خَلّي الناس تموت ، والهم يفوت
.
السلام عليكم كمعظم السودانيين يشكل الشعر الغنائي عندي ضلعاً مهماً من أضلاع الأغنية ولأن نشأتي كانت في مكان (هامشي) صلتنا بالدنيا فيه كانت لا تتعدى الراديو الذي يلتقط أمدرمان ليلاً على موجة الMW وإذاعة الكويت وصوت العرب نهاراً على SW بمساعدة الهوائي أهم ما كان يجذبنا في الراديو هو الأغاني المشكلة تتمثل في ضرورة التقاط كلمات الأغنية مباشرة من فم المغني ليتسنى لنا ترديدها فيما بعد وفي كثير من الأحيان لا يسعنا الالتقاط الدقيق للكلام بسبب ضعف راديو امدرمان الشديد وتجني باقي المحطات عليه أو ربما لعدم وضوح النطق لدى المغني وربما أيضاً لقلة حصيلتنا –وقتئذ- من المفردات فنضطر في كثير من الأحيان الى تركيب الكلمات حتى يستقيم الوزن الموسيقي للحن عندما استرجع هذه الأغاني فيما بعد ... تصيبني الدهشة (لشتارة) الكلمات التي كنا ندخلها في الأغاني طمأنني الفنان صلاح مصطفى أنني ليس الوحيد في (نجر) الكلمات فقد ذكر في لقاءه تلفزيوني شاهدت إعادته قبل أيام أن كثير من الناس لديهم نفس المشكلة مشكلة السماع الخاطئ أواصل... ......... |
أبدأ بالفنان صلاح مصطفى نفسه
أغنية غالي الحروف لصلاح مصطفى ومصطفى سند فقد كنت أنطق البيت الذي يقول حبيبي .. خَلّي النار تموت .. والهم يفوت ولا أدري كيف طاوعتني نفسي لهذا التغيير المرعب حبيبي ... خَلّي الناس تموت والهم يفوت ويبدو أن الفنان صلاح مصطفى على موعد دائم معي لتحريف أغانيه فهذه أغنيتة الرائعة التي أحمد الله ان " مشاترتي" فيها لم تكن عظيمة اساسق بالدريب الجاي بحداكا اقول يمكن يصادف مرة القاكا "عشان" ما ينشرح قلبي الأصلو حباكا الصحيح أسالمك ..ينشرح قلبي الأصلو حباكا وفي ظني أنه – أي الفنان صلاح مصطفى – هو السبب فقد كان يمد كلمة اسالمك هذه بطريقة تجعل نطقها أقرب الى ما ظننت أواصل .............................. |
عزيزنا الزول
(بوست) ظريف جاء في وقته ل(يميت) من نار (الملاسنات) الكثيرة ويرخي من الشد النفسي الذي يعيشه الكثير من الأحباب...:) أبدأ لك بصلاح مصطفى ذاته: كنت أتغنى معه شالة ال(صقُر) بدلا عن شال الصبر :D أبراهيم عوض: يمكن (شيبوا) والناس مابتريح (مع أحسان التخريج) :( بدلا عن يمكن شئ يفوح سيد خليفة: أبني رشّي ياسماري بدلا عن أبني عشك ياقماري :D ولكن هناك ايضا الأخطاء الكثيرة في أمر أحكام المعاني في القصائد المغناة... أذكر للمرحوم الدكتور عبدالله الطيب لقاء أذاعي بدأ المخرج -خلال فاصل قصير-في بث أغنية (بدينا معاكي قصة ريد طريفة خلاص لأنها من طرف واحد) وأظنها للراحل محمد أحمد عوض...فجأة تعالى صوت البروف قائلا (أوقف هذا السخف) فسأله المقدّم عن سبب غضبه ...فقال له (أين وجه الطرافة في ذلك)؟! ألأن قصة حبهما من طرف واحد؟!:mad: فلم يستطع المقدم المسكين الأجابة :D مودتي |
اقتباس:
الزوول الزين أغنية غالي الحروف كلمات عبد الباسط سبدرات أكتب لي يا ما الدنيا نورا وبهجتا صارت بلاك غيمة شتا |
اقتباس:
بروف عبد الله الطيب رحمه الله لم يعطه السودان حقه الأغنية لترباس، وما ها استايل محمد أحمد عوض |
أنا المرحوم أحمد الجابري ضيع زمني كلو وخاصة عندما يقول "جرعني كاس"
|
اقتباس:
|
قال الزووول:
أو ربما لعدم وضوح النطق لدى المغني يعني كان صلاح مصطفى سوى فيك كده طيب أبو علي كيف "حسن عطيه":D:D بعدين انت كان تخليك في "الصفقي" والبنقز القسمتوه ثلاثة شتامهgoood ملك ومال غنا البنادر شوف ناس القضارف "كيشو" كيف الغنا بيوصلهم هيروغوفلي تقولي منو وتقولي شنو مودة بحجم المحبة لكل أهلنا الشايقية |
الزول الزين سلام
كان شقيقي محمد الحاج مغرم بأغنية صلاح ابن البادية "حسنك أمر" .. وكان يغنيها هكذا (حسنك أمن وأحمل صباي بات الهول الهول) :D طبعا لم يسلم من طولة لسان خالك إلي وقت قريب :o يتخيل لي السبب في طريقة أداء الفنانيين .. حكيت من قبل قصة (أبوشوك) جارنا الشايقي دخلت عليه مرة وسمعته يدندن مع أغنية حسن عطية "يا ماري عند الأصيل" ودار حوار بينا سلام يا عم أبوشوك شايفك مبسوط ؟ أبوشوك: ده حسن عطية يا ولدي ملك العود . أسه يا عم أبوشوك عليك الله فاهمو بيقول شنو ؟ أبوشوك : والله يا ولدي كان جيت للنصيحة بلا جملة "يا ماري عند الأصيل" ماني فاهمو بيقول شنو لكن قالوا ده فنان المثقفين . :D:D هنالك أغاني لا تحوج الإنسان كي يخطيء فيها لانها أساسا مجوبكة ... أغنية اللحو البيقول فيها (لايكة الناس لبااااانة ) وكان شفتو الحنينة أيه يعني كريوكاوطبعا مافي فرد زول عاقل يقول لي ود اللحو يا أخي تحية كريوكا بقت كونتينر وماها الرشيقة شي :D أو أغنية محمد ميرغني من كلمات المرحوم حسن الزبير : "لا بتكالمي لا بتسالمي لا بتودي لا بتجيبي لاكي معانا يالكاتلانا قبال يومنا" الشكية لله :( تمثال الحرية دي ؟؟ بوست ظريف بجيك راجع بمزيد من المحن ... |
الزول..
بوست جميل لا يخلو من الطرافة .. متاابعين معك و مع مداخلات الاخوان التى حكت عن الكثير من حكايات الاغاانى و نطق الكلماات المختلفة.. ناس الشرق بحكم اللهجة المحلية و عدم تمرسهم و معرفتهم الشديدة باللغة العربية كانوا ينطقون الكثير من الكلمات بشكل مخالف جدا و بالتحديد فى اغنيات وردى الذى يحبون اغنيااته.. بعود بالكثير من الامثلة انشاء الله.. تحياات.. |
اقتباس:
الأغنية لمحمد أحمد عوض (فور شور) :rolleyes: أما البروف رحمه الله فهو بالفعل لم يجد التقدير الذي يتناسب ... الجماعة قالوا البروف (مسّخ) علي أبوعبيدة حسن أغنية (ياناس شوفوا لي حلل) goood أبوعبيدة بقا لمن واحد يطلبا منو في أي حفلة يشاكلو :mad: :D |
اقتباس:
المهم أخوك قديم ومعلوماتي دي من الجاهلية :) |
اقتباس:
عادل عسوم حبابك غايتو شالا الصقر دي بالغت فيها لكني وبحكم خبرتي الكبيرة في "جوبقة" الغناء فإنني أتفهم وبمنتهي التعاطف دوافعك فالمهم هو الوزن الموسيقي وشالا الصقر تؤدي اللحن تماماً وربما أحسن في قول :):) وكذلك شيبوا .. والناس مابتريح ولكني أبني رشّي ياسماري دي ما قدرت أظبطها ... حكاية أخرى مشهورة للدكتور عبدالله الطيب حينما "مسّخ علينا أغنية ابوعبيدة حسن القنبلة في ذلك الوقت يا ناس .. شوفولي حلل حينما قال أن الحلل في اللغة هو " ذكر التمساح" شخصياً .... منذ ذلك اليوم لم أدندن بها إطلاقاً حتى ولو في سري :p:p:p مودتي ..... |
اقتباس:
يعني لو ما غالطت يعرفوك محامي كيفن؟ من ألقاب مصطفى سند المشهورة " غالي الحروف" وأنا أصر اصراراً وألح الحاحاً على انو غالي الحروف لمصطفى سند وممكن تسنعين بالخال خلود في الحتة دي آل غيمة شتا آل ...:):):) ... |
[align=center]الزول...
للذكرى....[/align] [align=center] [media]http://sudaniyat.net/wadosman/uploading/gali_al_hroof.wma[/media][/align] |
اقتباس:
انت وعادل نازلين غلاط سااكت نحنا يا دكتور بنسمع قبل الأغنية وبعدها يعني من ما تجي المذيعة أو المذيع تقول نستمع الآن إلى فاصل غنائي إلى أن تعود وتقول استمعنا إلى فاصل غنائي (الله يغفر لينا هججنا وما زلنا نشتكي من آثار ذلك) :) |
اقتباس:
واحد صاحبنا كان من يقعد في الكشتينة يقول للجماعة (التمساح جاكن) والجماعة يقولوا خلاص الزول دة حيغلبنا كلنا...لكن من قولة تيت يقوم واحد يجرو ليك خمسين...:mad: صاحبنا يتنفّض ويقيف ويقول للجماعة نحنا أصلنا ولاد فقرا والكشتينة دي ماها (كارا) هولنا :D تسلم يامولانا :D |
اقتباس:
أنا كنت مهتماً بالأدب واشتغلت مدرس أدب وبلاغة سنتين الحكاية ما غلاط ولكنها خبرة يعني دندن بالغنية وأنا أقول ليك بتشبه منو مرة غالطوني في المنبر هنا في الفنان عبد الله محمد، وكان هناك من لم يسمع به، وفي النهاية طلع كلامي صاح إنت والزوول شوفوا ليكم "حلل"goood |
اقتباس:
سلاااام يا زول و تحياات كتاار و قلنا ندخل ركن النقاش دا بس فليق ما فينا...سمح..؟؟؟ طبعا يعتبر الشاعر مصطفى سند من الاصدقاء المقربين جدا للفنان صلاح مصطفى و لما لا فهم كانوا يكونون مع اخرين شلة البوستة الشهيرة و التى كان تضم الكثيرين من المبدعين فى هذا البلد...و انا دايما كنت اسال ما هى علاقة هذه البوست بكل هذا الابدااع و الكمية المهولة من الشعراء و الفنانين الذين عملوا بالبوستة بداية بمبارك المغربى و مصطفى سند و صلاح مصطفى و محجوب سراج و محمد يوسف موس و طبعا اخرين... اغنية غالى الحروف كتبها مصطفى سند للفنان صلاح مصطفى و هى بالتاكيد ليست اول تعامل بينهما فلقد كانت شارع الصبر اول الاغنيات و جاءت بعدها غالى الحروف و غلطان بعتذر و اخيرا كان عشان خاطرنا خلى عيونك الحلوة...... الشاعر سبدرات لم يكتب للفنان صلاح مصطفى اى اغنية رغما عن اعماله الكثيرة مع مجموعة من الفنانين و الفنانات... و يلا كوم سلااااااااااااااام... |
اقتباس:
يا ود عثمان أول شي احترام وتعظيم سلام تصدق؟ شككتني ولا غرو فأنت تستحق لقب مسئول المكتبة الغنائية ولكن وبما أنني سوداني يختلف معك في الحتة دي، وإنت عملتها ركن نقاش فالغلاط أحسن لي من الهزيمة: يا زول الأغنية كلمات سبدرات :D تحيات ومودة |
اقتباس:
يا زول تحيااات و لا ركن نقاش ولا حااجة..الظاهر زدنا الملح شوية..:D طبعا فى النهااية الغرض هو الوصول للمعلومة الصحيحة لا اكثر و ذلك للفائدة العامة... حتى قريب جدا كنت دايما اقول ان شااعر اغنية ليلة السبت لصلاح بن البادية هو محمد يوسف موسى و بغالط كمان فيها لغاية ما اكتشفت اخيرا اننى لم اكن على صواب فشاعر الاغنية هو الشاعر الفلسطينى مين كدا القاضى.. ايضا اغنية وردى سليم الذوق كنت اخلط فى شااعرها دايما حتى عرفت ان من كتبها هو ابرااهيم الرشيد... اذكر ايضا اننى مرة فتحت بوست باغنية بدرى من عمرك انت لسه شباب فدار جدل طويل حول شااعرها و ملحنها استمر طويلا فكان هناك من يقول ان الاغنية كتبها عبد الرحمن مكاوى و الاخرين يقولون لا..حتى تيقنا و بعد سماع المعلومة من الشاعر اسحق الحلنقى شخصيا حيث قال انه هو من كتب هذه الاغنية... غالى الحروف بدون اى شك شااعرها هو مصطفى سند كما ذكرت من قبل و هى فعلا اغنية من نوع الاغنياات التى تبارح ذاكرة اى منا... و ان كنت ارى ان اجمل ما كتب مصطفى سند لصلاح مصطفى هى اغنية عشان خاطرنا.. تسلم.... |
كيشو سلام
العمدة عكـــود عندو قناعة أني زول غالاط حتى أن محمد ابنه شهد في مرة لصالحي ضد والده أتمني عكــود يشوف غلاطك هنا :D لوووووووووووول يا أخي أنا أتاريني مسكييييييييين :( |
[align=justify]ده بوست جميل يا د. الزوول ولكن قبل ما ننداح في أخطائنا الشائعة المضحكة والمحرجة في ترديد أغانينا خليني أول حاجة أطقطق ليك كيشو وود عثمان :
يا كيشو أهلنا قالوا لو في إتنين قالوا ليك رأسك مافي ...أهبشو أغنية غالي الحروف أول مرة إستمعت إليها كان سنة 1973م وما زلت أستمتع بسماعها لأنها واحدة من أجمل أغنيات صلاح مصطفى وهي من كلمات الشاعر المرحوم مصطفى سند كما ذكر الإخوة. ويا ود عثمان أغنية عشان خاطرنا التي كتب كلاماتها برضو الشاعر مصطفى سند لم يتغنى بها صلاح مصطفى بل محمد ميرغني ..[/align] [align=center]عشان خاطرنا خلى عيونك الحلوات تخاطرنا ولما تمرى أبقى أقيفى و أسألى عن مشاعرنا زمان غنينا لعينيك أغانى تحنن القاسين هديناك معزتنا مشينا وراك سنين وسنين بنينالك قصور بالشوق فرشنا دروبا بالياسمين وقلنا عساك تزورينا ترشى البهجة فى ساحاتنا بعينيك تضويها حلاتك إنت ماشة براك شايلة الدنيا بأزهار أو بالفيها زمان بارينا ضحكاتك لقينا صداها جاى معاك وجايينا وحاتك تانى لما تفوتى أبقى أقيفى سالمى الناس وحيينا كفاية علينا لما نشوف بسيماتك تصابحنا وتماسينا عشان نتملى من عينيك عشان نلقى الصباح مسحور يعاين لصباح خديك جهرتى الدنيا يا غربتنا ياروعتنا ما هماك جهرتينا .[/align] |
اقتباس:
زيارة عزيزة من بركات غلاطنا طيب بدينا معاهو قصة ريد، عادل عسوم قال بغنيها محمد أحمد عوض وأنا قلت ترباس، دي مالكم ما أفتيتو فيها وشايف شبارقة ظهر وماشي عليهو سبدرات هو شاعر الأغنية، خليكم معاي |
اقتباس:
وكونك تسمع الأغنية من سنة1973 لا يعطيك الحق في أن تغير شاعرها وبعدين مصطفى سند في أغنية عشان خاطرنا ما قال خلي عيونك الحلوات تخاصمنا ولكنو قال خلي عيونك الحلوات تخاطرنا راجع حفظ سبدرات هو الجواب الصحيح |
اقتباس:
شبارقة... سلاااااام كلااامك صح مئة المئة.. انا لخبطت فى الاغنية دى...فعلا هى من اغنيات محمد ميرغنى و الحان حسن بابكر و كانت الاغنية الاولى فى احد المهرجانات خلال فترة السبعينات.. شكرا ليك.. |
اقتباس:
[/align] |
اقتباس:
صحيح رجعنالك لسبدرات ودي مافيها جدال، خلينا في المامعترفين بيها دي (غالي الحروف):p |
اقتباس:
|
السلام عليكم
لكن يا عصام كيشو ما لقيتك http://www.sudaneseonline.com/db/att...0_Thumb_Up.gif أهم شىء الثبات على المبدأ .... ايام طفولتنا وسرقة المنقة من الجناين كان عندنا واحد كده اسمو حسين حسين ده كان فيهو شىء لله كده وأضيفت ليهو بعض من "الكيشوية" :D:D كنا لما يقبضونا في الجنينة نقوم جارين كلنا حسين ده كان شوية تقيل في عملية الهروب دي فكان غالباً ما يتقبض الجماعة يقبضوهو وجيوب عراقيهو مليانة منقة وممكن يكون شايل ليهو منقة في ايدو الجماعة: يا ود أحمد سعيد مالك بتسرق المنقة حسين : ده ما أنا فتصيب الجماعة الدهشة : يا زول كيفن ده ما انت وجيوبك مليانة منقة حسين : لا ..ده ما أنا ويستمر حوار الطرشان هذا والذي لا ينكسر حسين أبداً فيه ويصر على انه ليس هو من سرق المنقة حتى يصيب الجماعة الملل .. ويتركوه أو يضربوه سوطين ثم يتركوه أو تصيبهم نوبة من الضحك لأصرار حسين على انه ليس هو فيتركوه بدون عقاب غايتو يا عصام كيشو انا حا أفتش لو كان عندك قرابة مع حسين زولنا ده :):):) |
اقتباس:
.. اسامة الكاشف حبابك ياخوي حسن عطية ده أنا أكتر زول متكيف منو لأنو كلنا كنا - اولاد الريف والبندر- في الهوا سوا زول واحد بيفهم كلامو مافي الا الناس المثقفين يا قول الخال خالد الحاج ..... أرجى الراجيك يى غادي ... :):):) |
السلام عليكم
عودة للبوست ومن ثم لردودكم الجميلة ... ..... أغنية الحقيبة الشهيرة [frame="2 50"]عقلي انشغل بهواك والحكمة عيني لاجة ومجافية النوم يا اربعيني[/frame]****** هذه أنا أعذر نفسي فيها تماماً فهي بالإضافة الى عدم وضوح التسجيل الحقيبي و( أكل) عوض الكريم عبدالله للحروف والكلمات وربما للجمل أحياناً فكلماتها الحقيقية من الصعوبة بمكان كل ما ذكرت أعلاه يعطيني العذر لأدندن بها [frame="1 50"]عقلي انشغل بهواك والحكمة عيني لا الجو مجافي النوم ..يا أربعيني[/frame] ....... وأرجو الا يسالني أحد عن معنى الجو المجافي النوم هذه :):):) ..... |
اقتباس:
تعرف يا الزوول أنا وطارق شبو كنا ساكنين في عمارة بطرس في غرفة واحدة، وكنا نقدم برنامج حقيبة الفن بالتبادل مرة أقوم بدور المذيع وهو يغني ومرة العكس (طبعاً دا سر كبير يا كابتن) |
[align=justify]عارفين يا جماعة ... ظهر فنان في مناطقنا في منتصف ثمانينيات القرن الماضي إسمو معاذ حسن أو معاذ موسى على ما أذكر ...عمل حفلات بالكوم والردوم وأخد شهرة واسعة جدا ً وليهو تسجيلات كاسيت ما ليها حد ... وهي كلها ترديد لأغاني الفنانين الكبار .... المهم الزول ده بشتن الغنا بشتنة عجيبة خالص خالص :mad: وخرّب المعنى نوهائي :D...أغنية واحدة بيغنيها صاح مافي (الحاجات الما فاهما بيقطعا من رأسو :D) .... ولو شفت الجماعة المستمعين آخر إنبساطة وهجيج وعرضة والعكاكيز في السماء :D ... يأخي والله بلدنا دي فيها حاجات عجيبة خلاص :D:D [/align]
|
اقتباس:
الأغاني المجوبقة أصلاً دي موضوع براهو يعني يستاهل بوست منفرد وما أكثرها ناس الحقيبة شابكين بنات الناس "الجاهلة" ومفتكرين بيشكروا فيها يا قول حميد في رائعته ست الدار البوليس صاقع شيوعية وفاكر نفسو بنبذ فينا .... ده كلو هين.. كدى شوف دي ستة وستة جوني من النوم صحوني في القلاي قلوني في الفندك دقوني في الفنجان كبوني هنية للشربوني أنا يا ناس الله لي الليلة.... ممكن زول يقول لي ستة وستة ديل منو؟ أو يعني شنو :confused::confused: |
اقتباس:
كم أنا سعيد بمرور ملك منوعات المنابر السودانية وكم أنا طامع في تزيين البوست ببعض ما بجود به ود عثمان وأظن أن أحداً يملك كل هذه المكتبة الضخمة النادرة من التسجيلات السودانية ، لا بد أنه يملك كثير مما يثري هذا البوست بالقفشات والمواقف الطريفة شكراً للحن " خلي الناس تموت والهم يفوت" وفي انتظار قفشات أخوانا أهل الشرق الحبيب .... |
السلام عليكم
أغنية جبل مرة لعبدالكريم الكابلي وأداء أبو عركي البخيت وأحياناً عبدالكريم الكابلي نفسه فيها الشىء الكثير الذي لم أفهمه ولم اقتنع بتأليفه ...... وزهر ناير نادي وبسام بالحيل زاير في شطر السام جيران وجداول هيمانة وصنوبرة نادية وريانة كذا مردة في صورة بانة طرّتنا ... العزيزة العاجبانا الدرنة تفوح حتى معانا .....وأسباب عدم اقتناعي كثيرة للكلمات التي لا تحمل أي معنى ... حتى وإن كان (مشاتر) شطر السام ده شنو؟ كذا عرفتها .. فما هي مردة "الدرنة" دي يا ربي نبات والا شنو؟ غايتو يمكن يكون بيقصد البطاطس ولكن... هل للبطاطس رائحة تفوح ؟ وكيف تكون الجيران والجداول "هيمانة" ؟ أسئلة كثيرة لم استطع الإجابة عليها وصرت اتجنب الدندنة بها ....... حتى عرفت الكلمات الصحيحة الجميلة والبليغة وزهر ناير ...نادي وبسام بلحيل زاهر ريشة رسام خيران وجداول هيمانة طرتنا العزيزة العاجبانا الدرنا تكون هسة معانا ونشوف في عيونا العاجبانا وتتم الصورة الفنانة ولكني وحتى الآن أيضاً لم أعرف كيف تكون الجداول والخيران ..هيمانة؟ .............................. أهديكم اياها ..... [media]http://sudaniyat.net/up/uploading/gabal_mara.mp3[/media] . |
اقتباس:
جبل مرة التانية يا الزوول بتاعت خليل اسماعيل (كمان قولوا لي خليل إبراهيم:)) واحد قال دي حصة جغرافيا عدييل |
اقتباس:
غايتو يا كيشو لقيتك خطرى...!!! |
السلام عليكم
هنالك عدة كلمات غريبة متداولة في الغناء السوداني يستعملها الشعراء لتؤدي معاني لا تؤديها غيرها كلمة "البين" لم أعثر لها على أصل في العربية إلا في العبارة المتعارف عليها "إصلاح ذات البين" وبالتشديد للياء فالبيّن تعني "الواضح" ولا أظن أن هذا المعنى هو ما اراده شعرائنا وإن كانت مستعملة ومشهورة في لغات أخرى لو أخذنا النطق الشفاهي لها فيبدو أن أصلها هو الكلمة الانجليزية (Pain) بمعنى الألم لأن شعرائنا غالباً ما يستعملونها لوصف الألم وإن كان بعضهم يستعملها بمعنى الفراق ..... نسيم الروض زورني في الماسية وجيب لي الطيب من جنايت آسيا وانعش روحي من ألم البين هوي ..... وأصبحنا رغم البين ...روح واحدة في جسدين ..... لكنى رغم البين رغم الفراق الطال كانت مشاعرى تقول ابدا فراقنا محال ما ليا غيرك شريك ما ليك غيرى ماال جمعت قلوبنا محبه ربطت حياتنا امال يا حبيب كفانا خصامنا كفاناهم وضنا ما بتقدر انت تلومنى وما بعاتبك انا ما كان بيدنا شقا وما كان بيدنا هنا حسد القدر فرقنا هو العلينا جنا ...... أنساني وأنا أنساك والحلوة القضيتا معاك تصير مرة ونتقاسم مرارة البين أنا وياك ...... حبيبي أكتب لي ... وانا أكتب ليك بالحاصل بي ...والحاصل بيك الحاصل بي ...أنا شوق وحنين وأقيم الليل...هات وأنين فارقني حبيب ...فارقني سنين أتحكم بيني... وبين البين ماليك أمان ... ياذا الزمان آه .. ياليالي زمان الله عليك هذه بعض الأمثلة ولكن هنالك الكثير الذي لا يسعنا ذكره هنا ............. |
| الساعة الآن 02:56 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.