عفوا سيدى الحلاّج ..
 

عفوا سيدى الحلاّج ..

كلابك والأفاعى الحايمة
من روتانا لامواج
كاوَرَت البلد بحالها
ما خلّت حاجة لمحتاج
...ولا لـِقت البقولها جـَ،ر
فى ناس جعانة
ماقلبت حرِف فى صاج
ناس عريانة ما لفحت هدم فى الزيفة
ما طالت ايديها رغيفة
والسبب المعكر كيفها
دق بنوتها بالكرباج
ناس غلبانة بس دغرية
ما بتعرف تخت طاقية فى طاقية
والدين الحنيف فى شرعها الحرية
زدتها فى الحرج إحراج
تخاريف الهوى الدجـّال
...عوج شفناهو ما سمعنابو
فى قولن قال
بنات دقوها دق العيش
ولاد ما اندقو فى شبـّال
بِقـِت فى غُصة الايام
قيم غنيتها يا "قدال"
قيم شلناها عِـمّـة وتـاج
رقيص الشامة بت حمدين
وخت الحنة ليات من حضور ضفرين
ورقصة جون مع اوهاج ..


أزهرى محمد على

للقصيدة بقية

جيب الباقى يا حبيب..

ازهرى اكيد زول كتّاب و له مفردته المميزه و المتفرده..


** قصدت اشيرللبيت الذى اقتبسته فوق لان الحرف دايما من الدوكه
و ليس من الصااج...!!!
طبعا لو دا مقصود بيهو حرف القراصه,,
تسلم...

سلام يا باشمهندس ..
القصيدة جميلة بلا شك .. كقصائد أزهري محمّد علي ..
المقطع ال بالأحمر دا .. جرسو جهجه قرايتي .. فيهو خلل ما .. ماعارفو وين ..مشيت قوقل قلت ألقى القصيدة يمكن في خطأ في النقل .. ما اتوفّقت ..
كدي راجع الأصل عندك ..ولو بقى كدة .. نبّهني لأعالج ضعفي في قراءة النص ..

__

تحيّاتي ..

اقتباس:
المشاركة الأصلية كتبت بواسطة معتصم الطاهر http://sudanyat.org/vb/images/buttons/viewpost.gif

السبب المعكر كيفها
دق بنوتها بالكرباج
ناس غلبانة بس دغرية
ما بتعرف تخت طاقية فى طاقية
والدين الحنيف فى شرعها الحرية
زدتها فى الحرج إحراج


أزهرى محمد على



جميل أنت يا باش
و جميل صديقك الأزهر
جميلان أنتما !

يا سماحة
قالو الما بسد دينو
ما نامت عينو
صاحlooool

ما تتعلم لياقة صاحبك الفوق دا
وجيب الباقي
ربي يرضى عنك:mad:

طيبان
أريتك طيب؟
كدي حاول أفصل حروف الجر عن الكلمات (مع وقفة خفيفة في ألف حالا وكأنك تشرح أو تؤكد نتيجة المَكاوَرَة في البيت التالي) كما يلي:
(بحالها = بي حالْها أو حالا)
(لمحتاج = لي محتاج)

كاوَرَت البلد بي حالا
ما خلّت حاجة لي محتاج

اخونا معتصم الطاهر ..
هذا اول عهدي بك ..
تحياتي

الحبيب معتصم الطاهر

لك التحية
جيب الباقي وماتعكر كيفنا

طيبان مشتاقين وتاني متين تجينا
بالمناسبة البيت حسب فهمي في غاية الروعة
في ناس جعانه
ما قلبت حرف في صاج
والمقصود هنا هو حرف الرغيف او اي من اشكالة سواء قراصة او غيرها

فى ناس جعانة
ماقلبت حرِف فى صاج
ناس عريانة ما لفحت هدم فى الزيفة
ما طالت ايديها رغيفة
والسبب المعكر كيفها
دق بنوتها بالكرباج
ناس غلبانة بس دغرية
ما بتعرف تخت طاقية فى طاقية
والدين الحنيف فى شرعها الحرية


***

تحياتي معتصم