[بابكر مخير]

أتذكر زمان الوالدة عليها الرحمة كانت من بيناتنا (وليداتها وبتها) مستصطفيا "كورية" حتى بتذكر مع شيخي الراحل المقيم "قاسم" سألناها ليييه يعني "
(بتريدي) كورية آكتر وهو بيضحك عليك، قالت: بيضحك عليا بس بضحكني وبونسني، إتا يا قاسم بس تماغص وإتا (المقصود أنا) سااكت لا تتكلم ولا بتتونس...
حبيبي وأخي "شنقيطي بدري" كان ملقبني بالصول، لأني قليل الكلام مع صرامة، "زيي" بتي كانت مسمياني من ورايا (أبو شنب) وكتيير من الأطفال بيخافوا من الزول اللابس ليهو شنب كبير. (إبني) العزيز "ناصر أبو عيسى" لمن نلعب الكوتشينة ما بزاملني وقال كيف؛ يا أخي بشنبك دآ تخوف الزول..
دآ كله كان زمان
بالله عليك حسي
الواحد لو عشرين نفر قاعديين معاهو، يمسك الميكرفون وخد يا هترشة..
لا والمدهش؟
تكون قاعد في كفتريا ويكونو ناس قاعديين براهم يتونسوا، ترمي أضانك ذي شبكة الصيد تلقف ليك طرف كلام ومنها تنتهزآ فرصة وتدخل التقول (بوابة عبد القيوم)..
واليحلهم الله من جنس هترشة وبعدين ما الواحد كبير وناسنا لساتهم فيهم الذوق والتأدب، يديوك فرصة ومساكين متوقعيين العجوز دآ نفسه ينقطع وينطم،،
لكن هيهآآآآآآآت لهم في مرادهم...
حسي بعض مرآت كدآ أقول "المصيدة ظابطآ..
ما هو "المندولآ" دي بيجوها الرواد المساكيين، هم قايلين القهوة والشاهي البيشربوهم والفرجة في "الجيكسي" ديل ما بيدفعوا تمنهم آكتر، مسآكيين مش درآهم بس، لكن ديل بدفعوا شد أعصاب وحرق دم!!
من هترشتي..
ودآ كولللللللللووووووووووووووو حق "الكُبر"