السودان وعجائب الدنيا السبع
 

السودان دا والله بلد عجيب جدا فيهو حاجات ممكن تدخل عادي في عجائب الدنيا السبعة مع انو العجائب الفي السودان اكتر من سبعين مش سبعة يعني ابسط حاجة تلقى الناس بتقول كلام على اساس انو مسلمات وهو كلام ما عندو اى علاقة بالواقع يعني مثلا امسك اى واحد من الشارع قول ليهو رايك شنو فى دكتور الترابي اول حاجة حا يقول ليك يا سلام دكتور الترابي دا مفكر اسلامي كبير وعندو اسهامات كبيرة في الفكر الاسلامي ويقعد اقول ليك حاجات كتيرة في الترابي حتى الترابي زاتوا ما يكون عارف الحاجات دي كلها فيهو لكن كان قلت ليهو كدى يازول اقعد في الواطة دي وقول لي الترابي دا فكر في شنو اقعد اتلفت ودى حقيقة يعني اسي عليكم الله الترابي دا فكر في شنو جديد وشنو الاضافو للفكر الاسلامي طبعا حا يطلع واحد ويقول ليك انت يا زول مجنون ولا شنو انت ماسمعت اراء الترابي المستنيرة في امامة المراة وحديث الذبابة ولا شنو وطبعا دا كلام فارغ لانو الحاجات دي الناس بتقول فيها ليها قرون يعني الترابي ما جاب الديب من ديلو على راي المصريين وبعدين عليكم الله البلد دي ما تحير وتجيب الضغط والسكري يعني الترابي دا ذاتو بشحمو ولحمو مش الجاب ناس الانقاذ ديل وفتح بيوت الاشباح وعمل الحرب بين الشمال والجنوب حرب دينية والناس صدقت ومشت الحرب وماتت والناس اقولو ليك شمينا ريحة المسك وحاربت معانا الملائكة وكلام كتير كدا معقولة بسانو الترابي دا اطلع من السلطة وبقدرة قادر ابقى سيد المعارضة وصوت المعرضة والحكومة ما بتخاف من المعارضة الشمالية الا منو يعني الحكومة بتعارض في روحهاالمشكلة وين انو لمن الحكومة تعتقل الترابي تلقى المعارضة زعلانة وتطلع مسيرات وتعتصم في دار المؤتمر الشعبي ولمن تسالن يقولو ليك انحنا ضد الاعتقال من حيث المبدا لانو ضد الحرية ياخي طيب ما اختلفنا كتير طلع بيان ندد واشجب بشدة زي ما نت عاوز اقول ليكم حاجة ياخي اطلعوا المسيرة لكن ما يكونن المسيرة طالعة عشان اعتقال الترابي تكون طالعة عشان القوانين المقيدة للحريات البسببها اعتقلوا الترابي ولا شنو ياخي خليك من الترابي ياخي في ناس لاسي تسالهم من الرئيس نميري اقول ليك ياسلام نميري دا كان راجل ضكر خلاص ياخي دا ارجل راجل في البلد دي يعني عليك الله زول زي دا شايف الديكتاتورية رجالة تقول ليهو شنو ياخي خليك من الترابي ونميري ياخي في ناس شايفة انو سفر الفنانات لنيجيريا بوسخ سمعة وشرف البلد والغريبة الناس دي بتكتب فى الجرايد والاستاذ مشى والاستاذ جا والاستاذ قال والاستاذ سوى كدى يا جماعة اصلا في دولة في الدنيا دي كلها عنددها شرف ولا سمعة انا بعرف الدول عندها تنمية ومصالح مشتركة مع باقي الدول وبس يعني انا اسي كان الدول عندها سمعة وشرف ولقيت واحد جاي من دولة مش ولابد من ناحية الشرف اقول ليهو يازول انت ماخايف على سمعتك ولا شنو الدولة شرفها في الواطة دى عليكم الله السودان دا ما بلد العجائب