسؤال بدأ لي غريباً ونحن كم ؟؟؟؟؟؟؟؟؟؟؟ كل ذلك وأنا لم أفرغ من مزاحمتي للناس في الحافلة (الهايس) أم اربعتاشر راكب وبعد ده كل البجيبو ربنا كويس . سائق الحافلة وكونه حسبما عرفت لاحقاً ثوري قديم وغنيوة ثورية وراء غنيوة ثورية حتي أنه وبمجرد خروجنا من دائرة بواليس المرور عبث بقلق يخصه علي محتويات بجانبه حتي شويتين وبدأ ود الأمين يغني : وهزمنا الليل وهزمنا الليل وهزمنا الليل وطني أنحنا سيوف أمجادك نحنا مواكب تحمي ترابك أنحنا ديل تخيل ؟ يا للغرابة ـ هؤلاء نحن الناس المهزومين الما عارفين زاتو شن يسووا بقوا بقدرة اللحن سيوف أمجادك يا وطني ـ تغللت الأشياء داخلي ـ كلها جاءت ـ فجأة أدرت مصطفي ويا مشرع (الحلم الفسيح) بكيت والله ـ يعني عادي الزول ببكي مرات في الأمور البتخصوا ورأيت أنه أي مصطفي خصني بذات دفئة القديم ذات الارتعاشات انتابتني ومفاصلي ـ وبقيت ماعارف اسوي شنو ـ ساحت مني الركب ـ والقلب الثوري تمرد وأنا أعزل ـ أنا رجل عادي ـ رجل شارع عادي يمشي بين الناس في الاسواق ويركب المواصلات ويبكيه مصطفي فهربت بشكوتي إليك يا مصطفي فأسمع ما أقول : أضُطهدنا كشعب وكقبائل وكناسات بلد واحد (واحد) حرمونا كل شئ تقريباً كل شئ مصطفي (اتنين) دواء مافيش ـ علام مافي ـ شغل مافي ـ جنوب مافي تخيل ؟ (تلاتة) صار أصغرنا أكبرنا وصار سفيه القوم عالمه وعلامه وموازين البلد كلها إنقلبت (اربعة) . يقيني انك مشيت في زمن كويس ـ ياخ بركة المشيت : وكيفنو قلبك كان يشوف موت المغنين من طرف موت البلاد موت الولاد موت العصافير البتحلم بي وطن قول لي كيف غير اننا ورغم رغم الرغم لسانا نتنفس هواك . والله كريم ياخ خضر |
ها هنا يبتسم النهر القديم
لبعانخي ولتهراقا ووو ,,,,, خلوها علي الله خضر |
جميل هذا التداعي
وبديع و معتدل طقسه بأمرك -أنت- يا أيها الخضر وليس السلطات مودة وتقدير |
أيها الخضر كانت السفينة لمساكين فخرقتها غير أن الملك الجبار رغم ذلك اخذها غصبا فكل شيئ يصلح للتعبئة العامه الاخضر واليابس أيها الخضر مات الغلام ثم بقدرة قادر عاد للحياة فقتل ابوية الصالحين أيها الخضر كان الجدار لغلامين صالحين فأقمته وكان تحته كنز لهما فلما بلغا رشدهما لم يجدا الجدار ولا الكنز لك مودتي |
منذ الأمس يا هيثم ياخي ومصطفي معلق معاي
معلق وأبي ما ينفك مني والغبار كذلك لساه عالق والأجواء كما هي فماذا ستقول الهيئة هذا المساء مودتي ياعزيزي |
يا يحي
وكيفنك يابا وماذا نفعل مع الجبابرة يا صديقي هؤلاء الذين يطاردون البشرية بسوءاتهم منذ الميلاد .. و(خلف كل قيصر يفوت قيصر جديد) . أما الكنز فقد سرقه الجبابرة أيضاً يا صاحبي كن بخير |
يا محمد الطيب يا خي اقول ليك....
لا أقول قاتل الله اللوائح و الخلق الزائف محمد الطيب و الله انا ما ناقصك .... انا الصباح دا قمت بأجمل حالاتي ... بحلم و الله بحلم و أنا صاحي .... بحلم و بفكر في انجلينا جولي معبودتي المفضلة ... بحلم و بفكر في الانسانية عابرة القارات تجيني أنت طاير (شوف خضر), يا خي خضر في عينك .... عليك دينك دا يوم خضر .... خلاص يوم و باظ ... بعدين يا خضر جنس كلاماتك دي كلنا بنعايشها لكن قادرين عليها بالحليب و الهم زايد الفاقة .... يا خي أقع الحليب ما تحلب لينا ضرع توهمنا يا شخص.... خضر أنت متجنب مصطفي لكن أنا متجنبك إنت دا..... |
حافظ مالك ياخ بتجهجه في باكاتي
انا خضر ده زول ماصاحبي ولا حاجة ... بقراهو من بعيد لي بعيد ويادار مادخلك شر ,,, هسي تطلعني بتونس بيهو في الفيسات والموبايلات وهكذا شمارات بعدين حليب شنو يا ننو ... ياخ كلام زي ده مراعي هولندا كلها مابتفطمك منو ده ياهو الكلام البخلي الواحد يسخن تحت الاسبليت ويتعلم سب الدين ياخدر بالله اسمع كلام حافظ ده وخليك بالجو ... بالجو ... بالجو .... طقس معتدل وجميل ,,و شوف ليك اي حبشية واقطع كباية قهوة وانسى فرنسا ياخخ |
الطقس اعتدل ذات مرة حين غنى له محمد بشير عتيق :
الطقس معتدل الهوى قوم يا حبيبي نمر سوا في خميلة و العالم نيام الروض حلى و بسم الزهر و البدر في افقه ازدهر مضى اسمه في سطح النهر و القمري يهتف باهتمام من كل فن يبدي و يعيد على شاطي ابروف السعيد -- غايتو وصية حافظ ما بوصيك بيها بس أقع مصطفى ده ومرة مرة ما تنسى ناس عتيق ديل قادرين على أن يحيلوا جحيم الطقس الى جنة عرضها المحبة والهيام. قلت لي كسر رقبة الطقس اعتدل عندهم ؟ حكتوا بالغة متعة رغم أي شئ ياصاحب |
أخانا في الحاجات دي كلها حافظ حسين
وينك ياخ ؟؟؟ قلت لي متجنبني عديل يا خي والله خير ما فعلت علي الأيمان كنت مليتك فقر وغاغا وانت ما ناقص . أمس مشيت لي اصحاباً لينا بي جاي علي اساس انو اليوم خميس :D:D:D الشهادة لله لولا كلام بتاع الدكان وانا جاي خاشي البيت بالليل كنت افتكرت فعلاً انو امس كان الخميس فعلاً ياخ الخميس ده معنوي ما اكتر مشتاق ليك يافقر وانتظرك كثيراً |
يا حولا محمد الطيب يوسف عديل
ازيك ياجنابو ياخ والله نورت المكان وانا اقول الزول ده انا شفتو وين شفتو وين شفتو وين ؟ كباية القهوة ما بناباها يا محمد علا حبشنا زاتهم بقوا بتوعين حركات ياخ اما بخصوص فرنسا فربك يجيب عواقب لوتري اكتوبر سليمة موش انا قدمت واعتذروا لي بي رسالة مشتركة مع جغجمية حالم :D:D:D غايتو امريكا روسيا قد دنا عذابها والله مودتي |
يا كانديك تصدق قبل فترة عندي صحبي ميكانيكي حسااس ورقيق كده ضرب لي بالليل يجي واحدة صباحاً بتوقيت الخرطوم ايام بنوم بدري ومطمئنين انو الموية حنلقاها الصباح في الحنفيات ... قال لي ياخضر عايز اسألك قلت ليهو في شنو ؟ قال لي ياخ اخر مرة شفت ليك فراشة متين ؟
قلت ليه والله ما متأكد تصور الزول ده بفتكر انو الفراش هاجر مشي وين الفراش يا كانديك ياخ مشي وين ؟ شكراً لعتيق يا صديقي |
بسم الله الرحمن الرحيم
خضر سلام .. وبعض الحكى يعدل المزاج .. غايتو لتصريحات بعض النافذين خطر على البيئة خاصة الرجل الدوحى اب شعراً كتير ده ايام المفاصلة الشهيرة بين الباطل والباطل كتب هذه (القوزقزحية ) ( جاء من يسألنى : ما العمل ؟ أراك تمسك بالعصا من الوسط .. فبماذا تنصح ؟ ) ( قلت : يا أخى أنا أمسك الحبل .. حبل الله المتين .. الذى هو الكتاب والسنة . إننى أنظر لمجريات الأمور فى المؤتمر الوطنى نظرة أصولية ترد الأمور الى تخريج فقهى واستنباط علمى يستوجب علينا طاعة ولى الأمر الحاكم كأصل من الأصول ) طقس ايه ياخضر !!!! ده حديث يرهق الزرع وتتساقط من فحيحه أوراق الخريف .. |
اقتباس:
قتا لي كان كأنه الخميس يااخي عااادي كان تنكر أقوال سيد الدكان و تصر علي موقفك وتخليك كما كت من حيث إنو يوم الخميس تهمة لا ننكرها و شرف لا ندعيه الما عادي يا صاحبي أن يحاصر السبت كل أيامنا و يمنعنا الأغنيات |
والله يا النور يا صحبي الراجل اب تفة بالغ ياخ
قلت لي جاءه من يسأله عديل تضوي ليهو ياخ انشاء الله تضوي ليهو :D:D:D هسي عليك الله يا النور أنا ما عندي حق في جغمستي الفوق دي نسوي شنو نحنا لهؤلاء الناس يا النور ؟ شن نعمل ياخ ؟؟ والله دي بلد مستهبلة يا صاح |
يا أميري ات حي يا شقي الحال
والله مشتاقين ياخينا بتاع الدكان ده صعب اقناعو يا اميري الموضوع ده عندوا علاقة بي التزامات مبالغة غايتو الواحد بقي يبلع الايام بلع ... ثم بالله الخميس ده مالو بقي قصير قدر ده ؟ بالله الواحد قبل ما يرجع من الشغل يوم الخميس يلقي الناس صلوا الجمعة ومارقين علي شغل السبت :D هو الناس دي لاحقة شنو بالضبط ؟ غايتو |
ياخوانا الله يرضي عليكم ... قبل شوية وأنا أتابع برنامج تلفزيوني علي قناة أمدرمان ضيف الحلقة فيها الأستاذ الطاهر ساتي .... تناول مقدم البرنامج قضية انقطاع المياه المهم قومك ضربك ضربك اتصلو بي وزير المياه ولا مدير المياه ماعارف المهم الزول ده اتكلم انو السبب لانقطاع المياه هو شجرة الدمس السعودي المزروعة في شوارع الخرطوم واتكلم عن قرار بمنع زراعة الدمس ومن هنا وانطلاقاً من الواجب الوطني انشاد اصدقائي وصديقاتي بولاية الخرطوم لو في اي زول زارع ليهو شجرة دمس ولا نبق (النبق النبق النبق) ولا ايتها شجرة تانية يقوم عليها باقي ليلنا ده .
صورة توضيحية للشجرة العاملة عمايل http://a7.sphotos.ak.fbcdn.net/hphot...06950977_n.jpg يعني هسي انا اعمل شنو بالضبط ؟ |
خضر:
ياخي اعرف انه حرفك طاعم .. ومسئول من الخير (انت السكر البتطعم بيه حبرك دا بتجيبو من وين؟) أنا في السعودية وطقسنا مرررررررررررررررررررررررة معتدل. وكان ما مصدقني أسأل النور يوسف .. وعلي طاري الفراش (قوية والله يا خضر) ياخي ربنا يصلح ليكم الطقس ويطول ليكم الخميس. |
يا خضر بتستفز القدرة و الحيل الشحيح
إنت عارف إنو إكتشفت إنو أكثر الأشياء التي تستفز الناس الآن هي كشف القبح الذي إنتهى إليه حالنا اليوم، و لا يمكن الكشف عن هذا القبح إلا بإستحضار الجمال الذي فقدناه و تصوير البشاعة التي حلت في مكانه. كتابتك عن مصطفى إستدعاء صديقك صديق الفراشات مثال البرنامج بتاع زول الموية دا كلها تصب في ذات الإتجاه كما هو حال كتاباتك دوماً واصل إستفزازنا ففي هذا الإستفزاز ما يهب الحياة شكرا لقلمك المرتوي دفئاً و جمالاً |
خضر حسين ... ;) ;) ;)
امبارح في الدمام وبعد ما أخوك طلع من السيوبر ماركت حتي أبو ريم قال لي الطلع هسي ده يبقي أخو خضر ياخي قدر ما مرقت وراه وفتشتو ما لقيتو ياخ تتصور نقس الغبار والكتاحه هناك برضو في ؟؟؟ لكن يا خضر اسمعني ياخ عاوز اقول ليك ياخ ديييييييييييييييييييييش ميتيشك ظاتو ياخ ;) ;) |
نفضت يدي هكذا
كما تراها على وجه التحديد وبين أصابعها أحدثت الورقة صوتها المميز نعم نفضتها كما تراها يا صاحبي وأتبعتها حتى يزيد تأرجحها بيدي القابضة عليها ويزيد صوتها أتبعتها بـ: دال فقط لم استطع إكمالها لأني عضضت بأسناني لساني متذكراً أظني عهدي الداخلي بعد أن حسُن إسلامي منذ مدة أحسبها كثيرة وهي لا تتعدى الثواني بحساب الخالق المدبر والتفت إليّ عاذِراً حالي سائقُ الليموزين وعذره ذا جاء من دخولي عليه ومص شفتيه بصوتٍ أيضاً يشبه صوت الورقة يا صاحبي وظني أن دواخله هتفت: مجنون قطع شك ولا بي من شيءٍ يا رجل فأنا أقر بأني مجنون ما به شيء فالمفطوم في الألوان والغارف الغارق في بحر مدادها والقاعد القائم الراقد الواقف .... في متونها يتحول لا محالة إلى مجنون ... وعليه وعلى ما هو عليه وإلى ما سيؤول إليه وعما سيحدث وإلى ما سينصت وهكذا وهكذا فالطقس في اعتداله سيظل والبحر ما أكثر ماءه الأجاج ويشبه تماماً الظمأ الذي فينا تصدح عقيرته بالغناء ولا يرتوي فما الأفيد لنا يا صاحبي ما الأفيد هل نغمض أرواحنا ونغمدها في أتون الهرب الدائم أم نصحو ونعلن إنهزامنا تماماً ونحدق مليئاً بوجه هذا الليل ونبدأ في طلائه بصبغة الصباح الملون وليحيا العشب الذي يرقد الماء في عرصاته ليحيا العشب محبتي الصباحية المشرقة المشقشقة |
أخونا خضر (كتاحة) بحسب إشارة ناصر يوسف ... انو شاف اخوك والكتاحة (سوا بعض ) في الدمام
انا هنا فقط بصدد تطمينك انو الهاجر (الطير) الزينا دا ... أما الفراش فغالبا بيكون (استشهد) لانو مرة قبل مروقنا (مروق الدخان بالطاقة) صادفت عرس شهيد كان قدام الصيوان (ابوالدقيق) في حالة سيئة ... وكأنه خارج للتو من جنب لمبة ... فعرفت انو الصيوان دا يعود لسيئ الحظ الفراش . خليني أذكرك حاجة أظنها ذات علاقة وأظنها لا ... الخرطوم ... مئذنة وقلم ... وكباية شاي كانت الخرطوم ترفع جناحا وتخفض آخرا ... تطير بنا في سمواتها الفسيحة الآن تنشغل باستخراج الشوك من رجليها الكسيحتين … دجنها الحزن يا لعينيها ... وهي توزع الدمع علی الجميع وتقرأ في سرها آية الكرسي بعد أن شمّعت لسنين طوال كانت الخرطوم مدينة جميلة ... خفيفة الظل ... حتی وهي تغرق الدرب بالفقد سيئ الذكر كانت ... ومازالت تحبنا مساجدها (كانوا يسمونها بيوت الله قبل أن تتصرف فيها الحكومة ... فيها وفي بيوت العرقي ... وبيوت الشعر ... فقط تفتح بيوت عقدتها ) كانت مساجدها تسجد وتركع في كامل لياقة أهلها .... تفتح صدر منابرها لصفاحات- هكذا يسمّون عقد القران - تزاوج بين الأحباء ( وحتی اولاد العمومة ... للقدح فيها أولوية ) ... المانفيستو الخاص بها ( كل الناس اتنين اتنين ) ... وتوسع صدر مجلسها لتقاسم الدمع في العيون الجميلة وهي تودع حبيبها الراحل رحيل الحبيب الآن يفوق الموت وشواهد القبور ومراثي الشعراء الساخنة ... رحيل الحبيب الآن يحفر بئرا في القلب ونهرا في الذاكرة ... ومراكب يرهقها التيار . الحبيب الآن ... آه عليه ... يشكو هجر الخرطوم ... وكأن حديقة القرشي وشارع النيل وهمساته الحائرة وتشققات يد الحبيبة برعشات الحبيب المسافر كأن تنهيدات الأمهات وهن يكلمن قريبا لتسهيل إجراءات الخدمة الإلزامية وموت الأب الصامت جراء بهدلة ابنه الوحيد بين أيدي مدن العالم كأن جبين الناس المصرور في نص السوق العربي والبسمة المدسوسة بين الحاجب والقلب كأن تنورة هاجر التي مسح بها ذات يوم وجهه فالتمئت صلعته وغطی الشعر عينيه وضحكتها التي كانت تخيط فساتين العالم وردة وردة كأن صبره والصفوف تطول ويدخل البعض في مكان الطوب المرصوص أو بين المعارف كأن الملايات التي يغازلها نسيم الحيشان فتغرق في الونس تكتب قصائدها لليل وحيد وكأن اصدقاؤه يتوسطون خمرا باهيا يزرع في حواشيهم الإلفة ... والبدر يحسدهم وهم يضيئون ... وفي رواية أخری يولعون كأنها كلها بعض من دمه المسفوك. مساجد الخرطوم كانت تغسل الحزن بجميل الآذان ووسيم السجود وأنيق الدعاء ... الآن تغرق في صمتها وهي تقفل أبوابها بعد ساعات العمل الرسمية الخمسة. جامع فاروق ... الجامع الكبير ... ينامان علی سهر أهل الصفة الجدد ... ويصحوان علی رهق العيش ... زمان ولزمانات طويلة كان الجامع ملاذا للعطشان والجائع والمزنوق ... الآن ما عاد بيت الله يحتفي بخلق الله كثرت المساجد بالخرطوم فقلت البركة ... ليست لنقص في ثقة الناس بالله ... ولكن نقصا في ثقة الله بالناس ... مضی يلملم البركة من بيوته وهو يری الخلق تنام علی القهر ولا تصحو .... عن مساجد الخرطوم يطول البكاء ولات ساعة عين تحتمل الدمع ......................... ........................ الشوارع ... تزرع خواطرها بالحفر ... ولا تعتبر نفسها مسؤولة عن عثرات البصات العتيقة البصات التي .... هذه البصات تعرف كيف تهدم ... تعرف كيف تسحب خيوط البسمة خيطا خيطا من شفاه الأطفال والرجال يحيا الأطفال علی البسمة المفقودة ويموت الرجال علی طريقتهم الباهظة لعينين مضيا يغسلان الدمع بالدمع كانت البصات تفتح بيتا من عزاء لقلبين باتا يلهمان النجم طويل السهد كانت البصات ترحل بالحب كانت البصات حين يباصر الحبيب لمقعدين مستحيلين ويجلس حبيبته بين عينيه ... تتبرع بكمساريها لأعلان (ياخوانا الباص دا ما ماشي بللاهي انزلوا لينا) ......................... ........................ الخرطوم تنام عن أحزاننا بحبها الكبير الخرطوم قلمي يا لقلمي والمداد من دمي ... تكتب عني قصاصات السهد والقلق الخرطوم مئذنتي - قبل التمكين - تناطح عمارات المادة بروحها الخرطوم أجمل كباية شاي عرفتها زمانات القريفة المجنونة يا لطعم الهبهان ... ينسج طاقيته الحمراء في رأس تكبله العرضة بقفزاتها الجامحة يالطعم الهبهان ... وخيوطه تمسح نهرا من كيف وتزرع شتولا من اكتمال يناطح العماري الجيد ... تجتهد وهي تغالط ( الانترنت للعماري نمرة واحد) ... شايفين العولمة ؟ وبيننا حديث وحديث وذاكرة تتشقق عن حب ولوعة وكثير جدا من دمع اسامة معاوية الطيب طهران 01/01/2005م يمكن أن تضيف للعنوان الفراش والموية والجنيه السوداني ... أنا أصلا قاصد انو يكون العنوان لستة .. فشنو ... أسكت ضيف |
سلامات ياخضر
كل يوم أقرأ بوستك دة..وأقول أكتب.. تخذلني القدرة..يخذلني طقس الروح..القرف ياخضر..وهذه المدينة التي نحبها وتكرهنا.. ألقى الحروف ما بتوصف ذلنا فيها..الشوارع التي لم تعد لنا..البشر البقوا فاقدين ملامحنا الحياتية..الالم الزاد وفاض وفات الحد.. ألقى الكتابة ترف..تخيّل؟! ونصك الأساسي دة .. كابنة خرطومية ما بارة ولا حاجة ..ما استوقفتني فيهو حاجة قدر العبارة دي: اقتباس:
قرأتها وتحسست وروحي.. والله انت كويس :p الحمدلله (الكتابة بعد أسامة معاوية مأزق..تحياتي..بس كان لازم الغصة دي تعبر) |
اقتباس:
المشاركة الأصلية كتبت بواسطة خضر حسين خليل http://sudanyat.org/vb/images/buttons/viewpost.gif يا حولا محمد الطيب يوسف عديل ازيك ياجنابو ياخ والله نورت المكان وانا اقول الزول ده انا شفتو وين شفتو وين شفتو وين ؟ كباية القهوة ما بناباها يا محمد علا حبشنا زاتهم بقوا بتوعين حركات ياخ اما بخصوص فرنسا فربك يجيب عواقب لوتري اكتوبر سليمة موش انا قدمت واعتذروا لي بي رسالة مشتركة مع جغجمية حالم :D:D:D غايتو امريكا روسيا قد دنا عذابها والله مودتي شفت يا حافظ ,,, اها دي ياها عمايلك ... زولك بقى يقول لي يا جنابو ويختم مداخلته بي مودتي :D:D:D مافضل ليهو إلا يكتب مودتي التي تعرف في داعي ,,, مش كان أحسن ترضع حليبك وتدمدم وتنوم .... بدل الحوريج الدخلتنا فيهو ده ــــــــــــــــــــــــــــــــــــــــــــــــــ ـ يا خضر جناب الحبشية ياااخ ... جناب الحبشية بتعرفو :D:D:D |
أعزائي هنا
تحياتي الحارة لكم جميعاً غبت وجيت مرقناها مساء اليوم بالحاج يوسف شارع واحد ياخ هذا السودان وسيع وساع لا اله الا الله . ده دربي أنا هنا لأشكركم علي جميل ما سكبتموه هنا . ولي عودة لكم نفر نفر وباكر صباحاتو بييض . دمتم أجمعين |
اقتباس:
بيييييييييييييييييض ساكت بـــــــس ( وبيض تُقرأ هنا من غير تشكيل لأي حرفٍ منها ) |
العزيز محمد حسن الشيخ
تحياتي واسف خالص خالص للتأخير لك ولبقية الأصدقاء/ت هنا الإعتذار والله طقس البلد تحول لطقس السعودية بالضبط ـ يعني حر وسخانة ورطوبة مبالغ فيها ـ أعتقد لو الأمور مشت كده شركات التجميل حتخسر خسائر فادحة أما بخصوص الخميس فياهونداك قريب أي والله شايفوا قرب وا حلالي مبارك عليك الخميس يا صاحب |
يا سامي صلاح
انت بي جاي من متين ياخينا ياخ بركة الوصلت واهو شايف براك العالم ده وسيع قدر ايش الكتابة يا صديق هي لمثل من هم في همنا بمثابة القشة ... القشة التي سنقصم (بها ظهر الحال المايل) تكبر هذه القشة يوماً بعد يوم في ايادينا سنطاردهم بها يا سامي بذات القشة فأكتب يا صديقي ودمت طيباً |
يا ناصر يوسف
انت خليت السودان جملةً وتفصيلاً ولا شنو جابت ليها دمام ومركز الدعيجي ياسلام ياناصر عارف انا قضيت اجمل الفترات القضيتها في السعودية دي في الدمام بالتحديد ـ وعلي الرغم من انو السعودية بنين دي بلد تخلوا من الذكريات تقريباً غير أن للدمام نكهة خاصة في قلبي ـ خلي ابو ريم يوديك بيت الفضيلة الكنا ساكنين فيهو انا وصحابي خليهو يوديك سوق الحب والكورنيش وسوق الحريم وراء شارع الخزان لازم يوديك الأماكن العجيبة دي كلها وستجد فيها شيئاً من رائحة الخرطوم . بالله لازم تمشي لي منعم يا ناصر يوسف هو زول ممتاز وحيفرح بي وجودك قول ليهو انا من طرف خضر اخوك لازم ياناصر ياخ |
يا بلة اديني فرقة بس للمساء بجيك وباقي الاصحاب
|
حليل الكان بِهدي الغير
صبح محتار يكوس هدّاي ما أجملك وأنت تحفر في بطن الكتابة صورة قلب مفجوع . وحياة تركُض بلا معنى . قصٌ يتداعى بسلاسة وعذوبة ، ويسر تنطق كل الحجارة وتتكلم عن إحساسٍ بالحياة ليس له حدود . بهذا نطقت ايها الباهي زيقو " خضر " وسكبت علينا ماء بارداً تحت شمسٍ حارقة . بك نحتفي وللكتاب والقص نرفع القبعات ، إن بقي منها في الرأس شيئاً . * |
مشتهياهو حرفك الطاعم دة يعلم الله
إزيك يا خضر ياخ |
| الساعة الآن 12:01 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.