رتـــــــــــــــــــــــــــــاج
 

والليل بهيم
ما بين رعودا في السما وبرقا
بيلمع في ابتهاج
دقيت على بابك سحر
وفتحت صنديد الرتاج
ما قلت لي ادخل تعال
شديتي قلبي عليك
وكان اصلا معاك
عاصراه بي رقة وحنين
نبضاته ترزم في اهتياج
ودخلنا في عالم بهاك
سقتيني يا جمل حلم جوة الحلم
لا سور بحدنا لا سياج
واتمدد الحلم البراح
وهمستي لي
انا ليك براك
انسانة من روعة فصول الاندياح
وهمست ليك انا ليك زول
في ريدتي ليك دايما اعاني الاحتياج
وسرحنا زي جوز القطا
لمن تهل عليه بدايات المطر
والسكة ما تصبح خطر
ويبقى الامان مفتاح رتاج
شفتك
والليل اواخر
عشتك
والفجر بي روعة بهاك
مخزونو ذاخر
والكلمة تمرق سلسبيل
والشوق مقيم ليك ومعاي وفتحت نفاج
للغنا
والكلمة واللحن الجوى
ايدك معاي جوة الانامل
ورعشة الريد تبدا من طرف الانامل
لي شغاف قلبا
عشق
قبل النظر
قبل المسافة تصير صفر
لما المشاعر بينا صارت ارتهان جوة العصب
كتبت ليك
صغت الحروف الشايلة من بهر النجوم
ليك شال وتاج
ردتك ؟ّ
نعم
شلتك نغم مليان تباريح واشتياق
دوزنتو من حسا سكر منك طرب
انداح وماج
وبس