المنتدى : منتدى الرواية والخواطر
ا
حلام اضغاث ..!!
طووول مفارق حيووو يخوانا كيف وازيووو ..
طول عمري بحب ثنائي العاصمة .. وبحب اغانيهم الخفيفة اللذيذة .. واليوم انتهز الفرصة لأعبر لكم يا يجيش بخاطري من لواعج وشجون وشوق . وحكاية الفراق دي حكاية حارة حُرقة الفلفل اللخضر ..!!
ويا ليتني اعيش هذه الفرقة وحرارتها فحسب .. ولكنني اصبحت لا انام إلا القليل .. والقليل دا زاتو فيهو كوابيس واحلام ملخبتة واحيانا مخيفة .. وتتوالى هذه الكوابيس في مناماتي المتقطعة بحكم انني وحداني ( وعزابي مقطع ) .
ليلة التلاتا .. افزع وارعب ليلة في حياتي .. توجهت الى سريري بعد ان حضرت فليماً وثائقياً عن اسماك القرش في قناة ( ناشونل جوغرافي ) .. حيث اسماك القرش التي لا ترحم .. السمك الذي يقطّع تقطيع .. رقدت كعادتي على بطني و###الصغير لفوق شوية لزوم الطراوة .. رجلي الشمال مجدوعة لهناك .. اما الكراع التانية مكعوجة .. احسست انني مرهق وجائني النوم في سراع .. نمت ورحت في سابع نومة .. وحلمت فيما يحلم النائم .
حلمت انني في بحر لُجي .. كنت ملللط كما خلقني ربي .. جاتني سمكة القرش .. طويلة وعريضة .. تملكني نوع من الخوف واصبحت اسبح واسبح .. قدامي مغارة كبيرة جوة الموية .. جمبلك دخلت فيها .. سمكة القرش ما قدرت تخش لان المغارة صغيرة .. واقفة في باب المغارة بتعاين لي .. وفجعة اتلفت لورا لقيت مجموعة من الناس قاعدين جوة المغارة دي ( ناس دقونم طويلة ) .. ماسكين سكاكين .. مشيت جمبهم .. قلت ليهم دا شنو البتقطعوا فيهو دا .. قالو لي دا السودان .. وسمكة القرش ما دايرة تمشي من قدام باب المغارة عشان شمت ريحة الدم ( دم السودان النازف ) .. اها واحد فيهم سألني .. واحد من اصحاب الدقون الطويلة .. انت يازول من وين في السودان ..؟؟ قلت ليهو انا من شمال السودان منطقة المحس .. والتفت هذا الرجل ذو اللحية الطويلة لأصحابه وقال ليهم .. جيبو الزول دا قطعوهو هو كمان .. فسراع فسراع قمت جريت ودخلت في خشم السمكة .
ليلة الخميس .. حلفت ما ابيت في البيت براي .. توجهت الى ديار صبري .. العزابة المعذبة .. الخاوية على عروشها .. قلت ابيت معاهو في بيتو يمكن الاحلام المزعجة تروح مني .. دخلت اليه ووجدته في سابع نومة ( نومة العصرية ) .. جلست بجانبه .. ولفت نظري شئ غريب في هذا الصبري .. سمعت اصوات تخرج من نخرتو .. باخ بيخ .. باخ بيخ .. ويصدر كلمات ليست بالمفهومة .. ويتقلب زات اليمين وزات الشمال في عصبية وكأنها يتخانق مع احد .. افزعني حالته .. تملّكني الخوف من جديد .. وقلت في نفسي ان هذا الصبري مثلي يعيش كوابيس واضغاث احلام في نومه .. !! ويدندن بأغنية لابو عركي البخيت .. جاييك يا آخر المواني .. من غربة الجزر المسورة بالهواجس والضياااع .
وهنا ادرك ان الرجال في غربتهم وبعيداً عن وزارات داخليتهم يعيشون في هواجس وكوابيس في نومهم وصحيانهم .
وبالمودة القاكم .. تحياتي
http://www.suleb.com/vb/showthread.php?t=6625