طنّوب الشوف
دربك مارق منك من محاحاة الحروف الحامن وتلّن وركّن ومن الطارن تانى سدّن عين الوجعه والفجه علال وام غِزيّل خالتَه جِنك جداولا جاريه زى دم الشرايين فى الجروف لافحه توب الفرحة ماشه جِيهة الدوبَن غبينتك ناحية الريد المحال هاطله مطرة من تيبار سحابه صابه للقعدن رِجنّك وجاريه كابّه الغناوى والمسادير الحكاوى والطنابير المسافات والمشاوير والفجة علال ودربك مارق منك ماشى يساسق تالا فرقان الجمال الراجيه منك فرحة فزعه وام غِزيَل خالتَه جنك واتا لا هاميك نشافك ساوّى درب المويه رجعه خاتّى مقدافك مقام فوق جروفك فوق ضفافك وام غِزيّل تبقى نمّه سايله زى شعر البِنيه ام غِزيّل تبقى ضمه فى سدور أمات نديه واتا ما هاميك نشافك وتسقى فى الناس سلسبيلك البريدك والبعافك شربتن سمحه وهنيه ام غزيل تبقى نيلك وللخلوق تريانه ساهله للسمع بيك ولا شافك شبعانه مواسمك حامده شاكره نديانه ماهله ونورَه نورك جهرة فوانيسك دليلك أم غِزيّل خالتَه جنك تبقى عِينه تسقى جيهات اليباس بالمطيرات الحنينه تبقى منها تبقى منك ابقى ماشى شِدُّو سرجك فوق غُناك واملا خُرجَك بى زوادة الروح معاك وابقى سادر فى عديلك |
لغة رائعة وتركيب جيد للمفردات وتعبير صادق
مع احترامي وتقديري |
مرحب ببشارة فجر
تتوسد كل الاحلام تحياتى |
اقتباس:
المشاركة الأصلية كتبت بواسطة فتح العليم الإمام http://sudanyat.org/vb/images/buttons/viewpost.gif لغة رائعة وتركيب جيد للمفردات وتعبير صادق مع احترامي وتقديري حبابين ومراحب يا فتح العليم مشكور ياخى على الجية السمحة ومشكور على النضمى المفرح تسلم وتطيب وتسعد ان شاء الله |
اقتباس:
المشاركة الأصلية كتبت بواسطة أمير الأمين http://sudanyat.org/vb/images/buttons/viewpost.gif مرحب ببشارة فجر تتوسد كل الاحلام تحياتى صباح الخير يا أمير ومرحب بيك انت ضوء صباح جايب معاك افراح |
| الساعة الآن 12:57 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.