سودانيات .. تواصل ومحبة

سودانيات .. تواصل ومحبة (http://www.sudanyat.org/vb/index.php)
-   منتـــــــــدى الحـــــوار (http://www.sudanyat.org/vb/forumdisplay.php?f=2)
-   -   مناطق الإحساس عند الرجل (http://www.sudanyat.org/vb/showthread.php?t=6511)

جلال محمد جلال 04-10-2007 04:24 AM

مناطق الإحساس عند الرجل
 
هل تعرف ما هي مناطق الإحساس عند الرجل ؟؟
إن كنت تعرفها ، فلا تقرأ هذا البوست ، فلن تجد شيئاً جديداً ...
أما إن كنت لاتعرف هذه المناطق الحساسة عند الرجال ، فإقرأ هذا البوست فلربما إستفدت شيئاً ..
ملحوظة :
ربما كان من المفيد للنساء والفتيات أن يطلعن على هذه المناطق ، للعلم فقط لا أكثر .
نبدأ بأول وأهم مناطق الإحساس عند الرجل :
1-الجيب :
الجيب هو المكان الذي يضع فيه الرجل أمواله ( في البنطلون أو الجلابية) بالطبع ، هذا إن كان من هواة حمل المال السائل ، أما إن كان ممن يتعاملون (بالكردت كارد) ، فالجيب الذي يوضع فيه الكردت كارد هو مانعني .
عادة ماتكون هذه المنطقة ، من أكثر مناطق الإحساس حرارةً عن الرجال، ويكون ذلك واضحاً تماماً إذا كان الرجل برفقة زوجته عند التبضع ، إذ أنه عندما تحين لحظة الحساب ، يمكننا بوضوح أن نلحظ تصاعد الدم إلى خدود العديد من الرجال ، وعندها تضيق عليهم الأرض بما رحبت ، ويكادوا يولوا مدبرين .

2-المعدة :
معدة الرجل هي ثاني المناطق حساسية عند الرجال ، وقلما نجد رجلاً لا تثيره هذه المنطقة .
وعادةً ما تختلف المعدة بإختلاف المشارب والمآكل ، فلا يمكن أن يثار رجل من دارفور بالزغني مثلاً ، كما لا يمكن أن يثار رجل من حلة عباس بالإسباكيتي أو التشيتشينوزوبولاشي ( لا تتعب نفسك بمحاولة قراءة هذه الكلمة ، المهم أنها أكلة صينية قديمة والسلام ). فيجب على المرأة دائماً مراعاة وسائل الإثارة المناسبة لرجلها .
على أن كثير من الرجال السودانيين ، تسهل إثارتهم باللحوم والكباب وما إليهما .

3-فريق كرة القدم المفضل :
أكثر من 60% من الرجال تكون هذه المنطقة من المناطق الحساسة لديهم ، ولكن ينبغي للمرأة التعامل مع هذه المنطقة بحذر ، وتفادي الإقتراب منها عندما ينهزم الفريق المفضل للرجل ، ومحاولة إظهار الحزن تضامناً مع زوجها ، ولا بأس من ان تشتم الحكم من مرة لأخرى أمام الرجل . الإقتراب من هذه المنطقة بصورة خاطئة ربما قاد إلى نتائج غير متوقعة .


4-نانسي ، وفانسي ، وهيفا ، وأليسا ، ... إلخ :
تكون هذه المنطقة حساسة عادةً ، إذا كان الرجل من الذين تستهويهم الفضائيات والكليبات ، ويمكن ملاحظة شدة تأثير هذه المنطقة ، إذا ظهرت إحدى أولئك الحسناوات على شاشة التلفاز ، حينها يلاحظ تصلب أطراف الرجال ، المصاحب ببرودة شديدة في المفاصل ، وتدلي الفك الأسفل ، وجحوظ العينين ، وتيبس الشلاليف .
نصيحة للزوجات :
إذا كان زوجك مدمنا لمشادة التلفاز بدعوى متابعة الأخبار ، أو حب الرياضة أوخلافه من الأسباب الواهية ، فيجب عليك الحذر ، فالأمر يدعو للريبة . وأنصحك بعمل مداهمة له على حين غفلة ، وحينها ربما رأيتي الكليبات الموصوفة أعلاه تتطاقش وما تديك الدرب.

5-الحقة :
تعتبر هذه المنطقة من المناطق الحساسة لدى الرجال الذين يتعاطون الصعوط ، حينها يجب على المرأة أن تحذر من ضياع الحقة أو كيس التمباك .كما يجب الحرص في معاملة الرجل في حال كان خرماناً . ويجب كذلك عدم تصديقه إذا قرر الإقلاع عن سف التمباك ، والإستعداد دائماً لنكوصه عن هذا القرار .

عكــود 04-10-2007 05:57 AM

العزيز جلال . .
كل عام وأنت بخير.

ده بوست مهم وفيهو معلومات مفيدة خالص . .
بس كمان، للأمانة وكده، يجب أن نتحدّث عن المناطق الحسّاسة عند بنات حواء
وما أظن بوست واحد بيكفّيهِن
ياخي نتكلّم عن شنو ونخلّي شنو؟
كدي لامن أجيك بعد شراب المويات
الكلام عنّهِن يعطّش. :D

جلال محمد جلال 04-10-2007 08:14 PM

عكود ...
وينك يا زول ياجميل ...
ما تحرمنا طلاتك ...
أولاً : مبارك عليكم الثقة الغالية من جمهور سودانيات .. وأنتم أهلها وقدها وقدود ..وبالتوفيق إنشاء الله ..
تانياً : الكلام في مناطق الإحساس عند المرأة كلاماً كتر بالحيل .. وأنا ناوي زي ما إتفضلت .. أفرد ليهو بوست إنشاء الله ..
دحين هسه يا أخوي خلنا في (عند الرجل) ..
وكان عندك منطقة حساسة ماعارفنها أفيدنا أفادك الله .

بركات الشريف 04-10-2007 11:48 PM

العزيز جلال
تحية رمضانية
هذا البوست مثل تسليم خرائط الالغام ( للعدو)، يعنى كشفت الطبخة ولو الواحد عاوز يعمل مشكلة ما حيلقى سبب.
طالما انو الموضوع بقى مكشوف فساضيف للخريطة مناطق ملغومة اخرى
1- امي
اي ام الزوجة وكثير من الزوجات خصوصا حديثات العهد بالزواج تحاول ابراز امها وكأنها في خبرة مارجريت تاتشر او حنكة انديرا غاندي، وما تدري المسكينة ان اى حديث أو اقتراح يبدأ بامي قالت او امي فعلت سيكون مصيره سلة المهملات..انتبهي يا شاطرة ما تجيبي سيرة امك نهائيا ولا حتى اختك ( في بعض القبائل الافريقية لا يكلم الرجل ام زوجته مدى الحياة)
2 - خط ستة
هي المنطقة التى يضع فيها الرجل بعض الاشياء الخاصة مثل النظارة ان كان من اصحاب النظارات، مفاتيح السيارة، حقة الصعوط او صندوق السجائر، الموبايل،..الخ والنسوان مهووسات بالتغيير وتحريك الاشياء ...ابعدي يا اختى العزيزة عن هذه المنطقة لأن اى فاول فيها سيتسبب في كارثة.

جلال محمد جلال 05-10-2007 06:03 AM

بركات .. إزيك يا عزيز ..
اقتباس:

( في بعض القبائل الافريقية لا يكلم الرجل ام زوجته مدى الحياة)
يا أخوي ناسك ديل ما بدونا جواز سفر ؟؟ إن شاء الله صلاحيتو منتهية ؟؟!!
:D:D:D:D

bayan 05-10-2007 07:54 AM

امال وين الكورة؟
اوعي تجي نقولي الولد عيان ولا البت لو في كورة
ولو كنت حامل اياك ان تلدي في بوم المبارة...
لانه حيمسكوها ليك ليوم القيامة وانك ذي الديك المابعرف الوكت..

بعدين لو كافي الكتاب في السرير على صفحة معينة ما تفرشي السرير
لو الكتاب مكفي 20 سنة
لانه لو الصفحة اتقفلت يحلك الحلا بلة...
شكرا يا رجالة على البوست دا..
بالنسبة لينا انا وممكونة وام راشد جا متأخر كثير
بنشاركم للشابات المقبلات على الزواج..
ولكم المودة...

حسين عبدالجليل 05-10-2007 10:12 AM

بوست جميل و مفيد المفروض يكون في امتحان الشهادة السودانية لتعم الفائدة

بمناسبة الكتب وبيت الزوجية اخوكم اخذ زمنا ليس بالهين ليستوعب الحقيقة المرة وهي انه لايستطيع ان يضع كتابا ما في مكان ما من ارض الشقة ويجده سالما في مكانه ولو بعد اربعين يوما كما كان يحصل قبل ان يكمل المرء دينه .
طبعا في النهاية التاقلم حصل بعد ان استوعب مخلصكم بان الكشة يمكن ان تحدث في اي وقت و دون سابق انذار- ياجماعة الكتاب الانا كنت خاتيه تحت السرير وينو? ومالو لو قعد في مكانه دا حيصل شنو? و بعدين اوع تكون جريدة اول امس اترمت

جلال محمد جلال 07-10-2007 04:30 AM

سلامات يا دكتورة ...
اقتباس:

ولو كنت حامل اياك ان تلدي في بوم المبارة...
لانه حيمسكوها ليك ليوم القيامة وانك ذي الديك المابعرف الوكت..

مبالغة !!! والله ماقادر أمسك نفسي من الضحك وأكتب ..
عموماً .. الحمد لله إنو جعل في جنس حواء واحدة عارفة البير وغطاها .. فليت الأخريات يعملن حسابهن .. ويراجعن جدول دوري كورة القدم قبل مواعيد الحمل ( والسنوات 2010-2014-2018 - ... ومضاعفاتها أختنها تب)
اقتباس:

بعدين لو كافي الكتاب في السرير على صفحة معينة ما تفرشي السرير
لو الكتاب مكفي 20 سنة
لانه لو الصفحة اتقفلت يحلك الحلا بلة...

دا بالذات هبشتني بالحيل ...
متعك الله بالعافية يا دكتورة ..

جلال محمد جلال 07-10-2007 04:39 AM

اقتباس:

بمناسبة الكتب وبيت الزوجية اخوكم اخذ زمنا ليس بالهين ليستوعب الحقيقة المرة وهي انه لايستطيع ان يضع كتابا ما في مكان ما من ارض الشقة ويجده سالما في مكانه ولو بعد اربعين يوما كما كان يحصل قبل ان يكمل المرء دينه .
يا حليلك يا حسين يا أخوي ...
أربعين يوم ؟؟ وتلقاهو سالم ؟؟؟
زمان وأن عزابي كنت مؤجر لي أوضة 3 سنة من أول يوم سكنتها لغاية ماطلعت منها فاتح لي مجلة فيها شبكة كبيييييييييرة بتاعة كلمات متقاطعة قعدت أحل فيها لمن طلعت من الأوضة بعد 3 سنة وطلعت خليت نفس الصفحة مفتوحة للبسكن بعدي .

معتصم الطاهر 07-10-2007 07:59 AM

جلال

بوست فى الإحساس دغرى

أها هادى قعدة

واحدة واحدة ..

10- رسايل الموبايل ..
ودى عندهن كيور ( شفت كيف ) يكتل كدسة الدنيا ..
أوعك تلمسي الرسايل ..
خصمتك يالنبى ..
دى فيها أسرارو .. ولو فيها رسايل من العينة ديك بكون مسحا أول بأول ..
لكن فيها أسرار خاصة حتى على الزوجة ..

11- البشكير ..
دا مع انو خاص لزول واحد ،ومحلو مكان واحد
لكن بتحركيهو ليه ؟

12- مفتاح العربية

أها خمى وصرى
مشى لبيت ناس هناية مافي
حتى لو لقيتى المفتاح ؟
انتو القال ليكم حركوهو من محلو منو ؟
عشان تآمنو

bayan 07-10-2007 08:00 AM

ولو انت عروسة جديدة وشايلاك الهاشمية في النضافة
اوعي تنضفي التربيزة الجنب التلفون
لانه حيكون كاتب كل الارقام المهمة في الغبار
اها ما تبقى عليك نضافة مرة الفكي الغسلت اللوح..
دا موضوع خطير جدا وحيجلب حروب جندرية
وانه النسوان ما بفهمن..بالله مسحت الارقام اللاميها لي سنتين
ومعها نظرة تحذيرية لصاحبو العذابي
كناية الا ان العرس دا خرمجة حياة لا غير..

كل الراجل دون استثناء ظلامينهم ومستنريهم
يكرهون حركة عفص معجون الاسنان من النص
ودا ممكن يكون سبب طلاق..
احرصي على تبني العقلية الذكورية في عفص المعجون من تحت..
بعدين القميص الواقع في الواطة في الركن
داك ما واقع داك خاتبنو هناك
مافي داعي تلميه في الدولاب لانه هو ما عميان من الدولاب
لما ختاه في الركن سامعة؟
والشراب القرب يقيف من الوسخ ايوة الريحتو كعبة داك
ما تغسليه لانه عشان يصل الحالة دي اخد سنتين وهي حالة مقصودة..
لانه الشراب النضيف بخلي الجزمة تضغط على الاصبع الكبير الغالب بيكون اتكسر في الدافوري
لما كان صغير
ولم تتم معالجته بالصورة اللازمة.عشان كدا ابعدي من الشراب وما تجيبي لنفسك الهوا..

والى مناطق احساس اخرى تحت رعاية من شاف ليس كمن سمع...

خالد الحاج 07-10-2007 10:32 AM

سلام علي صاحب الدار جلال والأحباب

والحديث هنا عن مناطق الإحساس عند الرجل :

جئت من العمل لأجد أن الطاولة الموضوع عليها التلفزيون قد تغير مكانها.
الغرض هو تغيير شكل الصالة والمناسبة زيارة ضيوف وهي أول زيارة لهم لمنزلنا ؟؟!!

آثار العدوان :

التلفزيون موصل بالفيديو والستلايت والكمبيوتر ..
شبكة من التوصيلات الغرض منها أن العبد الفقير لله يستطيع توثيق ما يعرض في هذه الوسائل
الإعلامية.
لتوصبل هذه الشبكة يتطلب الأمر يوما بحاله من التجريب.

لتغيير شكل الصالة حتى تصير مقبولة في نظر "الحيكومة" لإستقبال الزوار تم فصل كل هذه التوصيلات
وذلك بسحبها (معطها) بكل براءة :mad: والناس أول مرة تشوف منزلنا العامر. يعني أيا كان موضع التلفزيون فهو عندهم (أحمد وحاج أحمد)
نحن المتواجدون فقط نلاحظ هذا التغيير:mad:

عندي مجموعة من الأوراق (صفراء تلصق علي التربيزة) يكتب عليها ما تريد تذكره من مهام وأرقام تلفونات.. والواحد الشهادة لله بقي ينسي كتير نظام شيخوخة مبكرة وكده..
تم العدوان عليها بحجة التنظيم "وليس النظافة يا دوك" .

هذا مقدور عليه نوعا ...

لدي ثلاثة حسابات بنكية... جميعها تشترك حكومتي فيها معي.

لدي حكومتي حساب بنكي منفصل.. لا علم لي بتفاصيله ...

أي مقترحات أثابكم الله ؟؟؟



****
الرجل حيوان أليف تم ترويضه بواسطة مخلوق جبار في صورة زاهية إسمه المرأة ، لخدمة المرأة.

معتصم الطاهر 07-10-2007 12:03 PM

اقتباس:

المشاركة الأصلية كتبت بواسطة خالد الحاج (المشاركة 78753)
[color=#00008B]لدي ثلاثة حسابات بنكية... جميعها تشترك حكومتي فيها معي.

لدي حكومتي حساب بنكي منفصل.. لا علم لي بتفاصيله ...

أي مقترحات أثابكم الله ؟؟؟


color]

خالد
ياخوى دى حلها كان زمان ...
والراجل فيكم يجيب مقترح ( الا العذابة فهؤلاء تنقصهم الرجالة أصلا ) ..
ان شاء الله الماستر كارد رقموا السرى مشترك ..
يعنى ما غيروهوا .. وقالوا ليك

اقتباس:

انت كان داير حاجة قول لي .
وانت بتشترى لى منو ؟


bayan 07-10-2007 02:32 PM

اقتباس:

أي مقترحات أثابكم الله ؟؟؟
تعرف يا خالد عامل فيها شيوعي على الفاضي ذي الخواجة القال ما بسكر داك
قالو ليه طيب الباقيلها كافر شنو؟
ياخي انت ظلامي
اها قولي كيف ؟

الاسلام يشرع للمرأة ان تشارك في اموال زوجها
وتحفظ اموالها بطريقتها...
وانا شايفة اماني عاملة ظلامية بالجد جد..
دا الكلام....

جلال تقبل خلو للبوست دا؟

نسايم 07-10-2007 03:02 PM

سلام....
انا الحصل علي ما حصل علي زول قبل كدااا
انا خطيبي اجل الخطوبة لانو كان في المباراة
النهائية بتاعت كاس العالم والكلام دا عرفتو
بعد الخطوبة بي شهريين
اما مرتبو عاااافاهو لانو شغال معاي :D
وحسابو الفيهو والما فيهو عارفااهو
الغريبة هو ما عارف ولا عاوز يعرف
دكتورة بيان غايتو كلامك دا مرجع
انا حا ابروزو واطبقو


الساعة الآن 11:05 AM.

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.