طيبه
 

[rams]http://scotland.indymedia.org/usermedia/audio/3/taibaa.wav[/rams]

أتكائه مع الراحل المقيم مصطفى سيد احمد و حميد

طيــــبة


كل ما تباعد بينا عوارض
كل ما هواك يا طيبة مكنِّى
تلقى الغربة تكرب الواحِد
بيكى أسمى الشوق .. وأكنـِّى
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا .. بيوتى
لا غيرت وراك الجِتـّة ..
لا بدلت ملامح صوتى
لا غافلنى وهادن فنى ..
غامل المدن .. الما عِرفتنى
دقن الشوق الصبرو .. مصوبر
للأرياف الكم .. وفّتنى
وللأطفال الناشفة ضلوعا ..
ونازفة بغنى
أطمن روعة .. وأهدّى دموعة
لبسمة بكرة اللاّها تمنى ..
ولا مصنوعة
للاطفال النازفة ضلوعة
وناشفة بغنى
********
أغنى لشعبى ومين يمنعنى
أغنى لقلبى .. إذا لوّعنى
مخيـّر دربى الما رجعنى
إذا طلعنى دخلت القرب ..
ولا الغربة الكدروبية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
***********
أغنى الناس الما بتسمعنى
المِنِّى بعيدة .. ومبعدة عنى
ا نادى نشيدا .. وكنت المعنى
الإيدى فى إيدا .. وإيدا بتبنى
فى دنيا جديدة اليوم .. راح تدنى
وأريت غنواتى فى ناس شغالة
تكون سُندالة .. وعود طورية
ضراع رجالة .. كتاب أطفالا
وجملة بالا .. الما مقرية
سدّة مالة.. وبقـّة فالة
فى ليلة الدخلة على أسمى قضية
****************
حبيبة قلبى يا سودانية
يا أسمى معانى فى زول بيعانى
ياود ضكران .. ويابتْ دغرية
وأنا إنْ سامعانى بطـّلت
أغانى غُـبش .. فقرية
وروح غانيانى
هويتك منك يادافعانى براحة إيديا
ويا جابدانى ... قربت عليا
وما بتحيـّر بين الفوق ..
وبين الناس التحتانية
إلاّ مغـيـّر .. ولاّ عبوس ..
ولاّ كفيف الإنسانية
ومنـِّك وين يا كاشفة عينيا
بنور الإلفة .. ضِيا الحنية
وحِلم العالم .. ناس تتسالم
والبنى آدم صافى النية
والأطفال الناشفة ضلوعا
يطمِّن روعا..وتبقى تغنى
غناوى البكرة .. الكم مسموعة
حسيس طنبارة .. مع نـُقارة
صفِقتاً حارة .. ودارة تغنى
فيا حلتنا عليكى تـُرابك ..
وإنتى شبابك زينة الجَنـِّى
أحلى عروس البلد اللّتنا
ولاّ الغُبُش الرّابّة تهنى
ولاّ هدير المدن التصحا ..
وتمحى ظلام الحاصل .. عنـّى

العز ماهر
ما كل كل هذا الابداع يا مبدع انه الرائع جدا ود سيد احمد

وجيده

اهديك هذه المقاطع من شعر ازهرى محمد على عسى ان تعبر ما بداخى

مدخل أول

لمتين متيمم شطر النيل

متوقـّى اليابسة .. وواردْ

متوكـّى الغنية .. عصا موسى ...

بتـْهـش فى غيم الإلفة .. الشارد

مهدودة القُدرة وفترانة

حردان الضل البارد ...

بتـْوجـّل لى يوسف فى البير

يطلع من بطن البير .. المارد!

مدخل ثانى

فات الكان بدّينا إحساس بالإلفة

.... وكان راوينا

فات الباكى جرحنا .. وناسى جروحو

ولافـّى ورانا مدينة .. مدينة

فات الصاحى

ونحنّ نغط .. فى النومة السابعة

طالق حســّو .. ولا حسـّينا

حتـْحـتْ فينا غناهو الطاعم ..

وفات قنعان من خيراً فينا

سلامات يازول يا رائع

سلامات .. عوّافى

سلامات يا خلاصة الخير الفى الناس

وترياق الزمن المتعافى

سلامات يازول يارائع

سلامات عوّافى

الرائع ودالحويرص ..... ماهذا الابداع ... رحم الله الراحل المقيم مصطفى سيداحمد..... التحيه لضيوفك الكرام ...
تخريمه وجيده ....كيف الاحوال وكيف البنيه

وجيده لااسكت الله لكى حساً ...التحايا القوالى