شعبيات ود الفاضل
دعوة لبيع الضمير في ميدان أبو جنزير
يا قلبي اتشقلب وأبقى ملاوِع نطط وفنجط في الراكوبة ووسط السهلة وضل الحيطة وأقلب هوبة وأبقى حريف مشهور بالخفة وأوعى تقول: يا ربي التوبة وما تتأخر في شقلبتك يصحى ضميرك ويرجع عقلك تضحك فيك الناس وتشوتك وتبقى متنقز زي الكورة أبقى قُمرتي وغامِر بالإحساس والكلمة وأدي النفس الزايطة وجايطة وحالا ملخبط وفيها مدفن كمين مقلب غربة وكربة وعمر اتبدد حبة أملاً يشرد يرجع يمسح ظلم الوجع الأكبر ويكتل قرف السكة الفائتة وأوعى تجامل وتبقى مقنطر في خط ستة وأفهم للتكتيك العالي وشوت ضفاري وما تقوم جاري بتجري وتجري وتبقى مهستر وتبقى مدستر وفاقد الذاكرة وناسي المرسى ونومك زي كابوس متضاري بين الذاكرة ونبض الفكرة ويا حليل بكرة!! وحاجة عجيبة تعرف الشوف بيدخل خوف وتمرُق منك أحرف عاهة عقيمة وحاسب أوعى تجيلك عاهة عاهة تجهجه غفلة نومك وتنعِش إرث القيم الفيك مِندسة ومن ما قمت تغتي عليها تحاسب نفسك وترعى حقوق الجار الجنبك وتبني فصول العُشرة البينكم وتحفظ رأس مال بنوت الحلة و.... و.... و.... وتحفظ كل القيم الما بتنهز وما بتنعد وفيها محنة وحسن مظنة وشكل الطيبة ومعنى الإلفة بنوت الروضة الكانن يغرفن من ماعون الطيبة الأسمر وما فاهمات للدنيا حقيقة براءة وطيبة وضحكة بتكتل هم الدنيا لبسن لبس الثانوي العالي وقالن يواعدن وما يندسن وأوعى الجكس يكون إتدلع وقام يتعزز وبقى يتأخر وأرفع كفة وأرفع كُلفة وعادي زبادي وموعد وتاني وصارن فتة - ووين يا درفة ودنكل سفة وتف السفة وما تِتأسف للمنحرفة وحالا يمحِن وعمِر كأسك وشعلل رأسك وزيد في مقاسك وعيش في محفة وما زي كنت وكُنا وكُنت وكان الحِس الفينا يقطِر مبدأ وينفح منقة ويسكر مُدة بعرقي الطيبة الفينا امتد متوِج إلفه ووين الليلة الكان بيناتنا ووين الطيبة الكانت فينا ووين العزة الكانت تقدح تضوي مدائن الغُربة الشينة {برغم جمالا وذوق عُمرانا وكترة مالا ونِعمة فالا ورغم الناس الحلوة الفيها ويوت بتجيها} وفيها الزول مشهور بإسمو ووشِو الأغبش صِدق وطيبة وكان زي هالة وكان زي معلم وكان زي معجم وكان اسطورة يوم الليلة البلد اتباعت دق الجرس الما بِتأخر جاتا دقون ما بتعرِف ربك قالوا: نصيغ إسلامكم وقالوا: نعيد العهد الأول وقالوا: نوفر ليكم كل مرادكم وقالوا وقالوا وباعوا كلام للبلد النامت وفِترت من ثوراتا القامت وما بتتسيد وتجي منصورة إتغشوا الشفع وقاموا يكوركو وراهم: دم الشهداء كمِسك الجنة ودم الشهداء بيكون اتبل عنبر وحنة وعنبر وحنة وحنة وجنة وجن وجن وقام إتعسكر ماتوا شبابا وماتوا شيابا وماتوا درفن وماتت بينا الروح الطيبة وظلت عازة الصارت عنزة وبقرة حلوب فياضة مذلة تنادي: هلم ويلا ويلا ويلا تعالوا وما تتِأخر يا فارِسنا وأبقى النار التضوي تدافِع عن أعراضنا وعن إسلامنا وعن تاريخنا وعن البلد الليها بِندي دِمانا نموت في شانا وما نِتأسف وتجري دموعنا وتحفِر مجرى وتردم فجوة حتى العازة الكُنا عليها نتاكِي نقول في شانا نموت من ذلة وما نِهتم صارت كذبة كبيرة مظلة إفك ومذلة تسرق تنهب تزهِق روحك شان الفلة ومافي موانع ومافي محنة كل المُمكِن أو ما مُمكِن يصبح مُمكِن (شان ناس الحِلة يشوفوا عليها العِز والجاه وكم أطيان وصف عربات) وناساً تدخل ناساً تمرق دقون وخمور دجل وكجور بخور وعطور وهلس وملص وقلة أدباً ما بتنقص وأوعى تحاول داخِل رأسك ترسم صورة - دار الحزب ودار اللجنة ولجنة ولجنة وكمين لجنة ما نكون في اللجنة ونختا الصف (يا ربي بنلحق صف اللجنة!!) الصف الصف الفيهو الأبلة وأستاذ الحِلة وكمين شافع وأشعث أغبش فوق أكتافو وفوق وأردافو بتظهر رقعة (ما مِن دروشة بس من فاقة) وأيدو تجر عود طورية وعرقوا مخرط فصد خدو ودفق سرف فوق الأرض الزانية الدون ما تفرز تدي وتمنح لي وش الله وبرضوا كمان ما زولنا الأغبش أشتر خدر وفرهد أرض البلد البكر الباقية (زي ما ظن) ويوم ما بيحصد مات بالحسرة جابت ولداً ما اتعرفبو لونو غريب وشكلو مريب وما معروف جابتو من وين إتقصى الحلة ناساً قالت: يمكن زار حلتنا العسكر والناس في غفلة وبابا متاكى ونوما مظلة وناساً قالت: شفناها تنادي تقول للغاشي تقول للماشي تعال وإصطف في صف الصفق الأخضر وصِبحت زانية وبرضك بين الناس تتبختر وما تهتم (يا ربي بنلحق صف الصفق الأخضر!!) دقون الدولة الما بتميز بين الصالح وبين الطالح تنصب فينا الولد البسرق من الجامع شبشب عمك حاج عبد الله يبيع نِعلاتو عشان يتعشى ويشرب سِنة ويبقى محصل وصف العازة الأول (ناس الحلة يشوفو عليه العز والجاه وكم أطيان وصف عربات) وأضيف من عِندك أي مقاطع يمكن توصف حال الجزمة الرمة وإن كان دُرنا نتاوق لي دِقن الدولة ورأس الصولة وسبب الوجع الفينا مصوقر وما بينقل وقلنا: ندرس وندرُس شيم الضلل بت البلد الزينة ونصب فينا الولد السابق السقط حجر البلد الفيها الغُلب إتاكى وحل بنلقى مناقب ما بتتوصف أصلاً من ما تب وشب وطل ما بشبه شفع دارنا وداركم (يوم ما كان بنقابل شُفع) المن عينيهم تكرف ريحة الطيبة وتلمس هيبة أجدادنا ووِش السمحة حديقة دارنا تب ما فيهو نداوة الشفع شابي مشالِق يخطِف وينهب يجري ويرجع يقلع ويلبع ويضحك من ساديتو على ضعف الشفع من أندادو وغفلة جارو ودقسة أُمو تب ما فيهو نداوة الشفع ووكتين شب وفارق مسرح بلدو (التحمد الله وتشكر فضلو) ومن عينيه الشر يتناقز وقال يتسيد بالزندية وكُتر الحيلة غرق خير البلد الضائع بين إيديهو وأيد العسكر وآل عبد الله وبعض الصفوة وبعض الساسة وأهل مذلة وكشر عن أنيابو وطل وقال بي دجلو كمان: بسم الله و............. .............. .............. يا قلبي اتشقلب وأبقى ملاوع وما تتأخر في شقلبتك ....................................... ...................................... ....................................... 6/2003م |
[align=center]ضل العشم[/align]
[align=left]"صرخاتٌ لا تنقطع لغريبٍ امتطت روحه الأشجانُ"[/align] أظِني الليلة كُنت هِناك سريت بي روحي لي رؤياك وجيت متشابي زي أول أدوِرْ في الغمام مسراك وحِس إحساسي بيك تاور وجاب من جيب الشعر مغناك حنانك وأحلى أيامك سنين كانت في ضُل محياك مقسم حبي ليك في الروح موهط وما أظنوا سلاك عشِق مختوم بضي كلمات عشِق فائض بيزيدني هلاك أريتني أجيك جسد محروق وممحوق خاطري ديمة بلاك أريتني أجيك وأشم أيدك وألثم ثغرك الضحاك وأنوم من تاني في حجرك أنوم وأشبع كأني ملاك أريتني أجيك وأضم جسمك وأشيل في حضني أي هلاك وأمِش في الروح محل ساكن وأتحكر وأنالوا رضاك حنانك وصدرك الدافئ يدفئ قليبي بي مرآك وبرضو كمان بقول يُمة ضُمة أبقى بلاك جدة – 25/6/2005م |
[align=center]شخاتر
إلى محجوب شريف[/align] السكات الخطر على بال الريح وأبت تكنس مزامير النواح المثبتة في حلوق الغيم والبنات البشابن شان يدخل نجيض الضوء يمرق خريف يقيف على طرف البحر يفتح جداول الإندلاق شووووووووووووووووووو وابت المسادير تلتقط صورة الهتاف الصاري وشو ويرج شان المسامات المِدفِقة في العدم كلام متروس مواراة ومستريح في ضل نشيد مخروم بالعنا وبالجهجهة وأنت... من يوم خِلقت يا النسل الشريف محجوب عن خاطر الإنكسار مُخضر طريقك بي كتوف الروح الشايلة تبروقة البلد وأصلاً مُحال يبراك ضُر وأنت الغمام... أنت السحاب... أنت المطر... عمق الوتر، والدندنة... 2/6/2006م |
أبني بلة
سلمت يداك وماخطه يراعك بجيك راجع |
اقتباس:
سلمك الله يا خال أشكر لك عبورك المشرق بالانتظار |
صفاء الروح مع النفس
وفي غربة قد طالت ولواعج شوق ألي ..... ومخاض حرف مموسق وغدا تشرق شمس الحب والحرية وأشعتها تغمر الفلاة وعندها نبدا في الطريق الصحيح صعودا نحو قمة السمو يديكم العافية |
الخال العزيز
لحروفك اندياحها الفاعل في الروح دمت علما لك التحايا والتجلة |
نضم في شان البلاد والعباد
[align=center]نضم في شان البلاد والعباد[/align]
[align=center]نضم فوق البلد والبت[/align] فوق رأس الولد الماسك نضم البلد الداخت ونامت فوق الضيم عشش حب البت القالت ومالت بالشبال وحمرة عين .. فراسة عديل شيل الحق زندية وطار شن البلد الراجا وهاجا وناسية حديث الورق الزين فوق الجبة الفتق إتدور وشايل إبرتو بيرتق جرحو ودمنا نازف فوق الجبة الرقعة غتاهو وكم يتغتا براهو بحزنو الفتق فتح جرح الزمن الغبنو مصوبر فوق الجرتق فوق رأس الولد الدائخ بي نضم الطار وذكري المولى وعشق رسولو إتحكر سبب الطيبة الفينا عميقة وحس الذكر الفتح جوا الناس سور الحب السامي وغالب فوق رأس القالت ومالت بالشبال غلب الزمن الغرد حزنو ومسد ضهر الحيل الفيها غبن غبن القمح الكالح ومافي غبن الريد الحظو مجافي غبن المطر الفدر وخدر غادي غبن الوتر الخلى الكلمة تهاتي وفوق رأس البت الهامت وحامت في الراكوبة وريد الولد الماسك نضم البلد الداخت ونامت فوق الضيم ساكن جوا القلب الهائم وحايم في الأحزان شوك الشوق العربد فينا ورقص حزن الغربة الصمتو معشش بالأحزان وبين الولد الرقص طارو مديح وبت البلد التنضم حزن السكة تميمة شوق متداري ورا الآهات متين نتلم متين نتلم متين نتلم |
نضم في شان البلاد والعباد
[align=center]نضم فوق الغربة والشوق للبلد[/align]
في اليوم تصل مليون خواطر طيبة عن ناساً بقت مسكونة بي حب البلد والليل يساوم في متاهات القصيد ويطول علي يفتح منافذ للوجع يظهر نزيف وكأني ما عرفت الوجع أضحك في وجه الليل وأجود في مداخل كل بيت ممدود على نضم البلد تظهر علامات التعجب والشرود يا ألفة في ذات النظم تمتد تطوف غرف القلب تعزف نشيد مليان عزوف متداري من خاطري الموسد في رمال الغربة والشوق المستف فيهو ناقز في العيون وأنضم في نص الليل عقد القصيد وأنضم في نص الليل برأي زي زول فقد عقلو الرزين يا ريت مساحات البلد لو تحنو لي وأتدفا في بيتنا القديم بي ناس عزاز ناساً لذاذ تضحك كأنو الدنيا ما فيها الوجع قلباً نضيف ما فيهو غش قلباً نضيف ما فيهو لي حقداً مستف بالغبن |
نضم في شان البلاد والعباد
[align=center]نضم تاني للبلد[/align]
يا زول كفاك ... واقف على باب الغلب جوا العيون شوق أنسرب دفق سرب وإتخت في الخاطر السراب وضحكت لما الدمع في حفر الخدود شو إنسكب وإتدفق الشوق في الدروب ليك يا بلد من بكرة جاييك يا بلد من بكرة بحمل همي من غربة وسفر وأضحك أضحك على اليوم البعد فيهو الطريق عن ضلك السمح الوريف وأضحك علي العمر الكمل في الشوق بعيد عن زول ولف وأضحك عليك يا زول غشيم دفقت في الغربة العمر وبقيت تبرطم باللغات والعمر يسرق في خطاك والعمر روح بيك بعيد يا زول كفاك يا زول كفاك أنسى المستفة بالهموم كان برا كان جوا أتوجد رزق العباد رب العباد قسم شرق قسم غرب قسم جنوب قسم شمال ما ناسي زولن بيكدح في الأرض أو ناسي زيف المترفين قسم على الناس في عدل لي حكمة ما بندريها كيف وأضحك معاي يلا أترك الغربة وتعال قالد هموم الناس وامش بين الخضار بين النضار بين البنات .. الأمهات بين الحبايب والأهل يلا أقدل إتأنق تعال |
نضم في شان البلاد والعباد
[align=center]نضم فوق طلقات الغدر[/align]
البلد الفيها تلعلع بندق خائب بلد العزة الفيها بيقدل زولاً يرفض قلة أدب العسكر شن القوة بدون الأدب البيهو موسم بلد العزة شن القوة في صوت الطلقة الطائشة وزولا بيركض لي ضل مخبأ شقت صوت الجبل الطلقة وقدت قلب الولد الراكز وصادت صدر البت السمحة وخرمت عِمت عم فضل الله متاكي علينا يغتي الحلة وجات فوق جدلات جدتنا العازة عليها الحاج فضل الله مميل يفتش في شبال من زمنو وصوتو يقول يا الله مروة شان الشوف في الضلمة مطشش وشان الليد في الشيل تتراعش وشان القول في الفم متقطع وشان أولاد المجدع ود حاج فضل الله وشان البت الزينة بت حاج فضل الله وشان الحلة وحت ناس بله وعم عبد الله وأم جاد الله وعلي قسم الله |
نضم في شان البلاد والعباد
[align=center]نضم فوق البلد والزول الزين الفارق الولد والبلد (وطن وذكرى)
إلى روح أجمل من يتمشى في أرواحنا (مصطفى سيد أحمد)[/align] وطن يسمو على الغايات ... والأحقاد وطن ممتد على الساحات بلا أول ولا أخر ... ولا محدود يضج مداهو بالرايات ودم منساب على الحرية ... والمبدأ وطن قابض على أمرو وطن دائس على جمرو وطن دفيان مفاهيم ود عنيد منساب مع الأفاق طقوس العزة والسؤدد على حسو الوتر طربان على أفقو النهار مزدان في واحة ... في بستان وفي أرضو وبين ناسو وعصافيرو وحدايقو الديمة بتغرد ومزدانة بنتذكر حسيس دافي وتر دافي وكلام مليان بنتذكر مسام منفعلة بالحاصل وحب بي حرقة متواصل دموع وأسى عذاب غربة وأنين وشقى وليل ما ليل يجيهو الليل ويتأسف على الحاصل ويدندن والأسف ماثل على نورا ... وشباب نورا ويبكي ودمعو يسترسل مع الأنغام وأفكارو ولينا حديثو ما واصل !! بنتذكر رحيل إنسان وصوت داعب مسام البال كلام طيب نفس طيب كريم طيب يهش ويبش في وشف الضيف وبين عينيه يتختا ويتغطى ويتدفى وهاك يا الشاي والونسة على نغم الوتر دندن بدون يفرز يغنيلم حليلك يا ثمين القول حليلك يا نشوق الروح حليل أيامك الأفاق حليلو خيالك المرسل نغم دفيان كلام مليان نغم مزدان بصوت إنسان حليلو حديثك الحلو محال ننساك غنيواتك كليماتك مواويلك وعم عبد الرحيم جميع ما ردنا في محلو وبالبيناتنا داخرنو عشان بكرة وبعد بكرة محال ينزاح مع التيار ظلام الليل طيور الليل بنتحدى الزمن والغل محال ننساك يا مشوار بتتواصل خطيواتنا على المبدأ وصلاح الحال وتتواصل نغيمات الفرح والفال محال ننسى الكلام القال وعد منضوم على الآمال وأبشر يا بخيت الحال وراك رجال وقدر القول بنتذكر وكت نقعد وسط لمة خلق مليانة بالهمة ونسكب من براريدنا رحيق أبيض عشان نكتل شموخ الهم ويتدفأ الحديث عن نورا والحاصل وكيف نقدر نزح الغول وأشباحو ومرابينو عن الخرطوم وأم كدادة والقلقالة وأم بدة ويكون القول وراهو أفعال بتتأدى ونعزف بالوتر أشعار نغنيهم .. تغنيهم توريهم .. تصحيهم نزح خدراً طويل عشش بصوت الكلمة عن حاصل وليداتنا .. بنياتنا صوامعنا .. جوامعنا عدد ما عندنا وممكن نغنيهم .. تغنيهم نؤجج نارهم في الغل ندنيهم نحدثهم عن الحرية والمبدأ عن الإنسان وأطوارو وأفكارو وكيف يسمؤ بنتذكر حسيس دافي وتر دافي كلام مليان بنتذكر رحيل إنسان وصوت داعب مسام البال كلام طيب نفس طيب كريم طيب بنتذكر وليدنا الحي ومتوسد خريف القلب وما بننساه ما ساهل بنتذكر 19/7/1997 م |
اقتباس:
بلة محمد الفاضل .......... بحثت عنك يا صديقي في مرافئ النيلين سألت عنك ... وعن الهاسري ............... إحتجبت فجأة ... ووجدتك هاهنا متدفقاً نضمك سمح .... |
عبد العظيم الطاهر
لك الود كله كلي أسف على تأخر الرد عليك بيننا الهاتف يا صاحبي 2831955 2831956 شكراً لعبورك محبتي وانتظاري |
شُرخ
[align=center]شُرخ[/align]
الغُبن الرتب نَابك عَرش سقف أحلامك زيف غِرق البخِت آ وليد واتيبس ريق القيف الصي آ جني كرعينك تقدل تحت السيف قدامك غي ووراك الهاوية الخوف النَفس القايم وشُرخ اتمدد جوّا الجوف عبأ خُطاك تحريف تمشيهو غصب ودون ما تقيف دون ما تقيف 27/11/2006م |
[align=center]ريق مصموم[/align]
يا برِد... الهوى هَباش... والشوق ماسِك ضُلك تبيت في بيت الحِن... والنوى ناداك يا درِب... إتدرب فيك عفريت الضو الضو مصموم في ريق البِت والهوى نباش... كنكِش في ضُلك وأتدفق... ريق × ريق والكون محزوق ما تنسى تقبل قدم أُمك يمكن ترتاح يوم من جِنك والهوى نتاش... 4/12/2006م |
بلة
ارجو ان تسامحنى لاننى لم اعبر من هنا قبلا واسمح لى ان ابقى هنا ودائما يارائع مودتى |
اقتباس:
عبورك مطراً وعافية لك ورد الدار كله ولي أشواكه كُن بحب |
معقولة بس...
[align=center]معقولة بس...[/align]
معقولة بس... جيتي ومَداك كامِشلو ضَو، والوردِ فَتّق بي رواك، مِن عُمقِ روحِك... نَرجِسو معقولة بس... فِيكي الكَلام صَنقر وَقف، واتجهجهت فيهو الحُروف، بي عِشقو فَاق، فاض بِالأزاهِر... والصَدف و معقولة بس... في ضُل خَيالك بَهجتي، وبين ريق حَديثِك مُهجتي، وأنا مِعترِف.. إنو أَخري وأولي، قَائم على عِشقِك... وسَطوة لوعتي و معقولة بس... عِشقِك خَطير بالشكلِ دا، وما قادِر أوصِف ليك أنا، جواي مَداهو قَدُر شِنو، وساكِت بهضرِِب بيك هِنا، وجايب كَلام مُختل عقيم، فاتِح سَطُر سَطرين طَشاش، والباقي تَب مِتحمِلو... أنا والجُنون، والشوق، ورعشات الضَنى و معقولة بس... يا نور عُيونِك والغَمام... رَحمة وحَنان، ومَزار نَغم معقولة بس... مني الزمن، يسرِق خُطاي... ونمِش بعيد، لي حُرقة تَملأ الجَوف أسى ومعقولة بس... ما تقولي لي قُبال كِدا... سَاقتني ليك أقدار كِدا والريدة فيني قدُر كِدا سَاقياها بسماتِك قِبيل والشوق معاك وبيعذِبا دا قَدر شِنو الماسِكني دا خَلاني بيك أبكي وأنوح والريد يقطِع في الحشا معقولة بس... روحي المعاك سَقت المدى: أطياف خيال، قَطرات ندى... يا الروعة ليك مَشتل حُروف مَسقية بي نَفس الهوى وراعياها أضلُع مُرهفِين تدنو ويهِد حيلا النوى ومعقولة بس... 20/12/2006م |
[align=center]قامة غرام[/align]
لو كل حين جيتيني بي نفس الغرام شقيتي أمواج الأسى وحطمتي جدران الظلام جيتي أتكيتي وفي مدار عشقك رعيتي الورد والشوق والغمام يا عبيري وانتصاري على الزمان الكالح المتروس معاناة واحتدام إنتي نرجس للربيع فواحة يا رونق حياتي ويا زمام الابتسام إنتي في جواي حمامة بتروي أيامي بسلام يا غمامة ويا سلامة وصدق فوق الصدق قام في كلامك/من عيونك جاني الهوى وشالني الندى وصاد قليبي عظيم هيام لما جيتي علي ماشة داخلة بي خفة مشاعرك واحتويتي الكون بنظرة بي غمامك بي كلامك بي جميل صدق ابتسامك يا هنايا ويا هنايا لما جاوبني المرام إنتِ فوق وبعيد سماكِ إنتِ كوكب في عُلاكِ وإنتِ مطلب غالي غالي وإنتِ رعشات المسام يا غمامة ويا سلامة وصدق فوق الصدق قام ما بيكمل فيك كلامي يا مداري ويا نهاري إلا يسرقني المنام أو تفارق روحي دنيا ويقبض أنفاس البريدك رب الأنام 11/9/2006م |
ود الفاضل
و الله لكن ما تقول لى البوست بتاعك رهيب مبالغه ما حصل عجيب و غريب و فظيع و كل الكلام السمح الى انا ما بعرف اقولو .. و الله يا بله بكيتينى ما عارفه ياخ انتو ياخوانا بتجيبو الكلام السمح دا من وين يديك العافيه الا بالجد اليله الله يجيب لى نوم ساى بعد كلامك دا بسمله |
:
اقتباس:
انتى بارى لى وحيد وودالفاضل ديل والاتنين بيجيبو خبرك وقلتها ليك قبل كدة بيرقدوك التجانى الماحى دا ان ما كتلوك دحين امرقى من هنا :D مودتى |
طارق يا شلاقه ازيك و كل سنه و انت طيب و ما شليق
اسكت ساى يا طارق انا اصلو سودانيات دى جابت لى خبرى كان بقت على التجانى لاماحى هينه .. لكن عليك الله ود الفاضل دا ما فصمه ؟ ياخ دا انا من امس ما نومتا كويس بالجد يعنى ابكى و اتخنق امى سالتنى يا بت مالك هسه فى زول بيبكى يوم العيد ؟ قلت ليها صدام واجعنى اعمل شنو ؟ ما بقدر اقول ليها انى مشوكشه و متنيله بى نيله و ابلاه ما عارفه عاوزاها تجى على وزن وامعتصماه المهم افض علينا ياخ اصلها خربانه |
اقتباس:
اقتباس:
اقتباس:
سلام وامتنان على توقفكما برنين الروح هذا في اتساقها ولغة النطق محبتي وامتناني لكما |
من النصوص التي لا أعرف أين ذهبت..
وجدته بمنتدى النيلين وقد أنزله صديقي (أساسي/طلال) ضمن نصوص لآخرين احتفاء بالأم... ولا أذكر حتى عنوان هذا النص، ليته تكرم وكتب عنوانه... أظِني الليلة كُنت هِناك سريت بي روحي لي رؤياك وجيت متشابي زي أول أدوِرْ في الغمام مسراك واحِس إحساسي بيك تاور وجاب من جيب الشعر مغناك حنانك وأحلى أيامك سنين كانت في ضُل محياك مقسم حُبي ليك في الروح موهط وما أظِنو سلاك عشِق مختوم بضي كلمات عشِق فائض بيزيدني هلاك أريتني أجيك جسد محروق وممحوق خاطري ديمة بلاك أريتني أجيك وأشم إيدك وألثم ثغرك الضحاك وأنوم من تاني في حِجرِك أنوم وأشبع كأني ملاك أريتني أجيك كل يوم وأضحك وأشيل في حِضني أي هلاك وأمِش في الروح محل ساكن وأجيبني وأنالو تاني رضاك حنانك وصدرك الدافئ يدفي قليبي بي مرآك وبرضو كمان بقول يُمة ضُمة أنا ما ببقى بلاك ـــــــــــــــــ هيه يقتلني الشوق إليكِ أماه |
همهمات الوتر الحاس إتغلغلتي وجوا القلب النازف دمو ووجعوا مدفق وجاطت فيهو خريطة الكون وفي أحضانو الحزن أتخبئ وعتم أفق الوتر الحاس الفيهو تقاطيع مقطع من تعريشة الحب الأولى ومن ترويقة الجسد المسدل لامي عليهو براقع الغربة الما بتغطي وحبة فكرة وزادو لبكرة إنك فيهو كامنة وآمنة وكم متطآمنة وكم منشرة وغابت عنو ملامح الظّلمة وبيك مدفئ وعنو مقفل باب أمبارح وفاتح منك منو وليكي وفيكي وفيهو عليهو آمال بكرة وفاكر إنك يوم حاولتي تمرقي تدخلي شان ما تسقي شدرة الألفة النبتت فينا قمتي براك في ليل مأسوي وفتي عشان تتأملي فيها خارج حد الترف الأوصد قلبي وقلبك في بوتقة الشكل الأوحد وروحي وروحك في معترك الفرد المدمج قلتي تتاوقى لقيتي الدرب إنسد وباقي الحزن الكان مندسي متاكي متاوق وإنتي بداخل القلب الناقز نط وقفل باب الأوبة وجاطت بين عينيك السمحة ملامح الدنيا وأنا منتظرك فارد باب الوعد المدرج في آفاق الحلم الأوسع النائمة وتطمع حلم ومقطع وبين أحزانا مدون مطلع فيهو ملامحك وفيهو مرام القلب المفرغ من أحلامو وراجي هطولك شان يتمطق طعم الإلفة وزادي وزادك قلة حيلة وحبة فكرة إنو نضاير جيتي وجيتك من عين المدفع ولما خلاص الوعد يقرب وتبرز لينا خطوط الآلفة الكم إنشرت من ما عرفنا ولاحت بينا بوادر العرفة ووقفت بينا حواجز الكبت الما منظورة وفيها خطورة وكل الحاصل بعد الواصل ما اتلاقينا ورانا شقاق الوجع الأكبر فارد صدرو وقاصد يفرق بينا وكيف نتلاقى وجوا الوتر الحاس يجيني مَقطَعَ وفيهو نشاز قسمتنا العوراء وما تتضايقي من شذرات الشر السائد بعرف كيف تتباصر جيتك وداخل الفاق أحزانا مدائن الضنك الما معدودة بشبك شبك الشبك الشابك وفيهو مشبك ود عيني ومابي يفارق باقي الجتة وفيني مشربك ناضم حبلو وفاتل جوا مسام القلب مسارو -وأبت الحيلة الأولى تعدي- قلت أجرب درباً تاني تكيت التكية الما مغفورة وفيها ألوان الصورة اتخطت حد الشوف واتدمدمت عشان اتضارى وفي عيني وباقي الشوف الفيها مطشش وزي قربت ولاح المسلك جاني الهاتف: - أوعى تقرب من مرسانا وحاول إنك تبقى مشرق وأبعد دمك ونضمك وبين أحضان السابل عربد وأنسى مزار الورد الفتق ضايرناهو وفتش في أحضان السابل عيشتك وأبقى مودر درب الأوبة- كيف يا أفق الحيلة وباقي عليك بالعشرة وجاي الندم -- الحيرة مدفقة مني وفيني وليكي علي أكون متلبس طرح الأفق الأشتر وساكن نضمي زمان ما كان مني لقيتو مدفق فوق الشارع وهسا عرفت الدرب الأخضر وجاني غشاني الفارد صدرو وحكر نضمو وبيهو مرقت عليكم شايل بسم الكون الساطي هسا تعالوا وفي عيني الجوز السادرة طشاش ختو قياس الكلمة وأوزنو باقي قصيدتي الحية من باب النفس السابق وكلمة في كلمة - ألمح أضاير كلمة اتغطت من تعريشة القص السائد جاتني ملخبطة بي تأويل أركزي كلمة وفكي رباط العبث الفيكي وامسكي حرف النون الساكن وأرجعي تاني علي اتدسي- وكم كمبلت وزي زغردت وزي جاني كمان إحساس متأخر قال شباك الروح اتشربك ومن أسلاك السك اتفكفك وأبراج القدرة الكفت صدت وقلنا بنرضى أنا والإلفة وروح الوعد المدمج بس كيف نتلاقح وكيف الوتر الحاس يكون احساس وبعض مساس للأفق المطلق ونرجع تاني نعيد المطلع وختو شروطكم وأفتحوا دربي البت تسرسب تدخل تمرق تمرق تدخل عليكم الله أفتحوا دربي -وفاقد المنطق ما بتمنطق وكيف الحال لو عاد من تاني وفرتق كل ضفائر الأمل المسدل والله يكون في العون يوم جانا الشين وقالوا انسدت حيطة الأمل الباقية مظلة وباقي العمر إنسل وسلم وأرأفو مرة وأنسوا الزلة وقد تتكرر وقد تتكرر 9/5/2004م |
من الرحيق إلى الحريق عبر المدار قام من النوم العقاب قشقش ملامحو من السراب مارق على طرف الإياب يحلم بزعزعة الخراب يسبح في أوراق الخريف يكرف صريف والزرعة تنبت جوّا قيف تبقالوا نبتة سمسمة مضمض خشيمو من التعب ترمض عيونو من النزيف ترسل وميض لا عندو ساق لا مدّ إيد لا وصفو مسموح للحرف يرسم ملامحو على البياض يتكرفو النبض الحسيس والزهرة تنبت أغنية صاريلو من زمناً وريف حبات ملامح مرسلة ومسترسلة صاريها في خدرو الغريب قام بيها جافل زي قنا ومارق على طرف الرصيف يلقاهو في أول ركن متغطي بي لحنو النشاز مادي الكريعات العجاف والسوسنة المسلوبة أزمنة النضاف تبكي وتحنن شبشبو في لحظة سوا من الرصيف شكلاً خفيف فناهو لي سعر الإله واتحسس الجرح النفر عاد بيهو زي أول ملاك { وأنا من هناك كالح مخمخم لُجتي شابك فوانيس حُجتي وجاييك معمعم منكرب خطواتي تسرق أزمنة وتحفر دريب فاتني الصُّحا ولازم أواجه كربتي وزمن العنا وألحق عقاب شان استبين بين المسافات استكين وأتلقف الومض الحزين غمزاً شفيف وأمسح ذؤابات الورق بي نظرة تقضم للحرف تبلع بلع وأمشيك نضيف شاكيني دبوس القلق يرجعبي خطوات للأمام شان أنكرب وألحق خطواتي المشت بعدت علي ساقت عليك شهقاتي والوجع الكفيف ترمضني في شغفي العفيف تغمز لي من طرفاً خفي كان إنكفيت نتشت من جلدي الوجع لكني في الأخر أنا وكمين وساوس مثخنة وملمومة في الجسد النضيف يا حليلو وقتين القنا وسعر الإله تتلقفو وتنسج حوافو مسار غريب يمشيهو كيف يا ربي تربس عني زاد يمنحني قدرة على المشي درباً مبين أخرو كيف بمشيهو مجبر متقي درقاتي للقنا والنبال خانتني في الزمن الشقي سوت ملامحي من البياض من دون ما تقلب دفتري وتلقاني جواك ضي وريف ظِلاًّ يعشش فيك خريف وافتل ذؤابات الورق بيناتا كم رصفاً يبين دفقات حزن منشر غريب والموت مكفِن للكفوف تتباكى يوم دفنوا النبي القام يبشر بالحروف أعبد إلهك واصطفي وإندسا في بطن النطا بعديهو عندنا كم نبي جنس المساخيت الخراف البطبزو الضي بالجزاف ويبقولنا في الآخر عقاب نبرا في يا ربي تربس عني باب وأعكس مقاطع مدخلي وفهم عبادك يا إله إنو المساخيت الهني جاريني لا إيد لا كراع لي كرههم كره العمى مقتاً مسلس من حجى وحججاً مساخ تنساق عليك بإسم الإله وتقود أضانك زي خروف ترميك في الترف المقتت بالدماء وأكبر مصيبة تقيف تقول: فاتني الصحا وأكبر مصيبة تقيف تقول: فاتني الصحا وأكبر مصيبة تقيف تقول: فاتني الصحا |
مررت من هنا
ودون تركيز -لأسباب عديييييييدة- لكن ذلك لم يمنع أن أحجز لي مكاناً للعودة القريبة -باذن الله- مودتي بلبل |
اقتباس:
عارفو خارم بارم شخارم بس شنو برضك رفع الروح المعدنية سمح يا اخي أها شنو بنتظرك بس حاول جيب ليك معاك عكاز مضبب وأديني عليك الله في نص راسي دا كان أفك الشهر دا وقيلا الشهر داك ظاتو أسمع زمان في سودانيز أون لاين كنت مسمي ما اسميته بـ (شعبيات) هنا ب: وتر غير مصقول... غناء أشتر وظنيتو صاحبنا بتاع الدعم الفني داك لقط أشتر دي من عنواني وعينك ما تشوف إلا أشتر:D يا اخي والله مشتاقين |
اقتباس:
معقولة بس يا ... جميل ؟؟؟ الروعة دي مدفّقة هنا وما جايبين خبر !!! أصلو ما معقولة بس ... |
اقتباس:
جايي داخِل بي سماحة حروفك في الدرب دا بالشمين ساكت كدي ولا بتنلفت... شلِّت بالله عليك ما تخليني أدرق براي بلا سِبة والله طاقاني غبينة في الدرب الماسكو دا تعرف النجاض فيهو المفارقة وأخوك زول طيرة ساهي فوقو أها أفارق ولا تفارق ولا أكورك لي عبد المحسن جنا خالد...:D سلامات يا داعم الأرواح طبت |
اقتباس:
|
| الساعة الآن 11:33 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.