هيا يازول الله....اركز زى اخوالك الحجولة ديل.....
|
هيعععععع
عفيت منهم الغُبُش ابان مسوحاً موية ---------- بما اني مُحاط بالـ سوط من كل الاتجاهات اخوال رباطاب واعمام محس وحبوبة جهة الوالد من حوش بانقا تجدني لابد بـ سؤال يادوك: هل البُطان دا بيأكد جعولية الرباطاب أم هو يؤكد نوبيتهم*؟؟؟ لأن اعمامنا المحس برضو عندهم الجلد عادي وفرض عين كمان طيب الاصل الجغرافي للطقس دا وين؟؟؟ ياخوانا وين عزام ؟؟؟؟ *اقصد انتماءهم للنوبيين اقول قولي هذا واستغفرالله لي.............. |
اقتباس:
تميل زينوبة زي البان يمين وشمال تودي الطوق .... وأخوان أم شلخ ينكبو ا جوة الدارة زي صقرا نزل من فوق .. ضرب السوط والركزة بيفرق الناس عشان زينوبة ما بتحوق .. وعاد تتحزم الجنيات وتتنظم تقيف في روق .. وكل واحد يهز ضرعاتو الحجبات تزح لا فوق ... جفير الخوسة فايت الكوع وسيرو مع العضل مطبوق ... والطاقية تحت الحاجب المعقود هدية أم زين وما مشرية من السوق ... ويتقدم عريس السمحة رافع سوطو كانو بسوقوا بيهو النوق .. والعنجاوي ينزل فوق ضهورن بس تقول منشحطة فيهو بروق ... يبدا مجرو بالترقوة يتحدر مع الضلع القصار ملصوق .. وأحمر عين يشم الدم بعد ما يرش بنات عمو ويزيدن شوق ... وثابت حيطة لا بتهز ولا بتلز وصاري جبينو كلو عروق .. وقال بعد العقد طلقانة ما يحجزوهو ا إلا يخلو ا ضهرو شقوق .. هناك الحال مغير جد وهيجة الناس تفوت الحد... وكان حجازو مد اليد بتسمع كع ،، دكتور محمد بادي ---------------------------------------------------------- يا زول الله القبائل النيلية الشمالية دى كلها نوبية الاصل بعضها احتفظ بلغته الام والبعض الآخر استعرب لحد ما ولا زال فى حياته الانتاجية يحتفظ برصيد هائل من التعابير والاسماء النوبية ...فى نظرى المهاجرون العرب لم يتوقفوا كثيرا فى اقصى الشمال لضيق الارض هناك وانعدام الكلأ فاتجهوا جنوبا نحو مناطق المحس والدناقلة و الشايقية والمناصير وباقى القبائل الجعلية فانت يا زول محاط بالسوط لانك محاط بالنوبيين من كل الجهات فاركز |
غايتهو يا خال
ناساتك الشفتهم عامليين صناديد بينفدعوا عند الجلدة التانية عاملينها نوع من العرضة لكن هي جرسة سااااااااااااااكت هم مش ديل الحاكمهم البشير وكابين الصنة ولا غيرهم :rolleyes::rolleyes::rolleyes: |
يا روحي البريده يا مالكة الوسامه محتار
في جمالك اهوي اﻻبتسامه.. انتي القمره زاتك كيفن عاد اسيبك ما دام قلبي رادك يا النائر خديدك خائف يوم اسالمك تمسك ايدي ايدك ويتوقف قليبي الهلكان بي ريدك ---- سجمنا ياعمو دحين الاغنية دي مالتنا ولا شنو ياشوايقة المنبر ثم انه هسي الجلد دا دايرلو ركزان انا دي دحين ما بنجلدوا |
اقتباس:
و لأستاذنا حسن فرح و أهلنا الدناقلة برضو, دق السوط عندهم أساسي موش البطان بس هو القاسم المشترك بين البطون دي كلها, من أقصي نوبة الشمال, لحدي تخوم الكدرو و حلفاية الملوك, مجمل طقوس الفرح و الحزن, واحدة, البطان و الزغاريد حال الفرح, الإحتفاء بالميت يوم أربعينو, طقوس عدة الزوجة. طقوس الزينة, واحدة, عدا إختلافات طفيفة, الشلوخ و دق الشلوفة, إرتباط بعض الطقوس بالنيل زي زيارة الأم بي مولودا للنيل يوم السماية, و زيارة العرسان للنيل يوم السبوع. ده كلو بخلينا نتصور إنو القبائل دي كلها أساسا واحد, نوبي, أو نيلي, أيا كانت التسمية, الأساس واحد, و التقسيمات الحالية دي تقسيمات حديثة. ما داير أخش في جدل بيزنطي مع الناس البقسمو الشغلانة لي نوبة و أصول عربية من جعل و شايق, لكن كل الشواهد بتقول إنو الأساس واحد |
شكرا استاذنا حسن فرح
سبقت فأوفيت الداير أقولو ليك الأصل و لينا محض التناص. |
اقتباس:
الاخ خالد الصائغ...مش عارفك قاعد وين....على اية حال ينعم صباحك خير يسعد مساءك نور....تشتتنا يا اخى.... لكن رغما عن ذلك فنحن اهل... ابن عمى شوقى بدرى حبوبته دنقلاوية ووالده رباطابى.... انا ذات نفسى جدى رباطابى وحبوبتى عبادية من اسوان وبالطبع تكون مخلطة هناك..... ولدنا زول الله دا هسع دية زوجته دنقلاوية اومحسية الله اعلم...شفتوا كيف....وبالمناسبة بنت اخوى سامية زوجها المسيرى الفاضل ابو عبيدة...اها شنو.... وود عمتى مدينة الرباطابية والده من ساكسون دارفور...تانى عندكم كلام.... |
وود عمتى مدينة الرباطابية والده من ساكسون دارفور...تانى عندكم كلام....
|
اقتباس:
أنا قاعد في السعودية. تظل القناعة راسخة بي إنو السودان ده كلو أولاد حوش كبير, نفاجاتو مفتوحة علي بعض, و الفروقات الشايفنها بعض الناس, دي متوهمة, و سببا تبني بعض الناس لما يسميه الزول الجميل خالد عويس بالذهنية السنارية, الذهنية السنارية البتحاول تقسمنا لي عرب و عجم, عشان تقنع روحا بالتفوق و التمايز عن الآخر. |
عمنا حسن فرح
تحية واحترام ليك ولضيوفك هنا سؤال بسيط ليكم كلكم ( البُطان ) كفعل ثقافي تراثي ،، هل هو فعل كويس خالص خالص يعني عشان نحتفي بيه كفعل ( رجولي ) ؟؟ يعني حاجه كويييييسه كده ياخ ؟؟ ولا بس مجرد التعامل معاه كفعل ثقافي يكفينا إننا نحتفي بالبطان ؟؟ ياخي انا ذاتي الدخلني في حتة الفئوية دي شنو ياخ :075: |
اقتباس:
لا والله يا ود عمتى مدينة ...حاشاك ان تتلوم فى حق اهلك....الناس ديل اعتصاماتهم فى ميدان عزة بابى حمد سمع بها القاصى والدانى ووفودهم بشأن الكهرباء تتوارد على الخرطوم ...صحيح دا كله لم يرفع الظلم الواقع عليهم ...يجيهم المانافع يفك كضبته ويهرب ...وبعده يجيهم البشير يعرض عرضتو ويغادر...والحال فى حالو |
اقتباس:
انت يا ناصر ما سمعت بحكاية الجعلى الجاتو غرغرينة فى رجله حماك وحمانا الله فقرر الطبيب قطعها اثناء القطع قامن النسوان زغرتن لتشجيعه فصاح الرجل:على الطلاق تقطعوا التانية.... غايتو قبل 25 سنة من الآن لو انت حضرت ليك حفلة زى دى كان كلامك حيكون كتر...الدلاليك والشتم تسوى فى الدل دك دل دك وقلبك يدق بنفس التردد والسمحات يتمايلن فى الدارة .....قطع شك بدون شعور تلقاك يا نطيت ليك فوق ضهر جمل وقربتا بيهو.... يا اخدت ليك برجة وتنيتا بى سوطين تلاتة....أسأل مجرب |
اقتباس:
خلاس يا السمحة عفيناها ليكم بس بشرط تنزلى لينا فديو حفلة فرح شايقى الدليب والطمبور مولع نار وبناتكم السمحات فى الدارة حتلقى عمك رأفت المقدس ذاتو يجى متلب |
اقتباس:
والله يا دكتور حسن أهو بنسمع بحكاوي زي دي كتير لكن ما زالت أسئلتي قائمة ،،، وبرضو حكاية الجعلي الحلف طلاق بإنو لاااااااازم يقطعوا رجله التانيه ،، بسسسسسسسسسسسسس عشان الــ ( نسوان ) زغردن ليه دي ،، هل هي شئ ممكن الواحد يفتخر بيه يعني ؟؟ |
اقتباس:
ايوا ياناصر بنفتخر بيهو وكمان ماحصري على الجعلية هسه تعال اقطع كراعي اليمين وجيب ليك مرتين يزغردن عشان احلف عليك تقطع التانية ولو ماقطعتها بقطعا براي قدامك اها شنو ليك اقول قولي هذا واستغفرالله لي................. |
اقتباس:
والله يا حبوب ،، كرعينك الإتنين الليفت ديل محتاجين ليهم ياخ طيب كويس يا زول الله ،،، الإفتخار هنا مدعاة لشنو بالضبط يعني ؟؟ الشجاعة والإقدام مثلاً ؟؟ |
سلام يا دكتور،
الركزة للبطان سرّها عجيب ودق السوط منتشر في أغلب المناطق في الشمال. في بعضها انحسر وفي البعض الآخر مازال يمارس. في مناطقنا انحسر وصار نادراً جداًً. لكني أذكره تماماً ونحن في مرحلة الصبا، كنا نشاهده، والأكيد، كنا نتوق وبصدق أن نركز مع الراكزين غير أن عامل السن كان يحول دون ذلك. فيا ناصر، الركزة أسبابها الجو المحيط وما رسخ في الوجدان من تقاليد، لكن من الصعب تبرير دوافعها والسؤال عن ماذا يريد الراكز أن يثبت. فالراكز تتملكه "هوشة" وعند البعض، عدم وعي عند سماع الدلوكة والزغاريد ومشاهدة الشبابيل، كما وصفها ود بادي في قصيدته "هوي يا وليد" وقد أورد حسن مقطع منها عاليه. تلك الحالة كنت قد كتبت عنها في بوست عبد الواحد الصبي الفارس ووصفت الجو المحيط بها: اقتباس:
|
اقتباس:
اسمعني يازول انا ماعارفلك سبب باين كدا اديك ليهو لكن عندي اخوي "الصغيييير" لما يسمع ايقاع السيرة برجف كلو ومرات يبكي عديل قبل سنتين تلاتة جاء مع الوالد عُمرة وقمت دخلتو الرياض وقعد معاي زي شهر كدا يوم طالعين حفلة بالليل ومستعجلين عشان كنا متأخرين ومسجل العربية شغال فيهو حسين شندي وجات أغنية سيرة زي السيرة فجأة الزول دا بي صوت عالي جدا شبكني أقيف لي دقيقة اقيف لي دقيقة وقفت مخلوع قايل حصلت ليهو حاجة قام صاحبك متناول علبة المناديل وتلب في الرصيف وعرض زيييييييين لمن الله غفر ليهو وجاء راجع اتخيل براك كمية الاستغراب والدراما في الموقف دا والناس -جنسيات مختلفة- وقفت تعاين والبضحك يضحك والبعلق يعلق وهو ولاااا هماهو كمل عرضتو وركب جمبي زي الماحصل حاجة. اها اعرف السبب انت براك بعد دا اقول قولي هذا واستغفرالله لي................. |
سلام زول الله،
ياخي تحياتي بالله لأخوك. :like2: دي ياها حالة الهوشة والإنجذاب وبعض من عدم الوعي البتتلبس الزول الوكت داك. حالة مشابهة بتحدث لبعض الناس أثناء المديح، وعندنا بيقولوا "فلان داك عِشِق" ساعة تتلبسوا الحالة. الحالة دي وصفها حسون محمد سعيد في قصيدتو "نحن مانا سكارى" وقال: والحجاج هناك في "القرونة" سمعتو نقَّر طارا... ياحاج ..في "القرونة" سمعتو نقر طارا... قوماك ..في" القرونة" سمعتوا نقر طا را .. أمشاك "للقرونة" ..سمعتو نقر طارا... دا "الحساني ود ابجارة"...بي صوتوا اتقول زمبارة.. بشتن بي قلوبنا الليلي..ولَع نارا... وكتين قال"..عيب شبابي الما رحلْ...واللاهي لي ذاك المحلْ".. "جيناكا يا كاب الهملْ..لا دنيا...لادين...لا عملْ...." "يانور....هوي يانور...هوي يا نور..." والدماع جرت بي غزارة... والحجاج ملوها الدارة... "ود حاج طه"و"حامد"..وجدي"أحمد كارة".... وكل الناس تقولوا سكارى... نحنا في مدح الرسول نتشاف تقولوا سكارى...! لاكين حاشا ماني سكارى...عشقانين برانا...!! ناصر الله أعلم ينقشها. :biggrin: |
اقتباس:
كويس جداً والله ،، اقتباس:
اقتباس:
تحية طيبة يا أحباب إذن هي هوشة ،، هوشة الطقس حيثُ الإنجذاب كما هو الحال في حلقات الذِكِر د. محمد المهدي المجذوب قد ذكر ذات الطقس هُنا ،، وهنا حلقة شيخ يرجحن يضرب النوبة ضربا فتئن وترن ثم ترفضّ هديراً أو تجن وحواليها طبول صارخات في الغبار حولها الحلقة ماجت في مدار نقزت ملء الليالي تحت رايات طوال كسفين ذي سوار في عباب كالجبال وتدانت أنفس القوم عناقاً واصطفاقاً وتساقوا نشوة طابت مذاقاً ومكان الأرجل الولهى طيور في الجلابيب تثور.. وتدور تتهاوى في شراك ثم تستنفر جرحي وتلوب في الشباك مثلما شب لهيب وعلا فوق صدى الطبل الكرير كل جسم، جدول فيه خرير ومشى في حلقة الذكر فتور لحظة يذهل فيها الجسم والروح تنير وعيون الشيخ أُغمضن على كون به حلم كبير والمقدم يتغنى يرفع الصوت عليا وتقدم يقرع الطبل الحميا ورم الذكر وزمزم واستقامت حلقته وانحنت حين انحنى وهوت والطبل نار تتضرم وتصدى ولد الشيخ وترجم حيث للقطب حضور وتداعَى وتهدم أما هنا وفي قصيدته ( سيرة ) لعلهُ المجذوب قد تطرَق للبطان من زاويةٍ أخري وهوى عاشق وطار وأهوى السوط رعدا بمنكبيه وبرقا يتحدى عقوبة الصبر فالحرمان أمسى من السياط أشقا مُهرة "حرة" وتنتظر الفارس يحمى حريمها والذمارا وأتاهُ العبير من خمل الشبال حياه جهرة لا سرارا موعد لا لقاء فيه وتاجوج تولت عفافة وانتصارا |
هناك عادة قريبة جداً من بُطان الجعلية
وتُسمي ( شارو ) عند قبيلة الفولاني المفاصلة للفوز بإحدي الحِسان دائماً ما يتم التحكيم فيها علناً وفق تقاليد الفولاني عن طريق الشارو ،،، حيثُ تشهد البنت ( الزوجة المرتقبة ) صراعاً من نوعٍ فريد ،، حيثُ يقف الجميع كجمهور بتابع بشغف ،، نزالاً بين شابين يُريدان الفوز بالفاتنة التي تراقب نزالهم والنزال عندهم أقوي وأفظع من بُطان الجعليه ،،، حيثُ يقفُ أحد الشابين عاري الظهر ( راكزاً ) متحدياً وقع ضربات الشاب الآخر علي ظهره بثبات ،، وغالباً ما يتم الضرب بــ ( مُطرَق) من الشجر قوي جداً وهناك المُحكِم الذي يبدأ في عد الضربات ،، ثُمَ يوقف الذي يقوم بالضرب ليتفحص وجه الشاب المضروب ،، هل هناك أيتُها دموع قد نزلت من عينيه ،، ويعلن للجميع بأن لاااا دموع ،، ثُم يأمر الآخر بأن يواصل في الضرب ،، ويَعد لهم ،، ثُم يوقف الضرب مرةً أخري ،، ويتفحصُ المضروب ،، وعندما يجده ( راكزاً) غير متأثراً بالألم ،، لا دموع ولا بكاء يعلن للجميع أنه الفارس المنتظر ايظفر بالشابة الحسناء ،،، بينما يترك الثاني المكان ململماً خيبته |
اقتباس:
ويكون في صلة :gap: أنا غايتهو عاااااااااااااارف روحي "غرابي" :wink::wink::wink::wink::wink: |
| الساعة الآن 09:31 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.