[imported_طارق صديق كانديك]

المشاركة الأصلية كتبت بواسطة بابكر عباس

جدي طه أبوعباس ولدوهو تقريبا سنة 1873
قبل سنة ستة بست سنين جاب ولدو الوحيد عباس
طه وابوهو ومعظم أهلو جاب طاريهم محمود ود أحمد (خالد بن الوليد زمانو) والمجاعة لحست الباقين
سنة ستة، عباس كان طالع ليهو فوق شجرة بكد ليهو في كعكول صمغ، نادتو إمراة من تحت الشجرة: هوي عباس هوي، امك وأبوك ماتوا، ولا هببو ليها وكنكش قوي في الكعكول (عرفو دا، المراقة).
الحمد لله كتشنر كسر رقبة الدولة الدينية (بعد 15 سنة)، وعباس المكنكش عاش زمن رخاء وسنة 25 جابو ليهو ولد سماهو تيمنا بمشروع الجزيرة وليس المهدي: محمّد أحمد.
أها محمّد احمد دا، هو الإستمتع جد جد وسكن قلب ودمدني وجاور الكاشف وسافر مصر وحجّ لكل من الحجاز ولندن وروما ومات يوم واحد سبعة 1989
بكّة الذي باركنا حوله، شبيه طه الجد، عافر عافر وحالف يحضر نهاية الدولة التانية...

دحين، يا خالد، نحن ما عندنا مانع نخليكم تجربوا تاني 23 سنة، بس طلب صغير، صغيرون جدا، سغنتوتي: أدونا فترة خمسين سنة إستراحة وتعالوا لخوها تاني، ما معقولة، التجريب كلو فينا نحن! ما معقولة ما نستفيد من طولة العمر السببها إكتشاف البنسلين يا أخ!!

ياخي ده أعدل طلب في ظل الجوطة الحاصلة دي.
الكتير من الأنظمة السياسية ركبت الدين مطية وجننونا جن.

على الأقل لو فترة الاستراحة ما جيهت حالنا؛ نبقى على(كعكول الصمغ)المراقة بتاعت جدك ده

متعة يا دكتور يعلم الله