ليل البحر......
ساهرت في نَفَس الكتابة..
ونفس هاتيك الرتابة.. وصنة الليل الكآبة.. وباقي موج.. سرحان هنااااك.. في جفلة الخيل التجقلب في الرمال.. ساعة السؤال.. تشده حروف الانتظار.. جفن النعاس الاحمرار.. لمن ينحنح عبرتك.. طعم المرار.. والليل سوار.. في نصو ياقوتة صبر.. منحشرة ماخدة الكون ستار.. ويبدا التقاطع في الخيوط.. بيت الفكر.. والعنكبوت.. الملّ من هذا السكوت.. جات الحمامات هشتو.. لحتة جااايطة وودتو.. صوب البحر.. ولموجة في النص فكتو.. وشن فايدتو؟ عرف الهدير والشفتنة.. والنوة زادتو بشتنة.. لكنو بس بحرفنة.. وحبة شقاوة وشيطنة.. عرف البحر.. بطنو الغريقة.. وقصتو.. المكتومة سر.. لوك الصبر.. عاتبتو ليك هسي البحر.. اديتو من القلب أمر.. وبدون عذر.. شيلني في جواك حنين.. طيف اشتياق.. لهفة سنين.. محتاجة حضن اتوسدك.. اتدسى فيك واتلبدك.. ورغم الغرق في قسوتك.. بهواك شدييييد.. انا يا بحر.. وكتين تهيج.. والموجة تبدا تحنسك.. منك وفيك.. براااك بتفهم طلسمك.. قبضت من اثرك رسول.. وانا دون طيورك ببصرك.. صنعت من سحرك جسد.. ونفخت في الروح بلسمك.. لفظت بعضي علي الرمال.. رسلت حتة بتشبهك.. دمعة حنين.. سالت هناك في وجنتك.. رسمت معالم الموجة فيك.. ضوت ملامح سكتك.. وياااااااا بسمتك.. اضحك وسوق الليل معاك.. خلي الصباح يتنفسك.. |
طلع الصباح..
وما سمعنا فرحنا صاح.. الا بس هطل المطر.. دفّق رذاذو علي الدعاش.. واتدسى في حضن البحر.. فتشت ليك.. جوة صوت الموج صدف.. وشوشتك الشايلة الحنان.. لمن يهز الكون قرف.. بسمع غناك.. وبشيل همومي علي الوتر.. واعزف معاك.. لحن الظروف.. الكايسة في شمسك دفاك.. ضحكات صغار.. ساعة الهجير.. ما حسو في حرّك قساك.. ساقو الخطاوي علي التعب.. فرشو التراب.. لابسين حفاك.. واتغتو من لفح السموم.. قابضين باحلامهم سماك.. وانا بيني بينك مافي سور.. الا الهواجس في لقاك.. ساعة يتوقف زمن.. وتضحك ملامح اشتهاك.. |
http://sudanyat.org/vb/imgcache/612.imgcache.jpg
اقتباس:
ياطالعة من نص البحر حورية يانعة مفرهدة امتعني نشيدك واصلي شدوك يا رشا |
اقتباس:
ما قصرتي معاي.. هزيتي كانونك وقدمتي ليمونك.. اجاملك في سمحك وجديدك ;) لكن الباقين الفيهم اتعرفت :D |
حقيقي شدو ممتع..
كلمات تريانة حنية..وموسيقي شعرية عالية.. |
اقتباس:
متعك الله بالصحة والعافية والرواقة الكافية للاستمتاع بكل حرف يقع عليه بصرك حتى لو كان خرمجة كتلك التي احب :D |
اقتباس:
فى الأول مرحب بيك كتير يارشا, ومعليش على التأخير (كنت بره البيت)..:D جميل ليل بحرك ورتمه ممتع حبابك عشرة |
اقتباس:
اقتباس:
تشكرات كتيرات |
سلام يا رشا حاتم و مرحب بيك في سودانيات..
و شكرا للنظم المرتب و القوافي الرايقة .. عذرا على التأخير ، انت عارفة الدنيا خم رماد و بنصبحها كشاتين و كدا :D:D |
...
اقتباس:
ياربي دي جزء من القصيدة... بالله انتي اخت الرائعة "رندة"... عميق الشكر لشفافيتك.. وياخي بلغي احترامي، وشكري، وتقديري لأختك رنده، وافتقدها (فعاليات الدوحة الثقافية)، فهي ركن مهم.. ولسان صادح بشجاعة المرأة.. وهزي كانونك.. لضيوف البوست الجميل.. ... |
بين الحريق وانسان غريق ...
انسان رقيق ... حاول يكبر دفّتو ... حاول يطوّل لفّتو ... ويرسم على الشاطي الطريق ... يفتح شوارع موجه تايهة ... وموجه تبصق في الحريق ... يا انتي يا البليتيني ريق ... يا وردة بتنقط رحيق ... انا نورسك ... جاييكي طائر وفاكي الزراير:p:D يا شراع في الريح يقاوم ... وريحتو من نفسك رحيق ... يا وردة سايقة وراك عبير ... شتتي الشبال يا ام ضمير ... خلي قلوب الصبيان تطير ... وخلي قلبي كمان يطير:D فرررررررر القاعدين ليها شنو !!! وبرغم ذلك ... وهذا البحر الذي لم يشيل عوامو هذه المرة ... حرفنة في السباحة ... ومقدرة ذاتية في تناول الخمسة وسبعين في الميه من الواطة بشئ من الهدير والشفتنة والبشتنة والشيطنة التميتيها موية :D.. المود مود خرمجة ... ولكن !!! لا اريد ان أفسد عليك هذه الانبراشة وفراشة هاشم طه السكرانة ... بحرك والفراش ... ومين علّمك يا فراش تهجر عيون القاش ... |
اقتباس:
|
رشا حاتم
سلام يارفيقة بحرك مسجوع ومرتم وألانس بقربك له طعم وطن متلفح بصفاء الاصالة واصلي التدفق وابقي شموس وهاجه نحن هنا بقربك ندعمك وننتظر طلاتك كوني بالف نغم وشدو _____________ عذرا للتأخير فأنا كنت بالخارج مع اخوي الكاشف (جيلي) |
الف مرحب بيك ومنورة يارشا
كلامك جميل ومدوزن اسمعي الكلمة دي عااااجباني شديد وحابها ادخلها في حتة تحياتي يا حبيبة |
اقتباس:
ما مشكلة لو اتاخرت يااااخ المهم جيتك، بس اعمل حسابك ما نجرك خمسين :D |
| الساعة الآن 12:23 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.