محن سودانية..31..السودانيين يريسو و يتيسو
[align=justify]قبل ساعات اتاني ابني عثمان بالتلفون. وكان المتكلم من انجلترا. احد الاساتذة ، وكان يريد معلومات بخصوص كتاب يقوم بكتابته. والاستاذ يتصل بي كثيرا بخصوص معلومات. ولا اذكر ابدا انه اتصل بي بسبب التحية او المجاملة. وبعد ان زودته بالمعلومات التي طلبها واضفت عليها معلومات اخرى. قال لي ان الاستاذة الكاتبة ليلى ابوالعلا قد ذكرت في جريدة الشرق الاوسط بانها قد تبرعت بمبلغ لمجلة نفاج . والتي صدرت عدة مرات من لندن وتوقفت . وبسؤال الاستاذ محجوب شريف عرف الاستاذ الاديب ان الاستاذ محجوب شريف ليس له علم بالمبلغ. وطلب مني انا الموجود في السويد ان اتصل بالاساتذة الموجودين في لندن واستفسر عن المبلغ . وبعبارة اخرى اخونهم .. او اقوم بإحراج الاستاذة ليلى ابوالعلا.
وعندما سألته لماذا لا يتصل هو بالاساتذة المتواجدين معه في نفس البلد. كان رده انه لا يريد ان يحرج او يغضب الاساتذة. فسألته ..وطيب ليه اتصل بيهم انا؟. انا الموضوع ده ما دخلت فيهو من الاول ولا عندي بيه صله. يعني انا اشيل وش القباحة؟. كان رده ما انت ممكن يقبلوها منك..ثم انقطع الاتصال . وانا لا ازال ... متمحن. صديق ومعرفة منذ زمن الطفولة معي هنا في السويد شاهدته زوجته ايام الشباب وهو يتحدث مع فتاة. و عندما واجهته زوجته قال لها دي صاحبة شوقي. عندو معاها مشاكل انا بحل فيها . وزوجة صديقي هي صديقة طفولة لام ابني . وعندما لمته قال لي ... انت ما اصلك طالع للمشاكل. نفس هذا الشخص حضرت لزيارته فنظرت زوجته الي شذرا. وتجاهلت تحيتي . وبعد استفسار قال لي ...(في الحقيقة انا كنت زهجان. وشلت آخر مية دولار في البيت. ومشيت لعبت بيها بينقو (لعبة اجتماعية تلعب في اوروبا عبارة عن كرات فيها ارقام). ولمن مرتي زنقتني قلت ليها شوقي كان طالبني مية دولار واصر ياخذها وانا اديتها ليهو). وعندما لمته. كان الرد... اقول شنو؟. انا لا بسكر لا بستعمل مخدرات. اشرح ليها كيف ؟. الاخ حمودة ابوسن وهو زميل الطفولة والصبا والشباب ، قال لي مرة عندما ذهبت لزيارته في مكتبه في الخرطوم مع احد شيوخ الخليج . (عربنا ديل بسو الزول شيخ ، ناظر ولا عمدة عشان يعلقو فيك كل مشاكلهم . حتى المطر ده كان ما نزل يحملوهو المسؤولية ) . صديق وزميل الدراسة كوفي هارسون الذي كان سفيرا ثم وزيرا في غانا ، كان في زيارتي في السويد في التسعينات. وعندما استفسرت عن بعض اصدقاء الدراسة .عرفت ان احدهم قد صار ملكا على قبيلته وهو طبيب. ثم اردف قائلا ... ان تكون زعيما او ملكا في افريقيا هي من اصعب الاشياء. لانك لن تجد غير المتاعب والمشاكل . وكان من الافضل جدا لصديقنا ان يواصل كطبيب. انا هنا لا اقارن نفسي بهؤلاء ولست بزعيم ولا شيخ ولا ناظر. ولكن نحن السودانيون نبحث عادة عن شماعة لكي نعلق عليها مشاكلنا واخفاقاتنا. اما نجاحنا فنحن الذين صنعناه ولا دخل لاي انسان آخر به. قبل بضع سنوات طرق بابي سوداني لم اشاهده لسنوات عديدة. وقال لي بالحرف الواحد. (الراجل السويدي صاحبك العرفتني بيهو اكل عمولتي. وانا عاوزك تمشي تتكلم معاهو. لانو الراجل ده بسمع كلامك) . فقلت له انا عرفتك بالسويدي ده قبل عشرة سنين. وزي ما عرفت انا انتو عملتو شغل كتير جدا وطلعتو ونزلتو. لكن يوم واحد انت ما جيت قلت لي ازيك. عرست و ولدت و اولادك بقو كبار. وسمعتك اشتريت بيت وعملت حفلات يوم واحد ما ضربت لي تلفون . واتمنيت ليك الخير. عيد الضحية الفات ده 1999 اول يوم في العيد. انت شفتني في صالة المغادرة في مطار القاهرة معاك اولادك ، مرتك لابسة طرحة زرقه . سلام الله ما اديتني ليهو. طيب انت بقيت زول كبير ومهم بيكلفك شنو تقول لي ازيك؟. فقال لي والله في الحقيقة انا ما شفتك. لانو انا كنت بعد ما سلمت على كمال ترباس مشغول بعاين للبنت السمحة الكانت معاهو. فقلت له ... طيب انت وقت ما شفتني بي صلعتي وفقرتي دي. عرفت كيف انا كنت قاعد جنب ترباس. قبل سنة ابيت تسلم علي . هسه سنة 2000 دي دايرني امش اشاكل ليك السويدي عشان ما اداك عمولتك. طيب لمن كنت قاعد تقبض ما ضربت لي تلفون عيدت او سلمت علي..وحتى بعد هذا الكلام لم يحدث ان اتصل بي للمعايدة او للتحية. بالرغم من انه حضر للسويد بفيزا تحت ضمانتي بدون ان اكون قد شاهدته او تشرفت برؤيته. والغريبة ان هذا الشخص بعد ان اخذ اقامة وامورو سلكت كان يقول لنا. انا في الحقيقة وهابي . واول مرة اعرف انو الوهابية بجحموا في البنات. زي الكانت مع ترباس. لفترة تقارب السنة كان احد اقربائي الرباطاب يتصل بي من هولندا ، وهو ضابط امن كبير سابق. والامر كان بخصوص ضابط واجه تغولا على حقه وتعرض هو واسرته لمضايقات واجحاف استمر احد عشر سنة . والضابط قد تعرض للاعتقال والسجن في السودان لانه كان عضوا في منظمة العمل الاشتراكي في السودان ، لان احد الاشخاص قد استعمل قصته لتقارب الاسماء و تحصل على لجوء سياسي . وعندما تقدم هو بالقصة الحقيقية ، كان رد فعل منظمة العفو الدولية (الفلم ده شفناهو في سينما الوطنية قبل كده) وبطريقة مكثفة ، قريبي كان يتصل من هولندا. ويطلب مني ان اكتب عن القصة. لان الرجل واسرته قد عانوا كثيرا. وكان يقول لي انت عندك مصداقية عند الناس . ولو كتبت الناس حا تصدق قصة الراجل ده. وكنت اقول له (انا ما بعرف الراجل ده وما عندي خلفية. وعشان الناس تستمر تصدقني انا لازم اتحرى واتأكد. وانت و صاحبك ضباط بوليس كبار. وبتعرفو التحريات واهميتها). ثم طلبت منه ان يخبر صديقه لكي يتصل بي مباشرة. وكان قريبي يقول لي الراجل ما بيعرفك ومتحسس. بالرغم من انو انا قلت ليهو شوقي ده زول بسيط وما عامل اي هيلمانة لي روحو. وبعدين هو مفتكر انو الدكتور صدقي كبلو واقف في طريقو. وبعد مجابدات اتصل بي ضابط البوليس. وكان انسانا معقولا ولطيفا وبعد شهور من المتابعة والاتصالات بالدكتور صدقي كبلو ، الذي اكن له احتراما لا حدود له واعجب بكتاباته وفكره ، ناقشت الامر مع الدكتور صدقي كبلو. وكنت قبلها قد اتصلت بالاستاذ الدكتور الشفيع خضر . واغتنمت فرصة تواجدنا في مؤتمر المانيا. وعندما اختليت به بعد ان انهى دردشة مع الاخ بيتر ادوك وزير التعليم العالي ، سألت دكتور الشفيع عن الاخ ضابط البوليس . فأشاد بالسيد ضابط البوليس. ووصفه بالرجل ابن الناس والشخص الفاهم وانه تعرض الى ظلم. ثم اتاني ايميل من الدكتور صدقي كبلو بتاريخ 9-6-2009 بدأهو بالعزيز الصديق شوقي... مما اصابني بالفخر ومنه (في النصف الاول من التسعينات اتصل بي مسؤول في امنستي ليسأل عن شخص اسمه .........وعن منظمة العمل الاشتراكي فأعطيته معلومات عنها. فيما بعد عرفت ان الشخص المقصود ليس هو .........وان الاسم قد نقل لآمنستي خطأ . وان المعتقل حينها هو .......واردت ان اساعد.........ولكنه رفض مساعدتي بتحريض من احد الناس بسويسرا. المهم هو يتهمني بأني مسؤول عن المسألة. كما قلت انا مع مساعدته) وبفرح شديد وبحماس اتصلت به تلفونيا فقلت له انا مستعد اكتب ودكتور الشفيع اشاد بيك ودكتور صديق كبلو مستعد يعمل اي حاجة انت تطلبها. الرد كان مفجأة بالنسبة لي... وهو (دي ما المشكلة. المشكلة انو دكتور خالد الكد هو الخلق المشكلة دي . والراجل القدم بي قصتي صاحبهم. وانو المشاكل عملوها الشيوعيين. وانو الشيوعيين... و..و..و... فقلت له ياخي اذا عندك مشكلة مع خالد الكد ، خالد مات الله يرحمو. واذا انت عندك مشكلة مع الشيوعين ، فالشيوعيين بيذكروك بالخير. واذا انت عاوزني انا اكتب انا مستعد اكتب في المشكلة واعمل توضيح. وانت لمن اتصلت بي ما اشتكيت من خالد الكد ولا اشتكيت من الشيوعيين. عاوزني اكتب ؟... ووضح ان الرجل كان عنده حسابات مختلفة وانا شغلت نفسي بالقضية ستة شهور. وكنت فاتح ليها درج كامل في نافوخي . طبيب اخصائي يعتبر من اقرب اصدقائي بدأ تعاون في عمل طبي تجاري كبير يشمل الشرق الاوسط وبعض دول الخليج وكان هنالك تعاون بينه وبين طبيب آخر في هلسينكي في فنلندا. وتعثر الامر . فطلب مني صديقي ان اتصل بالطبيب السوداني في فنلندا. والطبيب في فنلندا كان زميلي في المدرسة الثانوية . وتربط اسرته باسرتنا صداقة قوية لا تختلف عن رباط الدم. صديقي حامل الدكتوراة في الطب كان يقول لي ان الطبيب في فنلندا يقدرني ويحبني. وطلب مني ان اتدخل لكي يواصلوا العمل. قمت بالاتصال بالطبيب في فنلندا الذي كان سعيدا بسماع صوتي لاننا لم نتقابل منذ ايام الثانوي. وعندما دخلت معه في موضوع صديقي الدكتور . قال لي... انا متأسف جدا انك اتكلمت عن الراجل ده . وانا كنت اتمنى انك لو كنت ضربت لي بسبب حاجة تانية. الراجل ده شتمني وقال لي ..........وانا ممكن انسى الكلام ده . لكن الراجل شتم ابوي عاوزني انسى دي . فقلت له طبعا لا وانا متأسف لانو ما كنت عارف. عندما سألت صديقي ، قال لي... آي شتمتو يا اخي . لكن مالو يا خي ده ما بزنس ممكن استمر. و عندما سألته قائلا... ليه يا خي تهبلني ، ما كان تكلمني انك انت شتمت الراجل وشتمت ابوه عشان ما اتهبل. ورد رسول الانسانية ومؤدي قسم ابوقراط انه لم يكن يظن ان الامر مهم. قديما كانت هنالك قصة العتالي في السوق. الجماعة شيلو صندوق كبير وبعدين زاغوا منو. وطلع انو الصندوق فيهو زول مكتول ومكرفس. وبعد تلتلة وحراسات ودق وبوليس. البوليس فكاهو. بعد مده جو جماعة عندهم صندوق فرفض ان يحمله. وعندما قالوا ليه انت ما عتالي ؟ قال لهم...آي عتالي لكن بس بشيل قصب. مرات الواحد يفكر في العتالي ده ويقول يبقى زيو. لكن لا... برضو حنشيل صناديق. المشكلة نحنا السودانيين ما بنسأل من ظروف الزول التاني وامكانياته ومقدرته. قبل شهرين اتصلت بالرجل الجنتلمان مولانا محمد صالح عبداللطيف وقيع الله. وهو بمثابة الاخ و الوالد و زوج اختي . ولما يقارب الساعة كنت اتكلم في الفارغ والمليان في التلفون معه. الا ان اضطر الرجل الرقيق ان يقول لي (والله انا في الحقيقة في اجتماع ومعاي جماعة) . بعد مليون سنة في اوروبا زيي وزي اي تشاشي . ضارب لزول في وقت عمل وفي مكتبه. وكان ممكن انتظر لحدي ما يرجع البيت. ومافي شيء مهم ولا عجلة ، لا زول ميت ، لا في زول مريض . والغريبة في اول خمسة دقائق بعدما انتهت المكالمة. كنت مستغرب او متضايق. لانو الرجل قد حسمني بعد ان ( قليتو) ساعة كاملة. فالمفروض في الاول ان نتحرى وضع الشخص الآخر وامكانياته ومقدرته ، وان نسأل وان لا يحرج الآخرون في قول ما بقدر او مافاضي عشان ما نعقد حياة بعض... التحية .... ع.س. شوقي [/align] |
عشان انت شوقي بدري العود الناس انو يمد يد المساعدة لكل من يطلبها وللأسف لا يوجد بينهم من يراعي ظروف شوقي..
تعرف ياشوقي أنا علاقتي بيك من الناحية الزمنية لا تتعدي 10% من حياتك العامرة بالصلات والتجارب لدرجة اني بقيت زي الزول الكان عميان وفتح لثواني شاف فيها ديك قدامو وعمي تاني وبقت الدنيا كلها مربوطة بالديك الشافو لامن زول يحاول يوصف ليهو حاجة أخونا يبدا يسألو : طول الديك...لون الديك ألخ.. أنا بقيت لما انت تكتب عن زول وتقول عليهو كان صاحبي ودكتور ..أخوك طوالي يبدا يخمن دا منو..لكن طبعا ناس كوفي ونيكي وشمبرلين ,وأفورق الحبشي وعلي باناتوشا وحبيب التنزاني ود.أومبايا والمرحوم أحمد باساي وأحمد الجبلي وشباتني موج الأداني كف رماني لامن هددتو وقلت ليهو حأجيب ليك شوقي بتزكرم كويس..حتي المطرب جيشيك دايما في بالي..غايتو الله يديك العافية وتعيش وتساعد وترمي ورا ضهرك يا أصيل.. |
ده نوع من الكتابة الصعبة جداً
نمط مغاير من أدب الحكايا السردي يعتمد على إمكانيات هائلة في توظيف الذاكرة وإعادة ترتيب الحكايات المتنوعة ومن ثم نظمها في سلك واحد وفق تصاعد درامي يجعل القارئ يركض خلفها بنفس لاهث بعض أدب السيرة الذاتية أصبح مرجعيات(الخبز الحافي لمحمد شكري مثلاً) لكن هنا تجربة غنية وواسعة الثراء من أم درمان وحتى مالمو حبلت بتنوع الوقائع والشخوص والأحداث لو قدر لها أن تخرج مجتمعة ستعيد صياغة العديد من مفاهيم الأدب السوداني المعاصر ربما دافع الحكى أحياناً طرح التجربة للخروج بقيمة اجتماعية أو مفهوم مغاير للسائد أو حتى مفهوم وعظي تعليمي سوداني لكنها تأتي مرتبة ومصاغة كحكايا يقرأها الجميع سودانيين وسواهم بنفس القدر من الاستمتاع فهي تحقق شروط الإبداع الروائي/القصصي/السردي دايماً مستمتعين معاك ربنا يديك الصحة والعافية |
عم شوقي متعك الله بالصحة والعافية ، مقالك دا قريتو أكتر من مرة والله وكل مرة أقرأه كأنو قريتو أول مرة أموووت ضحك من كترت ما اتكيفت والله ولعت لي سيجارة وكملت الكيف:)
حاسس بالرغم من إنه ليك عشرات السنين في أوربا وهناك الحياة ليها حساباتا الخاصة لكن كل شئ جواك ما زال وح يظل ينبض بسودانيتك الحلوة الأصيلة عشان كدة شيل الصناديق ما بتقدر تزح منه أو تخليهو ولا الحمار البيرمي سيده ما بتبعد منه:) "قولتي لي فاتح ليهو درج كامل في نافوخك ، الله يجازي محنك يا عم شوقي:D" التحية/ عثمان الطيب |
العزيز شوقى بدرى
تحياتى أكتب لك من القاهرة ولم أطلع على هذا الموضوع إلا الآن .. بعد الإضلاع على بوست العزيز فيصل عثمان الحسن فى سودانيز أونلاين شوقى بدرى يجند قلمه عالى المصداقية فى أعمال غير أخلاقية لاأظنها تشبه تاريخه . .. ننتظر تعقيبك تحياتى |
بسم الله الرحمن الرحيم
الحبيب رأفت إزيك وكيف عامل مع قاهرة المعز من خلال قراءتى لما كتبه الأستاذ شوقى والأخ فيصل أعتقد أنه هناك (تقارب ) فى تقيم كلٌ منهم للآخر اقتباس:
وشوقى كما العهد به كريماً وشهماً أعول عليك وعلى الأخ فرح جيلانى فى احتواء الموضوع فإن حسنت النوايا هى ليست سوى بضع كلمات هنا وهناك لا أعتقد أن تعقيب الأخ الكريم شوقى ضرورى الآن على الأقل رجائى أن تعمل على ذلك وأنا معك |
اقتباس:
هذا هو الكلام المطلوب الرد عليه وأضم صوتي الي صوت رأفت فالكلام بالفعل يحتاج الي توضيح من أخونا شوقي ولا مجال هنا للحديث عن شوقي أو الدفاع عنه لأن الموضوع لا يستطيع أحد توضيحه غير شوقي.. مالكتوب أعلاه ورد فى سودانيز أون لاين , تحت بند آراء وأقلام , قام بكتابته الأستاذ شوقى بدرى , ضابط البوليس المقصود فى الحدوته هو شخصى الضعيف , وضابط الأمن الكبير الذى أشير اليه فى متن المكتوب هو ضابط الشرطة الأخ فرح جيلانى . أحزننى بل أدهشنى ما ورد أعلاه خصوصا وأنه وارد من قامة يكن لها الجميع قدر وافر من الاحترام والتقدير , وكنت بالفعل قد استعنت به فى آداء مهمة محددة لم ينجزها وانما لجأ لضرب آخر من التعامل كنت قد أسدلت عليه الستار ولا أرغب فى اثارته مرة أخرى وهو الكتابة مرة أخرى حول قضيتى . الحصل بعد توقف الدكتور صلاح بندر عن متابعة قضيتى بناء على طلبى , كان حرى بى البحث عن آخرون يقومون بتبنى تلك القضية , فاتصلت بالأخ العزيز المعز الجمرى أبو نورة وكان يقيم حينها بأمريكا , والصديق رأفت ميلاد بسويسرا والصديق الحسن أحمد صالح المقيم بفرنسا , والصديق توفيق زيادة وزوجته الكريمة المقيمان بانكلترا والصديق فرح جيلانى المقيم بهولندا وطلبت منهم أن تمهر المذكرة المقترح تقديمها للسلطات السويسرية ومنظمة العفو الدولية بتوقيعاتهم حتى تأخذ الحملة صفة العالمية , ليقينى أن هذا النوع من المعالجات هو الكفيل بمعالجة حالتنا , اقترح على عضو المنبر الصديق المعز الجمرى أبو نورة الاتصال بالأستاذ شوقى بدرى لينضم لهذه الحملة , حيث أن للرجل علاقات واسعة ربما أفادت كثيرا فى دعم هذه القضية , أفدته بأنى لا أعرف الرجل ومن غير اللائق أن أتصل به هكذا وأطلب منه التدخل فى مثل هذا الشأن , ويبدو أنى كنت على حق فى تحفظى بقراءة ما ورد أعلاه , هاتفت الصديق رأفت ميلاد وهو أيضا عضو بهذا المنبر كما المعز أبو نورة , وشرحت له وجهة نظر المعز فأمن عليها وقال لى أنه على علاقة جيدة بالاستاذ شوقى بدرى وأنه سيكون مفيد فى دعم هذه الحملة , بالفعل اتصل به الصديق رأفت وتحدث معه فتحفظ الرجل وقال دعونى أدرس الأمر , ولم يرد بعد ذلك لا بالسلب ولا بالايجاب , صاح الكلام ده يا أستاذ شوقى ويا رأفت ولا ما صاح , صرفنا النظر عن مشاركة الأستاذ شوقى فى هذا العمل وقمنا برفع المذكرة لأمنستى وللسلطات السويسرية , بعدها اتصل بى الصديق فرح جيلانى وأخبرنى أنه على علاقة قربى بالأستاذ شوقى بدرى وربما نستفيد منه فى هذا الموضوع , أفدته أن الصديق رأفت اتصل به ولم يبدى الرجل حماس فى المشاركة فى حملتنا وأننا لسنا فى حوجة اليه الآن لأن المذكرة قد رفعت , طلب منى الصديق فرح اعطاءه فرصة لعله يستطيع ان يقنع الرجل وأن الرجل قريبه , مثل فرح من الرجال الذين لايرد لهم طلب وان كان الثمن مثل ما ورد أعلاه , اتصل الصديق فرح بالأستاذ شوقى وتحدث اليه وطلب منى التحدث للرجل ويعلم الله أنها كانت مثل التعليمات التى أنفذها وبطبعى لا ألح فى طلب أى شىء مهما كانت حاجتى له , وأستغرب جدا للانسان الذى يريق ماء وجهه مهما كان حجم المقابل , اتصلت بالأستاذ شوقى عل مضض واستقبلنى الرجل بأريحية بادية ما جعلنى أحس أنى أتحدث مع صديق , عند حديثه معى قال لى بالحرف الواحد أنه التقى الرجل الكريم الدكتور الشفيع خضر سعيد وتحدث معه بشأنى وأن الرجل قد أشاد بى وتحدث عن الظلم الذى تعرضت له وأنه حزين لذلك , كلام الشفيع هذا اضافة لمواقفه الكريمة وزياراته لى فى منزلى هو والرجل الكريم حمودة فتح الرحمن ومساعيهما الجادة بالكتابة للسلطات السويسرية هل من الممكن أن تجعل مثلى يحمل حقد على حزب يضم مثل هؤلاء الرجال!!!! , وقلت لى يا أستاذ شوقى أثناء حديثنا أن الدكتور صدقى كبلو يسعى ليصبح السكرتير العام للحزب الشيوعى وهو فى هذا الظرف من الممكن أن يفعل أى شىء يطلب منه خلينا نستغل هذا الظرف ونجعله يكتب صاح يا أستاذ شوقى ولا ما صاح , وطلبت منى أن أكتب لك ملخص لما حدث وأرسله حتى تستند عليه فيما سوف تكتب حصل ولا ما حصل يا أستاذ شوقى , ولم أقم بالكتابة اليك حصل ولا ما حصل , وانما أرسلت لك رابط البوست للاطلاع عليه وأرسلت صورة منه للأخ فرح , ومنذ ذلك الحين لم يتم بيننا أى اتصال , سأعود لمزيد من التوضيح . |
اقتباس:
داير أقول انو الTools بتاعة الناس البتصدوا لمساعدة الاخرين يجب أن تكون سرية مهما بلغت درجة إختلافك مع الزول الاتبرع لمساعدتك من غير ان يكون له ناقة في الموضوع.. هل الناس البتصدوا لمساعدة الأخرين من باب الشهامة السودانية، يجب أن يخضعوا للمساءلة الاجتماعية زيهم زي غيرهم لو غلطوا؟ أعتقد لا يجب ذلك... إنما يجب إرسال عتاب خفيف لبهم داخل كوم شكر... لانو الناس الزي شوقي بدري ديل أهم من السفراء في دول المهجر و أهم من السيد الرئيس داخل السودان.. الناس المظلومين زي أخونا فيصل كل يوم في إزدياد.. و الزي شوقي بدري في تناقص... و العمدة لو عملوا ليهو مجلس محاسبة ببقى ما عمدة.. |
اقتباس:
تحياتى من تعقيبك يبدو لى معرفتك بالأخ فيصل .. بمعرفتى بالأخ فيصل فهو شخصية الرجل "الجدع" بتعبير المصاروة وأنا بحضرتهم .. وهى الشخصية التى يكبرها ويحترمها شوقى بدرى .. شهم وشجاع ولا يقبل الشفقة .. مثل "البت الفتاة" فى التهذيب كما يحلو لنا أهل أدرمان فى التشبيه .. وكالأسد الهصور فى النزال .. ونمنعه أحياناً من التصدر بأمر فارق السن لحماقته فى الحق .. أمازحه ليبتعد لنا بالتحدث عنه قائلاً "أنت قايل نفسك فى المايقوما" تحياتى |
ارسلت هذا الموضوع للاخ رأفت ميلاد البارحه بالاميل .
................................ شوقى بدرى يجند قلمه فى اشياء غير اخلاقيه . 1. يعنى شوقى بدرى لبس قلمه لبس سته ( يعنى لبس خمسه زائد الطرزيماتش والكوريك ) . وقال ليه انتباه . استرح قوم بعمل غير اخلاقى علشان تكسب رضاء المجرمين او تتحصل على ميداليه من الناس الكعبين . كان يمكن ان يكون الكلام عن شوقى بدرى قد اخطاء او فهم غلط , لكن عنوان البوست يعنى الاصرار والترصد . 2. بعد الاتصال بعشرات الناس . فى لندن وامريكا والقاهره . تحصلت على اشاده وتأكيد من الدكتور صدقى كبلو بأن الاستاذ فيصل قد ظلم ظلم الحسن والحسين . وهذه كلمات دكتور كبلو . وانه مستعد للمساعده . أتانى تلفون وايغظنى وكان السؤال عن التطورات فى موضوع دكتور كبلو . فقلت فرحاً جزلاً بأن دكتور كبلو وكل الناس وانا على استعداد لان نكتب ونصلح الغلطه . الصوت فى الجانب الآخر لم يكن سعيدا بهذه التطورات . وبدأ الكلام عن خالد الكد والشيوعيين . وردى كان خالد الكد مات والشيوعيين عاوزين يساعدوا لو عاوزنى اكتب حأكتب لو عاوزين تدخلوا خالد الكد والشيوعيين انا ما حأكتب . وانهيت المكالمه . وكتبت فى مذكرتى ( تلفون ... يصرف الامر عن موضوع دكتور كبلو ..... حسابات خاصه ..... خالد الكد والشيوعيين ) . 3. بعد تفكير البارحه قلت انه من الممكن جدا ان المتكلم لم يكن الاستاذ فيصل . ولكن بعد ذلك التلفون لم يتصل بى الاستاذ فيصل او قريبى الجيلانى فرح . بالرغم من الاتصالات المكثفه فيما قبل هذا التلفون . 4. هذا الموضوع اصابنى بتمزق فى داخلى . وكنت اقول لنفسى لكى تساعد اسره الاستاذ فيصل . ستسبب فى كارثه للاسره السودانيه الاخرى . وتصورت رجال بوليس ضخام يأتون لانتزاع رب تلك الاسره . والاطفال يبكون . واهلهم يلعنوننى وكل انسان يقول هو الراجل ده دخلو شنو وصلتو بالموضوع ده شنو . ده اصلو راجل بتاع مشاكل . ولكن قلت الحق هو الحق واسره فيصل هى المظلومه والظلم هو اسوأ شئ . واجتهدت وتعبت وسعدت عندما قال لى صدقى كبلو ياخى الراجل ده مظلوم ظلم الحسن الحسين . 5. من الممكن جداً ان فيصل لم يكن المتكلم . لان مشكله السودانيين انهم لا يقدمون نفسهم فى المحادثات . وحتى قريبى الجيلانى لا يقدم نفسه . وانتظر الى ان افهم من سياق الحديث من هو . اليوم اتصل الاخ حسن محمد صالح من باريس ليلومنى بخصوص موضوع الاستاذ فيصل . والغريب انه قدم نفسه من البدايه وهذا شئ غير عادى وسط السودانيين . 6. فى سنه 60 كان فى لسته القبه التى طالبت العسكر بالرجوع الى ثكناتهم . واول من اعتقل كان احمد سليمان رحمه الله عليه فقال ضابط البوليس اللسته دى انا آخر زول فيها جايينى انا اول زول انتو اللسته دى قريتوها بالقلبه . السيد الصديق ما فى الاول ما تمشوا ليهو . الموضوع الاتنشر ديه كان تحت عنوان محن سودانيه . موضوع الاستاذ فيصل ذكر بدون اسم . ولم يكن حيثيات محكمه بل اقرب الى الملح (بفتح اللام) جمع ملحه . وكانت هنالك اشياء كثيره مذكوره كمحن سودانيه وانا لحدى حسى متمحن . منها المشكلة نحنا السودانيين ما بنسأل من ظروف الزول التاني وامكانياته ومقدرته)))) . اقتباس:
الاستاذ فيصل فى اول حديثه معى كان عنده تحفظات ولا يريد ان يسمع اى شئ عن الدكتور صدقى كبلو . واذكر اننى قلت له ان صدقى كبلو رجل ذو مصداقيه وقد يكون سكرتير للحزب الشيوعى فى يوم من الايام وهذه الصفات لا بد ان يكون اميناً . وان صدقى كبلو عنده مفتاح القضيه . والشخص الآخر فى امريكا الذى استلم القصه بسبب تشابه الاسم . قد غير تلفونه واختفى من العالم . وانا لا الومه . واذا كان الآن يعمر مسدسه ليبحث عنى فله الحق . البعض لقه الجنازه وشبع لطم .. خلونا فى المهم ( أ ) كل العالم قال الاستاذ فيصل مظلوم ظلم الحسن والحسين . وانا رفضت نصيحه الكثيرين بأن لا ادخل نفسى فى المشاكل واقول بملئ فمى ان الاستاذ فيصل هو صاحب القصه وليس الشخص الآخر فى امريكا .... نعمل شنو ؟؟؟ لو عاوزنى اقول نجاندينق وتعنى وليه بالبلدى مستعد . واتمنى كل الناس الحسى متداخلين ديل يقدموا ويسووا حاجه اقل شئ وضح ان الاستاذ فيصل مظلوم وصاحب حق . وان الذى تكلم معى ويعرف الموضوع جوه وبره ليس هو بالاستاذ فيصل .. نعمل شنو دلوقت . هل انا اخطأت فى الاتصال بالدكتور كبلو ؟ . ولماذا محاوله فلفله كلمات الدكتور كبلو وتفسيرها ووزنها وقياسها وليه وعشان شنو ؟ هل المطلوب نتيجه ولا مرمطه . كان انتو زعلانين انا ما زعلان وكان انتو رضيانين انا بالاكثر . عاوزين شنو.؟ .. وما حنسمع كلام خليك بعيد والدخلك شنو انت ناقص مشاكل ولو شفنا اى زول عنده مشكله حنمشى عليه قبل ما يسألنا . ونحنا ما ملائكه حنغلط وحنقع وحنقوم . هذه الذوبعه تؤكد كلامى بان السودانيين يريسو ويتيسو . الانجاز ما مهم كل الكلام الجميل القلته انا واتقال عن الاستاذ فيصل ما مهم . الاختلاف فى جمله واحده هل الاستاذ فيصل ضرب تلفون ولا ده زول تانى . كيف توجد المعادله . من الاول الموضوع فى يد الدكتور صدقى كبلو والاستاذ فيصل رافض مساعده صدقى كبلو وعنده موقف سلبى نحوه . انا كان مفروض اجد المعادله المستحيله . بعد ايجاد المعادله الاستاذ فيصل اذا كان هو المتكلم فى التلفون او ليس هو المتكلم فى التلفون فقط . قطع اتصالاته بخصوص الموضوع . انا عندى المعادله فى يدى بعد ان ضايقت وخالفت نصيحه الكثيرين . دلوقت هل الاستاذ فيصل والبقيه عاوزين نتائح ولا تصفيه حسابات . ما هو المطلوب ؟؟؟. ولكى لا نغلط على الآخرين توقفنا عن الكتابه فى المنبر العام ...هذا آخر ما اكتب فى هذا الموضوع. التحيه ع . س شوقى ... ( |
كدي بالله ياشوقي براحة وما تاخد المواضيع باستعجال..سواء رأفت أو أنا لما طلبنا منك التوضيح فدا ما مقصود توضيح لينا احنا ..التوضيح للناس الما بيعرفو شوقي بدري والراجل فيصل دا حكي كلام وسألك الكلام دا حصل ولا ما حصل والناس عايزة تعرف حصل زي ما هو بيقول ولا لأ وكمثال لذلك ما يلي:
الصديق رأفت ميلاد وهو أيضا عضو بهذا المنبر كما المعز أبو نورة , وشرحت له وجهة نظر المعز فأمن عليها وقال لى أنه على علاقة جيدة بالاستاذ شوقى بدرى وأنه سيكون مفيد فى دعم هذه الحملة , بالفعل اتصل به الصديق رأفت وتحدث معه فتحفظ الرجل وقال دعونى أدرس الأمر , ولم يرد بعد ذلك لا بالسلب ولا بالايجاب , صاح الكلام ده يا أستاذ شوقى ويا رأفت ولا ما صاح حكاية تبطل كتابة في المنتديات دا كلام زعل فارغ ..يعني عشان زول عايز يطلعك غلطان تقوم تبطل كتابة..شيئ عجيب والله وغريب انو يصدر من شوقي بدري العمرو ما هرب من مواجهة المشاكل.. لا ياشوقي لازم ترد وتكتب زي ما كنت بتكتب والما عاجبو ما يقرا.. وقلت لى يا أستاذ شوقى أثناء حديثنا أن الدكتور صدقى كبلو يسعى ليصبح السكرتير العام للحزب الشيوعى وهو فى هذا الظرف من الممكن أن يفعل أى شىء يطلب منه خلينا نستغل هذا الظرف ونجعله يكتب صاح يا أستاذ شوقى ولا ما صاح , وطلبت منى أن أكتب لك ملخص لما حدث وأرسله حتى تستند عليه فيما سوف تكتب حصل ولا ما حصل يا أستاذ شوقى , ولم أقم بالكتابة اليك حصل ولا ما حصل دا برضو كلام عايز توضيح ياشوقي ولا انت شايف شنو:confused: |
إنزعجت من تلفون فتحى وأنا حارس أمام الدمياطى وليمة "البلطى والإشر بياض" الهو العجل شخصياً .. لا أعتقد يافتحى قال إنه أضرب عن الكتابة .. ولكنه عنى هذا الموضوع ..
عموماً يا شوقى كما قال فتحى أنت ليس تحت المسائلة وكلنا متابعين ردك على فيصل .. عن نفسى غير منزعج عن ورود إسمى فى الموضوع .. كما قال فيصل زج شوقى فى القضية كان "شورة" المعز أبو نورة .. ومباركة كاملة منى .. لوزن شوقى الذى غير محتاج هنا للتوضيح .. وأنا وفيصل إحترمنا خيار شوقى الغير معلن .. وإكتفينا بعدم إتصاله .. وعند زيارتى لشوقى لم يأت ذكر لهذا الموضوع .. ولم أخبره بتفاصيل المذكرة التى رفعناها لأمنستى .. التى قمت بكل اللمسات النهائية لها .. وأرسلتها من إيميلى .. وبالبريد على عنوانى .. وبدون إذن من الأخ فيصل أريد توضيح شيئ عن الإلتباس بخصوص الود المفقود لدى فيصل نحو د. كبلو .. لن أخوض فى وجهات النظر لأنها تظل شخصية وتخص صاحبها ولكن أسمح لنفسى لعرض الحالة كما أتخيلها وقد أكون مخطئ .. قبل الخوض فى الأمر أقول لا علاقة خاصة لى بالدكتور كبلو لكى أكايده .. بل الرجل حدث أن "تخوشنت" معه يوماً تحيزاً لفيصل بوصلة أمدرمانية ديامية .. تعداها بأدب .. وأخجلنى بأدبه الجم فى بوستات الفرح والترح بمجاملتى .. إختزلت هنا فى مداخلتى السابقة وصفى لفيصل وأنا متأكد قد وصل تفصيلياً لشوقى بدرى .. أعود "لتنظيراتى" التى أتمنى أن تصل بدون المساس بأحد .. شخصية فيصل المتدفقة أنفة .. تمنعه الترجى أو الإستعطاف .. هو يرى أن د. كبلو وقع فى خطأ تسبب فى ظلمه .. وعليه التصدى لذلك وتصحيحه بكل السبل من نفسه .. الشئ الذى لم يمتنع عنه د. كبلو قبل أن يسؤ الحال .. نقطة تأزم الخلاف .. إحساس فيصل بأن د. كبلو يريده أن يطلب ذلك منه .. وفيصل رأى فى ذلك مذلة .. لأنه صاحب حق ولا يطلب منه فضل .. فتأزمت الأمور الى هذا الحد .. نقطة أخرى فى رسالة شوقى عن هذا الحديث الذى فعلاً يحيرنى عن مسألة خالد الكد والشيوعيين .. سأظل محتار أكثر من شوقى .. والرجلين "شوقى وفيصل" يشتركان فى صفتين .. قول الحق حتى لو كان السيف على العنق .. والثانية الذاكرة الصاحية .. شوقى يعرفه الجميع .. أوصلت يوماً فيصل بباكر مخير فى مكالمة تلفونية مشتركة .. فأذهلنا فيصل بتذكره كل التفاصيل عن الشرطة والأشخاص .. وفى يوم إتصل بى ظابط فى مقتبل العمر فى بريدى ينقل لى تضامنه مع فيصل .. نقلت إسمه لفيصل فاجئنى بتاريخ الولد الذى يقله كثيراً رتبة عسكرية .. ذكر لى بأنه كان أول دفعته .. وعندما تقدم ظباط الشرطة بمذكرة إحتجاج كانت بخط هذا الظابط لتميزه فى الخط .. وتسببت فى إحالته للصالح العام .. وعندما أخبرت الشاب إندهش وقال لى لم يتحدث لفيصل من قبل ولم يكن يتوقع أن يتذكره .. طلب تلفون فيصل وصار بينهم إتصال دائم .. فيصل دقيق الملاحظة قوى الذاكرة .. وهذا يحيرنى فعلاً .. أتمنى أن تزول الغمامة بدون تعاطف خيالى أو عاطفى .. |
أشكركم
فتحي أسامة الكاشف الابن الحبيب عثمان رأفت ميلاد النور يوسف بابكر عباس التحية للجميع أولا أنا سعيد جدا أنو أنا موجود في سودانيات . لأنو البحصل في س.اونلاين وبعض المنتديات ده شي ما أنزل الله به من سلطان . عبارة عن ناس منتظرة المشاكل ، وطبعا مش كل الناس . والبعض زي أولاد الزفة ، أول ما يسمع حس النوبة يجي جاري . وصفت فيه ب "المشاطة" وأشياء لا يعلم بها إلا الله . اليوم في الصباح عرفت من الشيوعي والمناضل حسن محمد صالح بأن الأستاذ فيصل قد قبل تدخل دكتور صدقي كبلو الذي كان يرفضه في الأول . يعني زي زول عايز يعمل عجة لكن ما يكسروا البيض ؟ والدكتور صدقي مشكورا قد وافق بأن يكتب إقرار بتصحيح المعلومة التي كانت مغلوطة من قبل . وهذا الاقرار سيكتب للمحامي السوداني الشيوعي المتولي القضية في سويسرا . أنا لسه متحير ليه دخلوني في الموضوع ده من الأول ؟ . ما فهمته أن الأستاذ فيصل عايز الدكتور صدقي كبلو يساعد لكن هو ما حا يطلب منه . الحمد لله علي كل حال القضية في طريقها إلي الحل. يا فتحي يا حلبي إنت قريت جامعة في الخرطوم ممكن نقول إنك قريت صحافة في براغ بالشيكي ؟ يمكن ما فهمت الفرق بين المضارع والفعل الماضي ، يا أخي أنا قلت عشان كده وقفت من المنبر العام يعني مش حا أقيف . والمنبر العام ده في س.أونلاين . أنا يا فتحي يا أخي أفوت أخليكم وين . ودي الوكت أنا متأكد أنو سودانيات حاجة معقولة وحلوة . والأستاذ فيصل بارك الله فيه حاول أن يفتنني مع صدقي كبلو ؟ وعندما شتم الناس شوقي بما ليس له لزوم لم يتكرم بأن يوقفهم وهو صاحب البوست ؟ بالنسبة لي فإن فيصل رجل جيد . يكفي فقط أنه صاحب رأفت ميلاد . التحية شوقي |
ولكى لا نغلط على الآخرين توقفنا عن الكتابه فى المنبر العام ...هذا آخر ما اكتب فى هذا الموضوع.
التحيه هاهاهاهااااا:D:D:D عليك الله تفتكر كان جبت سيبويه ذاتو حيفهم غير الأنا فهمتو.. أنا احتجيت علي : هذا آخر ما أكتب في هذا الموضوع وما تقول لي فعل مضارع ولا فعل ماضي..انت قلت عشان ما نغلط علي الآخرين ودي ما فعل ماضي ..دا رمز للمستقبل..بعد كدا قلت توقفنا عن الكتابة ودا فعلا فعل ماضي لكنه غير محدد الحقبة الزمنية هل من سنة ولا من اسبوع ولا قرار اتخذ من ساعات.. بعدين المنبر العام دا ممكن يكون هنا برضو لانو دا برضو تابع للمنبر العام ولو انو اسمو منتدي الحوار.. بعدين انت ناسي اني 4 سنين كنت شغال محرر أخبار في اذاعة راس الخيمة ولا كنت بكتب النشرة بالتشيكيgoood المهم يالعرندس أنا مبسوط انك عبرتنا وجيت كتبت وغايتو الحلبي تعبان معاك تفط الناس كلهم وتديهو هو بس علي راسو:D:D:D |
اقتباس:
التحية/ عثمان الطيب |
| الساعة الآن 12:53 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.