سودانيات .. تواصل ومحبة

سودانيات .. تواصل ومحبة (http://www.sudanyat.org/vb/index.php)
-   منتـــــــــدى الحـــــوار (http://www.sudanyat.org/vb/forumdisplay.php?f=2)
-   -   يا أخي الكُبر دآ حاجة ثقيلة بشكل (http://www.sudanyat.org/vb/showthread.php?t=58743)

عبدالحكيم 21-08-2016 09:17 AM

اقتباس:

المشاركة الأصلية كتبت بواسطة بابكر مخير (المشاركة 534192)
الذاكرة
_____

قولت تضعف مع الكُبر، ما شيتن جديد وذي ما قلنا من قبل، كله على كله بيضعف.
بس الغريبة في حاجات مخزنة داخل الدماغ ما بتنهبش حتى من أعتى جيوش الزهايمر..
ودي ظنيتني أنه الأمر غريزة وطبيعة مثلا؛ الأكل إدخاله وإخراجه، النوم والنوم.
وبرضه شيتن تاني، الذاكرة بتشغل بعض مرات حسب مزاجها يعني لا إرادي...
إتا تقول تتذكر، تلقى نفسك حتى إسمك إن درت تفرض تذكرهو ما تضبط وبعض مرات تلقى نفسك تتذكر حاجات من زمن الطفولة؛ جزء عم وكتاب الإنجليزي الأخضر المسطر وشنطة الدمورية وحزام الوالد عليه الرحمة (أشد آدوات التعذيب تبريحا)...
تتذكر التمُر من جيب "جدي العم" وما تتذكر أول مرة أكلت فيها آيس كريم..
تتذكر أول مرة مشيت فيها .... وما تتذكر الجيكس الإسلوفاكي النضر...
لكن برضه في حاجات جميلة تعلق في الذآكرة وتبقى ليك مقياس لمؤشرات ومعايير ...
في قهوة إسمها آروما في دبي، التقينا فيها مع الخالد "خلود" والشقيقات (آها الذآكرة وقفت هنانا) ما حصل مشيت دبي وإلا زرت القهوة دي والحكمة مكانها غميسس شوية بالنسبة لزول ذي بيمشي دبي في السنة حسنة... لكني مع تبديل العربات (ما هو حمار سيد اللبن بيعرف بيبان الزباين) طوآآآآآآآآآآآلي ألقى روحي قدامها ودي ما قصة ذآكرة بفتكر دي لأسباب نقشت في الدماغ وحتى (الزمهرير) يصعب عليه غزوها...
ناس لو شنهو وشنهو دآك الذآكرة ما بتتخلى عنهم وهو مالكين النفس ومطلعين الروح.... يعني ممكن يوم الواحد توحة وهو جزء أساسي من الحياة ولا بدور التركي ولا الزين (الراجل الحلو) وهشومي...
ينساهم،،، ما أظن
غايتهو ربنا يرحم أرواحنا ويعفو عنا يوم ذآكرتنا تخرب...

تعرف يا صاح إنت جبت الكلام الصاح ..:)
أتفق معك في كل الذي أوردته هنا ... بلا استثناء ..
أهـ الواحد قال أحسن يجي يسلي نفسه معاك هنا بدل ما هو ....
ولو تذكر في أول مداخلة لي هنا ...
قول الله تعالى ...
‏اللَّهُ الَّذِي خَلَقَكُمْ مِنْ ضَعْفٍ ثُمَّ جَعَلَ مِنْ بَعْدِ ضَعْفٍ قُوَّةً ثُمَّ جَعَلَ مِنْ بَعْدِ قُوَّةٍ ضَعْفًا وَشَيْبَةً يَخْلُقُ مَا يَشَاءُ وَهُوَ الْعَلِيمُ الْقَدِيرُ ) ‏ الروم ‏:‏ 54

ترى كيف ختمها بالضعف .. والشيبة ..
أحكي يا صـــــــــــــــاح ...

imported_أمير الأمين 21-08-2016 12:13 PM

اقتباس:

المشاركة الأصلية كتبت بواسطة بابكر مخير (المشاركة 534192)
الذاكرة
_____


تتذكر أول مرة مشيت فيها .... وما تتذكر الجيكس الإسلوفاكي النضر...

اقتباس:

المشاركة الأصلية كتبت بواسطة عبدالحكيم (المشاركة 534201)
أحكي يا صـــــــــــــــاح ...

احكى يا عم :cool:

بابكر مخير 22-08-2016 08:01 AM

اقتباس:

المشاركة الأصلية كتبت بواسطة عبدالحكيم (المشاركة 534201)
ترى كيف ختمها بالضعف .. والشيبة ..
أحكي يا صـــــــــــــــاح ...

الحكمة
____________

شوف التسلسل
عند قول المولى عز وجل...
ضعف الطفولة وقوة الشباب وضعف عرف بالشيب ولا ينتهي التسلسل هنا...
القوة جسم وقدرة ومقدرة، القوة العقل وموازنة الأمور، القوة المسامحة والتريس، القوة في الكلمة، القوة الحنكة والخبرة...
شفتا يابا
الشيب إن ضعف جسدهم وذاكرتهم و"إمكانياتهم" لكن مكانتهم بين الأقوياء محفوظة بحكمتهم وخبرتهم وهلماجرآ..
شفتا يابا كان مشيته ذي الأسد ومصافحة ذي ضربت الكهرباء،، حسي ياهو فكره الباقي وحكمته الثاقبة وهلماجرآ وكفاية على كدآ وما تجرجورنا في عشان نقول إسمه (أصله الهوآ بيقسمه)
ياهو ظاتهو سيد صادق :cool::cool:

بابكر مخير 22-08-2016 08:15 AM

اقتباس:

المشاركة الأصلية كتبت بواسطة أمير الأمين (المشاركة 534213)
احكى يا عم :cool:

الأمانة
____________


الأمين يابا
مع الكُبر الأمانة شيتن غسب ما هو ما في شئ بعجبك، قولك صدق وبي أمانة، إن حرسوك "ملاك" هو في آمان (فيك شنهو يعني عشان تعرضه لي ضرر) شفتا الواحد يا هو ذي الموية؛ لا بغلت عليك لا "بيوسخ" يديك ظاتهم;)
الأمين يابا إتا والله طيب وعسل
حسي ياتهو العجبك ..... (النقط دي) ولا الجيكس...
موضوع النقط ما ظنيتها لأنها دي مجال "كوكي" وحصري هو البينقشها...
في السودان الناس تعرف الأحياء بسكانها، الحي البريطاني، فريق العمايا (عندنا في العباسية أمدرمان) فريق فنقر وبرضه في أحياء حسب طبع ودين سكانها مثل المسالمة، أبو صليب وكدآ..
برضه غير الأحياء والفرقان كمان البيوت بتذكر في الهاشماب كان في بيت مسكون والله باقي ليا ود خالي بلالي شوقي بدري بيكون بتذكره لأنه قريب منهم ومن الأحفاد للبنات معروف البيت بأنه بيت الشياطين، وبيت العسلية وبيت آحرار...
بين السطور أسرار والأسرار هي ياها نقطة الحوار
وبي أمااااااااااااااااااااااااااااااانة كدآ:o
الدار دار والما دار
ما يتحاوم بي هنانا


لا دي لااااااااااازمن أقولها:
الأحباش للمرحاض بيقولو ليهو تشتنا بيت
بيت "البول" والحلاق شنهو كدآ "بيت"
تعرف يابا ومعليش
مستو بي الأسلوفاكي معناها مكان أو نقول برضه بيت وراحة معروفة وين الزول بيرتاح
يعني برضه مكان الراحة العندنا دآك قرييييييييييييييب من تسميت الحبش،، لكن إحنا جبنا الأسلوفاكي من ويييييييييييييييييين
يكون الأصل تركي
بي أمانة "ماني عارف" :cool::cool::cool::cool:

بابكر مخير 23-08-2016 06:23 AM

[QUOTE=بابكر مخير;534192]
الذاكرة

"ملحق" _____

الذآكرة تنمحي منها حاجات محزنة ودي حسنة بس كمان أوقات مفرحة وناس حلوة وأماكن كل النعيم أسقطت على الأرض...
لكن المابينمحي أو حتى يصيبه شرخ أرهف من سبيبة شعر طفل مولود حساتهو...
مثلاً.....
بسمة الوالدة عليها الرحمة وأشعاعة وجهها الجميل، صفاء قلبها وحبها للجميع (بدون فرز)، ضحكتها التي كانت تجلجل كصوت جرس الكنيس وبطعم صوت الآذان، لونها، شعرها، قامتهان خلقها، كرمها وكلها!!!
قطعاً لن تنمحي
وإلا كانت قد إنمحت القيم... لست من الذآكرة، بل من الكون كله...
الوالد الذي أورثني الكثير من شبهه في الشكل وحرمني من العزير علمه لن تنمحي ذآكرته من قلبي وعقلي..
شقيقي قاسم الذي بمغادرته لنا أحدث جرحا عميق في قلبي، لن يشفى ولن يزول أو ينمحي..
شارع الأربعين وبيت أبراهيم قاسم حيث أشرقت علي أول شمس وتطور الشارع من تراب لي زلط ولي مسارين واحد إتجاه السوق وحي الشيخ دفع الله حيث "الحوش" بيت الكبير لجدي بابكر وجاره عمنا ميلاد وقصاده بيت الهنود وشوية شمال بيت كمال وأبنئه متوكل وكمال أبو غازي صلاح كمال "الأمه ليبية" والمسار التاني ماش جنوب وخور أبعنجة الكان مخاضة لمن بقى كبري، غربه الضو حجوج وشرقه بيوت ناس معني وأولاد فريد وعمنا الجآك أبو العميد علي الجآك ومرورا بسينما بانت...
ما بينمحي بيت أبراهيم قاسم الرحلنا ليهو وهو في العرضه وعلى بعد من سينما العرضة وليها معاي حكاوي
بجيها راجع looool

بابكر مخير 25-08-2016 07:12 AM

2 مرفق
البحبتة
(الفضول نتاج قلة الشغلة)
___________

ما هو ما في شيتن بيبقى تعمله لي قدام، آها تقوم "تفتش الماضي" اله ولى وفات من زماااااااااان..
تقوم الصباح أقرب حاجة ليك (الكومودينو) جنب السرير وتفتح الدرج..... تلقى حاجة كان في ما مضى تستعملها منها الباقي الفيه فايدة ومنها (الواقي) :eek: لا والله .... قصدي البتتختا فوق العيون عشان الضو ما يحيمك النوم، ما زمان كان الواحد علي الهبشة، آي خشخشة أو حركة يتنفض وبعدها ما ينوم، حسي ذي البالع خلطة باربيتون مع فاليم، ما يصحيك ولا يقومك إلا مدفع بآزوكآ ودا بيودي التوج،،، إنخفاض في الدم لزوم الهجيمة...
الغريبة حكاية إنخفاض الدم وإرتفاعه موضوع تناغمي،، ينخفض من الأطراف الفوق ويهرب لي تحت مع أنه (موسم الهجرة شمال) مش الشمال فيهو أوربا والناس بتهاجر لي هناك...
ما علينا نخليها أوضة النوم البتجيب هوآ و"كوكي" يزعل...
تمشي الصالة والسايدبورد قدامك يقيف بإغراء وترغيب ما فيهو ستة أدراج والواحد يكفي يوم بحبتآ..
تلقى ظروف منها البسر النظر فيهو مرة تانية ومرات لأنها (الرسايل) وفيها فواتير تغم وتذكرك مرارات الدنيا...
تلقى فيها قلامة الأظافر الكنتا بتفتش ليها شهور وكمان بالله دي ما الساعة الكنت قايلها راحت وإنفقدت مبكي على جمالها أهميتها...
وبحبتا !!!!!
لقيت الصورة دي:
http://sudanyat.net/vb/attachment.ph...1&d=1472105470

imported_Hassan Farah 25-08-2016 07:29 AM

وجدتها......وجدتها....وجدتها.....
اسعى ليك كلب...اى والله....قمت بدرى وطلعت البلكون اشوف ليك راجل عجوز سايق ليهو كلب رابطو من رقبتو وقايدو فى الغابة القدام بيتنا حايم بيهو يمكن نصف ساعة اتذكرتك يا ود عمتى وقلت اخوى دا لو سعى الكلب ومرق كل صباح يتفسح معاهو مش اخير ليهو من يقوم من الصباح يبحت فى الكمدينو

بابكر مخير 25-08-2016 09:29 AM

اقتباس:

المشاركة الأصلية كتبت بواسطة Hassan Farah (المشاركة 534267)
اشوف ليك راجل عجوز..........
اخوى دا لو سعى الكلب

يابا

الخواجات ديل حقهم برآآآآآآآآآآآهو:eek:
الكُبر الكُبر
قصدي :o
اقتباس:

المشاركة الأصلية كتبت بواسطة Hassan Farah (المشاركة 534267)

اخوى دا لو سعى الكلب


يابا باقي ليا
عيشتك مع الخواجات دي خربتك تب..
حسي لو كنت في الرباطاب، كان قلتا أسعى ليك (مرتن) تونسك وإن قلتا كمان تدلكك، تدللك...
الكلب بعمل شنهو من دآ...
إلا النبيحة والهوهو....
خال يوسف مرة سألني سؤال (إيحايئ) وكان من ورا قصده أني إتزوجت، قلتا ليهو إن قصدك أني عرست تاني فالجواب لآ..
قال ليا: بيقولوا، راجل المرتين ذي العنزة بين كلبين، هو هو هو هو...
الباقي ليا الكلب والعرس
أخير منهم البحبتة:cool:

بابكر مخير 28-08-2016 06:29 AM

الموت
__________

أولا تبادي دي الحاجة الوحيدة الما في زول جربها... تجرب الشئ معناها أنك تمر بي تجربة جربتها وفي وعيك تتذكرالحظات المرة عليك في التجربة المعنية يبقآ ما في زول جرب الموت (إلا بعض من خترفات وأساطير)...
باليل ترقد على قفاك بعد يوم مرهق (التقول الواحد شغال طحان) تقول تنوم، تبدى الوساويس؛
حسي إن غمضتا وما قمتا
حسي إن لساني إنزلق وإتخنقتا بيهو
حسي وحسي وحسي
وفي لحظة ما تشعر وإلا إتا إزنقتا بولة وقلتا تقوم،، آها الأوضة مضلمة مع أنه بنوم والإضاءة فاتحة (الحاجة الوحيدة الفاتحة البقينا نستفيد منها:eek:، ما حظنا مقفل)...
آها يا زول دي ضلمة تحت وإلا بس ترجآ الثنائي بدكير ومنكير(ديل محققين شغالني معانا والبيمر عليهم آكيييييييييييييد لللظة ودآ سجن مكيفاته مركبة بالعكس، البارد لي برآ و"الحآر" جوآ)
المهم جنس شلهته وشهقة وخوفة بي عرقها، تغمض عيونك تقول عشان "ما تقدر تصرح" وتعضي لسانك عشان "ما يقدر يقول" وتلملم وراكينك عشان ما يمشي يفضحك.... وتتذكر حينها النملة المسكينة الدهستها بي شبطك وتقول أريتني ما كنت لابسة لأنه من دونه كان بخاف أنها تعضيني وتجنبت تلك الفعلة الشنيعة ما برضها روح، لآ كمان تتذكر البيف باف والكم الهائل من الصراصير التي هلكت به يعني هو "نوبل" برآهو اليعمل جائزة للتكفير عن شنيع فعله، ما برضه (مستر بيف باف) حقهوا يكون عنده جائزة..
يا زول وأسمع ليك من بعيد صوت كديس:(:(:(
دي ديكي وأنا في شقاوة طفولتي شتآ لي كديس لمن جرت تتلولو تكون جات تشتكيني،،،
ما هو قالوا يوم الحساب العظيم، بالله الحساب في المدرسة كان منجضنا، كمان حسي تااااااااااااااااااااني ورانا وانا بس دآك هين خمسة بالكتير عشر جلدات...
بس برضه أشوف شعاع ضوء ودآ أداني أمل، أنه الأنا ماري بيهو دآ
ما دآك الما منه رجعة
وفعلا لقيت يدي بتتحرك تهبش <غماز> اللمبة الفوق رأسي وبرضه ما ضوت....
على قول المصريين: هزت وسطي وقدرتا أقوم ونور الأوضة إستجاب لندائي وكان المنقذ الذي سمح لي بيوم آخر أو أيام...
لكن الزعلتني بالجد!!!
اللمبة الفوق رأسي،
ما عرفت تنحرق إلا "في الليلة ديك"

بابكر مخير 30-08-2016 06:52 AM

الكذب

_____________

إن كنت كذوبا كن ذكورً
وحبل الكضب؟! قصير
الكُبر والكِذب ما بيمشوا مع بعض، ما هو إن كضبت ، تقوم تنسا الكضبة والحبيل ينقطع. هو زول ضاربه الزهايمر!
إسمه لمن يذكره كتر خيرهو...
عمنا مطر عليه الرحمة (قنصل البرازيل الفخري في السودان "زماااااااااااان") كان رجل ليه حضور وديمة قيافة، مرة إلتقاه شقيقي أحمد "كوريا" بعد ما عمنا خلااااااص كِبر ومن الفضول سأل عمنا عن شئ ينسب ليهو وقال ليهو: تتذكر.... رد عمنا وقال: يا إبني أنا كوني لسة أتذكر إسمي، مش برضه كتر خيري...
قلنا كضب الكُبر بيقولوا شين....
مشيت قلتا أطقس خبيرات السودان وزرتا الرآكوبة...
لقيت...
"الكاتب الصحفي ذائع الصيت فتحي الضو:
الحلقة الثانية
"
قمتا من التواريخ لاحظت أنه زولي دآ
يكون كِبر وتنطبق عليه...
لكن يبدُ أنه لساته ناكر وما فاكر..
المهم معارض من أيام نميري وصحفي متجول ومراسل حربي ورئيس تجمع صحفيين وشئ آرتيريا والصومال وكندآ والكويت.
بس القاهرة مالهو ما إتذكرها مع أنه شهدت فترة مليئة بالآحداث والصخب وناس حلوة وناس فنانة وناس من الصعب تتنسي..
يا ربي الزهايمر عند ناس غسب وعند تانين عفوية وينطبق عليها
إرادية وغير إرادية...
بتذكر في شبابي
بالله عليك الكضبة برآآآآآآآآآها تدفر، حسي لمن زول يكضب ولو من باب الونسة بعطس... حساسية مفرطة
خالي محمد كان ديمة يكجن الزول البيكضب وساررني بأنه كان بيكضب لكن لمن كِبر شعر بأنه الزول البيكذب، أولن تبادي يفتكر أنه فهلوي والناس الحولاينه ساذجين لكن الحقيقة أنه بيرخس نفسه فهو بالضبط خاصة لمن الحبل ينقطع تبقى عليه قصة الجنين من ظلام بطن أمه لي ضو الكون وهنا كل مغطى يبان...
كذبة بيضاء وكذبة ما بيضة، ذي حكاية الزواج، قفص ذهبي برضه قفص ودي برضها كذبة.....
فرح ود تكتوك قال:
إن الصدق ما نجاك، الكِضب ما بنجييك:(

بابكر مخير 31-08-2016 06:16 AM

الحِلم

_____________

قالوا أنه أنواع
مقصود، موعود، مفقود، ممنوع، حلم المفجوع وغير مسبوق وحلم اليقظة
الأول تكون عشمان ليك في حاجة وتقوم تنوم وتحلم بيها، الموعود بيه دآ من دون تكون مستني ليك شئ تحلم بيهو وباكر يحصل، المفقود: حاجات تكون حصلت يعني الفاس وقع في الراس وفات عليك تقوم تحلم بيها ذي الفيلم عايز ترجعه من أول لكن هيهآآآآآآآآآآآآت والحلم (الأزرق) الممنوع نربطه بقصة الأفلام اللونها "أزرق"؛ تحلم وتفرح وتستمتع وتصحى الصباح غير نادم والحسنة أنك سالم لا جلد ولا رجم لكن دش الموية لو في الشتاء بالله عليك تقول متل دآ!؟ أخير ليا ما أنوم حسي إن قلنا يجينا الحلم دآ، إلا بس نستعين بصديق وبرضه أزرق:eek:.
حلم المفجوع انك تنوم نكدآن ومطرب وخايف وبرضهو فلم يكون حاقص بيك نوع فرانكشتين ودراكولا ويلا ليلك كله خليع والأخير دآ حق ناس مخصوصة الحلم الرؤية تشوف شيتن يبقآ وتقصد أمر يتحقق
والحلم اليقظة دآ نقول عليهو "بين اليقظة والأحلام" حلم كله أمل وتفاؤل ورغبة في التطوير يعني شغل إستراتيجيات.
آهاااااااا الأخيرناس إحنا ديل ما لينا فيهو ولا أنا عشمانين ليهو وما دآ بس كتيرات...
أيام زمان عندي زول كدآ بيجيني في النوم (قطع شك ما في الحلم الأزرق) ديمة يصحيني ويقول ليا شئ، مرة وأنا في لندن جاني وأداني ستة أرقام قال ليا دي اللوتري، صحيت وعارف زولي دآ صادق وعشان ما أنساها كتبتها في غلاف ورق الريزلا RIZLA بتاعت سجاير اللف بتاعي، آها كنت يومها شغال في المندولا لندن بتاعت يوسف أخوي وزنقة، جىء أحمد زكريا الهاشمي ود أختي فريدة بدري، أديته الأرقام وكانت عالقة في ذاكرتي (أيامها كنا لسة بنتذكر:()...
جاني آخر اليل وأداني ورقة اليانصيب بس لقيت فيها أرقام متغيرة، قال ليا في الحقيقة يا خال روحت الورقة ديك لكن من المتذكره لعبت ليك اليانصيب..
والله الأرقام كانت الستة الأدأني ليها زولي هي الكاسبة وكانت 4 مليون وبتاعت أحمد زكريا جابت أربعة عبارة عن متين وشية جنيه...
زولي دآ جاني يوم والراحل المقيم في قلبي قاسم أخويا في المستشفى وقال ليا: أمشي شوف أخوك. كانت ذي الساعة 4 ونص صباح، قمتا على عجل ومشيت المستشفى وين قاسم راقد. أول ما وصلت الممرضة قالت ليا كويس أنك جيت لأنه قاسم مغادرنا.. قضيت معاهو خمس دقايق ورحل وقدر ما نزلت من دموع إلا أن السماء خجلتني فقد أنهمرت كما لم يسبق له مثيل...
رحم الله قاسم ووالدي وكل من غادرنا من أهل وأحباء وأصدقاء، أقارب ومعارف ممن هموا من جنسنا ووطننا...

عكــود 31-08-2016 06:41 PM

رحم الله قاسم يا بابكر، وكل أحبابنا السبقونا.

بوست غاية في الروعة ومليان حكمة.. بدون مجاملة.

واصل أرجوك.

بابكر مخير 04-09-2016 05:43 AM

اقتباس:

المشاركة الأصلية كتبت بواسطة عكــود (المشاركة 534380)
رحم الله قاسم يا بابكر، وكل أحبابنا السبقونا.
بوست غاية في الروعة ومليان حكمة.. بدون مجاملة.
واصل أرجوك.

في ناس أوعك تصدقها :confused:
ذي البشير كلماته كلها مزيفة :eek::eek:
وفي ناس تأخد كلامها ديمة جادة
شوقي بدري لمن يقول ليك حاجة عنك،،،
"كوكي" لمن يبدي مشاعره...
مؤكدة....
بدون مجاملة
ما أصلي عارفك ما بتجامل
لأنها "هي" :)
الشايلة روحها منك

بابكر مخير 04-09-2016 06:15 AM

شنهو الشايلينو منها؟؟؟

___________

زمان تقول؟
يمكن أترفد ولا يمكن يزعلوا مني، إمكن يلبدو ليا يدقوني ولا يمكن ترفض تتزوجني، إمكن العوز قدام يرخصني ولا إمكن القرشين المعايا ديل ما ألم فيهن وأخير أدسهن...
قالوا أهلنا المصريين:
الكفن! ما ليهوش قيووب..
آها مانا شايلين منها شيتن تب...
مع الكُبر تشوف الناس تتجارآ وتلهث،،
وإتا ما خلاص، ولكتها لي واهبا، إلا بتشوف وتستغرب.....
-----
والله ما شماتة ولا حسد لكن بس شوفو الدنيا، الفانية أم بنايتن قش دي بتعمل شنهو...
في مرة كدآ واحد بيحكي ليا عن أملاكه ورزقه ربنا يزيدهو، عن صحتة وعافيته المولى يحفظن ليهو وكيف موفر حق علاجه لو إستوجب وكيف مقري وليداته وكيف أمهم بي عربيتها وبنايتها الخاصة غير الشقة الوين والفيلا الوين...
صدفة إتغيرت عليه.... الحمد لله؛ ما فلس ولا شئ من حلاله إتهبش، بس ولده حصلت ليه مشكلة بسيطة وكيف الدنيا بي حلاتها ومتعها إنقلبت لي مآساة وشراد عقل...
-----
مع الكُبر تعزف عن ملذات الدنيا ومتعها والأسباب عدة؛
عدم القدرة والمقدرة
ضعف البنية والشهوة
ضيق الوقت (مشكلة الأيام تمشي في زيادة عدد مستقطعة من الرصيد)...
بمناسبة الرصيد، حاجات كتيرة تستقطع من الرصيد...
مش كلنا مسطر لينا،،، يعني معروف يومك البتتولد فيهو وحتعيش كم ويبقآ كل يوم بينقطع من رصيد عمرك،،
مكتوب ليك كمين سنة ووشهر ويوم وساعة ودقيقة وثانية وعشر من الثانية وهلما جرآ
وكل لحظة بتمر بتنقطع من العمر.....
هوي إتلفتوا غآدي :eek::eek::eek: ويا "كوكي" سمآآآآآآآآآآآح :(
يعني في بداية المراهقة في عادات كدآ،،
آهاااااااااااااا في ناس بتسرف منها ودي برضها بتستهلك من الرصيد..
وينسوا حقيقة أنه كله مليون بيروحوا، يصعب تعويضهم...

:rolleyes::rolleyes::rolleyes::rolleyes:

بابكر مخير 05-09-2016 06:55 AM

2 مرفق
مع الكُبر وقلة الشغلة؛
أتصورو معايا كيف كانت تكون لو لا الواحد لساته (مااااااااااااا) على رأس عمله...
كان ياهو بتكون الحالة ذي السطر الفوق دآ، تكرار وكلام معاد وقلة شغلة والقعاد والتفكير في الوجع والآلم وفي "المضى واللكان"...
حسي كدآ مليون أحسن..
بتذكر الحبيب والشقيق الأكبر دكتور حاكم عبد الرحمن حاكم، فكر أنه خلاص يمشي السودان بعد عطاء ثر ونفع كثير لغيره؛
قلت ليهو هناك حتشتغل شنهو؟
قال: أقعد أرتاح بعد سنين العمل المتواصل.. قلت ليهو: سعادتك دآ إنتحار عديييل..
مثلك ومثلي بدون شغل معناها "دبرسة" ومع عمرنا دآ، ياهو الموت الأحمر....
طبعن يا ود فرح "ود خالي بلالي، ما التاني" علميا الدبرسة مرض نفسي وحاجة في الدماغ لكن أنا بفتكر أنه مع الكُبر هي شبه حتمية ما بس مرض نفسي، وهناك عدد كبير أعرفهم وقطع شك تعرفونهم!! ممن ضربوا في العمر عتيه دبرسو لمن قضوا...
لكن مع دآ كله...
الكُبر الجميل فيهو............


الأحفاد

http://sudanyat.net/vb/attachment.ph...1&d=1473054835

كوكي صورة الأحفاد ما نزلت،، الحقني وأفزعني :cool::cool::cool:


الساعة الآن 04:22 PM.

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.