يامحاسبو سودانيات ... اجتمعوا !
سلامات يا اشرف
طبعا ماعرفت لي اسم مناسب ولا عرفت اعمل البوست في ياتو قسم فقلت اعملو في القسم الفاضي ده لاني ناوي اتفكفك واتبهل ليكم هنا ده ! |
البوست لتبادل الخبرات
برامج المحاسبة ماهي افضل الزمالات للدراسة ؟ اسهلها اقيمها في السوق ... سوق الخليج تحديدا مواد الدراسة للزمالات هل يمكن الدراسة من منازلهم ؟ من غير التسجيل في معهد يعني ؟ هل في اي مشاكل ممكن تواجه الدارس ؟ واشياء اخرى كثيرة عايزين البوست ده يكون مرجع ذو قيمة كبيرة لاي محاسب وانا حا اكون فأر التجارب حقكم البنتفق عليهو حا انفذو بخصوص الدراسة وبوريكم اول بي اول المشاكل اللاقتني والتقدم في القراية وكل التفاصيل بحيث يكون عندنا تجربة حية ممكن نستند عليها وممكن ينضم لي اي متطوعين للتجارب |
اولا نطلب اجتماع كمية كبيرة من الزملاء المحاسبين
ذوي الخبرات ومن غير ذوي الخبرات لو لقينا زول خاض تجربة الزمالة يكون ممتاز جدا |
اقتباس:
حاضرين ------ بس ما عارف ليه ما فتحت البوست في المنبر العام بكون افيد ولاحقاً ممكن المشرفين ينقلوهو ليك ومال قاطعين لينا نومتنا في امان خليتنا لشنو عشان نفورم اول :) بجيك صاد ضاد بل ح اسكن ليك عديييل هنا جيتني في الاتو بتاعي ذاتو المافي شنو؟ تحياتي |
ماشاء الله
انا قلته طالما المحاسبين ملمومين هنا اكيد بلقى لى برنامج محاسبى لكمبيوترى مجدوع هنا ولا هناك ياربى اصبر شويه ولا اسوى شنو ...؟ |
اقتباس:
في انتظار خبراتك المعتقة المرة دي اخوك شاحز همتو شديد صدقني كان ما انجزت الموضوع ده المرة دي تاني مابنجزو |
اقتباس:
خليك قريب فاما ان يحزيك واما ان تجد منه برنامجا يهمك :) |
ياقيقراوي البوست كتبتو هنا عشان نقول لي اشرف يمدنا بي البرامج والمترجمات والكتب وما الى ذلك .. لكن لو شايفين نوديهو العام مافي مانع المهم الفائدة
اولا محتاجين بالجد لاكبر حشد من الناس العندهم خبرات بالزمالات قبيل شفت زول في سودانيز اسمو الزبير بشير عندو ال CPA ورسلت ليهو رسالة لكن ما رد علي لسة .. انت عندك زمالة ياقيقراوي ؟ |
خالد صباح الخير عليك وعلى الجماعه كلهم ..
تعرف ماظنه فى برنامج محاسبى بالعربى الا وعندى منه نسخه تجريبيه مره اخدته لى قعده فى مصر ..والقى ليك فى الشوارع الجماعه البيبيعوا الاسطوانت المضروبه والمكركه عنده كذا اسطوانه كلها برامج محاسبه ..برضه اشتريتها ..المهم كلها طلعت بيش ... جانى واحد مصرى قبطى باع لى برنامج قال حقه برضه طلع اى كلام .. المهم عندى نسخ تجريبيه كتيره ح احاول انزله ليكم لو وافقتم .. ملحوظه ..القروش الشالها منى القبطى المصرى ح نغرمها لى رافت ميلاد ...انشاء لو يعلمنا كيف انزل ليكم البرامج ...سلام وبالتوفيق |
سلامات ياقرقاش
برامج المحاسبة في تطور شديد لدرجة انو بقى حتى غير المحاسبين ممكن يشتغلوا محاسبين لانو الشغل بقى عبارة عن ادخال بيانات بس مستقبل المحاسبين بقى يامعلم في التخطيط والادارة المالية والتكاليف ... الباقي ده اي كمبيوتر بانتيوم فور بيعملو :D |
ياقيقراوي اين انت ياخي ؟؟
شوف لينا الزبير بشير داك معاك ياخ بالله عليك لمني في اكبر كمية من الناس عندهم CPA |
اقتباس:
دا بخصوص الـCPA يا دوب مسجل في الـSOCPA ودي الزمالة السعودية للمحاسبين القانونيين شبه جاهز لامتحان PART ONE لـ CMA (زمالة المحاسبين الاداريين - امريكية TOW PARRTS) معفي من PART 4 في الـCIA (زمالة المراجعين الداخليين -امريكية) امتحنت واجتزت فقط CFC (مستشار مالي معتمد - امريكية)* ------ * نظام الامتحان مختلف .. وبتم في وبمعرفة وكلاء المعهد الامريكي للمستشارين الماليين، بعكس الـ CMA والـCIA ومؤخراً الـ CPA دي كلها امتحاناتها بقت اون لاين في مراكز حول العالم .. في السعودية متوفرة اللتنين الاولتين .. اقرب مركز للاخيرة في الكويت او لبنان، او القاهرة (5 مراكز في الاقليم القريب). بتسجل في المعهد اون لاين وتدفع رسوم الاشتراك والامتحان، وبقوموا بارسال الموافقة للوكيل (نيو هورايزون)، وبتحدد ليك يوم الامتحان، وفق (النافذة) البتختارها انت، حسب جاهزيتك. برجع ليك عن البرامج المحاسبية .. حسب خبرتي ERP و SAP لا يعلى عليها. |
سلامات ياقيقا
تعرف انا قبل سنتين كده جيت عشان اقرا واحدة من الزمالات دي ود عمي الحاصل على ACCA نصحني بي ال CMA فقمت سمعت كلامو وسجلت فيها وقريييييييت لمن قلبي وجعني لمن قرب الامتحان وكنت وقتها بقتش لي شغل جديد لاحظت انو طلب ال CMA قليل جدا قياسا بي بقية الزمالات بعد داك قمت سالت ناس كتيرين في وظائف عالية في المحاسبة وفي الاتش آر فأجمعوا كلهم على ان الCMA ماسورة كبيرة! بطني طمت من الامتحان طبعا وقمت للتجربة كتبت في السي في بتاعتي اني عندي CMA وقلت اجرب فعلا مالاحظت اي طلب زائد للمعاينات المهم باختصار كده قررت انو الCMA مانافعة واسي حسب اعلانات الوظائف في الامارات هنا اكتر شي مطلوب الCPA والCA عشان كده انا اسي مركز على الCPA فياخي عايزك بتفصيل ووضوح شديد توريني شنو من الزمالات الافضل وشنو في رايك الانسب بالنسبة لسوق العمل في الخليج بالذات يعني بالتفصيل كده وريني عصارة تجربتك في الموضوع ده وتنصحني بي شنو ؟ وتنصحني بي ياتو زمالة وياتها الاسهل وياتها الاحسن وهكذا بخصوص البرامج طبعا الERP لايعلا عليه وده اسي البرنامج الشغالين بيهو في شركتنا الحالية شكرا يا حبيبنا |
اقتباس:
لدى بوست فى منتدانا هذا اسمه شهداء الكمبيوتر ارجو اضافه المحاسبين اليه .. ولا حول ولاقوه الا بالله وانا لله وانا اليه لراجعون المحاسب الكان شنه ورنه ....الكمبيوتر لحقه امات ياولاد على فكره الاوفس لديه برنامج اسمه ...اوفس بروجكت اظنه برضه للتخطيط والتكاليف :D |
ميزة التخطيط ياقرقاش انو داير ليهو مخ متحرر
يعني المخ الالي مابينفع لانو بيعتمد على متغيرات كتيرة جدا في عدة افرع في المحاسبة بتحتاج لي زول عشان يدير البرنامج يكون محاسب وبيفهم ودي الحاجة المطمنة لكن قصة المحاسبين الزماااااان ديلك البشتغلو بالدفتر الكبير ويوميتي ويوميتك وميزان المراجعة وبتاع .... فديل عادي ممكن تشيل فيهم الفاتحة ههههههههههههه |
ياقيقراوي ياخي ماممكن تديني بالقطارة كده ياخي !!
بالطريقة دي انا حا انتهي ليك متين من القراية دي |
اقتباس:
والإخوة المحاسبين الأكارم.... متابع يوماتي لتطور البوست والحاصل فيهو.. اها يا خالد غالي انا بقيت على الهبشة وبس مستني انك تحدد مسارك وين بالضبط وفي ياتو زمالة... عشان اردم ليك كتبها ومراجعها وقواميسها وبرامجها واي حاجة متعلقة بيها ومتوفرة على الانترنت... بس انت حدد... تحياتي |
سلامات يا ابو الشوش
تسلم ياخي والله عارفك مابتقصر انا خلاص حددت ان شاء الله ال CPA الكتب حقاتها اسمها كده Becker CPA Review ومحتاج برضو لي مترجمات امها بت عم ابوها تكون متخصصة في المحاسبة بالذات عشان اختلاف المصطلحات تسلم يازول ياجميل وعلي الطلاق اعمل ليكم تجربة لايف هنا ده لمن تآمنوا :D |
مساء الخير أيها الطالب المجتهد..
بديت ليك اولا بالبحث عن قواميس متخصصة في المحاسبة.. حتى الان غالبية ما تحصلت عليه هو محاولات لاعضاء منتديات لعمل ملفات شاملة للملفات،، او روابط لقواميس عادية.. كما تحصلت على بعض القواميس التي يمكن استعمالها اونلاين... وما زال البحث جاريا.. اولا: English-Arabic Financial Dictionary هو جهد By Mohamed El-Awagy, mohamed_elawagy [at] yahoo . com والصفحة للمصطلحات من هنا (انزل اسفل الصفحة) http://www.translationdirectory.com/...tionary034.htm ثانيا: موقع WordReference.com وهو من المواقع الجيدة لترجمة المصطلحات التخصصية http://www.wordreference.com/enar/accounting وجاري (البحت) لبرامج قواميس محاسبية.. شيل الصبر حبة |
قاموس المصطلحات المحاسبية (مستند ويرد)
طبعا يمكنك الضغط على (Control+F) لعملية البحث التنزيل من هنا وبما انك خارج السودان يا ود غالي.. فاظن بامكانك الشراء عبر النت هنا قاموس معروض للبيع في موقع نيل وفرات http://www.neelwafurat.com/itempage....earch=software وثانيا: برنامج القاموس المحاسبي عربي إنكليزي و إنكليزي عربي النسخة الأولى - أكسس (يعني لازم مايكروسوفت اوفيس يكون نازل في جهازك ومن ضمنه برنامج اكسس) التنزيل من هنا ثالثا: دا قاموس CMA به كل مصطلحات الشهادة مترجمة الى العربية فقط اقف على الكلمة بالماوس الملف صغير جدا بس ايه فيه 1567 كلمة .. اكيد بتكون في مصطلحات مشتركة يا خالد الملف من هنا |
معجم المصطلحات
(إنكليزي/فرنسي/عربي) مع شروح باللغة العربية The English/French/Arabic Dictionary With definitions in Arabic يتألف هذا المعجم من ثلاثة أقسام. يشتمل القسم الأول على معجمٍ للمصطلحات (إنكليزي/فرنسي/عربي) مع شروح باللغة العربية، رتِّب حسب أبجدية اللغة الإنكليزية. ويتضمن القسم الثاني فهرساً لنفس المصطلحات (عربي/فرنسي/إنكليزي) حسب الترتيب الأبجدي العربي. أما القسم الثالث، فيتضمن فهرساً لنفس المصطلحات (فرنسي/إنكليزي/عربي) مرتباً حسب أبجدية اللغة الفرنسية. فللتعرف على شروح مصطلح ما باللغة العربية، على سبيل المثال، يبحث القارئ في القسم الثاني حسب الترتيب الهجائي العربي، حيث يجد المصطلح باللغات العربية والفرنسية والإنكليزية، ثم يقوم الباحث بالرجوع إلى القسم الأول (معجم المصطلحات حسب الترتيب الأبجدي الإنكليزي) للبحث عن المصطلح الإنكليزي المقابل فيجد المصطلح باللغات الثلاث بالإضافة إلى شروح باللغة العربية. الملف عبارة عن بي دف اف التنزيل من هنا |
قاموس (مصطلحات) محاسبية ومالية على أكسل
من هنا قاموس (مصطلحات) محاسبية و مالية على وورد الجزء الاول الجزء الثاني مصطلحات و معاني مالية و محاسبية و إدارية من هنا واخرى من هنا وبرضو حاجة هنا وتاني هنا |
|
ابو الشوش ياخي ان شاء الله يوم شكرك مايجي
تسلم ياخي والف شكر ولسة عشمنا فيك كبير :cool::cool: |
ياخوانا هل في زول في امريكا ؟؟
كدى شوفوا الروابط دي https://www.alllibrary.com/students2.html https://www.alllibrary.com/students.html http://www.nasba.org/nasbaweb/NASBAW...ecusm?openform ياريت زول يورينا كيف ممكن ترسل الشهادات عشان تعرف هل هي مقبولة بي حالها ده ولا عندهم زيادة طلبات زي كورسات او خبرات او ماشاكل وبرضو ورونا كيف ممكن الزول يختار الولاية الامريكية الياخد منها الشهادة يا قيقراوي طبعا عملتها ظاهر شديد |
سلام يا غالي و لعلك بخير ....
أول حاجة عملتها قوقلت جماعتك ديل .... ده من ويكيبيديا : National Association of State Boards of Accountancy From Wikipedia, the free encyclopedia Jump to: navigation, search The National Association of State Boards of Accountancy (NASBA) is an association dedicated to serving the 55 state boards of accountancy. These are the boards that regulate the accountancy profession in the United States of America. There is one board for each of the 50 states, plus the District of Columbia, Puerto Rico, U.S. Virgin Islands, Guam and the Northern Mariana Islands. يعني العمقاء ديل مسؤلين عن الشهادة دي في الشقيقة أمريكا ... فمن الأساس إذا إنت ما قاعد في أمريكا ليه عايز تشوف شهادتك عندهم مقبوله ولا لا و ليه عايز تعرف ياتو ولاية تمتحن فيها ؟ مفروض الأسئلة دي تتسئل في محل ما ح تمتحن ... أو أنا فاهم غلط ... عموما ... أي حاجة عايزها من هنا إن شاء الله تتعمل ليك in no time بس فهمنا بالظبط عشان ما نطش بيك !! |
سلامات يابروف
الشهادة دي شهادة فنية عالمية في المحاسبة وعندها قيمة عالية جدا هنا في سوق العمل في الخليج اها زمان كان ماف اي طريقة ليها الا تمشي امريكا تقرا هناك وتمتحن وتجي طابق شهادتك في جيبك اسي سهلو الامور وفتحوا مراكز امتحانات في بعض الدول العربية عندنا مركز هنا في دبي اها الشي العارفو انا انو كل ولاية امريكية عندها قوانيين براها للقبول ومطلوبات مختلفة يعني في ولايات بتقول ليك يكون عندك بكالوريوس بس وواحدين عايزين خبرة وهكذا سمعت انو ولاية كالفورنيا عندهم اسهل متطلبات الروابط الفوق دي فيها كل المعلومات لكن قدر مافتشت مالقيت!! كيف ماعارف اما عن انا عايز شنو .. فانا عايز الشهادة دي مهما كلفني الامر اها عشان اجيب الشهادة دي عايز حاجات لكن انا لسة ماعارفها شنو !! واهو بحاول استكشف معاكم انا عاوز شنو وده اظنو حايكون توثيق كويس للتجربة من بدايتها لي زول ولاحتى عارف عايز شنو هههههههه لو انا في النهاية اتوفقت وعملت الشهادة دي صدقني البوست ده حايكون اهم مرجع في الدنيا لاي محاسب سوداني ... تسلم ياحبيب وكدى خش الروابط دي بانجليزيتك العلي اصولها دي وشوف بتصل لي شنو تحياتي |
ضربت تلفون للناس دي لقيتهم قافلين ... باكر إن شاء الكريم بديهم ليك سلك تاني ... كان كتبت لي اسئلك ليهم هنا في شكل 1 2 3 اديك اجاباتهم في شكل 1 2 3 إن شاء الله مية سؤال ....تكون ريحت رقبتيك و ريحتني ...و ربنا يوفقك و يعدلها عليك !
|
اقتباس:
|
اقتباس:
معاي زول هنا في البيت ياخي مامخليني اركز كلو كلو بخصوص الاسئلة بكرة انا حا امشي المعهد الهنا واعرف منهم كل التفاصيل الممكنة وبعد داك بجي بوريك الحاصل شنو كلو وبوريك الاسئلة المحتاجة اجابات عشان ما اضطراك تضرب ليهم كذا مرة ... لانو اسي ممكن اديك اسئلة وبكرة يقوم تطلع اسئلة غيرها وهكذا ياخي والله حركة التلفون دي موبالغة عديييل كده تسلم يابروف ياخي وربنا يديك العافية |
تمام يا زول ...
|
اقتباس:
|
مشيت اليوم المعهد
وريتهم شهادتي بتاعة الجامعة مسكوها وقعدوا يحسبوا كدااااااااااااااا قالو لي شهادتك دي تعادل 27 ساعة ! ومتطلبات المعهد الامريكي على الاقل 31 ساعة الحل انو لازم اعمل ماجستير عشان يقبلوني !! الشهادة ماشاء الله تبارك الله محشية مواد عربي وانجليزي وتربية اسلامية لامن قايلة بس! المهم انا اسي اشعر بيأس شديد .. وعدم رغبة في اي حاجة يا امين لو اتصلت عليهم اسالهم من متطلباتهم لي زول سوداني عايش في دبي عايزين كم ساعة دراسة محاسبة؟ |
اقتباس:
تعرف ممكن تقعد مدبرس كده و ما تعمل أي شئ ... الزمن بمر بسرعة خيالية ... و كلنا بنحبط لمن نقع، لكن لازم تتنفض سريع و تواصل لانو مافي شئ بستني ... ضربة التلفون مافيها أي مشكلة و ما بتاخد زمن ... لكن قصة أقول ليهم ( متطلباتهم لي زول سوداني عايش في دبي عايزين كم ساعة دراسة محاسبة؟) دي ما جايه لانهم بالتاكيد ما بكونو عارفين "السوداني العايش في دبي، عايز كم ساعة دراسة" ... الشغل الصاح انك ترسل لي شهادتك ( attachment في الايميل ) و أنا برسلها ليهم و بتصل بيهم عشان السؤال يبقي محدد ... الزول سيد الشهادة دي كان جاكم بجاي داير كم ساعة دراسة عشان يمتحن شهادتكم دي !! ايميلي [email protected] |
تمام يا امين
الحقيقة انا اتصدمت حتة دين صدمة ! لاني كنت طابق قروشي في جيبي وماشي اسجل المهم ابشرك .. لا يأس مع الحياة ولاحياء لليأس ولا ادب ذاتو :D انا في لحظتي اتجاوزت وعصرت علي بطني ليمونة وسألت من البدائل واسي حا انتظر نتيجة مجهودك المقدر وحا اوريك الخطة البديلة الحاتكون اتمخمخت للوقت داك في راسي قصة القراية دي انا نويت عليها وماني متراجع تب .. كع :D بكرة دعكة عينك من النوم حاتلقى الشهادة في ايميلك لانو ماعندي ليها اسكنر حا اعملو بكرة في المكتب الصباح وارسلها ليك طوالي وياخي الف شكر على جمالك الباذخ |
يا ابو الشوش ؟
اين انت يا ابو الشوش ؟ اعمل هولد لكل المشاريع المشتركة بيناتنا لغاية مانشوف الكارثة دي اخرها شنو هههههههه |
يا عم خالد ...
اتصلت علي ناس NASBA و قلت ليهم عندي قريبي بلال جدا :cool: و قاعد في دبي و عايز يعمل CPA و شهادتو عندي ايميل ممكن أرسلها ليكي تشوفيها و تورينا لو هو مؤهل للجلوس لنيل الشهادة دي أم لا ... و لو لا... محتاج يعمل شنو عشان يقدر يمتحن ؟ قالت لي هو ح يمتحن من ياتو ولاية ؟ قلت ليها الزول ده بلال و زول ساهلة :cool: .... عايز يمتحن من أقل الولايات requirements ... قالت لي ال requirements بتاعت الولايات مختلفة و متباينة بصورة كبيرة جدا ... و ورتني القي ال-requirements دي ويين و نبهتني إنو في كم ولاية هم ما مسؤلين من الشهادة دي فيها ( زي 6 ولا 7 ولايات من ضمنها الباما و أريزونا ) ... الرابط هنا : http://www.nasba.org/exams/cpaexam/ و بتلقي كل ولاية عندها رابط تحت العنوان الجانبي : Choose a jurisdiction below to begin the examination process إقتراحي انك تملأ كيس الصعود و تسف و تقارن شهادتك بكل ولاية و تختار ليك كذا ولاية فيهم من رقشة شهادتك ... بعداك إن شاء الله نديهم سلك تاني يورونا كل واحدة من الولايات دي نتصل عليهم كيف - لانهم في ال-NASBA ما مسؤلين عن ال-requirements بتاعت كل ولاية - و أنا بتابع ليك معاهم إن شاء الله ... أنا متأكد مليون في الميه إنو حتي لو عدد ساعات دراستك في الشهادة ما بتؤهلك للامتحان الان ... الناس ديل بيوروك شنو ال- prerequisite المطلوب تعملها ... المشكلة الوحيدة الشايفها انو الكلام ده لازم يكون هنا - في بلد الرجل الأبيض دي - و بتجي ك international student و ديل بتبلو بقروش كتيرة و ما مسموح ليهم يشتغلو و تعقيدات فيزا و كلامات تانيه ... المهم يا زول keep it up و بعد ده ما عندك سكة وقفة ... لو وقفت نحن بنبلك !! |
امين يابروف
ياخي والله ماقصرت كلو كلو خشيت ليك الرابط المهول ده ولقيت الموضوع فعلا محتاج حقة سعوط واكتشفت ليك الامريكان ديل انجليزيهم رابط خلاص! علي اليمين كبو ليك انجليزي في الموقع ده تقول خواجات بس :D المهم ياحبيب بكرة عندنا جمعة حا اتفرغ ليك فيها بالكامل للموضوع ده واول ما اكمل بجي اديك النجيضة هنا تحياتي |
سلامات يابروف
ياحبيبنا بخصوص الCPA دي انا اصبت باحباط شديد في محاولة واحدة بس رسل الشهادة العندك لي ولاية كالفورنيا وشوف لو بيقبلوني لانهم اكتر واحدين متهاودين في الشروط لو قالو لا انسى الموضوع طوالي لكن ولايهمك البديل ياهو ده قاعد جااهز بس بنتظر ردك واوريك البديل شنو تحياتي ياحبيب |
سلام يا خالد،
متابع البوست من قولة تيت؛ فاعلم أن هناك مشجعين على المدرّجات! Don't give up وإن كان أمين ما ظنيتو يدّيك فرصة تراجع :) تحياتي يا بروف. |
| الساعة الآن 09:45 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.