استراحة
 

سلام حبايب
نسبة لاني .ومعاي كتاااار تعبنا من الاخبار المحزنة والحرب ومآلاتها ..قررت بس اجيب لي بمبر و اقعد في البوست ده واكتب شعر ظريييف قدر ما الله يديني
والعاوز ينجم علينا جاي حبابو

نايرات الوجن
تومي متين لي يجن
---
نامو الخلوق والليل جن
مرسالي جاء وقال لي جن
ماشات علي يدرجن
ميهن خفاف يتبرجن
ريفات صغار بنات عجن
زي الجواهر يلهجن
من غير شمع هن سرجن
أخدن معاي ساعتين رجن
شالن فؤادي وعرجن
---
جمل قوافيك للوزن
لي الجمروه وبقى للوزن
أخفي الاسوم لا تفرزن
جنّ عشوقن عايزن
---
فارمة الكبد بي مقصها
قصصا عياني قصها
قادت المحزم نصها
وحلاهٌ رحى بنصها
---
قاموا الخلوق وقفوا ليها صف
مدبور ساقك ما أصف
مراية خديدها الاتلصف
مظلوم أنا وقط ما اتنصف
---
أصبحت حائر بي الدليل
وكايس لماك ما لقيت دليل
كاتلاني عندي عليك دليل
عينيك صاد ود الدليل
---
برسل سلامي بعد ما
دودا السحاب كر حبّ ماء
يمسك يديك ويلثما

تسلمي نحتاج فعلا مساحة تبعدنا من جو الحزن ده💙

ايوه يابتنا فعلا نحتاج ان نرتاح من الدانات والمسرات.. لكم جنس كلامك دا بودي التوووووج

ما احلاها استراحة.

تحياتي أم سهى.

الجمال ضد القبح
شكراً أم سهى

حبابك أم سهى
طابت مجايبك

تحياتي أم سهي

شكرا علي هذا النفاج الذي سيخرجنا من مآلات الحرب و القهر و الأوجاع