ياعذبة زي ريق السحابة الماطرة في عز السحر
والكون موشح انبهار
كتمت في جوف الحروف الشايلة اوجاع النهار
حزن السنين المرة والشوق المدكن من سنين
قلق المسادير الشايلة رعشات انتظار
زي رفرفات نورس مسافر
مرتجي الريح البتحمل ليه انفاس البحار
يا عشم الهوى البكر المشبع بي ندى العشق المحال
ختيني تعويذة وسبر
ما أصلي خاتيكي في جنبي الموجع بالسفر
اروع قصيدة..
الحنين جواها معطون بالشجن
فاح انتشار
غرامي ليك ماكان حروف تدغدغ للشعور
حنيني ليك ماكان تذلل ونكسار
غرامي ليك كان انتصار
كان ارتهان لي كل خفقات الشعور
لي مقلتيك
كان رحلة وابحار في مسامات الزمان
مرات يباري الموح
واحيانا يعاند في البحر تيار
يابنية من نور القمر
يابنية تتلاصف نضار
|