سودانيات .. تواصل ومحبة

سودانيات .. تواصل ومحبة (http://www.sudanyat.org/vb/index.php)
-   منتـــــــــدى الحـــــوار (http://www.sudanyat.org/vb/forumdisplay.php?f=2)
-   -   رجل تعِبْ فى احضان إمراءة ثائره (http://www.sudanyat.org/vb/showthread.php?t=24984)

محمد ديكور 31-07-2012 11:18 PM

رجل تعِبْ فى احضان إمراءة ثائره
 
الرَّحَّمَه إمراءة لاتعرف ان لا تتزمر جديره بالملاحظه والدراسه فهى على غير عادة النساء اللاتى يجادلن فى الاسعار ،تجادل ود القاضى زوجها دائما دوما ابدا فى ما لايفقه فهو رجل مكدود مجتهد فى عمله،الضحوه غالبا ماتتحول عنده الى يوميه نسبة لضياع بعض الوقت فى الفطور والشاى وهو بذلك امين ،الرحمه تنازع ود القاضى فى الخروج مع الخارجين لاسقاط نظام الحكم الامبريالى المتكلس وود القاضى لايقوى حتى على النقاش ،فتقول دوما والعباره تتكرر رجال التابا ولشدة ماسمع تلك الكلمه اصبح يقولها قبل كل كلام حتى مع الاطفال الصغار تفاديا لتجريح الرحمه عندما يدخل بيته قادما من الخارج،امسكى يا الرحمه نص الكيلو دا سوى لينا ام رقيقه نحن ياخى رجال التابا ،وبالرغم من الاعتراف الصريح من ود القاضى بانه من الرجال التابا او رجال التابا الا ان لسان الرحمه لايستطيع التوقف عن التذمر وقد تعود ود القاضى على ذلك حتى انه ظن ان الرحمه دى ممكن تكون جهاز امن عديل او رباطى دايره تدردقو عشان يجيب ليهو كلمه كدا ولا كدا وتتخلص منو والرحمة تومة الروح حبيبة القلب عشرة السنين لكن اكان سكتتت بس مره ،وذات مره بلا سابق رجال التابا او الكلمات الدلاليه التى تدل على مدى قنع الرحمه بت خريف من ود القاضى ،سالت الهمدان الرمدان ماذا تعرف عن البمبان والايرانى كمان؟؟ ورد فى سخريه الفتران يالرحمه بت خريف انا مابعرف فى الدنيا دى غير حاجتين الباندقه اللت الزباله اكان اشتغلتها بتجيب كم ملوة عيش ووقة سكر وكتحة شاى ؟؟والحاجة الاخرى حاجة فى نفسى ومن ساعتها اصبحت الرحمه تخشى الحوار او مجادلة ود القاضى وهى بخبرتها فى الاتحاد النسائى لحلة كنَّه بت احمر عين الذى اصبحت رئيسته وسكرتيره المالى فى آن معا،علمت ان ود القاضى يستطيع ان يفقه ولكنه لايريد.
يتواصل
محمد بشير حاج

طارق صديق كانديك 31-07-2012 11:42 PM

سعيد بعودتك يا ديكور طوّلت الغياب ياخي

وفي انتظار تكملة النص

تحياتي

اشرف السر 31-07-2012 11:56 PM

مرحباً بعودتك يا محمد ديكور..

النص يعد بالكثير...
وفي رجاك يا زول...

محمد ديكور 01-08-2012 01:51 AM

اقتباس:

المشاركة الأصلية كتبت بواسطة طارق صديق كانديك (المشاركة 472094)
سعيد بعودتك يا ديكور طوّلت الغياب ياخي

وفي انتظار تكملة النص

تحياتي

كانديك الجميل
انا سعيد جدا بطلتك وموعود منى بمواصلة ما انقطع من سرد
تحياتى التصحى امامى اشواقا تهز النبض

محمد ديكور 01-08-2012 01:55 AM

اقتباس:

المشاركة الأصلية كتبت بواسطة اشرف السر (المشاركة 472101)
مرحباً بعودتك يا محمد ديكور..

النص يعد بالكثير...
وفي رجاك يا زول...

اشرف السر
عليك السلام
والمودةُ غير منقوصه ولا هينُ
مايشجع فعلا على الكتابه ,قُراء نصاح متلك مفيدون
تسلم ياصديقى

محمد ديكور 02-08-2012 08:15 PM

ترى يا الرحمه بت خريف الكلام موزون لاتقلبنى
 
فى حِلة كنَّه بت احمر عين،العين لاتغفل عن ما يدور فى حوش ود القاضى او حوش الرَّحمهبت خريف كما يحلو لبعض الشمتانين فى حال ود القاضى وهو بذلك سعيد كون زوجته زعيمه عليه وعلى اعدائه فهى قادره على الوقوف فى الجزر والحديث عن غلاء المعيشه وضيق ذات اليد وتلقى رجال التابه شمالا ويمينا كلما نظرت فى عين رجل فهى بذلك تتمكن من عيون الرجال ولكن طبع الرحمه لم يكن سيئا لذلك الحد مع ود القاضى فهى رفيقته منذ ان تزوجا قبل ثلاث واربعون سنه لم تقصر فى واجب الرجل ولاضيفه كانت كما تصفها النساء مره بت قبائل قضاية حوائج سدادة فرقات بس اكان سكتت وود القاضى بذلك عليم ولكنه عرف كيف يستقيم حاله معها ،وهو كما يقول الراجل كان طلق مرتو فى الحله دى وداير يرجعا بيمشى لى الرحَّمه بت خريف اها انا اكان طلقتها امش لى منو ها ناس هوى عومو حدا البر وماتمشو تحت القيف ،وفى كلامه من الحكمة مافيه فقد بلغ ذلك العمر متزوجا ولايريد ان يفسد كدر حياته الرتيب باقوال الساسه والمتعجرفين،وذات هوس خمسينيىٍ قرر ود القاضى الخروج مع الخارجين بعد ان اقنعته حججه وحاجاته بالمروق للسهله والهتاف ضد النظام والكجر غير انه لم ير فى حياته فى حِلة كنه بت احمر عين ولا عسكرى ولم ير رجل قانون واحد وبالرغم من ذلك آثر الخروج ولكن اين ومتى سال الرحمه .يابت خريف اها انا نويت المروق طب ناسكن ديل بمرقو وين وبيقولو شنو ؟؟؟
بمرقو فى الرادى دا -لصيقا بها صديقها، الوحيده التى تشترى حجار البطاريه من دكان ود الزين الذى كان يجلبها خصيصا بوصية ناس اللوارى والمسافرين وحصريا للرحمه بت خريف-كانت لشدة متابعتها للاخبار ونشرة تلاته لايراها احد تدخل فى خلوة المجذوب الغرقان ،فى الرادى يالرحَّمه فى الرادى؟؟؟؟

محمد ديكور 15-08-2012 04:31 PM

وعلى العموم يابت خريف المرقه مى قاسيه
 
فى الرادى يا الرحَّمه سمعتى الخبر فى الرادى ولاشفتى لارائيتى؟؟؟عاد دا حديث آآآلرحمه؟؟وتوجه نحو الزير الوسطانى شاربا قرعه كبيره من الماء وهى تنده الزير الوسطانى دا انا تميتى قبيل من البئر بيكون حار ولكن لم يعيرها انتباها فقد كانت دواخله تغلى من الغضب،فى الرادى وكان شافت الناس مرقت الشارع بى عينها كان سوَّت فينا شنو؟؟والله يا الرحمه عندك محن،لكن الرحمه دى زرعت فى قلب ود القاضى روح صدام غريبه حتى انه وجد جاره يضرب حماره بعكاز فكاد ان يفعل به مافعل موسى حين استنصره الذى هو من شيعته،لولا تدخل بعض الماره والرجل مشدوه فى تصرف ود القاضى المسالم بطبعه،فى نهاية الطريق عينه الذى حدث فيه الشجار يوجد المجمع لم يقربه من قبل ولكنه ذهب وجد صبيانه الذين يعملون معه وود الخليفه سيد الجَزُرْ وود عنقره والمهيبيل وناس من فرقان تانيه ميز منهم اصوات اقربائه،حين دخل وقف الجميع حيرة تدلت لها عبَّاراتهم حتى سالت تحت ارجل ود القاضى وبعد برهه انتبه الجميع الى أن بصوت واحد تعال بى جاى ياود القاضى الجميع يريد الانفراد باول سابقه لى ود القاضيه فى المجمع جلس ود القاضى فى اول بنبر وكان فى الجلسه واحد من صبيته الذين يعملون فى جمع الزباله من الزرائب لم يعرفه ود القاضى او لم يعيره اهتماماً، كان باله مشغولا بحديثها، إلهى ياذاك يا الرَّحَّمه ويقدد كلاك يا الرَّحَّمه ،كان البال ضيق خلاس فى حدود حسابات الزباله والباندقه و هَم العمال وعيالهم وهسع بقى حال ود القاضى كحال الكونى الذى يخشى على السحاب من تغول اشعة الشمس ،كل مشكله فى الفريق انا سيدها يا الرحمه وكل زول بايت جعان يا التومه(تومة الروح) انا بفكر فيه قدر قدرتى وبسَّبِّبْ كل شى، اكان زمان كل شى بيحصل بالمشيئه ،لكن هسع كل شى وراهو زول يا الرحمه إلهى يازاك ويقدد كلاك،وفى غمرة التفكير ناولوهو عبار مقوطَّرمعباء،تناوله دون ان يلتفت وكتح غنى وكان صوته عزبا حزينا قاتلا لم يكتشف هذه الشخصيه الجديده ولكنه عرفها حينها ،غنى البلوم وغنى الريم والجِّدَىْ،غنى ألرَّحمه،غنى عُمْرُهُ،انتبه مع صوت العيال يصرخون الحق ياود القاضى بيتك حرق وجرى وكل المجمع ناحية قلعة ود القاضى ليجد الرحَّمه فى الحفره فصد الجميع ،وكانو يتحدثون عن الرحمه والحفره ،اول مره منذ ثلاث واربعون عاماً ايا الرحمه شن جديد،خرجت الرحمه تتبعها خيوط الدخان فاحتضنها حتى تخثر الحليب.
يتواصل

محمد ديكور 25-08-2012 11:40 PM

اصبح صباح ود القاضى وصباح كل الحله فى بابو اصبحت كيف يازول،وكانما كان مريضا ولكن قفزت الى راسه فكره لماذا يسالون فجاءه يرى امام المسجد وشيخ الخلوه فى المقدمه انت ماك عارف السكر حرام ياود القاضى الوداك تدشر السم الهارى دا شنو ونحن من يوم عرفناك عرفناك زولنا وخلفهم تتعالى اصوات الندامى الجدد هو المابيخلى يسكر شنو اى زول لو فى بكانو كان شرب شراب يسقى فدادينكم دى ست عليها والرحمه ناااااااايمه .

ناصر يوسف 26-08-2012 08:11 AM

عاين لي هنا ده يا محمد ديكور إنت ،،،
حتجي تواصل ولا نقيف ما نقرأ لغاية ما تنتهي من الحكي ده ؟؟؟
ياخي لكن ما بتبااااااااالِغ ياخ ،، ما باقي لي إلأا إني أمشي علي مجمع حِلة كنَّه بت احمر عين ده وأكتح لي عباراً كاااارب من مريستهم ياخ ،،،، ;) ;) ما تشحتفو لينا روح قرايتنا ياخ ،،، سَمِح ؟؟؟

لكن الحِتَة دي عجبتني للطيش ياخ ،،،



اقتباس:

انتبه مع صوت العيال يصرخون الحق ياود القاضى بيتك حرق وجرى وكل المجمع ناحية قلعة ود القاضى ليجد الرحَّمه فى الحفره فصد الجميع ،وكانو يتحدثون عن الرحمه والحفره ،اول مره منذ ثلاث واربعون عاماً ايا الرحمه شن جديد،خرجت الرحمه تتبعها خيوط الدخان فاحتضنها حتى تخثر الحليب.
ياخي الحريقة التقوم للصبيان ديل فوق ناقيرهم ظاتو ياخ ;)

محمد ديكور 27-08-2012 06:40 PM

ناصر يوسف عليك السلام
مالك علينا ياخى جلاليبنا خيتناها قبال العيد بى يومين هسع راسنا بقى مابيدخل تب فى الجلابيه من ناحية مُكُن وكدا،كل عام وانت بخير وربنا يحقق كل الممكن وبعض المستحيل من الامانى الطيبات،سعيد بمرورك وانشاء الله الخيط يتواصل ماينقطع مع زحمة الحياة اليوماتى.
تسلم يا الحبيب تسلم

ناصر يوسف 28-08-2012 07:31 AM

اقتباس:

المشاركة الأصلية كتبت بواسطة محمد ديكور (المشاركة 476462)
ناصر يوسف عليك السلام
مالك علينا ياخى جلاليبنا خيتناها قبال العيد بى يومين هسع راسنا بقى مابيدخل تب فى الجلابيه من ناحية مُكُن وكدا،كل عام وانت بخير وربنا يحقق كل الممكن وبعض المستحيل من الامانى الطيبات،سعيد بمرورك وانشاء الله الخيط يتواصل ماينقطع مع زحمة الحياة اليوماتى.
تسلم يا الحبيب تسلم

هو عليك الله راسك الكبير ده في جلابية بتقدر عليه ؟؟؟
حكمتو بااااااالغة لكن

أها يا الحبيب والنعمنو كدي مشغوليات الحياة دي ما تبقي ليك سِبَه وسبب وأسباب في البعد عن الحكي
واصل يا زول وكُب كل حروفك هنا ده
في إنتظار المزيد يا زول

محمد ديكور 28-08-2012 02:28 PM

سلام واحترام
 
ناصر يوسف ياصديقى الكتابه كما الحمى تاتى وتذهب غالب الاحيان تهذى ومرات بسيطه تستطيع ان تتناول ليك قلم وورقه لكن انشاء الله يتواصل السرد اصلها الرَّحمه دى مره متقدره خلاس .

محمد ديكور 09-09-2012 05:56 PM

دستور يا الرحمه دستور
 
صحت الرحمه على صوت ود القاضى ياوليه ماتنسترى البلد كلها تعاين فوقك ،وقامت على لسانها كلمة رجال التابا ولكنها تزكرت الامس القريب فلم تستطع ان تنطقها ،والرحمه تجَّلِق كايسه الهدَّاى, الرايح ومى خابراهو يالرحمه دستور دستور يا الرحمه دقى الزار قالت احدى النساء بعد ان رات حالتها ،وفى نفس الوقت تهامست النساء حتى وصل الخبر لآخر منزل فى الحى لتتجمهر النساء عندها وادوات الظار كلها والحمامه البيضاء والشافع الصغير اغبششششش معطون فى دقيق لزوم يشوف ويكشف والرحمه بى فستان احمر لايستر شيئا يراد ستره ،والنساء يتزاحمن دستور يا الرحمه وانفتحت بت احمد ودحسين بالدلوكه وغنت وغنت والرحمه مبكمه مانزلت وشيخ الزار الكودى عريف السكه, محتار فاشار على البنت ان تغنى
لولية جات من الحبشة ... لولية تشرب الأنِشة.
وكان ان نزلت الرحمه وحيرت حتى الزوار من الجن رقصت كما لم ترقص من قبل اصلو دستورا حبشى.وود القاضى يتاوق البيت بيتو وعارف محل يتاوق ها الرحمه لا حكت ولابقت ها زوله والله الليله مرقتى المدَّفن.
يتواصل

معتصم الطاهر 09-09-2012 06:14 PM

غايتو يا ديكور دخلت ليك دربا ضيّق



الله يمرقك منهن ..

محمد ديكور 10-09-2012 08:45 AM

غايتو يا ديكور دخلت ليك دربا ضيّق



الله يمرقك منهن ..
معتصم الطاهر سلامات
الدرب درب خترى مش كدى ربنا يسهل علينا والله


الساعة الآن 09:28 AM.

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.