البتول......
(1) حاجة فيني تدفع الآخرين للبوح لي بأشيائهم الخاصة جدا... يضايقني الأمر جدا ..جدا . اسمها البتول..تجلس وسط رفيقاتها في صمت ورقة..أكمل أنا شرح درس قواعد اللغة الانجليزية وأهيئ نفسي لكباية كاكاو باللبن وونسة مع رفاقي بعيدا عن هم الدرس والدروس... تناديني ..وبهمس تقول : أنا محتاجة ليك في موضوع مهم ... أرد عليها : جدا إن شاء الله خير ... تقول هامسة : ليس هنا ، هل تستطيع أن تلاقيني في مكان آخر؟ بيني وبينكم إحساس بعدم الراحة يتملكني وهاتف داخلي يصرخ بي "قول لا " ... تواعدنا علي اللقاء في مكتبي .... اسمه حليم ... كان صديقي رغما عن فارق السن بيننا فقد كنت أكبره بعدة أعوام ربما فاقت العشرة . كان إنسانا مميزا لذهنه دوي ، طالب مجتهد وناجح ... كنت بصورة ما أعلم أن حليم يعشق تلميذتي "البتول" حد الجنون... يتابعها بنظراته وتقوده قدماه إلي ناحيتها دون وعي منه فيتحدث إليها في كل شيء إلا مشاعره... شجعته بدون مباشرة أن يبوح بإحساسه لها فباح به لي ... ألم أقل لكم في البداية أن فيني ما يدفع الناس لرمي أحمالهم علي كتفي.. دخلت يسبقها صوت حذاءها علي بلاط المكتب وعطر خفيف.. سلمت وجلست ..لم أرد المباشرة فكنت أسلم وأسألها عن حالها وأظنني أكثرت من السلام .. : يا جمال أنا عندي إشكال عجيب وما عارفة أعالج المسألة دي كيف خير إن شاء الله ؟ : أنا عندي سيلان . بدأ لي أن أذني خانتني فسألت مجددا "شنو ؟ " : من مدة أعاني من إفراز عجيب صار مؤلم . طيب ما تمشي للدكتور .. بعدين سيلان ده مرض جنسي ؟ كنت لا أزال حتى اللحظة أتعامل معها كطفلة أو فلنقل تلميذتي الشابة الصغيرة .. : أنا أخدت جرعات كبيرة من المضادات الحيوية لكن لا يزال الحال كما هو . علي العموم دعيني أسأل وآتيك بالرد القاطع في الموضوع إن شاء الله ما تشيلي هم .. تركتني في حيرة من أمري وذهبت.. أكملت ما في يدي من عمل وخرجت... مستشفي الخرطوم .. كنت أعلم أن عادل يعمل وردية نهار ذاك اليوم فقلت فرصة .. كنت أحمل شنطة سامسونايت وألبس نظارة كانت تقيني شر لفحة الهواء وأنا أقود "الفيسبا" .. ما لم أكن اعلمه أن الشنطة والنظارة كانا جواز مروري إلي المستشفي.. ازدحام أمام باب المستشفي وحارس الباب متجهم الوجه قميء.. ترددت في محاولة الدخول لمجرد رؤية وجهه .. لغرابة الأمر بادرني وهو يفتح الباب مبتسما ابتسامة أنهكته بحق فبدت أسنانه كجمرات تحت رماد .. : تفضل يا دكتور ... دخلت غير مصدق.. وجدت عادل هو الآخر مكتبه يئن بالمرضي .. انتظرت بصبر لساعة زمن أو يزيد ... سلم علي بمودة اعتدتها منه ولم يقدم لي أي دعوة لمشروب أو كباية شاي ..يعلم أن رائحة المضادات الحيوية ومنظر المكتب الباهت المهلهل يجعلاني أعاف الشرب في المستشفيات ... : الجابك لينا الليلة أظنه الشديد القوي .. عيان ولا شنو ؟ لا والله يا دكتور شديد ولضيض بس عندي سؤال فني .. شنو علاج السيلان ؟ : مشيت تهبش ولا شنو يا جمال ؟ أبدا والله يا دكتور ما أنا زولة قريبة والمسألة شوية حساسة وأنا لا أملك أي تفاصيل سوي أنها حاولت مجموعة من المضادات الحيوية والمسألة ما اتعالجت . : ده إشكال كبير لأن المضادات الحيوية دون فحص معملي تجعل العلاج صعب . لازم أشوفها ونعمل كشف نحدد نوع العلاج . تشوف شنو يا عادل يا أخي المسألة ما بتتحمل والله وأنا الحكاية مفروضة علي . : الفرضها عليك شنو ؟ إنت لسه بتاخد مصائب الناس وبتعتبرها مصيبتك ؟ يا أخي ببساطة خليها كويس تمش معمل جيد وتعمل فحص وجيب لي النتيجة . لم يثقل علي بالأسئلة وخرجت من مكتبه وأنا أكثر حيرة .. من أين جاءها السيلان .. لم أشعر طوال معرفتي بها أنها يمكن أن تكون لها علاقة ناهيك عن علاقة جنسية ؟؟؟ أعود إن شاء الله . |
لابد من عودة سريعة فالموضوع لا يحتمل التأجيل
واليوم أحد ولا تتكرر هذه الفرصة الا كل ثلاث اسابيع اتابع باهتمام والوسواس الخناس يدور براسى كيف ولماذا واين؟؟؟؟؟؟؟؟؟ حيرتنى البتول |
الزمان و المكان و تفاصيل محض الخيال الذي لا علاقة له بالواقع تزيد التشويق و المتعة ، و الجرعات لازم تزودها شوية في الحلقة الثانية و لا غادي :D:D:D
|
اقتباس:
ما قالوا ليك الجرعات بدون فحص بتصعب العلاج لكن يا خالد زيد الجرعة اريتنا ما نشفى |
أصبروا شوية أدوهو فرصة يشم نفسو عشان ما يخاف ويغير رايو وهو أكيد عارف انو التأخير بخللي العلاج أصعب:D
أما الزمان والمكان فديل صاح ما محتاجين تغيير والقصة حقيقية ما تأليف زي حكايتو الأولي ديك الأنا اتهمتو فيها بانو هو العمل العملة المشي بيها القاهرة وهو نكر وفوتناها ليهو..كدا نشوف المرة دي حيقول شنو في حكاياتو الكلها تحت السرة دي:D:D:D |
اقتباس:
اقتباس:
انت من شلت هم نادية عارفين وراك هموم تقيلة .. اقتباس:
ذكريات خيال أم موت المؤلف |
أحكي يا جمال ..
انت من شلت هم نادية عارفين وراك هموم تقيلة .. ما هي دي القصة ذاتا المخليانا نفكر البخللي الجنس اللطيف يمشوا ليهو يحل مشاكلهم شنو وكلها مشاكل ما بتتحكي:D;) فيسبا الجن دى .. من الحبشية .. للميكانيكي للسيلان .. كان مفروض يامعتصم تسألو الحكاية دي حصلت قبل وللا بعد مشوار المكانيكي:confused:عشان التوقيت مهم جدا أما الحقبة الزمنية فتقريبا واضحة لارتباطها بزمن الفسبا:D |
الشكية لله :mad:
خلونا نعمل مراجعاتنا وكده تستعجلونا كايسين الشمار وباكر تجوا تقولوا أخطاء طباعية ومثني وجار ومجرور أها أبيت... بي مزاجي :cool: |
اقتباس:
عشان كدا قلنا ليهم أصبروا خللوهو يشم نفسو وكمان عشان أخوك قالوا أشتر في كتاباتو زي ما الجماعة صحبانك قالوا وما بفرق بين الفتح والنصب مع انو النصب دا حقهم وأنا ما ادعيت بأني خبير لغوي:D:D:D |
اقتباس:
:D:D:D ده شغل "سمسمية" يا فتحي |
فتحي... فيصل
يا اخوانا ناطين ليه في حلقو مالكم؟؟ الواحد ما تخلوهو يتم الكلام؟؟ لا حولا الله منكم!! يا خالد ولا يهمك خلينا نشوف محن بتول دي:D |
اقتباس:
بالله عليك الله منو فينا الناطي في حلق منو:confused:احنا وللا انتي الكل مرة ناطة لينا وعاملة محامية الضعفاء..:D بالمناسبة أنا ما دخلت في بوست رهف الحزين عند الجيران متعمد عشان في ناس ما بحب أشوف الدمعة في عينيهم وما بقدر أكتب في الحزن عشان ما أزيد من حزنهم وأتمني تكوني فاهماني:):) |
اقتباس:
ملاحظتك قويه يا باش.. متابعين يا خال. |
(2) لا أخفيكم سرا صار الأمر لي هاجس.. وفي المساء ذهبت إلي النادي ..جلست وسط شلتي شارد الذهن ولم أشارك كعادتي وعادة الشلة في الحوار كيفما اتفق فهم يناقشون كل شيء بدءا من أزمة المٌناخ إلي ارتفاع أسعار ود عماري ومن هنا جاءت تسميتهم بشلة المثقفين .. طرحت الموضوع دون مقدمات ..يا جماعة علاج السيلان شنو ؟ زكريا : إنت طفاستك دي ما بتخليها أسه غسلت يدينك ديل قبل ما تسلم علينا ؟ وزيري : يا زكريا ما تقهم الراجل بعدين المسألة دي تحتاج رأي علمي وما بينفع فيها الخبرات بتاعة مشعال وسبعة بيوت وكترينا فخلونا نعرف التفاصيل. . هنا وقف حماري .. لا تفاصيل تقال .. لمحتها تدخل ولأول مرة أراقبها بصورة مختلفة هي جميلة دون شك...تتهادي كحمامة ... و .. وبعدين معاك يا جمال ؟ حقيقي انت طفس علي قول زكريا.. كان دخول صديقي عوض الله كليلة القدر.. كيف نسيت ذلك .. سمية.. دكتورة سمية .. بادر عوض بالسلام ..جذبته من يده وسألته الدكتورة في البيت يا عوض؟ : أيوة . خير إن شاء الله ؟ زكريا : الراجل عنده سيلان . نظرت إليه وإلي عوض .. سيلان شنو يا زكريا الله يرضي عليك .. أنا ماشي مشوار وبجي راجع .. تركتهم ولا يزالون يتناولون موضوع السيلان بالحوار ... فتحت الباب ودخلت .. هو منزلي أو يكاد ... سلمت وجلست أفكر كيف أطرح الموضوع .. د.سمية : عوض أسه مشا عليكم تكونوا اتعاقبتوا . لا أنا قابلت عوض لكن جاييك مخصوص يا دوك . :دقيقة أعمل ليك شاي .. لا يا دوك أنا ما داير شاي والموضوع ما بياخد كتير من وقتك.. أسمعي عندي تلميذة مصابة بي سيلان يا دوك ممكن تتولي الموضوع ده أظنها لن تجد حرج في التعامل معاك؟ : يا جمال كدي قول بسم الله السيلان ده مرض جنسي كيف يجي لي تلميذتك ؟ حكيت الموضع لسمية فابتسمت مما زاد من حيرتي فقالت : يا أخي ممكن يكون التهاب عادي الحاجات دي بتحصل للنساء . علي العموم يا دوك أنا بقنعها تجيك وبيني وبينك الموضوع ده أنا تعبني عديل. : الرجال دايما كده .. الواحد فيكم يعمل فيها أبوالعريف ومشكلة صغيرة تتعبه . حتى انت يا دكتورة ؟ أسه أنا سألت الشلة بقيت موضوع للتنكيت ومتهم بأني مصاب بمرض جنسي ؟؟ رجعت إلي الشلة .. وفي المدخل التقيت حليم ..يجلس كالممسوس ... سلامات يا حليم. :هلا جمال.. يا أخي أخبارك شنو ؟ الليلة مافي حصة.. لأول مرة أنظر إليه بصورة مختلفة .. يا تري ماذا تراه فاعل لو علم بالأمر؟. تجاوزته سريعا كمن يحمل نبأ حزين وذهبت صوب شلتي... زكريا : أها أدوك حقنة ؟ عماد: بالله أمش غسل ادينك وأطلب لينا كاكاو .. "ضحكة مجلجلة تلفت نظر كل الناس حولنا ".. واصل حسن والذي كان يحكي في غيابي ويبدو أن حضوري قطع عليه استرساله.. .. :المهم يا جماعة الزول صاحبي وأنا لازم أديه راسه .. عوض : يغمز لي بعينه .. زولك ده مصر يفركش الزواجة .. كدي يا جماعة أنا ما فاهم حاجة فهموني الحكاية .. حسن: وكأنه كان ينتظر سؤالي ... يا أخي انت عارفها .. فلانة.. مالها ؟ : صاحبك فلان عايز يتزوجها وهي دايرة تديني شاكوش وتتزوج . يا أخي لو انت بتحبها بالجد اتقدم ليها المانعك شنو ؟ : أحب شنو يا أخي دي "....." ساكت . كان عوض يعرف كراهيتي لحسن وأكاذيبه فكان ينظر إلي ويضحك .. ولم استطع تمالك نفسي خاصة بعد تولي عماد للأمر وإعلانه صراحة أنه من سيخبر فلان بالقصة ويا دار ما دخلك شر ... اندفعت بثورة حقيقة .. حسن ده كضاب يا جماعة .. انت يا حسن متين تبقي راجل وتكبر يا أخي.. بعدين نفترض أنه كلامك صاح شنو يعني؟؟ وأقنعت عماد بعد لأي أن يترك الأمر.. وارتفع صوتنا أكثر من المعتاد فقد كنت أهم بضربه غير مبالي .. كنت أكره فيه نعومته وهندامه الأنيق أكثر من اللازم وحكاويه عن الفتيات والتي يختلقها للأسف فهو مجرد إنسان ضعيف ينظر إلي الآخرين بمنظار أسود هو انعكاس لحياته الخاوية .. وشاء الحظ في ذلك اليوم أن أنقذ زيجة كان بإمكان هذا الدجال أن يهدمها دون مشقة .. كم هن مسكينات الفتيات في مجتمعنا المتخلف.. تكفي حكاية من شخص مريض الذهن لهدم حياتهن.. وفكرت فيها .. فلانة .. إنسانة كالنسمة كنت شخصيا أتحين ملاقاتها في باب النادي ومتحملا حكايات علي حران "حارس النادي" التي لا تنتهي عن نادي المريخ فقط كي أسمع "مساء الخير يا جماعة" تقولها برقة تجعلك تحس بأن مجرد الكلام يرهقها .. يا تري ماذا رأت في حسن هذا الإنسان الأملس ؟؟؟ .. للحكاية بقية ... . |
حكى لزيز .. ينقلك فى واقع كأنك تعيشه .. رتم الحياة بكل تفاصيلها .. مخيلة خضراء .. وحنين لزمن إنتحر ..
واصل .. متابعين |
| الساعة الآن 07:38 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.