نفرة ليل . أبوخلود .
 

نفرة ليل .


من ليلة العتمة
الشديدة
القاجة فى نص
البلد
طلعت حزم
من ضو زمان
بتضوى بى
وهجا تعب

لى لمة من
نفرا قليل
فى سكة من
بلد الرحيل
مشروقة بوهم
الوصول
موعودة بالأسى
والأفول

تتوارى من
وهجا بعيد
تتضارى من
هبات حريقنا
الشب من نار
القصب

مرقن حريم الحلة
صاحبات أم حمد
فازعات جنوب
لابسات زراق
النيلة
كايسات الولد

شايلات مناجل
صفرا من لون
الصدا
لا لامست قشا
روى
لا طايبت كفا
تعب

والصوت من
المتر البعيد
اتدلى برجع
الصدا
شايل أنين
شكوى وجراح
والليل يصارع
فى سواد العتمة
لا نام لا استراح
والضلمة غابت
واختفت
مستحية من
نور الصباح

الاخ/ عبدالله مساعد
مساء الخير
في الحقيقة كتاباتك جميله ولكن اتمنى ان تركز على التشكيل لتضيف جماليات لنصوصك الشعريه .
وشكرا
اخوك عبدالعظيم

الأخ والأستاذ :عبد العظيم .
أولا نرحب بهذا الحضور الثر الجميل .
حضوركم أنتم وتفاعلكم مع هذه النصوص هو الجمال بعينه .
القادم من النصوص الجديدة سيرى النور بحُلة التشكيل كاملا إنشاء الله .
كل الشكر والتقدير ومرة أخرى ألف مراحب وياهلا بيك أخونا عبد العطيم .
أبوخلود .

ناضر التحايا أبو خلود

دي كتابة حية تتنفس يا جميل المقاطع

استوقفني توالي المقطعين هنا

بيناتم دلالات بارعة و موصولة

دلالة إرتباط خصوبة/عقم النساء
مع خصوبة/عقم الأرض

و إسقاطات فاتحة علي إلتقاط بديع لعمق تداخل الأشياء و تقاطعاتا في الحياة

المنجل المصقرَّ من حال جفاف الواطة

و الحال المصقرَّة من حال الجفاف من الجنا

أتفق تماما مع أبو روان في إنو التشكيل حيضيف كتير للنص
موسيقيا و نجاعة نسيج

باقي لي زي في دقداق هنا حسيتو عتَّر لي إنسياب درب النشيد

المتر لو ما خنتا ظني يا أبو خلود قاصد بيها (المِترَ) جمع (مِترَة)

و لو كدة باقي لي بتكون في تاء سقطت من كلمة (بعيد)

لأنها كانت حتجي .... المِترَ البعيدة.

اتدلي برجع
الصدي

برضو بحسها سقط منها حرف الجر (في)

اتدلي برجع
(في) الصدي


عسي أن يتسع صدرك لشلاقتي يا أبو خلود
فأخوك ليس بناقد

لكن شليق شلاقة الشافع داك :p

أستاذنا العزيز / خالد الصائغ .
لك الشكر أخى خالد على هذه الإضافات النيرة ونحن فى شوق لمثل هذه المشاركات لإثراء هذا المنتدى بدرر الحديث والأدب .
أكرر شكرى وتقديرى .
أبوخلود .

سلام يا عبد الله ، خالد..
برضو إستوقفني المقطع ده للتصاوير الشعرية المحتشده بيهو..
لكن الحته بتاعة ( لاطايبتن كفاً تعب ) تقيله في معناها وفي حسها الموسيقى شويه.. لأنو الضمير هنا في أوًل قرايه ليك بترجعو للمنجل ، فإذا قريتو ( لاطايبت) ورجعت الضمير للمنجل الصورة الشعرية بتجيك باهته باهته ، وإذا قريتا (لاطايبن) ورجعت الضمير لنون النسوه ، بتلقى إنوالجرس الموسيقى إختل..

تحياتي.