يا عازّة جَدّْ مِتْقَريِفِّكْ - راشد سيد أحمد الشيخ
 

يا عازّة جَدّْ مِتْقَريِفِّكْ

يا طالعة من حَلّقَ الهُتاف ...
تَبّرا الزّغارِيد خَطّوتِكّ
مغّسُولة بِالعرقَ الرِعّاف ...
دمعَ البِنيّات جَلّوتِكّ
صَهّراجّةَ البُقلَّ الجَفّاف
حراقة زيّ نار جَفّوتِكْ
.... يا ... جَفّوتِكْ .... يا ... جَفّوتِكْ
يا مُشّتهايّ ... دلينيّ سِكّة رُضْوتِكْ؟
وعِينيّ في عِينيكْ .. سُؤال ....
كيف نفّـرَتِكْ ... تَبّقالِيّ تُومّةْ صُحّبتِكْ؟
وكيف بيّ لهِيبِكْ أستّجِيرْ؟
بسّ ضحّكتِكْ .. ذاتْ همّبرِيبْ ....
بتّصفِيّ جُوايّ ما اعّتكرّ مِن قهّوتِكْ
والشايِقّـنِيّ فِيكْ يا (امّ خِيّرْ) كتِيرْ
يا جمّرة في عِزّ زمّهرِيرْ
يا شهّقـةْ تِسّتـنّى الزّفِيرْ
يا رعّشةْ صنّتْ في قليِبْ
تِتْخَبّى ... ويفّضَحَّا بالوجِيبْ
والبِينِيّ ما بِينِكْ رِباطّ
وعلاقة ما فِيها إنّفِراط
كعِلاقّةَ الحِـنّ بالحلِيبْ
لا غِشَاها من تالايَّ زِيّف
لا رِجَاها من تالاكْ غرضّ
ساقِيها نِيّلِك والخرِّيف
لدُعاشِكّْ.... الخاطِرّ نبَضّْ
زيّ لمـّةَ الفرّحْ القرِيبْ
العِرّقُو جُّوا الطِيّنْ قَبضّْ
و زرزُورُو ما باتَّ القَوّى
وجِنّياتُو مِتْماسكّينْ سَوّا
وبنّوُتُو عامّراتْ بي هَـوّى البلد الحبِيبْ
دا عشـمّ عجيّبْ .. دا عشـمّ عجيّبْ
عشمّ يلوِحّ من بعِيد ويسُوقّ فَراشّتِي لي ورّدتِك
دِروِيشْ اتْرجّمْ فِيكْ واصُّولْ ...أسّعَى وأطُوفْ بي كَعّبتكْ
مِتْلهّمَ الدّربَ الـمَهُّول ...ما بين صَفّاكِ ومَروتِّكْ
مُشّهادِك العَشّم البَتُّول ... أعْرِجّ و احِجّ لي سِدّرتِك
وفنايّا في عِشّقِك وُصُّول....
وكّرنِيّ عُمْرين أو يزِيدّ مِتْحقِبِكْ
مِدّفِيّ بي جمّرك وثُوقْ .. و في زِيفّةَ (أمّشِيرَ) العُقُوق
حارِسّ ضَراكْ مِتْلفِحِكْ
وعِنّْ فَجّةَ الفَجْرَّ الشُرُوقْ
جَـقّمتَا من قهّوة صّفاكْ وما زِلّتِا جَدّ مِتقّريِفِكْ.

بنّدهّه عليكِي الغِيّمة والنجمّـات وأدُوبِي:
- تِرِّيهُـو يا مطرَ التّخَـا الشّقِـيشْ نقبِلّ .. يُوتْ تَرُشّْ
تِرِّيهُـو يا نجمّ السّخَـا ... المرفُوعْ بِحُسنّ الفّالّ عَرِشّْ -
أسّدِلّ ضفايِّرَكْ للبِنّية ... اللّـيّا ...
والمنّقُوشةْ في الخاطِّر نقِشّ
أفرِدّ مسايّركْ يا وطَـنّ.... سِلِّم يوصِلّا للشَّمِـشّ
لو نشفَّتْ رِيقّا الحُرُور غَطِيها بِي ضُلَّ الرِمِشّ
وقشّقِـشْ دِيمِعاتّا الحُنّان واسّقِيها بِي كَفّك
وأمِـشّ....أمِشّ.....
أمِشّ .....
بِشّوِيش عليّ الجَرفَّ البِكِرْ
الباشِيّ نُوارُو انّبهلّ
ودهّرَابْ خرِيفّْا الـمُو سَراب
فَتّق برَاعِمّا بيّ مَهَلّ
فَتّحْ مَطَامِيرَ العَبِّيرْ
شَاشَايّة تَعزِّمْ في النّحَلّ
تَغْرِيهُو شَمّة وقُبّلتِينْ
وتَكْرِيهُو بي رَشّفةْ عَسَّل
وقُولِيها يا مَطرَ البَشايِّرْ والعَدَّل
تَرّجَانِي في الدّرتَ البِهِّـلْ ..
ألفّاهَا قُبـّالَّ المـحَّـلْ
قبُلَّ الرِهَّابْ يهدِّيها للسِّـكةْ الغلّـطْ
وقُول لِيها يا مَطرَّ البشايّرْ والعَـدَّلْ
إسّمِكْ ورسّمِكْ كان معايّ ..
داسِيهُو في حِـزّةْ هوايّ
أقْدِلبُو فرْحَان زيّ عَرِيسْ
زَافِنُو لي قطّعَ الرّحطْ.

فقّـرانْ وعدمّـانَ اللّـضّى ..
وريدِّكْ كُـنُوزِّيّ وثرّوتِي
حفّـيانْ أخُوضْ جَـمّرَ الغَـضَّا ...
وانزِفّ وأكابِّد آهتِيّ
مجّبُور أخُــبّ فُوقُو ... و أطّـا
... عرّيانْ وحُبِّكْ كِـسّوتِيّ
مِدّفِيّ بي سـدْرِّكْ غُطّـا
ولابِـّس يقّين شُوفِّكْ رِضـّى
وما عِندِّي ليكْ
غِيّرْ (شُـوبَـشّ) الحِـلمَّ النضِـيّرْ
ولو طُفْتَا بالأكّوانْ أكُوسْ ...
ما بَلّقَى غيّر ..ابزُّمُـلِكْ العُمّـرَ الفَـضّل
غِيمّتِينْ مَودّة تَحَانِنَّكْ
واهدِيكِّي هودَّجْ من غُـنّا
وهِينِيـنْ وئـّامْ ........
و(عَدِيّلة) من أبيّضْ ضمَّيرْ
و(بَنِينّة) للفَـالّ والسّـلامْ
سُومِيته في طَافُور عَبِيّرْ
و بِمَحنّة أمْسّحْ جَـفْوتِّكْ
وأهـقْدِّكْ بيّ دُعّاي وأغّنِي وأهدْهِدِّكْ
وبي كَـفّ حَـرِيّر ...
أنفُضّ وِجِيهِّك من عَوِيشَّ الصّدْ
ومن دَرنَّ المـّـلامْ ..
وما اعْتكّرّ من قهّوتِك.

وما اعْتَكّرّ من قهّوتِك
نتَاحّة في الضُرسَّ الأخِّيرْ
هلّواسَّة في عِـزَّ المـّنامْ
و النّية قِيدُومةَ الفَرّحْ ...
فتّاحةَ الشُوفَّ الضَّرِيرْ
ترّقيكِّي من ضُرَّ اللِئـامْ ...
و سُوسَّ العُقُوقْ ما يِتْلِـفّـكْ ..
ومُوجَّ العَدمّ يتْلـقَّفِـكْ ....
بَسّ خلِيّ دلّكْ وجَفّوتِكْ ...
وأصّحِيلّنا من جُوفْ غَفّوتِكْ
لأنُو يا وجَعِّي القدّيمْ
ما اتْبَدّلَ العِشْـقَ الزمّان
وما زِلّـتا جَدّْ مِتّقريِّفِكْ
... مِتّقريِّفِكْ...
زيّ بُنّ مَحَـوّقْ طِيبُو فاحّ
والنّاسْ جمِيعْ تِتّكَرَفِّكْ
وما زِلّـتا جَدّْ مِتّقريِّفِكْ
وما زِلّـتا جَدّْ مِتّقريِّفِكْ.

يا عازّة جَدّْ مِتْقَريِفِّكْ

راشد سيد أحمد
لندن مايو 2012

ياسلام على راشد وخيّتو الكاتب فوقا دي
شهّانا البلد وروابط الحِن والحليب
النبي فوقك يابلّه، تقول ليو جغمنا كليماتو ولازلنا متقريفين.

بس كدا

تأمري أمر يا أمرlooool


http://www.sudaneseonline.com/cgi-bi...355226664&rn=8

يا سلام
هذه الكتابة ترياق ضنى و فجة سهود

سلام ليك يا بله و لى راشد

تسلم يا أمير تسلم


جابتك أمر ولا تأمري
وهِن كلهن بنات عم حروف اسمك لزم
ولا دي عزة دي يا اخي
حليل عزة البقت ما بتقوم لا بلزة
ولا بلكزة
حليل عزة
القتلتنا
وماشة تتناقص أو تتراقص
لا أدري
حليل عزة


يا اخي اشرقت الأنوار

يا سلام يا سلام يا اخي
لم أكن أعرف ذلك
جميل أنها في هذه الإنسانة الإنسانية التي تمشي على قدمين
لهذا الرجل قاموسه المتين
وقدرته البارعة في حياكة الأناشيد بحبال الضوء الأمل المحبة والأماكن أيضاً
يا سلام يا سلام

وصل يا فردة
وصل
إلى حين مسارقة للوقت الثقيل...
وأكيد إني من الفائزين بما يحمل


محبتي التي تعلمين