ستاربكس
اقتباس:
اقتباس:
استاربكس* للأديب أبوبكر عباس، قصة من أدب الواقع نشرت سابقا من غير تنقيح بهذا المنتدى يجري العمل حاليا في النص لتحويله لعمل إذاعي هامش: * للقراء والأعضاء من الخرطوم وضواحيها وضواحيها تشمل مدني: استاربكس = اسم سلسلة مقاهي غربية، تٌدرج مع الشركات اليهودية أيام هيجات المقاطعة العربية للبضائع الأمريكية استاربكس: وأنا طالع من صالة المغادرة بمطار دبي الساعة واحدة صباحا بعد وداع صديق مسافر لندن، قلت أطلع صالة القدوم أشرب لي فرابتشينو كراميل من إستاربكس. مع الشفطة الأخيرة وقبل ألحس الكريمة لمحت لي زول آخر مرة شفتو كان قبل تلاتين سنة، عرفتو من مشيتو، إنتظرتو عند المخرج، إزيك يا دكتور عبد المنعم محمد حمد؟ عاين لي بدون إندهاش وقال لي: كويس الله يبارك فيك، ما عرفتك! - أنا مجدي سفسفة صديق محجوب أخوك الصغير الكارثة، كنا جيرانكم زمان بدباغة مدني جنب قبة ود كنان. قلدني "ونزلت منو دمعة " وقال لي متجنبا النظر لي مباشرة: أديني تلفونك يا مجدي، أنا مرهق جدا وماشي الفندق بتصل بيك بُكرة بعد بُكرة نتونس ونجتر شوية من شقاوة الماضي بتاعتك ومحجوب ورونق ماضي الدباغة. فجاءة خلعت جلابية مراكبية دبي ولبست عراقي دراويش ود كنان وقلت ليهو بتركيز شديد: تمشي معاي، ما بزعجك، ساكن براي على بعد حداشر دقيقة من المطار وبوفر ليك إقامة مريحة جدا وكنت في هذه الأثناء قد سحبت شنطتو الصغيرة وتقدمت خطوة نحو بوابة الخروج. إبتسم وردد: حداشر دقيقة! جنّك ذاتو! رجّعت ليهو مقعد العربية الأمامي لوضع الاستلقاء، لاحظت الحزن المخلوط بالإرهاق على ملامحه، قررت بيني وبين نفسي الهروب للماضي مباشرة دون السؤال عن تداعيات الزمان عليه خلال التلاتين سنة الماضية. رأيك شنو يا دكتور، نزيد للحداشر دقيقة ساعة تاني؟ أعزمك فوقها شيّة بقهوة الفنانين في الهواء الطلق، المميز في الشيّة دي، انو الفنانين ديل، عندهم صحانا يتم تسخينها للحفاظ على صوت طقطقة الشواء المحبب والصوت (أزيز على قول جيجي صديقتي) دا، بكون مستمر أثناء تناولنا ليها، ودا، واحد من تلاتة برامج لو ما عملتهم لضيوفي بدبي بكون قطع شك مستضيفم مجاملة ساكت. هزّ راسو بالموافقة وأضفت والليلة تخلي النقّة كاملة لي وإتّا تستمع، كرر الهزّة. اخترنا مكان خافت الإضاءة ومكشوف للاستمتاع بنسايم نوفمبر اللطيفة والشيّة أم صوت، بعد كتابة الطلب، قلت ليهو: يوم قبلوك بالدفعة الأولى بكلية الطب جامعة الجزيرة (79)، اليوم داك، أُمي قالت لأبوي بعد صلاة المغرب: الليلة، بيوت الدباغة كلهن فرحانات بود محمد حمد غفير التلفزيون القبلوهو بالجامعة، ردّ عليها بفرح: بستاهل؛ هو وأبوهو مبروكين. تاني يوم ونحن راجعين من المدرسة المتوسطة وفي نص ميدان التلفزيون، محجوب أخوك حاول يقشر بيك عليّ، طوالي قبضتو من شنطة الدمورية وقلت ليهو: أسمع هوي، نعّوم دا، حقنا كلنا... أول خميس ليك وإتّا عائد من الكلية الإعدادية لبيتكم، لقيتنا قاعدين نلعب بلي في ضلكم، قلت لينا أسمعوا إتوا الاتنين ديل، أوعة ألقاكم تاني قاعدين متفنين عند بت المنى تضربوا في البليلة العدسية بسلطة الروب، دا أكل غير صحي... سكتنا وأضمرنا عدم الطاعة وبعد إتّا دخلت البيت، محجوب علق ساخراً: يكون الاسبوع دا، ادوهم محاضرة عن البكتريا بالإنجليزي!! وواصل متحديا: البليلة والنيفة ديل، لو جاء عميدك سكن معانا هنا ما بنسيبن. مرّة ونحنا متفنين مع البليلة، محجوب لمحك من بعيد وقال لي: الزول البمشي زي السمبرية داك، نعوم أخوي قوم كُب الجاز نمشي البحر. بعد السباحة مشينا إنتظرنا النيافة يفتحوها؛ نشتري لينا واحد باسم. أثناء الإنتظار قلت لمحجوب: إتّا يا فردة، السمبرية بتمشي كيف؟ قال لي ما عارف، لكن أخوي دا، مشيتو فيها حاجة مميزة ما عارفها شنو! قلت ليهو: إذاً نختصر الموضوع ونسميهو سمبر، قعقع وقال لي حقو الزول الليلة يخليك تضرب لسان الباسم براك يا بجعة. ونحن راجعين البيت نام في العربية وبمجرد دخول البيت؛ غطّفي سابع نومة، صحى العصر وبعد الأكل والقهوة التركية ابتسم وقال لي: جلسة الفنانين غيرت مزاجي ويبدو أنو الصدفة دي، زي المحسوبة!! قلت ليهو: آخر عهدي بيك خريج جديد وعينوك بمستشفى مدني وفي نفس السنة ديك، أنا ومحجوب سافرنا للدراسة وناس بيتنا رحلوا من مدني، اعتقد محجوب سافر يوغسلافيا، يا أخي، الزول الجميل دا، كان مُعجب بيك إعجاب شديد. رجع ضهرو لورا وقال لي: محجوب دا، أجمل أخو ممكن تختارو وهو يتبع قلبو دائما، في واحدة من منعطفات حياتي جربت اسلوبو وكان سبب سعادتي. وواصل: بعد سنة في المستشفى أخدوني بالجامعة، في مرّة راجع البيت بعربيتي الموريس، جنب كبري حاجة عشة، العربية سخنت وطلعت دخاخين، وقفتها وأقرب باب دقيتو وطلبت من البت الفتحت الباب مويه للعربية، جابت المويه وأنا متحرك أفتح الكبوت، مسكتني من كتفي بحركة سريعة شرطت معاها طرف التوب بباب الزنكي وقالت لي إنتظرها تبرد. في لحظات الانتظار جابت لي شاي بنعناع. بعد دورت العربية قالت لي: الراديتر داير تسليك ونطقت الراديتر بإنجليزية سليمة، نزلت من العربية وقلت ليها: بتزوجيني؟ ردّت: محتاجة أعرفك أول قلت: عشان تعرفيني، محتاجة عُمر بحالو الخميس البعدو، بت المنى ما باعت سلطة الروب، وناس العشير اليوم داك ما طبخوا، وأبو عركي غنى لينا: عن حبيبتي بقول لكم وبدل الحمامات الحزينة قامت أدتا برتكانة غيرها لي قامت أدتا من حنانا ورفض يشيل قروش وحتى عرقي العازفين جابوهو أصحاب محجوب هدية. بعد ستة شهور من العرس توفى عمك محمد حمد أو المناضل كما يحلو لمحجوب منداته، إتّا طبعا عارف انو الحاجة إنتقلت بالتيتانس وهي بتضع محجوب. بعد أربعين يوم تانية جاتني بعثة دراسية بإستلفونيا (يوغسلافيا)، سافرنا أنا وسهام وخلينا خالتي سكينة الربتنا مع اهل سهام. الأقدار المقصودة وقعتني مع محجوب في مدينة واحدة. سنة 89 الجامعة وقفت البعثة، ومحجوب إتزوج صديقته وصديقتنا الجميلة إيليزابيتّا الإستلفونية وهو على أعتاب التخريج. سنة 90 إنهار الجدار وأصبحنا مُستكين، قربت أنهار وأدمنت الفودكا، نسيت أقول ليك: جابو لي محجوب الصغير سنة سبعة وتمانين ،وإيليزابيتّا الصغيرة يوم تمانية وعشرين رمضان سنة 90. يتبع.. باقي بس حكاية سهام التي أصبحت تتحدث بالإضافة للعربية والنوباوية، عدّة لغات بطلاقة زي بتاعة اللديتر! بعد سنين من زواجنا وفي إحدى عُطل عيد الميلاد بمدينة لوبلانا، أثناء ما سهام بتغزل ليها في بربتوز من الصوف لمحجوب - كانت قد تعلمت طريقة غزل الإستلفونيات ولغتهم من كلية المجتمع- سألتها وهي منهمكة، وبعد شفطة فودكا كبيرة جنب المدفاة: إتّي يا سهام، أهلك قبيلتم في السودان شنو؟ - طبعا إتّا بتعرف أهل أمي ناس دندنة الميكانيكية وأصلهم من جبال النوبة، لكن أبوي مقطوع من شدرة، تزوج أمي وعمرو ستة وستين بعد صداقة طويلة لخالي عثمان بمحالج مارنجان، وتقريبا من حكاويهو وحكاوي أهلنا بالتبني ناس الشقلة عوج الدرب، أستطيع أصور ليك حكايتو: حبوتي أم أبوي أنصارية أم درمانية غرابية، تم إغتصابها بعد كرري من الجنود الجعليين أو الشايقية؟؟ المهم، المرة الربت أبوي لقت حبوبتي مرميّة جنب كماين الشقلة الجنب المسيد ديك، وساقتها بيتها وولدت أبوي عندها وبعد أقل من شهرين ماتت. واصلت سهام: طبعا القصة الحكيتها ليك دي؛ استنتاج مني الغريبة بالرغم من انو الدم الغرابي ماليني من من جهة حبوبتي الأنصارية وأمي النوباوية، لكن ملامحي جات تشبه الجلابة (بالقديم) وكأنو بتول النوياوية ما أُمي!! صرخت فيها بإعجاب شديد بعد أن إبتلت عروقي بالفودكا وثبت أجر الونسة: طيب ما نحن أخوان في الإنسانية. قالت لي: كيف يعني؟ تحركت للمطبخ جبتا زيادة جبنة، زيتون، خيار وجزر، وجيت شفطّ لي بقة كبيرة وقلت ليها: مرّة يا ستي، وبعد دراستنا للمكونات الحيوية للجسم، كنا أنا وأبوي راقدين في برندة الزنكي بتاعة الديوان، وأتذكر اليوم داك المطرة كانت صابة والكهربا قاطعة وأبوي بجغم ليهو في عرقي، قلت ليهو: إتّا يابا، لي شنو ملامح جدي الله يرحمو بتختلف من ملامحك وملامح أولاد عمومتك وأولاد خيلانك الكنت زمان بتودينا ليهم في الكردة غرب شندي؟ قال لي: الليلة يا ولدي، زي ما بقولوا أولاد الزمن دا، الكلام دخل الحوش!! جدك دا، ولدوهو بعد كتلة محمود ود أحمد، والظاهر أنو حبوبتك غلبا تقع البحر، وفقعا ضحكة عكست فيها أسنانو البرق القبلي. قالت لي: فعلا أخوان في الإنسانية وحقو لو جبنا لينا ولد تاني نسميهو سلام... يتبع.. باقي جزء بسيط بتاع هجرتم لكندا، بمجهود خارق من محجوب وإيليزابيتّا، وكيف سهام قرت لغات في جامعة واحدة مع بتّها، وكيف ماتت في حادث حركة لمان نزلت من العربية تجيب قهوة من إستاربكس وهم كلهم كانوا راجعين من حفل تخريجها وإيليزابيتّا الإبنة أزيد ليكم القصة وأودي ليك الدكتور المطار عشان نلاقي محجوبس (جمع محجوب) وإيليزابيتّاس الح يلاقوهو عشان ماشين السودان في رحلة وفاء لأهل سهام، وكيف تاني جلسنا بإستاربكس قبل وداعم للسودان. بالرغم من جو الحزن؛ فرحت بمحجوب الكبير فرح شديد، وتلصصت جمال ايليزابيتّاس الرائعتين، واستغربت من تصالحم مع استاربكس! |
سلام يا أديب،
حكي جميل جدّاً وسلس، ويا ريتك لو أخدت الموضوع بجدّيّة. إستمتعت فعلاً بالقص المبهر وفن الرواية عندك. ممكن تورّيني الحاجتين التانيات الفي دبي بتكرم بيهم ضيوفك، شنو غير قهوة الفنّانين؟ |
اقتباس:
تانيا: الحاجتين هنّ تلات حاجات: الجزر للإبل، السينما والبيتش |
شكراً يحي
شكراً الجيلي إستفزاز تمخض إبداعاً والرد بالسد شكراً يا أديب |
اقتباس:
|
اقتباس:
كان كدي أنا طالبك تلاتة، لأني غير الجزر للإبل ما شفت حاجة. ضيافتك لي كانت ناقصة يا أديب، والله يستر على الباذخ. |
تحياتي دكتور
قمة الابداع ،،،،، كتابة فريدة من رجل فريد ... تابعت الموضوع ايضاً في سودانيز اون لاين حيث وجد رضاء كل من مر عليه http://sudaneseonline.com/board/480/...429371381.html مودتي |
اقتباس:
هسع أنا سؤال يحيى ما مزعلني، فيحيى حيّا الله مقرر مجلس، لكن الجيلي دا رئيس مجلس إدارة سابق وكذلك معتصم! |
سرد ممتع و آسر
و مُتخم بتفاصيل لو فرتقتا ضفايرا بتعمل رواية زي الترتيب أديب أديب ما في كلام يا بكور |
اقتباس:
|
اقتباس:
إتخيلتو يجي يكب ليك درابو الكبار داك ما عارف بنية النص و تكنيك السرد و النص فيهو تناص |
اقتباس:
منو القال ؟ بس اتعودنا نحنا عليها !!! في استاربكس لابس فل سوت وهناااك لابس عراقي وسروال بس في الحالتين الياكا بابكرنا |
كان يمشي وحيدا مع صديقة
في تلك الليلة التي اشرقت شمسها |
اقتباس:
امانة ماتلومت معاي يا أديب يامستنير غايتو حسب حسابات عكود الفوق دي ابقى انا طالبك كلهن بي صمة خشمن اعمل حساب انو ممكن اعمل تأشيرة واجي مخصوص عشان الرباعية دي وبالذات قهوة الفنانين دي عشان ماتاكلنا حنك ساي اقول قولي هذا واستغفرالله لي...................... |
اقتباس:
نوّر بيتنا |
اقتباس:
|
اقتباس:
المهم المرّة الجاية لو قدرت تفك الحبل شوية، ما بنقصر معاك |
اقتباس:
فيما معناه أن الجوع يجعل لأي طعام مذاق لذيذ... فالكسرة بموية زرقاء بفضل الجوع تصبح أفضل وجبة في العالم.... الآن يمكننا أن نحور مثل الانجليز ونقول (Honeymoon is the best sauce)... بمعنى ان هذه الشهر العسل بامكانه يجعل ورجغة بكور (نصّ) عديل كدة !!! |
اقتباس:
اسي بعد مايجي حايحلف بي دينو وايمانو انو ماكان قاعد يفتح النت! انت طبعا ولانك ثقيل حاتقول ليهو طيب قريت قصة استاربوكس دي وييييين؟ :biggrin: وبعد داك حايشبكك زاوية شوفك وزاوية بتاعك لغاية مايطرطش القضية الاساسية :biggrin: |
اقتباس:
وح يعمل زي الكأنه ما قراهو، مع أنو بكون الكلام دا حارقوووو شديد لأنو ما حيقدر يجادلنا في النقطة دي خصوصا انو هو عارف إننا نحن عارفين انو هو عارف كلامنا صاح في قصة بيضنة شهر العسل. لذلك ح يعمل ميت ويقطعها في حنانو وبالتالي ح يحقطها لينا، على أمل أنو يفش مغصتو دي في مواقف اخرى كحال كل المتزوجين اذ يظهرون خلاف ما يبطنون... على حد قول عمنا العظيم غاندي حين وصفهم فقال: وسبحان الله دا حال الرشيد كان من زماااان كدة عشان كدة أنا كنت ملاحظ أنه لا يشبهننا نحن زمرة الأحرار الطلقاء عشان كدة خلينا نقلب السحر على الساحر ولمن يجي الرشيد راجع من شهر ملله نقوم نعمل ميتين، وتكون مشاركاتنا في اطار تباريك وتعازي وما نشارك في أي حاجة تانية، عشان ما نديهو فرصة ينتقم وكدة |
اقتباس:
انت برضو يا ابن عمي،، طبعا انا ما داير استرسل و اخش ليك في التفاصيل لكن زول يرجاك في المطار بعد منتصف الليل هاشا باشا و يساهر معاك بالونسة حتى بشائر الفجر و يرتب ليك اللوجستيات و يفتح ليك مداخل التوظيف من أوسع أبوابها و يخطط معك بإخلاص خرائط الطريق، قطع شك زول استثنائي و متفرد الله يزيدوا خير و بركة. هذه الرحلة نفحها هذا الرجل باريحية و نقاء و ذلل صعابها قطع شك و دفع بعزم و قوة كل مساراتها و دروبها و تفاصيل تفاصيلها.. ابقوا طيبين.. |
في انتظار الحلقة الثانية فلا تجعل
انتظارنا يطول يا صاحب الاستنارة و مركز الوعي و الأدب و التثقيف.. ايامك طراوة بنكهة البن.. |
اقتباس:
أديبنا المستنير ، تحياتى ملكة القص واضحة ، النص يصلح أن يقدم هدية للعريس كدرافت ، :smile: يعالج جفاف اللغة ويضفى عليه مسحة من الخيال ،، وفى ذات الوقت يكسر به روتين ومنحنيات شهر العسل الحادة ، يا عمك الحكى الناشف ده ما بنبلع :biggrin: حقيقة استمتعت جداً بالنص ، وفى انتظار يتبع ،، |
أخي أبوبكر عباس
أسعد الله أوقاتك لي صديق عجيب . . يبدو أن غالبية أصدقائي أما عجيبين أو مجانين . . .لا تقلق حبيبنا عكود . . هنالك منطقة وسطى . . صديقي هذا يسخر من كل شئ اي شئ. . وعندما لا يجد من يسخر منه . . يسخر من نفسه . . ربما لهذا تذكرته وأنا أقرأ في بوستك الجميل الممتع . . هذه كتابة جديدة . . فيها كل شئ يستوجب وجوده في العمل الفني . اللغة كانت على قدر الفكرة . . لغة دراجة عفوية متدفقة . . وإطار العمل حمل نفس خصائص اللغة . . الحوار صادق وملئ بالعواطف والاحاسيس الجميلة . . الشكل قام على المحتوى كما كان يقول رسول حمزاتوف في كتابه الممتع القيم . . داغستان بلدي . السخرية التي أطلت برأسها من عنوان البوست والمناوشات مع الجيلي ويحيى وقادتنا حتى نهاياته . . عمل رائع ومدهش استمتعت به وارسلته لصديقي ناجى عربي ابن الدبابة مدني . |
كاتبي المفضل بكور ياخ
مشتاقين يا حبوب آي ياخ وريهم الحكي المو خمج ده ياخ يحي والجيلي وخالد غالي والود المسخوت أسعد ديل بالله تديهم لي بالحته الفيها الحديده ياخ النعمنو كدي ،،، كتر ليهم من يتبع دي ينوبك ثواب ياخ :tongue::tongue::tongue: |
عليك الله يا فيصل سعد، شفت ناس المنتدى حقارين كيف؟! البوست اتعلق ليلتين في البانر وبمجرد ما الاديب اسامة معاوية نزل ليهو قصيدة جديدة، شاتوني ليك من فوق!!
عودة اسامة معاوية تسرنا |
يا النور يا أخي، القصة خلصت ما في يتبع
سهام وهي راجعة من حفل تخرجها وقفتم غشان تاخد قهوة من استاربكس وهي قاطعة الشارع صدمتها عربية ما في كلام ممكن يتقال بعد دا!!! |
اقتباس:
عارفوا و ما بتقدر تتلولو معاو، فما تبهت الناس ساي و خليك واضح يا جميل أو خليك امين في العشرة لآخر مدى أيهما أقرب للشفافية.. ** امبارح العصر اتصل بيك عبد الخالق و بلغناه انك في زيارة سيادية خاصة و بترجع بعد أسبوعين أو أكثر.. |
اقتباس:
|
اقتباس:
:biggrin::biggrin: البنزين كمل يا باذخ ماعندو حل غير يهديها للرشيد ومعاهو تفويض شامل ، سلام يا دكتور ، |
اقتباس:
و الحقيقة النجر و القطع الاخدر هو الكمل و انمحق.. |
بعدين المستنير بعد ما بقى نائب رئيس مجلس إدارة سودانيات
روايته دي الله يعلم يتمها ليكم، و في رواية أخرى سلام الله و الرسول ذاتو احتمال يقلل منه، غايتو ادب و استنارة زائد سيادة و ريادة، الله يدينا خيرهم و كدا.. |
اقتباس:
انا استاهل وضعتك في مكانا ما مكانك رووووووح القدر ما بيبكو عليه ...تم ترم تمترلملم |
انت ما بتعرف صليحك من عدوك..
يا يحي أبعد من الأحلاف الاستراتيجية و ركز على الديالكتيك :gap: |
اقتباس:
|
أين الأديب المستنير و ماذا حل
بالفصل الأخير و خاتمة الرواية؟؟ |
اقتباس:
http://sudanile.com/index.php?option...d=34&Itemid=55 والمشتهي بانر عكود يطير الكاتب الأديب المفكر أبوبكر عباس |
بعد إنهيارجدار برلين تعبنا تعب شديد، وكان لزواج محجوب من إيليزابيتّا دور كبير في عبور الفوضى العمت البلد ووفر لنا أهل زوجته مأوى ومأكل لحدي ما قدرنا نهاجر لكندا بدعم كبير من إيليزابيتّا وأهلها. في كندا عدينا أجمل أيام حياتنا مع أسرة محجوب، وكانت سهام بحق ملاك يرفرف علينا كلنا، سكت برهة وتماسك من البكاء، وواصل بعبرة تسد حلقه: سهام درست لغات في جامعة واحدة مع بتّها، وأصبحت تتحدث بالإضافة للعربية والنوباوية، الإنجليزية، الإستلفونية والفرنسية، مرات كان بجيني أحساس انو الزولة دي بتتعلم اللغات دي ومعاني كلماتها بالإحساس. السنة الفاتت حضرنا كلنا حفل تخريج سهام وإيليزابيتّا الصغيرة ورقصنا على انغام أبو عركي من شريط جابو معاهو محجوب أخوي واستأذن منظمي الحفل على إذاعته لمدة دقائق، لا أتذكر على الإطلاق يا مجدي بهجة شعرت بيها قبل كدا زي الفرحة دي!! ونحن راجعين من الحفل وفي نص الطريق طلبت سهام إيقاف العربية جنب مقهى استاربكس عشان تعزمنا فرابتشينو مشروبها المفضل، بمجرد خروجها من العربية صدمتها سيارة مسرعة... بكي لمدة دقائق وشاركته البكاء وقال لي: كنت عارف انو في حاجة حا تحصل..... بعد يومين وديتو المطار عشان يلاقي محجوبس (جمع محجوب)وإيليزابيتّاس المتفقين معاهو يعملوا ترانزيت بدبي في طريقم للسودان في رحلة وفاء لأهل سهام. إختاروا الجلوس بقهوة استاربكس، بالرغم من جو الحزن؛ فرحت بمحجوب الكبير فرح شديد، وتلصصت جمال ايليزابيتّاس الرائعتين، استغربت تصالحم مع استاربكس! وودعتهم وقلبي معلق بالدباغة. |
شكرا ابوبكر
امتعتنا في انتظار المزيد |
مافي ملحق يا كاتب الوعي.. غايتوا لو
لحقت تميتها لينا في رمضان دا ما كعب.. على الأقل تجيب سيرة الناس و كدا.. |
| الساعة الآن 09:56 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.