سودانيات .. تواصل ومحبة

سودانيات .. تواصل ومحبة (http://www.sudanyat.org/vb/index.php)
-   منتـــــــــدى الحـــــوار (http://www.sudanyat.org/vb/forumdisplay.php?f=2)
-   -   هترشة (http://www.sudanyat.org/vb/showthread.php?t=32071)

ابوبكر بشير سردار 05-09-2016 07:38 AM

هترشة
 
هترشة
:
ـ احكي ليكم قصة ..!
ـ عندنا واحد جارنا كده "رقاص" رقيص مبالغة
ـ ده لو عملوا مسابقة "رقيص" بجي الاول عن جدارة
ـ مافي زول بنافسو
ـ بفوز .. بفوز ..
ـ رقيص بفوز .. سلفقة بفوز ..!
ـ لما يكون في حفلة في حلة تانية اولاد حلتنا ما بمشوا الا يسوقوه معاهم ..!
ـ كان بحلي ليهم الحفلات بي رقيصو .. عشان كده كانو بحرصوا انو يسوقوه معاهم .. وعشان يشجعوه .. مرات بكرموه بي وشاح .. مرات بي درع .. مرات بي قميص .. ومرات يشجعوه بي تصريح .. ومرات يهدوا ليهو كرسي ..!
ـ عمركم شفتوا ليكم "رقاص" بشجعوه بي تصريح ..؟
"الرقاص" بشجعوه بي صفقة ..!
عمركم شفتوا ليكم "رقاص" بيهدوا ليهو كرسي ..؟
الرقاص بيهدوا ليهو طبلة ..!
ـ اولاد حلتنا الفيهم اتعرفت .. يطبلوا بس ..!
ـ مرة كان في حفلة في الحلة "الجنوبية" .. قلنا نمشي ونسوق معانا "الرقاص"
ـ الناس اختلفت في الحتة .. قالوا مافي داعي نمشي كلنا .. نرسل نفر او نفرين يمثلوا الحلة .. ومافي داعي "الرقاص" يمشي لانو المشوار بعيد .. وبرضو خائفين عليهو من كيد بعض "الحَلَّآل" المجاورة والغير مجاورة .. لانها تتربص به حقدا وحسدا علي موهبته "الرقيصية"
ـ لكن "الرقاص" اصرّ انو يمشي عشان يثبت ليهم انو ما خائف منهم وانو ما حيقدروا يعملوا ليهو حاجة .. وانهم "تحت جزمتو" .. وانه مسنود بي رجال تسد الشمس ..!
ـ حكاية انو حلتنا فيها رجال تسد الشمس دي ما دايرة ليها غلاط ونحن عارفينها .. لكن المواقف البتخلي الرجال يسدوا عين الشمس وينها ..؟ ويسدوها لي منو ..؟
ـ ما علينا ..!
ـ المهم مشينا ..!!
البرنامج كان ماشي زي الحلاوة .. لكن كان في اشاعات كده .. قلنا مانشتغل بيها .. اصلا هي اشاعات مغرضة اطلوقها الاعداء والخونة والمتربصين واعداء النجاحات
و.....
و.....
و.....
هي لله هي لله
ـ المهم اتلفتنا كده لقينا "الرقاص" مافي ..!
الله ...!
الراجل ده مشي وين ..؟
افوووووووو ..!
ـ اخيرا عرفنا انو عمك "كَبَرا" وفك "البيرق" .. ورجع الحلة ..!!
ـ ماعلينا ..!
وده ما المهم .. المهم التغطية .. و"المطبلاتية" ما قصروا .. استقبلوه استقبال الفاتحين .. اقصد ستقبال الهاربين ..!
ـ ماهو "مطبلاتية" حلتنا دائما بحتفلوا بالهاربين وبطلععوهم لينا ابطال وبحتفلوا بالفشل والفاشلين وبصورهو لينا انو قمة النجاح ..!
ـ مطبلاتية حلتنا ما عندهم دين .. وبالرغم من ده اغروا ناس حلتنا ودخلوهم المساجد وهم مشوا احتلوا السوق ..!
ـ مطبلاتية حلتنا احتلوا الحلة .. وجعلوا "الرقاص" قائد ليهم وقدوة . عشان كده حلتنا كلها بقت رقص
ـ ترقص وتغني .. تغني وترقص
ـ القنوات في حلتنا تغني وترقص .. حتي "قنوات" التصريف يغني فيها الباعوض وترقص فيها الصراصير .. الاذاعات تغني .. الشوارع والازقة .. صالات المناسبات .. تغني وترقص .. الكوارو والركشات تغني وترقص ..!
ـ نحن اول كنا فاكرين انو الركشات بترقص للغناء .. لكن لقينا انو "البرقص" الركشات هو سوء الطرقات والحفر والمطبات
ـ وقياسا علي هذا ممكن برضو ناس حلتنا برقصوا من اجل حاجة تانية غير الغناء
ـ هو اصلا غناء حلتنا ما برقص
ـ غناء حلتنا لا موسيقي .. لا لحن .. لا كلمات
ـ غناء حلتنا زنقات وكتمات ....!
ـ وقديما قال الشاعر :
(لا تحسبوا رقصي بينكم طربا
فالطير يرقص مذبوحا من الألم)
ـ و ناس حلتنا يتم ذبحهم في اليوم عشراااااات المرات ..!
ـ عشان كده برقصواااا
ـ و .....
ـ بالمناسبة .. ما تفتكروا انو القصة انتهت ..!
ـ قرفنا بس .. تعبنا خلاص .. انتهينا نحن ..!!
ـ والمكضبنا وما مصدقنا ما يسال العنبة الرامية في بيتنا
ـ نحن بيتنا مافيهو عنبة .. ولا بيوت حلتنا فيها عنبة .. بيوتنا كان فيها قطن وصمغ عربي وفول وخيرااااات كتيرة .. كلها انت بالاهمال وانشغال اولاد حلتنا بالرقيص .. عشان كده المكضبنا اليسأل "الموارد" الكابة في ماليزيا وسويسرا و.... و.... و.... هلمجرا ...!
تعريجة
:
ـ الاستاذ : ماهي أغني دولة في العالم ..؟
ـ الطالب : السودان يا استاذ
ـ الاستاذ : مندهشا .. كيف ياولد السودان اغني دولة في العالم ..؟
ـ الطالب : يا استاذ .. انت ما شائف .. يسرقوا فيه جنس سرقة دي كلها .. ولي هسة قروشو ما كملت ..!! 😂😂


الساعة الآن 02:52 PM.

Powered by vBulletin® Version 3.8.8 Beta 2
Copyright ©2000 - 2021, vBulletin Solutions, Inc.