بهدلة السودانيين في الغربة
أكتر جنس متبهدل في الملبس
جاي هسة من صلاة العشاء صلى جمبي عمك شراباته الاثنين مخرومات واصابعينو برة أنا لبست شرابات مشرطة لامن قلت بس لكن يوم واحد مافي زول شافهن .. يجي وقت الصلاة بملص الشراب قبل الجزمة يعني في سرعة البرق بتحشر جوة لا من شاف لا من دري المحيرني زول مغترب في السعودية ما عندو 3 ريال لي شراب !!! معقولة بس ! طيب المقعدو شنو ؟ وقوووول عذرناهو في عدم الشراب لو كان ملص فضيحته دي برة زي كل الخلق مالو ؟! كلنا صلينا حفايا ما عندي أي تفسير غير إنه الراجل دة مبهدل خلقة والمشكلة ما براهو .. كتيريييين يلاقوك بي جلاليب ومرات عراريق وسخانة وريحتهم ترمي الصقر .. والوسخ دة مع الأسف ما شفته في جنسيات تانية |
سلام عبد السلام،
ما في الغربة بس، حتى في السودان. ذكرتني بوست كنت كتبتو قبل سنين يهبش نفس الموضوع، السوداني بين المظهر والجوهر والشغل الدراش كدي اديهو طلة، وبرجعلك. |
سلموتي
سلام ولي ناسنا الزمان سلام للنذاكة والنضافة الكانت عنوان سلام لي أيام الواحد قبل ما يمرق من البيت كان نص ساعة في السوآك، الحلة كلها تعرف، فرشة ومعجون وفرم للسان دش بي صابونة "فنيك" ودش بعده بي كلونيا (4711) عبيرها يعبق ويملا المكان جلابية سكروتا ولا بنطلون مربوط بي حزام مع الجزمة توليفة الوآن دآ الكان زمان.. حسي في (تنكر ميآ) جلابية المفروض بيضاء لونها حسي يزغلل للعيان الزراير مفتحة ومن تحتها بنطآل زيادة في الآذى للعيان... والله يابا مرض... لآ سيداتنا يديهن العافية!!!! بالله عليك الواحدة تكون بت الخرطوم تلاقها لابسة دون تناسق الوآن بس المهم؟! الدهب مردومة بيها آطنان.. الناس التانية غيرنا آكان رجال آكان نسوان يومين تلاتآ في دآ المكان،، يمسحوا ليك المولات ويشوفوا المناسب ويقشروا بيهو بمناسب الآثمان... يا آخي واحد صاحبي ليهو هنانا 20 سنة يومتها مرقتا معاهو مشيت أشتري ليا عدة من المول وبالأخص "إيكيآ" وحاتك حلف أنه دي أول مرة دخل المول دآ وماكنن عارف أنه في حتت بالشكل دآ.. صاحبنا ميسور الحآل وقادر بس يآهو (سوداني) بجيك أحكي ليك تجربة خاصة... آآآآآآآآآآآآآآآآآآآآآآآآآآآآآآآآآخ بس خليها سآكت :cool::cool::cool: |
قريت البوست بالكامل لحدي الصفحة 13
بوست مدهش فعلاً وفيه كل الكلام الكنت عاوز اقوله المدهش فيه إني بكتب وانا ملاوز وفي بالي كمية العالم القامت فيني في واحد من المنتديات قبل كم سنة كدة لما ظهر موضوع استقدام شغالات سودانيات للسعودية وقلت ليهم so what! المشكلة وين في إنه السودانية تشتغل عاملة منزلية أو في إنه العاملة المنزلية السودانية تلقى فرصة اغتراب ؟ كل العالمين دي قامت فيني كرامتنا وعزتنا وبطيخنا بالإضافة لكمية الواتسابات الحايمة حول أي خليجي يشكر ليه سوداني .. تلقاهم شايلين الاسكرين شوت ويعرضوا بيه نحن أكبر شعب ماخد مقلب في نفسه البوست هبش حتت حساسة كتيرة جداً ما انتبهت ليها إلا في الغربة 1- كيف تسوق نفسك 2- كيف تكتب سيرة ذاتية 3- كيف تهتم بمظهرك 4- كيف تتعامل مع معاينة الوظيفة 5- مهارات خدمة العملاء 6- مهارات الكلام مع الآخر ودي كل واحدة فيهن محتاجة كتب وبوستات لكن بالتجارب الناس بتتعلم اكتر |
عارف يا بابكر مخير
بعد وفاة ابوي الله يرحمه شلت أكتر من 10 بدل كاملة بي كرافيتاتها من دولابه وزعتها على المساكين في الجامع ما كنت متخيل إني في يوم من الأيام حأحتاج بدلة وحاتك هسة عندي بدلة واحدة وبفتش فرقة اشتري غيرها ناس الحلة بقولوا على أبوي متفلقص بسبب البدل دي وهو تربية انجليز شايف إنه مدير مدرسة مفروض يكون لابس فل سوت |
إطاطرتا وعملت ليا "كفتيريا"
قلت نعمل حاجة توري أننا (السودانيين) ناس (ذوق وتذوق) ما صرفتا فيها كتير، لكنها وبجميع المقاييس "ظريف" ووالله دون مبالغة، خدمة أربع نجوم، أكل حق الأمهات (تسبيكة ولحم في الطبخة على مزاجك).. تكنلوجيا للآخر.. طباخ بي شهادة وخبرة فنادق 5 نجوم والجرسونات بنات أقل واحدة خبرتها 4 سنينن في كفتيريات "مولات"... تعال بس أقعد دقيقة وأسمع.. لا العجب ولا الصيام في رجب بالله واحد صديقي وخفيف دم... لآحظ ضعف حضور الزبائن وبالأخص السودانيين...قال ليا: بابكر جيب ليك شوية صراصير فكهم في الكفتريا وأترم "الجبنة" والفناجيين وآهتك الكراسي والحيط كدآ اديها شوية سكن،، حتتك تتملي وما تلقا ليك كرسي فاضي... آها دي حالة |
2 مرفق
والله يا سلموتي
ما تجني على البوست "بوستيك:D" لكن مش حاجة ظريفونية [mtohg=undefined]http://www.sudanyat.net/attachment.php?attachmentid=1244&stc=1&d=145871006 9[/mtohg] |
جيت السعودية على باب الله .. بدون وظيفة رغم مؤهلاتي وخبراتي الكويسة
قدّمك قدمك وقعت لناس الشركة الشغال معاهم هسة في جرح .. كانوا محتاجين لمؤهلاتي بصورة عاجلة ومدير المشروعات اردني اتصل بي وقال لي تركب أول طيارة للرياض بتلقاني منتظرك في المطار الكلام دة حصل وانا ما تميت 3 أسابيع في السعودية ركبت الطيارة بي غبشة السودان وشعر كتير منفوش ودقن ما محلوقة وشبط وبنطلون قديم وقميص نص كم ما مشكوك طبعاً طبعاً مهما حاولت أوصف ليكم صدمة الأردني فيني ما بقدر .. وأقسم بالله لولا إنه محتاج لشخص خلال الأربعة وعشرين ساعة دي كان حيقطع لي تذكرة إياب طوالي وقالها لي صراحة .. بكرة الصباح حنقابل المسئول الأول لكن بي مظهرك دة ما حيقبلك لحسن الحظ كان عندي صاحبي في الرياض وقاعد في السعودية 11 سنة اتصلت عليه جاني في الفندق النزلتني فيه الشركة وأول ما شافني هو ذاتو اتخلع وقال لي أنا قايل في زول وعاك من السودان ساقني غبيرة حلقت عند حلاق سوداني وجلبطني بي كمية من الكريمات والشامبوهات واللوشنات وبعديها وداني محل الهرم بتاع الملابس اشترينا بدلة كاملة وشنطة صغيرة راقية كدة للأوراق تاني يوم لمن لاقيت مدير المشروعات لمن قعد يضحك قال لي أمس وقعت لي قلبي يا زول |
اقتباس:
مرات بستغرب لمحلات فيها ازدحام غير طبيعي ورغم كدة ما مهتمين بالمظهر ياخي معقولة محل بحجم الموناليزا بتاع امتداد ناصر ما قادرين يحلو مشكلة الناس الواقفين شماعة كايسين تربيزة !!! |
سيطرة الحبش على المقاهي والمصريين على الكافتريات والمحلات الخدمية ما جات من فراغ
جات لأنهم بيعرفو customer care بالسليقة والله بنمشي من السوق العربي لحدي اركويت لي شيشة تيتو بتاع المصريين ومرات كتيرة بنمشي بالمواصلات ونتمها مشوار كرعين لأنه شيشتهم نضيفة وتعاملهم راقي وسريع قبل ما تقعد كويس في الكرسي بكون جمبك مصري يسألك تطلب ايه يا بيه ؟ في أقل من 3 دقايق بكون الحجر قدامك ويولعه ليك بمبسم حقه يديك ليه جاهز ويشيل المبسم يختو في جيبه ويديك مبسم جديد تفكه انت من الكيس .. وعلى رأس كل ربع ساعة بجيك بالنار يغير ليك النار الموجودة وينفخ الرماد من الحجر الحجر بي 20 جنيه .. في محلات السوق العربي بي 5 جنيه لكن ما تسألني عن الوسخ دة خليه نقول عشان رخيص لكن التنهّر البنهروك ليه لما تقول ليهم حجري وين .. بدوك احساس إنك جاي شاحدهم وهم بتعطفوا عليك بالحجر نفس الشئ في الكافتريات والمطاعم .. السوداني يسل روحك بالانتظار وتقعد تنادي في بتاع الفوطة لأنه التربيزة وسخانة بينما المحل المصري تلقاهو يلمع وبعد تنتهي من الأكل يجيك بتاع الكاشير يقول ليك إن شاء الله اكلنا عجبك يا بيه ! |
من الحاجات الموجودة عندنا كسودانيين بكثرة ملاحظة وما موجودة عندي بقية الجنسيات بنفس القدر الوزن الزائد والكرشة
ما عندنا ثقافة غذائية بالحبة كل أكلنا زيوت ونشويات تزيد الوزن .. ياخي لحدي الفتة والسخينة وحتى الدمعة البيقولوا عليها أكل المساكين كلها نشويات ودهون تعمل الكرش أنا طبعاً زي ما كنت مبهدل سابق برضو سمين سابق .. كنت مقنع روحي بي إنه الوزن الزائد دة مسألة جينية .. ما عارف الأقنعني بالحنك دة منو رغم إنه والدي الله يرحمو ما كان سمين :p لما عاشرت بقية الجنسيات قايل نحافتهم دي حاجة طبيعية لكن اكتشفت إنهم بيهتموا بالموضوع دة اهتمام ما طبيعي السلطة ثابتة في الوجبات وبياكلوها بكمية كبيرة .. شوربة الخضار بشربوها بالليل قبل النوم بدل العشاء .. شاي اللبن بدون سكر .. بالإضافة لي رياضة نصف ساعة يومياً بالصباح عارفين .. الكرش المؤزمانا كلنا دي اكتشفت إنه شيلتها أسهل بكثير مما اتصور .. أمسك ليك في أي ريجيم من طرف وحافظ عليه مع رياضة صباحية بعد 3 شهور بتلقاها اختفت تماماً |
نرجع لتعليق عكود حول بهدلة السودانيين في كل مكان وليس الغربة
حقيقة أنا بعذرهم في السودان للأسباب اللي تم ذكرها في البوست بتاعك مثل الجو العام للبلد ونظرة الناس ليك وانت متهندم .. لكن في الغربة مفروض تتطبع بطبائع الناس الحولك وقتين ربنا أداك الفرصة تبقى راقي المبهدلك شنو تاني ! أذكر قبل الاغتراب عندنا زميل منتدى جاء من امريكا ومشيت أقابله لأول مرة في حياتي .. منتظر مع واحد بعرفه من زمان .. قال لي هسة يجيك بي كرفتة ومظبط روحه وخانقها بي لبس ما عندو أي علاقة بالسودان .. فعلاً الراجل جانا لابس كرافتة ومعاها جاكيت البلبسوهو تحت البدلة وانا لساني الطويل مع امتعاض الكان معاي من الخنقة بالكرافتة طوالي ردمته قلت ليه ياخي دة السودان تعال لينا باللبس البنعرفه .. قال لي أنا لما اتبهدل ليك معناها ما احترمتك ولا احترمت روحي أنا عايش في امريكا من فترة طويلة ودة بقى لبسي الطبيعي حيجي عليك يوم تكتشف إنه البهدلة ما عندها علاقة بالبساطة ولا البساطة عندها علاقة بالبهدلة اتذكرت كلامه وأنا ناوي أعمل لي كم حركة كدة في السودان بتضطراني أقابل شخصيات مهمة .. وبفكر إذا مشيت ليهم بالبدلة الكاملة هل حيحترموني ولا بيقولوا دة شنو الزول الأوفر دة ! مادام متشنط كدة معناها كيسه فاضي غايتو شكلي كدة حأبقى على القميص مع الكرافتة بدون جاكيت .. لكن وحاة الله موش لو اصحابي دقو جرس ولا السكرتيرة عاينت لي من فوق لي تحت ! لو شنو وشنو داك ما بمشي من غير كرافتة :D |
اقتباس:
كله ده عسل مقطر خصوصا البى احمر .. ياخوانا نحنه لسه سنه اولى ..شقق يادوب السنه الفتت دى عرفنا السيراميك .. قبل كده حيشان ..ومازلنا مقتنعين بانه اوضه بى سقف بلدى وواطه فيها رمله مرشوشه احسن من غرفه فيها سيراميك (سيرميك ) واسبلت .. بالنسبه للمحلات والمطاعم .. ناس الصحه علموا الناس السيراميك البونيه .. اما القندفه ..وحات الله كنا متقندفين واخر ..جامايكا وشارلستون .. بس ماعارف الحاصل شنو .. اظنه ترييف العاصمه هو السبب ..الريف كله جا العاصمه |
عارف يا قرقاش
البسكن الشقق عمرو تاني ما يرضى بالبيوت الهبابي الشقة أقل مجهود بظهر فيها بينما البيوت كتاحة واحدة تبوظ ليك نضافة ساعات وهو ذاتو زمن النوم في الحوش خلاص انتهى لاقاني جنوب افريقي بحكي لي عن اخوهو القرأ في السودان في التمانينات قال لي هو كان مبسوط من السودان لكن اكبر مشكلة واجهته إنه السودان مسخن وما فيه مكيفات قلت ليه لا لا اطمن هسة المكيف بقى ما عندو أي علاقة بالحالة المادية .. بقى أساسيات حياة ودي ذاتها من الحاجات البتخلي الواحد يستغرب إنه السوداني ممكن يدفع قروش مكيف لكن ما بدفع قروش أقل لتجميل المنزل .. ممكن يدفع سعر تلفون جلاكسي آخر موديل لكن ما بدفع قروش بنطلون جديد لكن لسة .. ثقافة الشقق محتاجة زمن عشان تقع لينا لأنه طبعنا وتعاملنا مع الآخر بجلافة بخلي فكرة المشاركة في سايفون مرعبة السنة الفاتت شجعني صاحبي مهندس على شراء شقة بالأقساط لما سألت كل الجماعة حذروني قالوا لي ياخوي مالك رابط مصيرك بي مصير عشرين شقة معاك .. بكرة إن حصلت مشكلة سباكة ساي كلهم يتجابنوا ويقولوا ليك ندفع نحن ليه .. في النهاية أخدت لي قطعة واطة وخلاص بختلف معاك في حتة ترييف الخرطوم لأنه الرقي كان في السودان كله وانتهى من السودان كله .. بتذكر لما ندخل سرايات مشروع الجزيرة زي الدخلنا بيوت مسلسلات وفي الحلة زمان لمن يجي مهندس المشروع باللاندروفر الما خمج وينزل لابس البدلة السفاري كل الشباب بتلموا فيه لأنه بكون جايب الويسكي والبيرة المستوردة والكوتشينة الجديدة وآخر افلام الفيديو |
الكلام دا قلناه قبلى كدى يا عبدالسلام ....اها شوفوا زى دا
http://sudanyat.net/showthread.php?t=27714 |
| الساعة الآن 07:01 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.