محـــن شــوقى بدرى وبركة ساكن ( 1)
اهلنا السودانين ديل حقيقه احلى ناس ممكن يكونو فى الكورة الارضية من نواحى كتيرة ، ومنها الكرم الفياض ، والوقوف بقوة وراء ود البلد فى حالة انهم خارج الوطن ...بالاضافة لى حاجات كتيرة رغم مايغلفه من غلاف ، الا انها جميلة فى قرارة مضمونه ، ومن اهمها البساطة والتلقائية مع شوية (قندفة) بحسب دواعى الحال ... وتعريف (القندفة ) لغير الناطقين بلغة مثقفى البادية هى تلك الحالة التى تركب احدهم جراء بعض نعم الله البتكون المت بيهو كحالة جديده بتخليهو يتميز من الوسط الحوليهو ..كان يكون ارتفع درجة بالتعليم ...او حباه الله مالاً او مركز ميزه عن من حوله .. وبذكر القندفة اذكر حكاية حكاها لى الوالد ربنا يديه الصحه وطولة العمر ، بعد ماسالتو عن مصطلح القندفة ..قال لى انو زمان كان جدو بشتغل مع عمال السكة حديد ، واسمهم عمال الدريسة ، وهم الموكل ليهم صيانة خطوط القطر ...اها جدنا الله يرحمو عندو شوية افتراء جابهم من شنو الله اعلم ، المهم حسب حالتو وحركتو مع العمال وحب السلطة وحماسو قام الافندى المسئول منهم ميزو بان عينو مشرف على بقية العمال ، اها دى طبعا زادت الطينة بلة ..وبقى جدى يقعد هنااااك وشايل عصايتو وشى كواريك وشى حاجات عجيبة ، وقال ليك حتى مشيتو فى الواطة اتغيرت ، وطريقة كلامو ... وطبعا نتيجه للترفيع ده ، كل يوم يرتب ليهو ربع لحمة عند الجزار ويجى غاشيهو ويمشى لى حبوبتى تحمرو ليهو بالبصلة وده كنوع من الاشعار لى ناس الحلة البشمشمو انو القبة تحته فكى وماساهل ..واعملو حسابكم ...وطبعا جدى كنوع من الاعلام وعشان يقيس ويستمتع بحجم الدهشة فى عيون اصحابو ، بقوم كل يوم يعزم واحد فى اصحابو على ربعو ده ، وكانو بتبارو على الشغلة دى ويحاولو يتقربو ليهو بشتى الصور ... الا ان جا اليوم الشالوهو من منصبو الرفيع ده ، ورجع لقواعدو ، ولى حرفة قراصتو بالسمن والسكر ، وطبعا اصحابو بقو يشتغلوهو بكل الوسائل فى شماته بائنة ، واحلى تعليق لمن سألو واحد من اصحاب الحظوة والاتعزم مرتين تلاتة على شية جدى ، لمن قال ليهو ...هسع خلاص ؟؟ يعنى تانى (الشِننننن :D) وبقصد صوت اللحمة فى الطوة – تانى مافى ..!!! مع حرة من يدو يحاكى بها حركة الطوة فى النار !! ومن هنا وبالافتتاحية دى دايرة اهبش الزول الجميل ، الكتااااب عمنا شوقى بدرى ، ومايفهم انى قاصداهو بالقندفة ، بس بشى قريب ليها ، وماهو براهو ..معاهو مجموعه كتاب كبار معانا هنا فى المنتدى ذى الجميل صاحبى بركة ساكن .. ودايرة من هنا اوجه ليهم صوت لوم ، ليه مابداخلو مع بقية الاعضاء فى مواضيعهم كنوع من الحراك والنقاش الممكن نستفيد منهم ومن خبراتهم فى مجال الكتابة او الحياة عموما ً ...!! انا طبعا ختيت ليهم 10 اعزار بس !! ولقيته كلها مابتديهم الحق فى انو يبخلو علينا ببصمتهم معانا فى مواضيعنا ، وبقول احتمال هم شايفنها دون المستوى ! طيب لو كده مايوجهونا ! يعنى ياعم شوقى الشغلة فى النهاية سيك سيك معلقه فيك !! طبعا ياعمنا واستاذنا شوقى عشمى فيك هو الشجعنى صراحه انى اهبشك بالموضوع ده ، وثقتى فى فهمك الراقى بانك زول بسيط وجميل وده نابع من خلال معطيات اتوصلته ليها لانو من المداومين على متابعة كل ماتكتب سوى فى الاسفير او الصحف ، ببقى بحسب المرجعية الجواى انك لازم تكون زول ( حقنا ) ،وحقنا دى بمصطلح الراندوق البسيط انك زولنا وعندنا حق كبير فيك .... فيااااخ ماتبقى زول بعيد عن متناول ايدينا .. شفتة كيف !!looool |
طبعا ياعمنا واستاذنا شوقى بدرى ، والزول الفنان التانى داك بركة ساكن ، دىالمحنة الاولى :D
وستتوالى المحن تباعاً ، كمتواليه مثل متوالياتك البننتظرة بفارق الصبر ، حتى وصلنا لى قناعه انو السودان ده كلو محن تحيّر !! وحتى محنة تانية ....اقعدو عافية |
يا سمراء دا شنو!
نحن ما صدقنا انو الناس ديل رضوا يقعدوا معانا في بكان واحد! نحن والله يا سمرا نحمد الله صبح وعصر انو الجماعة ديل قاعدين يخلونا نعلق علي كتاباتم... كنا وين وبقينا وين! البتقولي فيهو دا عندو إسم واحد: دا طمع.... |
محن شوقي بدري (2):
مرة مشيت مع أخت صديقي لتسجيلها في كلية الأحفاد للبنات قعدتها في كرسي برا و دخلت مكتب المسجل للإجراءات... عميد الكلية يجي يلقى البت قاعدة برا المكتب و عرف انو أنا قاعد أعمل ليها في الإجراءات جوه المكتب، بقوم يناديني و يمسح بي الواطة... جنس الكلام بتاع إعتماد المرأة علي نفسها.... تعليم المرأة و لب ...لب.... كلام كتير و بعد داك طردني من الكلية.... سألت الغفير الزول دا منو؟ قال لي يعني ما بتعرفو؟ ما بعرفو انت كمان داير تبستفني؟ - دا ود بابكر بدري ديل و أولاد أبو سن لا بخافوا و نفسهم عاجباهم عجب شديد.... و الله الزول دا لما طردني الزمن داك أنا كنت بعتبر نفسي في السودان زول محترم... عشان كدا ما شايفاني مداخلاتي مع شوقي بدري مهذبة كيف؟! هو قاعد يكتب عتالي سابق لكن برضو انا ما مطمن للقصة دي! |
تعرفي يا سمراء مرة ... وأنا طالب في السنة الأولى في الجامعة اشتركت بقصيدة في برنامج بدون عنوان في فقرة المواهب ديك
وجاء سعدالدين إبراهيم ليعلق عليها في صحيفة ظلال - كان رئيس تحريرها - وعليّ ( أسماني الشاعر البرعم ) وقال كلاما جميلا وكثيرا علي وعلى القصيدة ... وبشّر الشعب السوداني البطل بمولد شاعر في هذا المنعطف التاريخي الذي تمرّ به البلاد ... وكتب أن عليّ أن أذهب إلى اتحاد شعراء السودان سأجده قام بتزكيتي لهم ... وأنه يأسف جدا لأنه جاء متأخرا فلم يحفظ اسمي كاملا لذا فعلي أن أذهب إليه معرفا ... حتى يسهم في دفعي نحو شنو وشنو وشنو المهم قابلته بعدها بأشهر في استقبال التلفزيون ... فخبيت نحوه مصافحا ومعرفا (بالشاعر البرعم ) الذي نوّه عنه في ظلال فنظر إلي من فوقي إلى أخمص صليبي ... ومضى دون أن يفتح فمه بكلمة أها والبرعمة الدخلتني ما مرقت دي مش محنة أسي ؟ أما الأستاذ شوقي بدري فهو من اكثر الناس حميمية في ردوده على الناس ولكنه كثيرا ما كان يعتذر ببعده عن تقنيات الكومبيوتر ... ليته يتداخل فنستفيد جميعا بركة ساكن ... علاقته بالمنتدى تبدأ بما يكتبه من كتابات باهظة القيمة ... نرجو ألا تنتهي بها ... فحتما قامته ستزيدنا طولا لهما حبي الفد واحد ... أما بخصوص مسؤول شؤون الأعضاء ... فبسم الله ما شاء الله ... بابكر عباس ... وجودك في البوستات يزيد فائض قيمتها يشهد الله |
اقتباس:
موش قالو لو عشقته اعشق قمر ولو سرقته اسرق ....ناقة :D اهو نحن اسع بنعشق لينا فى قمر ياخ وعشمانين فيهو انو يدينا من قبسو . ان شاءالله شعاع ..!! |
اقتباس:
ثم انو والله برضو احترامك مقبول فى هكذا مواقف ! واكيد مابتنقص منك شى .. بس النصيحه عمنا الجميل ده زول من خلال سردو زول حبوب وود بلد وكونو يكتب انو عتالى سابق ، فده من تواضع نشأ وتربى عليهو وده انا بعتبرو درس براهو .... |
اقتباس:
بالجد محتاجين لى رايهم ويدونا شوية من الفى راسهم ده ! اقلاها نستفيد من نقاشهم . اقتباس:
|
الله يعدلا عليكي يا سمراء والله مسكتيني درب من زمان كايس لي فيهو فرقة ما لاقي صارها بس ما عارف أكبها كيف ، إنتي عارفة يا سمراء بفكر في الحتة لي زمن كل ما أفكر فيها بتذكر كلام عمنا شوقي ده بعمل نايم.
اقتباس:
اقتباس:
والله من عشمي فيك يا عم ما تاخد على بالك |
اقتباس:
لاحولاااااااااا الكلام ده جبتو من وين ياعثمان !!! :eek: اقتباس:
ده كلام بقنع الزول عديل والله وياعم شوقى بعد كلامك ده اعتبرنى عزرتك فوق اعزارى ال10 ديك ، عزرك الكتبتو فوق ده ياخ انا اتارينى ظلمتك ظلم الحسن والحسين ، دحين امسحه لى خالد الحاج فى وشو وبالعدم النور ولا عكود :D |
طبعا زودتوا الموضوع شوية
اولا انا لست من الناس الكبار، اطلاقا وفي الحقيقة كلكم عارفين الكلام دا، عمرا قد اكون عجوز شوية، ولكن المقامات هي هي، وعليكم الله خلوني معاكم، و سنة سنتين ما بين الأخوان. واما استاذي و حبيبنا الحكاي الجميل،الأستاذ شوقي فهو اكثر الناس تواضعا في هذا الكون الكبير، ونعرف عنه الكثير الكثير، ولو لقي وقتا لا اظنه سيبخل الموضوع التاني، لما قرات محن الأستاذ شوقي مسخت لي محنتي الخاصة ولدي موضوع منشور على أحد الأسافير بعنوان محنة الكاتب السوداني، وكنت عايز انشره في سودانيات، ولكن الآن لألألأ؟ على ما أظن لديك نسخة من المقال يا سمراء؟ انا سعيد بيكم وفي الأيام دي عندي انترنت وما مخلي مكان إلا كتبت فيه سمراء الجميلة اسامة، بابكر عباس لكم الود و سوف اكون معكم لأنني منكم |
اقتباس:
تحيات كتاااار ياراقى ، والمقام محفوظ ، وحقيقه نحنا كشعب معروفين بالفطرة ناس بنعشق الكلمة المدوزنة الراقية ، وبنتحسس كل مواطن الجمال فى اى مفردة ، وبنسعى دائما للاستاذة من المعرفة فى مجالات الكتابة بشتى اشكالها القصصى والشعرى وخلافه ... عشان كده بندى اى انسان حقه ومستحقه ، وبظهر ده فى شكل توقيرواحترام ، وعرفان بالجميل لذلك الاهداء الذى ينفحنا به ، واستاذنا شوقى بدرى من هؤلاء الناس بمعيتك انت الذين ندخر لهم و افر التقدير والاحترام ، وممنون لما يرفدون به ساحاتنا من احرف ...ايمّا منْ . وبمناسبة المحن ، ياريت لو اكرمتنا بتلك المحنة ، حتى تحل محنة الكاتب السودانى ، واقلاها نحس انو فى محنة اتحلت :D مشكور يابركة على الحضور ...وياريت ماتحرمنا من وجودك .... |
الابنة سمراء
تحية طيبة سأعود لك وهذا وعد . أمر بمحنة الاهتمام باربعة أولاد أسهلهم أسوأ من شرامة العباسية . ومررت بمحن أخري . لكن في هذه الأيام القادمة سوف تحل هذه المشاكل وسأعود لك بكثافة . تحية عمك شوقي |
اقتباس:
اها ياعمنا شوقى ، ده محنة من محنى اسع اتفكت بدخلتك دى ، واشكرك عليها ايما شكر ربنا يحلحل محنك ومايخلى ليك محنة ..غيرى !!:D وربنا يخلى ليك شرامة العباسية ديل (ياريت تكتب لينا عن شرامة العباسية برضو ) ياها حالتهم ياخ ...نسوى شنو ؟ الشكية لله :( ياقول الخال |
يعني انا بصراحة اول ماجيت اتداخلت ذات مرة مع عمنا شوقي ولما مارد لي تاني مافتحت ليه بوست من يومها
ياريت عمنا يمد معانا جسور تتيح لينا الاستفادة منه ويورينا رايه في حديثنا من خلال مداخلاتنا مادام انعم علينا بوجوه بيينا خلال حكيه الجميل وله منا خالص الود |
| الساعة الآن 10:29 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.