أفتحن البيبان والطاقة ..
بنوت الزمن دا و نسوانه جندريات و بنوت عاديات .. وناسات كايسات وناسات كيور .. دايرين شنو ؟ من الرجل ودايرين منو من الرجال .. انتن عارفات شنو عن عالم الكائن المدعو ( ر جـــ ل )؟؟ كنت بتناقش مع صديقات و زميلات ... عن مواصفات الرجل البتبحث عنو المرأة فكلهن أقرن بإنو ( راجل عادى ) لكن ....!!!! و لكن دي .. استمرت ساعة من الشروط و المحاذير و طلع في النهاية راجل عادى .. بس سيوبر .. ونصف الكلام القالنو ما عندو دخل بمشاكل بعد الزواج ونصو .. الباقي .. أكبر من مشاكل بعد الزواج .. و كان ردي ليهن و بكل بساطة .. عندما تجدى 60% من المواصفات عند رجل ما .. كنكشي طوالي .. لأن 30% مخبأة .. لأسباب كثيرة .. و 60 في المية دى عند 10% من الرجال يعنى 30% هو الحد المناسب .. وقلنا 30% مخبأة يعني أكثر من النص .. طبعا والنص الحلو بتكملو المرأة .. طيب المرأة مشكلتها الـ كم% دى .. دي ما المشكلة .. المشكلة انو المرأة دفاعية .. ( السبب نحن .. ok? ) و أول حاجة .. بتقابل بيها الرجل .. الشك حتى يثبت براءته .. أو التجاهل .. حتى يلفت انتباهها .. ثم تكتشف لاحقا انو ( شليل) .. لأنو ( شليل) ربما أو حقيقة أحوص و لابس نظارة ودخلو مش و لابد .. و أخضر..أو أسود عديل ووشو كلو منقّر .. و كان فى الأحراش) تقبل بيهو منو ؟؟ غير واحدة بتشوف الزول من جوة أو فاتحة ذهنها .. عشان شليل ما ممكن يقول كلام حلو بدون مناسبة .. او داخرو لوقتو .. نواصل .. و ... نشوف عينات جاية .. |
يقولون
أن هايبرماركت ضخم أُنشأ بأمريكا تخصصه ....تجارة الرجال أو العرسان زبائنه كلهم نساء ومقسم لعدة طوابق في كل طابق نوعية معينة من الرجال شروط التسوق أن للتسوق اتجاه واحد بمعنى أنه لا يمكن للزبون أن يرجع مرة أخرى للطابق الذي تعداه ويقولون ايضاً أن أحداهن ذهبت لتختار لها عريساً بعد أن سمعت أن هنالك تخفيضات ضخمة دخلت الطابق الأول فوجدت الرجل (المعروض) رجلاً غنياً يمتلك الملايين فرحت به ولكنها قالت في نفسها ... دعنا نرى ماذا بالأعلى فربما كان هناك ما هو أفضل بالطابق الثاني وجدت رجلاً غنياً ووسيماً طمعت في الطابق الثالث فوجدت رجلاً غنياً ، وسيماً ويقدس الحياة الزوجية وفي الرابع كان المعروض رجلاً غنياً ، وسيماً ، يقدس الحياة الزوجية ويساعد في الأعمال المنزلية يمكنك زيادة الطوابق بما تريد من صفات محببة للمرأة وفي كل مرة يتملك الزبونة الطمع وتتطلع الى ما هو أفضل حتى وصلت الى الطابق الأخير فلم تجد رجلاً بل وجدت لافتة كبيرة مكتوب عليها أنه يستحيل إرضاء المرأة .................. سمعت المضمون رواية والصياغة من عندي |
و هذه يا الزوول عن الثقة المتبادلة ..
يقال أن اثنين من العشاق قررا الانتحار بالقفز من هضبة فأغمضا عينيهما .. على أن يقفز الشاب أولا .. و عندما قفز الشاب قالت الفتاة ( الحب أعمى .. ) و في أثناء قفزه التفت الشاب ففلم يجد الفتاة خلفه ففتح مظلة الهبوط وقال ( الحب لا يموت ) .. |
اقتباس:
يا ابوى شليل الرجاهو (لما واطتى تصبح ) عارفه عندو 60% من المواصفات او اكثر و مع انو هو افصح عن مشاعرو و عبر عنها بطريقة امكن هى ذاتها التى جذبتنى لكى التزم بهذه العلاقة و بدينا و مشينا و بعد التعارف عن اسرة و الحكى عن البيت و المزاجيات و هلم جرا (وهنا انا مكنكشة لسه) و كل و نستنا بحس ان انا بتكلم كتير وبحكى عن مشاعرى و ابث اشواقى لانو هو بسافر الخلا كتير وهو و حاتك ساكت يسمع بس بعد داك نتوكل و نمشى بيوتنا و نجى المرة الثانية حتى لو بعد شهر نتونس ونسة عامة و حكى السياسة و الهموم و حكى الشغل حقيقى بسمعنى كويس وبشاركنى حتى الراى لانو اصلا فى تقارب فى (حتات كثيرة) و هنا بتظهر كمان الـ 30% مخبأة .. لأسباب كثيرة ..و تجدنى اعرف من هذه الاسباب و مرات كده بتجنن و اناقشو فى الكلام الحلو الصبانى بيهو اول مرة (ما ظنيتو يتكرر تانى) (عشان شليل ما ممكن يقول كلام حلو بدون مناسبة .. او داخرو لوقتو ..) الكلام الحلو ده لو ما بقى من اول البدايات و يستمر (حتى لو سلمنا انو عايز مناسبة) ح يتجمد و تكون مشكلة وانا محتارة فى الفصاحة و البلاغة البدى بيها ديك مشت وين !!! تعرف القصة اتحولت عندو لمسيج من سطرين بعد شهرين ثلاثة و غالبا ما تكون مطلع اغنية ( يعنى الباقى تمى براك) ياخى انا عايزة اشاركك الاحساس و العاطفة حتى فى الاغانى دى و اعرف مدلولها عندك ... و مرات فى اثناء الحكى يقوم يفتح الموبايل و يقرا ذات الرسالة التى بعثها قبل شهور .... ( قولت لى داخرو بس) غايتو الرجل السودانى بخيل فى مشاعرو ( و لمن الله يفك ساجور لسانو يتمتم بكلمتين و (عايز المرا ) ترشو بمطر الكلام الدقاق المعسول لذيذ و كمان لما ابادر و اقول سيبك منو خليك مبادرة يكون الرد على وشو يفرد سنيناتو ياخى انا شاحداك بسمة و نظرة ...رد بذات الكلام او اجمل قليلا .... يا عمنا القصة تربية صحى... و لكلٍ ادوات تعبيرو دى فى ..واشكاليات التعبير عن العاطفة فينا كسودانيين مبالغة فى التقصير رغم انو نحنا مليانيين محنة و حنان حتى فى سلامنا و كلامنا و و نستنا لكن لما نكون (حبيب و حبييبة ) القصة بتعقد كتييير ... و كل ما اسمع اغنية محمد مرغنى عاطفة و حنان يا ناس .... بموت بحد الدهشة من الكلام الذى انتظم فى الاغنية و بجد انها بتورى اليوم قصة جفافنا العاطفى ده بقى قدر شنو...و غنانا المشبع بالعاطفة ده ما قالوهو رجال شعراء...و الله شى عجيب فى غرامك ..اقابلك كلى حنية و اخاف شوق العمر كلو يفاجئك يوم فى عنيى...بعدين عايزة افهم داخرو كيفين يعنى و لمتين ... و هو عارف انو العمر ده كلو قدر شنو ما يفك لسانو و يعبر .. و عارفة انو للتعبير ادوات كثيرة لكن حق اللسان ده الخالد مع الايام بين الحبيبين لانو بذكر كل الكلام البقولو يوماتى لكن ما بذكر الهدية البجيبها الا احيانا.. انا غايتو ما زالت ابحث عن كوامن العاطفة عنده ... و انتظر ذاك الكلام المعسول لذيذ .... عشان كده احيانا تجدنا نستغرب لرجل يفصح عن مشاعره لحبيبته و يجاهر بها على الملأ .... و بجيك صاده لانو الكلام محرقنى شديييييييييييييد ....... |
اقتباس:
لحدى ما تجى واحد ينزل لينا ( أقيف وسط البلد واهتف .. بريـــــــــــــــــــــــــــــــــــــــــــــــ ـــــــــدك .." |
اقتباس:
يستحيل ارضاء المرأه !!! ياخى بالغت و الله هم الرجال ديل هم الما مفهومين .. و الواحد فيهم ما عارف هو عاوز شنو تعامليهو بى حنيه يطفش تطنيشيهو يجيك راجع تقنعى منو بمشى لى ابوك |
اقتباس:
و صيتى ليك عن تجربة 3 دى ما تكترى منها ادى من العيار التقيل داك بتاع المساخة و كمان اتلادحى على لمن يعرف شى و بجى راجع طائعا مختارا و محتار :D:D:D |
اقتباس:
هووووووي حمد وخوجلي ديل ما تقربوهم ففي حمد فقدت حبلي وفي خوجلي فقدت كثير من الأصدقاء وممكن أرشح ليكم الشللالية والدناقلة بشقيها وكان ماكفاكم ممكن توصلوا الختمية والعزبة والأملاك وطبعا انتو ملاحظين اني سايبكم في وسط البلد ما داير أبعدكم للحاج يوسف والحتت البعيدة :D |
اقتباس:
|
اقتباس:
أنا مستني الخلاصة عشان تجاربي ما فيها حكايات زي دي وأنا شخصي متزوج خواجيتين وعندي منهم أطفال الاتنين وفي الآخر جريت كراعي بي عرجتا ورجعت لي مراحي والحمدلله لي 28 سنة عايش مبسوط ومرتاح البال ولو في مشاكل بتكون مع العيال ما مع أمهم الانا من يوم ما ألله جمعني معاها حسيت انو رضي عني:)ومن خرج عن دارو اتقل مقدارو بلا خواجات بلا غربة مع اعتذاري للذين تزوجوا من خواجيات وهم بالتأكيد فاهمين كلامي وموافقين عليهو بينهم وبين نفسهم;):rolleyes::p |
اقتباس:
|
اقتباس:
و يقولو لسك النساء غريبات .. يا زوله تانى مساخه بس ظرافه ذاتو مافى .. تعرفى الرجال ديل باقى لى عاوزين ليهم نساء متعددات الالوان يوم تصالحيهو بدون سبب و 10 يوم تطنيشيهو بدون سبب غايتو يا ريت لو معشر الرجال بالمناسبه دى يقولو لينا هم عاوزين شنو يعنى و لى شنو الراجل بيكره البت الى بتحبو |
اقتباس:
الزي ديل ما تغلطي تحكي ليهم حاجة عشان بيودوها التوثيق طوالي وبتدخل الأرشيف لوقت العوزة لكن عشان خاطرك حأديك اختصار لقصتي مع أم أحمد.. زمان في الستينات شفت بت عمتي في زيارة لي شندي ولقيت حاجة كدا زي باربي شعر دهبي وعيون خضر صورة مصغرة من زبيدة ثروت..بيني وبينك دخلت في مزاجي وكان سنها 12 سنة وأنا في امتحان الشهادة يعني لسة قدامي 5 سنين لنهاية الدراسة وقلت أكلم عمتي وأقول ليها تحجزها لي وللأسف عمتي قالت لي ما بتغلا عليك لكن متكلم فيها ود عمتك قبالك واحنا قلنا ليهو علي بركة الله...بيني وبينك جاتني صدمة ومشيت سألتو وقلت ليهو انت يازول بي جدك دايرها فقال لي آى فقلت ليهو مبروكة عليك وزي ما قال زيدان ورجعت حابس أدمعي في الليلة ديك. المهم قلت انسي الموضوع ورجعت للدراسة ودخلت كلية الحقوق جامعة الفرع وبعد اكتوبر جاتني منحة وأنا في سنة تالتة لتشيكوسلوفاكيا فقررت أسيب الجامعه وأسافر يمكن في السفر أنسي وفعلا سافرت وبرضو ما نسيت واتزوجت المرة الأولي والتانية وبرضو ما نسيت... بعد 17 سنة رجعت السودان في اجازة وكان زواج اختي آخر العنقود وهناك شفتها في العرس وراسي ضرب وأنا أياميها كنت رجعت من أوروبا واشتغلت في الامارات..عاينت لقيتها محننة حنة عرس فسألت أخواتي هي لسة ما عرست قالوا لي لأ وأظنها فرتقت الخطوبة فدخلت في حيرة وأنا زول متزوج مرتين ما بقدر علي العزوبية تاني وأنا في الامارات براي فقلت أخللي أمي تشوف لي واحدة مطلقة انشالله حتي لو عندها عيال ما بتفرق فأمي قالت لي ليه مش انت كنت داير زمان بت عمتك :confused:ما هي فرتقت فقلت ليها حرام أنا زول صاحب سوابق وأطفال وحرام أول عدلا يكون زول زيي فقالت لي انت ماليك دعوة انا بطلبها ليك فاشترطت عليها قبل ما تطلبها تسألها براها ولو وافقت تكمل ولو اعتذرت مافي داعي لضربة تاني علي راسي وبالفعل د الحصل..وطبعا في تفاصيل كتيرة بس ما بتتحكي لكن رايك شنو مش فلم هندي:D:D:D |
اقتباس:
|
اقتباس:
انا بس عاوزه اعرف انت كيف اتزوجت ال2 ديلاك و انت ما بتحبهم !!! و كمان عندك اولاد ... كيف يعنى ؟ |
| الساعة الآن 09:07 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.