تألم انت في السودان...
ان تكون سوداني لابد ان تتالم (وتنجلط)
حقيقة تملكتني الحيرة كيف يجابه الانسان كل هذا الكم من المعاناة ما ان يقابلك احد وقبل السلام الشكوى من الغلاء الفاحش الحياة القاسية والمعاناة في كل شيء الاكل الشرب التعليم حكت محدثتي (زمان كان المسكين بياكل السخينة حسع ماقادر عليها اقل بصل بي خمسة الف الزيت قدر ظروفك الدكوة ما بتنهبش بس الله في) كنت في زيارة خاطفة للسودان الاسبوع المنصرم وهالني بل (فقع مرارتي) كم المعاناة التي يعيشها انسان بلادي اول يوم كانت هناك ازمة غاز!!!!0 الشوارع متكدسة بارتال البشر الباحثين عن مقعد في حافلة أو بص...!!! الغلاء لايصدق !!لا يصدق الوجوه كالحة تكسوها سحنات من معاناة وضيم وقلة حيلة... هناك معادلة انهكتني ولم اجد لها تفسير كيف يوازي الانسان بين منصرفه ودخله بين احتياجاته الملحة وذاك الغلاء الطاحن..!!! الناس اختصرت وجبة الغداء وصارت الوجبات فطور وعشاء كيف الغداء وكيلو اللحم في بلد درسونا ان من ثرواته ومصدر دخله الماشية؟؟!!! الكيلو للعجالي 45 الف !!!! والضان 60 الف !!!!! بالله دا كلام ياخ والله حرام حرااام :( وآخر بدعة ربط الجمرة الخبيثة بي فاتورة الموية يعني لو قطعت كهربتك وفي جيبك مافي غير قريشات ماعندك طريقة ترجع كهربتك الا تدفع فاتورة الموية والقرار دا تضرر منه كثيرين كما تم تسريح جميع جباة فواتير الموية..!!! |
والله قضيت سبعة ايام تألمت ومنذ أن وطأت قدماي ارض بلادي ومن المطار!!!
وتلك الوجوه العابسة لك كان بينك وبينها تار تخرج من مطارات الامارات تتبعك البسمات والامنيات بسفرية سعيدة تمشي اهلك يصروا ليك الوش ويعاملوك بمنتهى عدم الانسانية... حزينة ليك ياوطن وحزينة ليك عزيزي المواطن وحزني الاكثر لاطفال بلادي الذين تحرمهم احوال بلادي من ابسط شيء وهو كوب الحليب الذي اضحي ليس بمقدور الكثيرين توفيره لهم !!!! تعرف ان اكثر الامراض الشائعة الان في السودان الجلطة والذبحة...!!! لله دركم اهل بلادي...:( |
في الطريق من المطار والى المنزل الكثير من البنايات التي تطاولت
حين اصبح ذاك الليل ضحكت بيني ونفسي فلقد تطاول البنيان وتقاصر الانسان لعمري تلك من المفارقات المبكية... |
كثرت الجلطات والذبحات من كثر ما يحمل القلب من المعاناة والالم
للتشخيص لابد من الصور المقطعية هل تعرف ان الصور المقطعية تبدأ من مليون مليووون وحتى 500 الف والمرض لايصيب الا الكادحين المعدمين وتلك ايضاً من المفارقات المبكية المحزنة التي يشهدها ويتعايش معها مرضى بلادي ولاصحاب الغسيل الكلوي قصص وقصص تدمي القلب الانسان في بلادي غررريب في وادي الذئاب..!!! |
الى متى يا ساسة..؟؟؟؟
الى متى يموت الانسان فقراً ومرضا ؟؟؟؟ في المستشفيات قصص تراجيدية تفوق الافلام الهندية حبكة كثر اللصوص وماعاد هناك امان..؟؟ تُرى لماذا كثر اللصوص...؟؟؟ هل عدم الامن أم الجوع والفاقه؟؟؟ تنوعت اساليب الغش والكذب والتحايل!!! الكل يضع سماعة على اذنيه سألت لماذا؟؟؟ لأن هناك عصابات متخصصة في خطف الموبايلات قبل ان يرتد طرفك موبايلك يروح في حق الله... يا نجوى ابقي عشرة على موبايلك...!!! |
مرافى
سلامة العمة .. و حمد لله على سلامة الرجوع .. ( ما ضاق الوطن بس كبرت الزنزانة ) .. |
أهوال موجعة
وأحوال لن تستقم والظل أعوج وإن شئنا الدقة فإنه لا يوجد ظل من أصلو هيه يا مرافئ ... سلامات للعمة وعوداً حميداً... |
والله يا مرافى أنتى والمعاك كضابين جنس كضب .. شوفى كلام الرجال
اقتباس:
|
هو شنو الحاصل ياإخوانا البجي البلد كلو يكورك زينا يعني ماتجو ولا شنو ، أمس يأمدام عمنا بابكر مخير بشتكي من تعب البلد دي لدرجة أنو ضحكنا في أنو لما وصل نزل مع قاسم بدري قال أنا بس بعاين للبعمل فيه قاسم فترتة انتو مستحملين الحال ده كيف
|
سلامات للعمة يامرافي وماتشوف شر انشاءالله
الفقد عظيم ياخوانا الفقد بلد بي حالو والناس الفي النص الله يكون في عونهم ------ ------ جايين ياعلاء نكورك ونجوط وننعل سلسفيل اي حاجة لكن برضو ياها بلدنا ونحن اسيادا جايين تب لو الله مد في العمر اقول قولي هذا واستغفر الله لي.............. |
اقتباس:
ربنا يسلمك من كل شر والله يا معتصم ماضاق الوطن ولكن ضاقت الجيوب وكبرت المعاناة ..:( مودتي |
اقتباس:
والله الظل شدة ما اعوج لمن لافي صينية الانسان يا بلة ارهق ويعاني ما يعاني فقط من اجل لقمة العيش الكسرة والملاح بس دعك من الكماليات والفاكهة والسلطة تدخل في بند من استطاع اليها سبيلا.. هيييه يابلة الوجع كبير في قلب الوطن... مودتي |
اقتباس:
والله ود الخير متفائل وربنا يتم ليهو تفاؤلو وكلنا لينا امل في الاوطان سمح ولكن... يصدمنا الواقع حين نحط على ارضه الميمونة فالواقع مرير مرير وود الخير ربنا يوفقو فيما نوى ,,,, بس اهمس ليهو ما تحرق كل سفن الآياب فلربما تحتاجها يوماً كأني بود الخير يقول اصلكم ااابتطمنو...:D مودتي ليك رأفت ولود الخير |
اقتباس:
والله انا زاتي كنت بسأل اختي انتو عايشين كيف..؟؟؟ فالمعادلة ابداً ما بتظبط بين الدخل والمنصرف بس نقول الناس ماشه بالبركة... والله يا علاء لو الواحد عاش في احدى دول الخليج يشوف كيف انو الناس ما بتعاني ولابتتعب ياخ اي شيء يجيبو ليك البقال لغاية عندك لامليمة لا تعريفة ناس البلد دي شدة ما راحات شوف عيني الصيدلية يكونوا رافعين القزاز ويجيء الصيدلي لي عندهم ويشيل الروشته ويجيب الدواء والزبون من عربيتو ما ينزل..!!!وهكذا في كل مكان بيع...دار امان ما بعدو امان تقولي شنو وتقولي منو...:D اللهم ارفع البلاء والغلاء عن بلادنا وجنبها الفتن واجعلنا مواطنين نتمتع بحقوقنا كاااملة بلا تعب ولا معاناة قول آمين الذ حاجة وكنا متجهين للمطار وقفنا في بقالة نشتري موية توقعت يجيء البائع جري للعربية ويجيب العايزنو قت لاخوي يعني بتاع البقالة مابجيء الا تنزل قام رمقني باستغراب ...وتعجب !!!!! والله انتي طبعك خرب خلااااص...:D |
اقتباس:
ووالله زي ما قت الفقد كبييير البلد بلدنا لكن ما نحنا اسيادا انحنا اغراب فيها ياخ انحنا الاحترام البنلقاهو في دول الاغتراب في بلدنا ما بنلقاهو وشئون المغتربين تشهد... ياخ ناس مادايرة تشتغل لييه ما يكون الشغل نظام شفتات وعارفين الجاي في اجازة دا وقتو محدد والله عندهم موظفات كدا شيء عجيب ورايت امامي كم حالة مستعجلة ورفضن الشغل بحجة الدوام زمنو انتهى انتهرت احدى المتعاملين انت شايفني حسع شغالة وبيدها كأنه طفل امشي انتظر هناك فالموظفة المصونه ماكانت في المكتب كانت بره والله غلطان هو ماينتظر مؤدب ويستناها تكمل الونسة والحوامه بره المكتب عشان بعدين تقوليهو المواعيد انتهت... ياخ والله المغتربين دي فيها جنس اذلال لبني الغربة لاحُكيت ولا قيلت برضو تقولي بلدنا وما عارف شنو...!!!!:( |
انا اقترح ان يهدم السودان ويصير انقاضا
بعدين تتبانا دوله نلتجيء اليها لحين اعادة بنائه اعادة بناء من المطار وانت ماشي تستثنى من الهدم عمارات ناس الحكومة لانها عيني باردة مواكبه ومدفوع فيها كويس..:) لكن نخليها وقف اما انسان بلادي وارض بلادي ندخلن الانعاش حتى تدب الحياة في اوصالهم بالمناسبة هي البلد دي حقت منو...!!! اطالب الانجليز ان يستعمرونا بعد اعادة بناء السودان الجديد.. الموافق يرفع ايدو... |
مرافي ازيك وحمد الله على السلامة، بقدر ما بفرح بالإجازة في السودان بقدر ما برجع من الإجازة وجواي كم متناقض من الأحاسيس.. بس نقول شنو، ياهو بلدنا وهو الأصل.. ربنا يلطف بالبلد وبأهلها.. |
مرافى يابنتى
حمدا لله على السلامه ..رايح جاى المهم من فى اعلى السلم يرى ابعد .... وكل ما ارتفعتى درجه حتما سترين اكثر بعدا اتمنى لو تحلقى فى الاعلى بعيدا حتى تحكمى وتقارنى ..بين السودان واى مكان اخر . عموما عتدما نكون ملوك اللحمه فى العالم او نكون ملوك زيوت الطعام فى العالم او ملوك الذره الشامى مثلا او تكون بلادنا افضل بلد فى العالم يصدر مواد غذايئه اورجانك .. او عندما تصرخ الحكومه كل صباح فينا ( مثلما حدث فى اليابان ) ... ايها الشعب الفضل .. قللوا ساعات العمل شويه ... مامكن الانسان يشتغل عشرين ساعه فى اليوم ...انتوا بتتعبوا نفسكم حرام والله .. اليوم داك تعالى قارنى .. غير كدا ..قضى اجازتك ...واضربى الهم بالريال او الدولار .. |
اقتباس:
ولله يا سحر الكم المتناقض من الاحاسيس ينتابك من عتبة المطار للاسف فالبون واسع في كل شيء... في بلادي ليست هناك من قيمة للانسان عكس مانري ونعايش في البلاد التي نقيم فيها وذاك ما يزيد إحساس الحسرة والالم لحال البلد واهل البلد ربنا يتطلف بي اهل البلد ويعوض صبرهم نعيم ورفاهية يارب مودتي وسلامي للعائلة الكريمة |
اقتباس:
والله هم السودان لا بيضربو الريال ولا الدولار...:D قوي ومنيع بلدنا قديما قيل سلة غذاء العالم في الاول اليبقى سلة غذاء اهلو ويشبعن والله يا عم قرقاش نفسي اعرف سبب المعاناة دي هل الارض صارت بور عقيم..؟؟؟ ولا الانسان اصابه الوهن وهدتو المعاناة واحد باكستاني عامل روحو بيعرف عن السودان قال لي انا معلوم سودان هادا واجد خير بس هذا سوداني كسلان واجد في نوم مافي شغل.. بالله شوف ... الناس كلها تقول السودانيين كسلانين..حسع يعني الحاصل علينا دا سببو الكسل بس!!!! الله كريم علينا شكرا للمرور |
اقتباس:
اهديك برنامج اسمه ..طرق قاتله ..يقدم فى حوالى الساعه السادسه مساء بتوقيت السودان من الاحد الى الاربعاء ..على قناه الجزيره الوثائيقيه ..لتعرفى مدى معناه البشر فى كسب رزقهم ...وبعدها قولى رايك ..؟ صديق باكستانى يعمل معنا هنا فى السودان كمدير لواحده الشركات الكبرى هنا مما ادهش الرجل فى بلدنا ان العامل السودانى يشترى كل يوم طعام افطاره من البوفيهات والدكاكين بما يساوى تقريبا ثلث مرتبه ..ويسال لماذا لايصنع العامل او الموظف طعامه ليلا فى منزله وياتى به الصباح فى عمود اوماعون ما الى عمله .. هذا من الجانب التحت ... ومن الجانب الاعلى فانا اعتقد ان مشكلتنا فى قياداتنا ..فهم ومنذ الاستقلال كلهم مشغولين بالحفاظ على كرسى الحكم فقط ... |
| الساعة الآن 02:44 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.