تحضير ارواح
كنت في العاشرة من عمري عندما حضر ابن خالي من كسلا وبدأ يشرح لاخوتي كيفية استحضار ارواح الموتي. لم اكن معنيآ بالكلام ولكن تتبعته باهتمام واستوعبته تمامآ. لا استطيع ان اتذكر الآن تفاصيل كيفية عملية تحضير الارواح .. ولكن تبدأ بان تغلق نفسك فى حجرة وتضع اناء ماء اسفل منضدة وتضع صورة للميت على المنضدة وورقة تكتب فيها اسئلة للميت وقلم رصاص... ثم تغطي المنضدة بثوب كبير وتبدأ في قراءة كلمات غريبة لا معنى لها. قررت خوض التجربة واردت ان استحضر روح احد الموتى وان اسأله عن حاله الآن..... المشكلة التي واجهتني هي الصورة الفوتوغرافية، وهي ضرورية للعملية ولم اجد للميت اي صورة. |
ارسل ليك صورتي الخايف عليها يا دكتور زين ؟؟ loooollooool
انا غايتو حاجز بنبري هني قبل وبعد الرحيل .. في الحالتين ياخ انا هنا سمح ؟ تسمح ايامك يا حبوب |
قمت برسم وجه على ورقة بيضاء وكتبت اسفل الرسم اسم المتوفي وذلك
لاستخدامها بدلآ عن الصورة. عدت من المدرسة منتصف النهار ولم يكن بالمنزل احد غير والدتي. بسرعة احضرت (حلة) مليئة بالماء ووضعتها اسفل المنضدة ووضعت الرسم (الصورة) على المنضدة واغلقت الغرفة (الباب والشبابيك) وبدأت قراءة الكلام من ورقة. فجأة ينبعث صوت وضوء من اسفل المنضدة (انفجار صغير) فالقيت بالورقة واندفعت نحو الباب وخرجت من الغرفة. كانت والدتي في البرندة خارج الغرفة تجلس في هدوء ولا يبدو انها احست بشيء غير طبيعي. انتظرت حتى عاد ابن خالي وحكيت له فشل التجربة... قال لي سبب فشل التجربة هو الصورة لان الذي قمت برسمه هي صورة للشيطان وليس للمتوفي. ومرت السنوات ثم قابلت شخص سوداني له قوة خارقة وكان يقدم عروضآ باوروبا ومسميآ نفسه (شمسون السوداني)... والله يا ناصر الكلام دا جد:confused: |
أها ياعمك..
ياخ دى قصة بيكبوها بووووو بدون تقطير منتظرنك |
دكتور زين سلامات
الموضوع دا شيق جدا وكان يستهويني بدرجة كبيرة ومارسته ولكن بطقوس أقل درامية من مشاهدك أعلاه ، وقد كتب القلم الرصاص في إجاباتي التي كنت أسألها مباشرة ، إجابات بعض قريب للحقيقة وبعضها مبهم وبعضها كنت أحس بتأثيري عليه احكي ليك طرفة مرتبطة بإحدى التجارب كنا في القضارف لتجهيز أعمال حفل تجاري للفنان صديق أحمد دعنا لأسبوع ثقافي كنا نحضر له في رابطة مروي بجامعة السودان ذهب زميل لنا قبلنا بأسبوع للتحضير ، وحين وصولنا للقضارف فقدنا أثره تماما (جاتو ملاريا ورقد عند جماعة أهلو وطبعا ماكان في موبايل ولا أي وسيلة تانية) وما عرفنا نعمل شنو ، نمشي من الصباح نفتش ونرجع آخر اليوم لي قطيتنا الشهيرة نخستك كان معانا قريب لي متابع معانا الموضوع ومهموم بيهو جدا ، كل يوم يجي يسأل ويمشي يفتش بي طريقتو ، ومافي نتيجة وانا كت لما نرجع البيت المخصص لينا بنفرد في غرفة مظلمة وحارة ومليانة عفش ، عبارة عن مخزن هي ، وباقي الشباب في القطية كت بستمتع جدا بتجربة التحضير دي بعد خمستاشر يوم زميلنا طاب وجا السوق وعرف انو اصحابو جو وبيفتشو فيهو ، وقريبي عرف الخبر وجانا طاير في البيت عشان يكلمنا لما وصل البيت انا كت في مخزني ، وبالشورت بس ، وحر وعرق مبالغة ، وضلام كلم الشباب بي صوت عالي وانا سمعتو ، وسأل مني قالو ليهو في الأوضة التانية ، وجاني جاري بحماس شديد شايل البشارة فتح الباب وقال لي يا اسامة لمينا في وليد انتبهت لي انو زي رجع لي ورا بعد شاف المنظر دا ، زول عريان وماسك قلم رصاص بطريقة غير المعتادة ، على ورقة لا تكاد ترى ، وحر وعرق شديد ، وضلام ، وصمت مطبق ، لما حسيت بي خوفو اتلفت عليهو وقتليهو بي ثقة شديدة عارفو قال لي عارفو كيف يا زول انا يا دوب لاقيتو وجيت هنا - مع خطوة محترمة للخلف - عاينت ليهو في عيونو بغضب مفتعل وقتليهو - طيب وأنا هنا بعمل في شنو ؟ وزولك على اليمين فد جرية جابوهو من قريب الصومعة دا بوست ممتع وبجيهو بانتظام تاني |
د. زين
طاب يومكم انت وضيوفك هنا الجيلي اسااااكه معاوية بالدرب العديل يا حبوب .. ما تشتغل ببداية مداخلتي الفوق دي ... كانت مجرد مزحة والله لكن حقيقي الموضوع ده مستهويني شدييييد فاتتني جلسة تحضير روح واحمد من امراء المهدية قبال كدي الجلسة كانت في الموردة والزول الدعاني للجلسة دي ما اداني اسم صاحب المنزل الحتقام عليه الجلسة مشيت حمت الموردة دي شارع شارع اقلاها القي عربيتو واقفة وفعلا لقيت عربيتو واقفة جنب كشك بسط الامن الشامل الواقع غرب سوق الموردة سألتهم يا اخوانا سيد العربية دي قال ليكم ماشي بيت ناس منو طبعا عاينو لي من فوق لا تحت وانا غباري لاحق رموش العين حتي اتبرع واحد وقال لي ما عارفنو والله .. لكنو دخل علي الزقاقات دي انتظرتو جنب العربية لغاية بعد صلاة العشاء واول ما شافني عيونو ديل حممممممر قلت ليه انا من العصر بفتش عليك ياخ ركبنا العربية وحكي لي بإنو الفعل بتاع تحضير الارواح ده واللهو اصلا ما كان مصدقه .. الليلة حصل حقيقي ياخي خليتني استرسل في الفاضي تعال كب الحكاية دي كلللللها هني علي قول الجيلي ياخ |
يا دكتور زين ما تجي هني ياخ
روحنا دي ما أنسلت ومرقت عدييييييل كده ياخ أبقي تعال كُب العندك يا حبيب فوالله انا في شوق للآتي من حكي |
اقتباس:
بس الويك اند مشغول في المستشفي.... امبارح السبت نادوني للمستشفى الساعة ٧ مساء وظللت بها حتى الخامسة صباح الاحد ومعظم اليوم نايم والخوف ينادوني تاني. قصة شمسون حاحكيها ليكم. |
اقتباس:
سلام يا الجيلي ياخي القصة دي حصلت زماااان وانا شافع صغير عشان كده احداثها ما بقدر اتذكرها كلها لكن لو كنت كبير او واعي شوية لما قمت بتجربة لتحضير روح ميت ..... واذا لم يحدث الانفجار الصغير لكنت نسيت هذه التجربة. وبعدين انا زول علمي يمكننى ان افسر كثير من الاشياء الغريبة والخارقة وارجاعها لموجات كهرومغناطيسية وتذبذبها. حسع شوف عادي الزول يتكلم صوت وصورة مع شخص يبعد عنه الاف الاميال وهو كان بمثابة الاستحالة قبل ٣٠ سنة. كل العالم من نبات وحيوان وجماد يتكون من وحدة الذرة وجميع الذراتلاي مادة مكونة من الكترونات وبروتونات ونيوترونات، فاذا ارجعنا المواد لاصولها فسيكون الكون عبارة عن الكترونات وبروتونات ونيوترونات. وسيأتي اليوم الذي يعرف فيه الانسان ما بداخل الالكترونات والبروتنات نفسها. |
اقتباس:
سلام اسامة الاطفال تقول ليهم اي كلام يصدقوهو.... والموضوع انا تقريبآ نسيته لولا حدوثه مرة اخرى بعد ١٤ سنة من الحادثة الاولى. |
طيب قصة شمسون بعدين أرجع للنقة
|
اقتباس:
SAMSON (شمشون) ذكرت قصته في التوراة وتقول القصة بان الرب بشر والديه وارسل لهم ملاك يخطرهم بان الرب سيرزقهم ابنآ وسيكون له قوة وعليهم عدم حلاقة شعره وان لا يشرب الخمر وسيخلصهم من الفيلستين اعداء الاسرائيليين احفاد يعقوب...... وقام شمشون بزيارة مناطق الفيليستين من سكان جنوب الشام (غزة) ووقع في حب امرأة فيليستية اسمها دليلة وهي التي كشفت لاهلها سر قوة شمشون وانتهت قصته بهدم المعبد عليه وعلى اعدائه. ------------------------------------------ شمشون السوداني من مدينة عطبرة وكان ذو قوة كبيرة يستطيع ايقاف شاحنة متحركة او يدفع قاطرة او يرفع حمار على كتفيه وكان يقدم استعراض لقوته بالمدن الاوروبية. سألته عن سر قوته فقال لي انه بعد ان يستنفذ كامل قوته البشرية في ايقاف الشاحنة تأتي فجأة قوة لا يدري مصدرها وتقوم بالدور الاكبر في انجاز عمله. قال لي انه يعتقد ان القوة التي تساعده هي قوة روحانية وهو لا يعرف مصدرها وقد تكون اتت له عن طريق بعض اجداده من الصالحين. وهو الآن يبحث عن الطرق الصوفية ويحاول التقرب منهم. ذكر لي ان له موعد في المساء لزيارة اخوان الصفا بمدينة بحري. |
اخوان الصفا جماعة فلسفية اهتمت بالعلوم والفلك والرياضيات.. وحسب
علمي ليست جماعة صوفية، فقلت لشمسون ناس بحري ديل بعملوا في شنو اقترح علي بان اذهب معهم لزيارتهم فوافقت. عند وصولنا لاحد المنازل تعرفت على صاحب المنزل (مهندس زراعي) ومعه احد الاشخاص وكان يتحدث مع المهندس باعجاب وانبهار بالشيخ الذي كشفه وعرف انه البطيخة التي اشتراها بالامس طلعت حلا وحمار. كنا مجموعة من ٧ اشخاص نجلس في صالون المنزل وبعد مراسم الضيافة قام المهندس واحضر طاقية مدعمة باسلاك لكي تحتفظ بشكلها ووضع قلم رصاص في مقدمة الطاقية ووضع وورقة بيضاء اسفل الطاقية وذكر الرجل (بتاع البطيخة) بانهم سيقوموا بتحضير روح الشيخ (المرسي ابوالعباس) المتوفي بالاسكندرية وان المهندس الزراعي هو الوسيط الروحي. بدون مقدمات قال المهندس اصمتوا لانه يشعر بان الروح قد وصلت فبسط كفه ووضعها تحت الطاقية بينما وضع زول آخر كفه علي الجانب الآخر من الطاقية. بدأ المهندس في تحريك الطاقية بحركة تشبه (الرجفة) واثناء تحريكه للطاقية تظهر شخبطة قلم الرصاص على الورقة. كان تركيزي منصبآ على كيفية تحريكه للطاقية ليكتب بقلم الرصاص على الورقة ... يعني عملية استهبال. واستمرت الكتابة لمدة تزيد عن ٥ دقائق. ------------------------- والله يا رأفت ما بحب التطويل لكن انا بطيء في الكتابة فاوعدك بكرة ننتهي من القصة. |
فجأة تطير الطاقية باندفاع شديد نحو سقف الصالون ثم تنحرف من السقف
لاتجاه الحائط وترتد مرة اخرى نحو السقف ثم الحائط ويتكرر تحرك الطاقية بقوة في جميع انحاء الغرفة (الصالون). وقف الرجل الذي كان يساعد الوسيط في تحضير الروح وبدأ في ترديد آية الكرس ثم فتح المصحف (مصحف صغير اخرجه من جيبه) وبدأ في قرأءة سورة يس. وقف شمسون واتجه نحو الطاقية محاولآ الامساك بها وبعد عدة محاولات قبض عليها بيديه بشدة ولكن لم تهدأ الطاقية واخذت تدفع به من اتجاه لآخر ثم توقعه أرضآ واستمرت هذه المعركة لعدة دقائق وشمسون ممسكآ الطاقية وملقي على الارض. ذهب رجل آخر لمساعدة شمسون وبدأ في تقبيل (بوس) الطاقية ويتحدث معها ويقول (معليش يا شيخنا ..اعفي لنا) فهدأت الطاقية بعد فترة. كنت طوال الجلسة والمعركة جالسآ في مكاني وشاهدت دم يسيل من كف المهندس نتيجة جرح تسبب فيه احد سلوك الطاقية عند انطلاقها. == انتهت القصة== |
اقتباس:
الحبيب زين ...اولا شمسون شاهدته فى سينما النيلين فى الديوم الشرقيه ..فى احتفال كان يحيه مجموعه من الفنانين ومن ضمن راقص شهير لااذكر اسمه الان.. اما بالنسبه لتحضير الارواح ... فالامر فعلا مشوق ..ومدهش ...باقى بس نصدق ..لانو وحاتك ده كلام مابخش الراس ...والغريبه انه موجود عند الخواجات برضه . |
| الساعة الآن 01:09 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.