أنا ما بلوم الحكومة !!!!
جاء الصيف ...! وتخفف الناس من ثيابهم ..وتخففوا ..ثم تخففوا حتى كادت ان تبين عوراتهم . ثم انها الثالثة صباحا وانا راكعا تارة واجثو على ركبتى أقبلها بعنف فى غير اشتهاء..أقبلها واقبلها وأصب عليها جام ضعفى ...قبلتها تسعة وتسعون قبلة قوية ..ربما فاقت المئة أقبلها حتى تكاد انفاسى ان تتقطع ثم أبصق
صاحت بى زوجتى فى قرف ...خلاص ح تجيك لوّز دعها ولكنها يا سادة كما عهدتها تأبى ان تبل ريقنا بقطرة ماء وظلت ماسورتنا عصية على كل محاولاتى شطف الماء على الرغم من الموتور الذى يهذى زوجتى لم تعتقنى وظلت تطلب منى التوقف خوفا على حلقى وانفاسى ، تماما كما يفعل محصل فاتورة المياه الذى حلفت له بالطلاق بأن الماسورة ماهى الا مجرد قطعة حديد صدئة وعلى الرغم من ذلك حصل فاتورة المياه (تالت ومتلت ) وألا ح يشيل العدة بينى وبينكم( ان خفت يشيلو العدة ) ظلت ماسورتنا عصية على كل محاولاتى ليل نهار وتأبى ان تجود بقطرة ماء...حتى انى فكرت فى الدخول الى موسوعة جينس العالمية بعدد مرات قبلاتى للعزيزة الماسور ومن ثم التوجه الى مكتب الملكية الفكرية بحسبان انى أبتكرت طرقا فى مص الخرطوم والعزيزة الماسورة ما سبقنى عليها احد من العالمين بل انا اكثر من قضى الليل واضعا يديه على خده متوسل ماسورتنا (ان تحن مرة وتلفت لينا) أنا يا سادتى لست غاضبا من الحكومة ولم احملها المسئولية ....ما ذنب الحكومة ؟ يعنى تفتكروا ناس الموية يصحو الساعة تلاتة صباحا عشان يشوفوا لى الماسورة ولا شنو ؟ بعدين الحكومة دخلها شنو فى انعدام المويه كلو من موتورنا أبن الكلب دا !!!! موتورنا يا سادتى لا يستطيع ان يلاحق ويجارى ويبارى باقى موتورات الفريق ذات اللياقة العالية والتى تاتى بالماء من دون قبلات او مص أنا لا الوم الحكومة كلو من جارنا دا !! تخيلو جارنا دا اصلو ما بنوم ..طول الليل مساهر يملا فى البراميل والأزيار التقول بكرة موية مافى . الزول دا طابور خامس عديييييل كدا ...الموية المساهر ليها دى الا كان بعبيها فى قوارير لناس مصابع الموية وبيصدرها للخارج ...ما قلت ليك طابو خامس وعميل امريكان . اقول ليكم حاجة والله اعلم ؟ جارنا شويعى عديييييل كدا !!! مرة سمعتو بقول ان الحياة ماء أنا ما زعلان من الحكومة ...الحومة ذنبها شنو ؟ فلو انى أشتريت موتور زى الناس ..موتور ابو دشلمية حصان كان الموية جات ...حى تقولوا لى الموتور بيصرف كهربا ...ما مشكلة عندنا سد مروى والكهربا رخيييصة الخامسة صباحاً اذان الصبح أذن ...النباه الأول ...يا ارحم الراحمين أرحمنا ياربى اواصل فى مص الماسورة عسى ولعل ولا امشى الجامع ؟ الله يلعنك يا أبليس . كدى النديها مص مصتين يمكن تجيب ليها موية اتوضأ بيها بوووووووووووو ووووووش ... .كبت بت الحلال ...الموية دفرت زى البترول ..الماسورة حقتنا جبرت بخاطرى وراعت الألفة البينا يا سلالالالالام ربنا يخلى الحكومة اها بعدا كدى النملا الصهريج بالمرة واغسل الحمامات ،بعد ما املا التلاجة والازيار والبرميل بوووووووووووو كدى الناخد لى حمام كااااارب وزيادة ترف كدى النرش الحوش بووووووووووو المويه حبيبتى المويه ...اليه بتروى العطشان ... وجعلت اغنى الجمعة فى شمبات جداول الموية كاااااااااابه نسايم العذرى هااااااابه عيون لى عيون محاربه شفاه لشفاه مقاربة خليهم يقولو زى ما الناس يقول تعيش الحكومة .... صوت الموية الموسيقى جاءنى مخلوطا بصوت زوجتى .... ياراجل وكت ما قمت على الصلاة قوم امشى الشغل الساعة ثمانية جات بوووووو التفت الى ماسورتنا ووجدتها تشخر كما المصروع خير اللهم اجعله خير ...قالو الموية فى الحلم قروش كتااااار وبرضو ما بلوم الحكومة |
هههههها
هي الحكومة بتنلام ليك عويرة هي نوم نومك سااااي واحلم بالموية ام طين وسد مروي الطلع فشنك والدولار النازل النومة بتريحك شوية:D |
اقتباس:
المشكلة الواحد ينوم يحلم بالموية ...يقوم يلقى المويه مافى ...نسوى نلوم الحيكومة ...ربنا يخلى الحيكومة ..ما نحن الشعب كان جعنا بناكل كيك وباسطة |
اقتباس:
جميل والله يا اسامة الحكاية دي لو ما مشيناها بالسخرية دي الناس بتمرض أكتر مما هي مرضانة .. وهنا : اقتباس:
اتلومو والله :) تحياتي |
هسي إنت المصحيك شنو ؟؟
ما الأمة كلها نااااايمة .. نومة أهل الكهف .. لا عطش ولا جوع ولا مرض ولا بطالة بصحيها .. أسامه يا خوي نوم نومك .. نوم العافية إنشاء الله .. |
يا طارق كانديك ...شر البلية ما يضحك ...
ونحن ناس ما عايزين عصير عنب ...ولاحتى روزانا دايرين موية ...موية ياعالم ..نروى عطشنا... نزيل نجاستنا ...نتوضأ منها ..نسقى الاشجار ...مويه يا ناس ما أكتر وكان كتير علينا ...اليزرعوا لينا جوز هند ولا بطيخ بنفقش ونروى خليناها موية الماسورة دى .....ههههههههه |
اقتباس:
بحلم بى موية كتيرة وخضرة ووجه حسن وجو ربيع ... وفى الجو الربيع دا بالذات خايف الحلم يتصادر ونبقى فى خبر كان ... يازول خلينا فى سهر الجداد دا ولا نوموا ... أرقدوا عافية يا زاهر ونوموا عافية ... واروينى اروينى من ريدك اروينى |
| الساعة الآن 01:45 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.